Lêngtrûl Tlànsie

“Tu hin ka naupa, ka hril ang hin thaw rawh: inrang takin
ka trapa Laban kuom tieng Haran-ah tlan hmang rawh.”
-Rachel (Gen 27:43)

Baibula hin naupa tlân hmang tekhinthu le naupa tlânsie chanchin a um a. A changtuhai hi unau pahni laia a naupang lem ve ve an nih. Pakhat chu tekhin thu a ni a, Luka 15-ah ei hmu a; pakhat chanchin ruok chu Mosie ziek Genesis 28/29-ah a chuong. A hmasa hin a pa ina inthoka a rochan po po chawiin, hlimhlopna buzawla nuom tawka a zalenna chèn dingin a suok dok a, sawt naw teah a’n khawngda dèr a, insîra simin a pa inah a hung kir nawk a, a pain ropui takin a lo lawm lut nawk a nih. Insîr le sima hung kìrhai chu ieng lai khomin Pathienin a ngaidam hlakzie le inpui nghaktuhai ruok chun lawm lut neka thîka an lo er lem hlakzie entirna dinga Isu tekhin thu hril a nih.

A pahnina pa ruok hi chu tekhin thu ni loin chanchin tak tak a nih. Dawha hmanga a u rochan po po a lakpek hnungin a u lungsenin that a tum a, sa himna zongin a puhai ram tieng, kea inzin chun a sawt naw tawpah kar hni lam, kilometer 700-a hlaah a tlansie a nih. Hi tlangval tlansepa hming hi Jakob a nih. A hming umzie chu kekhong cheltu, mi hluolàntu, khêl hmanga mi thil nei lapektu tina a nih. A hung pieng chun a phîrpui, a u Esau kekhong chela hung suok a ni bakah a hnungin a u upatna le a rochan a lakpek leia a hming khom hi put ni mei a tih. Sula an um lai khoma anni unau hi insekhêk zing an ni ang bokin an hung seilien hnung khomin a naupang lem hin a nu leh inthuruolin a u hi a sop hnê hle a, dawha rolin a rochan po po khom a lakpek vong a nih. Inphîr, chi mal inphel, iengkim deuthawa inang èm ém ding ni si, hieng lawma mizie inang loa an um el hi ngaituo tham tak chu a nih. Suol le thra indona inentirna dingin an hmang hiel hrim a nih. An thlahai chen khom kum sangthum sung hin inchemhâr an la ma nawh.

Esau chun kum sawmli a niin nuhmei pahnih, Kanan (Hit) mi ve ve a nei a, chuong mohai chu a nu le pa Rebek le Isak suklungzingtu an nih. Chu hnung chun a nu le pahai suklawm tumin Ismail naunu Mahalat (Bashemot an ti bok) khom a nei sa bok a. Jakob ruok chu a nu le pain Kanan mi nuhmeia a nei an remti naw lei ni ngei ding a na, kum 77 a ni chen khomin a la lengtrûl tah zing el! A u Esauin that a tum chu remchanga lain, a pu Laban kuom tieng Haran-ah fe a, a naunuhai laia mi nuhmeia hang nei dingin an tir tah a nih. A fe hnunga a nu le pain an ngaisak zui thu hrim hrim ziek lang a ni ta der naw hi thil chîk mihai makti tawp lo a nih. Chu bung le chang chu a ziektuin a ziek san le inzoma poimaw a ti naw leia a hmaiah ngai inla, a hadam tak ka ring.

A châng chun nun hin a letlinga inher hun a nei leiin hriet thiem a harsa hle hlak. Pathienin Abraham chu ram a la pek ding tieng pan dingin Ur khuoa inthokin a thruoi suok a. Ur chu Mesopotamia/Babulon ram chuonhnuoi, tu laia Irak ram, Eufretis vadungin Persian Gulf a zuk fin hmaa vadungpui kama um, khawpui ropui tak a nih. Ur-a inthok hin Mesopotamia chuonchung Padan-Aram an tia khaw poimaw pakhat Haran-ah an sungkuoin an inpèm phot a. A pa Tera thi hnungin Abraham chun a nuhmei Sari le a tupa Lota thruoiin Pathienin ram a pek ding tieng panin Haran khuo a suoksan a. Hi hnung hin a suoksan tah Padan-Aram tieng kir nawk a tum ta naw hrim hrim bakah an ram tienga a laibunghai laia a naupa Isak nuhmei ding zong dinga a siehlaw laia lû tak a tir trum khom khan, “ka naupa chu chu taka chun i thruoi kir ding a ni nawh” (Gen.24:1-9) tiin thu a’n khàmtir hiel a nih.

