Ei Suotlang le Internet Khawvel

Zing arasihaiin zai hla rem a,
Hlima vantirkohai an khek lai khan,
Nang khaw lai am i um a? (Job: 38:7)

ti thu, Pathienin Joba kuoma zawna 60 zet a’n don laia pakhat hi ka tiem hmasa tak chun thil tam tak a mi’n ngaituotir a. Radio amanih television hmanga boruok zaia inthoka an ri mana ei ngaithlak anga ei thaw ve thei dan ieng tik am a um ve ding maw! ti chuh ka thil dawnkhawl laia pakhat a nih. Chu chu tu laia ‘Internet’ ei ti huoi huoi pieng hmâ daih a nih. Thuhriltuin, “nisa hnuoiah thil thar a um nawh” (1:9) a lo ti ang hrimin, thil thar ei hmu suok ei tihai hi a Siemtuin hnuoi le vanvela a lo phum ta sa vong a lo nizie chu boruok zai hmanga khawvel ei indawr chur chur el tah hi entirna thra tak a nih. Van lengruol hla pawl le rimawi rem khom a man thei dan ei hriet suok ve pha chun ei la ngaithlak ding a nih. Tuta ei phak tawk chin chu internet hi a la ni hri a, chu chu thrang khat liem tah lai khan a hming khom ei la hriet ngai nawh. Tu ruok hin chu a thrang loin seramu ei thŭr ta nawh. Chu thil chun ei khawvela kakhawk a nei dan tlangpui ei thlir tum a nih.

Ei suotlang hlui
Zani kha voisun hringtu a ni leiin, ei suotlang thar umzie hriet fie ding chun ei suotlang hlui ngirhmun hriet chieng a ngai. Chu khawvel pahni chu a tak ngeia tonhriettu laia mi ka ni ve leiin, keini naupang laia ei khawvel mawl-mawi tak khah Sura favang lo enin hang thlir thuok thuok ei tih.

Mawl ei ti hih nachang hriet lo tina a nih. Thuo tam a um. Hringnun sir tin hi mawlna phuhlip thuo tama tuom a nih. Chu chu dam tea ei phi thlakna tieng tieng ei mit a hung var tran a. Ei phi thlak rawn po leh a hung var deu deu a, a hmaa ei hmu thei lo khom ei hung hmu fie thei hlak. Chu ruol chun nachang hrietna khom a hung pung pei a, mani kuta lo thei zing ni si Sura’n zer far duon duona pelte hmin bawr tuoi a, “Nahai chu ni sien aw, a hang lo el ding bah!” a ti hun khawvel kha nachang ei hrietna muol muolah ei fe pel hun a hung tlung hlak. Amiruokchu, tu mi var le thiema hril khom nachang ei hriet nawna muola chuh sa mawla mawl vong ei nih.

Pathien lunginsietna zarin kum 78 ka suoa inthoka a ni thumnaah hi artikul hi ka ziek tran a, mihriem ta dinga Mosie ramri khang pahnina ka tlungna ding khomin pên hni chauh a bâk tah. Mihriem bi thlieka inkhi chun ngal fîma dam pawl laia tiem sa ve ding ka lo ni tah. Histawri hlama inkhi ruok chun tibur tui hmuom da sung khom a ni naw a, chatuon Pathien inkhina lem chun mit khap kar lo a nih. Chu sung chun thiemna tieng khawvelin hma a sawn hrat hle a. Kan naupang laia lawn dîm dǐma kan hriet kha 1970-80 tunga khan chu a tlanin a tlan ta a, 1990-2000 bawr tunga ruok chu a vuongin a vuong tah thung a nih. Tak ram am mang rama chêng ei ni le ni naw ei indap ruoi chang a um naw thei nawh.

