Tukver Hrang Hrang

Kan khuo Pherzawl tlanga inthoka suo tieng ei hang thlir chun tlang sîp pakhat, a ki inzum vara van tieng song, rawl bang insi khup chunga thrung lêr el hi a’n lang a, a hmingah Vankisong kan ti a. Hi hi sim tienga Thanlon tlang inzam pheia a sîp insangna tak a nih. Ka tienami ziek LALNUNNEM a khom hi tlang chanchin hin parakraf hnina a hluo vong a nih. Amiruokchu, sak, sim le hmar tienga inthoka ei thlir chun hi tlang sîp hmel hi a danglam dai a, a ki inzum var hmu ding a um naw a, van tieng ruok chu tlang dang po po angin a song ve. Ei thlirna tukvera inthoka ei hmu dan sengin iengkim hi ei inkhi a, thil thuhmun chie khom hin hmêl danglam tak tak a lo put vong a nih. Chun, tukver pakhata inthoka inlang phak lo kha tukver danga inthoka thlir chun chieng ém èma hmu thei a um bok.

Mi pakhat hin pastor kuomah, “Pastor, ka trongtrai lai ziel hawp thei ka ti?” tiin a’n don a. Pastor chun, “Thei lo ve! Chuonga thaw chu Pathien inza nawna a nih” tiin a hril a. Hun dang daiah ama vek chun pastor kuomah, “Ziel ka hawp lai trongtrai thei ka ti?” tiin an don nawk a. Pastor chun, “Trongtrai thei e. Ieng lai khomin Pathien i biek zing thei annawm” tiin a hril thung. Trongtrai laia ziel hawp le ziel hawp laia trongtrai chu thil thuhmun char a nih. Trongtrai laia bu fak le bu fak laia trongtrai, trongtrai laia inhnawm le inhnawm laia trongtrai tihai khom. Amiruokchu, ei indon dan zirin thil thuhmun si khom a donna chu a letling hlauh a ni thei.

An ti annawm, Tuikuk-hai chun kontrek (contract) hi an ngaisang khop el a. Inhlawfa ding mi ei zong a, “Ka huon thloah hung inhlaw la, ni tin cheng za peng ka ti che” ei ti chun tu khom a nuom an um nawh. “Ka huon thlo sin ni tin cheng za hisapin hung kontrek ta la” ei ti ruok chun invak suorin an aw nghal el a nih, an tih. An thlirna tukvera inthok chun inhlawfa chu mi hnuoihnung sin, kontrek chu mi changkang chin thaw hlak nia an hmu leiin, thil inang char ni sien khom an hmu danglam tlat el a nih.

Chuong ang bok chun nawchizor inchawtu nekin KS amanih Call-girl amanih le filmstar hmingthang dam kholbingpui thei chu mimirin an en dan le ngaisang dan a danglam daih a nih. Sienkhom an sum sengna san chu thuhmun, Rengkaihaiin bu an bak a, Saidanhaiin an fak ang char hi a nih. Ei thlirna tukver zirin thil pangngai chie khom ei hmu danglam hlak a nih.

Shakespeare-in “There is nothing either good or bad, but thinking makes it so” (Hamlet) a lo ti ang el khan, a sie a thra ei ti hi a lo um tak tak naw a, ei ngaituona thlek zuia ei inkhi dan inang naw mei mei a lo nih. Lusun beidongin nisa khom dal ruoia a hmu laiin, vangneina tuoktu ruok chun ni dang neka var mawi lemin a hmu thung. Mi ditsaktu ta dingin ka hlawtlingna chu thil lawmum a ni laiin, mi hmelmatu le khingtu ta ding chun lung kheitu a nih. A hmasa hin ka chan siet mi lunginsiet a ta, a nuhnung hin mi diriem a tih.

Tukver inphîr
Hawp le hmuom thila kristien ei ni hnunga ei thlirna tukver le hnam danghai thlirna tukver inang nawzie hi ei ngaituo ta hlak am? ‘Hawp le hmuom’ ei ti hi ‘fak le dawn, zu le sa, bu le bâl’ ei ti anga tronglamkei (phrase) a ni a, dumziel, dumbel le tibur hawp, tibur tui hmuom, dumhmuom hmuom le inrui thei thil hrim hrim, abikin zu dawn tina a nih. Kristien ei hung ni hnunga ei thlirna tukvera inthok chun hawp hi suolah ei ngai naw a, hmuom tieng ruok chu, zu a ni phot chun suol buruah ei ngai thung. Hmun dang tam lema ruok chu hawp hi kristienhai thaw lo dingah an ngai a, hmuom ruok chu an ngaimaw nawh. Inrui buoi ruok chu tu sawsaiti khomin thra an ti ngai nawh.

