Rawl mawi
Guwahati pana ka vuongna ding IndiGo 6E 221 chun a hun takah a mi suokpui a. Ka thrungna 28-C sira chun Paite trong hmang tleirawl pahnih, pasal le nuhmei, an inthrung a. Tleirawlnu chu rawl innêm le ngainobei, trong sieu sieu mi, a bau suok chu rangkachak tuia inluon ang a nih. Thla thum lai zet châma thingtlang khaw pakhata khawsa Elizabet hung kantu Mari rawl leh khan a rawl chu inang dingin ka ring tlat chu tie! H.W.Longfellow-in,
Oh, there is something in that voice that reaches,
The innermost recesses of my heart
(Christus pt. I, The Divine Tragedy, The First Passover, pt. VI) a ti dam kha ka na darah a hung inri vang vang a. Ama bok hi a nih, “Thy voice is a celestial melody” titu khah. Rawl mawi neihai hi mi vangnei, zawlnei Jeremia-in Gilead ‘thing hnai damdawi’ a ti ang koltu an nih.
Sienkhom, anni chu ka biek nawh. Imu intuo hman loa suok ka ni leiin Guwahati tlung tawm chenin thin thiin ka in a. Chu bakah, upat hnunga dawngmatehai ei inbiekpui leh ei inkarah kum sawmnga sawmruk dam a tla tah leiin an nu le pa nekin an pi le pua inthoka indon tran a ngai a, a velvuol (process) a sawt leiin hun a hek a. Eini rawi hi hnam naupang tak ei la ni leiin, suon hni khat ei hang inhril hnung hin chu iemani zawng bekin inkungkeina ei lo nei deu tèi hlak a. Indon kuol hrep hnung khoma ei mi hriethai leh inzomna an nei der naw chun a tù tù ta ding khomin hrilhaithlak tieng a fe tlat. Chu lei khom chun a nih ka biek tawl naw chuh. Hang inhril inla chu, ruol hlui le hmel hriet hai tù le tè dam an lo ni khiet el thei.
Indaidanna bang
Hi le inzoma ka ngaituonaa thil hung lut chu, kha hmaa Churachandpur laia Zo hnathlak hnam tin inchekpola ei inhriettuo lai khawvel ang khan thil fe ta loin, indaidanna pindan sungah mani sengin puon ei indelkil tak lem dan hi a nih. Ei chengna le khawsakna le ei trong hmang dungzuiin hnam hming tum tum putin ei hung inko hrang a, dai ei insakkhum fir fer a, phuokfawm histawri rimsiein ei phing ei hnaw mar a, unau hmel inhai thaw chu sinpui takah ei hung nei a. Hnam khat trong khat hmang sunga khom pawl indaidanna bang chi hrang hrang ei inbawl khum a; ei boruok rimsie pai, hier tak chu a khat tawka thretin ei invoi khum tuo a. Khawlaia misuol le zurui ruol insuol khom a hnam zawngin ei lâk vong a. Motor eksiden leia thi chen khom dan anga an chungthu rèl el ding a ni laiin a hnam zawnga la-in ei khek indur a, awna zongin ieng hril se lo mi motor chunga dam kut ei thlak a. Motora mi ka bawhlum palh kha mihriem tu amanih ni ta loin, Hmar amanih, Paite amanih, Kuki amanih ka bawhlum lui angah ei lak pei a, ei lungril chin dan le lutinle dan hi hisap ngaina khom a um ta naw a, inremna lampui tieng ngha loin Sheol tieng a ngha tlat tah niin a’n lang. Hang ngaituo chîk deu lem chun nuizat a um khelah inzapui a um a nih. Anleh, Hmar amanih, Paite amanih, Kuki amanih chu motora bawhlum thei mei meia ei ngai a ni? Roreltuhai hun laia “Chuong lai chun Israel ramah lal an la um naw a, mi tin mani thra tizawng zawngin an thaw senga” (17:6) ti ngirhmuna ramsa anga la’n tâl zing ei ni chieng khop el.
Nina thuo tam
Hienga Coleman Factor-in hnam le hnam, sungkuo le sungkuo le pawl le pawl inkara hem a thlak pei dan pangzatumzie hi ka ngaituo laiin, Nobel Prize dongtu mi ril Amartya Sen-in Identity & Violence: The Illusion of Destiny (2006) phek 19-a, “Histawri le trobula inthok ringotin mi nina amanih le thrangna pawl en ding a ni nawh. Nina insersuon tam tak a ruolin ei nei kop a nih. Kei hi Asian mi, India khuo le tui, Bengali-a khom kan thlatuhai chu Bangladesh-a inthoka mi, America le Britain-a khawsa thei dinga phalna nei, thiemna tieng economist, philosophy buzawla khom inhnel hlak, ziektu, Sanskrit thiem, tlangkhuo (secularism) le mipui rorelna khawl (democracy) dittu, mihriemah pasal, nuhmei zalenna dittu, nuhmei-pasalna tienga mi pangngai, a pangngai lo gay hai le lesbian haiin an chanvo zalenna hmang thei dinga suolpuitu, sakhaw tieng chu Hindu, Brahmin chi-a mi ni lo, sakhawmi lo khawsak dan zuitu, thi hnunga thlarau khawvel um ring lo mi ka nih” (And yet history and background are not the only way of seeing ourselves and the group to which we belong. There are a great variety of categories to which we simultaneously belong. I can be at the same time, an Asian, an Indian citizen, a Bengali with a Bangladeshi ancestry, an American or British resident, an economist, a dabbler in philosophy, an author, a Sanskritist, a strong believer in secularism and democracy, a man, a feminist, hetero-sexual, a defender of gay and lesbian rights, with a nonreligious lifestyle, from a Hindu background, a non-Brahmin, and a non-believer in an afterlife (and also, in case the question is asked, a non-believer in a ‘before-life’ as well) tia nina thuo tam umzie ama nina ngei tekhia hmanga a hril chun a mi hung deng a.
