New York-Denver
USA-a kan nupaa kan inzin hmasa tak trum 1990 October-November chun Dr. Rochunga Pudaite hai nupain Bermudaa mi za ruol fienriel kum tin an neipui hlaka thrang ve ding bakah khawvel huopa an rongbawlna hmun le hma hmupui ve a, India Childrens' Choir fe hmasa tak hai rongbawlna iemani chen zu uoppui ve dinga an mi fiel leia fe kan ni a. Kan inzinna chanchin khom 'Khawvel Thara Inzinna' ti hlam tam fea sei ka ziek nghe nghe a. Sie thrat nachang hrie ei um chun, khang hun laia thil tlung, tlangram hmun kilkhawra pieng le seilien einihai rawiin Pathien thu hmanga khawthlang mihai, hausakna le neinungnain an mit sukdel a, Siemtu neka a thilsiem be lemtu tam takhai laia chanchin thra ei hril let dan histawri suituhai ta dinga hmangraw poimaw tak ni ngei a tih. Khawvel histawri-a thil tlung hmasa tak khom a ni el thei.
Chuong lai chun Dr. Rochunga Pudaite hai chu 'Bible Belt' an ti biel, Wheaton, Illinois State-a umhmun an la khuor lai a nih. Hi hmun hi Watkin Roberts khawsakna Toronto (Canada) dota ei khawvel suizomtu khaw poimaw, USA-a khaw lien le chin sang tam laia eini rawi ta dinga khaw lien tak le poimaw tak, ei mission chanchin ei hril changa a ser laia a mei ni zing ding chu a nih. A kum nawk 1991 khan kan nau tlum tak James Lalropui Keivom chu Illinois Institute of Technology (Chicago) a lekha inchuk dinga a fe thlakin anni hi tluklutna le insaisangnain a zuk hmang phot a Kum hnina a zoin Computer Course-a inthokin Photo-Journalism tieng a pakai leiin University of Colorado, Boulders-ah a’n son a. A hnungah Bibles For The World (BFW) khom Wheaton (Illinois) a inthokin Colorado Springs-ah an inson ve leiin khuo inhnai te-ah an um tlang nawk ta pei a. Kan naupa khomin New York-a a sinthawna New York Daily News besana August 15, 2013-ah khawvel hrieta thla la thiem chawimawina a dong pei leiin, an kuoma ngei fe a, kan pafaa lawmthu hril chu Pathien le mihriem laka khom tha bat kan sut ngei ngei dinga ka ngai a ni leiin November 15, 2013 tuk khuontevikin New York-a erpawt pakhat La Guarda-a inthokin James hai nupa leh kan inthok suok a. An inkar a lo hla khop a. Chawl loa vuong char charin, New York-a inthokin Colorado khawpui Denver tlungna dingin darkar 4 top a lak a, Denver kan tlung chun darkar hnia inhnua Time Zone danga um a lo ni leiin hun hisap dan a buoi rup hman a nih.
Denver hi USA khawpui laia lien pawl le poimaw pawl, an erpawt hi an rama a lûn tak laia pangana a nih. Hi State hi a ram lailia um, Rocky Mountains le tlang poimaw takin kulpui anga an huol vel, chuong tlang sanga inthoka vur intui thla chun vadung poimaw tak siema a’n luongtir huou huouna, an ruom turu Grand Canyon (Arizona) dam hi Colorado River-in kum sang tam sunga a hor kuok a nih. Ram dang khaw laia inthok khomin thalhlawn (missiles) hung kap sien, a tlung hmaa lo hmu hmana kap thlak theina hmun remchang a ni leiin sipai tienga hmun poimaw a nih. Saddam Hussein inlal laia America-in a run a, an Scud missiles-hai indo longa inthoka a kap thlak khan, an hmet puokna hmun tak chu Rocky Mountain sunga an ralthuomhai an kontrawlna hmun inthupa inthok daih niin an hril!
Erpawta inthoka kan suok kha, kan cham sunga hmang ding motor thra kan rizapna Hertz hai umna hmunah an bus-in a mi thruoi a. Thlirna tieng tieng, car insi khupin an bok khup el a, a hmang ding an um seng zozai amanih ti ding a ni laiin, chuong ang car hiring company lien tak tak chu erpawt se vela chun a dorzon-in an um. Kan huol lai khan a man kan pek lawk sa a ni leiin, kan car hmang ding khom chu inpei sa diemin a lo um a, a chabi an mi pek a, Denver khawpui tieng kan pan a. Jacob & Zingi Pudaite hai naunu Marilyn Pudaite (a pasal Jonathan Ray le an naunu Shiloh) le a sangnu Gloria Pudaite, (a pasal Matthew le an naupa Sinn) hai chun zingbu fa dingin Viernamese restaurant-ah an mi lo nghak a. Jakob-hai sungkuo hi Wheaton-a an um laiin James-in belbula a zu nei a ni bakah Mayur Vihar, Delhi tlangah pansak-panthlanga kum iemani zat khawsa tlang kan ni a, kan sungkuo laia kan zêl rop hlak an nih. Mani mi le sa, mani tronga inbiekpui thei mi lawmluttu Denver-a dam an lo um el hih, malsawmna ropui a va ni ngei! Bawinuhai, kan lawm takzet cheu!
