Trong Hmasawn Dan

Trong hi thil hring, inthrang le inthlak danglam pei a ni ang bokin inthrang loa a um chun a kawl le kienga trong inthrang lemin a dîp rìl a, a tawpah a dîp hlum hlak. Kong danga hril chun, tui thar luong lut zing lo dil ang a ni chun sawt nawteah a hung inhnop a, hmang tlak a hung ni naw vak a, a kang tiel tiel a, a ral hlak. Kum sawmnga sungin trong hi a thi hmin dèr thei a, kum sawmnga sung bokin trong thar a pieng thei bok. Naupang laia ei trong thiem èm ém hi hmang zom loa ei um chun kum khat kum hni sungin ei inhmang nawk vong thei. Trong thi tah hnung sukhring nawk thei dan um sun chu thu le hla hai zieka sie le lekhabua hlu lut le hum thrat a nih. Chu zara Hebrai trong khom hi rong thar puta an sukhring nawk thei a nih.

Kum 1992 February-a Mizoram sim Saiha-a kan inzin hung kir, Marboat-a Tuipui kan hung kan trumin Lawngtlai kaiah naupang kum 13 vel mi hin Lala Khobung le Hmar tronga kan inbiek ri a hriet chun a mi hung pan a. A Hmar trong chu ngainuomum kan ti a, nuizat zawnga lak chun nuizat a um bok a. A chanchin kan indon a. Kum hni vel liem taa a nu le Senvon-a inthoka hung inpem a lo ni zing a. A hang trong kha, iemani chen Hmar trongin, iemani chen Lusei trongin a suok. Hieng ang deuh hin: Ka nu leh Senvon atrangin kan hung inpem a, Mizo trong ngotin min bia a, Hmar trong pawh ka pai vang vang tawh a ni.

Hi naupang hin ngaituona a suksei khop el. Kum hni hnungah hmu nawk inla chu Hmar trong inhmang hulhuol tah dingin ka ring. Ka u Kamzabiek naulutir Mina L.Pari hi a hming ka phuok a ni bakah Bishenpur-a an um laiin College chawl chang an inah umin ka don hlak a. Meitei trong chu Meiteihai ang charin a thiem a. Bishenpura inthoka an inson hnungin Khawmawi-ah an um a, Hmar trong ngot hmangna hmun a ni leiin thla ruk hnunga chu Meitei tronga biek thei a ni ta nawh.

BC 721 laia Assuria lalin hmar tieng Israel lalram hung rùn a, a tam lem salah thruoi a, an ram ruok hluotu ding hnam dang a hung sie bita inthok khan Israel hnam sawm chu an trong pumin kum sawt nawte sungin an pil bo a, tu chen hin an hnung sui ngaina um loin an riral song tah a nih. BC 608 laia inthoka intrana Babulon lal Nebukadnezzar-in Judai Ram-a Israel mi la um sunhai a hung rùn a, mi tam tak Babulon tieng sala a thruoi hnung kum sawt nawte sung khan an trong Hebrai chu Aramik trongin a làn hman a, kum 70 hnunga an rama hung kir nawk hmasa takhai khom khan Aramik trong vong an hmang tah a nih. Isu hung laia an trong hmang khom khah Hebrai ni loin Aramik a nih. Tu laia an Hebrai trong hi Hebrai trong hlui besana hmanga trong thar an ser, a hawrop ziekna khom an siem thrat le vowel an belh a nih.

Hmar trong inthrang dan
‘Hmar trong’ tia hriet hung ni tah hi Hmar pahnam hrang hrang trong le Dulien/Lusei trong inchokpola inthoka trong thar hung suok, kha hmaa Hmar hnathlak thlang tla hmasahaiin ‘Khawsak Trong’ tia an lo hriet hlak kha a nih. Kum 1800 vel hnunga hung insiem tung le kum 1900 chawhma tienga inthoka hung inlang tran le gospel puongdarna tronga hmang a hung ni leia thu le hla ziekna tronga kum 1920 hnunga kristien sakhuo sula inthoka hung inder suok a nih.