Chuong khopa a laibunghai kuom tieng kir ta lo dinga Abrahamin ama le a naupa Isak a ti si chun, ieng leia Isakin a pa ti naw zawng tak thaw a, a naupa Jakob, rohluotu ding ni ta si chu a puhai khuo Haran tieng a tir tlat am ning a ta? Hi zawna hi zawna poimaw tak ni ngei a tih. Chu chu hriet fie lo chun Pathien remruot dan inthukzie man chieng thei a ni nawh. Chik taka thil inher pei dan ei bi chun, a u lungsen chu a san bulpui tak ni loin a san dang poimaw lem sapsatu ni lemin a’n lang. Eden hluia chêng Adam hmasaa inthoka Eden thara hlangkai Adam nuhnung hung suokna dinga histawri kalchawi dan ei bi chun, Pathienin a thil tum hlenna dinga a relh tluong hrui inzam a um a, chu chu siktan tumin Setanin nasa takin thrang a lak hlak a. Chu tluong hrui chu suiin hang inzin vak ei tih.

Pathien thil tum tak laia pakhat chu ama angpuia siem mihriem khawvel le a nun rama a lalram indin a nih. Chu chu Lal Biekna ei hril zata “I ram hung tlung raw se” ei ti hlak hi a nih. Bawsietna leia mihriem ta dinga Eden-a a ram indinpek a tluk siet hnung chun Pathienin hnuoiah a lawm zawng mi a zong a. Sienkhom a mihriem siemhai chun suol tieng an awn deu deu leiin tui letin a hrem a, Nova le a sunghai chauh chu mihriem dam khawsuok um sun an nih. Chuong khopa nasa chun hrem tawl sien khom sawt nawteah a pangngai bokin an hung um nawk el. A tawpah, mihriem ta dinga sandamna lampui a buotsai chu hlen suoka a um theina dinga hmangruoa hmang dingin Ur khuoa mi pakhat Abram chu a ko suok a, ram pek a tiem Kanan ramah a thruoi lut a. Fiena rik tak tak a tawn tlang hnung chun Pathienin, “Ka thu i awi leiin, i thlahai hmangin hnuoia hnam tinin malsawmna la chang an tih” tiin a kuomah thu a thlung a, a hming khom ‘Abraham’ tiin a thlakpek a nih. Hi chânga malsawmna hnar hong theina chabi chu ‘thu awina’ a nih. A thu ringa a taka zawmna a nih. Chu chu Isu Krista nuna a laimu a nih. Ringna hi thilthaw thrang lo chun thil thi a nih. Ringna hi thu zawmna thrang lo chun umzie bo a nih. Chu thil pahni inkop tlat chu hmanga Pathienin a thuthlung a sukpuitling dan inziekna chu Baibul ei ti a nih.

Chu thuthlung sukpuitlingna dinga Pathienin mi a hmanghai le a thlanghai chanchin ei bi chun mihriem remruotna a hmang kher nawh ti a chieng khop el. Sari remruotna ang chun nau lutir, rohluotu ding chu Hagar naupa Ismail a nih. Sienkhom, Pathien ruok chun thaipui Sari nau nei sun Isak, thuthlung nau ngei chu thlatu zungzam suinaa hmang dingin a ruot lem tlat a nih. Isak nauhai pahnih- Esau le Jakob- chu inphîr an ni a, Esau chu pieng hmasa a ni leiin nau lutir nina changtu a nih. Amiruokchu, sula an um laia hril lawk a ni angin, Esau-in a nau lutir nina chu bu thlèng khatin a zor a, a naupang lemin rohluotu nina a hung chang a. Chu chauh chu ni loin, Esau chu upa lem a nina leia a pain malsawmna vur a tum po po khom a sangpain dawha hmangin a huipek vong a, Jakob chu thlatu zungzam cheltu a hung ni ta dai a nih. Hi lei hin a nu le pa chun an sung le kuo, an chi lakna hnàra mi ngei naw chu nuhmeia a nei an remti naw a nih. Ama khoma an thu a lo zawm bok leiin a u Esauin kum sawmli a nia Kanan nunghak nuhmeia a nei tawl hnung kum 37 khom chun mi tilre ang elin a la lêngtrûl tah zing a nih. Esau angin Jakob khomin a nu le pa thu zawm loin Kanan nunghak nei hrût ve el sien chu chanchin thra kalchawi tawk buoi nasa hleng a tih. Chu chu Pathienin a remti nawh.

