Search


Jun 3, 2013

YMA: Zoram pawn Atranga A Lan Dan


YMA ri rehnaah ka chawl ang. -Anonymous

Ka bitum tura thupui min tuk hian min tibuai a ni. A hmasa berin, Young Mizo Association (YMA) lo chhuahna Young Lushai Association (YLA)–a ‘Young’ an hman chhan hi enge ni, thralai inzawmkhawm pawl nge hnam naupang inzawmkhawm pawl? tih a ni phawt a. Kum 1935 a min lo phunsaktu Welsh misawnarite khan an hnam tlemte London-a khawsaho chu English hoin an chimral mai loh nana kum 1920-a London khawpuia Young Welsh Association an lo din ang khan, India ramin zalenna a hmuh hunah keimahni pawh min chimral mai loh nana hnam vengtu leh humhalhtu atana he pawl hi min lo dinsak nge, a nih loh leh khawthlang kristian kalcharin kan kalchar chim pilhtir vek tuma kohhranin hma a lakna ata kan hnam chhanchhuaktu leh humhalhtu pawl ni tura an lo duan? Eng vanga ‘Young’ tih thu mal kher kher hi hmang nge an lo nih le?

Nge, zawlbuk thar thawh tumna a hlawhchham avanga a ai awh atana YLA/YMA hi an lo din zawk? Chu vang chu em ni ang, tun thlenga zawlbuk inthununna hmanga kut kan la lek zawm zel ni? Chutiang chu lo ni ta zel se, Mizoram Synod din Synod Social Front (SSF) Co-ordinator Robert S. Halliday-an mipat-hmeichhiatna hman lawk chungchang survey an tih truma Mizorama pre-marital sex a hluar chhan chu zawlbuk hrin chhuah (fallout of zawlbuk) nia a sawi, Calcutta chanchinbu Telegraph (June 4, 2011) ripawt1 kha YMA-in a pawm hmiah tihna em ni ang? A pawm si loh chuan, dawt mihlum ni awm tak sawitu Co-ordinator chungah hian enge a tih? Mizoram pawna awmten he thu kan lo chhiar hian mak kan ti a, kan zak a ni. Mipat-hmeichhiatna kan hman hluar hun hi zawlbuk awm tawh loh hnu daih, pianthar kan uar hnu a ni zawk. Eng pawh ni se, YMA hi zawlbuk thlaktu tura din a lo nih chuan, zawlbuk nei ve lo Zo hnahthlak tam zawk tan din a ngai lo tihna a ni ang. Chu chuan sawi tam ngai loin thu tam tak a hril awm e.

Nge, YMA hi tunah chuan, pawlitiks huanga zuan luh tumten kawng sialna rahbi remchang le Duhlian trawng hmangtuten Mizoram lo dintute ‘agenda’ kha chhunzawm zel tura an hriat loh hlana hman hlawk an tum pawl lian ni tawh zawk? Hei hi tuna YMA kraws ber chu a ni mai thei.

‘Young’ an lo hman chhan chu eng pawh ni se, la upa lo, thralai, tleirawl, la tuai no tihna chu a ni hrim hrim. Chu chu ni se, a hruaitute hi taksa leh ngaihtuahna rilru kumah eng anga ‘young’ nge an la nih hlawm ang? Young thring nge thring young? Young thatho nge thathrum young? Young kulcho le kulva young? Statistics ka neih loh naa Conference vela an thlalak ka hmuh thrin hi a daw loh chuan, hmel lan danah chuan, “I pian a tlai, kei ka hma si a” tih hla chham mual mual tawh awm mi an bung thluah niin a lang. Delhi tlangah chuan thralai chung lam, mi valai tak la ni site hi ‘thrahma’ tiin ka vuah a, kan lawm tlang ni fahmiang, tun thleng hian an sawisel ka la hre lo. Kei ngei pawh hian kumah chuan Mosia ramri kham ka pelh tawh naa, ngaihtuahnaah erawh chuan kum 17 pelh ka tum lo hrim hrim. Ka kum lêt tama naupang zawk tam tak hi ka aia ngaihtuahna tar zawk daih pu mi ka hmu hnem mai. Chuvangin, ‘young’ tih ringawt pawh hi kan thawnthua Vâwrselapa an sawi tluka teh dik leh hrilh fiah harsa a ni awm e.