Ziek ngeia Hmar trong a chuongna hmasa tak chu G.A.Grierson buotsai Linguistic Survey of India Vol. III Part III (Tibeto-Burman Family: Kuki-Chin & Burma Groups), 1904 kha a nih. Chu taka chun ‘Naupa Tlan hmang’ thu (Luka 15:11-32), Major J. Shakespear inlet chu hieng ang hin a chuong a: (Thlûk sei ‘â’ umna po hi ‘aw’ anga tiem ding a nih)

“Mi tu-na-ma-nih fa-pa pa-nhih a nei-a. A-nao-pang-lem-in a pa kuam-a, ‘Ka pa ro ka chan-tum mi pe-roh,’ a ta. Chuang-chun, a sum chu an in nhin a shem-rel-a. Ni-shât-nâ-tak-in a-nao-pang-lem-in sum a-reng-in a khâm-vong-a, khua-lam la tak-a a fe-tah. Chu khua chun-in hoi-ta-bek-in a om-a, a sum chu a bo-mhang-ta-vong-a. A mhang-zo-vong-le an khua tiang chu na-sha-deo-vin an tam –a, bak-ding a tla-sham-a. Chuang-chun chu-hai khua chun tu-kuam-am shin thoh-in a va-thang. Chu mi-pa chun vok thlai pe-ding-in a lo tiang a thuai-a. Ziang-tin kâm vok-in a bak kha a-ma khom a-puar-tak a-bak a nuam-a, tu-khomin iang-khom an pe-noh-a. A harh-nâk-phing-le, ‘Ka pa kuam-a sum-lhâ-hai bu bak-shen-lo-va nei an tam-theia leh kei la-khi hi-lai-hin von-tam-in ka thi-vang-vang-a. Tho-ka-ta ka pa kuam-a va-rhil-ka-tih, “Ka pa van-a mi chung-a leh nang-a mit-mhu-in iang-tin ka thâ-shual, ka mhing i nao-pasal a-ring tlak ka ni-noh, I kuam-a sum-lhâh pa-khat ang-in mi shiam-ve-roh” ting-ka-tih.’ Chuang-chun a tho-va a pa kuam-a fe tah-a. Chuang-chun lha-tak-a a la-om-lai-in a pan a lo mhu- a, a khâ-ngai-a, a tlan-a, a ir a shuk-tua a fâp-a. A kuam-a a nao-pasal-in, ‘Ka pa van-a mi kuam-a leh nang-a mit-mhu-in iang-tin ka thâ-sual. Ka mhing i nao-pasal a-ring tlak ka ni-noh,’ a ta. Ni-khom-sian a pan a suak-hai kuam-a, ‘Puan tha tak tak kha hang-la-un-la hang-choi-tir-roh, a kut-a kut-sebi-hai, a khe-a phei-khok hang-bun-tir-roh, se-bâng-te a-thao-tak kha hang-la-un-lan that-ro, lhim-tak-in bak-ei-tih, hi ka nao-pasal hi a thi a a hong-rhing-nok a ni, an mhang nhu kan mhu-nok-ta a nih,’ a ta. Chuang-chun lhim-tak-in an om-tan-nok-ta-a.

A nao-pasal a-len-lem lo-va om. In-a hong-tlung-tâm-in iang-tin shut-ri le an lam-thâm a hong-rhiat-a. Chuang-chun suak tu-ma-nih a sham-a, ‘Chu ia-ma ni-ta-leh?’ a ta, a zât a. “I shang a hong-tlung-tah-a, him-tak-in a-mhu-lei-in i pan se-bâng-te thao tak kha a that,’ a ta. Chuang-chun a lung a shen-a in-a an loi-nuam-noh-a, a pa a hong-shuaka an thlêm a. Nih-man a pa kuam-a, ‘Rhe-roh, kum khâ hi-ang-chen-hi i sin ka thoh-a, i thu lakhi ka nhial-ngai-noh-a, ka rualhai kuam-a lâm-na-ding kel hai-khom ini pek-ngai-noh. Chuang-chun i nao-pasal hi nâ-chi-zuar kuam-a i sum bak-ral-vong-tu hi a hong-fe-phing-leh a-ma-ding-in se-bâng-te thao tak kha i lo-that-pek-zel-a’ a ta-lo-don-a. ‘Ka nao-pasal ka kuam-a i om-zing, an roh ka-ta poh chu i-ta vong an nih. Lhim tak le lâm tak-a om a tha an-nâ, hi i shang hi a thi hong-rhing-nok a nih, an mhang-a kan mhu-nok-ta a nih’ a ta. (p 259-261).