Kan khuo Pherzawl kha suo tieng Tuizang le tlak tieng Tuibum vadung chep dè, hmar le sim zawnga muol inkham phei, tlang zawl inhoi le thawveng chunga um a nih. Sak tieng kan hmu hlat thei tak chu Kailam tlang, sim tieng Senvon zopui, hmar tieng Tinsuong, thlang tieng Vangai tlang, chung tieng van dumpawl rui el a nih. Rikrum thila kan se vel khaw dang le kan inbiek paw theina um sun chu Mizo Union Movement laia an hung phur lut, kawlphekhawnvar (torchlight) hmanga Morse Code-a inbiek a nih. Kan khaw puo tieng chanchin kan hriet thei dan um sun chu mikhuol lenglak baua inthok a nih. Ieng anga thu hlui khom kan ta ding chun thu thar vong a nih. Radio takngiel khom a um naw a, um sien khom a trong inlet thei ding mi kan um nawh. Boruok zai hmanga kan biek thei um sun chu Pathien a na, kan inhnaipui tak a ni bok. Inlirthei kan nei sun chu naupang ruolin intruo an tan bong, a lai ver kuok, motor ke kuola hmanga thing gari an siem chu a nih. Saikal kan hmu thei hnai tak chu lekhabua chuong a lim a nih. Motor khom chuong tho. Vuongna kan hmu hmasa tak chu Indopui-2 tawp tieng van sanga Japanese fighter vuongna le Allied Forces fighter vuongna an inhnot kuol zak zak le thuomhnaw phurtu vuongna Dakota (DC-3) pakhatin kan khelzawla rawsot (ration) a hung thlak trum a nih. Papui ruol a threnin ‘vuongtheina’ an ta, a threnin ‘vuongnathei’ an ti bok a, indik lem ni inchuin an inbaw vang vang hlak. Chok si loa var thei Electric an ti hih a hming khom kan la hriet ngai nawh. Zana sana kan nei sun chu âr khuong a nih. An taima hle. Hun an vong dik bok. Lenghnotsuok ar an hung khuong pha chun tlangval ruol nunghak leng khom an trin trak trak hlak. Chuong leia a hming khom hi an inputtir a nih.

A hnung daiah kan lal, ka pu Dolurin Hringchara inthokin khawl khuong thei, Gramaphone an ti chuh a hung hawn a, chu chu rikawta inthoka hla kan ngaithlakna hmasa tak a nih. A hmingah ‘Thingremhlasakthei’ kan tih. A rawl hung suokna kuo, a khei par, a ‘tawtawrawt’ kan ti sunga khan a saktu inbi dinga kan ring leiin, naupang le a tar a zûr chenin, hmu beiseiin kan bi hlak. Singara (samosa) sunga alu a lut maktitu ang thoin, mak kan tina kha mawl thilah kan ngai naw a, mawl kan inti nawh. Mawlzie hriet ding chun mawlna phuhlip thuo tam phi thlak a ngai ti kan la hriet nawh. Evi angin, mita kan hmu phak tawk char khah kan mit le ngaituona latu a nih. Tu laia mobile hmang phak dam hi hung sien chuh, “A hung ding pa chu ka ni nawh” ti sien khom, “I nih” tiin zui dul dul tho kan tih.

Hi hman hi pipu suotlang, ei Rih Dil khawvela Jordan vadung a hung luong lut hnung, Chanchin Thra var a hung lut hnung le chu suotlang thara ei chuong luta inthoka kum sawmnga hnung, keima ngeia ka hung sir ve phaka kan khawvel ngirhmun a la nih. Vangneithlak takin kum 1951 khan Pherzawl High School a hung ngir a, 1954 khan Matriculation Exam tran a ni a, kum sawm vel sung chauhin Matriculate 80 chuong an suok hman a nih. Chuong laia ka kaipui, 2008-a muol liem tah Lalthanzau Pudaite leh Foreign Service kan ban tung a; ka tuhai pahnih- Hrangchunghnung Hrangate chun Indian Ordnance Factories Service (IOFS) a hmu a; Dr. Laldena chun Education tieng Manipur University History Department-a ngirhmun insang tak chela a penson hnung khomin Sangai International University, Manipur-a Vice-Chancellor ngirhmunah hlangkaiin a um tah pei a nih.

