the man who says it can't be done is generally interrupted
by someone doing it. - Elbert Hubbard
Kum 2013 November khan kâr hni sung ka naupa James Lalropui kanin New York-ah ka zu’n zin a. Kâr a hla hlea chu ke lâwnga inzin ni ta lo mê chuh, Delhi-a inthoka zing dâr khata suok kha hriet mang naw kâr, bu voi thum kan fak hnungin, chawhma dar 11-ah New York ka tlung a. Pherzawla inthoka bawmrang phur a, ke puor nenga ni thum pum hlum lawn ngat ngat hnunga Tuithraphai kan ban chauh hun lai anga hniek tiema inzin chu ni lang, thla ieng zat top am a lâk ding chu aw? Keini dam sung ngei khoma thiemna insang peiin hun le hmun kar hlatzie a kei tom nasat dan hi hrilin a siek nawh. Delhi le Imphal inkar khom darkar thum chauha hla a lo ni tah.
Americaa ka cham sunga ka ngaituona hluotu pakhat chu mihriem seng seng ngirhmun inkâr hang inhlatzie hi a nih. Thilsiem danghai chu a neitu le enkoltu zirin an ngirhmun danglam thei sien khom, anni huong le tlatna pangngaiah sie inla, an nina phung angin an hung khawsa nawk el. Pathien angpuia siem ni si mihriem le mihriem hmasawnna le khawsakna inkâr ruok chu hnuoi le van inkâr angin a zâu thei a, a zâu hrim bok a nih. Zing le zana ding suongsam ngirhmuna um, meichok ena inthrung el maktaduoi tam ei um laiin, kum 2014-a khawvela hausa taka Forbes Magazine hril Bill Gates chun dollar tlukledingawn (tld) 76 chuong a nei. Darkar tin cheng maktaduoi (mtd) 2.5 hmang ta sien, a hmang zona dingin kum 222 chuong a ngai. D.M. College-a kan kai lai, pocket money umzie khom kan la hriet hma, khawlai kan leng changa seki kan fun lum tut phot chun kan ngai a ngam hlak lai ngirhmun leh khan chu a kâr a hla ta ngei maw! Pa le pa le nu le nu inti seng seng si anga inthlau thei hi thilsiem dang an um nawh. A san iem ning a ta? Chu tak chu a nih ngaituo tlâk: tuthlaw le laptop khawvel kâr hlatzie hi.
Mingo-midum inkar
America ramin British opna hnuoia inthoka zalenna an puong khan Thomas Jefferson chun Declaration of Independence-ah “Mi tin hi intluk vonga siem ei nih” (All men are created equal) ti thuro hi a lo thun sa a, chu chu America ram innghatna ban poimaw, an Constitution inthlungna sûtpui pakhat a nih. Chuonga mihriem intluk tlangna thu an khekpui lai zing chun midum ruol, sala an man, Africa rama inthoka bawia sor dinga an tol thlak Negro maktaduoi 12 neka tam le an thlahai chu bawiin an nei a, ran angin an sor a, zalenna hrim an pek naw a, mingo le midum inkar chu hnuoi le van anga inhlat a nih. A thu vuok thlaka French Revolution chen nghong suok hiel, Political philosopher Jean Jacque Rousseau-in, “Mihriem hi zalenin a pienga chu hmun tinah kol a bun si” (Man is born free, and everywhere he is in chains) a ti char khah mihriem zalenna le a chanvo kengkawtu tak rama inngai USA-a mingohai chun tak ramah an thaw ngat ngat a, midumhai le kâr siem chu gawspel taka an nei amanih ti ding hiel a nih.
A thuphunga zalĕn le intluk tlang, a taka ruok chu ni si lo khawvela cheng ei nih. Chu le inzoma thil fe dan chu Amerika tonhriet bok hmangin hang hril fie tum inla. Hienga bawi ringkol mingohaiin midumhai an inbattir el hi Danpui hmanga sukbo dingin President Abraham Lincoln chun 1863 khan bawi insuona dan a puong a, a thi pha nghe nghe a. Bawi insuo zalen thu puong an tum lei hin sakhaw mi inti, bawi kol rawn le insuo nuom lo America sim tienga States 7 chun inthuruolin, America lakah a hrana indang tumin indo an puong a, American Civil War (1861-65) kha a suok pha a nih.
