Senvon Diary-1

Delhi-Aizawl
Manipur sim thlanga chanchin thra hung lutna kotsuo, ‘chanchin thra mansapui bangna’ ti hming chawi hiel Senvon khuo panin October 8, 2007 Thawtranni zing dar ngaah Pastor Lalditsak le tlawmngai taka mi trawiawmtu, makpa fel le ringum Hrangthangvung le India khawzawl, mihriem tlukledingawn neka tam laia a sinthawna tienga mi fela kum 2007-a thlang suok le India President meuin chawimawina nopui a’n hlan David Buhril hai leh Delhi-a inthokin vuongnain kan inthok suok a. Zing dar 7-ah Netaji Subhash Chandra Bose Airport, Calcutta (Kolkata) kan tlung a. Darkar nga neka tam erpawtah kan nghak ding a ni leiin Calcutta um ei airhostess suong Lalramthar khom a diuti naw ni a ni leiin a hung nghal a. Kan hang inhmu chun Calcutta khom Delhi ruiin ei hmu tlat chu tie! Bengali nupui inlon lai chun ei President thar nu ang ang hi a um bok a, chu chun a suk-Delhi zuol a.

Calcutta-a inthokin Mizoram khawpui Aizawl, Zoram khawvela ei Jerusalem chu panin chawhnung 1:50-ah kan inthok suok nawk a, dar 3:30 velah Lengpui Airport kan ban ta hram a nih. Darkar thum le a chanve kan vuong sung hin Delhi-Aizawl inkarah hnuoi lama inkhia km 3000 chuong daih kan vuong khum a nih. Kan ban tum Senvon khuo khom km 200 neka tlawma hnai a ni tah. Chu tlungna ding chun ieng chen hiel am a la lâk ding ti ruok chu tu khomin kan hriet nawh.

Duthusam sukpuitlingtu
Keini hi October 12-14, 2007 sunga Senvon-a innghat Hmarram Kristien Thralai Pawl Inkhawmpui Voi Khatna hmang dinga fe kan nih. Hi Inkhawmpui hi kohran pawl bik um loa thralai inkhawmpui Hmar Biela tlung hmasa tak, kohran chanchina mel lung poimaw le inchik tlak chu a nih. Chutaka thu hriltu dingin Delhi tlanga inthokin Pastor Lalditsak le Pi Lal Remsiem an fiel bakah Seminar thruoitu dingin an mi fiel ve a. Seminar thruoi dinga sengso le lawmman iengkim tum inhuoma Mizorama inthoka fielna tam tak ka hnawl laiin, hi inkhawmpuia chanvo an mi pek ruok hi chu Pathien remruot ni ngeia ka hriet leiin mani sum senga fe khom ni sien hnawl ruol loah ka ngai a.

Kha hmaa inthoka lungril ruka duthu ka lo sam hlak chu chanchin thra lutna kotsuo Senvon tlang ngeia kum tam sun le zana kan buoipui tah Hmar tronga Holy Bible (Delhi Version) tlangzar a nih. Sienkhom, Delhi leh a karinkik êm lei le a hran ngata prokram hang buotsai chu thil hautak a ni leiin Pathien kuoma khom ka la hni ngam lo thil a nih. Seminar thruoitu dinga fielna ka hmu chara ka hriet suok hmasa tak chu ka duthusam ruk chu a nih. Iengkim Pathien, lungril ngaituona rûk chen hre fai vongtu chun ka duthusam ruk chu hrein, a kuoma ka hni hmain a sukpuitlingna lampui a lo ruot dèr tah niin ka ngai a, fielna chu ka pom nghal a. Chuongchun, sut dinga Baibul kan rem mek lai chu tlangzar hman ngei dinga kawpi zanga bek inpei hman dingin sun-zan zomin thrang kan lak a, iengkimah Pathien kut a’n lang a, mihriem ngaituonaa hisap phak lo khom a dar bi ruot sa angin a hun thlap thlapah zo le hmu hmanin a um pei a.

