Rinawmna Chibai

Unaute u, in dam tlang alawm maw!
Rinawmna chibai in dawng thei em?
Thinlung chhungkhat Zoram chheh vela mite,
Insuihkhawm leh zai i rêl ang u

tiin Zo hnahthlakte insuihkhawmna duhtu, mangphantu leh chumi atana thih thlenga hmalatu, kum 2008 June 25-a mual liam ta, Capt. Lalzuala Sailo (L.Z.Sailo) chhuahpui unaute zawnga Rêngpui Ram (Tripura) a fan trumin a lungkham rûk ber chu hla thuin a auhchhuahpui a. A ri thangkhawk chuan thawk leh khatah Zoram khawvel a deng chhuak a, lungsi takin kan auhpui hluah hluah mai a ni.

Engah nge hemi zawhna mawlmang tak mai hi a zawh tlat le? ‘Rinawmna chibai’ a tih chu eng tihna nge? ‘Rinawmna chibai’ a awm chuan, kum 1659-a Shivaji leh General Afzal Khan inchibai ang mai khan, ‘Rinawm lohna chibai’ pawh a awm tihna em ni ang? Rinawmna chibai dawng thei tura a ngaihte chu tute nge ni ta ang? Hemi chhanna hi a chang tawpah hetiang hian a dah a, engemaw chenah a sawi fiah hlein ka hria:

Unaute u, in dam tlang alawm maw?
Rinawmna chibai inbûk ang le;
Chhinlung chhungkhat Zofa kan nih hre rengin,
Insuihkhawm leh zai i rêl ang u.

Abrahaman ram tiam Kanan rama ke nghahchhan a phumna hmasa ber chu, September 28, 1993-a ka biakzinna Makpela Puk a nih thu Baibula kan hmuh angin, Zofate pawhin kan lo chhuahna ni tura kan sawi fo chu pûk a ni a, chu chu Sinlung emaw Chhinlung kan ti a, a threnin ‘Khul’ kan ti bawk a, chu chu ‘Khur emaw Puk’ tihna tho a ni. Chu chu phuahchawp thawnthu mai nge, khawi hmuna awm nge? tih kan hre lo. Mahse, phuahchawp thawnthu mai ni loin, kan thusim (myth) emaw thurachi (legend) atranga kan lak chhawn emaw, kan chi-zama hriatna (genetic memory) inphûm, kan inthlah chhawn zel leh kan sub-conciousness-a bet tlat, chumi atranga kan rochun chu niin kei chuan ka ring. Kan trobulah kan nihna a inthlung a, chu chuan kan nihna tak a sawi. Khawi hmunah pawh awm ila, trobul thuhmun kan nihzia hriatna leh pawmna chuan inunauna a siam a, chu chuan min hip khawm thrin.

Hlawm hming
Zo hnahthlakte hi hnam dangin mi kohna hming tlanglawn pahnih- Chin leh Kuki-a hriat leh koh kan ni hmasa ber a. Kawl rama chengte chu Chin tiha koh an ni a, a rawn thlangtla hmasate chu Bengaliho lo kohna hming ‘Kuki’ tiha hriat kan ni vek a. Lusei hnam, abikin Thrangura thlaha mi Sailoho lalna hnuaiah tuna Mizoram zawng zawng deuhthaw a luh hnu leh British-ten an rawn awp hnua Lushai Hills District a pian khan, a chhunga chengte pawh a ram hming chawia Lusei an rawn tih tâk vek avangin ‘Lusei’ tih chu Chin leh Kuki te anga inkohna hming tlanglawn a rawn ni ta zêl a. Hemi avang hian, a rama cheng hnam hrang hrang sawi fiah nan sorkar pawhin Danpui-ah “Any Lushai tribe” tih term hi a rawn hmang ta zêl a ni.