A thuphung chun, 1863-a inthokin midumhai chu insuo zalen ni hai sien khom a takin an zalen teuh nawh. Sienkhom damten an kăr a hung hnai tiel tiel a, kum zahni sawmthum pathum hnungah, 2008 November a hung tlung zet khan chu America President 44-ah midum Barack Hussein Obama chu thlang tling a hung ni ta nol el! USA House of Representatives le Senate chun khânga râwng tak le indik lo taka midumhai an lo soisak leia thupha chawina thu chu USA a pienga inthoka kum 233-ah an puong chauh a nih. An lal tak midum ni ta tlat chuh, thupha chawi chu thaw awm tak a ni hrim a nih. Amiruokchu, danin midum le mingo chu chok ruol vong khom ni sien, kong hrang hranga an inkar chadan chu zâu tak a la ni zing. Mingo le midum inkar hi hruk bit thei a ni ngai chun kum za tam a la lak ring a um. Tuta inthok hin innei pol tah ngat ngat hai sien, mingo le midum rong inpol, eini rawi vun rong, hăngngo, ngainobei tak ang put hi thrang iemani zat hnungah an la hung suok chauh ding a nih. Chu pha chun America hmelhmang khom danglam ta hleng a tih.
Hi le inzom hin zuk titi sap met inla. Mingohai hin kristien sakhuo phênah nasa taka hma an hung sawn a. Khawvel lien lem chungah ro an hung rêl el chauh khom ni loin an thiemna hmangin khawvel an rûn zing leiin ngaisang an hlaw a; an thaw dan iengkim hi thil thra le changkang inkhina hmolah ei hung hmang a nih. Sienkhom, African-hai tukvera inthok ruok chun a lo ni chuong kher nawh. Kum 1976-80 sung Nairobi (Kenya) a kan um laia kristmas drama an inchang le naupang hmang ding milim bu an insuoa hai chun Setan lim hrim hrim chu mingo hmel an inputtir a, Isu le vantirkohai le Baibula mi thienghlim hmel rêng rĕng chu midum rong an inputtir vong. Vun ngo hi thangindei a um ang hrimin, anni midumhai chun Diebol le a rawihai rongah an ngai ve tlat!
Hieng zawng hin zuk bi pei inla. Mihriem hmasa tak chu Africa rama inthoka hung suok niin thil suituhai chun an hril leiin, ama chuh mingo nekin midum a ni ngei ring a um. Pherzawl lal kan pu pakhatin, “Keivom ruol, Keivâra ka siem cheuh” a ti vet thu ka nuin a mi hril hlak anga Kristien sakhuo hi khawthlang mingohaiin haijek a, an bil le thuoma an incheitir hnunga khawvel hmun hrang hranga ramper an zauh ruola an thon darh a ni leiin iengkimah anni rong an inputtir a, ‘van angel dum/vom/hăng’ lo ni mei dinghai kha ‘van angel var’ti an hung ni ta vong khom a hoi khop el. Van rama puon var sila leng ni awma inlarnaa hmutuhaiin an hril khom hi khawthlang vun ngohai thlirna mita an hmu dan a ni el thei. Midum inlarna hmu chu ni sien, puon dum vonga inthuomin a hmu lem el thei bok. Ei rama misawnari hunghai khom khan van rama chen ‘Mingo Veng’ um bik dingin an ring chu tie! A ieng khom chu ni sien, thimthama chu rongin umzie a nei nawh. Chun, ei vun hi hang hîk inla, mihriem chu angkhat vong ei nih. Ngo, eng, hăng le dumin kawk a nei ta nawh. Kâr a um ta bok nawh.
Chi zawnga indaidanna
India rama ve thung chun, zaa sawmriet chuong hi Hindu sakhuo zuitu an ni a, chi li- Brahmin, Kshatriya, Vaisya & Sudra-in an inthre top a, chu chu dam sunga sukdanglam thei lo a nih. Chi hnuoihnung Sudra chu chi chunghnung tak Brahmin ta ding chun tirdakum, a hlimin a hlie ringot khoma porchea inngai a nih. Hieng khopa mihriem le mihriem inkara indaidanna bang rapthlak hi khaw lai khawtlang le sakhuona khawvela khom a um ngai nawh. Hi hi Caste System an ti chu a nih. Sakhaw lien Jainism, Buddhism le Sikhism le a dang dang an hung pieng san tak laia pakhat chu hi Caste System hi thriek le sukbo a ni a, sienkhom hun sawt a seiah an hlawsam vong. India Danpui hnuoia khom hienga inthlierna hi phal ni naw sien khom a tak rama chuh India ramin zalenna a hmu hnung kum 67, hi thusep ka ziek lai khom hin a zie a la danglam chuong nawh. Ei sorkar thar hnuoia lem chuh, sukhning ruol lo kul nghet ang a nih.
