are cocksure and the intelligent are full of doubt.
- Bertrand Russell
London Review of Books ka tiema chun kum 1853 a Reverend Frederick Morris thu hril tawite an ziek ka tiem fuk a. Ama hi a hun laia Scientist hmingthang Charles Darwin thu khûkpui, Theory of Evolution nasa taka kaltu laia mi a ni ve a. Hieng lai khawvel hi Queen Victoria inlal lai (1837-1901), Victorian Age an ti, nuhmei-pasalna thila fîr taka an invong up lai hun a nih. Rev. Morris chun a kohranhai an fuinaah, “Chongzong nupa angin, nupa chu ringum takin um ro” tiin a hril a.
A thu a thra a, a hril tum khom a chieng. Ei hang ngaituo chîk ruok chun, enton dinga chongzong nupa a hmang hi a hlap suol deu a nih. Sienkhom, Rev. Morris chun a hlap suol a nih ti a hriet nawh, chongzong nungchang a hriet tlat naw leiin. Vate lai chu chongzong hi an inphalrai tak el thei. Mihriem dan taka hril chun, chongzong hi an uire zing a nih. Chongzongpui hin dannaranin chongzongchal pahni bek a ruolin a kop zing a nih. An inzawl sung hi 0.1 second vel chauh a na, chu chu mit khap kar lo ei ti ang hi a nih. A zawnin koppui hrang hrang a pawl ding ni sien, darkar khatah koppui 360 zet a pawl thei tina a nih. Pui hei hei tak a nih. Chu chu an kohranin mi thiem filora an ngai ve Rev. Morris chun a hriet tlat naw leiin enton ding thraah a hmang a nih.
Chuong ang deua Pathien thu ei hlap suol ngiel ngiel hi ka hriet rawn ve ta hle a, inkhawm rawnhai lem chun hre rawn zuol an tih. A san bul threnkhat chu, Baibul ei inlet suol lei dam, Baibul chang umzie ni awma ei ngaidan ei sîrtlukpui lei dam le a umzie ei hriet suol lei hrim hrim dam khom a ni thei. Thil rêng rèng hi hril lang a nina san le ngirhmun le a bebawmhai hriet chieng lo chun a umzie man fuk a harsa hlak. Entirnan, “ram buoi lai khan” ti hi Mizoram tienga an thu ziekah hmu ding a um rop hlak a. Mizoram rama chenghai chun kum 1966-1986 sunga MNF Movement leia buoina kha a nih tiin an ngai nghal a. Manipura mihai ruok chun HPC Movement amanih, Kuki-Paite buoina amani le thil dang dangah ngai ve thung mei an tih.
Vanawia chun Isai 41: 2 a ‘khawsaka inthoka mi pakhat, felna leia rongbawla ko…” ti chu ama ni ngeia a’n ngai leiin Mizoram kilkhawr Sangau-ah 1977 khan kum sang rorel a tran mop a, ama chu PA aiawin a thrang a, a nuhmei chu THLARAU THIENGHLIM le a nuhmei sangpa chu NAUPA aiawin. Kum iemani zat chu vung takin an bei a, PA le NAUPA lem chun nuhmei khom an nei rawn hman hle. An invet chil tak chu Pathien thu tho a nih. A tlak siet hnunga a hmun khuorna Longtlaiah ka pawl trum chun, “Mi khomin thil dang dangah risk an lak a, keini khomin Pathien thuah risk kan lak ve a ni el” tiin a mi hril. Mani trang hma kei zawnga Pathien thu nuom zawng zawnga hril fie le pot fâna ‘risk’ lak hi thil trium tak a nih. Chuonghai lai chun Israelhai le ei hnam trobul suikop phet tumtuhai hi an thrang ve chieng khop el.
Baibul chang ei sermon suol rawn pawl taka ka hriet chu 2 Korinth 6: 1 a “Pathien lunginsietna chu thrathnempui loa in hmu nawna dingin ama thawpuiin ka ngen cheu a nih” (BSI Version) ti hi a nih. Ei buoina tak chu “ama thawpuiin” ti hi a nih. Hi hi ei tiem rîk dan zirin thil dang daih a kawk ve ve thei. “Thaw” ti hi Rengkai Zote Hmar trong lama a tung zawnga ei thlûk chun “a sinthawpuitu/rongbawlpuitu” ti a kawk a, chu chu a ziektu Paulan ama le ama a’n tina a ni a, a hril tum tak khom a ni bok. Mi tam lem ruok chun “thaw” hi a thluk inhnuoi amanih a suk zawngin an lam a, Pathien thawpui ding ei nizie thu an sermon rak hlak. Chu zai chu zuiin, RP Version-a chun mak takin, “ama le thaw hmunkhat kan ngen cheu a nih” tiin an inlet! Tuta Delhi Version-a ruok hin chu, ngai buoi thei ta lo ding le Baibula inziek angin, “Pathien lunginsietna in dong chu tangkaipui ngei dingin keini in rongbawlpuihai hin kan ngèn chêu a nih” tia sie a ni ta lem. Hi hnunga sermon suol an la um rop chun anni thu thu leh.
