Tuta kara boruok zai hmanga computer-a ei titina dawkan HYG hluo rawn tak chu June 20, 2010-a Hmar Literature Society (HLS) thurolum insuo a nih. An thu insuo chu, a tawi zawngin, HLS-in Hmar trong zieknaa hawrop hmang dan ding a ti naw anga Pawl 10-12 thaw lai, Hmar MIL ekzama ziektuhai chu mark pek an ni naw ding thu le HLS-in a ti dan lo anga thu ziektuhai hrim hrim chu hnam hmelma le inphatsantua a ngai thu a nih. Hi thurolum an insuo hma khom hin HLS chun a ngirna derthawngzie hrein, santu dingin Hmar Inpui le HPC (D) ruoiin thurolum a lo insuotir tah bok a nih. Tui tla chun mani insanhimna dingin rûl khom a chel hlak ti thukhawchang leh khom khan an inzawl hmel khop el. Mihriemin inringzona ei nei ta naw pha leh santu ding dapin ei inmai ruoi hlak hrim a nih.
HLS ngirhmun hi hriet thiempui ding chun thil bul man fie a ngai. Indopui-2 lai, September 25, 1945 khan Lungthulien-ah Dr. Thanglung rawiin chuong laia a thri be china ngai mi iemani zat an inkhawm a, chu truma HLS hi an indin le September 28, 1949-a Churachandpur (Mission Compound) a an inkhawma Manipur, Cachar & North Cachar Hills chen huopa an suklien a nih. An thiltum hmasa tak chu a thei theiin sum tuoka Hmar tronga ziek lekhabu sut, zor le a hlawk insem a nih. MIL sabzeka Hmar trong hmang phalna ei hmua inthoka HLS-in text book a buotsai le sut ti lo, kum sawmli vel sung khan lekhabu ieng zat am HLS hin a sut ti ka hriet ve naw a, sienkhom a sut naw khom a ni el thei. Pakhat ka kol ve chu kum 1959-a an buotsai, HMAR HLA HLUI LE HLA THAR LAWRKHAWM, cyclostyle-a her, phek 61-a sa, a kawm ruok chu Gandhi Memorial Press, Imphala an insuttir a nih. Thuhma (Forward) ziektu chu chuong laia HLS Chairman H.L. Daka a nih.
Hmar trong ziekna dinga alphabet ei hmang hi Italian-hai trong ziekna, Roman hawrop a nih. Hi hi besana hmangin Mizorama misawnari hung um hmasa tak S.W. Savidge (Sap Upa) le J.H. Lorrain (Pu Buanga) hai ruolchamin March, 1894 khan Hunterian System zuiin ei A AW B hmang lai hi an siem a nih. Hunterian system an ti hi kum 1860 bawr laia India rama Director-General of Statistics-a thrang William Wilson Hunter-in hming le thu mal hrang hrang ziek kop le kop lo ding ruongam a siem phuor chu a nih. Hi system hi Tibeto-Burman amanih, Chinese amanih le Arabic trong hmanghai lai chu hmang tlak a ni nawzie mi thiemhaiin an pom tlanga chu, hang besan ding dang an nei naw leiin Savidge le Lorrain chun an hung hmang ta tho a nih. Chu ringsana chop le chila an siem chu siem phuisui metin, 1901 lai khan tuta A AW B ei hmang char hi an hmang tah a nih.
Hawrop an siem hnunga Mizo tronga lekha ziek hmu thei hmasa tak chu Khamlienin Queen Victoria kum 60 tling a lawmpuina, June 16, 1897-a a thon chu a nih. Chu taka chun, “Tuna zong Padiri sap kan hnena an lo kal a Pathian lehkha te min hrilh shiem shak a anmanin khawngai takin lehkha bu te min hrilh a keimani tong zong ziek thei in kan om ta, kan lawm em em e” ti hi a nih. Chun, Mizo Kristien hlabu suok hmasa tak 1899-a chun,
Khawvela ka om chhung zong,
Hreh om kan tuar fo vang;
A chang changin kan dam lo ve,
A changin kan dam
tiin a chuong.