Chu thu zuk hril taka chun November 22, 1982-a Saidana muol liem tah Upa Ngama kha ka zuk hriet suok chu tie! Ama kha ziel du èm ém, a meng sung chu pak khu lai lai zing el kha a ni a. A hawp naw sung chu chawibiek inkhawm le bu fak sung a ni el awm. Hla mawi le hlu, sak hlaw tam tak a phuok a. Thlaraua hla thra tak tak a dong lai hin, a um dan ding awm hieng hin ka zuk sungtuo a. Makhata lo a riekna tru namthlakah bokin, a singtur dumbelah dum inru tak el, kauzing dum an naw leh kauchang trawl ngei el chu bengin, a chungah meiling siein hang fawp hring a ta, chu zoah pak khu hlat hlat a ta, a khu inzam chiei chiei hung bawtu thrangthrâm ruol chu lu inhaiin vuong dar cham cham an ta. A pak ruola a khû a hip lut tûr khan a lua inthoka a ke chen thawk le khata fang riei rieiin, a thazam damten sukchawlol a ta, hadam song songin inhrieng a ta. A lung phûrin a thluok tieng thisen a pam suok rawn ang pei ruolin a ngaituona hung dîng a ta, nun ram le thlarau ram fangin hriet lo ramah inzin a ta, chu taka thlarau leh chun inpawlin thu le hla thar a baua inthokin hung far thlang a ta, inhoi a va ti thei awm de aw!

Inrui thei thil hrim hrim hin damdawi chi khat, mi choktho, chokphur le sukthatho theina tûr (stimulant) an pai vong a nih. Chuong inrui theihai laia chi khat, a threnin ei hawp, a threnin ei fak, a threnin ei hmuom hlak chu dum (tobacco) hi a nih. Mi sukrui theitu a tûr chu Saptrongin ‘nicotine’ an tih. Hi tûr hi tûr dang neka a danglamna chu a tui le a khala a um thei bakah boruokah a khü, tûr pai si kha a’n zàm thei a nih. A hawptu nek hmanin a khü lo hiptuin a thawhla lem niin an hril. Ziel ei hawp phaa ei chep dena lai kut para dam hin duk tlûkin a tûr chu a kop thei. A tûr hi a hrat leiin natna hrik le ngè a that thei bok. Mi dawk tuma ei panga hung kai invot khom hi tibur tuiin zuk dep inla, an inkon choi nghal el a nih. Chu chu fa a, hawp a, hmuom a, ei taksa ei hang inchietir ngam el hi, huoisen tak chu ei nih. Kansar, a bikin chuopa kansar siemtu laia a pikhawi a nih.

Chu bawia chun India hmar saka Zo hnathlak a tam lem hi ei intang a nih. Kristien ram inti ngam, a pilril taluo leia a hrana Lalpan a zong suok ngat ram nia inhril Mizoramin khawvela inlar tak nina, a mihriem um zat phua kansar tamna tak ngirhmun a hang hluo el dam hi pangzatum tak chu a nih. Amiruokchu, tûr fak, dawn le hawp hi ei huoi tlangna tak a ni si leiin tritna châng ei hriet nawh. Tri nek hmanin ruol êng ei inlàk a, ei insukhmu a, ei khu lui lui a, ei bau thu vut vutin a chang sup sup el a nih. Dam leh tlang khatah, thi leh ruom khatah ei ti tlang diel khom a hoi khop el. Ei inhmangaituo dan hi inthichilh hmangaina, hmangaina vangduoi an ti chu ni ngei a tih. Ei hang inbekbor a, “Khawm, i pai?” ei hang ti sap chun indon sei a ngai nawh, ei fak chi, thina tûr bok hi ei phor dok zat el a nih. Thichilh hmangaina!

Kan naupang lai chen khom khan, chawibiek inkhawma hung pahaiin singtur dumbel khu hlut hlutin an hung pak a, lut tawmin biek in râp bang, bawta keisawia a taa khan an zep fur a, trinah an hawp zui nawk nghal a. A thren chun stetman lekhaa (Statesman newspaper) zuol, kutpui tiet tieta lien an hung hawp a, an ziel bong chu bangah inthir fukin an zep bok a. Nu threnkhat chun puonbilah tibur tui an hung chûn sa a; tibur hawphai chun bangah an zep far bok a.

