J.F. Laldailova

(9.1.1925 - 7.6.1979)

A hmasa berin, vawiina lo kal khawm zawng zawng Zoram khawvel duhsakna chibai ka buk a che u.

Thu leh hla lama ka mi ngaihsan leh zah em em, mihrâng Joseph Francis Laldailova (JFL) kutchhuak lehkhabu tlangzarh tura duhsakna min hlan hi ropui ka tiin nihlawh ka inti takzet a, min sawmtute chungah rilru leh thlarauin ka lawm a, lawmthu ka sawi.

Kei Delhi tlang Zoram khawvela cheng, Bharat Mata sorkar bawngpa chhawr ban tawh, hruaitu Mosia hringnun ramri kham pawh kum khat dawn lai kal pel tawh, ni tin computer nena inkawm ni leng ringawta lum, hetianga mi rawn sawm mai hi mak ka ti a, a chhan engemaw chu a awm ngei ka ring a. Pathian thlarau hriattirna vang a nih loh pawhin JFL-a thlarauin an thinlungah thu engemaw chu sawi a nei pawh a ni fahmiang. Mahse, min beisei chhan ka hlen zo lo ang tih erawh ka hlau hle. Ka hlen zo lo a nih pawhin, min sawm ta sa sa, kan inhre thiam tlang a ni ang chu.

Min sawm chhan tur awm ka ngaihtuah laia ka inthlahrun duh lohna chhan threnkhat hrilh che u ka duh a. JFL-a nen hian a hringhranin intawng hman lo mah ila, a lehkha ziak atranga ka mi kawm hnem berte zinga mi a ni. A tisa hmel put lai hmu ve lo mah ila, a thu leh hla atrangin tu nge a nih tih hai rual a ni lo. A thrian hnaiten ‘Dungtawia’ tiin an ko thrin an ti a. Ka tehna fungah erawh ani anga dung sang hi Zoram khawvelah hmuh tur an tam lo hle. A taksa dung a tawi a lo nih pawhin, Zakaia lawnna theipui ai daiha sang, thu leh hla hriatna leh thiamna Everest chhipa chuang a nih tlat avangin, chung en loh theih a ni lo.

JFL kha ka aia kum 14-a vawk ek lo rap hmasa a ni a. Mahse, keima ngaihah chuan kawng hrang hrangah, abikin thu leh hlaah chhul khat kual kan niin ka hria a. Ani kha unau piang 13 zinga pakhat a nih ang bawkin keipawh hi ka ni ve a. Tun lai chhanah chuan, chutiang zozai fa neite chu thil atthlak lamah kal tawh mah se, kan nu leh pate hun lai kha chuan tam chu dam khawchhuahna a ni zawk. Family planning kalhtuten JFL nen hian fa ngah thratzia sawi mawi nan min hmang fo a ni. A enga pawh chu ni se, a pa Thangphungan kum 1925-a Roman Catholic kohhran a din khan an chhungkua ringawt denchhena a phun pawh ni se, a thlaphan thlak vak awm lo ve.

English mi, ziaktu lar Thomas Carlyle chuan, mihringin harsatna tawngkhawng an tawh avanga chhan chhuah an ngaih hunah kawng hrang hranga chhantu tur Pathianin khawvel hmun hrang hrangah mi chungchuang a khat tawkin a buatsaih thrin niin a sawi a. Hei hi histawria kan hmuh theih chinah pawh a dikna lai a awm. JFL-a pawh kha chumi atana bel ruat pakhat chu ni ve ngeiin ka ring tlat a ni. Thiamna lama sulsutu hmingthang Roman Catholic kalkawng zawhin Siamtuin a rawn buatsaih a, Chittagong-a Catholic sikulah Zotrawng theihnghilh deuh vek khawpin Class VIII thleng a zir zo a, ekzam vawi 22-ah vawi 17 lai pakhatna a ni. Indopui laia sikul an khar vek avangin zir zawm thei loin 1943 khan Royal Indian Air Force a zawm a. Mahse, TB a vei avang leh daktor ten a nak ruh pakua tawp an tansak hnuin 1949 khan a rawn bang ta a ni.

