Lekhabu Huoisen Tak

The Bible is no mere book, but a Living Creature,
with a power that conquers all that oppose it.
- Napoleon Bonaparte

1992 kum bula muol lo liem tah ka ruolpa Prof. Siamkima Khawlhring chun a lekhabu ZALENNA RAM ah Baibul hi khawvela lekhabu huoisen tak a nizie thu a ziek a. Hi hi thudik muhlum a nih. A huoisen tak chauh khom ni loin huvang nei tak, thilthawthei tak a ni bok. Hi lekhabu thu le inzom thu chuongna lekhabu le thu ziek hrim hrim raw hmang vong ding ni inla, khawvela laibrari po po deuthaw hi ruok deu huoi a tih. Hi lekhabu le inzoma hrietna, thiemna le kong hrang hranga hmasawnna po po hi bo vong tah sien, khawvel hi kum za tam tak hnung kir a ta, selfa hnamah inchang nawk mei ei tih. Dannaranin, a hun laia lekhabu thraa hril thang khom hi sut a nia inthoka kum sawmnga hnunga tiem hlaw chu tlawmte chauh a ni hlak. Kum za hnunga tiem hlaw lekhabu lem chu a tlawm zuol. Baibul ruok chu kum 1500 vel sunga mi hrang hrang ziek lak khawm ni sien khom lekhabu hlawm khat, pat hlum ni sien, zai inzom vong a ni tlat lei hin Tirko Paula chun, “Pathien inthuok khum” a ni thu a ziek a ( 2 Tim 3:16). Isu zirtir laia ri se tak le phok tak Peter khomin chu chu mihriemin Thlarau Thienghlim thruoia Pathiena inthoka suok an puong a ni thu a ziek bok a nih (2 Pet 1 :20-21). Chuleiin, an sut rawn deu deu a, tiem a hlaw deu deu bok.

Baibul hi, Thuthlung Hlui tawp tienga Aramik tronga ziek tlawmte a lo inther sa ti lo chu, Hebrai trong le Grik tronga ziek a nih. Thuthlung Hlui tieng po hi Pathienin a thuthlung hlen suokna dinga hmangruoa a thlang Abraham le a thlahai trong hmang, a hnunga ‘Hebrai trong’ tia hrieta ziek a nih. Anni tak ruok chun ‘Hebrai mi’ ti hi hnam hmingah hmang ngai awm nawh; hnam dangin an hmusit kona ni lemin a’n lang. Tu laia Israel State khom hin ‘Hebrai trong’ ti hi a pom a, ‘Hebrai mi’ ti ruok hi chu hnam hmingah a pom nawh. Hi trong hi Eufretis le Tigris vadungpui inkar le a se vela chenghai trong hmang Aramik leh trong inhnai tak a nih. Babulon sala Israelhai intang hung suok khan Hebrai trong nekin Aramik trong an hmang tlanglawn tah lem a, Isu hun laia an trong hmang khom Hebrai trong ni loin Aramik trong a nih. Tuta an Hebrai trong hmang, ‘Modern Hebrew’ hi Hebrai trong hlui leh inzula kum 1900 hnunga trong thar hung pieng a nih.

Hi thu hi eini tonhriet le inzomin hang hril sap met ei tih. Tuta ‘Hmar trong’ ei ti tak khom hi Hmar pahnam hrang hrang trong le Dulien/Lusei trong inchekpola inthoka kum 1700 hnunga trong thar hung pieng, thlang tla hmasahaiin ‘Khawsak trong’ an ti, kristien sakhuo a hung lut hnunga Hmar pahnam trong hrangin trong tlanglawna an hmang thei dinga trong hung tral thut a nih. Chu ‘Khawsak trong’ chun unau suopui, a hlawma inkona tlanglawn nei loa pahnam hrang hranga inko hlakhai chu hnam khatah hui khawmin, an renga inkona dingin ‘HMAR’ ti hnam hming hi a hung hring suok bok a nih. Chuong zawnga sui chun, ‘Hmar hnam’ le ‘Hmar trong’ ei ti hi Baibul kalchawina dinga a lampui lo sat lawk tia hril thei a nih. Chuong anga Zo hnathlakhai laia trong tlanglawna hmang dinga chanchin thrain a lo duong lawk chu Dulien trong hi a nih. Dulien trongin Lusei trong a hring a, Lusei trongin Mizo trong.