Hi entirna tlawmte ei thur suoka inthok hin ieng am ei hmu a? Thil dang dang chu maksanin, hawrop ‘aw’ le ‘o’ hmang dan indik taka an hmang thu a nih. Hieng ang hin fe pei sien chu, Dulien-Mizo trong amanih Hmar-Mizo trong ei tiema ei buoina tak, ‘o’ hmangna dinga ‘aw’ an mi lo hmangpui hlak leia ei lam suol hlak hi ei pumpel daih ding a nih. Ziek dan ding an hung duong peiin thluk sei ni sa ‘aw’ hi thluk tawiah ‘o’ aiin an hung hmang a, thluk sei a ni ding pha leh thluk sei ni ta sa ‘aw’ chunga khan thluk sei nawk sawng sinsiena ‘v’ letling (circumflex) chu hawrop ‘a’ chungah an hung sie a, a ri suok ding angin hang lam inla, ‘a’ kha thluk fan a ngai a, a ri indikin a suok thei naw hrim hrim.
Chu bawia chun kum za chuong ei intang an tah. Mizorama mihaiin Sap thaw dan a ni phot chun thra vong anga ngai a, a kawi a ngila an zawm tum angin, eini rawi, Mizorama an thaw dan a ni phot chun iengkim fel fai le indik thlupa ngai pawl, an Baibul inlet indik le indik lo khom siem thrat met tum loa a comma chen khom inhmai loa kawpi vong chîng hlakhai hin har suok nachang ei hriet hma chu ‘aw’ le ‘o’ a nina ang taka ziek nachang hre ngai nawng ei ta, hmang dan indik mi kawkhmu tumtuhai chu hnam hmelma le hnam phatsantuah puong zui pei ei tih. Ei hriet dinga poimaw chu: tu khomin ‘aw’ le ‘o’ hi thlak amanih siem danglam an tum nawh; a ri indik le a hmangna ding indika hmang dan hril hriet an tum lem chauh a nih.
Thiemna buzawla te tam tak nei dinga lut tum hlak kha kum 1967 khan Indian Revenue Service zom lemin, kum 1970-ah Indian Foreign Service-ah ka pakai a. Ka thil inhnikna, thu le hla tieng inhmang zui pei ka nuom leia IAS neka IFS thlang lem ka ni ang hrimin, ka zoma inthoka kum li sungin hla 37, tienami tawi (short stories) 6, novel 2 le artikul tam tak ka ziek bakah Rabindranath Tagore-in nobel prize a hmuna Gitanjali dam Hmar trongin ka’n let a, Hmar history, abikin HMAR HLA SUINA ka ziek tran bok a. Kum 1980 khan Hmar Hla Suina chu a suok a. Hi lekhabu hi Hmar cultural history suina lekhabu puitling suok hmasa tak a ni bakah ‘aw’ le ‘o’ hmang dan indika hmangna lekhabu suok hmasa tak a ni el thei bok. Tu hin revised edition kan buoipui lai mek a nih.