Ka buai lehna chu, “Zoram pawn atranga a lan dan” tih trawngkauchheh hi a ni. Hei hian zawhna pahnih a cho chhuak a. Pakhatna, ‘Zoram pawn’ chu eng tihna nge? ‘Zoram’ kan tih hian Zofate chenna ram zawng zawng nge, a nih loh leh ‘Mizoram’ thliarkar chauh kan huaptir? Vairengte piah lama awm Zofaten YMA an hmuh dan kan tihna em ni? ‘Mizoram’ a pian hma daih tawh khan ‘Zoram’ tih hi hla trawngah hman a ni tawh a, chu chuan huap chin, ramri bik a neih loh a, tlang emaw zo ram thengthawa awm, Zo hnahthlakte chenna ram leh suangtuahna rama a huhoa an la chen tlanna tur ram an lo din lawk sawina trawngkam ni berin a lang. Ram hi a pian hmain rilruah a piang hmasa thrin reng a ni. Hla phuah thiam Rokunga khan ‘Zoram’ tih hi a hmang rim hle a, ramri huap chin a kham ve loh naa, a rilrua a huaptir ber chu a pian leh murna, chung laia Lushai Hills, a hnua Mizoram lo ni ta hi niin a lang. Mahse, a ngaihtuahna ril berah Zoram khawvel hlimthla a hmuh tlat avangin Zofate chenna tlangram, a chânga ‘Zotlang’ a tih chu ‘Zoram’ tih nen a hmang kawp thrin niin a lang. Mizoram hlapui-ah chuan fimkhur takin, “Kan Zoram tlang nuam” ti loin, “Kan Zotlang ram nuam” a ti zawk rêng a ni.

Tichuan, hetiang hian ramri kham ila. ‘Zoram’ tih hian awmzia pahnih a pu a. A hmasa chu, tuna Mizoram ramri huam chhung, hmar lamah Vairengte kawtchhuaha tawp, chhak lamah Triau luia tawp, thlang lamah Kawrtethawveng, chhim lamah Rengtlanga tawp chu a ni. Hemi khawvel hi hla thu-ah a nih loh chuan ‘Mizoram’ tiin ziak ila, a fiah berin ka hria. Ka lehkha ziakah hian ‘Zoram’ tih ka hman chun Zofate zawng zawng chenna ram a kawk a, Mizoram State chhung sawina a nih chuan ‘Mizoram’ tih vekin ka ziak thrin. ‘Zoram’ tih awmzia pahnihna chu Zo hnahthlak zawng zawng chenna ram a ni. Mizoram hi Zoram khawvel chhunga ram bung pakhat ve chauh a ni.

A dawt chu, YMA hian hmai hnih a pu em ni ang- ram chhunga a lan dan leh ram pawn atranga a lan dan? A nih loh leh, ram chhunga keimahni inhmuh dan leh ram pawn atranga min hmuh dan hi danglam viau turin kan ring em ni ang? Mahni inchhungah chuan duh duhin chê ila, pawn lam atranga min thlirtute lakah erawh, Keichala ang khan, “Zia thup aw, zia thup aw, hringmi hawng e, zia thup aw” tih thukhawchang kan la auhpui reng vang em ni ang? Hemi thu ziak tura min sawm hian, Mizoram thliarkar chhunga kan darthlalang hman hi a râng trial buai tawh a, kan hmelhmang dik tak a lang chiang tawh loh avangin, darthlalang fiah le fai zawk kan hmaah rawn hûng se tih min duh vang em ni ang? Chu chu mawhphurhna rit tak le harsa tak a ni. A chhan chu, thil rêng rĕng hi kan nuna kan tawnhriat ang leh kan thlirna tukverh atranga kan hmuh danin kan ngaihdan a kal duh a, chu chu a dik ber lo mai thei. Mitdel panga sai hmuh an sawi ang hi a ni duh hle. Sai an khawih threuh a, mahse an hmu lo. An khawih phak china sai awm dan tura an ngaihruatna kha sai pianhmang an hriat dan chu a ni mai. Chuvangin, Mizoram pawn atranga YMA nihna leh kalphung kan hriat dan leh hmuh dan tlangpui chauh, a thra a chhiain, tlang takin ka rawn thur chhuak dawn a ni. Ka ‘Hmar bai’ siam aia thak lo zawk daihin aw..

YMA ka hriat tran dan
Kum sawmhnih panga lai a lo ni ta reng mai. Rangoon (Yangon) a ram palai hna ka thawh lain (1986-89) an ram buai avangin thralai tam tak himna zawngin an chhehvel ramah an tlan lut a. Chungho awmna tur chuan Manipur leh Mizoram ramri bulah refugee camp pahnih kan khuar a. Chungte chu tlawh turin March/April 1989 khan ka zin a, Champhai ka tlawh a, chu chu a hringhrana Mizoram ka tlawh hmasakna ber a ni a, Mizo Academy of Letters (MAL) ten Book of the Year min pekna ‘Zoram Khawvel-1’ a pian phah nghe nghe a. Mahse, Mizoram nena kan insuihzawmna erawh nikhua ka hriat tìr atrangin a ni tawh zawk. Kĕl khalh rual ka nihin Mizo Union thlipuiin mi rawn nuai a, Zoram thar lo piang tur lawma khuangpui nen a pui a pang kan ri bung bung lai kha ka hre phak a, Mizo Union hlate kha naupang pawhin kan bûkpui ber a ni. Chu chu YMA-a YLA an thlak kum, 1947 lai, British Kumpinu awpna atranga India ram a indan kum, hun hlui leh hun thar inthlak lai, kawngthruam pawimawha kan khawvel a din lai kha a ni.

