Trong Hmang Dik (Lesson Khatna)

December 27, 2014-a DHWA, HSA le HCFD thruoituhai Quarterly Joint Meeting-a kum 2015 sunga Delhi tlanga umhaiin thupuia hmang dinga pom tlang chu ‘Trong Hmang Dik’ ti a ni angin le chu lesson chu buotsaitu dinga an mi ruot angin, a remchang ang peiin Delhi Thurawn-ah ei hung insuo ding a nih. A tawpah, chuong Lesson hai chu la khawmin a bute (booklet) sut ei tum a nih.

Trong ei hmang suol rawn laia threnkhat chauh, a khulang khangna dingin, a tawi thei ang takin hang hril ei tih:

Pulpit: trong suosamna
Ei chanchinbuhai baka trong ei suosam nasatna hmun tak chu pulpit a ni ring a um. Ei inkhawma zata trong ei suosam zat hin thisen anga inchik suok chu ni ta sien, ei pulpithai hi ran thatna hmun ang chara thisena por inthluok le rimsie ning a tih. Sienkhom ei suosam a nih ti hre le chu thil ngaituo le invoi chu mi tlawmte chauh ei ni ka ring.

Kha hma khan hi le inzom hin Delhi Thurawn-ah artikul iemani zat ka ziek tah a, iemani chenah ei trangkaipui a hoi a, lawm a um khop el. Kha hmaa ‘Hun vongtu’ tia indik lo deua ei hril hlak kha ‘Prokram vongtu, Inkhawm Thruoitu, Conductor’ tiin an hung ziek tlangpui tah. Hun hi thil um zing, hung lo, fe lo, chatuon ei ti hi a ni a. Ei sui inthuk deu lem chun hun hi Pathien tia hril thei khom a nih. Chuleiin, mihriemin hun hi ei vong thei chi a ni nawh.

Mak ka ti bèk bék pakhat chu, trantu le inkhawm vongtua ruothai Baibul chàng tiem hi chik takin ngaithla la, indik taka tiem thei chu mi zaah sawm khom ei ni naw el thei. Chu taka inthoka thil chieng êm êma inlang chu, ei chàng tiem ding tawite inbuotsaina dingin kar khat zet ei neia chu a tiem lawk ei tlawm ti a chieng. Delhi Version ei hang tiem lem lem hin chu, Hmar trong indika ziek a ni tak leiin ei inkhor a, zu inrui biling lamlawnin pem tlei tluoiin ei tiem a, luok ei suksuok deu a nih. Kristmas lai khom khan Luka 2:14 a vanmihai tlang hung insam kha indik taka “Chunghnung taka Pathien” tia ei inlet ta sa sa, mi tam lemin “Chunghnung takah Pathien” tiin ‘ah’ ti indik lo taka belin an mi la lampek ta tho tho a nih. A hmasa le nuhnung umzie hi sim le hmar anga danglam a nih ti an ngaituo naw khom a ni el thei. A hmasa hin Pathien chu iengkima chunghnungtak a nina a hril a, a pahninaa ruok hin chu chunghnungtak nina an pek naw leiin chunghnungtak nina an inhlan a nih. Chunghnungtak nina chu Pathien nina bul hrim (attribute) a ni leiin mihriem pek le inhlan thei a ni nawh. Mihriem thaw ding chu a nina poma chawimawi a ni a, chu char chu van zaipawl khom khan an thaw a nih.

Tisa Vs. taksa
‘Tisa’ le ‘taksa’ indanglamna khom thlier hrang thei loa Pathien thu ei hril dam hi a pangzatumzie iengtik am ei hriet thei ding maw! ‘Thu’ chu ‘tisaa’ ei inchangtir tlut tlut sung chun Setan lawm zawng ei thaw a nih ti hriet a ngai. A san chu ‘tisa’ thil chu ‘thlarau’ thil le inkal le ‘tisa’ thil chun Pathien a suklawm thei nawzie thu Tirko Paula’n Rom 8:1-11 a khan chieng takin a ziek a, THU chu TISA-in lo inchang palh sien, tu khom sandam ni thei nawng ei tih. THU chu mihriem taksa putin a hung inchang lem a nih. Ieng angin ‘thu chu tisain a hung inchang’ ti hi lo hmang nâl hle inla khom, ei hmang inrim leiin Pathien thu a kalna a bo chuong nawh. Hre zinga ei hmang lui pei a ni lem chun suol lien tak ei thaw a nih.