Lengkhawmna le pungkhawmna hmunah zalen takin ziel an pak hlut hlut a, mit sukthip khopin a khu chum chum hlak. A thren, neinung deuhai chun dumhmuom, Hringchara inthoka dawrkai haiin an zu lak, Chin Hills-a mi Sukte sumdawng ruolin an hung tol treuh hlak leia an kona hming ‘Zatèp’ an inputtir ngei chu hmuom dingin an pai bok a. Hawp le hmuom hi a sur a sa hnuoia rimsikna huol vel kara sin hram thawhai nun sukhadamtu, zalen taka an thaw thei le an hlimpui thei um sun tlawmte laia pakhat chu a nih.

Dumhmuom hmuom, dumziel hawp le tibur tui hmuom hi kristienhai chun thaw der lo dinga an inchuktirna hmuna chun suola ngai a ni leiin ringtua inngaihai chun an thaw ngai nawh. Entirnan, Vai kristienhai, abikin South India tieng hi an ni zuol. Ziel hawp an hmu che chun kristienah ngai naw nghal an ti che. Korea mi, kristien ka hmuhai khoma chu char chu an ngaidan a nih. Zu dawn ruok chu suolah an ngai naw thung. Eini tukvera inthok chun kohranin zu dawn hi suolah a ngai a, ziel hawp ruok chu suolah a ngai ve naw thung. Ieng leia kristien seng seng, Baibul thuhmun hmang sihai thlir dan le pom dan a letling thei tlat am ning a ta? Ei inchuktirna le thlirna tukver inang naw lei niin a’n lang.

Ei ramah misawnarihaiin kristien sakhuo an hung put lut khan ringtharhai kha ringnawtuhai leh an thre hrang theina dingin ei nunphunga ei ching hlak thil iemani zat bek inbantir trûlin an hriet a. Ziel amanih tibur hawp le a tui hmuom chu a mimira an thaw hlak le an insukhadam theina tlawmte laia pakhat a ni leiin khappek chu remchangah an ngai naw a. Ser le sang le thil poimaw thawna taphota a ser laia a mei ang, sienkhom mi neinung le lal le a khawnbawlhai ti naw chun a nazonga an thaw ngai lo zu khap chu remchang lemah an ngai a, an khap tah a nih. Hi lei hin tu chen hin eini lai zu dawn chu suol, ziel hawp chu suol ni loa ngaina a um. Ram dang le hmun dang tam lema ruok chu misawnarihaiin zu dawn khap loin ziel/tibur hawp le hmuom an khap thung a nih. Chuonga hawp an khapna hmuna chun ziel hawp hi ringnawtu thuomhnaw-ah an ngai a, ziel hawptu chun kristien inti sienkhom kristien-ah an ngai thei nawh. Chuong ang char chun eini lai chuh zu dawn hi ei ngai ve a nih. Ei turver siemtuhai chu misawnari hmasahai an ni a, an mi lo siempek ang ang khan, indik sien indik naw sien, ei pom tlut el a nih.

Judahai tukvera inthok ruok chun zu/uoiin hnawl hi Pathien malsawmna hnawl angah an ngai. Uoiin hi an thilthawna taphotah a ser laia a mei ang a ni ve a; uoiin thrang lo chun Pathien kuoma an inthawina khom a kim thei nawh. Zu thra dawn rawn tak khom tempula sinthawtu thiempuhai an nih. Chun, Pathienin mal a sawm le sawm naw inkhinaa an hmang tak khom uoiin an hau le hau naw-ah a nih. Molawma Isu a thrangna hmasa taka a nu Marin, “Uoiin an tlasam” ti a hung ripawt dam khan umzie inril tak a pai leiin, mi dangin hril hmai inchuhai sien khom Hmangai Johan chun hril hmai a tum naw hrim hrim. Isu le a zirtirhan zanbu nuhnung tak an kil khom khan uoiin chun hmun a hluo rawn hle a; a thi hnung khoma a thisen, an ta dinga suok chu an hriet zing zie inentirnaa uoiin hung dawn tlang hlak dingin thuro a sie a nih. Chu chu sakramen ei ti hih a nih.