Manipur-ah kan awm na-a chhim lam Churachandpur District luahtu Zo hnahthlakten thu leh hlaa kan châklâkna ber chu Mizoram, chung laia Lushai Hills District an tih chu a ni a. Hei hi kan khua Pherzawl-ah phei chuan kum 1951-a High School a lo din hnu leh Mizoram atranga zirlai thrahnem takin mi rawn chen chilh hnuin a ni lehzual. Zirlai a tlêm berah pahnih tal kan awmpui thrin a. Kan awmpuite zinga pakhat chu Darlawn/Sawleng atranga lo kal Ralte tlangval Rothruama, kutziak thiam, Zosapthara (Edwin Rowland) sitail-a mawi taka ziak thrin a ni a, ka kutziak pawh a hruai nasa hle. Kum 1992 khan Aizawl tlangah kan inhmu thuak a. YMA do ber zinga mi leh a member tam takin arûka mahni nupui anga an kuah bang lo thil ni tlat si kha a ngaihzawn ber a lo ni a, rei vak loah min peih lohsan ta a ni. A kutziak ka zir ruala hlawk taka ka zir chu hla lenglawng a ni a, ziaklohbu chhah tak mai khat dul hian ka ziak thla ve thrin a. Chungte chu tun thlenga thu leh hlaa ka nun chawmtu thu nung, ka bûkpui peih vak tawh loh hnu pawha zaithiamte sak ka ngaihthlak fo thrin leh ka lung tilengtu a la ni reng. Chung lai bawka ka benga lut fo thrin chu YMA a ni. Kan ngaisang thlu thlawt a ni ang, Pherzawlah pawh Pherzawl Young Christian Volunteers (PYCV) tih te, Pherzawl Young Athletic Union (PYAU) tih te kan din ve a, kan khûkpui nasa hle. Kei ngei pawhin kum 13 lek ka nih laiin PYAU hlapui tur ka siam a, ka hla phuah hmasak ber a ni.

YMA thil tih thrat
Hei hi YMA hulùmin a hrin chhuah a nihna ril tak a awm a, chu chu sawi ka tum a ni. YMA hian thil thra tam tak a tih rualin, a hruaitute zira chawngkawr mit pua a inham buai chang leh zawlbuk inthununna (zawlbuk discipline) hmanga tawrawt a chhuah vak chang a awm a. Thil thra, nghawng thui tak neih a tih pakhat chu kum sawm a tlin kum, December 6, 1945-a YMA Central Hotute inkhawma ‘Hla lenglawng’ sawi fiahna thu a chhuah kha a ni. Chung lai chun YMA hi YLA tih a la ni a, a thu chhuahin a sawi fiah ber chu YLA tana hla lenglawng sak rem chin leh rem lo chin a ni. Chu tah chuan ‘Hla lenglawng’ tih hian sakhaw hla (sacred songs) lo tawh phawt chu huap theiin an hria a. Sak rem china an ngaih chu hla thu pawi khawih lo, zahmaw thu kawk lo, inngaihna thu leh mi ngaih huat theih tur tel lo; thil thra ti tura infuihna, ram leh hnam leh khawtlang duhawmzia, lui leh tlang, rannung leh thiltro etc mawizia leh ngaihnatawmzia phuahna lam hla a ni. Sak rem lo chi chu hla thu pawih khawih, zahmawh lam kawk, inngaihna sual lam thu tel, mi ngaihhuat theih tur ang chite hi a ni.

Hemi sawi fiahna thu hi YLA Chanchinbu-ah chhuah a nih bakah hetiang hla hi a bu-a siam tham awm se chhuah a duh thu te, hla phuah thiam apiang phuah tura sawmna, chung hlate chu la khawm tura Rokunga leh Muka an ruat thute an chhuah tel bawk a. Hemi thupuanin a hrin chhuah pawimawh pakhat chu Rokunga buatsaih ‘Thralaite Hla Bu’ kum 1952-a lo chhuak kha a ni. Heng hun lai bawk hian ruahpui vanawn ang maiin Mizo Union hla te, kaihlek hla hrang hrang te, lengzem hla te leh tlâng hla hyrang hrang te a rawn baw thla huk huk a, chumi zalenna boruakah chuan kan chhuahtlang thara kan secular literature-in zung nghet tak a rawn kaih a, sakhaw thu leh hla nen a rualin a kal a, kan hnama siksawina tam tak a rawn siam ngil a, tuna kan dinhmun hi kan thleng ta a ni.

Chuvangin, hla lenglawng sawi fiahna thupuan hi sakhaw turverh zîm tak atranga thlirtuten tun thleng pawh hian tiltîpin lem harsa la ti mah se, tlangkhua (secular) thu leh hla lo irh chhuahna tura zalenna kawng hawngtu, Zofate tana kan Magna Carta a ni a; thrianpa Siamkima trawngka hawhin, Jordan luiin kan Rih Dil chim piltir vek kan tumna atranga kan hnam thu leh hla hnukchhuaktu kut pawimawh ber zinga pakhat a ni. Grikho thawnthua Alexander The Great-an Gordia Tawlailir an phuar behna thirhrual ‘Gordian Knot’ a sah chah avanga trawngkauchheh ‘to cut the Gordian knot’ a lo pian ang khan YMA thuchhuah hian kohhran phuar behna hrui chu phelhin, kan thu leh hla a chhuah zalen ta a ni, kan ti ve thei ang.

