Ruolpa Thanzau

Life’s but a walking shadow, a poor player,
That struts and frets his hour upon the stage,
And then is heard no more...
- Shakespeare’s ‘Macbeth’

Delhi, September 25, 2008 Ningani zan tieng dar 6:45-ah Lalthruoisuok Pudaite-in a mi hung biek a. “I ruolpa Thanzau chanchin i lo hriet t’am? Dar 5:40 khan a lo liem tah a ni awm ie” tiin a mi hung hril a. HBO Channel-a film pakhat ‘The Firm’ ti ka en lai chu ka that a, TV hmai ruok le inthim chu to trokin iemani chen ka en a. TV ka hmet hlum ruol chara umzie bo a ni nghal ang bokin, mihriem hringna khom hi a chat thla chara inthokin umzie bo a ni nghalzie dam chu ka ngaituo a. TV chu nuom hun hunah la hmet hring thei a ni a, mihriem hringna bo tah ruok chu thiemna ieng ang hmang khoma sukhring nawk thei a ni ta nawh. A kin a, a chat thla a, a TAWP top el a nih. Vai trong taka hril chun a ‘khawtom’ dan hi ‘bilkul’ deu a nih.

Ruolpa Lal Thanzau Pudaite hi kum 1937 -a Mizoram hmar saka khaw pakhat Khawlêk-a pieng, ka nêka kum hnia vok êk sir hmasa a nih. Hmun hrang hrangah lekha inchuka umin kum 1952 khan kan khuo Pherzawl High School-ah Pawl VII a hung inchuk a. Chuong lai chun kei chu Pawl V ka’n chuk lai a nih. Zirtirtu, a hnunga Pastor hung ni tung pei Ramlien Pudaite inah a um a. Tuta Sielmat Bible College-a Principal ni lai Dr. Jacob Pudaite hai hi an la songnawi hle a, a puok tlei tawl an ni tak.

Ka la hriet zing thil pakhat chu a mu man a nih. An tuola âr lak tumin muin a hung baw a, âr le an insuol buoi lai chu Thanzauin a lo man a. Thingtlanga chu mu dam sanghar dam hi âr ta dinga râl trium an ni leiin a thattu chu lawmman pek tlakah an ngai a, mu/sanghar chu naupang ruolin an zawn a, in tinah lutin artui an khon hlak a nih. Thanzaua mu man hi that loin tuolah a thlung a. A umna in chu lampui bul a ni leiin kan sikul trinin naupangin an lo bawr lai lai a, kan en ve a, mu a hang man el chu kan ngaisang hle a. Thanzau mu man hi a’n thang nasa hle a, khang laia khuo hre phak chin Pherzawla umhai chun tu chen khom hin “Mumanpa kha” ei ti chun Thanzau a nih ti an zuk hriet nal nghal el a nih. A mu mana inthok khan mihaiin mi vangnei le pa chungchuong ni dinga an en tah hrim hrim a ni a, chu chu a nunah a hung sukdik pei bok a nih.

Sungkuo harsatna leiin sikul kai zom thei loin lo sin thaw pumin private-in lekha a’n chuk pei a. Khawlêkah lo kholbing neiin a riekngha a, khawnvar burte de rien rien hnuoiah lekha a tiem hlak a. Hi lei hin ka nêka kum hnia siniar ni hlak kha kum 1956 khan Pherzawl High School-ah Pawlsawm kan thaw tlang a, kum 1957 chawhma khan Imphal-ah kan ekzam a, ama a tling a, sierkopah kei ka tlol thung a. Pawlsawm kan thaw laia inthok hin a nih a thluok thratzie, thil a man hratzie, a tumrùzie le a lungril hang puitlingzie ka hmu suok chu nih. Chuong laia tienami a ziek EI TIEM SIRUK KHA ti chu College a kai hnungin khawlin a sut suok a, kum 1963-64 khan ka tiem nghe nghe a. Tienami ngainuomum le changkang tak el, varnakiular sabzeka inchuk tlak tak tak a nih. Vangduoi thlak takin hi tienami kawpi hi Hmar Literature Society-haiin Manipur sorkara thrangpuina sum (subsidy) hmuna dingin an hawpek a, an thè lut a, an sukhmang song tah a nih.