Mahse, ‘Lusei’ chu Zo hnahthlak hnam zinga pakhat a nih si avangin, chumi hming hnuaia Zo hnahthlak hnam dangte dah chu thil fel niha hriat a nih loh avangin ‘Mizo’ tiha thlak a rawn ni a. Chuvangin, awmna hmun leh hun azirin hnampui (nation) hming Chin, Kuki, Mizo tih-a koh kan ni leh ta zel a. Chumi hming hnuaia chi-hnam hrang hrang, Chhinlung chhuakte chu Zo hnathlak tiha hriatte hi kan ni. Thing lian taka a zâr, a trang, a hnah leh a zîk zinga pakhat emaw leh an sa phuntu emaw nih loh chuan heng hming kan sawi takte hnuaia mi hi kan ni ve lo tihna a ni. Zo hnahthlak ni si, ni ve lo anga inngai emaw leh insawite hi mahni nihnaa chiang lo emaw, chi bing nihna inchherchhuan pakhat rikngawt atchilha lungawi tum leh duhtawk mai mi an ni duh khawp mai.

Unau hmel hai
Zo hnahthlakte zingah chhan hrang hrang avanga unau hmêl inhai palh avanga inchemhar châng a awm thrin. Hnam tin zingah pawh chutiang hun thim zawh hun chu a awm fo. Chhungkhat unau laina zingah pawh chutiang hun chu a awm thrin. Baibula chhungkua kan hriat hmasak berte fapa upa zawk pawhin a nau a that tih kan hria. Mahse, Zo hnahtlakte zingah chuan unau kan nihzia kan hai tak tak ngai lo. A haider, hre duh lo leh pawm duh lo hrim hrim kan awm hunah, rinawmna chibai inbuk a harsa thrin. Israela thlah hnam sawm pahnihte zingah pawh chutiang chu an tih châng a awm fo. Chutiang tih chîng hnam sawm phei chu Pathianin a nuai bo vek a, tun thleng hian chhui ngaihna awm loin an ram thrak a ni. Khawi unauho zingah pawh, rinawm lohna kut hmanga indawrte chu an dingchang ngai lo.

Keini ho pawh unau inhai hi kan bâng bik lo. Kan nihna threuh nihna dik bera kan dah hunah chutiang thil chu a awm thrin. Ka unauin kan inunauna hnawla a pawm duh tlat loh chuan min phatsan tihna a ni a, kei chuan rinawmna chibai ka hlan laiin ani chuan Iskariot-a chibai chauh bukin mi fawp ang. Chuvangin, Zo hnahthlak zingah hian mahni nihna pawm duh tawh lo, hnam hrang anga inchhal tawh, rinawmna chibai nei tawh lo kan awm a nih chuan, inlamlet a, mahni nihna huangah lawi lut leh a, zau zawka inhung khawm a, dam khawchhuahna kawng kan zawh a trûl takmeuh meuh a ni.Kan khawtlai chuan niin min liampui ang a, ‘A tlai lu ta!’ kan tih hun a thleng dah ang e.

Inunauna hlutzia hi sawi fiah mai rual a ni lo. Vun rawng leh hmel hmang inanna ringawt pawhin thu a sawi thûi hle. Kum 21 a zawna India ram pawna ka awm chhunga ka tawnhriat han sawi lawk ila. Diplomatic function emaw reception-a ka kalna apiangah, a tir lam chuan ram hrang hrang aiawhte chu inchiahpiahin kan inbia a, kan zi nuaih nuaih a. Mahse, zawi zawiin, kan hriat loh hlanin, kan inthli fim a, darkar khat emaw hnuah chuan hmel leh rawng inangte chu magnet angin kan inhip khawm a, kil khatah midumho, kil khatah mingoho, kil khatah mihang, vai hmel puho, kil khatah mongoloid hmel puho an tla khawm mai thrin a ni. ‘Nang i awmna hmunah, kei ka hmunah’ tih ang deuh kha a ni awm e. Hmel hriat loh tlimpui karah pawh ralkhatah kan hmel anpui kan hmuh chuan kan pan nal nal mai a ni.

