Hla tienga Zo hnathlakhai chungchuongna pakhat ni-a ka hriet chu khuong vuok inrang le inruola sak chi ‘Lengkhawm Hla/Zai’ ei nei tlat hi a nih. Hla thuhmun char khom solfa thluka ei sak pha leh solfa vuok (beat) le inremin khuong ei vuok a; lengkhawm thluka ei sak pha ruok chu ei khuong vuok khah ei hla trum le inruolin ei vuok thung a nih. Ei trongkama ‘khuongruol’ ti khom hi chu thil leia hung pieng a ni ka ring. Hla ngar fuk el le a thluk tritro tak tak khom lengkhawm zaia ei rem pha chu ei hrŭt ruol vong a, sak a hadam zat el a nih. Chu chu ei nun zepui hriltu, thil mawl-mawi tak a nih.
Hmasawnna chi hrang hrang, a thra le a sie hung leng lutin, ei lengkhawm zai hi a hnaw tom pei a. Khawthlang nun taphot kawpi tuma telhelhai lem chun lengkhawm chuh thil thring, thingtlang mimawl thaw danah an ngai chauh ni loin, lengkhawm hla hriet lo le sak thei lo ni chu changkangnaa ngai an hung pung a. Entirnan, Delhi tlanga Delhi Mizo Welfare Association-a lem chu lengkhawma thrang thei le pei thralai an tlawm a, nupui-papui thaw dingah an ngai leiin, kum tam liem taa inthok khan khawvara mithi lengpui a trul chang chu zan dar 11-a inthokin thralai pawlin hun an lak hmak a, Keyboard leh solfa thlukin an nor zankhuo hlak a nih.
Wales rama harna runpui fe peiin a hung fen dok lengkhawm zai le hlahai hi thlarauin kristien hmasahai hmanga ei sumphuka Bethlehem le Kalvari a hung intrumtirna hmangruo a ni leiin a danglam a. Ei khawtlang kalchar le inmila eini zierang puta Pathien hung inlarna a ni leiin, hieng hlahai hi a hung suoka inthoka sawt naw teah eini lai a phakna chin chin chu kristienah ei hung inlet tah suou el a nih.
Ei lengkhawm hlahai hi hang bi chieng inla, Ri Dil kotsuoa inthoka van ram kotsuo thlirna deu vong a ni leiin ei ril le kal pên a rem a, ei so inphu leh an inmil a, ei lunglengna a hnĕm a, ei lawmna a hril a, ei mitthli a hrûk hul a, chatuon pielral a mi’n tem lawktir a, mi chokbuoi hlaktu ramhuoihai a hnot zam a, ei thla a sukmuong a nih.
Hieng khopa ei khawvel don tleitu le van mihai le zai khata min luongtirtu lengkhawm hlahai a hang bo riei riei el ding chu Pathien khomin a dit naw hle ni ding a na, ei hla sak thiem Lalruotmawi hmangin Zoram khawvelah lengkhawm hla a hung sukvul nawk kha a hretu vong ei ni leiin, hang hril sap rak a ngai nawh. Ezekiel rawl hre a, ruom dăpa zâl ru trawl an hung tho ang el khan, Zoram khawvel dung le khangah, ei suotlang hluia la cheng phak, lengkhawm khawvel le inthuk taka inzomna nei, kum 40 le a chung tieng hai chu, Lalruotmawi lengkhawm hla sak ri an hriet chun lawmna mitthli leh an hung tho sung sung a. A mak ti ringota hang hril fie thei ruol chi khom a ni nawh. A hnukhawi tieng, kum 2006 August-November sung USA-a kan nupaa chawl hmanga kan inzin trumin Maryland-ah ni hni sung khaw hrang hrangah Zo hnathlakhai lai rong kan zu bawl tlang nghe nghe a. Ka tupa (fam tah) Rev. Paula Pakhuongte-in Fredericks-ah riekin, duthusama inhnika suong Hmar hme indik tak thretin thlaithleng kan kil tlang a. America khawzawla khom eini rawi ina ei lengna taphota chawl loa Tv-a hla an insaktir chu Lalruotmawi a nih.