Mi tam tak chun Pathien lakah inchikna le thil mak danglam tak beiseiin ei zong hlak a. A lunginsietna zar chaua mi tin ta dinga sandamna kot a mi hongpek bakah chu chatuon hringna chu chang thei ding le a la chang nawhai hrilhmu thei dinga ni tin, darkar tin, minit tin le sekhon tin ei hringna a mi hlapek ringot dam khom hi thilmak chungchuongah kei chun ka ngai a. Chu khela a thruoina kut ei la dong lem lem hi chu thil mak chunga thil mak, lunginsietna ngot, lunginsietna ngot a nih.

Chu thil mak ka tonhriet, ka chunga inlang chu a nih ka hril hi. Ka piengna le seilienna biel, ka lungkham Hmar Ram, mi ngaia hmun tlawm le hmusitum, ka ta ding ruok chun hmun po po laia hmun hlu tak hmu nawk thei ding le Pathienin ka kut tlawm tak hmanga a buotsai Baibul chu a chanchin thra lutna dinga a ruot Senvon tlang ngeia tlangzar thei dinga lampui a hang ruot el chu vangneina chungchuong a ni tâk vei leh, mi trawiawmtu ding mi fel Hrangthangvung le David Buhril a mi pek nawk pei a. Anni pahni hi inkhawmpui buotsaituhai fiel ni loin keima fiel sawng an nih. Kha hmaa inthoka a rama buoina ching fel tuma a kûl a tâia thrang latu an ni bakah mautam leia trampui mitsimin a nang mek, ei mipuihai ngirhmun mit ngeia hmu a, video le thlalaknaa an ngirhmun indik tak rikawt dingin ka dit a. Pathienin an lungrilah sin a thaw a, hung an nuom el khom ni loin an hung dan ding remchang a ruotpek pei a nih. Lalpa chu inpakin um raw se.

Pawl lo pawl
Inkhawmpui kan hmang ding hi kohran pawl hrang hranga ei inthre dar hnunga la um ngai lo, ei chanchina mel lung poimaw tak a nih. Kohran pawl tum tuma ei inthre dar leia ei ram le hnamin a tuor nasatzie hre chiengtu le chu chu imu intuo thra thei lo khopa invoitu mi iemani zat laia pakhat chu Lal Remsiem a nih. Pathien hmaah suol thupha chawi a, ei suol sim a, lungril hmunkhat put a, huong khata inlawi zai ei rêl zet naw chun ei chungah Pathien a lawm naw zing ding niin a hmu a; a lungawi hma khat chun a hremna kut ei ram le hnam chungah a tla zing ding niin a hmu bok a. Chun, kohran pawl hrang hrang thruoituhai kara chadan lien tak inkhang hi hruk bit el thei a ni naw khoma thralaihai lai bek chu thaw thei niin a ngai a. Chu lampui chu zongin hmun hrang hrangah beipui a lo thlak ta a, ra thra a hring pei a. Hi hin a hring suok poimaw tak chu Hmar Biel sunga pawl bik um loa kristien thralaihai luong khawmna, HMARRAM KRISTIEN THRALAI PAWL (HKTP) an indin chu a nih. HKTP hnuoia inkhawmpui an huoihot hmasa tak chu October 12-14 inkara Senvona innghat hi a nih. Trûl a ti tongkhong pha chun Pathienin lungte khom an khektir el hlak a nih.

Calcutta-Aizawl
Kan inzin hun le India hmar sak tienga airawching intran an intuok leiin Calcutta kan zuk tlung chu, ei hla phuoktuin, ‘trap sil lai puon ang bang thei naw ningah’ a ti ang el khan a lo sur thluk thluk el a. Thei ni sien chu, kan inzin sung bek airuo po po chu Sahara thlalera tir hmang daih nuom a um hiel a. Chuong chu lungrila a um lai zingin, naupang chikte kan ni lai khoma kum tina inkhêl loa tlung hlak airuo dam a hun taka a la ching thei zing chu vangneina ropui tak a nih ti ka ngaituo bok a. Airawching laia tapzawl kîl trai a, zeupuok zêu a, titi baraw sep a, thu tin thu tang kan sep lai hun dam le a chîng zo hnunga vadungte kama aiin kuo an suotna vung thar sur el hmu a, a kuoa inthoka ai thau tak tak kan huot dok lai dam kha ngaituona le mitthlaah a hung inlang a. Airawching hi favang le thlasik thretua ngai a ni a. Hi huna hin aihai chu an kuoah thlasik sung po an inkhum a, thralah an hung suok nawk chauh hlak a nih. Dannaranin airuo hi ni thum le ni sari inkar a chîng hlak a, chu sung chun rama sinthawa fe suok thei a ni naw leiin inah an inkhum hlak a. Chuleiin, “Airawching le i hnawmsuok intuok raw se” ti dam chu trongsie inphurna a nih.

