advancement of knowledge than the ambiguity of words.
- Thomas Reid
Lesson Khatna chu 2015 Pathienni hmasa tak January 4 khan Delhi Thurawn-ah insuo a ni a. Chun, Tv. Lalremlien Neitham tlawmngaina le thrahnemngainain website/facebook threnkhatah a lo thun bok a, Delhi tlanga um naw hai khomin ei Lesson hi an mi lo inchukpui a nih ti ei hrietin, lawm a um khop el. Kil le kapa chenghai khom internet khawvelin dawkan pakhat kîl tlang theiin a mi siem tah leiin, chu remchangna le hamthratna thar chu hlawk taka hmang trangkai ei tum a, ei hmang trangkai ngei ei beisei bok a nih.
Chu chu a ni laiin, ei sawsaiti hi bu thleng khat ot tlang la ni inla khom, tuthlaw le laptop sivilaizeson inkara khawsa map map ei la ni tlat leiin, ei khuongruol vong thei nawh ti hi ei hriet nuom a um. A thren vuongna hrat chi anga fe hrât nuom an um laiin, a thren ruok chu bawng tawlailir speed chu hril lo, chengkol speed-a intawl trĕk trek dam; a thren chu hmasawnna thu hril sia êk che inthrunga intawl son tum lo hrim hrim dam; a thren chu chĕpa anga ‘awk ta lailêng’ tia mani inawkna hrui sût nuom lo, awk tănga um kha inhoiti le uongpui ni awm dam; a thren chu A AW B hawrop lam dan la thiem chieng lo le thiem nuom si loa thu le hla inril khel tum, literechar umzie hre si loa thu le hla khawvel paw inthuk anga inngai tlat pawl dam ei um pol nuoi a. Pakhat fâk phak le inhnikti kha pakhat mangphan phak lo le intem phak lo dam a ni tlat leiin, ei songnawi dan le saisa dan hi inkhi ngaina tak khom a um nawh.
Hi hi thil mak bika ngai ding ruok chu a ni nawh. Khawvela cheng hnam tin nunah thim le var inthre hun, bet-le-but hun, khawfingchat hun hraw châng a um naw thei nawh. Mi mal nunah thiemna kawitan hraw leia khawfing inhma taka inchat le khaw vara lut an um laiin, hnam nuna khawfingchat hun sung ruok chu a sawt a, a tam lem chu khawvar hmu hman loa boral an nih. Kum sang tam tak sung hin hming nei khopa sivilaizeson pieng tah chu, Arnold Toynbee inkhi danin, 19 major, 4 aborted & 5 arrested civilizations a ni a, a fe mek chu tlawmte chauh an ni tah. Chuonghai laia huvang nei tak Khawthlang Sivilaizeson (Western/ Christian Civilization)-a chun sakhuona leiin ei lo kop ve tet a, tlang lien taka tho pakhat fu tluk khom ei ni nawh. Sakhaw hlun Hinduism, Buddhism & Islam- zuitu ram le hnam lien lem pathum chep dè karah ei khawsa a, dam khawsuok ve tumin mani taptebulah ei inhŭk ve pap pap a. Sienkhom, a ru no no suokna khawvela hin dam khawsuok ei tum si chun a hun zira inthlakthleng pei a, hmasawnna lampui hraw ve a, a taka thaw suokna nuna leng a ngai. Mani tapsaka inhrosak ringotin mi san naw nih.
Ei hmasawnzie le hnufuolzie inkhi theina tam tak laia pakhat chu trong ei hmang indik le indik naw-ah a nih. Ei lungril le ngaituona darthlalang fie tak chu ei trong bau suok a nih. Ram le hnam hmasawn ei tihai hi an hmasawnna kong sengah an trong khom nasa takin hma a sawn a, trong hmang khom an fimkhur. Trong hi mihriemin ei ser suok le sukhmasawn lieu lieu a ni leiin, a hmangtu mihriemhai dung neka insanga inthrang thei der lo a nih. Threnkhat chun trong hi Pathien mi pek niin an hril hlak a, sienkhom chu chu thu kawrong a nih. Pathienin trong bik a nei naw a, mi a biek pha leh a mi biek khan ama trong angin a lo hriet a, tronga a hril suok thei lo thu khom a hrilpek hlak. Trong hi ei nunphung, khawsakzie le ei chengna leilunga ni tina ei thil hmu le tonhriet hrilna dinga ri dang dang ei ser suok, a hmangtuhai hmasawn dan ang peia ni tina insiem thar le inthrang tung pei a nih.