Kha hma khan hla 150 lai hiel phuokin, artikul tam tak le novel pahni pathum lo ziek tah lang khom, lekhabu zieka hun ka hmang tak tak hnungin Hmar trong tiem sukharsatu laia a pikhawi chu ‘aw’ le ‘o’ hai hi a hmang dan indika ei hmang naw lei niin ka hriet a. A hmang dan indik taka hmang chun thluk sinsiena hmang der loa ei harsatna zaa 30-40 sukzangkhai thei a ni leiin ‘Hmar Hla Suina’-a hin ka hung hmang tran a nih. Hi hi thluk sinsiena thrang loa Hmar trong tiem sukolsamtu a ni lai zingin vowel a, e le i thrangnaa ruok chu thluk sinsiena sie lo thei lo a nih. A tawi zawnga hril chun, ‘aw’ le ‘o’ hmang indik hi ei harsatna sawktu a ni a, a sukfihlim vongtu ruok chu a ni phak nawh. ‘Aw’ le ‘O’ hmang indik le indik loin thu a phur dan tlawmte chauh entirna dingin a hnuoia hin hang tar lang ei tih:
A thla a khawng (She flaps her wings)
A thla a khong (Her wings are stiff)
Zonga’n zawng a zong (Zonga is searching for a monkey)
Zawnga’n zawng a zong a zong a, zawng awzawng a zong hmu nawh (Zawnga keeps on looking for monkeys but finds no monkey at all)
Ka ke a khong (My legs are stiff)
Ka ke a khawng (He strikes my leg)
I In sawng chu tri a um (High rise building is scary)
In song chu tri a um (To die in sleep is scary)
Bonga zang a bawng (Bonga is humpbacked/hunchbacked)
Bonga zang a bong (Bonga is circumcised)
Tuizang le Tuibum chep de kara um Pherzawl tlanga Pawl 7-8 ka thaw lai, mawtor chu hril lo, saikal hmel takngiel khom ka la hmu hma hun kha Hmar trong thiem tuma ka bei rak lai, thrang hlui la damhai pawl a, thu le hla hlui indon a, ka khon khawm nasat vanglai a nih. Chuong hun laia ka Hmar trong hriet hmun thuma threa hmun khat neka tam hiel chu tu hin ka theinghil zo tah niin ka hriet. Chuong laia ka thil lo invoi hlak chu tu hin kum 57 hnungah a hmor ei hung phok tran dek dek niin ka ngai a, ka lawm khop el. Chu chu mihriem nuna inkhi chun awisawt hle sien khom hnam inlumlet dan kalchawia inkhi chun zani lai thil ang chauh a nih. Chu sung chun ram palaia thrangin, rambung hrang hrangah mi ningkhong hmu le hre phakin khawvel ka lo pal ve a. Thil thra ei hmu taphot ei mi le sahai nei ve dingin ei dit a, inchuk ding a tam a, inchuk seng a ni bok nawh. Ei khawl khawm ve sun, ei ram le hnam ta dinga trangkai le hnama ei dam khawsuok theinaa ei ngai tam tak laia a thren chauh bek hang hlu lut nuom chang khom a um hlak. A san chu, thaw thei loa ei ngai tam tak hi a thaw dan hriet chun thaw thei lo a lo um naw a; ei tlangmi thluokin phak lo dinga ei lo ngaihai khom a lo phak takzet ti a tak ngeia sintu pakhat ka ni ve lei a nih.
Thil dang po nek khoma inhnaruma ka hmu chu hnam var lem, abikin English trong hmanghai thu le hla a nih. An hmasawnna bulthrut po po khom an thu le hla lungphum chunga innghat a nih. Ei inkar inhlatzie ei hmu chieng po leh inzak a na zuol. Thupui fun china ngai an thu ziekhai hi ei hang bi chieng a, eini rawiin phek tama chieng lo deua ei hril hi mawi takin sentence tawite-in an zo thei tlat a nih. Chuong thu inril le mawihai inhnikna le thlumna intem phak ding chun a bebawm hriet sa a ngai. Chu chu hriet sa lo chun a’n hnikna le inrilna man phak ruol a ni nawh. Samphuola Rom ziek inchuk ang elin, a mithi vun khom a paw phak naw el thei. A hre lo ta ding chun rangkachak le darsen le lunghlu tlang le darthalang tlang chu thuhmun rong an nih. Uoiin umzie hre lohai chun hang dawna a mi kap thruk kha uoiin thrain an ngai a, a upa le to, dam ziei el nekin an thlang lem rop. Ei thu le hla le ei thlarau chang nuom chin khom XXX Rum standat a ni chun bet le but khura intang, ramsa le insik zinga la cheng ei ni leiin, intlansiekna khawvela hin dam khawsuokna ding a um nawh.
