Intum Lo Intum

Truth is tough. It will not break, like a bubble,
at a touch; nay, you may kick it about all day like a football,
and it will be round and full at evening.
- Oliver Wendell Holmes, Sr.


February 14, 2015 Inrinni khan Delhi Assembly inthlang rizal an tiem mek lai le Aam Admi Party (AAP) haiin seat 70-ah seat 67 an hui vong thu ka ziek a, chu chu a tukah Delhi Thurawn le Hmasawnna Thar-in an hung insuo a. Chu artikul HMUNPHI-HMUNPHIT tia chun parakraf thumnaah hieng hin ka ziek a:

“AAP ‘tsunami’ hin thil tam tak a min ngaituotir a. Eini lai chu inthlang hun hi pawlitisian intihai, a dik taka chu ‘sumtisian’ ni lema inlang sihai rawi vokbu pek hun le ei ‘ramhuoi’ ruol an huongtau hun a nih. An hmunphi hmang khom thina kut, AK-47 a nih. Inthlang nuhnung taka thil tlung, abikin chanchin thra mansapui bangna Senvon tlanga hmuomthlum danglam, silaimu an sem thu an hril dam kha ngaituonaah a hung inlang naw thei nawh. Delhi tlanga AAP khekpui tak chu hmunphi hmanga mipui mamaw phuhruk le kawrapsan hmunhnok phit fai a nih. Eini kum za chuong kristien intihai khawvela ruok chu sum le silaimu hmanga ei khawzawl sukhnok zuol a nih. Mihaiin democracy hi ditthlangna zalen taka hmanga hmasawnna lampui sielna hmangruoa an hmang laiin, eini ruok chun inhlemna hmangruo-ah ei inchangtir zing.”

Fimkhur taka tiemtu chun Delhi tlanga inthlang felfaizie le ei ram tieng, abikin Manipura inthlang hang porche takzie a tlangpuia hrilkhina a nih. Chu le inzom chun Manipur inthlang nuhnung taka Senvon tlanga thil tlung, a tlung laia a hmun ngeia um, mita hmutu mi iemani zat thu mi hril, ka ngaituonaa a hung inlang thu ka ziek a. Luseihaiin, “Buichhia laih lohin a inpuang” an ti amanih, Solomon thuvara “Misuol chu tu hnot loin a tlansie a, Mifel chu sakeibaknei angin a huoi” (28:1) ti ang el kha’m a ni ta ding, ka ngaituonaa thil hung inlang ka hril chu lungloa la pawl an lo um a, Open Letter dam an insuo hiel a, an testimawnia inthokin ei hriet lo thil tam tak ei hriet pha a, lawm a um takzet. Hi lekha hi tlang hrieta an lekha mi thon, a hnuoia ei la hung tar lang ding donna a ni nawh ti tiemtuhaiin an hriet hmasak ka nuom. Hieng ang lekha hi ka hriet thei china chuh tlang hrietin ka la don ngai nawh. Vantlang hriet dinga poimawa ka ngai a um ruok chun a hranin artikul ka ziek lem hlak.

Hi lekha hi ziek trula ka ngai san lien tak pathum a um. Pakhatna, ka ngaituonaa thil hung inlang hi ka thuneina hnuoi amanih, tu dang khom thuneina amanih hnuoia um a ni nawh. Pahnina, ka ngaituonaa thil hung inlang ka hril suok amanih ippui chu ka piengvo, ka malchan, ka thu thua ka hmang thei, ka ditthlangnaa innghat, ka fundamental right a nih. Pathienin mihriema a sie, a chanpuol, a piengvo hlu tak chu ditthlangna a pek hi a nih. Chu chu Saptrongin hril inla, ‘mother of all rights’ ti ni mei a tih. Chu ka ngaituonaa thil hung inlang ka hril chu mi threnkhatin an thilthaw intumnaa an ngai a ni chun, anni an inen fie phot ngai a tih. Pathumna, lekha ei tiem amanih, thu ei ngaithlak hin a thu kawk tak hre fie dinga ei fimkhur a ngaizie hril ka nuom lei a nih. Ka thu ziek hi hang tiem non la, intumna thu hlek khat khom a um nawh. Sienkhom, a khu rim ni awma hretuhai hnăr chu a rol nasa chu a ni hi tie! Hang ngaithlang ei tih.