Hemi kan sawi awmzia ril tak mai hi kan thu thiam Vanneihtluangan Malaysia khawpui Kuala Lumpur-a December 2010-a a zinin a hmuna cheng Zofate zingah a han chhar a, Nazaret tlangval nena inbekbawr Samari nuthlawi ang mai khan a man fuh chiang hle a ni tih Lengzem (Thlamuang takin kal ang che, April, 2013) chhiartute chuan an hriat ka ring. A ziaktu kâ ngei atrangin tlem tal han ngaithla ila:

“Kan inkhawmna Biak-in chalah chuan Kros chhinchhiahna leh Gereja Baptish Church tih hawrawp a intâr a. Sakhaw serh leh sang khawihna leh Pathian biakna hmun thianghlim a ni tih kan hria. Chu Biak-in chhungah chuan, ‘Mizo kan ni alawm, kan hlim ang chu..!’ tiin Mizoram Biak-ina kan sak ngam loh Mizo hla thulkhung chu, tîm hauh lovin kan han sa ta thruai thruai mai a ni a. ‘Hei hi a ni ka hmachhuan Zoramthar chu..’ ka lo ti a, ka lawmna a thûk lutuk a, ka zai tui phal lo zawk! Tran a lo hun a, Pastorin hunserh a hman zawhah zaithiam a lo ding chhuak a. Chu Biak-in maicham hmaah ngei chuan, ZoRock-a hla, ‘Zanin chu ka lunglen min hnem turin…’ tih chu sain, Zoram Ngaih Hlapui min han rempui leh ta hep hep mai a. Kan veng Biak-inah heti hian ti ve ta ila, a biak in chawpa then thianghlim ngai khawpa tihbawrhban ni-ah kan ngai ang. Hetah chuan Zofate insuihkhawmna atan, pulpit bulah ngei Pathianin a hmang mek a ni tih ka mitin ka hmu si. Unaute u, ka thinlunga thawk hi hawrawpa ziah fiah ngam rual a ni lo. Ka kawchhunga naute hi in tiché a ni!” (p 25-26)

Tun lai YMA dinhmun
YMA kum 75-na champhaa Wikipedia-in YMA member zat ni tura a ziak chu 1,000,000 vel a ni a. Kum 2011 census-a Mizoram mipui zat chu 1,091,014 a ni a. YMA Danpui Bung III Artikul 17 (1) ah chuan membar ni thei chin “Mizo tu pawh, tleirawl/rawlthar chin chung lam” tih a ni a. Mizo mipui aiin piangthar nambar a tam zawk daih tih fiamthu kan sawi thrin ang hian a mihring nambar aiin YMA member kan tam zawk a nih pawhin a mak lo e. Mi naran chung lam, dinhmun eng emaw vuan pha chin chanchin an ziak hi han chhiar ila, eng hunah emaw chuan YMA-a nihna chelh an lo ni deuh vek mai. Van kawngkhar vengtu Pawla an sawi pawh hi YMA membar a lo nih palh hlauh chuan, YMA hming lam theih apiang chu, “Vanah pawh YMA takin aw” tiin eng sawi set loin a lo lawm lut ang a, a luhtir dialin ka ring.

Chu chu Mizorama awm, Duhlian trawng hmanghoin YMA nih awmzia kan pawm dan tlangpui chu a ni awm e. Lal Saulan thah tuma Davida a um laia Filistinho rama a tawm lai, Israelte Pathian hliahkhuhna pawna awm anga a indah ang khan, Vairengte emaw Mizoram ramri kan pelh chiahin YMA hliahkhuhna leh khuahkhirhna pawna awm tawh anga inngaihna kan nei tlangpui a. Chu chuan thu pahnih a keng awm e. Pakhat chuan him tawk loa indahna, Davida ngaihtuahna ang rilru a keng a, rilru a zâm a ni. A dang chuan YMA khuahkhirhna, zawlbuk inthununna ata fihlim tawh-ah inngaiin, ‘YMA ri rehnaah ka chawl ang’ tih hla sa-in, khauphâr thawven a tum nghal a ni. YMA ri rehna hmun kan thlen veleha chin tawk awm loa thil kan khiat mai zel chhan pawh hi a ni ta ve ang. An pahnih hian, “YMA takin aw” tiin thlah liam ila, ‘Josefa hre lo lal dang’ tih ang khan YMA hre lo mi dang lalna leh thuneihna hnuaia an luh chiah khan YMA zirtirna leh inthununna hian eng chen nge kawngro a sú tih a lang chauh dawn a ni. Kristianna hi khawthlang kalchar pawhleu (pawnlang) zirna leh lemderna nun zirna remchanga kan hman anga YMA zirtirna leh inthununna te hi nunpui si loa hmaikawr atana kan hman a nih chuan, bŭkin a awm ang a, a kâng lawp fo ang. Chu chu tak rama kan dinhmun niin ram pawn atranga thlirtute chuan min hmu a ni.