Hieng lai khawvel thlirna thu, ‘Zofate khawvel pahnih’ ti chu Shillong Mizo Students annual magazine ‘Hnam Lungphum’ a insuo dingin July 2006 khan ka ziek a. A hnungin website hrang hrangah an hung insuo bok a. A tlangkawmnaa chun: “Eng vang nge Lalruotmawi hi a lăr tak thut le? Amaah Rih Dil le Jordan lui lungrual takin an luang hmun thei tlat alawm! Rih Dil ram ai a awh zo a, Jordan lui ai a awh zo bawk a ni. Zofate chhungril bera tuihalna leh riltramna a dawm a, an lunglenna ril ber a hnĕm a, a hla an ngaihthlakin an dam sawng sawng a. Kalvari par chhuangin mawi tak leh zahawm takin Zo zia leh nun a vulhtir a. Rih Dil tukverh atrangin hringnun piah ram mawi leh thlamuanawm tak chu Zo mitin min entir leh a; Zo bengin min ngaihthlaktir a; lemchanna khawvel atrangin tak ramah min chhuktir a; kristian nih leh Zofa nih kawp nawmzia leh hlutzia a rawn tar lang a ni” tiin ka thluoi a.
Ka nuhmei Dari hi ‘acute dimentia’ leia khumbeta a zalna le naute sen anga sun le zana ka donna hi kum khat pum hlum a ni ta a. A thluokah thil thar a lut thei ta naw a, thil hlui a hriethai khom var hung de zoka a bo nawk daih angin, a hriet suok ruolin a bo nawk nghal a. A dam thrat laia a hla ngainuom chu lengkhawm hla, abikin Lalruotmawi sak a nih. Chuonghai le hla dang dang a ngainuom hlak hai chu ka computer-ah ka download a, ka’n saktir a, a hla dit bikhai chu kan ngaithlak malamin ka sakpui hlak a. Kei khom kum tam hla sak hman ta lo khah ka’n hman hun hunah ka sak nawk a. Chuong kan sak ngun hla iemani zat laia pahni chauh chu a phuoktuhai chanchin tlawmte leh hang ngaithla vak ei tih.
Ka hmaah lui ral khaw mawi chu a awm
(2007 Mizo Kristian Hla Thar Bu No. 327)
Pherzawla Pawl 4 ka’n chuk lai, kum 1951 khan ka ruolpa pakhatin sikulah hi hla hi a thu le thluk a mi hril a, ka zieklobu-ah ka ziek thlak a. Hla thar a thluk ka hriet taphot hi a thu ka baihat hma chun thil dang ka thawsan ngai naw leiin, in ka tlung chun chawr tienga ka riekna pindanah sakin ka baihat tran a. Chuong lai chun sunbu fa dingin an mi hung ko a, thilthaw laklaw ka nei leiin mi lo fasan el dingin ka hril a. Ka baihat zo chun bu an lo fak khop tah leiin ka hla hriet thar chu bu-a ring ka thlang tah lem a. Sienkhom a hlawkzie chu, kum 66 hnung, hi lekha ka ziek lai khom hin Lal Trongtrai ka hril thei ang tluka innalin ka la hril thei a nih. Voi ieng zat hiel am lungril le thlaraua inhoiti em emin ka sak tah hril seng an nawh. Thu le hla thra baihat hi a lo va manhla de aw! Hla lem hi chuh ei baihat pha leh eini-ah a riek nuom chauh a, chu chu ei nunin a mamaw angin thlarauin a sukhring a, ei nun a chawm hlak a nih.