Hieng thilhai hi ka zuk inzawt san chu, zero-a inthoka tran a, thiemna hmangruo hmanga kum sawt naw te sunga ‘civilization’ tam tak chawm hlêna tuta kan ngirhmun hi tlung kan ni thu ka hril nuom lei a nih. Ka ruolpa Thanzau leh lem chu Matric kan tlinga inthoka kum sawmah Delhi tlanga khom India hnukpui tak inthrutna Raisina Hill-ah India palai sin chelin kan inthrung hman a, chu taka inthok chun ngirhmun inzaum le insanga khawvel ngai, ram palai fe khawm diplomatic community-ah kan inleng lut tah pei a nih. ‘Your Excellency’ ti-a an mi hang ko chuh mi dang an kona sawnin ka ngha vel a, sienkhom zani el laia vok êk dŭra inthoka hung suok, Pherzawl-pa, Sinlung pachal an mi kona a ni ve tlat!

Hi thu ka hril hi uong thila lo ngai suol palh an um el thei. Sienkhom uong thil a ni nawh. Thil inthlak thleng thutin nghong le kakhawk a nei thei dan hril ei tum leiin a tak ngeia kan khawvel lo pal tah chanchin ka hung inzawt a nih. Thil inthlakthleng hi ei hrietna le thiemna dawl zo tawk a ni sung chun hmasawnna changtlung lema mi hlangkai pei theitu a ni a, a ni naw ruok chun nunah siksawina a siem a, mihriemin nasa takin ei thawhla thei. Ransa le inhneng zinga la tla khawm, a tak khoma ran rim la’n nam butna khawvelin Internet le mobile khawvel ei hang paw thut el hih hmu nuom ei um khop el. Puk inthima khum sahuoi, sunchang ni intal rui laia thruoi suok thut ang ei nih. Ei hriet le inkhi phak ruol loin nghong a nei a, ei hnam, khawtlang le mimala siksawina nasa tak hringtu a nih.

Culture Shock
Kum 1986 (Dec 15-24) khan Rangoon-ah Indian Trade Fair hmasa tak kan huoihot a, chuong laia Foreign Minister N.D.Tiwari le Trade Fairs tienga lu tak le mi hmingthang, kan service-a um hlak Mohammad Yunus, ‘Frontier Gandhi’ an ti Abdul Ghaffar Khan tupa, Trade Fair Authority of India indintu khom an hung a. Chu truma kan titina-a Yunus thil hril chuh hi thu ka ziek lai hin ka ngaituonaah a hung leng lut a, chu chu hang zep vak ei tih. British India hun lai khan World Games-a thrang dingin Afghan mi, inbuon hrat pathum an thlang suok a. Thingtlang khaw tea inthoka hung, mi mawl, nun insang la hre lohai khah Maharaja of Patiala lal inah thla thum zet, an dit dit le du du lam thei ngirhmunah Rengpa mikhuolin an sie a, sun le zan nun an chĕn a. World Games-a thrang dinga longa an fe suokna ding Bombay (Mumbai) pana rêla an tlan lai chun anni pathum laia pakhat chu Allah hming sâmin a khêk vuol vuol a, rêla inthok chun a’n chawm thlak a, a hmunah a thi nghal a. A pieng a pata a mangphan phak lo le la hriet ngai lo thil thar vong a hang tong kha a nunin a dawl zo naw a, a ngaituona a sukvet a, a thipui a nih.

Nun inthlak danglam thut hi hrietna le thiemna (hrietthiemna) le inzui amanih le inkop tung pei a ni naw chun, mihriemah siksawina chauh khom ni lo, chi-aina nasa tak a hring thei a, chu chun mimal, khawtlang, ram le hnam nun le kalchawinaah a sie a thrain nghong a nei a, mihriemin a thawhla a, thratpui nekin a sietpui ei tam lem nuom. Hi hi Saptronga ‘Culture Shock’ an ti chuh a nih. Foreign Service-a ram palai sinthaw a tu rama inthoka hung khomin ram dangah an hang khawsak tran laia nun inthlak thleng thutin anni le an sung le kuo, abikin naupanghai a nghong buoi ding veng hi sinpui pakhata an nei a nih. Culture Shock ei ti hi puitling nekin naupangin an thawhla lem a, ram hnufuola inthoka ram changkanga hung luthaiin an tuorhla zuol a, mani ram le kalchar hmusitna lungril an put nuom a, anni chen khoma mi tluk zo lo dinga inngaina an nei pha nuom. Mobile nei lo le la tawk ngai loin mobile tlai thei a chungen ang deuh a nih. Takrama ruok chu mi takin lemchang a ngaisang letling ang char a ni thei.