Chu thu le inzoma ei hril nuom tak chu lekhabu huoisen thilthawthei dan a nih. Hi lekhabu hi, Prof. Siamkima ti dan takah, chechang loa um trok trok thei lo a ni a, do nei zing ngirhmunah a ngir a, a va nèkhai chu chungdelh a tum ngei ngei a, an do nasat po leh a puok dar nasa el a nih. A khingpui Koran hai, Gita hai le sakhuo lekhabu dang danghai chu chet hmasa tum loa inveng ringot angin an um thung a nih. Hi lekhabu ropui bok hi Rom sorkar ropui tak le an lal Constantine chopa hnetu a ni a, Rom sorkar hmang hin British-hai khom a thu hnuoiah a lo sie bok a nih. British thlierkar chikte, tu hriet hlaw mang lo chu a thilthawtheinain a vawr tung a, hun sawt nawte sungin ram ropui le thilthawtheiin a’n din suok a, hnuoi hmun thuma threa hmun hni zet a thu hnuoiah ramperin (colony) a siem a, an ram lakna taphotah an hnam puonzar (flag) zuiin Baibul a lut a, chu chun an trong khom kum zahni vel sung chauin khawvela trong inlâr tak le hmang tlanglawn takin a vor kai dot el a nih. Voisun hin Saptrong thrangna taphot lekhabu le thil ziek po po lak hmang vong ding ti thu um sien, khawvel hi mutpuom inthla thêp ang ning a ta, thil siemna khawl ropui po po deuthaw chawl a ta, khawvel hi chechang loin êk che inthrung ringot a tih.

Khawvela hnam var hmasa le literechar tienga hmathruoituhai chu Grik mi an nih. Anni hi thu le hlaa khawthlang mihai chàk lakna tak an nih. Chu trong chu Thuthlung Thar ziekna trong a nih. Chu zoa Baibul an hung inletna trong chu khawvel histawria lalram ngir sawt tak Rom lalram trong hmang Latin a nih. Jerusalema inthokin hi lekhabu huoisen hin Rom-ah a hmunpui a son a, Rom lalram cho dolin a thu hnuoiah a sie a. Iemani chen hnungah Grik trong hmang pawl le Latin trong hmang pawlin an hung inthre dar a. Grik trong hmang pawlhai hmunpui dingin Kumpinu Constantine chun Turkey rama an khawpui chu a hmang a, ama hming chawiin, Constantinople tiin hming thar a phuok a, chu chu tuta Istanbul ei ti hi a nih. Hi khawsak tienga Rom lalram hi a nih Byzantine Empire an ti, Eastern Roman Empire tia an ko bok chuh. Thlang tieng Western Roman Empire chun Rom khawpui chu hmunpuiah a hmang zing a, a hnungah Roman Catholic hmunpui hung niin, tu chen hin a hung ni zui tah pei a nih.

Rom lalram tluk hnungin lekhabu huoisen chun hmunpuiah London a hung hmang a. Chu chu hmanga khawvel hmun tin a rùn hnungin a mi hmanghaiin anni varna le theina sawnin damten lekhabu huoisen chu an hung hnawl tran a. Tu cho ruol loa inngaia an insan puom leiin Indopui I & 2 an tuok a, hnèna an changa chu an inkhawngda dèr a, an ramper po po an chàn a, a tawpah thlierkar chikte bok kha an chang nawk trawk a nih. Sienkhom, lekhabu huoisen puong darna an trong ruok chun ni tinin lien tieng a pan deu deu pei a nih. Khawvela trong pakhat hmanga Baibul an inlet rawnna tak chu Saptrong (English) a ni a, English version hrang hrang 150 chuong a suok tah a nih.

Chuonga London a lo chau hnung chun lekhabu huoisen chun a hmunpui USA-ah a son dai a, chu taka chun hmunpui a la khuor zing a nih. Amiruokchu, mihaiin damtea an hnawl ruolin lekhabu huoisen khomin a thilthawtheina chu a hnawltuhai laka inthokin damten a kei kir ve a, an hnawl thlak pha leh a hnawl thlak ve el a nih. Chu ngirhmuna chun Amerika hi a ngir mek a, a hnawl hrat dan ruolin hnawlin a um hret hret pei a, a ropuina khom a kum têlin a tla hnuoi a, sienkhom khawvela sorkar hrat tak chu a la ni zing. Tuta an inthrang anga an fe tung pei chun kum sawmhni velah China-in USA hnot phak a ta, India khomin kum sawmthum velah a hnot khèl ding niin mi thiemhai chun an ring. Chu pha chun lekhabu huoisen hin a hmunpui Delhi tlangah son naw nih ti thei a ni nawh.

Nang le keiin ei hriet ding le inchik tlak chu hi hi a nih: hi lekhabu huoisen hin a chawimawitu chu chawimawiin a dom sang a, a hnawltu chu a hnawl ve el a nih. Hi lekhabu huoisen, a um ti ei hriet ngai der lo chun kum zabi sawmpakuona hnukhawi tieng khan, ei chengna ram kilkhawr a hung tlung ve hlol el a. A hung hawntuhai chu Grik le Roman literechara inthoka varna lo inchuk tah, English pachal Savidge le Lorrain an nih. An lekhabu huoisen chu innghatnaa hmangin, A AW B mi siempekin, ziek hmanga ei literechar bul an mi hung tranpui a. Chuongchun, thu le hlaa inril Hebrai, Grik le Roman hai literechar zungpui chu ei lo zom ve tah a nih. Chu bul chu sirsana hmanga Thangngurin thu le hla a phu suokhai dam hi hang bi chieng inla, thingtlangpa thluok le ngaituonain a hawl phak lo rama tla, inril le inthuk, mawi le thlum, rangkachak le lunghlu tlang vong a nih. Chîk nawkzuola ei bi chun, ‘Hmar trong’ ei ti tak bulthrut ei rem tranna khom hi niin a’n lang bakah hi sula inthok hin ‘Hmar hnam’ ei ti khom hi a pieng niin a’n lang. Ei ngirhmun lo pal tahai lungnona thrang loa fîm taka ei bi pha leh hieng lai thlalak hi hmu fie tak tak thei chauh niin ka hriet.