Quote:

OPEN LETTER TO L.KEIVOM

Hmasawnna Thar February ni 15, 2015 a “HMUNPHI-HMUNPHIT” ti thupui hmanga i hung insuo, para 3 na a.. “ramhuoi ruol” an huongtau hun a nih. An hmunphi hmang khawm thina kut, AK-47 a nih…Senvawn tlang ah hmuomthlum danglam, silai mu an sem..” iti hi keini HPC(D), ram le hnam ta dinga hringna khawm chan huoma a sur-a-sa pawisa lova thingbul-lungbul khawm nisien a tul chun bela, in-le-lo maksana, a tul ang anga hnam san dinga pensuok hai hi imi tina ah kan ngai hmaka. A san chu AK-47 chawitu hai kan ni leiin. Senvawn tlangah hmuomthlum anga silaimu sema i min tumna hi kei duty i/c in ka hrietnaw a silaimu kan sem bawk nawh.

Thudik i hriet nuom leh chiengtakin hang hril ka che. MLA vote campaign laiin ralthuom chawi thenkhatin candidate tan bik neia, tharum hmanga vote thlak dinga hmalak an tum leia ralthuom chawia Thingkal, Vangaitlanga an inkul le sum le puon le fak –le-dawn ding demand mipui kuomah an thawlui le harsatna an siempek ti kan hriet leiin mipuiin boruok thienghlim tak hnuoia an dit seng ta dinga vote zalen taka an thlak seng ditna leiin, boruok riktak chu suk kieng tumin hma kan lak. Keini kan tlunghma in Assam Rifles (Army) haiin an lo hnawtdar hmana, chuongang mi hai chu tlansuokin Tuolbung le Maulien ram tieng Tuiruong ral kaiin an pan ta a. Chuonghai chun mipui harsatna siempek an la tum pei nia kan hriet leiin mipui thlaphang chu thlamuong tumin hma kan lak ta peia. Senvawn khuoral Parvachawm ram ah an la um ti le Senvawn khuoa mipui in thithaia, candidate an tanpa ta ding a vote capture an tum ti thu kan hriet nawk leiin Senvawn khuoah kan Sipaihai kan tir luta, khawtlang thuoituhai kokhawm an nih a. Boruok ditumlo tak a um leiin Candidate, Agent hai le mipui tukhawm zan dar 7:00pm hnung chu khawlaia invak ta lo dinga mipui inhrietir dingin ngenna siem a nih. Chuongsa khawma kan thu pawisa lova khawlaia vote zawng invak candidate le rawi hai chu Trinamool party an nih. Action kan lak em naw kha lawm um ah ngai ei tih. Chun, Senvawn Re-Poll ah mipuiin an dit seng ta dingin vote zalen takin an thlak thei senga, tukhawmin thawluina in iengkhawm an thaw nawh.

Keini HPC(D) chun candidate tan bik le vote capture le tumna khawm kan nei bawk nawh. Vote capture tum na le kan thaw ti Pu L.Keivom in i hriet chieng a ni chun mi hung hril la, i hriet si naw chun thukhel phuokfawmin chanchinbuhai a chen ziekin mi hung intum ta ngailo dingin ka hung inhriettir che.

Ram le hnam tadinga a tul ta phawt thaw dinga inpe le pensuok kan nih ti lo hre bawk rawh.

KT HMAR,
Duty i/c
HPC(D)

Unquote

Voi lo voia intum hman a na an ti a, intum lo intuma ngaia intum sawng chu thil khikhawk tak a nih. A tak ngeia tuortu le hmasuontuhaiin rawl insuo ngam lo khopa inrikrapna hnuoia intâng dinga ei insie zing sung chun, khawvel hi a pumin nei inla khom, umzie sunhang khat khom nei naw nih. Zalenna an kharkhipna, thim sâin ro a relna, Black Hole-a khum ding chun ei pamhmai taluo. Thudika mihriem a ngir ngamna le theina, thutakin lalna a changna tieng pana kal chawia inngaiin, kum sawmruk chuong liem tah, 1954 October-a T.Khuma’n beiseina mita thlir a, “Kawl ang a êng tran ve tah ei lengna” tia a lo insam chu insam non pei inla khom, tak rama ei khawsak dan leh an inmil si naw chun, aium rîla intûl leh a danglamna a um nawh. Dikna le thiemna hmanga mimal, insung, khawtlang le ram le hnam indin a ni naw chun phaiphin chunga in bawl ang chauh a nih.

(February 27, 2015, Delhi)

###