Hi thu inletnaa thrangpuitu chu Zote trong hmang hlak a nih ti ‘fâk’ ti neka ‘bak’, ‘phìng’ ti neka ‘von’ an hmanga inthok hin hriet thei a nih. Chun, ‘ie’ neka ‘ia’, ‘uo’ neka ‘ua’ an hmanga inthok hin Biete pahnama mi khom a ni el thei bok. A ieng khom chu ni sien, tuta ei hmang lai Baibul leh ei tekhi chun trong hmang dan le ziek danah kum za sung hin nasa takin a danglam tah ti inhmai ruol a ni nawh.

Dulien-Lusei-Mizo
Tuta ‘Mizo trong’ tia hriet tah hi kha hma khan ‘Dulien trong’ tia hriet a ni a, Lusei hnathlakhaiin an hung hmang lar hnungin ‘Lusei trong’ ti a hung ni a, chu chu ‘Mizo trong’ tiin an hung thlak nawk tah pei a nih. Hi trong hi zieka sie a hung ni tranna chu kum 1894-a Aizawlah misawnari pahnih- S.W.Savidge (Sap Upa) le J.H.Lorrain (Pu Buanga) an hung a, anni khomin an hmang ve tho Roman hawrop hmanga A AW B an siema inthok a nih. Chu hawrop chu hmangin 1895 khan Luka ziek an inlet tran a, 1898 khan khawla sut chu a hung suok tah a nih. A kum nawk 1899-ah sikul an hong tran a. Hmu theia um, sikula inchuk ding lekhabu an siem hmasa tak Mizo Zir Tir Bu, phek 27-a sa, chu 1901-a Shillong, Assam Secretariat Printing Dept sut (2nd Edition) a nih. Sut khatna hi 1899 laia suok a ni ring a um.

Hieng laia Baibul an inlet dan chu a hnuoia hin a thren ka sie a, ngainuomum tak a nih. Braket sunga italics-a siehai hi inlet nuhnung tak, 2005 edition-a an sie dan a nih. Trong inthrang dan le a fie zuol pei dan hriet theina darthlalang thra tak a ni ka ring. Chîk taka ei bi chun, kum za hmaa ei trong hmang dan le tu laia ei hmang dan hi 30-40% velin a danglam ta a, kum za nawk hnunga chu tu laia ei Baibula ei trong hmang dan hi maktiin, nuizat siemnaah hmang tang an tih. Tu khomin ei hmang mek zing a nih ti a hnuoia ei thu tar langa hin hriet thei a nih.

Luka
3:6 Tin, nung na-ran in Pathian chhandamna an hmu ang (Pathian chhandamna chu mi tinin an hmu ang)

4:8 Tin, Jisua’n a hnena “Jihova i Pathian hnena dovan-kai roh, ama rong chaoh bawl roh, ti a ziak a ni,” a ti a. (Isuan, “Lalpa i Pathian chu chibai buk la, ama rawng chauh bawl rawh’ tih ziak a ni” a tihsan a).

8:10 “Jihova ram thu zep nangni hriat an oih e, ama eraw chu mi dang chu teh-khin thu chaoh-in an oih. (Pathian ram thu ril chu nangni hriat atana tih a ni a, mi dangte tan erawh chuan thu harsa a ni).

8:50 “Hlao shu, ring mai roh, chutichuan a dam leh ta ve ang” a ti a. (“Hlau suh, ring mai la, a dam leh ang” a ti a)

Thilthawhai
1:5 Johana’n tui in a baptaiz thin kha, nimahsela ni rei lo te an, Thlarao Thatfamkim-a baptizam in chang ang, a ti a. (Johana chuan tuiin a baptis a, nangni erawh chu ni rei lo te-ah Thlarau Thianghlima baptis in ni ang” tiin a hrilh a)

Korinth I
13:1 Mihring leh van-tirhkoh tawngin thu shawi mah ila, hmangaih nei shuh ila, dar ri mai mai emaw, darbenthek ri emaw mai ka lo ni. (Mihring tawngte leh vantirhkoh tawngtein thu sawi thei mah ila, hmangaihna ka neih si loh chuan, dar ri ang emaw, darbenthek ri ang emaw chauh ka ni ang)