Sawrkarah hna remchang a awm loh avangin thlai huan a siam a. A tih tawh apiang atchilh mi a nih avangin thlai chin dan nasa takin a zir a, thlai entirsiaknaah lawmman pakhatna a dawng thrin. Zofate zinga leithratna (fertilizer) hmang hmasa ber a ni mai awm e. Chung laia mimawl fing Vawmphunga, hetiang lama tui mi leh hmathlir thui tak nei nen inkawmin a lakah thil tam tak a zir bakah German Ral Run chanchin, Vawmphunga sawi chhawn ngaihnawm tak chu a lo rikawt thlap a, Zofate histawria bung leh chang pawimawh tak chu humin a awm phah ta a ni. Vawiina kan lehkhabu tlangzarh hi chumi rawngbawlna kal zel rah chhuah chu a ni. Hemi chanchin sawitu leh rikawttuin Zotrawng an thiamzia, Zotrawng mawizia leh Zotrawng thiamte chuan engkim mai hi fiah takin an sawi thei a lo ni tih i chhiar hunah i hmu ang a, mak pawh i ti ve hial ang.

A tih tur takah bung zelin, 1954 atrangin JFL-a chuan ‘Hun Thar’ chanchinbu a chhuah a. Kum 1958 February atranga ‘Zoram Thupuan’ nen an inchhunfin hnu pawhin Editor a ni zui zel a. Chumi rual chuan Zotrawng thiam tumin ngawrh takin a trang a, a khat tawkin 1963 atrangin ‘Thu Ngaihnawm’ a chhuah reng bawk a. 1965 khan Mizo Academy of Letters (MAL) chanchinbu ‘Thu leh Hla- ah Editor hmasa ber a ni a, mahse 1966-a Mizoram buai avangin chhunzawm theih a ni ta lo a. Kum 1965 atranga a buatsaih English-Mizo Dictionary (JF Laldailova Dictionary tiha hriat lar chu) kum 1969 khan a chhuah a, a hnuah an chhu zing hle. Ani chuan Mizo trawng kimna nia mi threnkhat sawi Pu Buanga Dictionary-ah pawh Mizo trawng kim lo thu mal leh thu hlawm khat singruk chuang a hmuh chhuah thu a ziak.

Trawng chungchanga a rilzia leh thukzia a lan chianna ber chu lehkhabu 12 lai a lehlinte ai mahin a Bible Thlirna leh Kristian Hlabu a chîkna atrangin kan hmu a. Baibul leh Hlabua Zotrawng ulh leh trîtroh lutuk hi Zosapho leh anmahni pui tura Mizo an lak luh hmasakte vang chiah niin a ngai a, “Kan Mizo mi hluite khan Zosapho hi an thunun ni lovin, Zosapho hian Mizo trawngah an thunun niin a lang”* tiin min hrilh. Chumi atranga Zotrawng leh literechar chhan chhuah thuai chu trulin a hria a ni. Amah ngeiin, “Zosap-hovina an hmaa hnawksak an tih ber ZU an han buan hmasa ber ang khan, kan Duhlian Trawng dik, tluang, mawi leh ropui tak mai tlu-sawp chhe tawh tundin leh nan hian kan hmaa hnawksak ber mai, pathian tè-nau biak taka Zosapho biak kan lo tumna rilru kha (hi) kan paih bo hmasak a ngai dawn niin ka hre ta” #tiin min hrilh a ni.

A tran dawn lai pawhin a hote hnenah, “Ngawi tak rawh u, mipui zingah bombshell ka thlak dawn a, a mi nghawr let han nasatzia tur chu in lo hre mai ang” tiin a hrilh lawk a ni. Tlang tak le huaisen takin Zotrawng kal sual chhan leh siam thrat dan tur a ziak a. Pathian ang thawthanga an lo ngaih leh thianbiak Zosapte kuthnu, mi tam takin sawisel tina an tin loh leh dik ti mang lo chung pawha a sawi mam dan ngawt an zawn zawk laia a ruh langa a rawn phawrh chuan, thri beh china ngaih atrang pawhin dotu leh khaktu a ngah hle a, an rawn bauh rawn huai huai a; tam tak phei chuan zu rui lung puam leh ât so lekah an ngai tih a hria.

