Thrangpuitu Ban Sei

LALPA chun Mosie kuomah, “LALPA bàn a tawi taluo a ni?
Ka hril anga i chunga a tlung le tlung naw tu hin hmung i tih”
- Nambar 11:23

Sansuokna din LALPA kut chu,
A taw taluo teu naw a,
A nâ khom a sêt bok nawh.
- Isai 59:1

September 21, 2013 Inrinni chawhnung dar 1:35-a Delhi-a inthoka Chennai pana suok dingin Spicejet (SG 303) ah ka chuong a, ruo a sur nasa leiin suok el thei loin vuongna sungah kan nghak a. Chuong lai chun ka lungrilin, “Lalpa, ka hisapnain a hawl phak ngai lo sim tawp ram pana i mi thruoi el ta hih, ieng thil am an ta le?” tiin ka’n don a. Hi hi zawna amanih, an naw leh maktina trongkam amanih a ni le ni naw ka hriet bik nawh. A ieng khom chu ni sien, indik vè véng a tih. Kum 2007-a sut Baibul (Delhi Version) chu a remchang hmasa takah international standard-a mawi tak le inphân danga sut nawk dinga riruong a ni a, chu chu baw zui dinga inzin ka nih.

Kum 2002-a sorkar sina inthoka ka penson charin mi tu khom ruoi le sor ni loa mani lungpuok ngeia a hran hlaka Baibul inlet thrat le chu chu Manipur simthlang Senvon khuoa Gospel a hung lutna zabili 2010 hma ngeia mi dang sum thaw khawma inthok ni loa mani thaw suok ngei sum hmanga sut chu kha hma daih a ka target a ni a, chu chu zabili hma kum thumah hlenin a um a, Senvon-a ngei October 13, 2007 khan tlangzarh a nih. A kûl a tâia mi enpuitu H.K.Kawllienthang le hi rongbawl sin kan thaw ngat ngat sunga kan tonhriet poimaw tak tak laia pakhat chu Pathien ringumzie, mihriemin ei chana innghat thaw ding ei tlâk phot chun ama tienga a thu tiem chu hni non khom ngai dĕr loin, mihriem beiseina khêl daia nasain, a hlen zat zat hlakzie thu chu a nih. Chu le inzom pei chun a nih mani sum senga India sim tawp pan dinga vuongnaa ka chuong hih.

Hmar tronga 2007 Baibul (Delhi Version) hi hawrop inhrol hmanga sut, phek 1700 zeta sa, kilogram 1.2-a rik, thingtlanga meivar um nawnaa le tarmit thra an nei nawna hmuna khom nu le pa-in harsa loa an tiem thei dan ding ngaituoa duong a ni a. A hmangtuhaiin an hril rawn tak chu a sa le rik thu a nih. ‘Chanchin Thra mansapui’ paitu hnama inngaihai khom hin inkhawm sung chauh khom Baibul rik tap el pai chu ei lo pei naw tlang khop el. A hung suoka inthoka sawt naw te-ah computer le mobile-a inthoka tiem thei dinga sie a ni khan thralai tam tak chun remchang takin mobile-ah an chawi ve thung a, an tiem le tiem naw chuh thu dang ni sien. India rama hnamhai lai mobile-a Baibul sie hmasa tak a parietna niin ka hriet, Lalchungsiem Thlawngate bengvarna zarin. A ieng khom chu ni sien, Baibul inlet thar sut hmasa tak hi tu khomin a aitecheuna anga ngaiin, siem thra le sukdika sut nawk vat dinga riruong a ni hlak angin Delhi Version khom sut zo a ni char khan ennon sin tran nghal a ni a, a sut dan ding le mi sutpuitu ding lampui lungrila dap zing pumin, mihriem thaw thei bak khela iengkim sukpuitlingtu, thrangpuitu bân sei, tawpintai nei lo Pathien kutah kan innghat top a. Thil dang danga Pathien mi thruoina, ieng ka hriet naw lai khoma ka hma khala hnuoi tienga a mi lo dom dan, testimawni hril seng lo chu maksanin, Baibul prawzek le inzom ringota a mi thruoi dan hi ziek seng lo le ziek suok ruol lo tam tak a um leiin, hringnuna innghatna tlak um sun chu Pathien, Bânseipa a nih.