A nu a thi inhma leiin, an insung somdawltu dingin an khaw nunghak hmelthra Donvung leh an innei a, nau nuhmei pahnih Pari le Evelyn an nei hnungin an inthre a. Thanzau mak vena chu, College a kai hlim, nuhmei a nei hma khoma ‘Paripa’ lo inti lawk tah le chuong anga a ruolhaiin an ko fiem hlak chu a nih. A nau lutir a hung pieng chun a hming dinga ringnaa a lo sak sa ‘Pari’ chu a hung chawi tah hrim a nih. Hi hnung hin IA&AS-a a thrang laiin Shillong-ah Khasi nu leh nau nuhmei pakhat Thiengi an nei bok a. Foreign Service-a zom hnung le kum nga zet a parol hnungin 1972 khan Aizawl nunghak Lalthangliana (Lani) leh an innei a, nau pasal Bula le nau nuhmei Dingdi an nei a. A penson hnungin Aizawl Zotlangah in inhoi tak el an bawl a, chu taka chun a hun tawp chen a hmang ral tah a nih.

Pa lungvar nei, mi thiem le thil chinchang hre tak a ni leiin College a zo charin Independent Church of India (ICI) hmunpui Sielmatah Education Department tieng an ruoi nghal a. Kum 1963-a Sielmat Christian College hong a ni laia a kûl a tâia buoipuituhai laia ban poimaw, Registrar le Secretary, Board of Governors chel kop a ni bakah College an hong khan Tutor-ah a thrang nghal bok a nih. Hieng hun lai hin Union Christian College, Barapani-a a kai laia a Principal ni hlak Dr. H.J.Taylor chu Gauhati University-a Vice-Chancellor a ni ta a, a biek thiem leiin olsam takin College hong phalna khom an hmu nghal a nih. Kan inhmu nuhnung tak, June 27, 2008-a a mi hril dan chun, ama khom Sielmat Christian College-a la sor dingin Oxford University-ah M..A (Philosophy) inchuk dinga tir tum a ni a, admission khom a sukfel vong ta a. Sienkhom, hun hma tieng pei ding ngaituoin innghatna tlak nia a hriet naw leiin Competitive Exam a thaw a, kum 1964 khan Indian Audit & Accounts Service (IA&AS) a zomsan tah a nih. Hieng hun laia an file hlui ei en chun Thanzau kuthnung a tam êm êm.

Sielmata a thok lai hin a’n khat tawkin kan inhmu hlak a. Chuong laia kan titina thupui chu thu le hla sukhmasawn dan ding le Competitive Exam thu a ni tak. Competitive Exam thuah ama hi J.C.Nampui hnung enton tlaka hung zuitu a ni leiin sulsutu poimaw tak a ni a, a hniekhnung zuiin mi tam takin an ekzam ve a, sin lien an hmu pha bok a nih. Hi lei hin kum 1974-a ka tienami ziek ‘Zangkhuo Bungbu’ a chun hieng ang hin a hming ka’n chuongtir ngat a nih: “A zinga chun RTT chu Pu Lal Thanzau Pudaite hmu dingin Sielmatah a fe a. A hmel a hang hmu chun a pate hle a, an hang titi ruok chun a hmu lien ta tuol tuol a, a lo pate naw hlein a hriet tah a. Barapani tieng a fe dan ding chau khom ni lovin a hun hma tieng peia a kalchawi dan dinga thraa a hriethai a hang hrilpui chun Hmar trong pangngai tho hmang siin a thuhrilhai chun phûrna le beiseina insang lem amaah a pek leiin mak khom a ti hle a, a tumruna nasatakin a sukzuol a” tiin.

Thu le hla sukhmasawn dan ding chungthuah, Saptrong thlèka Grammar an lo siem hlak ang ni loa Hmar trong thlèk lema Grammar siem a trulzie dam, A AW B le ei hawrop hmang dan siem phuisui dam, AW le O hai hi an ri phur anga indik taka hmang a, “T” tia T hnuoia sunhang an mi lo siepek hi ‘TR’ inkop ri a ni leiin chuong ang taka hmang lem a thratzie dam, ‘UO’ le ‘IE’ ti ri aia hmang ding hawrop dap suok a, ‘G’ hawrop ‘EX’ tia ei lam hi ‘GE’ ti ta lem ding a nizie dam chu kan thu chai tak a ni hlak. Ziek zom le zom naw thuah rihlawm khat trong (monosyllabic language) a nina hi a thei ang tawpa zui le thu mal pahni amanih a neka tam inbel khawma umzie nei theihai chauh ziek kop chu ziek dan ding indik niin kan ngai bok a. Hi le inzom hin artikul le seminar paper iamani zat Mizo-Lusei trongin a ziek a, mi thiemhaiin an ngaiven el bakah tu laia trong ziek dan an siem phuisui peinaah a ngaidan hin nasa takin a thruoi a nih.