Balance bo theina khawvel
Kum 2008 October 22 khan ka naupa David Lalhmingsang thruoiin airuoching hnuoiah Churachandpur-a inthokin Pherzawl panin zing dar 4-ah kan suok a. Chawhnung dar 3 vela Thanlon kan lut tawmin JCB (Joseph Cyril Bamford) Excavator pathum sorin contractor haiin lam sirah Cable hrui an lo phŭm a, a khaw mi iemani zatin an lo thlir tieu a. Ka lungril tê te chun, “Aw, an thil hmu nuom hi a umzie hre hai sien chu an hmu nuom awm naw vei leh!” ka ti vong vong a. Reliance Company haiin tlang hrang hranga transmission tower an siemhai suizomtu dinga cable hrui an phum, internet, telephone le mobile hmang po poin nei le nei loa sum an khawralna ding a nih ti an hriet phak nawh. Hmasawnna ei ti hih a sor trangkai phak ding ngirhmuna umhai ta dingin thil thra a ni laiin, a sor phak lohai ta dingin bohmangna a ni thei. Bilding ropui tak tak bawla inhlaw, bekte hnuoia khawsahai chan hi hang en inla, zo a ni pha, hluo a ni hmain, an chengna bêkte inhai leh inthiel fai an ni hmasa hlak. Hmasawnna ra sor phakhaiin mobile an khel zatin an inkhel hlawk a, a sor trangkai phak nawhai chun ei khel zatin ei inkhel rethei a nih. Mi tam takin “Ka balance a bo” ei ti hma daih hin ei mihriem ninaa ‘balance’ kha ei inhmang daih tah ti ei ngaituo ngai nawh.

Internet trangkaina
A hmang trangkai thei ta dingin internet hi mamaw iengkim deuthaw phuhruktu, Pathien dottu ti hiel thei khopa thil trangkai a nih. Ni danga Bills pe dinga ofis hrang hranga fe hlak kha tu hin chu ka dawkana inthokin minit tlawmte sungin ka pek fel vong thei a, a rikawt ka computer-ah a um nghal vong bok. Ka bank-a sum lut le suok po po ka mobile-ah a hung inlang vong a, sum ka thon nuomna taphotah ka computer-a inthokin ka thon nghal thei bok. Baibul inlet kan tran khan Saptrong Baibul varson hrang hrang le hrilfiena (commentaries) hrang hrang kaset-a an siem a um a, a poimaw zuol deuh inchawk ding chun a nuoi zawnga seng a ngai. Amiruokchu, a hmaa internet-a hmu thei lohai khom a hnungin hmu thei deuh vongin an hung sie a. First Edition kan sut hnunga Revised Edition kan hung buotsai khan chuh kha hmaa Internet-a inthoka hmu thei lohai khom kha a thlawna hmu theiin a hung um ta a, a varzâng khop el. A hmaa Baibul inleta inhmanghaiin Version le Commentaries hrang hrang bakah Hebrai le Grik thumal poimaw le inril hrilfiena Lexicon rawn ding zongnaa hun tam an lo seng hlak kha Internet hmangin minit tlawm te sungin ei hai suok zung zung thei. Delhi Version hi kum 2007 October-a tlangzar a ni hnungin mobile-a mi tin tiem thei dingin 2008 khan SinlengNews hmanga ei khawvel rûntu Lalchungsiem Thlawngate chun hieng tieng thaw hlakhai kut hmangin Mobile Version a hung ngaituo a, India rama hieng ang Mobile Bible Apps sie hmasa tak parietna ei nih. Entirnan, khawvel huopa rongbawltu Bible-smith Project haiin an website le Google Play Store-a download thei dinga Hmar tronga Baibul an sie hi Delhi Version (2007) a nih. Sienkhom, an thu dongna a felhlel deu ning a ta, Rochunga Pudaite inletin an hung ziek daih chu tie! Tu kum 2017 July 15, ka piengchama kan tlangzar ‘Ka Tukvera Inthokin’ ti khom Baibul le lekhabu dang pathum leh internet hmanga boruoka Amazon ‘Thengreng Dawr’ a inthoka inchawk thei dingin August 3-a inthok khan sie a ni a, ei khawvela hieng ang dawr ei nei hmasa tak a nih.