Hi ngirhmuna inthoka ei sawsaiti sansuok hi ram le hnam hmangaitu tak tak hai lungril le tum a ni vong ka ring. Amiruokchu, mong intawl son thrak loa ram le hnam chu thruoi suok thei a ni si naw leiin, ei ram le mipuihai hi ieng konga khom thruoi suok ei tum a ni chun mong intawl son phot a ngai. An khawvel boruok hipa inthokin thrangthar nengnawia ei ngai, lekha inchuk mumal lohai chen khom hi anni thrang hmasahai nekin an var lem vong ta si leiin, dikri kawruok khuma mani pindana inthoka hrawk thei tu khom an um ta nawh. Mobile le electronic thila hrim hrim chu a pa nekin a nauin, a pu nekin a siehlawin a thawpek lem hun a ni tah. Upa lem inza hi ei kalchara ei ngaisang le hlut a nih. Chu ding chun nasa takin ei inhril hlak bok. Amiruokchu, upa an ni lei ringota inza chu ruoltharhaiin an hriet thiem ta nawh. Upatna ei inza ding a ni chun naupangna ei ngainep ding tina anga ngai pawl khom an hung um tah. Ka upatna chu naupanghai ta dinga malsawmna ni lo a, an mamaw ka phuhruk thei si naw chun, ka upatna chun ieng kongro am suk a ta? Sungkuo inzomna le inhmangaina khelah, hmun hrang hranga cheng ka nauhaiin an mi ngaina san le harsatna an hmasuon changa ka kuoma an hung tluk lutna san chu an harsatna le an hma dom hautakzie ka hrietpui bakah Pathien lunginsietna zara hma an lak pei dan ding thurawn ka pek thei lei le chu chu pe thei dinga ieng lai khoma ka’n buotsai hlak lei a ni sa vein ka hriet.
Chu ngirhmuna inthoka thlirin, HLS hi thrangtharhaiin ieng tin am an hmu a? An lekhabu buotsaia inthokin thu le hla tieng hmasawnna a pek am? Chik taka thlirin, thrangtharhai kuoma an thu inba tumhai hi bu tak khuka khukpui tlak ieng zat am a um a? An bu thur suokhai hi a si am a tak? Fak tlak am fak tlak lo? An in bawlhai hi literechar thlipuiin lunginsietna nei der loin innuoitir inla, minit ieng zat am thrang zo a ta?
Kum khat lai khan trong inchukna dingin mi threnkhat thu ziek, a parakraf hmasa tak pei kan thlang lawr a, HYG member hrang hrangin chîk takin an hung bi a, an bukna lung seng hmangin an hung ziek a, a rizal chu ngainuom a um kher el. Critics-haiin dit tawka an lepse lem chu ni sien, inchen nasa ngot a tih. Chuong chu a ni leiin, naupangin ‘aw’ le ‘o’ le ‘tr’ an hmang le hmang lo suonlama hmanga an thiem le thiem naw inkhi an tum thu, ziek ngeia an tar lang dam hin, HLS ni loin a thruoituhai inhlieuna dil pawnlangzie a hril fie lem el thei. Hmar MIL hi Hmar hnathlakhai chauh khom ni lo, ei kawl le kienga ei unauhai tu khoma thu le hla inchukna le chuong tienga hmasawnna an dong theina ding hmangruo nia ngaia an lak sup sup theina ding chun HLS lungtum inlet hi a sie thlak phot a ngai. A deng ding a ni chun ama le ama indeng hmasak a ngai el thei.
