Ei pi le puhai khom an bang bik nawh. Rau amanih huoi (spirits) chi hrang hrang an lo biek bakah iengkim siemtu umin an ring a, chu chu hming hrang hrangin an ko a, an kona tlangpui tak chu ‘KHUO’ ti a nih: khuonu, khuopa, khuovang, khawzing le a dang dang. Huoi chi hrang hrang, mihriem sukna thei le a chunga thil thra naw intlun theitu umin an ring a, tlon lungawi an tum hlak. Khuoa hri intluntu chu ‘khawhri’ tiin an ko a, rama thuneitu chu ‘ramhuoi’ an ti thung a. Mihriem le indita inngaizawng theihai chu ‘Lasi’ an ti a, lasi lalnu Chongtinler chu ramsa po po chunga thuneitu ni dingin an ring. Sa tienga hmungilhai chu Chongtinlerin a ditsak lei ni dingin an hril hlak. Mihriem mana la hmang dai thei chu ‘Zasam’ an tih. Mi soisaka fiem hlak, uminhnel deu el chu ‘Nelhaua rawi’ an tih. Vantirko anga an lo nei, an angelhai chu ‘vanchungnu/vanchung laizuor’ an tih. An ngaituonain a hawl phak ang peiin thlarau khawvel hi an lo nei ve vong a nih.
Baibul ei tiem chun khawvel pahni ei hmu a, chu chu Edena inthokin ieng lai khom inkhingin an indo char char a. Khawvel pakhatna chu Judahai khawvel le an Pathien a na, khawvel dang chu hnam danghai pathien, Juda sakhuo pieng hma kum sang tam tak liem taa inthoka an ring le biek pathien chi hrang hrang hai chu an nih. Thuthlung Hluia ei hmuhai chu dannaranin Aigupta ram, Kanan/Palestina ram, Syria ram le Babulon /Mesapotamia (Irak) le a se vela chenghai pathien an na, chuong ang pathien chu tam tak an nei. Pathien indik tak an biek theina dingin le a tak ngeia ama an puong theina dingin Pathien chun pathien lem siemtu Tera naupa Abraham chu a hung thlang a, chu taka inthoka kum 700 hnung chun Juda sakhuo ei ti hi Sinai thlalerah a hung pieng tah a nih. Chu taka chun Pathienin Dan Sawm a pek a, a hmasa tak pahnihai chu ama Pathien ti lo pathien dang le milem biek a khap thu a nih.
Thuthlung Thar ei hang kai chun Kanaan pathienhaiin hmun an chang tlawm tiel tiel a, Grik le Latin khawvelah ei chuong lut a, Grik pathien le Romanhai pathien an hung inlàr a, chuonghai chu Chanchin Thrain hnot zam tumin thrang a lâk a, chu indona chanchin iemani zat chu Tirko Paula inzinna le inzomin Thilthaw 14, 19 ah ei hmu a. Paula le Barnaba inzin trumin Lustra khuoah Paulan ke zeng pakhat hi a sukdam a. Mipui makti chun “Pathienhai chu eini lai mihriem angin an hung um tah a ni hi” an ta, pathien anga biek an tum a. Barnabas chu Zeus an ta, Paula chu thuhriltu tak a ni leiin Hermes an ti thung a.
Zeus chu Grikhai pathien puipa tak le chunghnung tak a na, van le pathien dang po po le mi hrat khawkhenghai chunga roreltu a nih. Vana um po po chunga thuneitu, var petu, sik le sa po po kontrawltu, van inrûmtir a, kawl inleptir a, ruo insurtirtu, indonaa hnena inchangtirtu, dawn ding uoiin petu, fel tak le indik taka roreltu ni dingin an ring. Romanhai chun Jupiter tiin an ko ve thung. Jupiter chu nisa hèltu planet laia a lien tak a na, eini trong chun Hrangsuon tiin ei ko.
Khawvela hnam upa le var hmasahai chanchin ei tiem chun an chanchin poimaw tam tak, an ring le biek le an mi chawisanghai chu arasi (planet) hming an lo inputtir hlak a. Zeus (Jupiter) ti khom hi chuong ang leia hming put chu a nih. Ei pi le puhai tienamia khom Hrangsuon (Jupiter) le Chongmawi (Venus) chanchin a um a. Hrangsuon chu tlangval hrat le hmel thra a na, khaw danga mi Chongmawi an ti chu a ngaizawng a, zanah an kula chun lut ruin Chongmawi chu a leng hlak a. A leng trîn zatin an khaw mi pakhat lu a hawn zie a. Nasa taka zong suok tuma an bei hnungin an man a, an that a. A nunghak chu hmu suok tumin a ruong chu a khaw nunghak po po an inkàntir a. Chongmawi hun a hung tlung chun kan ngam loin, “Awi ka rei, Hrangsuon!” tiin a baw a, a pom ta ngawi ngawi a. “E, e, e, i tlangval a ni maw!” tiin ama khom chu an that ve ta a. An thi hnung chun thlarauin an pahni chun van tieng an vuong a, inhnaitein Hrangsuon (Jupiter) le Chongmawi (Venus) in an inchang tah a nih ti chu ei tienami ve chu a nih.