Ni sien, ni sien la, ni rawse
Thil ei puong zata trongkam hoihawm anga ngai a, “Chu po chu ei hang puong thei ni sien la/ ni raw se” tia ei suktawp zie hi trongkam indik lo hulhuol a nih. “Ni sien la, ni raw se” ti chu thu rotna (proposal) amanih duthusam (wish/wishful thinking) hrilna a nih. Thil ei puong vong hnunga thu rotnaa suktawp chu thu letling a nih. Chuleiin, thupuongtu hrim hrim chun a kharnaah “Chu po chu ei hang puong thei chu a nih” ti el ding a nih.

Thawlawm dawl lo ding
“Thawlawm dawlna um a tih” ti hi trongkam indik lo a nih. Thil dawl amanih khon hrim hrim chu dannaranin thaw ding zat inbitukna thil a ni hlak. Kristmas le kum thara ding thawlawm chu dawl ding a ni laiin Pathien chawibiek dinga ei inkhawma Pathien ta dinga thilpek ei hung chawi khawmhai hi chu a dawla dawl ding ni loin lak khawm ding a nih. Thuthlung hlui huna inthok khan Lalpa Tempula an fe changina hmaa kut ruoka inlang lo dingin Pathien ngeiin chieng takin Mosie hmangin a lo hril a (Exodus 23:15), chu thil chu voisun chen hin thaw hlaka neiin ei sunzom pei a nih. Chuleiin, “Pathien kuoma ei thilpek hung chawihai lakkhawmna um a tih” ti ding a ni lem. Tuta inthok chu inkhawm vongtu dinga ruothaiin an thaw suol zing ta nawna dingin DHCF Secretary-in mi a ruot taphothai chun trongkam indik an hmang theina dingin thurawn pe lawk zie hlak raw se. Thawlawm dawl nawk chut el hlak hi a thring taluo.

Thawlawm inhlan
Thilpek inhlantuin ram tin an insam kuol sa hi bansan a thra. Threnkhat lem chun thu thup deuin kut tam tak lo fe thleng tah a ni leia thawlawma notes ei pek hlui le zor taktak le kut tling loa ei hmu, thawlawma ei thawa ei ringhai chu lo sukthienghlim dinga Pathien ei ngen hlak a, hi hi a fuk chie am ti ngaituo ding a nih. Poisa chu amain a porche thei naw a, a thawtu porche le porche naw thu lem a ni leiin hril sa a trul naw hulhuol a; porchea ei ngai a ni lem chun a porche po lak hmang hmasa a, a faia ei ngai po inhlan ding a nih. Amiruokchu, chu chu thil thei a ni naw leiin, hril sa lo a thra tak. Inhlantu threnkhat chun thawlawm inhlan loin thil dang hniin an tawp chang a tam. Chun, inhlan pha leh “Isu Krista hmingin i kuomah/hmaah ka hung inhlan” ti el loa “ka hung inhlan che” tia CHE ei bel hi thil trul lo a ni bakah, sentence an hlap suol chang lem chun a thawlawm am Isu Krista am an inhlan lem hriet hrang thei lo khopin a buoi hlak.

Benediction hril dan ding
Inkhawm trin tawma malsawmna hril dingin dannaranin ei thiempuhai ei fiel hlak a, chu chu hmun threnkhata chu namnghetna chang tah upahai khomin an hril hlak. Benediction chu ‘malsawmna’ tina a na, chu chu Pathien aiawa ngir theihaiin Pathien hminga kohranhai mal an sawmna a nih. Baibula benediction hril ei hmu hmasa tak chu Mosien Israelhai mal a sawm thua khan a nih (Nambar 6:22-26). Chuleiin, pastor-in benediction a hrilin ama le ama mal insawm sain, “ei renga chungah um raw se” a ti ding a ni naw a, “in renga chungah um raw se” a ti lem ding a nih. “Ei renga chungah um raw se” titu chun benediction hril loin ‘duthusam’ a hril lem a nih. Benediction hriltu dinga ruot chu duthusam hril dinga ruot a ni naw leiin, benediction hrilin pung khawmhai chu mal a sawm ngei ngei ding a nih. Hi hi ei pastor-haiin an thaw suol ngun khop el a, thil poi tak a nih. Malsawmna inhlantuin mani le mani mal an insawm sa hlak ti hi Genesis-Thupuong chen zong la, pakhat khom hmu naw ti nih. Hi thu chipchier lema August 25, 2005 ka ziek Benediction Vs. Duthusam chu Delhi Thurawn-ah insuo a ni tah.