Pakhat nawk chu, sabengtung tuoi chunga chuonga Jerusalema Isu a lut le an lo chawimawi thu hi a nih. Ei Baibul inlet hmasaka hai khan ‘sabengtung te’ chungah an inchuongtir rep el a, ngaituo a suksei khop el. Baibul thu a ni leiin a tu khom hlakin ni dingin ei ring vong ni ngei ding a na, kum za kristien ei ni mek taa chu makti nachang hrie khom ei la um naw a hoi khop el. Sabengtung puitling khom hi an lien naw vei leh, a tê nawk nghal chunga kum 33 mi Isu a chuong chu ring a um naw khop el. KJV le RSV le NIV chun ‘colt’ an ti vong a, chu chu sakor amanih sabengtung chal tuoi, a til lak lo, dannaranin kum li neka upa lo tina a ni tlangpui. Chuleiin, Delhi Version kan buotsai lai khan za ngaiin, sabengtung tea inchuongtir tah loin sabengtung tuoi chungah kan inchuongtir lem a nih.
A ieng khom chu ni sien, hi lai thil hi ei hril pha leh mitthli le zer huom tla rak khopin Isu inngaitlawmzie, sakor chunga khom chuong loa ran laia khom ran hmusituma hril sabengtung chunga a chuong thu chu ei sermon hlak a, a thren lem chun lungriem thlak zawnga lain ei inhniekpui hlak. Sienkhom, hi inzirtirna hi lungnona tuia inchie zop a ni a, thutak zawl nek hmanin a letling tieng lem hman a awn niin an lang.
Jerusalema Isu chawimawia a um ni kha zawlnei Zekaria-in kum zanga vel hmaa a lo hmu le hril lawk ang taka hung tlung a nih. Zekaria 9:9 a chun,
Nasa takin hlim rawh, Zion naunu,
Inring takin khêk rawh, Jerusalem naunu!
En ta, i kuom tieng i Lal a hung,
Mi fel le Sandamtu a nih;
Sienkhom inngaitlawm takin,
Sabengtung chungah a chuong,
Sabengtung tuoi chung ngeiah
tiin BC 480 vel khan a lo ziek a. Hi thil hi a tak ngeiin April 2, 30 AD Pathienniin a hung tlung kim a nih. Chu ni chu ‘Tumkau Ni’ tiin ei hmang hlak.
Hi ni hin Isu chu Lalhai Lal a ninaa Jerusalema lut a ni leiin iengkim a thaw taphot kha “By order” a ni vong. Hieng lai ram, tuta Middle East ei ti rama hai hin ran an sor trangkai laia pakhat chu sabengtung a ni a, mi lien mi lalin an hmang a, Damascus, Baghdad, Aleppo, Cairo le hmun lien le poimaw deua hai lem chu a man khom a to êm êm. Chun, inremna thu hril dinga lalhai an fe changin sakor chungah chuong loin sabengtung chunga ngei an chuong hlak. Sakor chu indona hmangruoa ngai a ni a, sabengtung chu inngaitlawm inentirna a nih. Inrem an nuomzie, chu leia lal khom ni hai sien inngaitlawma inphahnuoi an inhuomzie chu sabengtung chunga an chuong hin a hril fie a nih.
Isu khom van le hnuoi inremna sin thaw dinga Jerusalema a lut hun a ni leiin sabengtung chunga a chuong chu an kalchar anga a thaw makmaw a nih. Chuleiin, sabengtung tuoi va la dingin a zirtirhai a awrdar a nih, Laltak a ni tlat a. A hmaa ei hril ang khan, kum zanga hmaa zawlnei Zekaria-in a lo hril lawk ta sa a ni leiin sakor le ran dang chunga chuong thei a ni nawh. Chuleiin, hi thu hi ei sermon nawk pha chu a lungriemthlak zawnga inhniekpui nekin, sabengtung chunga Isu a chuong kha a thaw dinga ruot lawka um ta sa a sukpuitlingna le Pathien thu chu an khel ngai nawzie tieng hril uor inla, chu chu Pathien thu tak khom a ni lem ring a um.
Chun, ei thu hril lai le inzom a ni bok a, Baibul inlet suol leia khawvelin kum tam ei hlap suol hang zep sa vak ei tih. Chu chu Luka 23:43 hi a nih. Hi chang hi a buoina san chu comma sie nawna dinga an sie pal lei a nih. “Truly I tell you, today you will be with me in Paradise” (RSV) tia ‘you’ khela comma an sie hi ni loin ‘today’ khela sie lem ding niin mi thiemhai chun an hril a. Chuonga sie chun, “Truly I tell you today, you will be with me in Paradise” ti a ni a, a kawk a danglam a, indik khom a’n dik lem bok a nih. A hmaa ziek ang hin, “Titakzetin ka hril che hi, voisun hin ka kuomah Paradis-ah um veng i tih” tiin ei inlet a, chuong ang deu chun Thuthlung Thar (Delhi Version) kan sutin kan sie ve a. Tuta Baibul pumpuia ruok chu, “Voisun hin thudik ka hril che hi, ka kuomah paradis-ah um veng i tih” tiin kan sie tah lem a nih.