Kum 1997-2002 sunga India President K.R.Narayanan khom khan chi hnuoihnung Dalit a ni leia a fe thei nawna hmun tam tak chu President a nina leia a sir um sien khom, a chi nina chu sunhang khat khom a thaibo thei nawh. A pumpel dan um sun chu Hindu sakhuo maksana sakhaw dang chel a nih. Hindu sakhuo maksana Muslim-a inlethai le Hinduhai inkar thu hieng khopa a hier el san hi ei thil hril bawra inthoka suok a ni tak. Chi hnuoihnunga inthoka chi-a inthlierna um ta lo sakhuoa an inpem hnung khoma hmusit zui zing tumtu Hinduhai chunga kut thlâk hi an chak dop dop a hoi khop el. Chu inkăr hruk bit tum chu Lusei tronga ‘zawh dawra suk tin ang’ an ti, mengte monga fahrel rol lut tum ang a nih.
Thiemna kâr
Gautama Buddha chun BC 500-400 inkar vel khan “Hrietna tluka hausakna a um naw a; mawl tluka retheina a um nawh” (There is no wealth like knowledge, and no poverty like ignorance) a lo ti a, chu chu hringnuna thudik ngir zing chu a nih. A Study of History ziektu Arnold J.Toynbee chun kum singkhat vel sung hin sivilaizeson 21 tlu ram (decline) tah le 5 ruok chu la ngir (arrested civilization) zing niin a sui a. ‘Civilization’ ti hih hmun hrang hranga khawtlang nun hung inthrang lien le inthlak thleng pei hrilna trongkam a nih. Sivilaizeson chu hmun hrang hrangah mihriem angin a hung insieng a, a pieng suok a, a hung inthrang lien a, a vanglai ni a tlung a, damten a hung chuoi tiel tiel a, a zŭr hmang a, a dang a hung suok nawk pei a. Chuonga kum sang tam tak sunga mihriemin hrietna, thiemna le varna ei khawl khawm, zieka ei sie thrat le ei thilsiem le hnuhma ei maksanhaia inthok chun hma thar ei hung lak zui pei a, tuta ei ngirhmun hi ei tlung tah a nih.
Chuong thilhai po po chu lekha inchuktu chun kum sawt naw te sungin a hung inchuk suok el thei bakah a nek daiha trangkai lem, thaw olsam lem le hlawk lem a hung ngaituo suok a. Tharuma mi sangkhatin ni khat sunga an thaw suok trawk kha khawl hrat hmangin darkar khat khom tling loin a thaw el a nih. Chu thawna dinga mi an hmang po po kha thil trangkai lem thawna dingin an hmang tah lem a. Hi thiemna hi hmangin, khawthlang mihai chun mihriem tha seng rawn ngaina thil hrim hrim chu ram hnufuolhai thaw dingin an pek suok a, an rama mi pakhat an ruoina man khan a tlawm takah mi sawm an ruoi thei a, pindan inhoi takah computer leh inthrungin, a hlawk an fak char char el a nih. Chu chu a nih tuthlaw le laptop khawvel kar indanglamna chuh.
1970-80 bawr vel khan personal computer (PC) hi a hung inlang pheu pheu a, sienkhom ei hung hmang lar tak tak hun chu 1990 hnung tieng hman a nih. Kei khomin 1992-93 khan ka hmang tran ve a, sienkhom ka typewriter inthlaa ka hmang tak tak hun chu 1994 kum lailung, Thuthlung Ram bung thumna ka ziek lai niin ka hriet. Kum sawmhni a lo invoi der el tah. Chu sung chun Desktop hi sawm chuong ka hmang triek ta a, laptop khom tuta ka hmang lai hi a parietna a ni tah. Ka laptop hmasa tak chu Russian siem, kg 15 laia rik a na, tuta ka hmang lai ruok hi chu kg. 1.3 chauh a ni a, sienkhom ka nei hmasa tak neka a let zaa hrat lem le thilthawthei lem a nih. Laptop seng seng, an inkar a hla khop el.