YMA vs. Mizona
Mizoramah chuan YMA nihna leh Mizo nihna hi tangka hmai hnih anga ngaih a ni a, YMA Branch awm lohna khua chu Israelte angin Filistinho awmna khua ang deuh hiala dahna a awm. Tun hnai lawka Sinlung Hills-a cheng khaw threnkhatin YMA hruaitute laka an lungawi lohna tihlan nana YMA suai (seal) an pekkir khan Mizo nihna atranga bang leh ram leh hnam inpumkhatna thriat tumtu angah an puh nghal mai a ni. Pawn lamah erawh YMA leh Mizo nihna hian inzawmna a nei tehchiam awm lo e. Duhlian trawng hmang ve lote tan YMA a awm emaw awm lo emaw-in kawngro a su tlem hle. Zoram khawvela kan khawpui lian ber leh pawimawh ber Aizawl dawttu Churachandpur-ah hian Duhlian trawng hmangho zingah loh chuan YMA Branch a ding awm lo e. Dik loh taka Zo hnahthlak ni sa reng reng Gangte (Rangte) ho kha tute emaw thawh âtin Mizo sa an phuntir hnu khan an zinga threnkhat chu an inti-YMA ta hluai a ni awm e. Khami vuak vet lai khan CYMA chuan Zo hnahthlak dangte pawh YMA-a inchhung lut turin an nawr deuh a, mahse anmahni inhmuh dan leh pawn atranga mi dangten an lo hmuh ve dan a inhmuh loh avangin an hlawhchham rih niin ka hria.

Duhlian trawng hmang ve lo, Mizoram chhung leh pawna miten Mizo/Zomi nihna kan hriat dan leh pawm dan a inang lo. Duhlian trawng hmangho chuan Zo hnahthlak tu pawh kan trawng hman ang hmang apiang chu ‘Mizo’ nihnaah kan behtir nghal a, hmang ve lohte chu ‘Mizo tak tak’ ni ve lo, a suakah kan ngai nghal tlangpui. Hei hi Zofate insuihkhawmna kawnga a mutan lian ber a ni tawh mai thei. Duhlian trawng, a hnua Lusei trawng lo ni ta, chumi hnua insuihkhawmna kawnga kan duhthawh luat avanga ‘Mizo Trawng’ dinhmuna kan hlan kai tak hi Zo hnahthlak zinga trawng tualleng ber leh hmasawn ber, kan lingua franca a ni tih hi hnial rual a ni lo. Thîk chi a ni lo a, thîk rual pawh a ni hek lo. Lusei lal, abikin Sailo lalte khan an unau Zo hnahthlak dangte aiin mi huihkhawm an thiam zawk a. Manipur leh Tripura ramte angin Rengpui (Maharaja) hnuaiah inhung khawm hman loh mah se, British-ho an lo lian hnua tuna India, Pakistan leh Burma (Myanmar) ram zawng zawng ramper (colony) pakhata an rawn din hnu khan, an kutzâlah kan tla lut ve a, Lusei lalho awpna ram zawng kha ram bung khata siamin Lushai Hills a lo piang a, chu chu Mizo Hills-a thlâkin, a tawpah Mizoram a lo piang ta a ni tih kan hria. Mahse, eng anga thil thra pawh ni se, barh luih kan tum hunah a letlingin thil a kal duh a, chu chu thil hlauhawm tak a ni.

YMA tlawmngaihna
Khawvel kalphung chu thuneihtute solfa vai dan anga an hlapui rem a ni ber a. Age of Empire (1875-1914 Eric Hobsbawm)-hunah phei kha chuan a ni lehzual. Histawri kan tih pawh hi dannaranin hnehna changtute ziah a ni ber a. Chutiang chuan Mizo histawri kan tih pawh hi Luseiho lal lai chanchin a ni ber a, a ziak hmasatute pawh an kut thli ringa seilian leh an vulh len an ni a, an pute han bauh ngam tur an ni lo tih hi thil chîk mite sawi ka hriat ve dan chu a ni. Kan cultural history leh kan thu leh hla hmasate pawh chutiang deuh vek chu a ni. Chumi khawvelah chuan, tlawmngaihna hnara kan sawi vung chu Sailo lalhoin 1700 AD hnu lama Selesih-a inhumhimna hmanrua (defense system) atana an duan chhuah, ‘zawlbuk’ a ni. Mahse, Luseiho leh Fanaiho lalna khuaah loh chuan dannaranin Zo hnahthlak dangten zawlbuk an neih ngai lo a, tlawmngaihna nun erawh kengkawh ve tho.

Zawlbuk thlaktu tura duan YMA thil sawi uar pakhat chu tlawmngaihna nun a ni a, kan inphût dan pawh a sang hle. Kan pi leh pute nunpui tlawmngaihna (voluntas:latin) kha YMA khukpui ‘tlawmngaihna’ nen hian a la thuhmun reng em? tih erawh a hrana seminar buatsaihna tham a nih ka ring. Pawn lam atranga thlirtute chuan YMA tlawmngaihna sawi hi ‘Phutluih tlawmngaihna’ a ni a, a suak a nih loh pawhin piputen tlawmngaihna an sawi nen chuan a inhlat hle tawh mai thei. Saptrawnga ‘code of social conduct’ an tih nen ‘phutluih tlawmngaihna’ hi a inzûl hle a, chutiang nun dan (code) tura khawtlang beisei chu hnam tinin an neih vek a, chutianga nung tur chuan an inzirtir bawk. Mizoram lo dintute histawri leh an tih dan hmang apiang chauh YMA-in Mizo thilah a pawm zui zel a nih chuan, he pawl lian leh zahawm hi Zofate insuihkhawmna kawnga a mutan a ni zui zel lo ang tih hi sawi ngam a har ang.

