Pipu rauthla leng an kaina;
Chengrang le an sai ram suokna,
Do tin thlunglu an vănna ram.
Singmit lenin ka thlir vel a,
Singkhuol ei lo chang zo ta si!
Lunglam ka’n vai, hril a hai ngei,
Suilung khuo ang zingin an nim.
A ru no no suokna ramah,
Hringchan ei inzuom ve si chun,
Inthuruola, insuikhawmin,
Phei khai ruolin, hma tawn ei tiu.
Fam chang loa hring chang ding chun,
Hi hi ei biethu ni raw se:
Sem sem, dam dam; ei bil, thi thi,
Dam leh tlang khat, thi leh ruom khat.
Thiemna,varna thuom inbelin,
Inthuruolin hma tawn ei tiu;
Ieng leiin am ei ram ngeiah,
Singkhuol chan chang ei inphal ding?
Dam khawsuok hnam tin chan a nih,
Ram, hnam humhal an maw a nih;
Unau suopuihai, juong tho ro,
Ram sanin kal chawi tlang ei tiu.
Malsawmtu Khuonuleng zarin,
Zangkhuo la bungbu ngei a ta;
Pipu ram sat, ei ram ngeiah,
Sinau ang la’n nui nawk ei tih.
(January 15, 2015, Delhi)
Note: Zana ka manga ka hla lo phuok, a tuk January 15, 2015 ka ziek suok a nih. LK
###
No comments :
Post a Comment