Korinth II
7:10 Pathian lama hmangaih-na-in inchhir lo chhandamna turin shima a thawk. (Pathian duhzawng anga lungngaihna hian chhandamna tura simna a thlen a, inchhirawm lo tak a ni)

Galatia
5:1-2 Libarti atan a Krista in min chhua, chutichuan ding nghet ula bawi-tanna nghawng-kawl-a chuan lo hnawk tawh suh u. Ngai teh u, kei Pawla’n in hnena ka shawi hi, peritem lo chang ula, Krista engma-in a sawt lo vang che u. (Krista chuan min zalentir ta si a, in zalennaah hian ding tlat ula, bawih nghawngkawl bat leh tawh suh u. Ngai teh u kei Paula ngei hian ka hrilh a che u- serh in tan chuan Krista chu in hlawkpui lo tawp ang)

Kolossa
2:11 Ama-a peritem kuta-a shiam a ni lo chuan peritem pawh-in in lo awm, tisha chu a hlip shawn-in, Krista peritema chuan. (Amaah serh tan in ni ta, kuta tisa vun tan ni lovin, Kristaah chuan serh tan in ni)

Note: Tuta ‘ser tan’ tia inlet hi a hmasa tak chun ‘peritem’ tiin an sie a, chu chu Grik trong a nih. Kum 1898-a an inleta chun “Naoshen zang tan” (Luka 1:59) tiin an sie a, kum 1912-a an ennon khomin “Nausen zang tan” tiin an la sie zing a, kum 1924-a ruok chu ‘Nausen serh tan” tiin an hung thlak tah thung a nih. ‘Peritem’ kha lo hmang zing hai sien chu ‘pulpit, sermon, sakramen, pen’ tihai ang hin eini trong hrim sawn tang ei tih. ‘Lekha’ ti dam hi Vai trong a nia chu ei tuoltro trong ei sawn tah vong a nih.

Hienga bu hrang hrang an inlethai hi siem phuisui peiin kum 1924 khan Thuthlung Thar bu hmasa tak chu an sut a, bu mal mal an inlet le sut trana inthokin Thuthlung Thar bu pum bu khata a hung suokna dingin kum 26 sung a lak a nih. Chuonga fe peiin Lusei tronga Baibul pumpui chu September 6, 1959 khan a suok a; kum sawmah, October 1968 khan Hmar tronga Holy Bible khom a suok ve tah a nih. Hrietna le trong a hung inthrang pei ruolin Lusei tronga mi chu an siem thra zing a, hma a hung sawn deu deu a. Hmar tronga mi ruok chu sut a’n khat bakah a buoipuituhaiin sin dang le fawmkèma an thaw a ni leiin a châng lem chun hma sawn nekin hnung ei intawl lem am a ni aw ti ding hielin a um.

Ei ngirhmun thlalak
Dr. Thanglung inlet Baibul 1968 suoka chun Deuteronomy 11:10-12 chu hieng ang hin Lusei tronga an inlet ang charin, “In va hluo ding ram chu in hung suokna Aigupta ram, thlai huona chi in tuh a, in kea tui in buokna hlak ang a ni nawh a; in va hluo ding ram chu tlanghai le ruomhai le van ruotui dawng ram a ni lem a. LALPA in Pathienin a zawng suok ram a nih; LALPA in Pathien mit chu kum thara inthawka a tawp chenin a fu hlak” tiin a sie a. BSI sut Hmar-Millenium Edition (2005) le BFW sut nuhnung taka chen a ngai charin ei la sie zing a nih.

Hi hi entirnaa ka hung hmang san chu, iemani chena inthok khan trong hmang dan mumal tak ei lo ser suok taa chu indik taka hmang tumna lungril le hmang nachang ei hriet naw amani aw ti dingin a um a, chu chu ei Baibul chang thur suok khi hrilfiena thra tak a nih. Hi taka hin trong hmang dan indik lo, grammar indik lo le inlet suol hulhuol thil pathum a um a. Chuonghai chu inlettuhai le tiemtuhaiin ei hmu thei naw chun trong hmang thuah ei ngaituona mit a la meng tawk nawh tina a ni el thei. Hieng ang chi hi ei Baibul hmang laia hai hin hmu ding a tam em em. A chunga mi chauh khi a bat batin hang hril ei tih. Chu chun ei hma bak nor ding inkozie ngaidan ei nei thei ka ring.