Chu chu mihring awmphung mai ni loin, thilsiam dangte nihphung pawh a ni ve. Ramsa emaw savate emaw leh rannung dangte pawh an anpuite nen an tla khawm thrin. Mahni huanga lawina châng hre lo emaw leh lawi duh loh chu sa borala boral a ni a, a tawpah mi chim hnanin a awm thrin. Chutiang mi chuan a dinhmun derthawnzia a hriat hnu pawha a inlamlet duh si loh chuan rinawmna chibai dawng tlak a ni lo.

Zâu zawka inhung khawm
Hei hi eng lai pawha kan hriat reng a ngai. Zofate hi ram hrang hrangah min thren darh a,dimokrasi rorelna hnuaiah chuan a ram pum rorelna inpuiah kumkhuaa tlêm zawk dinhmun luah reng tur kan ni. Mahse, chu chu kan tawpna a ni mai lo. Pawng se ek tam rikngawt hi dam khawchhuahna a ni chuang kher lo. Kan awm khawm tamna rambung apiangah inthurual taka kan insuihkhawm phawt chuan tuman min zuam mai mai ngam lo. Interek a, inla bing a, puan indelh kilh a, mahni lum luma kan lum erawh chuan, zawi zawiin kan bula awmten mal saiin min hneh ang a, a hmatiamin min chim ral ang. Chu chu khawvel awmphung a ni. A mihringin kan zir tlat loh chuan, Pathian pawhin tih ngaihna tak a hre bik lo ang. Dikna Pathian a ni a, kan thiltih ang zela kan chunga roreltu a ni. Suma tham lungawi mai theih a ni ve lo. Pathian rinawm, rinawmna chibai kawltu a ni. Mihringte hi a lalna ram dintu turin a duh a, chumi atana ram pêk chu a thil duh ber a ni.

Trawng vuina dar a ri
Kum 2002 atrang khan UNESCO chuan trawng ral mai turte veiin chhanchhuah dan ngaihtuahin khawvela trawng bo mai turte chu la khawmin Atlas of the World Languages in Danger of Disappearing tih a buatsaih a, chu chu kum 2009 khan ennawnin an siam thra a. An sawi dan chuan khawvela trawng 6000 chuang awm zingah hian 3000 chu thi chhawnga lum tawh an ni a, kum 2050, tun atranga kum 36-ah chuan khawvela trawng zaa sawmkua hi thi hmin der turin an sawi a. Tun hma thrang thum chhung khan trawng 200 chuang daih a thi hmin hman niin an sawi bawk. India rama trawng boral thuai tura an ngaih 167 zingah Zo hnahthlak trawng hrang hrang 48 te hi an telhtir bakah Naga hnam inti zawng zawng pawh an telh vek a ni. Chi liin an thren a: 1. Vulnerable (derthawng) 2. Definitely vulnerable (derthawng takzet) 3.Severely endangered (thi chhawnga lum tawh) leh 4.Critically endangered (chatthla trêp tawh). Kum 2012 leh tun kum 2014-a ZoFest kan hmanna leh a chhehvela cheng kan unaute hi hemi dinhmun hlauhawm taka ding an ni. Chutiang bawkin, kan chhehvel ram Bangladesh leh Kawlrama cheng kan unaute dinhmun pawh a ni tlangpui.

Chhan tlak kan la awm em?
Hengho hian zawi zawiachim pil an nihzia leh an dinhmun hlauhawmzia an hre mai thrin lo. An hriat chhuah hunah meuh chuan, Zangkâkin dawia a phuar beh hnu, dawithiam hmingthang Lalruanga ang mai emaw, a mut tui laia a nula Delilah-in a chakna sam a tansak vek, hratkhawkheng Samson-a ang mai khan, chêt ngaihna a awm tawh thrin lo. Chuvangin, ZoFest thupui, ‘Insuihkhawm leh zai i rêl ang u’ tih hi hmanhmawh phelenga Ninevi-a Jona tlangau hria apiangin an ngaihven mai ni loa an ngaih pawimawh aia nasaa kan ngaih pawimawh a trûl tawh takzet a ni. Chhan tlak kan la awm e.