Kum 2002-2007 sunga Baibul inlet sin ka thaw vung laia Bible software ka hmu thei taphot ka siena laptop (Sharp) khom chikte, inphân dang el a ni a, sienkhom a keng rawn a, Baibul chi hrang hrang le a hrilfiena (commentaries), Hebrai le Grik tronga thu mal le thu harsa chaina le hrilfiena bu za tam hu a thluokah a’n leng a nih. Hi softwares hi hmangin, library-a kar khat sung khoma zong hmu seng lo dinghai kha minit khom tling loin ei lak suok zung zung thei a, a varzâng kher el. Hi hmangruo hi hmang loa Baibul lo inlettuhai kha a lo hautakpek hle ding a nih. Kum tam tak hmanga an buoipui hlak kha kum thum le thla sariin ka’n let zo a, Pathien lunginsietna zara a thawtu ngei khomin mak ka ti rum rum hlak a nih. Kawl inlep tluka hrâta hmasawnna lampui ei hraw thei pha lem chun, Pathien le ei inkar khom hung inhnai met ta’ng a ta, Pathien angpuia siem ei nina khomin umzie thar hung nei ta’ng a tih.
Pherzawl-Delhi inkâr
A mêl hniek zawnga inkhi chun ka pieng le seilienna Pherzawl le Delhi inkar hi km 3400 vel a ni el thei. Pherzawl chu AD 1850 hnunga indin, Delhi chu Isu pieng hma kum zabi parukna (6 BC) lai daia inthoka indin tah, Pherzawl neka kum 2500 vela pieng hmasa a ni el bakah hmar thlang tienga hung rûn tuhai dangna dinga lal tam takin an thlang le khawpuia an hmang, India zalen hnunga ei ram khawpui a ni leiin, iengkimah Delhi le Pherzawl inkăr hi a hla taluo a, hang hrilkhi chi khom a ni nawh. Amiruokchu, hi khawvel pahnihai hi thiemna kawitan hrawa thlung zomtuhai laia pakhat ka ni ve leiin hril kop naw thei a ni si nawh.
Saruok deuthawa ei la khawsak lai, February 5, 1910-a Watkin Roberts-in Senvon hung sira Chanchin Thra a hung hril lai khan Rashtrapati Bhavan (President bangla) le a tuol hmaia Secretariat ropui tak hai le India Gate phei, Rajpath hi an indin mup mup lai a nih. Hmasawnna tienga mihriem seng seng ke pen hlatzie le hnaizie hi hang inkhi ngaina a um nawh. Amiruokchu, chuong khopa inkhi ngaina khom um loa kar hla chu thiemna kawitan hmanga kei mat thei a nih. Chu kawitan chu hrawin, Pathien lunginsietna zarin, Pherzawl ka suoksana inthoka kum 12-ah Delhi tlangah umhmun khuorin, India sorkara rorelna le thuneina khawl lipui hertu laia pakhat ka ni hman dĕr a nih. Manipur State a pieng le seilien lai lem chu Indian Foreign Service (IFS) tling le zom hmasa tak ka ni hman bok. Ka nauhai lem chu Pathien malsawmna zar chauhin ka penson hmain khawvel dapin an inzar darh hman a nih. Daniel le a ruolhai khom, Babulon sala an intangna hmuna inthokin, thiemna kawitan hrawin, sal ninaa inthoka suokin, a lalram sunga roreltu ngirhmun cheltuhai lai an thrang hman dĕr a ni khah.
Ei pi le puhai beisei tawp chu thangsuohai chauh inlawi theina pielral a nih. In le rama thangsuohai chu pielralah faisa ringa kumkhuoa khawsa dingin an ring. Anni huna ngirhmun inhnarum tak chu fak le dawn tlasam loa um a nih. Chu chu mi tam takin ei tlung phak tah chauh khom ni loin, ei lekhêl daih tah. Fakfawm zonga khawsakna khawvel (subsistence economy) a chu bu fak khop nei chu mi hnienghnara ngai a nih. Tu ruok hin chu sorkar thoktu tu khom deuthawin a thla khat hlaw-in a kum khat fak daih bufai a’n chawk thei der tah. Taksa khawsakna thila chuh, thangsuohai ngirhmun khêl daia insanga khawsa thei, sekibusuok nei ei tam tah.