Hi lekhabu huoisen hin lekhabu dang chu inngeipui a nei thei hrim hrim nawh. Hi lekhabu hi a nih, “Kei hi lampui le thutak le hringna chu ka nih; keimaa fe naw chu tu khom Pa kuom an tlung ngai nawh” (Joh 14:6) ti ngam ngat chu! Chuleiin, a hung tlung phata inthokin ei khawvela thu le hla lo tro le inthranglien tah hai chu a’n ngeipui naw nghal a, suotthlak tumin thrang a khaw nghal a nih. Prof. Siamkima hril dan bokin, lam lailung ngat naw chu a hraw nuom naw a, ei rama thil tro, thu le hla lo um ta sahai chun an ngam naw a, lampui inkiena lam sir inchuin an kat rok rok a, pung chu hril lo, ngai khom an aw hlei thei naw a, a thu hnuoiah inchêp tak le thawpik takin an um ta lem a nih. Chuong hun laia a rîl rem zawng taka ei kalchar le thu le hla zieranga inthuom a, sungpui chan chang dinga mawi taka lo chei thiemtu Thangngur le mi hrang hrang ei lo nei kha ei vangnei hle a nih.

Hi lekhabu huoisen hin a dong thiemtu taphot thu le hla le kalchar a ching châu hrep tah ze mawi chi hrang hrang tho chu an literechar thar cheimawinaa hmang nawkin, inphalamna nei dêr loin, tu mitmei khom vêng loin a chawi sang el a nih. Tu laia Western literature khom hi chuong ang vong chu a nih. Hi lekhabu an tiem tam nawna ram taphot chu literechar tieng an inhnuoi ti inla, ei hril suol ka ring nawh. Buddhism le Muslim sakhuo biekna ramah literechar ropui a suok der nawh. India ram thlir inla, Mahabharata le Ramayana hai hin literachar sukhausa zawngin sin an thaw nawh. Tu laia India ramin literechar-a hma a hung sawnna khom hi Grik le Roman literechar lo inchuk tah, lekhabu huoisena inthoka varna lo dong tah English mihai kuoma inthok boka an rochung a nih. Rangoon-a ka um laiin Zo hnathlakhai laia mani hnam tronga Baibul tiem le sung inkhawm nei hlakhai le chuong thil chu thaw ngai lo sungkuo ka khaikhin a, a hmasa hi hnam le sakhuoah an nghet a, a nuhnung pawl hi chu bo dawbola bo, an lungril le hoiher iengkim Kawl mizie put an ni tlangpui. Mani tronga Baibul tiem hlak hi hnam damna dinga bulthrut poimaw a lo ni takzet.

Chu chu a ni lai zingin ei bi chieng ngai thil a um. Chu lekhabu huoisen, Lusei tronga inthoka eini tronga ei inlet chu a thren kum 1946 laia inthokin, a rêngin kum 1968-a inthokin ei hmang tran ve a, nasa takin ei trangkaipui a, taksa le thlarauah malsawmna ei dong rawn hle. Amiruokchu, hla tienga bulthrut indik mi tranpuitu Thangngur le a zawlpuihai hniekhnung zuia hma ei sawn pei laiin, thu tieng hma ei sawn hrat thei dèr nawna san le ei trong ziek ei thiem naw deu deu amanih ti dinga a um el hi a san bi chieng a ngaiin ka hriet. Kum tam ka sui hnunga a san bul, a kaikuongpa nia ka hmu chu thil dang ni loin Baibul inletnaa trong indik lo ei hmangin a mi thruoi suol lei a ni tak. Ei lo hmang suol sawt tah leiin a mi thruoi suol a nih ti ngaituo nachang khom ei hriet ta naw a, a suolna lai lai kha thlarau tuihang pai rawnah ei ngai el tah khom a hoi. Chu chun ei Pathien thu thlirna mit khom hi a tlawm takah 45 dikri velin a sukkal niin a’n lang bok. Hi mit inkalna hi siem thrat ding chun kum tam ngai a tih. Chu thil chu invoiin Delhi Version Baibul hin hma a lak tran a, lekhabu huoisen tak a nina zie le rong put ve phak, trong hmang dan indik ei hung inchuk theina lekhabu a ni ngei beiseia buotsai a nih.

(Delhi, April 26, 2008)