Trong hmang indik poimawzie hi hril sei khom a ngai nawh. Thrang khat ei inchuktir thiem chun a thrang nawk hai an rochung a, hma an hung sawn pei a; ei inchuktir thiem naw chun thrang tamin a kakhawk an tuor ngat ngat a, a tawpah a trongin a thi pha hlak. Ka hmu dan chun, BSI sut ei Baibul hmang lai hi Hmar trong sukhringtu a nina chin a um lai zingin a chokchawrawitu khom a nih ti hih sel ruol lo a nih. A ieng phek khom hi hang phok inla, abikin Thuthlung Hlui tieng, Hmar trong indik loin a phan rang nuoi vong a nih. Indik anga ngai um inla khom, Pathien thu ziekna a ni lei elin a’n dik pha chuong nawh. Pi le puhai huna an thil hmu phak china an hlut tak chu darsen (copper) a ni a, thil thra iengkim tekhina trongkamah an hmang: dar ang tong, dar ang leng, dar ang sai, dar ang mawi, dar ang hlu, sakhmel dar zam, sakhmel dartui luon ieng. Ei Baibul trong hmang khom chuong ang chun entona hmang dinga a thra tak niin an mi hrilpek hlak. Sienkhom, rangkachak a hung suok hnunga dar hlutna a hlan daih angin, thu le hla thila khom ei mit a hung var pha chun indik lem le thra lem ei hung hriet a, kha hmaa ei lo hlut le ngaisang khom kha a hung hlăn hlak.
Pipuhai trong lo ser le an thu le hla lo phu suokhaia hmang tlak le thrahai vong him le siem phuisui pei hi thrangtharhai liengkoa innghat a nih. Chu mawphurna hlen ding chun dier kei singa thrang lak a ngai. Trong hmang dik thu ei hril hin, famkimna ram tieng ei ngaituona, ei lei le hmur inhĕmtir ei tum a nih. Tuta truma ei bi le ngaituo tlang dinga ka dit chu kawk thuhmuna ei ngai le hmang, ni si lo, ‘tina a nih’ tia ei hril tlip nam fawm, tìna ni si lo laia threnkhat a nih. Hang bi vak ei tih.
Thil suol thaw Vs Thil thaw suol
Rom 3:23 chu BSI le BFW Version-ah, “Mi po poin thil an suksuol vong ta a, Pathien ropuina an chang zo ta naw a nih” tiin an inlet a. Chu chu English version tin deuthawah “For all have sinned and come short of the glory of God” tiin an inlet deuh vong a. Hi taka ei bi ding chu verb-a thu mal hmang ‘to sin’ ti, ‘thil suksuol’ tia indik lo taka ei inlet hi a nih. ‘To sin/ to commit sin’ chu ‘thil suol thaw’ tina a nih. Thil suol thaw chu thaw lo dinga ti dan bawsiet a nih. Eden huona fak lo ding ti Pathien thupek kha dan chu a nih. Dan a um naw chun suol hi suola ngai a ni nawh (Rom 5:13). Sienkhom, fa lo dinga ti thupek chu bawse-a an fak leiin thil suol an thaw a nih. Adam le Evi khan an thaw suol amanih suksuol a ni nawh. Pathienin huon lailunga thing ra fak a khap thu le an fak chun an thi ding a ni thu khom baihat hrilin Evi khan rûl kuomah a hril zat zat a ni khah. Thaw lo ding a nizie hre zinga thu an awi naw leia an thaw a nih. Thaw suol amanih suksuol amanih ruok chu dannaranin tum reng khom ni loa thaw palh thil a ni tak a, chu chu Saptrong chun ‘to commit mistake/blunder’ an tih.
Hi thu hi a poimaw em leiin hang pot sei met ei tih. Lekha i ziek a, inhmaw taluo leiin amani le fimkhur naw leiin amanih thu mal threnkhat i ziek hmai a, spelling i sukdik naw bok a. Tuolah saikalin i tlan a, mi i baw a, i thaw suol a nih. Lamah i lawn a, i ke i bil a, i thaw suol a nih. Tui i dawn a, i’n hak a, i dawn suol lei a nih. Chem i tât a, i kut i tuoi at a, i thaw suol a nih. Hieng po poa hin, chang suol amanih i thaw suol pal (committing mistake/blunder) a, sienkhom thil suol (committing sin) i thaw nawh. Amiruokchu, hieng i thaw palhai lai hin thaw lo dinga khapna dan a um a, chu chu inza loa i bawsiet a ni chun, thil suol (sin) i thaw a nih.