A phuoktu Zumi hi a hming tak chu Chalthrieng, Ruolphung le Suoki hai naunu, Darsun khuoa kum 1899 a pieng, a hnunga Saituola um a nih. Sakhaw mi tak, Kristien thra, mizie thra le ruol pawl thiem tak a na, amiruokchu a nunghak lai khomin a hrisel naw hle a. Perkung leh sawt naw te inneiin an inthre nawk a, nau a lo pai hman a, sienkhom a nau chu ni tam a dam nawh. A nu le pain an thisan inhma leiin a pâ u naupa Vomkhawi sungkuo a bĕl a. Anni kuoma a um lai hin kum 30 mi chauin 1929 khan a boral. (Ref. Mizo Rohlu, Second Edition, 2009 compiled by R. Lalrawna, p. 60)
Zumi hin hla pakhat chauh a phuoka chuh Zoram khawvelah hming hlun a ser pha a nih. Hla trongkam ruoi dêr loin, thu tluong pangngai hmangin, a hmaa khawpui mawi tak, ‘lui ral khaw mawi’, ‘lungduh zawng zawng an kimna hmun’ le ‘lawmna kin tawh lohna’ ti-a a ko chu pana khuolzin a ni thu le chau le chawl loa chu khawpui mawi chu pan ngat ngat dinga ringtuhai a fielna thu chuh a hmatiemin a thu inlawn dak zaiin a hang insam thlak a, a tiema tiem ringot khomin hmulthi indingin sikhlim a puor iei iei thei a nih. Thu a thiem dan hi Hmar tronga hla phuoktu nuhmeihai laia hriet le ngaisang hlaw tak Runchong leh an inzawl khopin ka hriet. Trongkam tuolleng hmangin kumkhaw dai ding rangkachak in mawi le ropui an indin thiem a, Zoram khawvela ei thu le hla sukvultuhai laia mi an nih. Ei hla thlir lai hi lunghlu tlang, Kohinoor hai Kohinoor a ni leiin, a thunon hi insam zing pumin, a thu baihat seng tum ei tiu:
Aw, kal lai kan ni,
I chawl lo vang;
Lalpa chakna ringin,
Khawpui mawi i pan ang.
Aw khawngaihtu Pathianin
(2007 MKHTB No. 195)
Kan nu hla dit laia mi, hla dang ei thlir vuot ding khom hi a phuoktu hla phuok sun, sienkhom ei khawvel rûn zingtu hla hring, Zo hnathlakhaiin khawvel hluoa ei sakhuo ei chel zing sung chun bo ta lo ding a nih. Pathien hmangaina le lunginsietna zara thlarau hringna a mi pek hlutzie le inthukzie hi mihriem mihriemna, hring hrietna le khawvel varna chun sui suok zo ruol a ni nawzie a tlâng insampuina a nih.
Hi hla phuoktu, Kawldingpui naupa Chongkhup hi April 9, 1909-a Sailam khuoa pieng, a unauhai laia a budel, piengtro infuk rak lo, nasêt le dangawk a nih. A hming tluontling chu Lalchongkup a nih. Kum 1914 khan Kristienah a’n pe a. Kum 1917 khan inlarnaah Mizoram um pei dan ding le rorelna inlumlet dan ding chen a hmu a. Pathienah a hung hlim zuol pei ruolin thupuong a hung hau tah pei a. Mi khawsak anga a hung khawsak tak naw leiin an khaw lalin a hriet thiem naw a, sukdudana a tuor nasa hle a. Mi bawm dawa tla nga le ai le changa awk vate dam insuoin, “Zion ram nuam an hawng leh ta an ti e” tiin mi tru banghai a sât thlak a, mi trua mai le maibal an siehai dam chu a’n hlumpek hem hem a. Chuonga a thaw chun insuo zalen taah a ngai a nih. Tirko Paulan thilsiemhai po poin insuo zalena a um hun ding nghaka nau se tuor inrum anga an inrŭm thu a hril kha (Rom 8:18-25) Chongkhupin sukdik a lo tum khom a ni el thei.