HLS hin trî dang a la nei a, chu chu ‘t’ hnuoia sunhang insut hlak hi ‘tr’-a a hung inthlak inlauna a nih. Chu chu hnam thu le hla rohlu vui liemna ni dingah a ngai. Hi thil, khawvel mihriem tu dang khoma an la lak lut ngai lo nia hriet, ei mawl em leia an lo lak lut thriek chu Matthai 5:18 bawsiet anga inngaina an nei khom a ang hle. ‘Tri’ tia ei lam, ‘t’ hnuoia sunhang sie hi trong tienga mi thiem tu khom indon la, consonant pahnih lam kop- t&r- inbel khawma siem a nih ti hril vong an ti che. Hieng ang boka ri pahnia insiem chu br, cr, dr, fr, gr, hr, kr, pr, sr, tr, vr, wr an nih. ‘Hr’ lam thei sia ‘Tr’ lam thiem lo chu a hawrop inthlop indik naw lei ni loin a lamtu baksamna lei a nih. ‘Hranga’ ti lam thiem chun ‘Tranga’ ti khom a lam thiem a; ‘hr’ inkop lam thiem lo Vaihaiin ‘Haranga’ an ti anga ‘Taranga’ titu chun baksam a nei a, 99 deuthawa an mi zel sa a ni khomin, mak tia lak ding a ni nawh. Chun, ‘tr’ inkopa ri siemna dinga ‘t’ hnuoia sunhang bel ngaia ei hriet tlat chun ‘hr’ inkop ri siemna dingin ‘h’ hnuoia sunhang ei bel ve ngai a tih. Hawrop dangah thaw si loa ‘t’ khera ei thaw bik hi umzie bo a nih. Khawvela hin ‘tri’ ri nei hnam an tam a, a ziek suokna dingin ‘tr/thr’ an hmang vong a nih. ‘Tr’ hmang trituhai tri tak chu kha hmaa indika an lo hriet le an lo thrangsan inphet a nih. Chu chu thangtlawmna, tlawm ngaina si tlêp a nih. Thu dika ei lo hriet le tran, sienkhom thu dik a ni nawzie ei hriet chara ngirhmun thlak ngamna hi huoisenna le indikna a ni a; hriet hnung khoma inthlak nuom tlat lona hi suol, thangtlawmna thra lo, kawmaw bawlna a nih. Kristien intihai lungril puthmang ding a ni nawh.
Chuong chu thil um dan a ni leiin, ‘aw’ le ‘o’ le ‘tr’ hai hi an nina ang taka hmang lo le hmang tum lo hai hin an ngirhmun an inbi let a ngai. Hmar trong hi tuta ei ziek dan neka fel lem, thra lem le olsam lema ziek thei a nih. Chuonga ei ziek ding a ni chun ei A AW B hmang lai hi hawrop pakhat khom pei si loa a hmangna ding senga ei hmang theina dinga siem phuisui le thluk sinsiena fel tawk ei duong a ngai. Chu chu trul loa ngai ei um chun ei thu chai umzie hi ei la paw phak naw a ni el thei. Insel nikhuoa a trong hrat hrata thrang hlak hai hi hang indon chieng inla, an thil hril kha ngun taka bi ngai lo le bi pei lo an ni nuom khop el. Kohran pawl inkara buoina a suok changa thrang inru ru hi sakhuo ngaisak lo, inkhawm pei lo an ni nuom ang deuh hi a nih. A dik char chun, ei thu chai laimu hre chieng le ei harsatna sutkiengna ding lampui zong pei le dap phak eini lai hin mi ei vang. A ri sie sie hi a taka thaw pei lo, khelzawl kotlanga mi inkhel laia lo khek puok ang hi ei ni nuom khop el. Thu mu hang seppui tum inla, minit tam hrilpui thei an ni nawh.
A ieng khom chu ni sien, siem phuisuina konga hma latu ding taka ngai HLS hi a dangtua thrang a tum zing chun Hmar trong tungdingtu nekin a thlan chotu a ni pei ding a nih. A ziekna hawropa buoi buoi nekin, ei thu le hla changtlung dan ding ngaituo lem hi a hun tah. Chu chu a nih literechar ei ti tak chuh. Chu buoipui chu a lêt tamin a hautak lem a, mi nazong thaw thei a ni naw a, ngaituona tak tak hmang a ngai a, thil sawlum tawp a nih. Chu dinga mani inbuotsai lawk le inpe zo mi ieng zat am um ei ta? HLS member lai chuong ang mi chu an um am? An um si naw chun HLS hin a puon in a zauh ngai a tih. Hmar hnathlak po poin Hmar MIL hi la dinga ei beisei chun Tuithraphai ruom chiktea inthoka HLS hi ei indâk suoktir a ngai. Tuta ei tukvera inthok hin chu Teisieng tlang, Saidan tlang, Hriengkot tlang le Len tlang bak a’n lang nawh niin a’n lang.
(June 23, 2010 Delhi)
No comments :
Post a Comment