Of Oreb, or of Sinai, didst inspire
That shephered, who first taught th chosen seed
…I thence
Invoke they aid to my adventurous song.
- John Milton (Paradise Lost)
Thiemthainu ei hril ding hi phaivang chanchin a ni nawh. Grikhai thusima an Pathien Zeus (Latin Romans Jupiter)-in zan kuo a zawna hmel thra chungchuong Mnemosyne a riekpuia inthoka naunu pakuo hung pieng- Clio, Euterpe, Thalia, Melpomenia, Terpsichore, Erato, Polymnia, Ourania & Calliope- hai chanchin a nih. An renga hming tlanglawn an inputtir chu Olympian gods hming Mousa, Mousai (Mu-se) ti-a Grik tronga an ziek, Latin tronga Musa, Musae tia an ziek chu a nih. An hung pieng hin Grik pathien pakhat Apollo le a thaikem Nymph Eufime enkol dingin Mnemosyne chun a pek suok a. Apollo inchuktirna hnuoiah hung seilienin, theina le thiemna chi hrang hrang, a khawm hrilna hminga ‘Arts’ ei ti, tu lai hnai ela Delhi tlanga khawsa Hmar Students’ Association thruoituhaiin ‘Thiemfin’ ti-a an inbuk chu koltu an hung ni a. Kha hmaa ka lekha ziek threnkhatah hieng Muse-hai hming tlanglawna hin ‘Thiemthainu’ ti ka hmang a, chu chu ka hung hmang zui pei a nih.
Hi ka hming inputtir ‘Thiemthainu’ le einin ‘thiemthainu mong tol’ ei ti hlak hi thil thuhmun a ni nawh ti ei hriet hmasak trulin ka hriet. Eini ‘thiemthainu’ chu phaivang chi khat, ke paruk nei, Saptronga ‘ant lion’ an ti, pilvung amanih hnuoi hul le pil inthawtnaa tlakkhur, a rei inbiel le parh, a mong tieng inzui siem a, a mongah a hmûr chauh suklanga thilhring man le se dinga lo inchan a, a hung tla thla phot mana fa hlak a nih. Thiemthainu hi chi hni an um a. Pakhat chu a lu le a mong bawr lien tak el, a tâi le awmbawr tieng inrêk, thilhring a man nghet theina dinga ha hmai sir ve vea ha kuoi kir nei a nih. A dang chu khumfât amanih satel kawr ang deu nei a nih. Pu Buanga diksawnri-ah thiemthainu mong tol chu hieng hin a hril fie: n. the ant lion. (The larva of the Myrmeleo formicarius). The little creature digs a funnel-shaped pitfall in the finest and driest sand available and buries itself at the bottom with only its formidable mandibles projecting and waits for its prey. The moment a victim falls in it seizes it with its mandibles and sucks its juices.” Naupang inhnelna pakhat chu ‘Thiemthainu muchep’ ti a nih. Kan naupang lai chun a keilet sakin, “Hmeithainu mongah satel kai lei luoi” kan ti daih!
Ei thiemthainu hril ruok hi chuh tienthu le hnam mihranghai chanchin inzawt thiemna le perkhuong siem le tum thiemna dam; trong le thuhril thiemna dam; rimawi siem le tum thiemna dam; hla phuok le sak thiemna dam; lemchang (comedy), geometry, science, agriculture tieng thiemna dam; lemchang (tragedy) le lung kuoi taka thu hril le insam thiemna dam; lăm (dance) dam, tringtrang kei le lekha thiemna dam; inngaizawng, inhmangai, indit, innei tienga lung chok thotu le hmangaina hla phuok thiemna dam; pathien inpakna hla dam, lem chang thiemna dam, geometry le grammar thiemna tieng dam; thla le arasi le vanlengruol chanchin (astronomy) sui le hriet thiemna dam; lalhai le roreltuhaiin indik taka ro an rel theina ding le remna le muongna an lengna dinga thruoitu, vengtu le malsawmtu khuonu pakuohai chu an nih. Lekha ziektu hmingthang Homer hai, ‘Divine Comedy’ ziektu Dante Aleghieri hai, ‘Paradise Lost’ ziektu Milton le mi dang dangin an thu ziek tontirah Thiemthainu kuomah an thu ziek an inhlan a, malsawmna hniin a kuomah dawvan an kai hlak. Hieng ang char hin Manipur le Tripura Renghai chanchin ziekna Royal Chronicles ei tiem chun, a tontirah Shiva kuoma inhlanna le dawvankaina an ziek tlar ve duot el.