A thlarau changin a thruoi dan hi khawvel thuneitutuhaiin an hriet thiem naw leiin lung inah an intangtir ta nghe nghe a nih. Aizawl Jail-a a’n tang lai, 1936 khan ‘Aw khawngaihtu Pathianin’ ti hih a phuok a, a hla phuok sun a nih. Hi hla hi a hringin Zoram khawvela hla thra takhai laia mi a nih. Lungril kim lo thukhawchang a ni nawzie chu a saktu taphotin an hriet ka ring. Ama hi hla ngaina mi, hla sak deuh zing, Pathien thu hrila mani in khom hluo lum hman loa Zoram dung le khang fang kuol hlak a nih. Thlarau mi, rannung le nungcha hrim hrim suknat dit lo a nih. Rûl tûr nei khom kutin a man a, a ringah a or el. Savom hliem khom a peltuhai lakah san hima, a hliemah damdawi nalpeka, tuomtu a nih. Lunglei bul Dawn khuoa a cham lai khomin a tlung in Thangngai hai inah vate dawi tak el, varâlthi hi a hung inlawi lut ve a, chu khuo Chongkhupin a suoksan chun vate khom chu a vuong hmang ve nghal el a nih.
Mizoram buoi (1966) hmaa Mizoram dung le khanga inzinpuitu Upa Hmingthang, Aizawl Electric Venga mi chun, “A nun danglam tak el, Thlarau zara a nei chu khawvel ta dingin hriet thiem ruol a ni naw a, chuleiin chang khatnaah hin ‘Thlarau min pek nunna hi, Khawvel finin a zo lo ve’ a ti a nih” tiin a chanchin la khawmtu R.Lalrawna chun a ziek. MKHB 2007 suoka chun ‘Thlarau min pek lawmna hi’ tiin sie a ni a, sienkhom chu chu a phuoktu phuok dan a ni nawh.
Mihriem ngaia mi invet, Pathien hriet, thlarau chang sang Chongkhup chu June 24, 1990 khan ama hmangaitu Pathien kuomah thlamuong takin a chawl a, Selesih Farm Veng, Durtlangah vui liem a nih. A hla phuok thunon,
Mihring mihrinna hianin,
A ngaihtuah chhuak zo lo va che,
Ka Chhandamtu, i thuruk hi
tia MKHTB-2007 No. 195-a an sie khom hi Isai 19:14 le 1 Kor 1:19 sirsana a phuok a ni leiin ‘Mifing mihrinna hianin’ ti ding lem a ni thu a hril bok. (Ref. MIZO ROHLU, 2009 p.137-138, compile by R.Lalrawna).
Tlangkawmna
Thlarau chang dan inang naw leia roreltuhaiin invet anga an ngai le lung ina an khum hi an tam tah hle ka ring. Johan chun Patmos thlierkara Roman sorkarin an intangtir laia a kuoma Isu inlarna Thupuong hi a ziek a nih. Baibul dottu tluk deuh hiela kristien tam tak ngai Pilgrim’s Progress, Holy War le a dang dang ziektu John Bunyan (1628-88) khom hi a thlarau chang an hriet thiem naw leia Bedford Prison-a an khum a nih. Tirko Paula lekhathon tam tak hi lung ina inthoka a ziek a nih. Kristien hla 61 le hla dang 9 phuoktu R.L.Kamlala khom khah 1931 November laia kawlphe ang ela vara a hmaa Isu a hung inlar a hmu hnung chun a thlarau chang dan kha an hotuhaiin an hriet thiem naw leiin zirtirtu a ninaa inthokin an inchawltir a, lung inah an khum a, a hung suok hnung khomin rongbawlna nei thei lo ding le inzin suok thei lo dingin an khuokhir a nih. Amiruokchu, lung in bang ieng anga sa le hrengthir kol ieng anga rik khom in Thlarau Thienghlim sinthaw chu a dang thei nawh. Chu taka inthoka thu le hla hung puok suok hrim hrim chu dang ruol a ni naw a, a dangtu a rik po leh a puok darh nasa el a nih. Chongkhup hla khom hi chuong ang tho chu a nih.
(August 12, 2017; Delhi)
###
No comments :
Post a Comment