Ei buoina tak chu thil suol thaw (committing sin) le thil thaw suol (committing mistake/blunder) indanglamna ei hriet hrang naw hi a nih. Thil suksuol amanih thil thaw suol hi thil suol thaw tìna angah ei ngai. Sienkhom, theological term-a chu sim le hmar anga inhlat a nih. Thil poi tak chu, Baibula thil suol thaw (committing sin) ti po po hi thil suksuol amanih thil thaw suol (committing mistake/blunder) tia ei inlet suol vong el hi a nih. Chu indanglamna khom chu hre hrang loa Baibul inlet amanih rongbawl sina ei hang pu chot el dam hi chu huoisen tak chu ei nih. Ei mawl dan ang peia hrem loa a lunginsietna kuta mi domtu Pathien ei nei hi chu ei vangnei thlawt a nih.
Hi ei ngirhmun hi hre zingin, Delhi Version-a chun, “Mi po poin thilsuol an thaw a, Pathien ropuina an chang thei ta si nawh” tia sie ni a, a hriltupa Paula khom a lung a dam deuh huoi tah ring a um. Ei hriet ding chu, ‘thil thaw suol’ (committing blunder/ mistake) ti hi ‘thil suol thaw’ (committing sin) tìna a ni naw thu a nih. Hi thil indanglamna hi an hriet naw lei amani ding, BSI Version nuhnung takah Genesis 2:17-a ‘sie le thra hrietna thing’ ti hlak kha ‘suol le thra hrietna thing’ tiin an hung thlak chu tie! ‘Sin’ le ‘Evil’ indanglamna an hriet chieng naw leia an thaw ni ngei a ta, an hriet fie pha chu an thlak nawk nghal beisei inla. Hnam danghai anga thil ngaituo chik mi ni inla chu, hi thil lei ringot khom hin hi Baibul Varson hin voi tam raw tuok tang a tih. Sienkhom, muong muta hmang pawl ei la tam. A’n dik nawna le chieng nawna lai lai hi a Pathien thŭna nia ngai pawl ei um bok. Pathien thu ei ngai poimaw nawzie le ei sùt chieng ngai nawzie chieng taka hriltu a nih.
Ta dinga thi le aia thi
Hi trongkam pahni hi kawk inangin ei Baibul-ah an hmang inkarthlak rawn hle a, thil thuhmun a ni nawzie ruok chu ei ngaituo ngai nawh ni mei a tih. 2 Kor 5:14 a chun “Mi po po thi aiin mi pakhat a thi a, chuleiin, mi po po chu an thi a nih” dam ei ti a. Ka aia thi le ka aia tuor a ni chun ka thi le ka tuor a ngai ta nawh. Zuolkoa ka aia fe an um chun ka fe ve a ngai ta naw a, zuolkoa ka ta dinga fe an um ruok chun siet kan tuok tina a nih. Ka ta dinga hla mi khumpek dingin hla sak thiem ka ngen thei a, sienkhom an hla khum chu ka aia khum an ni naw a, ka ta dinga khum an ni lem. Krista aia palai ka ni chun Krista ai ka aw ta leiin ama thrang a ngai ta naw a, Krista ta dinga palai ka ni ruok chun a tirko ka nih tina a nih. Rom 8:32-a chun “Ama Naupa ngei khom hla loa ei renga aia petu chun thil dang po po khom a thlawnin a mi pek sa naw ding am a ni?” dam ei ti a. Taksaa eini aia thi ni tak tak sien, thi loin, a hringin van ram ei inlawi vong ngai a ta, thlarau tienga eini aia thi ni sien, chatuonin hremhmuna ei fe aia a fe ngai bok a tih. Krista chu ei aia thi ni loin ei ta dinga thi a ni lem.
‘Ta dinga thi’ ti le ‘Aia thi’ ti danglamna hre nawtuhaiin ‘Aiaw Theulawzi’ (Substitute Theology) chen khom hi an hung vor suok a nih. Ei hlaa hai khom a luong lut nasa ta hle. Ei berampuhai a tu el khom thu hril hi ngaithla la, hi thila ei băngbozie chu hre thei nghal i tih. Pulpit hi ei trong thatna zawl lien tak a hung ni tah hielin a’n lang a, ei trong ei that zatin Pathien thu khom ei suosam sa bok a nih. Inthiem naw nachang ei hriet phak naw leia ei lo thaw hlak a ni chun, hriet naw leia thawtuhai chu ngaidam dingin Isu khomin a Pa kuomah a hnipek a ni khah. Ei hriet chieng hnunga ei la thaw zom zing a ni ruok chun a maw chu eini le ei hnamin a tuor zui pei ding a nih. Tu chena ei tuor tak dan khom hi pangzat a umin sui tham a tling takzet a nih.