Hi thil indanglamna hi ieng lei am a na ti hang hril vak ei tih. Inlet hmasak ang khan chu Isu le an khaikang mi suol pakhat kha an thi ni lâ laa paradis-a lut nghal ding an nih. Amiruokchu, Isu kha mihriem taksa puta hung, chu taksa thia phuma um chu a ni thum nia tho nawk dinga hril lawk sa a ni bakah a tho nawk hnung khomin a mihai lai ni sawmli mihriem taksa putin a la’n lang a, chu zoah van tieng a kir nawk chauh a nih ti Baibul-ah ziekin a um a. Chu thil le sui zom chun, kha hmaa ei lo inlet dan ang khan a thi ni lâ lain Isu kha van tieng a kai nghal nawh ti a chieng. Peter lem chun thlarau mita hmuin, ziektu dang hril sa ve der lo a mi hril a. “Taksaa sukhlum a na, thlaraua ruok chu sukhringin a um a. Ama chun lung ina intang thlarauhai kuoma khom thu a zu hril a. Chuonghai chu Nova long tuk sunga Pathienin dawthei taka a nghak laia awi nuom nawtuhai kha an nih” (1Pet 3:18-20) tiin thlana a zal laia a thilthaw a ziek lang hiel a ni khah. Chuleiin, “Voisun hin ka hril che hi, ka kuomah paradis-ah um veng i tih” ti hi a fûk lem hmel khop el.
Pathien thu ei inchuk chang amanih le sermon ei thlak changa ei thu chai mani nun senga a taka lak lut le hmang (apply aspect) a poimawzie ei hril hi ei thaw ding a ni hrim a. Ei thil inchuk rêng rèng hi ei nun leh inzomna a nei pha leh umzie a nei tak tak chauh hlak. Ngaizawng nei thu le hmangaina tuipuia lilut thu tienami voi tam tiem inla khom mani nunah a tak ngeia ei chang hma chun a umzie tak tak ei hriet phak ngai nawh. Ei tonhriet pha ruok chu Sukar khaw mihaiin, “Tu hin chu i thu hril leia ring kan ni ta naw a, keini ngeiin a thuhril kan hriet a, hi mi hi khawvel sandamtu a ni ngei ti kan hriet tah” an ti ang khan ei testimawni a dang zak el a nih.
Chu chu a ni lai zingin, apply aspect a poimaw ti leia nuom zawng zawnga kei kawi a, mani lung tlukna zawnga lo sirtlukpui dam hi thil um thei chauh ni loin thil um rop hlak a nih. Europe rama hun inthim (Dark Age) lai, Roman Catholic sawrdena hnuoia kohran a um lai chun Pathien thu indik nia an hriet chu fîr takin an kengkaw a, a naw zawnga hriltu chu Pathien le kohran poi tawka ngaiin an hrem a, mi tam takin hringna an chan pha a nih. Josua 10:13 a nisa kei dinga a um thu kha changchawiin, hnuoi hi nisa le thla le arasihaiin an hêl a nih ti thu an lo inchuktir a. Chu zirtirna kal zawnga thu hril reng reng chu sakhuo poi tawka ngaiin an hrem ngei hlak. Chuonga an thaw chun Pathien suklawmah an inngai.
Scientist Galileo Galilei (1564-1642) chun hnuoi hin nisa a hêl lem thu, khuorel um dan indik tak lem chu a thil suinaa inthoka a hmu suok bakah chu thu chu puong suok ngam hmasatu a ni leiin Pope Urban VIII rawiin thi dingin a chungthu an rêl a. Sienkhom, a trantu mi lien an tam leiin that êm loin, Florence khaw bul ela khaw chikte Arcetri-a a ina chun suok thei lo dingin a thi chenin an hrên el a nih. A na sêt hnung le a mit inthim hnung khomin, a thil hmu suok, hnuoiin nisa a hêl thu indikzie chu tran tlatin, a thi tawm chenin, “Epur si muove, Epur si muove” (A hêl zing annawm, A hêl zing annawm) tia insamin a hmur a lan phu sep sep hlak a nih. Hi hmun hi sira ka biekzin ni chun ngaituona a fe sei ngei. A thi hnung kum zangaah, Pope John Paul rawiin kohranin an lo thaw suolzie chu ziek ngeiin thupha an chawi chauh a nih.
Chuleiin, Baibul chang pakhat pahni chauh la bing a, mani rîl rem zawnga keia hlap suol rak thei a nih. Personal agenda nei pum râna mi vuokna dinga Baibul hmang lem chu a trium zuol. Hlap suol chu hriet nawna le mawlna lei a ni a, hmang suol ruok chu Setan hmangruoa inchangna a nih.
(December 3, 2009; Delhi)
###
No comments :
Post a Comment