Iengtin am thil a hung inher pei ding ti ka hriet naw laiin, ni khat chu John Ruolngul-in Hanoi-a inthokin a mi hung biek a. “Pu Muong, printing press tienga sumdawng Indian Company pakhatin hi taka hin UN project-ah kontrek an hmu a, Vietnam sorkar le a ram mi, hmu lo inbeiseihan dang tuma nasa taka thrang an lak leiin contract khom sign thei loin ni kum khan an lo um ta a, an bei a dong der a. An chungthu hrilpui dinga Indian Embassy an hung inpun leh kan sukfelpui a. An lawm taluo kha, “Iem kan thawpek thei ding che” tiin an palai Dr. Manoj Verma hin a mi’n don lep a, pawl ding dang a hriet naw bok leh, inah dam a hung leng a” tiin a mi hung hril a.

Kei chun, “John, innu inzin lai, i parol lai a nia chu lo nghok naw rawh. A hung leng nawk pha leh ei Baibul prawzek hi lo hril la, khawl thra nei an ni bok a, ieng chen an an hung thrang thei ding ti lo indon rawh. Pathien hung tir khom an ni el thei a nih” ka ta. Ka ti ang chun a lo hril a, an theitawpa Baibul sutna thrang an nuom thu an hril bakah, India rama an hmunpui Sivakasi-a um Director Senthil Kumar chu lo inbiekpui dingin a address le mobile nambar iengkim an mi hung thon a. An Company hming chu Lovely Offset Printers Private Limited a nih. A hmunah mani ngei fe hmasak phot thrain ka hriet leiin Chennaia um, unau sungkuoa inman, Rathinavelu chu ka zuk telefawn a. “Chennai-ah hung thla phot la, i fe nuomna taphotah fepui ka ti che a, Maldives-a i um laia Pu H.T.Sangliana hai le ei hril vet, Security Training Academy indinna dinga ram acre 50, Madurai-a inthoka km 75 vela hla, Kerala le inramrinaa kan inchawk dam ei va sir ding a nih” a ta.

Delhi le Chennai inkar hi chawl der loin vuongna lienin darkar 2:45 a lak a, a vuong sung hi Delhi-Imphal leh an inzat vel char a nih. Ruo a sûr nasa leiin darkar khat deuthaw Delhi erpawtah kan nghak a, thim hmulah Chennai ka tlung chauh a. Ka fe nuhnung tak 1997 le inkarah thrang khat le a chenve zet a lo tla tah leiin a khaw hmel a lo inthlak nasa ta hle a, erpawt bilding thar khom an lo zo fel chie nawa chu an hluo tran ta a. Nghatna tieng tieng khawvela company lien le inlar hming, Saptrong le Tamil-a inziek hmu ding a um a, abikin automobile industry an lut nasa. Kum 2012-a Chennaia mi um zat chu 5,008, 763 a nih. Chuonghai lai chun sinthaw le lekha inchuka um Hmar mi um zat chu 60 vel niin an inhril. Hmasawnna le a phur sa thil thra lo tam takin hmun hrang hrang a chimbuoi laiin, Tamil-hai chu an nina, kalchar, sakhuo, hoiher le ni tin khawsaknaah an hnam zepuiin a phan nghet em em a, inza le ngaisang an um khop el.

Chennaia unauhai le inpawlna
A tuk September 22 chu Pathienni a ni leiin Chennai Hmar Christian Fellowship-ah inkhawm a, ei mi le sa umhai inhmelhrietpui dingin prokram ka siem a. Pa fel tak el, Tuolpui (NC Hills) khawsuok Henry Changsan-in dar 12-a inthoka dar 4 vel chen chawibiek inkhawm le inpawl khawmna nei dingin prokram a hung huoihot bakah ruoi an buotsai bok a.