Pakhatna, “in kea tui in buokna hlak” ti trongkam hi ngaituo buoi khom ngai loin trongkam indik lo a nih ti ei hriet thei nghal ka ring. Eini lai hin kea tui buok ei um ta hlak am aw? Kutin an naw tui ei buok hlak? Chu chu ni siin, ieng dinga Baibul thu a ni lei ela kea tui ei buok ding? Hi taka a hril tak chu, ke ngota tui chawia thlai chawm harsatzie le Pathienin van ruotuia thlai a chawmna hmuna chenghai vangnei dan hang inthlauzie thu a nih.

Pahnina, “in va hluo ding ram chu tlanghai le ruomhai le van ruotui dong ram a ni lem” ti hi an ram hluo ding chu phaizawl ringot ni lo, tlang le ruom umna le ruo a surna hlak ram a ni thu a hrilna a nih. Aigupta rama Israelhai umna Goshen phaizawl, tlang um nawna le ruo a sur ngai zen zen lona le an hluo ding Kanan Ram chu a hrilkhi a nih. India hmar sak ram, ruotui tamna hmuna chenghai chun ruo a sûr dêr nawna ram hi ei ngaituona khomin a suongtuo phak thei naw el thei. Kum 1980-83 sung Saudi Arabiaa kan um lai voi khat char ruo a sur a, chu chu November 14, 1980 chawhnung dar thumah a nih. Hi hi thil vang a ni leiin a ni khom ka hrietzingna khawlin a la vong zing ni mei a tih.

Ei hril nuom tak ruok chu, “tlanghai le ruomhai le ruotui dong ram” ti hi sentence kim lo a ni bakah trul loa plural ‘hai’ voi hni zet inzepna le a hrilfienaa ‘ruotui dong ram’ (adjectival noun) hi a ram um dan hrilfietu pakhat a ni leiin a ram um dan hrilfiena dang ‘tlang le ruom’ hrilfietuin a um thei nawh, ti a nih. Hi hin grammar dan a bawsiet bakah a kawk a fuk thei naw bok. Delhi Version-a chu “in va hluo ding ram chu tlang le phairuom umna, van ruotui dong ram a nih” tiin kan sie. Zo le phai, tlang le ruom ei ti hin plural nina a pai sa a, a hrana plural sinsiena sie a ngai ta nawh. Ei Baibul hmang laihai hi hang tiem inla, Saptronga plural form an siena taphotah eini trong fe dan ni naw sienkhom ‘hai’ ti bel trep trep an tum a, ei trong kal rem le grammar fe dan nasa takin a khak buoi a nih. Hieng ang thu rem dan indik lo hi ei lo pawlnel sawt tah leiin le ngaiah neia chuong anga ziek chu ei ching thrang tah leiin, ei thaw suol a nih ti khom ei hriet thei tah naw a, ei hriet tlat naw leiin insiem thrat trûlah khom ei ngai nawh. Chu chu ei thrangmawbawk laia pakhat a nih.

Pathumna, ‘LALPA in Pathienin a zawng suok ram a nih’ tia an sie hi Lusei tronga an inlet dan ang chara a comma khom pei loa an lo inlet sawng ve top el a nih. Baibul ei en ruok chun ieng tronga zieka khom ‘Lalpa zong suok ram’ ti hi a um naw hrim hrim. Chu chu ni siin, ieng leia ngaingam taka ei lo lak lut ve? Ngaituona hmanga ei bi chieng naw lei dam le Lusei tronga an inlet dan ang anga a hrum a hriela ei kawpi sawng lei dam a nih. Iengkim siemtu, hretu le neitu Pathienin a la zong suok fawm hiel khopa ram pilrila um anga ei inngai leiin, ei ngirhmun le inhmea an lo hriet dan angin an lo inlet ve top el niin a’n lang. Inzakum deu a nih, inzak nachang ei hriet chun.

Delhi Version-a chu Deut. 11:10-12 hi, “In hluo ding ram chu in hung suokna Aiguptaa thlai chi in thlàk a, thlai huon anga harsa taka ke ngot hmanga tuia in chawm hlak ang kha a ni nawh; in va hluo ding ram chu tlang le ruom umna, van ruotui dong ram a nih. Chu ram chu LALPA in Pathien ram duot a na; kum bula inthoka kum tawp chenin LALPA in Pathien mit a fu zing hlak” tiin sie a nih. Duthu a lam chie nawa chu a hmasa le inkarah mel tam a tla tah. Sut nawka chu hi neka nam le fel-fai lema sie ning a tih.