Hemi thil avang hian kumin 2013 Chapchar Kût souvenir-ah khan, ‘Revisionist tukverh atrangin’ tih ka ziak a. Chu tah chuan, “Mizorama khawtlang pawl lian berin a khat tawka irhfiak a vei thrin chhan hi kan bih chian chuan, Mizoram histawri lo ziaktute agenda anga zawlbuk tlawmngaihna leh inthununna kengkawh tuma mawlmang taka tran a lak vang a ni thui hle” tiin ka ziak a. Khami artikul kha ram pawn atranga histawrian tarmit atranga kan dinhmun thlirna leh tarmit thar vuah a, tukverh thar atranga kan inbih chian a pawimawhzia a hmawr phawrh lanna a ni a, chhiar liam mai mai chi a ni lo.

YMA Kumpuan
YMA hian kum engemaw chen atrang tawh khan UNO tih dan kawpi vea insawiin ‘kumpuan’ a ti ve a, chumi kum, khami kum pawh kan hmang tam tawh hle. Kan kumpuan thupuite hi gospel bu zinga telhtir thama thra vek a ni. Mahse, kan hlawkpui em? Entirnan, ka hriat sual loh chuan 1983 leh 1991 khan ‘Faina Kum’ kan puang tawh a, tun thlenga hotela chaw ei khawm huna fian kan dah dan engah nge kan la thlak loh? Nungchate humhalh kan sawi chiam a, Mizoram dung leh vangah hmuh tur aruang an awm tawh lo. Ral atranga thinglera sava cheng kan hmuh chhunte pawh an tri êm êm a, ‘Aw ka chenna raltritna hmun’ tih hlira hram ni awmin an lang. An han thlawk chhuahte hi thlaphang êm êm, khurh hlawp hlawp ni awm takin an thlawk vawn vawn a. A chhan kan zawn chuan, thah tuma sairawkherh leh silai nena vehtu YMA mi leh sa kan tam em alawm! Rahtlan thratna apiang tûra kaptu leh sangha man nana luia tur phultute chu keimahni tho kan ni.

Do ngah YMA
‘Ni tin thlemtu chuan min do thrin’ tih ang deuh khan YMA hian do a ngah a, amah leh amah pawh kawng hrang hrangah a indo a, hneh aruang erawh a neih tam vak lo a ni awm e. Kum 1950 tawh khan zu khapna dan Bawrhsap K.G.R.Iyer a chhuahtir a, mahse kan tilal chauh zawk a. Kum 1997-ah Mizoram sorkar chuan Total Prohibition a puang a, tihrêm aiin zu chhia leh drugs a pung sauh a. Mi lal leh liante in dap ngam si loin mi rethei te te, ei chawp zawnga sumdawngte chungah hlei lenin kut kan thlak a. Kum 1950 January 26 atrang tawh khan India ramin Danpui (Constitution) kan lo neih tawh tih hre lo ang hrimin, zawlbuk inthununna kan la leklam reng a, mihring zalenna leh zahawmna pal zûtin kan suasam a. Dan anga roreltute phalna la lawk si loin mi inah kan luhkhung a, an in kan dap a, thil khap an kawl chuan kan mansak a, an thil kawl leh a kawltute kan sawisa a. Danin a khap emaw phalh loh emaw titute chungchang ngaihtuahtu Department hrang hrang sorkar-in a siam a, hlawh pein thawktu tam tak a rawih a, chungho tih tur chu ni zawk awm tak a ni. State dangah chuan chu chu an tih dan asin.

Entirna pakhat sawi ila. Ram dang atranga India rama dan lo anga lo lutte chungchang thu reltu leh buaipuitu tur chu Ministry of External Affairs leh Home Ministry an ni. Mizoram chhehvel, abikin Burma (Myanmar) atrangin sumdawng leh inhlawhna tur zawng mi tam tak Mizoramah an lo lut a, sum tlemte sengin duh tawkin kan chhawr a, a ram mi anga awm theihna lehkha kan siamsak a. Aizawl tlangah ringawt pawh chutianga dik lo taka kan chhawr chu a sanga chhiar an ni ang. Mahse, thil thra lo engemaw hlek thleng se, anniho kan mawhpuh nghal a, chhantu neih loh apiang kan man a, ran ang main kan khalh khawm a, motor-a phurin Triau-ah kan va dah a. Hetiang tihnaa phusa bera an sawi fo, pawn atranga kan lo hriat chu YMA a ni. Eng danin nge leh tu-in nge hetiang thil tih phalna YMA kutah a hlan le? Dan loa hetiang titute leh mihring pianvo (human rights) suasamtute hi mana hrem tur an ni zawk lawm ni?