Suong Vs uong/chapo
Tirko Paulan ieng nèk khoma kros a ngai poimawzie le hlutzie a hrilnaa ‘suong’ ti ei hmangpek hi Saptronga chun ‘boast’ ti a na, chu chu a mal ngawka inlet chun ‘chapo, uong’ tina ning a tih. Hieng thu mal ‘uong, chapo’ tihai hi Grammar dan chun tuortu Object thrang loa hmang thei a ni leiin Intransitive verb an tih. Amiruokchu, ‘uongpui, chapopui’ (boast of) tia ei hmang pha ruok chu ei uongpui le chapopui thil kha hril sa a ngai leiin object thrang sa loa hmang thei a ni nawh. ‘Suong’ (be proud of) ti khom transitive verb a ni leiin a suong thil (object) hril sa loa hmang thei a ni nawh. Entirnan, ‘Lala a uong’ (boast) ka ti thei a, chu chun tuortu (object) ieng khom a ngai nawh. “Lala a suong” ka ti ruok chun mi dangin Lala a suong (to be proud of) thu ka hrilna a ni dai a nih. ‘Lala a’n suong=Lala a + insuong’ ka ti chun ‘insuong’ tia ‘in’ ti tak hi reflexive verb siemtu a ni leiin object (tuortu) ngirhmun a hluo nghal a nih. Paula chun tirko danghai rongbawlna chu a suong hle laiin, ama rongbawlna biel puo tienga mi dang thaw inrimna chu a uongpui nawzie a hrila hin (2 Kor 10:13-15) ‘suong’ le ‘uong’ danglamzie chu a hril chieng hlein ka hriet. Exam-a mi thaw thrat ka suong thei a, ka thaw thra ve chun, chu chu keima thilthaw a ni leiin ka uongpui thei.
Ei thil hril hi a teknikal êm leiin, phêk tam ziek thei a ni lai zingin, tiemtu mimir ta dingin nghokum a ni ding ti ka hriet a, ei hril tum takah lut lem ei tih. Hi Baibul chàng tar langa ‘suong’ (to be proud of) ti ei hmang hi a’n dik naw a, ‘uongpui’ (to boast of) ti hmang ding a ni lem. BSI le BFW inleta hin ‘boast” ti po po deuthaw hi indik lo takin ‘suong’ tiin an sie deu vong a nih. Delhi Verson kan buoipui hlim lai, inring naw kara baihat ta sain a mi thruoi chang a um leiin hi ei chang tar langa hin ‘suong’ ti kan lo hmang pal ve a, sienkhom Baibul pum kan sutin “Kei ruok chun ei Lalpa Isu Krista kraws chauh naw chu uongpui ding hrim ka nei nawh” tiin kan siem indik tah a nih. “Suong” bilpui umna 2 Korinth 10,11 & 12 hi tiem la, ‘uongpui’ ti dinga ‘suong’ ei hmang nasatzie chu hmu thei ei tih. Hienghai hi Delhi Version-a chu kan siem thra vong tah niin ka hriet.
Ta dinga hemde?
Galati 6:14 hi Bible Society of India (BSI) le Bible For The World (BFW)) varsona chun “Kei ruok chun ei Lalpa Isu kros naw chu ka suong naw ding zie chu, chu zara chun khawvel hi ka ta dinga hemdein a um tah, kei khom khawvel ta dinga hemdein ka um a nih” tin an mi siepek a. Hang tiem vuoi le ngaithlak vuoi chun thra êm êm, a thu khom fie le fel thlup a hoi a, Baibul chang laia baihat hlaw rawn pawl tak khom a ni ring a um. Ngaituona ril hmanga chik taka ei bi ruok chun pangzatum deu a nih. A tawi zawngin, a trong kam hmang a’n dik naw a, a grammar an dik naw a, a hriltupa hril tum a kawk naw a, Pathien thu a kal bok a nih. Paula kha hung tho nawkin hmu sien chu, a hril der lo ei inhriltir leiin ei bekberêpah mi thrâm nuom hiel a tih ti ring a um. A sanhai chu, a tawi thei ang takin, a bat batin la hung hril ei tih.