Entirna pakhat dang hang la nawk inla. Chanchin Thra Johan 1: 4 a ‘light’ ti chuh Lusei tronga ‘enna’ tia an inlet leiin Dr. Thanglungin Hmar tronga a’n letin ‘varna’ tiin a sie a, “chu hringna chu mihriemhai varna a nih” tiin millenium kum 2000 ei tlung chen khan ei la ti chur chur a. ‘Light’ chu Hmar trongin ‘var’ a ni a, ‘varna’ chu Saptrongin ‘wisdom’ a ni bok si. BD/MTh/Doctorate iemani zat ei suok hnung khoma inlet dik lo a nih ti hre suok thei loin, inkhaw trawt trawtin a hrilfiena ei siem a, ei tlip mawi a. Ieng leia chu indanglamna chu man suok thei loa ei um? Hi thil hi ka nghok leiin ri ka siem a. Chu zar chun BFW buotsai 2002 suoka chun ‘var’ tiin an hung thlak a, BSI sut 2005-a khom an hung sukdik ve tah pei a nih.

Chu lungmawlna le inthimna chu lungvar neia ei siem phot naw chun ieng angin ei trong sukhmasawn tum inla khom thil thei a ni nawh. Sungril mit varna thrang lo chun taksa mitin hmu kur inla khom ei thil hmu umzie ei hriet thei nawh. ‘Hnam hmelma, hnam inphatsantu’ ti umzie khom hre si lo le thusuok tlawmte khom ziek indik thei mang si loin literechar sukhmasawn ka tum chun, ka tumna le thrahnemngaina chu inpak tlak a ni lai zingin, ka tak bitna le kawrongna hriet suok phot tum chu ka thil thaw hmasak ding ni lem awm tak a nih. A thuphunga hriet le a tak rama tonhriet inkar hi iengkimah a hlat lai zingin, thu le hla khawvela lem chu a hla zuol el thei. Hi lei tak hin a si le a tak critics haiin an buk pha leh John Ruolngulin, “literature-on-demand” a ti ang chi hi chuh Belsazar chan an inchangtir hlak hrim a nih.

Trong hrim hrim hi a hmangtuhai dung nêka insangin a’n thrang thei nawh. Thil thar chi hrang hrang hmusuoktu hnam chun a thil hmu suok hrilna ding trongkam a ser sa ngei ngei. Sura The Great khan mongping operation chauh thaw loin le Phungpuinu sekibusuok ringa lungawi el loin vuongna dam lo siem sien chu, vuongna bung (parts) po po hrilna eini trongin nei daih tang ei tih. Arbawm tâ dàn teknawlawzi chen ei hriet a, a bung tin hrilna ding trongkam khom ei nei. Tu laia arbawm tâ dàn khom hre ta lohai chun arbawm hrilna trongkam khom an hriet ta nawh.

Chuong ang chu ei trong hmasawn dan a ni chun ieng am thaw tang ei ta? Insuo zalen a, hrietna le thiemna tui thara ni tin chawm a, a fintu vadung hrang hrang la lut a, chuonghai chu thlit fim a, mi tin pan tlak, chawi tlak le dawn tlaka siem a ngai. Chu literechar vadung chawmtuhai chu thu le hlaa inhnikna nei, thlarau hrang hrang pawlna donghaia inthoka far thla, zieka an khawl khawm, an kutsuok intling khawm a nih. Ziek dinga mortu le taimakna petu khom annia inkoltira um le thok thlarau a nih. Literature-on-demand chu hnar nei lo, mi mawtor-a tui an hung chawi, a fai le fai lo ngaisak loa lo inchawk ang mei mei a nih. Hmar MIL ringot thlir le inhûkpuia ei literechar sukhmasawn ei tum a ni chun hmeithai in tiet khom indin suok ngai nawng ei tih. Inpui hrietpui le hrietpui loin literechar khawvelah kongro a suk naw a, a suk thei naw a, suk ngai bok naw nih. AK-47 a kap suok thei chi khom a ni bok nawh.

(July 6, 2010, Delhi)