Zangkhua a bungbut hunah
Hemi nena inzawma thil kan hriat tura ka duh pakhat chu hei hi a ni. Hetianga ramsa cheta zawlbuk inthununna kan leklam hian Zofate insuihkhawmna kawng nasa takin a tihchêp phah a ni. Chumi ruala kan hriat tura ka duh chu zangkhua a la bungbu dawn tih hi a ni. Zoram Chhak (East Zoram) hian ram rorelna fuh loh avangin eng emaw chen harsatna tawk mah se, tun hnai atranga rorelna kalphung dik zawk an kalpui hnu hian nasa takin hma a sawn a, rei rial loin a lo la vul leh dawn a ni. Chumi hunah chuan tuna dim loa kan chhawrbawkte hi an ramah an kir leh vek ang a, min la chhawr let ve dawn a ni, chhawr tlaka kan awm chuan. Chumi hunah chuan Triau lui kân turin ‘ar’ lam thiamin thu a hril tawh lo ang. YMA kut tuara inngaiten an vuak let ve hunah, Jeftha hun laia Gilead miten Efraim ho an hneh truma Jordan lui lo dai kai apiang, “Efraim mi in ni em?” an lo ti a, ‘Ni lo e” an tih chuan ‘Shibolet han ti teh’ an ti a, lam fiah theih loha ‘Sibolet’ an tih chuan Efraim mi an ni tih an hre nghal a, mi singli leh sanghnih an that ang khan, Triau lui rawn kân apiang ‘YMA i ni em?” tih an zawt ve hunah, a buaithlak duh hle ang. Chumi hunah chuah Zofate thlavang hauh ngama mi ngaih MZP/MSU nih hi miten an thlan zawk a rinawm. An ram buai avanga tlan chhuak, USA le Canada-a hmun khuar ringawt pawh singhnih chuang niin an inchhal tawh a, chungte chu an ram tuai thar lehna tura an Josefate an ni. Hringnunah hian zangkhua a bungbu fo a, miten kan chunga an tih tura kan duh loh chu mi chungah pawh ti lo ila a thra ber. Chu chu Pathian thu pawh a ni.

Kuang loh nawra hmanhlel
Mizoramah sorkar lian pathum- Synod, YMA leh State sorkar- an awm thu leh a sorkar ber hi a lal loh ber thu hemi hma daih khan ka ziak tawh a, tunah pawh chu chu ka hmuh dan a la ni reng. Lemchanna State zau ber ni mai thei Mizoramah hian sorkar chak lohna avangin, an tih tur tam tak ti loin, an mualphopui tur dapin, NGO te kutah thuneihna threnkhat vervek takin an dah a, hnungzâng an inhiat tawn a. Mihring ûm ber chu thiltihtheihna (power) a ni a, chu chu Setana tlûk chhan ber leh Adama leh Evi pawhin ei thiang lo thei rah an ei chhan a ni a. Chu chu YMA pawhin a hai lo a, kum 1997-a Lungdar inkhawmpui atrang phei kha chuan inthlan dawna campaign thawm a rik tran nasat tawhzia leh a hnu zela thil kal dan chu ZoLife Vol 8 Issue 1 (2013) -a a bu zawla lo tal hrep tawh, P.L.Liandinga titi chhiartute chuan an hre chiang ang.

Pawn atranga a lan dan chuan, YMA hi mahni kuang loh tur nawra hmanhlel, Sorkarin tawtawrawta a hman, a sawi duh loh a sawitir, a tih duh loh a tihtir, sorkar uicho, hamthratna hrang hranga a vulh niin miten an ngai a, a pawi hle. YMA hruaitute ka atranga chhuak ni-a an sawi, Mizoramah tu mah Autonomous District Council (ADC) pek tawh loh tur tih te, Tuikukte hi kan chhiahlawh atana Pathian siam an ni tih te, Sakawrdaia Convention neih khapna thu CYMA-in February 3, 2013-a a chhuah te, sorkarin dik loh taka mahni unaute hnawlna awrdar a siam avanga a tuartuten an duh lohzia entir nana kawng zawh an tum YMA hmanga an dante leh thil dang tam tak, bial threnkhatin India Constitution hnuaia zalenna leh hamthratna an dawn tur an dawn loh avanga ngenna an siam tam tak chu Mizote inpumkhatna tichhetu nia puha YMA-in a lo dodal thrin te leh human rights zahna them tè pawh neih loh ang ziazanga tun hnaia Vaphai/Saikhumphai leh Rangvamuala zawlbuk talhtum an lek dan chanchin pawn atranga lo chhiartute chuan he pawl zahawm tak zuitu mi threnkhat kawchhungah hian tulùm a lût ta em ni ang? tih hi zawhna dengkhawng an zawh fo chu a ni.