Hnam tin hin taksa le thlaraua ei tonhriet phak le a umzie ei man phak ang peiin Pathien ei ring dan le sakhuo ei fepui dan a thruoi a. Ei mawl laia thilmaka ei ngai threnkhat chu hrietna tienga ei hung leikăng deu hnung chun mak ei lo ti hlak tam tak kha mak ei ti lem hun a hung tlung a. Chuong ang bok chun, ei hriet thiema ei ngaihai dam kha ei hriet nawzie ei hung hriet chieng deu hnung chun a letlingin nui a sukza hlak. Trum khata thil ni dinga ei lo pom tah chu hang thriek el a lo harsa.
Kum 1929-30 a Coleman pawl le Watkin Roberts pawla kohran ei hung inthre hnung khan Watkin Roberts tienga thrang po chun kum 1930-a inthok khan Independent Church (Manya-Enkol) tiin an hung inko a, ei khawvel kha a hung inphir nasa khop el a. Pherzawl khuo 90% vel ding kha Independent Kohrana inlawi kan ni a, a dang po chuh, Salvation Army member um sun Pa Zulawm thrang sa loin, NEIGM an nih. Kan kohrana khan a’n khat tawkin thlaraua hlimna a tlung hlak a, NEIGM chun an do leiin voi khat khom anni lai a tlung ngai nawh. Khang hun lai khan chuh NEIGM rim innam hrim hrim chuh van ram kai um thei dingin kan ring ngai nawh. Sienkhom, khawvel lien lem ei hang paw a, Coleman zuituhai khom, Catholic hai khom, tu khom Isu ringtu taphot chu sandamna lĕnin a huop vong ti inzirtirna chu Baibul thutak a lo ni lem si! Italy-ah ka um hnung lem chun Catholic hai chu van ram kai lo ding hiela cheksoltu Protestant intihai nek daia ringtu fel le thra lem le thlarau mi lem an lo um treuh ti le anni chun Protestant-hai le Muslim-hai hi zât khat chara an mi lo ngaizie dam ka hung hmu suok tah pei a. Ruom chite-a inthoka khawvel le nun ram thlir chu a lo keng tlawm khop el.
Ei pi le puhai khan Iengkim Siemtu Pathien an lo biek a, an umna zirin hming tum tumin an ko a. An kona tlanglawn tak lem chuh Patuon (Chatuona Pa) ti niin, chu taka inthok chun ‘Pathien’ tiin an hung ko tah pei a nih ti thil suituhai chun an hril. ‘Khawzing’ ti pawl an um a, chu chu Khuo+Zing ti inkopa hung suok ni-a pom chun, Mosie kuoma Pathienin, “Uma chu ka nih” a ti leh a hung inang char a nih. Hi thu, chipchier lema ka suina chu May 29, 2001 khan ‘Khawzing’ ti le March 2011 khan ‘Khuo, Khuo, Khuo’ ti thupuia hmangin artikul ka ziek a, Delhi Thurawn le chanchinbu hrang hrangah an hung insuo.
Ei sawrbing nuom tak chu Pathien konaa ‘Khuovang’ le ‘Khuonu’ an lo hmang kha a nih. Saptrongin ‘Khuovang’ hi inlet inla chuh, ‘God of Luck’ ti ning a tih. Kristien sakhuo a hung lut hnunga Baibul inlet an tran khan ‘God’ ti inletna ding hin ‘Khuovang’ am ‘Pathien’ ti lem hmang ding thuah dit dan nasa takin a hung inkal a, a tawpah ‘Pathien’ ti hmang chu an sukthluk tah lem a nih. ‘Khuovang’ ti khom lo hmang inla, vangneina po po chunga vangneina chungchuong, a Naupa leia chatuon hringna mi petu a ni leiin, a fûk khop el.
Pathien hminga ‘Khuonu’ amanih ‘Khuonuleng’ an lo hmang hi chik taka ei sui chun hlaa chauh niin a’n lang. ‘Pa’ kha ieng leia ‘Nu’ ei inchangtir am ning a ta? ‘Khuonu’ an ti hin Saptronga ‘Mother Nature’ an ti hi a kawk hnai tak el awm. Khuonu chu van sanga um ni dingin an ring leiin ‘Chungkhuonu’ an ti bok. Chu khuo, chung tienga um dinga an ring, Khuonu umna chu ‘Chungkhuo’ an tih. Ei hlaa, “Chungkhuo run rem mawi tak a um” ti hi tu lai tronga van ram an tina a nih. ‘Van ram’ ei ti hih kristien ei ni hnunga trong thar ei hung ser tah pei chu a nih. A hmain ei nei ngai nawh. Hremhmun khom ei nei ngai bok nawh.