Richard Songate, Bank PO inah kan inkhawm a. Anni hi an tlawm bakah inchuklai le sinthawna chi hrang hrang nei an ni leiin, Pathienni zatin ni loin, an inhman tlang hunah chawibiek inkhawm an nei a. Mi sawmthum chuong an hung a, zalen takin kan titi a, ruoi inhnik tak kan kîl bok a. Chawibiek inkhawm hi an nei tran hun char an hriet nawa chu kum 2004 lai vela an lo tran tah, hring le hroa um, inkhawm khop an inhui khawm pha an sukhring nawk pei niin an hril. Hienga Vairampur hmun hrang hranga inkhawmna bultrantu ka ni leiin an ngirhmun hi ka hriet thiempui a, mi hnam kara mani nina, kalchar le sakhuo kengkaw tlat poimawzie le bultrantuhai mawphurna insangzie dam a mi’n ngaituotir zuol a. Delhi-a inthoka lekhabu iemani zat ka hung chawihai chu an laibrari-a dingin ka pek a, dit khop lo takin chawhnung dar 4:30 ah kan inpawl khawmna chu kan zo thei trawk a nih. Mi ngainatu le ei ngainathai kuoma cheng ang tluka inhoi hi a um nawh.

Chennai-Madurai-Sivakasi
September 23, 2013 Thawtranni chawhnung dar 2:30-ah Madurai panin vuongnain kan suok a, 3:50-ah kan tlung a, ka fena ding Sivakasi tienga ka’n hmupui dinghai car hung thona chun kan chuong a, zantieng dar nga inrik vangah kan tlung a. Ka fena san tak, Baibul sut thu chu Senthil Kumar, Director, Lovely Offset Printers Private Limited leh kan hril nghal a, minit sawm sungin kan zo a, kum 2014-a sut tran dingin kan rèl a. Baibul sutnaa hmang lekhapuon, Bible Paper hi an tawk thrang naw leiin, a sut tak chu Bangalore-a a ruolpa, hieng ang tawk thrangin buoipui a ta, a dang po po chu anni buoipui ding a ni thu Director chun a mi hril bok a.

Chu zoah an faktawri a mi fangpui a, an khawl hmanghai chu German siem, a thra tak chi vong a ni a, pui rep rep tak a nih. Assam rama inthoka hung le chu faktawri-a thok chu thralai iemani zat an um a, a thren chu ka’n biekpui a, mi thar deu vong an la ni thu an hril. Hi faktawri kan fang lai chun ka ruolpa L.Rokung, kum 2003-a muol liem tah le hausa dang Liensangvung inthukopa kum 1962-a Churachandpur-a printing press hmasa tak, a hminga L & R Press an inbuk, an hung inthrut lai chu mitthlaah a hung inlang a. Hieng lai hin hieng ang khawl hi Churachandpur lai chu a la um naw leiin, a en ding ringotin khaw hrang hranga mi an hung fuon khawm hlak. Hi Press-a hin a nih lekhabu puitling ka buotsai hmasa tak, HMAR HLA SUINA ti chu 1980 khan kan insuttir ni. Tuta faktawri-a ka khawl hmuhai le L & R Press inkara hin kum 50 chauh a la tlaa chuh hmasawnna tienga an inkar hlatzie chu mel sang tam a ni tah. Ei buonhai hi mihriem taksa put ve an nia chu pa le pa inkar hlatzie hi hril ngam khom a ni nawh. Trong khat hmang seng seng, uisa fa seng seng lai khom, tuthlaw le laptop civilisation inkara chenghai inkar khom hi a hla ta hle a, “a pawng bik a phai bik um loin” ti hla hi bau chauh naw chun ei sak ruol thei ta nawh.

Sivakasi dangdaina
Sivakasi bung le chang hi ei fe pel hmain hi hmun dangdaina hi tlawmte hang zep sa vak ei tih. Sivakasi hi khaw lien rak lo, mihriem 234,688 (2011) umna, Maduraia inthoka km 75 a hla a nih. A dangdaina chu, Sivakasi huol vel km 25 sunga hin ruo a sûr ngai naw a, a boruoka luma chu tui hu a um ve naw leiin a hul a, lum tuor a sukzang. Kha hmaa Congress hotu hmingthang K. Kamaraj, Tamilnadu-a Chief Minister trum thum zet (1954-1963) ni zawn le a hnunga Congress President hun lai khan hi hmun le inrem fakzongna indin dingin mi thiem a ruoi a, rawpuok (fireworks, crackers) le nawtchok/nawalh (match) siemna le lekha sutna khawl inbunna dingin duthusam niin an ngai a, chuonghai siem suokna dinga hmun poimaw tak a hung ni tah a nih. India rama nawtchok le rawpuok 70% hi anni siem a nih. Hi khuoa hin printing press lien pathum a um a, printing works hrang hranga fak zong ruok chu kompani 800 chuong an um. Hi khuoa hin faktawria thok 25, 000 (2011) an um a, kum khat sunga an thaw suok chu cheng tlukledingawn 20 chuong a nih.