Voisun ni, voituk zing, voizan ni
‘Voisun’ ti el dingah ‘voisun ni’ ti hi ei ching em em a, a uor zuolhai lem chun ‘voizan ni’ amanih ‘voisun zan’ dam an tih. ‘Voituk’ ti el dingah ‘voituk ni, voituk zing’ ti pawl khom ei um nok a nih. DHCF chawibiek inkhawm 1500-1700 hrs hi sunchang le zantieng inkara mi a ni leiin indik taka hril ding chun ‘chawhnung inkhawm’ a nih. Amiruokchu, lo ngai veng veng la, ‘chawhnung inkhawm’ ti fuk chu ei vang em em.

Hrilna, tiemna, puongna, sakna... na na na
Thu hrilna nei, Baibul tiemna nei, thu puongna nei, hla sakna nei ti dam hi trong chang lakna taka ei hmang a ni tah. Hi hi trongkam indik lo a nih. “Pastorin thuhrilna a nei” ei ti hin ‘Thuhriltu chu pastor a nih” ti ei inkawktir tuma chu a kawk hrim hrim nawh. A kawk tak chu pastor thil nei ‘thuhrilna’ a nih. Chu thuhrilna chu hmangruo, entir nan a bau amanih, an naw leh loudspeaker, tape-recorder le a dang dang amanih a ni el thei. “Pastor-in Baibul tiemna a nei” ei ti chun kha a thil nei ‘tiemna’ kha a mit amanih tarmit amanih a ni el thei. “Secretary-in thu puongna a nei” ei ti hin Secretary-in thu a puong thu ei hril ni loin ‘thu puongna’ a nei thu ei hril a ni lem. Chu thu puongna a nei chu lekha amanih internet amanih, loudspeaker amanih, tlangsam amanih a ni el thei. “Pastorin thu a hril, Baibul a tiem, thu a puong” ti el ding a nih. ‘Hla sakna a nei’ ei ti chun a rawl amanih ei tina ning a ta, ‘hla insaktirna a nei’ ei ti chun tape-recorder amanih VCD a nei thu ei hrilna ning a tih. ‘Thal sakna a nei’ ei ti chun thal sakna dingin chem a nei thu ei hrilna a nih. ‘Sa kapna a nei’ ei ti chun silai amanih thal amanih a nei thu ei hril a nih. Ei tronga a hmun le hmun loa ‘NA’ ei bel hi Saptrong awphawia Baibul inletnaa ei trong an lo kei kawi leia inthoka hung suok a ni tak a, chu chu trong thraa ngaiin, ‘Active Voice’ a ei hril hlak kha ‘Passive Voice’-a hril ei tum tlat a, chuleiin ei trong hi ‘na-in’ a sip a, a na inrik hle a nih.

Sam ziek maw?
Hla sak hril taka chun, threnkhat chun “Sam ziek” dam ei tiem hlak a, Sam chu a ziektu mihriem khom ei sukhoi khop el. ‘Sam’ chu Inpakna Hla tina a ni leiin Mathai ziek, Marka ziek, Luka ziek le Johan ziek ti anga ‘Sam ziek’ tia hril thei a ni nawh. ‘Sam bu/lekhabu’ amanih ‘Sam’ amanih ti lem ding a nih. Sam hi hla a ni leiin a bung (chapter) zawnga hril loa hla anga ‘Sam nambar chuong zat khang zat’ tia hril ding a nih. A ziektu hming inchuon lo, sienkhom Mosie zieka ngai Genesis, Exodus, Leveticus, Nambar le Deuteronomy hai hi ei hril pha khom ‘Genesis ziek’ tia hril ding a ni nawh. Hieng bu ngahai hi ‘Mosie lekhabu’ tia hriet an ni ang hrimin ‘Mosie lekhabu Genesis’ ei ti naw leh ‘Genesis/Genesis Bu’ ti top el ding a nih.

Lawmthu hril
Lawmthu hril dinga ei ngir chang hin mi tam takin ei thaw rop chu lawmthu hril ei bat thu le nuom thu ei hril ei hril a, sienkhom lawmthu ruok chu ei hril ngai nawh. Trum khat chu ei pastor pakhat Vote of Thanks hril ka ngaithlak a, “I want to thank” tiin sentence tin a tran a, lawmthu a hril nuomnahai hming a sam a sam a, sienkhom lawmthu hril der loin lawmthu hril a nuom thu ringotin a suktawp. Lawmthu hril ei bat chun ei bat thu hril hril loa ei lawmthu hrila tlak el ding a nih. I poisa an bat thu an hung hril an hung hril nekin an bat hung tlakhai sien la, i lawm lem daih ka ring. Lawmthu hril i nuom chun i hril nuom thu hril hril loin lawmthu chu hril el lem ding a nih. Chik takin lo ngaithla inla, lawmthu hril dinga ei ruothai hin lawmthu an mi hril fukpek chang hi vang tak a nih.

(Um pei ding)

###