Chuleiin, Abrahamin a laibunghai umna ram Padan-Aram (Mesopotamia chuongchung) tieng a naupa Isak kir a phal dèr naw laiin, Isak ruok chun a letlingin a naupa Jakob chu thai la dingin a tir thung a nih. Thuthlung sukpuitlingtu ding chi zungzam ziding cheltu a ni leiin a nuhmei nei ding thuah an dit fìr èm ém a lo nih. Haran pana Beer Shebaa inthoka a suok nia zana a riek hmasakna tak Bethela chun Pathienin, “Kei hi LALPA, i pu Abraham le i pa Isak Pathien chu ka nih. Nang le i thlahai kutah i zalna ram hi pêng ka ti che a, i thlahai chu hnuoia pilvut anga tam la nîng an ta, sim le hmar, sak le thlangah la um dar an tih. Nang le i thlahai hmangin hnam tin malsawmin la um an tih. I kuomah ka um a, i fèna taphotah vêng zing ka ti che a, hi rama hin thruoi kîr nawk ka ti che. Ka thu tiemhai hi ka hlen hmâ khat chun thlathlam naw ning che” tiin a mangah thu nghet takin a thlung nghal a nih.

Pathienin Abraham, Isak le Jakob kuomah thu thlunga mal a sawm tawl zata a hril sa tei chu an thlahai hmanga hnam tin malsawma an la um ding thu a nih. Chu thu laimu chu anni zungzama inthoka mihriemhai sandamtu la hung ding, thu chu taksaa a la hung inchang ding thu, chu zara hnam tin malsawma an la um dingzie, Kalvari-a intlanna mak la hung tlung ding thuruk chu a nih. Chu chu lêngtrûl tlansie, a la hmu ngai lo ram pana kar hni top la’n zin ngat ngat ta ding chun thlamuongum hle sien khom a umzie inthuk lem ruok chu a la hriet tlawm hle ring a um. Sienkhom a hriet sun le phak chinah a lawm a, a chieng a, chu hmun hminga chun ‘Bethel’ a’n bûk hiel hrim a nih. A nu le pa thu a zawm kha Pathien thu zawm a lo ni zing. Chu thu zawmnaa kuonga chun chatuon malsawmna tui a luong lut huou huou hlak a nih.

Jakob chun a tum ram chu a tlung tah ngei a, a pu Laban leh an putuin an inhron tran a. A pu naunu pahnina Rachel chu a ngaizawng leiin nuhmeia nei dingin kum sari a pu sin a thawpek a. An innei hun a tlung chun nasa takin an lawm a, sienkhom zana chun a puin Rachel ni loin a u Leah chu a pek lem dai si. Jakobin a pa a hlèm trum khan a u leh an rawl inang naw sien khom a pain kèl hmula tuom a kut a hang tuoi a, Esau thuom a hak leia a rima inthoka Esau rim a put tlat leiin, a pa chun Esau sawnin mal a sawm a ni khah. Chuong ang bokin thimthamah Jakob-in Leah rawl a hang hriet khan Rachel rawl ang naw sien khom, a pang a hang tuoi khan Rachel pang, a rim a hang inhnam khan Rachel rim a sawn ni ngei ding a na, ngaingam taka rong ropui bawlpuiin, thang a lo suopui a nih. Hlèmtu chu hlèmin a um ve a, ama châng kam chara chun a awk ve tah a nih.

Zing khuo a hung vara leh, kum 84 khoma la ‘varzin’ ni ding Jakob-in a pu thilthaw a hang hriet suok zet chun an putu an insuosal ngiel a, sienkhom a sawt ta nawh. A pu chun an hnam dan suonlam thra tak a nei. Chu chu a upa lemin pasal a nei hmaa a naupang lem inneitir a thieng naw thu a nih. Kum sari dang a rong a bawlpek nawk ding chun Rachel khom chu a nuhmei dingin kar khat hnungah pek a nuom thu a hril nghal a. Chuong ang chun, an putuin an inchalrem a, kar khat hnungah Jakob chun Rachel khom chu a nei a, a ruol deuthawin unau a nei kop tah a nih. A nuhmeihaiin an rongbawltu nunghak ve ve hmeia nei dinga an pek hnung lem chun nuhmei pali zet a kuol tah a nih. Upa Ngama anga hla phuok thiem ni ve sien chu,

Ka hun sei lem ka hmang zo hnu’n,
Hun ler tieng hin par ang i hung vul chu
a ti ve ngei ring a um.