Ka ngaituo neu neu hlak a, ram changkanghai le India rama chenghai khawsak ngirhmun chu tekhi ruol loa kâr inhlat a ni lai zingin, Delhi tlanga kan khawsakna le Pherzawl tlanga khawsahai ngirhmun chu a kâr a va hla ta de aw! Pherzawl tlanga khan chu harsa takin tui ei chawi trĕng trêng a, Delhi-a chuh bathroom tin le choka-ah tuidawta mi ei mamaw zat ang ang ei her suok. Kha hmaa puonsawp le insil dinga Daihnai tuikhur, Lungpui Tuikhur, Maukot Tuikhur, Changpui Tuikhur pan hlak kha a ngai ta naw a, insilna pindan ei lut a, ei nuom le tui lum, ei nuom le tui dei ei her suok a, trêntui khawthla inphi seng seng hnuoia insil ang elin, chung tienga inthoka tui hung inphi thla seng seng theina dinga tui dawt hmawra a bau an inbuk (shower), a hmai an ver kuok sing senga inthok chun a lum le dei ei dit dan ang taka ei her mil chu a hung inphi thla seng seng a, a hnuoiah ei insil hem hem el a nih.
Favang hnukhawi tieng amanih le chapchar huna puonsawpa umni khama ngaizawnghai le fienriel kha a hun lai chun a tluka inhoi khawvelah a um bik chuong naw khom lo ni sien, ni tina thuomhnaw, sil le bil ei sukbalhai sawpnaa hmang ding chun a thei naw chu hril tam a ngai nawh. Delhi tlanga chu thuomhnaw bal met taphot puonsawpna khawlah ei deng lut a, amain a sawp a, a her hul hieu a. Ei thaw tawp chu puon bal deng lut le puon fai lak suok ringot a nih. Chu zoah nawt ngaihai chu a nawttu ei ko a, nawt sa, nal taka thlep thap chu an hung thak a, a nawka thaw ding um sun chu hăk a ni el. Ka mimal thuomhnaw bik lem chu trum khata sawp le nawt hi thla thum bek ka ring leiin, kum khatah voi li bak thaw a ngai nawh. Mani ina tuia sawp chi lohai, suits le thil intom theihai ruok chu drycleaner kuomah ei pek a, chu chu kum khatah voi khat vel chauh thaw a ni tlangpui.
Thlai suongna ding thing phur amanih gas bur rik tak put luoi luoi nekin a dâwta chokaa an hung lak lut chu thlai suongna thuk (gas burner) leh ei zom a, tawptai um ta loin nuom zat zat her chokin ei hmang el. Meikhu leia mit inthîp a um ta naw a, intringin hmun a chang ta bok nawh. Bu fa dingin mi ei fiel a, thlai suong laklaw laia gas bo inlau amanih le a bo thut changa invir buoi el hun kha mang ram a lo inchang tah. In bul elah mamaw lam theina dawr a um fek fuk a, ei fe pei naw leh telefawn-in ei thil dit dit ei mangai a, minit 5-10 sungin a hung tlung. Sa chi tinreng, a hmin (suong sa) an naw leh a sel, ei du ang ang ei awrdar a, hmai ei phi sungin ei kotkhar bul a hung tlung el. Eini lai kristien intihai ching, sa thra lo inhnaw lui a um ta nawh. Damdawi chen khom thrunghmuna inthoka inchà thei vong a nih.
Thingtlang hmè ei ti el, kha hmaa vairama um ve lo hmeruo dam kha tu hin chu Delhi tlanga khom du zawng zawng hmu thei a ni ta a, incha zung zung thei a ni ta bok. Ni khat lai khan saruol sa hro khom kg khatah cheng sang khatin ka’n chawk takluo kha tie! Hienga thil hlu ka’n chawk changa ka ngaituonaa lut hmasa tak hlak chu: a kâptu amanih âwktuin a sawlpui man ieng zat am a chang ve ding, a sa khartu le zor sawngtuin ieng zat am a hlawkpui ding? ti dam hi a nih. Thiphuhâkin mi rethei le hnuoihnunghan sin an thaw a, an tharsuokhai chu mi neinunghan man tlawmte chauhin an lungsiet kharpek a, a lêt tamin an zor sawng a, sum an intêl trok a, Pathien kuomah lawmthu an hril a! Chuong vel ka ngaituo chang chuh, ieng anga sa hro inhnik khom, kam indên taka fak harsa ka ti hlak. Rethei le hausa inkar hi a hla a nih.