A nih, mihriem amanih pawl hin a ruolin nina tam tak ei nei kop a. Unau sul khat kuol le suok khom hmel le pumruo inang lo le kong hrang hrangah nina inang lo tak tak ei tam. Chuonga mimal senga ngaituona hrang put le thlarau tum seng neia siem ei ni lai zing chun, tla tlâng le intuo khawm a, innghai tuo a, dam khawsuok dinga khuonu ruot ei nih. Chun, sungkuo tum tum tla khawmhai chu damtea lien lema hung insung khawmin, ei dam khawsuokna dingin hnamah ei hung insiem a, ei delna ram seng chu ei ramah ei hung huol a, ei hluo le ei ta china ei ngaiah ramri ei hung thre a, chu chu ei hung uipui sa hau a, ram le hnam tranna lungril (nationalism) hi a pieng hlak a nih. Sienkhom, taksa pumkhat chu bung hrang hrang inchuktuoa siem a nizie ei hriet naw pha amanih, chuong ang boka nina pakhat chauh hnuoia inkhum ei tum pha, mani hnam le nina bing tranna uchuoka vai ruiin ei um a, mi dang hrim hrim ngai thei nawna lungril a pieng a, buoina a suok naw thei nawh.
Inrum rûta khaw dang ngha loa mani hnam amanih pawl chauh invoihai hin ram le hnam le pawl dingchangna ding lampui siel nekin, hrisel taka ram le hnam kal chawi ding sukchaitu le sukbahlatu an ni nuom khop el. Trum khat trum hnih an hlawtling palh a ni khomin an thilthaw kakhawkin hun sawta a nghong siet a rapthlak lem daih hlak. Thuvar 16:4-a, “Lalpan iengkim hi san neia a siem a na, mi rilohai khom hi sietna nia ding an nih” ti-a a hril dam hi ngaituo tham a nih. Juda mi maktaduoi ruk neka tam rawttu Hitler dam kha, chu dinga ruot am a lo ni ding maw? Judahai chun, “A nih” tiin don an ta, German hnam tranna thlaraua vai ruituhai chun, “A ni teuh nawh” tiin an don ka ring.
Lungnona thrang loa a lailunga thudik ngir hmu thei dinga sungril mit varna nei le an thil hmuhai huoisen taka tran ngam le puong suok ngamtuhai chu an nih khawvelin ei mamaw le Pathien khomin a hmang trangkai nuomhai chu nih. Saula chun Juda mita Isu le a zuituhai a en sung chun an hnam hmelma, an Pathien hmelma, an sakhuo kaltu niin a hmu a, hrem dingin a kut a’n tim nawh. Sienkhom, chiengna kotsuo Damaska-a mit thar a hung put hnung chun mi thar, hming thar Paula a hung inchang a, hnam tin le mi tin huop chanchin thra tlangsamtu a hung ni ta lem a nih. Chuong chu a ni lai zingin, Hebrai mi, Israel mi, Juda mi a nina, a aidentiti le a hnampuihai a tranna le an ta dinga hmakhuo a ngaina chu sunhang khat khom a danglam nawh ti a lekha ziekah ei hmuh (Rom 9-11). Krista ringtu intihaiin hi thuruk hi ei man phak naw chun ei zui hi Krista ni loin buoina lal, hnam bing trannaa ei mit sukdeltu le Sheol pana mi thruoitu zui ei ni lem el thei a nih ti hi inngaituo a trulzie dam chu ka ngaituo zui pei a.