Mahse, a zâm lo. A tranhmun dikzia a hria. Ama trawngkam takah, “Zosapho kekawr mawngtret hi thrangthar zel turten an hmu ve ang tih hlauva belsaka thawm thrat ka lo rawt laiin anmahni pawngpaw tran tlattute hian, ‘An mawng a pawp lo ve. Nang zu lo hrût tawh thrin rui thring hian i ngaihbel mai mai a ni e’ tiin trawngka ringawta thuam mawi an lo tum thrin a. Thrangtharho hi an â hauh si lo va; ka hrilh hriat kher ngai lovin kan Bible leh hla thu tritroh chhan hi chu trawnghmang an hman dik loh vang vek a ni tih an rawn hre leh tho tho dawn a. Trûl lo leh dik vak chiah bik si lova hla thu an tihdanglam vak vak ngam si hi chuan heng mualphona hi thawm thra vat vat zawk se a duhawm ngawt ang. Chu chu Zosapho duh dan pawh kha a ni ngei zawk ang” tiin a ziak.

A sawi zel a. “High Sikul dai chin chuan an hre deuh zel ang a; sikul rap ngai hlek lo kan pi leh pute pawh khan râl hlauva ramhnuaia an lo tlan an lo tlan thrin laite pawh khan an lo hre vek tawh a; an hla phuah-ah te pawh grammar kalhmang pakhat mah an bawhchhe ve duh ngai lo va; keini thrangtharho pawhin kan tum tak meuh chuan kum sawmhnih velah chuan kan hre vein ngai kan awh leh thei mai ang. (Chung hunah chuan tuna hmingchhiat khumtu leh phunchiar nih hlawhtu hi min lo hre thiam tawh ang a; tisaa ka lawmman têl tûrin ka lo awm tawh si lo vang)” tiin zawlnei mit puin a lo ziak a ni. A tawpa kualkhung chhunga a dah hi ka chhiar hmasak ber trum chuan ka hnuk a ti-ulh a ni.

JFL lehkhabu chhuahte hi ka hmuh theih apiang ka lei a, ka chhiar mai ni loin ka zir thrin a. A thih hnu kum 24-a R. Lalrawna chhuahsak ‘Bible Thlirna’ phei chu kawpi li ka lei tawh a, ka zinna apiangah kawpi khat ka keng ziah thrin. Hemi lehkhabu tluka thu leh hlaa JFL thukzia tar lanna hi a awm kher lo ang. Grammar leh trawng kalhmang a chîk dan leh a hriat êm êm dan hi a mak a, kan bih thuk poh leh tluk loh rim a namzia leh mi chungchuang a nihzia kan hre zual mai a ni. Chutiang khawpa trawng a lo chîk chhan leh zir chhan, eng lai pawha rim taka thawk reng tura turtu chu Zosapho tihchingpen Zotrawng kal sual tihngil leh tihhmasawn a duhna vang a ni. Chumi maichamah chuan a hriatna, thiamna, a hun leh a nunna a hlan ni tin thrin.

Kum sawmthum leh kum thum kal taa JFL thrahnemngaihna aw chu boruakah a thamral ta mai em ni? Teuh lo e! Khami hmaa Mizo Baibul leh tun hnaia chhuak Mizo Baibul hi kan khaikhin chuan a danglamin a phuisui sawt ta hle a. Chik taka kan bih chuan, letlingtute hian JFL awka kha a comma thlengin an ngai pawimawh hle tih hmaih rual a ni lo. Tisaa a lawmman têl turin kan zingah awm tawh lo mah se, a têltu chu Zofate zawng zawng hi kan ni. JFL chungah lawm nachang i hria ang u.

Hemi thu huai taka ka sawi chhan chu kum ruk pum hlum, 2002-2007 thleng khan ni tin darkar 12-16 chhung Hmar-Mizo trawnga Baibul lehlin hna ka thawk ve vang a ni. Khami hmaa Hmar trawnga Baibul pahnihte chu Lusei-Mizo trawng atranga a ngial a ngana an lo lehlin lehchhawng, ulh tak, phuai tak, tritroh zet mai a ni. Hei hi Hmar trawng chang ni lo, Zo hnahthlak trawng hrang hrang kechheh tibuaitu a ni. JFL-an a vei tlukin kum tam tak ka vei ve a. A damdawi awm chhun chu trawng hman dan dika Baibul lehlin thar nia ka hriat avangin kum 2002-a ka penson veleh beihpui ka thlak ta a ni. Hemi lehlin hna hautak ka thawh laia trawng hman dik chungchanga chhawr nahawm ber chu JFL-a ‘Bible Thlirna’ a ni.