Chîk deuin hang tiem la, “Kei ruok chun ei Lalpa Isu Krista kros naw chu ka suong naw ding zie chu,” ti sentence hi principal verb-in inzuitir a, sentence bukima siem loin, laklaw deuin an maksan a, sentence dangin an sunzom dai a, pa fimkhur le lekhathiem Paula kha sentence kim loin lekha an inziektir dêr a nih. Chu thil chu Grammar thil a ni leiin a la poi sei rak loah ngai inla. A pangzatum tak chu a zuitu “chu zara chun khawvel hi ka ta dinga hemde a ni tah, kei khom khawvel ta dinga hemdein ka um a nih” ti hi a nih.
Hi thu ei inlet hi Paula khan hung hmu sien chu ei tuolthu buoi ngot a tih. Paula thu ziek po poa hin a ta dinga khawvel hemde a ni thu le khawvel ta dinga ama khom hemde a ni thu sunhang khat khom a ziek naw a, ziek pal chu ni sien, a thu ziek po po hi Baibula inthoka pei hawn vong ngai mei a tih. Paula tlanginsampui tak chu mi tin ta dinga Isu Krista hemde a ni thu a nih. Chu thu chu zirtir loa Isu chanchin thra a ni naw zawnga kei kawi taphot chu trongsie phur dingin a hril hiel a ni kha. Khawvel hi Paula ta dinga hemde a ni naw a, a ta dinga hemde chu Isu Krista a ni lem. Paula khom khawvel ta dinga hemde a ni bok nawh. Lo ni sien chu buoithlak hleng a tih. Khawvel ta dinga hemde a ni chun khawvel ta ning a ta, ama ta dinga khawvel hemde a ni bok chun khawvel chu ama ta ning a ta, nunghak le tlangval inthichil tienami ei tiem hlak, Romeo & Juliet anga inpom hlum thrak ning an tih. Paula hril tak ruok chu kros leia khawvel laka a fihlim tak thu, khawvel thil hrim hrim a thlauthlak takzie le inzomna an nei tak nawzie thu, ama nina hlui, Adam hmasa hemde a, mi thar a hung ni tak thu a ni lem.
Hi taka thil sukbuoitu chu ‘ta dingin’ ti hi a nih. A san tawite hang hril ei tih. Lusei tronga Baibul inlettuhai khan an thaw thrat hle laiin, baksamna tam tak an nei a, chuong laia pakhat chu ‘for me’ ti le ‘to me’ tia ‘for’ le ‘to’ hi a hmangna zira umzie danglam put an nih ti ngaituo chieng loa ‘tan, atan’ tia an lo inlet deu vong lei a ni hmasa tak a. Hmar tronga a ngiel a ngana Lusei trong Baibula inthoka an inlet ve khan chu chu ‘ta dingin’ tiin ei hung inlet ve ta vong niin an lang.
Chun, hi taka “chu zara chun” ti khom hi ngaituo tham tak a nih. Saptronga an inlet bu hrang hrang hi hang bi inla, ‘chu zara chun’ ti hmang hi ka hmu der naw chu tie! By which, through which, by whom, through whom an hmang vong a, ‘chu zara’ ti kawk hnai deua hmang chu Good News Bible a na, chu taka chun “for by means of his cross, the world is dead to me, and I am dead to the world” tiin an ziek a, chu khom chu ‘chu zara chun’ tina a la ni chuong nawh. A ieng zar le lei khom ni sien, khawvel ta dingin Paula chu hemde a ni naw hrim hrim a, khawvel khom a ta dinga hemde a ni bok nawh. A ta dinga hemde chu, mi tin ta ding khoma hemde, Isu Krista a nih. Hi changa Paulan a hril uor nuom chu Galati 2: 20-a “Kei chu Krista kuomah kraws-a hemde ka ni tah a, ka hring zing ta naw a, Krista chu keimaah a hring ta lem a nih..” ti kha a nih. Thil dang le inzomna a nei ta nawzie, ei hla phuoktuin,
Aw Kros, ka lu mi domsangtu,
Tlansan ngam ta naw top ka che;
Ka phûm tah, dam lai ropuina
a ti ang nun kha Paula hin a hril a nih.