Madurai-Andipetti
Zan tieng dar 6:30-ah Sivakasi maksanin Madurai kan pan a, FORTUNE Pandiyan Hotel-ah kan innghat a. September 24 sun dar 12-ah suokin, Kerala le ramri tienga um Andipetti, Rathinaveluin security training academy hongna dinga ram 50 acre a’n chawk chu sir dingin kan suok a. Hi training centre hming dinga an hmang tum chu Velbros International Security Academy (VISA) a nih. Hieng ang tienga hmang dinga kontrek an ziekpuihai chu khawvel hmun hrang hrangin trening pe dinga kontrek an ziekpui, Israel rama private security organisation an nih.

Kum 1994-97 sung Maldives-a ka um laiin hi Security Training Academy thu hi H.T. Sangliana hai nupa le Rathinavelu hai an hung changa kan chai hrep tah hnung a ni a. A hnung, Baibul inleta ka buoi hnungin Mizoram tienga mi sawmnga ruol an incha thlak a, trening an tran a. Amiruokchu, inthununna le teireina an tlaksam bakah inrui thei thilah insum an pei naw a, an trening-na laia ui, mi vai le vai lo khom, an rêm duok duok leiin an hming a se hle a, muolpho takin an tir suok nawk vong a nih. Tu khom hin mihriem hmang tlak trening pek ding um hai sien chu ieng tik lai khoma tran el thei dinga phalna, arms training chenin, kum 2009-a inthoka an hmu ta sa a nih. Kum 35-40 inkara upa, trainer ding mi an dit a, chu chu hung zongpui dingin a mi ngen a, tlin dinga inngai, a nuom le a pei ding an um chun mi hung inhriettir hai sien, thaw dan ding pei lo kawkhmung ka tih. Sienkhom, mi thabo, ringum lo le teirei pei lohai chun hni buoi ngai naw nih.

Andipetti-a inthokin zan dar 8-a Madurai erpawta inthoka vuongna man dingin kan hung kir a, zan dar 10-ah Chennai kan chuong lut nawk tah a nih.

A tuk September 25-a Delhi tieng kir ding ka ti leh Rathinavelu-in zan tieng mi poimaw pakhat inhmupui dinga prokram a lo siem tah leiin ka la cham a. Zan dar 8-ah bu fak malama kan inhmupui ding, Tamil mi, Rajan Natarajan, Deputy Secretary of State and External Affairs, Maryland (USA) chu hmu dingin ITC Grand Chola, Asia rama hotel lien tak dottu nia an hril, pindan 1200 umnaa chun kan fe a. Rajan hi la thralai tak, trong nuom le chinchang hre tak a ni a. November-a USA ka zu sir phaa inhmu dingin kan intiem nghe nghe a. A san chu, Maryland State hi Zo hnathlakhai inbum rawnna tak, mi singhni ding lai uma an insalna a ni leiin, harsatna an tuok changa thrangpui theitu ding nia ka hriet lei a nih.

September 26-ah dam takin Delhi ka chuong lut nawk a. Pathien lunginsietna le thratna zar lieu lieu leiin, thangsuoa hung inlawi angin ka’n ngai. Kan zin sung po poa ka fena taphota ka thil tuok chu ditsakna ngot a nih. Damlai suk le tunga ka voi le chang, ka hnung le hma sir tina mi vengtu, Baibul sut dinga Delhi-Hanoi-Chennai-Sivakasi-Bangalore suikhawmtu le iengkima mi thrangpuitu Pathien bân hi a lo va hang sei de aw!

(September 28, 2013 Delhi)