Uoiin hi zu chi khat a nih. Zu a ni nawh titu chun uoiin umzie a hriet naw hulhuol a nih. Zu do pawl threnkhat chun, “Isu rawia an dawn kha grep tui (grape juice) a nih” tiin, zanbu an faka inthoka kum sanghni invoi hnung chenin an uoiin dawn kha thlakpek tral tral an tum. A san chu, an thlirna tukvera inthokin, zu dawn chu suola an ngai lei a nih. Voi khat chu, hmun danga sakramena uoiin tak tak an sem hlak angin Korean pastor pakhatin Delhi tlangah uoiin tak tak a sem a, a kîlhai lai chun eini rawi threnkhat, zu hi suola ngai pawl an thrang ve a, hahîpin an hril a nih. Isu hril dan ang taka sakramen an kil kha suol thaw-ah an inngai daih thung a nih. Thlirna tukver indika inthoka thil thlir hi a lo va hang poimaw de aw!

A bul tienga a hming ei sam Upa Ngama nun kha ziel hawp le zu dawn thuah hrilfiena thra tak niin ka hriet. Kristien a ni hmain zu dawn mi a ni hlak a. Ringtu a hung ni charin zu dawn a bansan a. Iemani chenah a hnungtol a, zu dawn a sunzom nawk a. Rong nasa taka a bawl hnungin a petek a, nunghak lakah a tlusil a, kohran phuorna chen a tuok a, nasa takin zu dawn tieng a pu nawk a. A hung inhmu suok nawk chun zu dawn a ma a, a tawpah Upaa thlang a hung ni tah pei a. A tlu pha zu dawn, a tho pha zu nghei a ni laiin ziel ruok chu suolah a ngai naw leiin a dam sungin a hawp hem hem zing a nih. A thlirna tukvera inthokin ziel hawp chu ieng suol khom ni lo, zu dawn ruok chu suol a ni tlat a nih. Chu chu eini laia mi tam lem thlirna tukver a nih. Baibula ruok chu hawp le hmuom khapna a um nawh. Fak le dawn le hawp le hmuom thua Isu khom kha a buoi thrak nawh; a ngaidan chu sunchang lai tak angin a fie a nih. A zuitu intihai hi ei nih a buoi chu.

Ruoivel Vs Kohran tukver
May 1, 2010 Hmasawnna Thar suoka khan L.Ruoivel Pangamte-in “Inneina hi mi po po lai chawimawiin um sien la” ti thupuia hmangin, Pathien thu ang taka kristienhai thaw dan ding nia a tukvera inthoka a lo thlir dan angin January 15, 2010-a a naunu pasal nei chu inthlana a buotsaipek thu, soiseltu an tamzie thu le mo lawmnaa inseng treuh hi thra a ti naw thu a ziek a. Mo lawm ei uor san hi ei Baibul nei tah po Version pathuma Hebrai 14:4 ei inlet dan inang naw dam mawsietin, “mi po po laia innei (inneina) chawimawi” ti hi trawngbau khap suol niin a’n lang” a ti hiel a. Ama chun, “Nupa ni dinga inneihai hin, nuhmei dang le pasal danghai lakah an inneina (nuhmei pasal nei an ni tah ti) hi inzaum takin inlangtir hai sien la” tia inlet thrat a rot hiel a nih. NIV-a chun hi châng hi “Marriage should be honoured by all and the marriage bed kept pure” ti a ni a; RSV chun, “Let marriage be held in honour by all, and let the marriage bed be kept undefiled” tiin a sie.

A thlirna tukvera inthoka a mit sukkhamtu tak chu mo lawm uor le mo lawmnaa sum tam tak seng hi a nih. Amiruokchu, Baibul tukvera inthoka thlira infuina ziektu hin mo lawm thu a hril nawh; innei hi inza taka chawimawi ding a ni thu a ziek lem a nih. Inneihai chu nupaa insiem an ni tak leiin chu chu khawtlangin hrietpuiin an inneina chu inzapek hai sien, nunghak le tlangval an ni lai angin tu khomin beiseiin hèl ta naw hai sien ti le chu chu hrepuitu tu khom mawphurna a nizie a hril a nih. Hrepuituhai mawphurna le inneihai mawphurna a thriengin a hril kop pei a, a hrilna san khom Thupek Sawma khap bawsea an uire a dit naw lei a nih. Chun, inneihai thutiem chu inzapek (respect) el khom ni loa chawimawi (honour) ding a nizie thu a hril tum tak a ni leiin ‘respect’ ti nekin ‘honour’ ti trongkam hi a hmang a nih.