Hebrai sakhuo piengna hi tlang fil, thlaler ram trawl le inlingin a huol vel, tu chen khoma mihriem chengna thei ni lo a ni leiin a pa a, a rawng a, thisen a hè a, powder le lipstick khawvela chenghai ta ding chun nĕl um lo deu a nih. Kalchar dangah an pathienhaiin hmei an hau laiin, Hebraihai Pathien chun pakhat khom a nei nawh. Grik khawvela chuh pathiennu hmel thra tak tak an inzi nuoi nuoi a, lim ziektuhai khomin an ngaituonaa an hmel inlang dan an ziek suokhai chu zer far duon duoin, mit tla vâng văngin an en tlok tlok el a nih. Chuleiin, an kalchar sŭla inthoka Thiemthainu pakuo zet an inpiengtir el dam hi an khawvel thlalak fie tak chu a nih. Anni chun, “Pathien chu hmangaina a nih” (God is love) ti nêkin “Hmangaina hi Pathien a nih” (Love is God) an ti ve thung a nih.
Grikhai chungchuongna
Grik thlierkar chu ram chikte, sir tina inthoka chawl loa tuipui fawnin a not zing ni sien khom, thiemna tienga khawvel elvartu a la ni zom zing. Thuthlung Thar po po a changtu takhai tronga ziek nekin Grik tronga ziek a ni vong el dam hi thil mak a tling. Khawvel ta dinga a thilpek hlu threnkhat laia mi chu: histawrian hmasa taka ngai, ‘Father of History’ nina hlaw hiel Herodotus dam; sierkop tieng, mathematic theorems (Thales theorem) chok suoktu, Miletia mi Thale dam; filawsawfi hming sertu Pythagoras an tihai le nasa taka hung sui zautu Socrates hai, Plato hai, Aristotle hai, khawthlang filawsawfi innghatna bulthrut remtuhai dam; kumzabi pasarina B.C laia an khawpui Athens-a inthoka khawvelin a hlut mipui rorelna ‘Demokratia’ an lo tran le rochung pei dam; Athens-a inthoka vantlang mi thlang khawm hmanga Court-a thubuoi rel dan an lo tran, ‘trial by jury’ ti dam; thusim, abikin an hnam mihrang, pasalthra le huoisen Achilles hai, Poseidon hai, Hercules hai, Athena hai le mi dang dang tienami hmanga an mipuihai kuoma an pathienhai le mihranghai chanchina inthoka an hnam histawri le kalchar an lo tu dan le nina chieng tak an lo ser dan hai; lemchang (comedy & tragedy) chi tum tum le hlasam (dramatic poetry) hmanga thu le hla an lo hril dan hai; kum 3000 neka tam liem tah, BC 776-a inthok khan Olympia khawpuia an pathien Zeus hminga kum li dan peia Olympic Games an lo nei le khawvelin Athens-a inthoka kum 1896-a tharthaw, tu chena a la sunzom pei dam; in bawl dan chi hrang hranga hmathruoitu an nina dam; lunga inthoka milim ker (sculpture works), pilpoka inthoka bûr le bel chi hrang hrang an siem (pottery works), mawi taka rong hrang hranga chei, thil hlu le hlui siekhawmna miuziam (museum) le thil dang dang hai an nih. ‘Museum’ ti trongkam khom hi thiemthainu hming hlawma an hmang ‘Muse’ ti-a inthoka ser a nih.