Ieng leia sin intieng hnêr hnŭr laia Haflong-Muolhoia ZoFest 2014 hmang dinga fe am ka na? Ieng leia a huoihottu MZP thruoituhaiin insuikhawmna thupui hriltu dinga ngaina taka an mi fiel non ngat ngat hlak am ning a ta? Tu hi a zawna voi thum- ZoFest-2009 (Aizawl), ZoFest-2012 (Darchawi), Zofest-2014 (Haflong-Muolhoi)- an mi fielna le ka fena a ni tah. Fe hman lo dinga inngai le insie tah ka ni hnung khomin, zawlnei Jeremia ang deuin,
Ru sunga mei thun angin,
I thu chun ka lungrilah,
Mei angin a mi hlieu a,
Ka pai trok trok thei naw a,
Ka topui thei hlol si nawh (20:9)
a ti ang el khan, insuikhawmna thu tlanginsampui dinga sungrila mi turtu le mortu a um tlat leiin, upat le inhman naw thu chuh menah thlakin, ka’n thok suok nawk el hlak chu a ni hi tie! Damnaw at ngai le a enkol lai tam tak fesana Guwahati-a inthoka ama car ngei khala mi fepui dinga inpe Dr. Chongrolien Chonzik khom hin natna inrik lem le trium lem, kansar zung neka sei lem le hrat lem, ei mi le sahai thrâm hlum mektu, inchimralna kuta inthoka san suok an ngaizie thu hril dinga fe chu rongbawlna poimaw chungchuong a nizie sungril mita a hmu chieng lei a ni naw thei nawh.
High Court buzawlah
Kan vuongna chun a tlung hun ding taka ruot 0735 hrs-ah a Guwahati a mi tlungpui a. Tuta trum chu kha hmaa inthoka sir dinga ka ti, sienkhom Guwahati High Court tieng an inson hnunga ka la sir hman lo, Justice Tinlianthang Vaiphei ina tlung dingin rem ka ruot a. A mi tuok dingin erpawt-ah Protocol Officer a hung tir a. Prime Minister Narendra Modi inzin lai a ni leiin khang anga khaw trop le porche Guwahati kha a hmai fai vukin an lo chei a, lampui khom taptebul anga tler lupin an lo zut nam a, ni danga darkar khat vel bek tlanna hlak kha minit sawmpanga vel chauh kan aw a, Gauhati University-a ka kai lai (1964-66) a kan University bus manna hlak dîl bula bungalow lien tak, Chief Justice kuartar dota um, kha hmaa ralkanga kan thlir ngam chauh hlak ina chun, kum 48 hnungah, sorkar sina inthoka ka penson hnung kum 12-ah, Delhi-a kan khawsak hnunga kan ina hung leng hlak Thanga le annu Goldeni chengna bungalow-a chun intichongpu takin, kan lawi lut tah a nih.
Justice T.Vaiphei hi Zo hnathlakhai laia High Court Judge puitling ei nei hmasa tak a nih. Churachandpur High School headmaster Thianlam Vaiphei naupa, 1956-a pieng, 1979-a Delhi University-a inthoka LLB Degree a hmu zo chara Churachandpur District le Imphala ukil sin thaw, 1998-a Mizorama inson, 1999-a Assistant Advocate General of Mizoram hung ni, 2000-a Additional Advocate General hung kai, 2003-a Gauhati High Court, Mizoram Bench-a Additional Judge kai le February 28, 2005-a inthoka Gauhati High Court-a Permanent Judge kai tah, Zoram khawvela dan kengkawtu Judiciary van zawla ei sikhawvar la um sun a nih. A tum hrim le nuom lei khom ni loa Mizoram State hluo dinga High Court-a Judge pahni hmun ruok um laia pakhat hung hluotu a ni a. Kum tam tak hnunga khom hmun ruok dang hluotu ding chu an la’n vai zing a, sienkhom hluo sip vak tah dinga beisei a nih.
Dan kengkawtu, tran le thlei bik nei loa dan bawsehai hrem a, indik lo taka intumhai insuo dinga rorelna lal hmol viliktu an ni leiin, porche theina lakah an inthier fihlim a ngai bakah mi thil inhnar a, kut tling lo thil an ban nawna dingin, tlaksamna lakah hum an ngai a. Fak le dawn le silfen ti lo, insung enkolna dinga an mamaw iengkim deuthaw chuh sorkarin an phuhruk a, airconditioner thra chi ringot khom sawm lai an inah an inther fuk el a nih. An in hmaiah lawn lien tak el, duthusama carpet anga hlobet innem chi an hrut ruol le sir tuokah par chi hrang hrang le kawldai an phun huol, mi za ruol inlengna, hmun dangah fe ngai loa zing le zan tieng walking nei theina khop a um a. A in chawr tieng chun Brahmaputra vadung le inepin bathlar inhoi tak le nihliep anga inkûm zar hnuoia ‘Bar’-a hmang thei dawsawn kuol, chilled beer dom puma a bul ela thing insi khupa cheng vate chi hrang hrang inhram ngaithlak zing puma suk le tunga longa intawlhai le, vadung lailung thlierkar kama cheng, tuivaarngo ruol tuolchai lai thlir veng veng theina a um a. Phunchong kûr duom duom tienami ang khan, ei hmaa khawvel mawina (nature’s beauty) hningzu hung far thla chu dawkin, Peter ang khan bawkte khaw ei rot nuom zing el a nih. Hieng hmuna hin a nih van le khawvel lungsi taka an infawp hlak chu nih.
(December 17, 2014, Delhi)
###
No comments :
Post a Comment