Hi inneina hin zawna tam tak a cho suok a. Chuong laia pakhat chu: Nuhmei pakhat neka tam nei hi Pathien remti zawng a ni? ti hi a nih. A tira Eden huona Pathien remruot chu pasal ama chaua um thra a ti naw leia a koppui nuhmei siempek le anni chu taksa pum khata insiem a nih. Chu remruotna chu bawsietna leiin a tlol a, chu hnung chun hmun tinah mani nuom dan le remchang dan seng zuiin an hung khawsa tah a nih. Thuthlung Hluia hming inlang phak mi sawmli chu nuhmei pakhat neka tam nei an nih. Chuonghai laia a zuolkai tak chu nuhmei 700 le hmei 300 nei Solomon kha a nih. Thuthlung Thar huna nuhmei pakhat neka tam nei lo dinga tihai chu kohran thruoitu le upahai an nih. Hnam tinin inneina chungthua ei zui tak chu hnam dan a nih. Pathien remruot dan hmasa tak ruok chu nuhmei pakhat nei a nih. Mihriemin hma ei hung sawn pei ruolin nuhmei pakhat chauh nei hi ching dan takah ei hung nei pei a nih.

Ei thu tluong hrui zuiin inzin nawk pei inla. Jakob remruot chu Rachel hlaw dinga kum sari a pu rongbawl a nih. Sienkhom, thil hung inher dana inthoka ei inkhi chun, Rachel laka Jakob lunginnona le a remruot dan kha Pathien remruot dan a ni chuong kher nawh ti chieng takin ei hmuh. An hnam dan indik taka zui a, a upa lem a thaipuia sie chu Pathien prokram a lo ni lem tlat a nih. Chu thaipui, Jakob duot hlaw lo, sienkhom Pathien ngaisak hlaw sia inthok chun Israel hnam 12 laia hnam ruk zet an hung suok a. Jakobin a thi hmaa a nauhai mal a sawm khan Leah le an nau palina Juda chungthu chu hieng ang hin a hril a nih:

Lal hmol chu Juda laka inthokin,
Lak hmang ni ngai naw ni a;
A neitu tak a hung inlang phaa,
Hnam tinin a thu an awi chenin,
Juda ke kara rorelna hmol chu,
Lak hmang ni tah ngai naw nih (Gen 49 :10).

Chu chun ei na rilah ieng dar am a vuok ri a? Chu chu a nih a poimaw. Genesis 29:35 ei tlung hin THU chu mihriem taksa puta a hung inchangna dinga a chi lam (genetic trait) hrawna ding Juda chu a hung inlang tah a nih. Ama chu thaipui Leah sula inthoka hung pieng a nih. Thlarau mitin a nina la hung chel pei ding poimawzie le ropuizie chu a pa Jakob-in chieng èm éma a hmu leiin a chunga ei tar lang tah malsawmna thu hi a lo insam a nih. Chu el bakah,

Juda, nang chu i unauhaiin,
Inpâk hlak an ti che;
I kut chun i hmèlmahai rìngah,
Inrêktir hlak a ti che a,
I pa nauhai po po chu,
I hmaah hung kùn an tih (49:8)

tiin a hril bok a nih. A ti ang hrimin, Israel hnam sawmpahnihai chu damten an riral pei a, a tawpah an rênga inkona hming tlanglawnah ‘Juda hnam’ (Jews) ti chu an hung hmang a, an sakhuo chen khom ‘Juda sakhuo’ (Judaism) ti a hung ni ta pei a nih. Chu zungzama inthok chun Isu Krista khom a hung pieng a nih. Judahai ruok chun an Messia a hung pha leh lal hmol chu a la hung vilik ding niin an ring a, a hung hun ding beisei takin an la Tlumte thlir zing a nih. Kristienhai ruok chun chu thil chu Isu Kristaah hlenin a hung um a, a fainal ruok chu a hung nawk phaa khèl ding niin an ngai. Hmangai Johan chun, “Lekhabu ziel chu a hong a, a sûng en thei tu khom an um naw leiin ka trap ka trap a. Upa laia pakhat chun, “Trap naw rawh, ngai ta, Juda hnama sakeibaknei, Davida Trobul khan inchikna suoi pasari chu a hong a, lekhabu ziel chu sût dingin a hnè tah” (Thupuong 5:3-5) tiin a ziek.

Chu Juda hnama sakeibaknei a ti chu Isu Krista a nih. Chu chu a nih Genesis le Thupuong inzomna leilak chuh. Chu inzomna, chanchin thra tluong hrui chu Genesis-a intran a ni leiin, Genesis hre chieng loin Baibula thu tam tak hi hriet chieng thei a ni nawh. Samphuola tiem liemtu ta ding chun Genesis-a thu tam tak hi thu invetthlak le umzie bo a nih. A hmu futu ta ding ruok chun chatuon thuruk puonglangna, lunghluhai lunghlu a ni thung. Paulan, “Kraws thu chu bohmang mekhai ta ding chun thu invetthlak a na, eini sandama um mekhai ta ding ruok chun Pathien thilthawtheina a nih” (1 Kor 1:18) a lo ti hrim a nih.

(April 4, 2008 Delhi)