Computer pahnih a ruolin ka hmang a, pakhat chu hmangruo ka mamawhai internet hmanga la suoktu a ni a, a dang chu ka thu inlet ka sut suokna a nih. Kuta ziek amanih typewriter-a sut, a’n dik nawna ei siem thrat tum changa ei thai siet vong ang kha ni ta loin, computer-a thu zieknaa (word process) chu ei nuom le dit dan ang taka rem thrain ei thlak kuol thei a, editing khom a suk-olsam. Hieng lei hin a hran hlaka Baibul pumpui inlet thuolpui khom kum thum le thla sariin ka zo hman a nih. Sut dinga ka buotsai lai le setting kan thaw lai khom internet hmang vonga indawr kan nih. Ka computer a buoi changa ka rawn tak hlak chu New York-a um ka naupa James Lalropui a ni dai a, aman ka computer a hung kontrawl a, a’n hnoknahai a hung inthiel fai zo pha ka kutah a hung inhlan kir nawk hlak a nih.

Piengsuolna siemtu
Khawvel hmun tina mihriem nun khaltu tak chu internet kut le ke a nih. Internet hmangin khaw lai hmuna inthok khomin khawvel hi dawr thei a ni ta a, chuong ang chun ei pindan ril tak khom sun le zan a mi rûn zing a nih. Ieng leiin am Aizawl tlang hi ‘Arirang’ khawvelin thla a zar khum thei? Zopa khawzawlah ieng leia luoksuokum deua nu dâka pasal an inchei ngam? Ieng huoisenna kalchar letling am a ni tah leh? Ieng leia chuong mihai chu ei hlap thluk zot zot ngam naw? Zopa insukpăna thlarau khan ei khawvel a trinsan am an ta? Ieng leia ei kawl le kienga umhai khom ngaisak ta loa ei biekbawm chawi ringot buoipuia a hmai inhâng rak khopa ei tuoi ei tuoi? Mi tam tak piengsuola siemtu a ni lien tah khop el.

A hmang trangkai dan hre nawtu le hmang thiem naw ta ding chun computer le internet khawl hrat le to nei chu rûla raw nei ang char a nih. A hmang thiem ta ding ruok chun mani pindana inthoka khawvel rŭn theina le hausakna hnârpui a nih. Chu neka poimaw nawk lem chu a siem thiem ni a nih. Chu thiemna chu technology ei ti hih a nih. Thluok ril hmanga thil thar le trangkai ngaituo le siem suok a nih. Hnuoi le vana thil iengkim, hmu thei le hmu thei lo le hriet phak le phak lohai hi Iengkim Siemtu Pathienin a sie sa vong a ni a, chu chu hmu suok le hmang trangkai dinga ama angpuia a siem chu mihriem a nih. Chu mihriem chun a theina zaa sawm vel chauh a hmang phaka ngai a ni a, zaa sawmkuo dang hai suok le hmang hlawk chu thiemna thil tum a nih. Chuleiin, mi tin, sungkuo tin, khawtlang le sorkar tin thil tum chu mihriem siem a nih.

Mihriem siem poimawzie
Chu mihriem siem sin poimawzie hre chiengtu laia ka mi ngaisang, Israel ram indintu laia thruoitu poimaw, September 18, 2016-a muol liem tah Simon Peres kha a nih. Ka la hriet zing chu, kum 2015 October-a Israel rama India President Pranab Mukherjee inzin ding truma Ballava Bagla an tiin Shimon Peres intarviu a thaw, Times of India suok October 12, 2015-a hung inlang kha a nih. Chutaka zawna pakhat a donna hin ngaituona a fak khop el.