Hellenism huvang
Grik kalchar, an thu le hla, an sivilaizeson hrilna trongkam aiawa an hmang chu ‘Hellenism’ a nih. Roman lalram sak tieng (Byzantyne), Mediterranean Tuipui le Black Sea (Tuipui Dum) kam le a se vel ram po po hi Hellenism huvangin zie a thlakna a nih. Zawlnei mit hawa khawvel inlumlet dan ei thlir chun, Isu hung pieng hma kum zasari vela inthok khan mihriem lungril le ngaituona buotsai dingin harna thli a hrang ni sien a hoi. Chu chun Homer hai, dawnril Confucius hai, Lao-Tzu hai, zawlnei Isai le zawlnei dang dang hai, Mahavira hai, Buddha hai le mi dang dang a hung mut tho a. Alexander The Great a hung inchawm suok a, Mediterranean Tuipui le a se vel ramhai le Asia ram tieng India chenin a lalram a zauh hman a. A ram opna sung po poah Grik trong a hung indar a. Chu ruol chun mihriem ngaituona chok har dingin dawnril le filawsawfar Socrates hai, Plato hai, Aristotle hai le mi dang tam tak an hung suok a, thiemna tieng nasa takin hma an hung sawn a. Thuthlung Thar zieka a hung um zet khan chu Thuthlung Hlui trong ni ta loin, Thuthlung Thar trong, kum tam khuonun a lo buotsai lawk ‘Grik trong’ hmangin an ziek tah a nih. Chun, hieng hun laia sakhuona tienga dangcharna nasa tak leiin India rama ringot khom sakhaw thar 300 chuong a suoka hril a ni a, chuonghai laia dam khawsuok chu Jainism le Buddhism an nih. Khawvela sakhuo po po hi Asia rama pieng vong a nih.
Tlangkawmna
Sakhuo a ieng khom hi a zuituhai chengna khawvel le nunphung leh inthlop le inzel tungin kal a chawi a, a hung inthrang lien a, a par vul a, ra a hung insuo hlak a nih. Isu chu Asia rama pieng le seilien ni sien khom, Paulan Makedonia kona dona a Chanchin Thra thlai chi Europe-a a va tu hnung khan damten indar peiin, mingo lai hmun a khuor nghet a, sawt naw te sungin Asia mi Nazaret tlangval kha an kalchar huongah introtirin, an kalchar tuia chawmin, Mingo tlangvalah an inchangtir der a. Eini lai an hung tlungpui khan chu mingo tlangval thuoma inchei a ni tah leiin, a hung put luttu mingohai khom kha Pathien ang thawthânga enin, an kalchar ngaisangin, ei kalchar hnawmhnawlin, ei biek titi deuthaw a nih. Ei khawtlang nuna siksawina tam tak hi Sap kalchar kawpi le an thaw dan insira ei inhnel buoi lei a nih.
Grikhai ruok chun an kalchar, hnam ro, thu le hla le thil dang dang hai chu hnawm hnawl el loin, hnam dang ta dinga malsawmna hnar tling khopin an kengkaw pei a, inpak an um takzet. Paula khawlai lengin an buonzawl, Areopagi a va sir trum khom khan, thu dangdai tak a hril leiin a threnin an nuizat hlea chuh a thu mu man fu pawl an um leiin, ringtu iemani zat chu a man el chuh a ni kha tie! (Tt 17:16:34). Khanga hniek phawi der loa Quantam Theory of Relativity hmanga a hun le hmun zira Pathien thu vai ve thei iengtik am ei suok ding maw? Paula thiemthainu chu a tu am ni tang a ta? Pentecost ni-a in sawi hning a, mei anga inlâr a, mi sangthum chuong zet lungrila thu hriltu kha ni ngei a tih.
Kum 1999 July 30 khan Mizo trongin thusep, ‘Hriat Loh Ram Ata’ ti ka ziek a, chu chu Zoram Khawvel-8 ah a chuong a. A tawp tienga ka thu kharna laktawi chu hieng ang hin a nih: Ei thil inhnik le invoi tieng thilah, hriet phak lo rama inthoka pawlna mi tam takin an dong a, chu chu Saptrong chun ‘mystical experience’ (rauhrietna) an tih. Chuong ang hrilna le inchukna chu ‘Mysticism’ an ti bok. Thlarau hrang hrang a um angin ei rauhriet khom a danglam thei a, ei inpompek dan khom a’n ang bok nawh. Hi hi sakhaw thilah a ni zuol. Iengkimah a lem a um angin a tak khom a um. Hriet lo rama inthoka pawlna ei hril ruok hi chuh ei thil invoi le invet chilh zawng thil, ei lungril le thlarau kotkhar inhongna tiengah a ni vong a; ei kalchar mit le naa ei hmu le hriet phak chinah, ei dawl zo phak tawkin a ni bok hlak. Chuleiin, boruok zaia inthoka i ngaituona hung dengtu a um chun i thiemthainu-a inthoka hung a ni thei a, ziek thla nghal hlak rawh. I donsak naw chun bo nawk daih a ta, ngaituo suok zo ta naw ti nih. I’n hnikna tieng zawng ‘frequency’ i nuom hun huna man dan i’n chuk thiem lem chun khawvel mihriem ta dinga sekibusuok neitu ni thei i tih, tiin.
(June 10, 2017; Delhi)
###
No comments :
Post a Comment