Ei thupuiah kir nawk inla. Lustra mihai chun Paula chu thuhriltu a ni leiin ‘Hermes’ tiin an ko a, chu chu Grikhai pathien laia sumdawngna, themthiemna, hrietna le varna tienga an pathien, lampuihai le ramrihai vengtu, mi an thi phaa an thlarau mithi khuo tienga thruoitu niin an ngai. Romanhai chun Mercury tiin an ko thung. Mercury hi planet lai po poa chîn tak le nisa hnai tak a na, inthim hlimin thlang tieng kawl bulah an lang a, favang laiin sak tieng kawl bulah nisa suok hmain an lang bok a, vanlaizawlah hmu ding a um ngai naw leiin a hming khom ei nei naw niin ka hriet.
Grikhai pathiennu poimaw deu el chu Artemis a na, Romanhai chun Diana tiin an ko ve thung. Hi thu hi Thilthaw 19 khan an lang rawn hle. Diana chu thla chunga pathiennu, ramsuok mihai pathiennu, ramsahai chunga thuneitu, nunghakhai inthieng taka vongtu niin an ngai. Eini tienamia lasi lalnu Chongtinler leh an ngirhmun chel hi a’n ang khop el. Diana (Artemi) lem i hmu pha leh saihli le thal a chawi lai hmu hlak i ta, chu chu mi lienhai le ramhuoihai a hnot zàmna a nih.
Tienami anga an hril dan chun Diana chu Efesi khaw kawl ram hnuoia pieng a nih. A piengna hmuna hin vana inthokin ama lim thinga siem a hung tla a, chu hmuna chun tempul ropui tak an bawl a, chu hmun chu a nih Paulan a va sir chu. Asia ram tienga Romanhai khawpui tak a ni bakah Diana betu an tam a, thawlawm ieng ang khom an pom vong leiin sum a lut nasa a, dar le tangkaruoa Diana lim siemtuhaiin an hlawkpui a, an sum hnâr tak a ni leiin Chanchin Thrain a va phur thluk tum chu lungkham naw ding an ni naw hrim a nih. Ei Minister-hai sum hnar siktan tum ang char ning a tih. Paula le eini danglamna ruok chu, ama chun thlarau le titakzetin Setan lalram a do a, eini rawi ruok chun bauin kawrapson ei do a, an hlepruk poisa tlawm te bek mi sem ve dingin kut khing hniin kut ei daw nawk tlat si hi a nih. Ramhuoi hlakin Skeva nauhai hlak a hriet chieng nasa el si, a nuom hun hunah ei kohranhai hi a mi sop el hlak niin an lang.
Diana tempula thiempu laltak chu mi tilre a na, a hnuoia thiempu thokhai chu Essenes an ti a, sienkhom Kumran Puka khawsa Essenes hai leh ngai pol ding an ni nawh. Nuhmei thiempu, varzin ngat, pasal neka tam dai an um a, chuonghai chu Melissai tiin an ko a, a umzie chu ‘Khuoi’ (Bees) tina a nih. Diana lim tangka hlui i en chun khuoi lim chuong hmung i tih. Hun a hung fe pei a, nuhmei thiempuhai hi tempul ta dinga inzor an hung chîng a, mi hausa le neinung hung betuhai kha inhoi takin Diana khuoihai chun an lo bel hlak leiin tempul a suklùn pha bakah an sum hnar poimaw laia pakhat hung ni ta hiel awma hril khom an um.
Efesi khuoa Diana/Artemi tempul hi khawvela thilmak ropui laia pakhat (seven wonders of the world) laia thrang hiel a nih. Tempul dang neka a ropui bikna khom, an Municipal Chairman-in a hril ang khan, “Artemi ropui tak le a lim thienghlim, vana inthoka hung tla tempul” (TT 19:35) nia an ngaina chu a nih. Makkaa um, Muslimhai tempul thienghlim tak Kaaba khom hi a thienghlim le hlut bek bek san nia an hril chu Adam le Evi bawsietna ngaidamna dinga vana inthoka Pathienin lung dum (black stone) a hung thlak chu a kil thruta hmanga Pathien ditzawng anga bawl nia an ngai tlatna chu a nih. Chu lung dum chu kha hma khan biekzina hung taphot fawp theiin an sie hlak a, sienkhom an fawp ral el ding nia an hriet leiin tangkaruoin an tuom a, an tuomna chauh them le fawp thei a ni tah.
Hieng thil hi a ringtuhai chun thi chil an ngam tlat leiin ram thima rongbawla fehai khomin mi thil biek va pawng hmusit le cho el hi thil thaw ngai lo ding a nih. Pathien varna le hratna hmanga thiem taka phet thluk lem ding a nih. Chanchin Thra var an mit ngeia an hmu pha chun hril ngai loin an bansan el hlak.
(July 31, 2004, Delhi)
Note: Hi artikul hi 2016-a HCFD Sande Sikul sabzek Thilthawhai (Acts) inchuktuhai ta dinga thu trangkai a ni leia insuo non a nih. Hieng anga sabzek hrang hrang thlirna artikul hi DT Article Bank-ah a um a, a remchang ang peia hung insuo non tum a nih. Editorial Board.
###
No comments :
Post a Comment