Thu le hla thiem a ni leiin lekhabu ziek dingin ka nor ka nor hlak a. Lekhabu tiem rawn mi a ni el bakah Saptronga thu le hla thra inpawlpui thrang a ni leiin a dittui êm êm a. Chuong ang level-a ziek chu Zo hnathlak trong a ieng khomin thil thei lo tluk deuthaw a ni leiin, a hang ziek sin changin a ngaituona phok suok zoin a hriet ngai naw a, a’n sit pei a. Chu chu kei khoma ka harsatna a ni hlakzie le a ni zingzie le a ngaituona zaa sawmnga khom a phok suok thei phot chun hlawtlingah inngai a, lungawi hri phot a trulzie ka hril hlak a. A tawp a tawpah a thusep ziek 14 lak khawm chu lekhabua siemin, DAWN TISEI ti hming inbûkin kum 2006 khan kawpi 2000 a sut a. Bel chieng dawl lekhabu a ni leiin sawt naw te sungin semphihlip a lâm el a nih. Novel danglam tak el, a ngaituona khawvel phok suok thei dinga a ngai chu a duong mek thu kan inhmu nuhnung takin a mi hril a. Chu chu puitling hman loin a liempui el tah si a, a pamhmai top a nih. A nuhmei Lani ruok chun lekhabu tiem hlaw tak el Ram Palai Nupui 1 & II a ziek tah a nih.

Hla ieng zat am a phuok ti ka hriet nawa chu Saptrong chun tam tham tak a ziek hman niin a mi hril a. Hmar tronga a hla phuok ka hriet ve sun chu Union Christian College, Barapani-a a kai lai, a nu thi champha voi sawmna a hung tlung truma a phuok a nih. Hla phuok a thiemzie tar langna dingin chang hni chauh hang thlir inla. Hi hla hi Hmar vernacular sabzeka inchuk dinga thlanghai laia pakhat a nih.

An hril sâppui dawtling rûnah,
Tinkim dawna sam ang ka zàl niin,
Thâ suoka nawh, thaikawi zietriel sai din;
Kumpui sûl sawm a’n voi hnung hin,
Nu e, i pûr hlân ang a thar pei si.

Ami ienga Khuonu siemin,
Mi hril thiemna ngulruo phun inla khom,
Ei di’n damlai par thrâ thrà vul sien khom,
Kima nawh ie, lunglai hnêmtu
Chûnnûn hringkhuo trânruo ang khêl tlat chu!

Kum 1966-a Foreign Service a zomin a trong inchuk dinga Compulsory Foreign Language (CFL) an ruot chu Chinese a ni leiin kum khat hnungah Hongkong a pan tung a. Hi taka a um lai hin 1968 khan tuoksuol a tuok a, nasa takin a hming a’n thang pha a. Ofis trinin insung mamaw thil inchaw dingin China Bazar-ah a fe a. A hung kir tieng Bus-a a chuongnaah pickpocket a um leiin, chu bus-a chuong po chu dap dingin police station-ah driver chun a tlan lutpui a. Police tawk thieng lo Indian diplomat a ni thu hril sien khom police-haiin. an awi naw leiin an dap ve a. Chu chu ‘diplomatic privilege’ dan bawsietna a ni leiin Indian Commission chun Hongkong sorkarah an put lut a, poi an tawk leia ngaidam inhni dingin an ngiet a. Hongkong sorkar chun a nina an hriet naw lei le Chinese a ang em leia an dap ve a nizie thu le ngaidam inhnina san ding an nei nawh thuin an thrang tlat a.

Chuong lai chun Hongkong chu British colony a la ni leiin a tawpah British Parliament (House of Common)-ah a thu chu MP pakhat Rankin-in October 13, 1969 khan zawna (No. 51) siem a, chu chu British Parliament thilthaw rikawtna HANSARD- chun hieng hin a chuong: “ Question No 51. Mr. Rankin asked the Secretary of State for Foreign and Commonwealth Affairs whether he will inquire into the reasons for the arrest in September last of Mr. L. T. Pudaite, Third Secretary for the Indian Commission in Hong Kong, by the police without any charge being made against him and his subsequent release after examination without any apology being offered.” Hi lei hin British sorkar chun a dan ang taka inphain ngaidam an inhni chauh a nih. Hi thu hi Hongkong le a sevel ram le India chanchinbu po po deuthawah an insuo uoi uoi a, chuong laia thri be china inngai chun Thanzau hming hre loa ram an um nawh. Hi thu hi British Parliament thilthaw rikawtna Hansard 1969-a chun hieng hin an ziek:

Uong thu chang naw sien, Foreign Service-a lut phak chin Vaihai hi a thiem fàl deuh an ni bok a, mak khopin thil an hriet a, ieng hun khan am an lo inchuk bik a nih ei ti rum rum chang a um hlak. An titi man phak ve ding chun tlanbahrika hnot a ngai a, nuom inla nuom naw inla, lekha tiem rawn lo chun a thei naw leiin tiem le inchuk tlut tlut a ngai. College-a kum li sunga ei inchuk nêka tam hman hi thla ruk sungin ei inchuk a ni tak. Ei hung siniar deuh hnung lem chun, abikin sorkar mi lienin ei sinthawna ram an hung sir changin, University-a Ph.D an hmuna thesis neka tam lem hiel dam hi ni hni ni thum sunga paper buotsai a ngai chang a um hlak. Chuong ang mi fel le thiem falhai laia hril lat lat kai phak, Vaihai khoma an ngaisang chu Thanzau kha a ni tlat a nih.

A penson hnungin sorkarin kum iemani zat ruoi zomin Taiwan-ah a um a. A hung suok hnungin, Mizoram inthlang hmasak lai khan pawlitiks chir iemani chen a’n chek ve a, a’n sirin bân a pèl takzet a nih. Mizoram hmasawnna dinga a theina indik tak le hlawk taka hmang nuomin NGO a tran a, a hlawtling hlè laiin mi fel le indik, hang thawpui tak tak ding a hmu naw leiin a lung a dong thei hle a. A theina chu hmang trangkai tumin Mizoram sorkarin Adviser sin an pek a, thla khatah cheng khat char lain a thok a, an trangkaipui êm êm. Chuong lai zing chun ‘Look East Policy’ a hlawtling theina dingin nasa takin thrang a lak bok a, seminar paper ziekin voi iemani zat an inkhawmah thrahnemngai takin a thrang ve a. Hieng hi bawzuia Arunachal Pradesh tieng a’n zinnaah pneumonia a lak a, a hung chau tiel tiel a. Inenkol dingin June thla bulah Delhi tieng a hung thla a, Metro Heart Hospital-ah a pneumonia chu enkolin, a lunga thisen fêna lampui hmun thuma 80 per cent a lo hnaw bit tah chu an inthiel fai a, ni tinin ka va kan hlak a. September thla sunga inen nawk dinga ti a ni a, sienkhom nghak zo tah loin a lo chawl tah a nih.

Aizawl tieng an pan ding hma zan tieng inkhawm trinah ka ruolnu Dari leh a tlungna Mizoram House-ah kan va’n thla a. Kum 2010-a Centenary a suok ding lekhabu buotsai kan tum, THUKNA ROPUI (AMAZING DEEP) ah Adviser a ni leiin a hmaa ka lo fiel tah angin artikul hung ziek ngei ngei dingin ka fiel non a. Ama chun, “Muong, ei dam suok di’m khom hriet an ta nawh hih” a ta. Kei chun, “Zau, dam suok e, Sinlung tlangval le pasalthra chuong el chun ni thei hlak a tim! Einin ei mamaw nêk hmanin ei ram le hnam, ei mihai hin an mi la mamaw lem a nih. Ei thrang tràng trâng a trûl. Hung trongtraipui zing kan ti che” ka ta.

Pa tumru le mi huoisen, zàm hmêl put ngai lo, kan pahni ringot khoma vai ruol a dorzona phîn dar ngam hlak kha kan ni a. Tuta trum ruok khan chu a taksa pil bêl le a thlarau suizomtu, a hringna tangkaruo zai derdêpzie le ieng lai khoma inchat thei a nih ti a hriet a, kei khom ama ang boka inenkol dinga Shillong-a fe ding ka nih ti a hriet bok a, kan khuo a sawt ve ve a, inhmu nawk beisei ta loa inchibai liem kan nih. Mizoram House tuolah car-a kan lut tawmin kan nun, “A hmêl ei hmu tawpna ding a ni el awm de!” a ta. Chu char chu ka ngaituonaa um ve a ni leiin ka hnuk a ul a, kan nu chu don thei loin ka lu ka suk ringot a.

(September 26, 2008, Delhi)