Aizawl le Calcutta inkara kan chuongna Air Deccan (DN-565) chu vuongna chin chi a ni leiin khaw siet laia vuongna ding chun phùr a sukum naw hle a. A vuong man tak hi mi pathuma dingin Rs. 1500 a na, sienkhom sie (tax) Rs. 4,425 le Special Services /Transaction fee Rs. 75 an mi lak a, pakhatah Rs. 2000 pei a hung kai dai a. Chu bâkah kg 15 chauh thuomhnaw chawi an phal a, chu chu kan e-ticket ah an ziek si naw a, a chuong po kha a phur man to deuin mi an inchawitir leiin tu khom thuomhnaw chawi rawn deu chun inzinna chi lo top a nih. Keini khom Delhi-Calcutta inkara chawi si loin Calcutta-Aizawl inkarah kan chawi trok a nih. Airhostess Rachel Lalramthar khoma a mi hrilpui ngiela chu an thokna airline a ni naw leiin kg khat khom an mi ngaidam nuom nawh. Kan thuomhnaw chawi kha Baibul a ni hràm a, lung a na nêp chauh lem a nih. Kan hung kir tieng chu Indian Airlines-ah cheng zanga senga tlawm lemin, thuomhnaw a let hni phur thei siin, kan hung tah thung a nih.

Kum sawmli sung hi vuongna deu ngota inzin hlak ka ni ta a. Dannaranin, khawmuol a thrat naw chang khom sawtnawte ei vuong hnungin sûm chung boruok inthieng ei paw a, ei vuong hlak kha a na, tuta trum Calcutta le Aizawl inkara darkar khat le a chenve kan vuong sung ruok chu khuo hmu thei loin sûm kan nêr char char a, kan sùm nèr kha a’n phân hram a, kan biling balang naw mei mei niin ka hriet. India hmar saka vuongnaa inzin hi boruok awng (air pocket) a tam leiin khaw inthienga khom ei insu ut ut châng a um naw thei naw a. Sûm pik kar nawknghala vuong lem chu rawl koa lawn ang a ni leiin piengthar chieng lohai ta ding chun ngaingam taka inthrung a harsa ngot ka ring.

Lengpui erpawt kan tlung chun Aizawl Post neitu C.Lalrambuotsai le Mizo tronga ka lekhabu ziek po po suttu M.C. Lalrinthanga haiin motor pathum hung thruoiin an mi lo hmuok a, kan hlim lai lai hle. Mak ka ti rop hlak chu, ka pieng le murna ram khawpui Imphala ka vuong lut chang le ka pieng le seilienna ni lo Aizawla ka vuong lut changa ka um dan inang naw hi a nih. Imphal lut chu ram dang mi khawpuia lut anga inngaina ka nei tlat a, Aizawl ka lut ruok chun mani inpui chuong kai angin ka’n ngai a, ka thla a ngam êm êm el chu tie! Chu danglamna chu a nih pawlitiks rilmu ei ti vet hi. Lungrila ta anga ei hau ngam ram ei mihai chengna le inlalna ram le ei bèl ngam tak tak hnam chu thisena ei inzompui hnam an ni tei hlak. Chu thu mawl tak chu vate le ran lung mawl chen khomin an hriet a nih.

Kan rengin ka tlungna Lala Khobung in hnuoia ka riekna ding Circuit House-a VVIP Room-a chun kan lut phot a. Kan tlung an hriet charin chanchinbu mihaiin intarviu dingin an mi hung pan nghal a, ka buoi tah char char a. Kan zo chun Pastor Lalditsak chu a tlungna ding Lal Remsiem in tieng an thruoi a, Buotsaiin an in tieng Vunga le David Buhril a hawn phei a, kei khom ka tlungna tieng zanbu inhnik tak kil dingin a intekpa leh kan kai tung ve tah a nih.

(Delhi, October 20, 2007)