Eini rawi sadukaihaiin sa ei hril pha ei na a kap a, ei titi tluong hrui khom sa tluong hruiin ei thlak daih hlaka chuh, ei titi tluong hruia bok kir nawk inla. Ei leng suok pha leh car-in ei fe a, car bokin ei hung kir nawk. Inhoi ei ti tawk charin lum hunah car sung ei sukdei a, dei hunah ei suklum a. Hla le rimawi ei ngaithlak nuom nuom ei sut a, chanchin thar ei ngaithlak nuom leh radio ei hmet hring a. Car khalnaa hmang bak chu pheikhok hi hmang inrim ta lo ei ni leiin pheikhok bun siet chu dam sawt thil a ni tah, fashion inthlakin a mi hnawlpek leia ei inthla liem hlol a ni ngot naw chun. Chuonga inthla liem loa ka kol zing chu pheikhok sen-uk (brown) pakhat ka nei a, kum 15 chuonga upa a ni taa chuh la thar tak, ‘a pangngai, a’n dang nawh’ ti ang kha a la nih. Aigupta le Kanan ram inkara kum sawm li top inzin sia bun triek zo lo Israel thlahai (Deut.29:5) pheikhok leh ruok chu hrilkhi ei tum chuong nawh. Thlaler phaiphin deuh vong hraw an ni leia an pheikhok kha tlo ni loin, se lo dinga humtu an nei lei a nih.
Tlangkawmna
Pherzawl-Delhi inkar hlatzie ei hrilnaah ram tin ei pet kuol sa leiin hun a lo fe rei tah a. Mi dawizep ei ti phal dim, hming tak ziek ngam lo, hming lem chauh hmanga bau phong ngamhai tlan khawm rawnna tak ni dinga ka ring Facebook-a Nêlhau rawi ni awm tak ruolin hmu hai sienla lem chu, an thunona an khekpui chu “A sei taluo” ti ngot ni tang a tih. A ziek pei hman um lai a, tiem pei naw thu inpawtpui hi mithi rawl, Samdal thlahai rawl a nih.
‘Kâr’ ei ti hih a taka inkhi thei (physical distance) nekin inkhi thei lo, sienkhom thil um ni si khawvelah a zâu lem. Kâr siemtu san tiem seng lo a um. Hrietna le ngaituona khawvelah a ni zuol tak. Titi a hung inruol thei ta naw pha chun kâr a um tina a nih. Nupa inhmangai le inngei tak inkara khom kâr hril seng lo a um thei. Du zawng, inhnik tizawng le ngaiven zawng thil inang le inang naw leia kâr inkhang a tam. Nupa inrem tak kara khom san hrang hrang leia kâr a um pha chun, inhrietthiem tuona lungril puta hruk phûi pei a ni naw chun, a hung kak lien deu deu a, chadan inthuk tak a hung um a, intrâng thrê chen khom a tlung hlak. Sakhuona le ringna thila inkhuongruol nawna dam hi kâr siemtu trium, innghirnghona le indona tam tak chok suoktu a nih. Ei ram kohran pawlhai hi entirna thra tak an nih. An kàr siemtu hi Chanchin Thra a ni nawh.
Kâr po po laia zâu tak chu Edena thing hring ni si thina thing le Kalvari-a thing trawl ni si hringna thing inkar a ni el thei. Evi le Adam bawsietna leia Pathien le inzomna lo intan tah chu ran thisen ieng zat khom inhlăna thawi mat thei a ni tak naw leiin, Pathien ngei chu mihriem taksa puta hnuoiah hungin, Kalvari tlangah intlanna le inremna sin hung thawin, ama thisen ngeiin kumkhuoa dingin a hung sui zom nawk tah a nih. Chu ngei chu a nih Pastor Thangngurin hla mawi taka a lo khek suokpui khah:
Inremna thinga i tliekna hmuna chun,
Hung inthruom i ta, zalenna ropuiin,
Sâ le mihriem doral bâng ta’ng an tih.
(Tuesday, November 11, 2014. Delhi)
###
No comments :
Post a Comment