YMA tehfung dik lo
Tin, ram aiawha palai kan rorelna inpui (parliament)-a dah tur kan zawn changa tehfung dika kan ngaih chu kan ram leh mipui tana thil thra tam tak hai chhuak theihtu tur mihring ni loin YMA mit tlung, a thil khap zawng zawng laka fihlim mi ni zawkin a lang. Mahse, YMA nihna (credential) hi keimahniin engto hle mah ila, kan ram pawnah chuan eng tihna mah a ni lo. YMA hming lamin ramhuai emaw huai lo emaw pawh an zâm lo. YMA silhfen inbelin awmzia a pai lo a, kan in leh ei ang chi chauh YMA taka hlûi hi thrian hmantlak siam nan a trangkai hek lo. Ram thianghlima biakzina kalho hruaitu atana thra em em kha Parliament-a kan aiawh atan chuan a hmantlak lo mai thei. Mi tinin chemkalna zawng kan neih threuh a, chutiang mi, chhawr tlak kan thlan hunah thil a danglam mai ang. A hun leh hmun zira hruaitu trangkai ni tura Pathian duan tiha sawi theih hi an awm a, Thuthlung Hlui huna Jeftha ang te kha entirna thra tak a ni. Lalpa zawn chhuah ram, Pathian nung betu tih hluam hluam rikngawt hi ram leh hnam hmasawnnan eng tihna mah a ni lo.

Inbih chian a ngai
A tawp berah chuan, YMA hian mahni dawi sa eia hmanhlel tawh loin, tak ramah chhuk thlain, lung nohna ringawt hmang loin, kan nihna kan inbih chian a ngai. Tlawmngaihna ze hrang hrang kan sawi vung fo mai tam tak hi kan khawvel dai lai nena inmil tawh lo a tam mai thei. Hemi thu hi October, 2010 khan Churachandpur-a magazine pakhata chhuah turin, a thupuia ‘Tlawmngaihna Re-interpreted’ tih hmangin ka ziak a, a la chhiar lohte chuan chhiar turin ka fuih a ni. Kan hun pal lai nena inmil zelin ke chheh kan rem a ngai. Mi zah phurh kan duh chuan zahawma kan awm a ngai. Dikna kengkawh kan tum si chuan hruaitu lu ber atranga kan tran a ngai. Sorkar thawktu ni si, sorkar thil leh mawtor ilo vel hmang a, ofis hna thawk hman lek loa vantlang thiltihna leh mitthi vui leh thil dang danga kan inhmang a nih chuan kawrapson chirh-ah kan inbual tihna a ni a, chutiang titute chu hruaitu ni tlak an ni lo. Kan huau huaunaa kan mamaw engkim min phuhrûksak tura sorkar emaw mi neinungte kan beisei hian kutdawh chunga inzuar tluk kan ni. YMA hmai zah avanga min tihsaktute leh contract lem min petute kha an duh thu thlu lohin kawrapson kan tih luihtir a ni a, KS te aiin zah kan phur loh zawk. Anni chuan anmahni thil neih an zuar a, a lei duhten an lei mai a ni. Thudik trana huaisen nih kan duh chuan mi hnuaihnung leh retheihte in kan dap ngam ang bawkin mi lian leh mi lalte in pawh kan dap ngam tur a ni.

Trum khat chu YMA Inkhawmpuia rawn tel ve turin Tripura atrangin Mizo IAS ofisar siniar tak pakhat hi an sawm a. An ram atrangin Bus-in a lo kal a. A lo thlen chuan mi zawng zawngin mak an ti a. “Engati nge i motor-a i lo kal loh?” tiin an zawt a. Ani chuan, “Keini sorkar chu Kristian sorkar kan ni ve lo a, mahni thila sorkar motor hman hi kan puten an phal lo” tiin a chhâng, an ti. Chu chu India sorkar leh khawi sorkarah pawh thil awmphung a ni a, an zawm nge zawm loh chu thu dang ni se. YMA hian thudik a tran ngam a nih chuan, an pute an zilh hmasak ber a ngai ang. ‘Charity begins at home’ tih a ni lawm ni? Ka hnuaia thawk chu ni hlawm se, sorkar thil a nih loh chuan, ofis hnathawh chhungin an duh duha ofis an chhuahsan leh sorkar motor an hman ka remti hauh lo ang.

Pawn atranga thlirtuten YMA hmelhmang an hmuh dan hi a Hitler hle niin a lang. Hitlera khan tawrawt a chhuah hma, kum tlêmte chhungin indopui pakhatna avanga German ram tlu sawp tawh chu khawvela ram ropui leh chak ber zinga mi ni leh phakin a tungding a. Kum 1939 atranga tawrawt a chhuah hma khan bang ta chu ni se, khawvel hisrawria hruaitu thra le ropui ‘The Great’ tih hlawh tlak a ni ang tih hi histawrian tam tak ngaihdan a ni. YMA pawh hian tawrawt a chhuah zui zel chuan, eng anga pawl zahawm pawh ni se, a dinhmun chelh tur chu a chuangliam bik kher lo ang tih hi Mizoram thliarkar pawn atranga thlirtu tam zawk hmuh dan a nih ka ring.

(June 3, 2013 Delhi)

1 comment :

Unknown said...

A ngaihnawm dawn hle mai a. Ka la chhiar hman rih lova, mahse ka han en thuak thuak a. Wikipedia in pawl "secular" ti a a dah hi a fuh chiah lo em aw...? ka ti deuh. Aims and objectives ah "Revere Christian ethics (Kristian nun dan ṭha ngaihsân)" tih ani bawk si a.