Chun, innei hi mi po poin chawimawi hai sien ti a hril leia mo lawm hi ei uor pha anga hril tum hi thlirna tukver him lo a nih. Kristien le tien lo tu khawtlang khomin mo lawm hi ei uor seng a, mi neinunghaiin an uor zuol. Kristien ei hung ni hnunga ei uor tran khom a ni bok nawh. Hinduhai tak tak hin mo lawm an uor a, sum an seng rawn taluo leiin India sorkar khomin a ngaimaw a, mi fiel thei ding zat chenin a bituk hiel a, sienkhom dan siemtuhai hai hi a bawse hrát hràta thrang an nih.

A ieng khom chu ni sien, Ruoivelin a tukver le inrema Baibul inlet a nuom dan ang hin inlet ding ni inla, ei buoi fe ka ring. A hmasa takin, “nupa ni dinga inneihai hin” ti hi Hebrai ziektuin a ziek naw bakah, “Nupa ni lo dinga innei khom an um a ni?” tiin indon inla, ei buoi nghal ka ring. ‘Innei’ chu nupaa insiem tina a ni a, hrilfiena dang a ngai nawh. “Nupa ni dinga innei” ti chu trongkam chuongliem a ni el bakah nupa ni kher lo dinga innei khom an um ti a thawiin a kawk sa tlat a nih. Chun, “nuhmei dang le pasal danghai lakah an inneina (nuhmei pasal nei an ni tah ti) hi inzaum takin inlangtir hai sien la” ti hi Hebrai ziektuin a ziek sa naw a, a ziek umzie nia a tukvera inthoka a hmu dan anga hrilfiena a phuok ni sien a hoi lem. Ei tukvera ei thlir dan le enremna bang ei intung le inmil zawng sengin Baibul hi inlet inla chu saisa hleng a tih.

A ieng khom chu ni sien, a naunu pasal nei hi a thrangna kohranin hrietpuiin, inzain chawimawi sien, a tukvera inthoka a thlir dan anga thra le mawi le indika a hriet dan ang taka a naunu inthlàna a buotsai khom chu inzapek bok hai sien a thra ding bah. Chun, mo lawmnaa sum seng treuh hi khap thei ni naw sien khom, mani sum le pai ngirhmun zir ang peia chàng thiem inchuk hi thil varthlak a nih. Hieng ang konga huoisen taka hma la ngam le a ngirhmun tlang taka ziek ngeia puong ngam L. Ruoivel Pangamte hai ang ei um hi a vangnei thlak khop el. Lemchang nuom lo le pei lo ei tam pha ei khawtlang le kohran khom a zie hung um pei el a tih.

Hun thim (Dark Age) an ti lai, Roman Catholic pumbilna hnuoia kohran a um lai chun Pathien thu indik nia an hriet chu fîr takin an kengkaw a. Joshua 10:13 a nisa kei dinga a um thu dam, 1 Kron 16:30, Sam 93:1, 96:10, 104:5 le Thuhriltu 1:5 dam changchawiin, hnuoi hi chang loa nghet taka rem, nisa le thla le arasihaiin an hêl a nih ti thu (Ptolemic theory of geocentrism) an inchuktir a. Chu zirtirna kal zawnga thu hril reng reng chu sakhuo poi tawka ngaiin an hrem a, a thren an raw hlum bok a. Chuonga hrem tuokhai laia pakhat chu Italian Scientist Galileo Galilei (1564-1642) a nih. Hnuoi hin nisa a hêl lem thu a fie chieng chu a puong leiin Pope Urban VIII rawiin thi dingin a chungthu an rêl a. Sienkhom, mi lien a trantu an tam leiin that loin, Florence bul, khaw chite Arcetri-a a ina chun suok thei lo dingin a thi chenin an hrên a nih. A na sêt hnung le a mit inthim hnung khomin, a thil hmu suok, hnuoiin nisa a hêl thu indikzie chu a tran tlat a, a thi chenin an khattawkin, “Eppur si muove, Eppur si muove” (A hêl zing annawm, A hêl zing annawm) tiin an sam hlak a nih. Hi hmun hi sira ka biekzin ni chun ngaituona a fe sei ngei.

Kum 2000 khan Pope John Paul II chun kha hmaa Roman Catholic kohranin a lo thaw suol po po laka thupha chawina le ngaidam inhnina lekha a’n suo, Galileo chun a thia inthok kum 358-ah thiem a chang chauh a nih. Kohran tukver besana hmanga Pathien thu lak suol le hmang suol hi thil trium tak a nih.

Hi po hi tuta trum chu a khulang khangna dinga ei hung thur suok a nih. A remchang dan ang peiin khawvela tukver dang dang ei la hung bi pei ding a nih.

(May 18, 2010, Delhi)