JFL-a trawng leh thu thiamna chu thu khat ni se, a taimakna leh huaisenna kha a ni ngaihsanawm chu ni. Zosapho khan kan rilru min bawih hneh êm avangin, mingo hrim hrim ngaihsanna le chungenna rilru dik lo, inngaihtlawmna ni loin inngaihhniamna emaw hnuaihnung zawka inngaihna rilru (inferiority complex) kan pu a, chu chu kan hnam natna benvawn ril ber pakhat a ni. Hemi kawngah hian, keimahni ringtu threuh threuh zingah Father leh Brother nei kohran hian an tuar nêp deuh emaw tih turin a awm a, a chhan chhui tlak niin ka hria.

Hei hi kan thupui nen inpersan hret mah se inkungkaihna a awm tlat avangin han sawi sei hlek ila. Mizorama a ber kai hmasa, entirnan Assam sorkar hnuaia awm laia Cabinet Minister hmasa ber A. Thanglura leh Mizorama Chief Minister hmasa ber Ch. Chhunga te chu kohhran nawlpui atranga lo kal ni loin Roman Catholic kohhrana mi an ni a. Chutiang bawkin JFL-a pawh kha a ni. JFL-a kha kohhran nawlpui atranga Zosaphoin a rilru an hmin leh bawih tawh sa ni ve se, Zosapho sulhnu, an thiltih dik loh leh phuaina leh an tlak lohnate huaisen takin a tar lang ngam ang em? Hemi zawhna kan chhannaah hian a dik a dik lo thlu loa Zosapho kuthnu hrim hrim tlip mawi tuma ramtrangho tran chhan a sawi fiah ngeiin ka ring. He thilah hian kan chian hunah, chumi thanga awk kan thu leh hla leh kan Zotrawng chhan chhuah tuma huaisen taka JFL hmalakna threnkhat kan sawite hi a ngaihsanawmzia kan hre thiam pha chauh ang.

A tawpna atana zawhna ka zawh duh chu hei hi a ni: JFL-an mut mawh hnar mawha a neih, Zosapten kan trawng an tihchingpenna lakah eng chen nge kan fihlim tawh a, eng chen nge hma tawn tur kan la bak? Zosapte kuthnu a nih vang hrim hrima siam thrat leh thriah ngam lohna leh duh lohna rilru hi eng chen nge kan la put? Mingo an nih vang hrim hrima ngaihsan leh chung-en tumna rilru, kan thinlung min bawihna lakah eng chen nge kan zalen tawh? Chumi lak ata kan zalen hunah JFL-a beisei ram chu kan lut pha tak tak chauh dawn a ni. Kan luh hunah, hriat fiahna rilru nena siam thrat hna kan bawhzui tak tak hunah, A AW B atranga kan tran thrat a ngai tih kan la hre fiah tak tak chauh ang. Chumi rama lut tur chuan thil thra zawk duhna leh chumi atana inthlakthleng ngamna rilru kan put a ngai. Chu chu hnam fing leh huaisente mizia a ni. Chu ber chu JFL mizia thlungpui pawh niin ka hria.

Kan histawrian chhuanvawr B. Lalthangliana chuan JFL-a kha “chanchinbu chhuah kawnga hmahruaitu, Mizo trawng uluk leh tih dik kawnga thranharhna siamtu, lehkhabu lehlin kawnga Zofate kaiharhtu, Dictionary siam lama entawntlak”@ sartifiket hraw leh ropui tak tak pali a pe a, chu chu a phu reng a, a pawmawm hlein ka hria.

Note: A speech delivered by L. Keivom at the release function of J.F. Laldailova’s book ‘German Ral Run leh Thu Ngaihnawm Dangte’ at Aizawl, June 8, 2010.