Delhi Version-a chu Galati 6:14 hi “Kei ruok chun ei Lalpa Isu Krista kraws chauh naw chu uongpui ding hrim ka nei nawh. Chu kraws-ah chun ka lakah khawvel hi hemde a ni tah a, kei khom khawvel lakah hemde ka ni tah” tia sie a ni a, duthu la sam chie naw sien khom, Paula hril tum chu a kawk fuk tah niin ka hriet. A nêka indik lem le fie lema inlet thiem ei um chun thrang hung la mol raw hai se. Trong hmang indik lo leia Pathien thu ei suosam po po hi inthiel fai tum ei tiu.
Vêng Vs Khuo
Mihriemin hma ei sawn ang peiin thil ei puong suokna dinga trongkam ei hmang khom a hung chieng tung pei hlak. Thil bukna le inkhina mumal tak ei hmang hma chun thil lien le chin, inthuk, insang, inhnuoi, hlat zawng, hnai zawng, rik zawng, hun le thil dang dang inkhina an lo hmang kha a chieng naw em em. Thil inkhina piu, khâp, tong, trâng thre, hlam, fun ti dam; hlat zawng inkhinaa dumtong chen, chil sak phak, lunga deng phak, per phak, fing khat, chawhma lam, ni khat lam, a kara zan riek ti dam; lo an nei lienzie hrilna trîn khat/hni/thum hmun ti dam; bu an thar zat hrilna ke-thup, chemsat, sipzawn, tuha-zawn, hreiha-zawn, silai-zawn, rawtluon-zawn ti dam; hun inkhina thimbut (unau hmel hai), lêng hun, leng hnot suok (arkhuong), zanril arkhuong, khuon hmasa, khawfingchat, vartrien, tho hun, zingbu fak hun, vairik, thingphur hung hun, sunchang (sunbu fak hun) chawhnung thlang her, vaimim tui suong hun, zanbu suong hun ti dam le a dang dang hai hi a chieng naw em em. Sana ei hmang hnung le inkhina le bukna metric system ei hmang hnung chun a darkar bi amanih, inches/meter, kilometer, gram, kilogram, quintal, ton, litar (litre), gallon ti zawngin ei hril ta a, buoina ding a um ta nawh.
Chu khawvela ei lut hnung khoma eini rawiin ei ram, ei chengna khuo hrim hrim hrilnaa ‘Vêng’ ei la hmang tlut tlut zing hi a mak khop el! ‘Veng tieng ka suok ding; Kan vengah chawl ka hmang; Veng hmeruo ka hung hawn; Veng tieng chanchin i hriet am?’ le a dang danga trong chăng lakna taka ‘Vêng’ ei hmang hi a san iem ning a ti aw? Lekha zieknaa chen ei hmang inrim khop el. Khuo (village/town) a um a, chu sunga chun ‘vêng’ hrang hrang a um. Meitei trong chun ‘leikai’ an tih. Saptronga ‘locality’ an ti hi a nih. Delhi-a hin veng tam tak a um a, eini rawi inbeng khawm rawnna Munirka hi ‘vêng’ pakhat a ni a, R.K.Puram khom a nih. Veng threnkhat lem chu Tuithraphai let iemani zata lien a nih. Kan umna veng Mayur Vihar-1 a inthoka Mayur Vihar-3 tontir chu km 8 hiela hla a nih. Chung chu ni sien khom, Delhi-a um kan ni a, ‘vênga’ umin kan inhril ngai nawh. Vaihai khomin Delhi hi ‘veng’ an ti ngai nawh.
‘Vêng’ ei la hmang tlut tlut san chu ei lungril le hisapna hi ‘vêng/leikai’ zawnga a la fe lei a ni el thei. Chu chu thil suongum taka hril ding chi a ni nawh. Bansan ei tiu. “Khaw lai am i fe ding?” tia an mi’n don pha leh “Vêngah” tiin don ta nawng ei tiu. A chieng nawh. Ei fena ding khaw hming amanih hmun hming hril fak fak lem ei tiu. “Vêng hmeruo a hung tlung” ti nekin “Thingtlang hmeruo a hung tlung” bek ti’ng ei tiu. Chu nêka fie lem a, “Zawngtra, ankhapui, singzuor, khanghmuk, rawtuoi, manta samtrok, tierhrep etc a hung tlung” ei ti chun a thra deu deu. Thu le hla ei ziek pha lem chu fimkhur zuol a thra. Pên khat bekin hma tieng pan tum ei tiu.
(January 6, 2015, Delhi)
###
No comments :
Post a Comment