Quote
Ballava Bagla: You’re among a rare group of politicians who literally built their nation – did you imagine Israel would become a global powerhouse for start-ups and technology?
Simon Peres: No – because all we knew about was against us. We had a tiny land with a desert in the south and swamps in the north. We didn’t have a drop of water. We didn’t have natural resources. We discovered that we really have nothing – and that is what made us great. Because when you have nothing, you discover you have something that is called a human being.

History is the story of people who have blessed the land – not land that has blessed people. At a very early age, I learnt that you have to cultivate the human being.

Another lesson was the Arabs around attacking us. We were tiny and alone, they had armies and we had war before we had an army. We started thinking about how we could equalize – we turned to science.

So, the two great scientific attempts came because we did not have land and we did not have friends.

I was a great dreamer. But today, when people ask me, what’s your greatest mistake, I say, my dream was too small. I recommend to young people whose world it is today – dream big, do not hesitate. The greater your dreams, the more you can achieve.”
Unquote

A tawi zawnga hril chun, a ram leilung hausakna hang ringsan ding iengkhom an nei si naw leiin, an ram ngirsuokna ding chun an nei laia hlu tak mihriem siem le sir tina inhuoltu Arab mihai hne theina chu thil siem thiemna science tienga tluk lut a nih. Eini tlangram khokroka chenghai khom chu chu ei dam khawsuokna dinga ei lampui hraw dinga ditum a nih. Ei lekha inchuk tum dan ki khom hi thlak danglam a ngai. Inchuk duou a, hmang tlak inchuk dok si lo, thiemna thrang lo dikri lukawrok ringot dampui tum ei tam taluo. Kha hma deu khan Computer inchuka inhril, a ieng tak am a na an inchuk indon inla hril thei si lo, fakzongnaa hmang thei khop inchuk lo, mobile tuoi tler ringota inhmang, zan sawt tak tak laptop khel a, film en a, sun pachang khoma la’n hnăr bur bur ei tam. Drug neka internet bawia intang ei tam lem.

Khawvel hmasawnna hi a fe hrat bek bek leiin technology iemani beka fak hmuna khop thiemna inchukna tieng inruolsiek ei tiu. Ei tlangram hmun thawvengah ei nunghak-tlangvalhaiin internet hmanga khawvel an rŭn theina ding lampui săt hi thruoitu tu khom hma thlir ni raw se. Kum tam taka inthoka suongtuona boruoka in ka bawl hlak chu Senvon zopuia dam, Pherzawl le Tinsuong tlang pheia dam, Kailam tlang pheia dam, Hriengkot le Teisieng tlanga dam, Saidan tlang le Len tlanga dam le hmun remchangna taphotah computer technology hmanga khawvel ei runna ding ofis mawi le inhoi tak tak inngir khup a nih. Vairampur khawpui hrang hranga ei nunghak-tlangval sinthawhai hi ei khawvel thar la pieng dinga hmathruoitu an nih. Ei hmel inangpui, ram hrang hrang hluohaiin ei thil hril hi thrang tam an lo thaw an tah. Pelte hmin fak chaka tuoi vuta a lo dan hre si lo pu Sura lungril kha bansan ei tiu. Nahai lo thei chu eini khomin ei lo thei. Ei baksam chu nachang hrietna chauh a nih.

(August 16, 2017; Delhi)

Note: Hi artikul hi kan nu piengcham, Independence Day-a thon dinga ka zo khah, thon tawma insil dinga bathroom-a ka lut vak karin electric a hung thi a. Insil zoa ka zuk hong leh a tawpna tieng thu tlawmte le a bul tieng phek khat vel chauh hmu ding a um tah a. Computer-in hnawl hmang dinga phek 50 vel a lo hnawk khawmna hmun hrang hrangah a lo inzep a, kan hmu thei po kan lak kir a, format hrang hrang hnuoiah a lo sie leiin siem ruol el thei a ni naw leiin, a thren chu type thrat a ngai a, a original angin a suok thei ta nawh. LK)