Zau zawka inhung khawm hi dam khawchhuahna kawng a ni a, hnam bila intihbin leh intihhranna kawng erawh chuan Sheol kawng a chhun. Tun hnai lawk, September 18, 2014-a United Kingdom (UK) atranga indan nge la beh reng tur thua Scotland-a Referendum an tih kha entawn tlak takzet a ni. 55.3% chuan UK-a la beh reng an duh a, a chhan chu zau zawka inhung khawm reng chu an tân thra zawk daiha an hriat vang a ni. Tuna UK emaw Great Britain kan tih hi England, Scotland, Wales leh Northern Ireland inhui khawm an ni.

Kan hmaah damna leh thihna
Tunah India sorkar chhak nawr pawlisi (Look East Policy) chu ngawrh takin a kal mêk a, kawng zau zawk leh thra zawk an sial mup mup a. Kum 2003 lai atrang tawh khan beihpui thlakin helho pawh an tawmbuk atrangin zawi zawiin an hawl chhuak a, an SoO (Suspension of Operation) bawmrangah khung vek tumin hma an la a. Chumi ke chheh rual chuan sumdawng an rawn lut tran a, thawktu tam tak an rawn hruai bawk a. Moreh/Tamu kawng, Tiddim/Singat kawng leh Champhai/Triau kawng pathum hian Kalemyo (Tahan) chhun vek tura duan a ni a. Tin, tuna BJP sorkarin 100 Smart Cities sak an tum zinga pakhat chu Moreh bul lawkah bun an tum bawk a. Tuna an tihfel lai mek Moreh/Tamu inkalpawhna leh sumdawnna kawng ringawt pawh hi an hawn zalen hunah chuan tun aia let tam sumdawng leh an mi chhawrte an rawn fuan khawm dawn a, bank tam tak an rawn hawng bawk ang. Smart City-ah chuan tute nge cheng ang?

Chumi kalkawng pawimawha ding chu zoram khawvel deuh vek a ni a, kan kawt zawlah mana leh vahmim a sur tran mêk a ni. Chu chu dam khawchhuahnan kan hman phah ang em? Nge, chim ralin kan awm phah zawk dawn? A ruh no no chhuahna khawvelah hian Zo hnahthlak hmun hrang hranga awmten kan chanvo dawng thei tur leh kan ram humhalha veng him tur chuan inthurual taka zau zawka inhung khawm a, kan finna, thiamna leh remhriatna hmang trangkai tur leh kan tana chakkai khawrh thiam tura kan inpuahchah a ngai. Indona zawng zawnga hlauhawm ber chu tharum leh hriamhrei tel loa indona a ni. Ram hruaitute chuan tun hi chhun-zan zawma mutmu tuah hman lo lêka hma lâk hun a ni. Rual kan bánna tur mai ni lo, kan khûmna tur kawng kan sial a ngai. Chumi indona chu hmachhawn turin, zâu zawka infin khawmin, rinawmna kuta inchelhin, pheikhai rual takin hma lam i tawn ang u.

A tawp berah chuan kan rilru leh thlarauah zoram khawvel hi a piang tur a ni. Chu chuan kan thil vei, khawhawi leh hmathlir a tidanglam ang. Threnkhat chuan zoram khawvel hi mumang rama awm, tang ang mai niin an ngai. Chung mite chu piangthar lo, kristian inti si te ang an ni. Tu pawhin “Zoram khawvel chu khaw nge a awm?” tih an zawh che chuan, “Zoram khawvel chu ka thinlungah a awm” ti thrin ang che. I thinlungah zoram khawvel a pian tawh chuan, khawi hmun leh ramah pawh awm la, Hmuhtheihloh Ram chu i hmuh tlat avangin, rinna leh beiseinain chu ram chu luah turin phûr tak leh chhel takin hma lam panin kal i pên ang.Chu chu hnama piantharna kan sawi thrin hi a ni.Chumi rama lawi lut threuh turin duhsakna leh rinawmna chibai ka hlan a che u.

NB: A speech delivered by L.Keivom at Zofest-2014 at Muolhoi (Haflong) from 3-5 December, 2014.

###