Colorado Springs
Denver-a zingbu kan fak khop chun, kan inzinna san tak, Dr. Rochunga Pudaite hai sungkuo hmu dingin kan inthok suok a, darkar khat le minit sawmpanga vel lam a nih. An lampui a thra em leiin du tawka hrata khal châk a um khop el. Sienkhom, hieng lai chu motor khaltuhai hi an fimkhur khop el a, dan ang thlapa thaw naw chu lam sira enthlatu camera mit hmun tinah an sie leiin, dan bawsetu chu an inring hman hmain, an man nghal el a nih. Khanga mi’n chăntu le mantuhai khan dannaranin police thuom le motor an hmang ta naw leiin an hmel hmu naw lei ela ngampat chi a ni nawh.
Zing tienga inthoka mi lo tŭng tah a ni leiin Paula pa khom ni dang nekin bathroom a pan inzing lem kan ring a, sienkhom Vaihai ti danin, ‘a râm se-a fe a ngai. Bibles For the World ofis-ah intuok hmasa phot a, fang kuol a, chu zoah an ofis bul ela um, hmun hmingthang le mawia khawvel hrilfak, ‘Garden of the Gods’ chu thlir tlang a, chu zoah a inteknu Pi Lalrimawi le John Pudaite nuhmei Lawm le a nauhai hmu dinga an ina fe a, inhma tienga zanbu kil tlang a, Denver tieng dar 10 velah tlung a, ka naupa James ruol thra, Patrick ina riek chu kan prokram a nih.
BFW ofis inhoi tak el kan tlung chun John le a pa chu an la tlung hman naw a, minit nga hnungah an hung tlung ve nghal a. Hril ding kan hau taluo a, an ofis hmasak Wheaton-a kan titi sunzom dingin a karah kum 23 zet a lo tla hman ta a, lungril le thlarau chu sazuk tuoi ngal hrat le tha inza angin la’n per zak zak sien khom, taksa-in zŭr tieng a lo pan ta a, ni danga voi khat inchawma ei hlĕn hlak kha chokchawnâl kal rema suol a lo ngai tah si. Chuleiin, a trûl tongkhong chauh hrilpui dingin lungril ka siem a. Umran Retreat-ah lungril le thlarau le sum le paiin hung thrang sien khom, taksa ngeia a hung thrang thei naw leiin, October 23-25, 2013 Fienrielna kha a tawi kim thei ang taka ka hmu dan tlangpui le ama rawia kum 1978 Haflong HSA General Assembly trumtriek zoa Student Leaders-hai Fienrielna neipui a ni truma buotsaih, LUNGKHAM BANGNA ang kha LUNGKHAM BANGNA-2 buotsai chu a huoihottuhai thaw tum a ni thu le chu chu bawzui a ni pei thu ka hril bakah, a sunzomna ding, thla ruk sung ngeia buotsai nawk a thrat ka ring thu le, chu chu buotsai a ni hmaa a hrâm bilpui lo bitumtu ding, hieng tienga inhnikna nei le hrietna pai mi iemani zatin workshop nei a poimawzie thu ka hril bok a. A tawi zawngin, Fienrielna kha ring bakin a hlawtling a, a seng thlawn naw a, bawzui tlak a ni ang hrimin bawzui a ni pei a, ra thra a la hung insuo zui pei ding a nih.
BFW hin khawvel hmun hrang hrangah Baibul maktaduoi 22 neka tam a thon dar tah a. Kha hmaa an lo thaw dan anga America rama sut le thon suok kha sengso a tam talaw leiin, tlawmte senga tam tak thon suok ding chun India rama sut le thon darh thrain an hriet leiin, kha hmaa ofis lien tak el, an bazarpui laia mi kha zorin tuta an ofis hi an inchawk a nih. Hi khom hi an la hmang seng naw leiin a chenve deuthaw, kha hmaa Baibul thon suok ding an hnaw sipna hlak kha mi an inhluotir a, body-building trening (sasuksekna sikul) in an hmang.
Ofis-a inthokin a bul hnai ela um, GARDEN OF THE GODS kan fang a, ngaituona a suksei khop el. Phaivangpui chi khat, lu inlok bur elin hnuoi sungah in lien tak tak inlengna khop kuo suot a, hmun threnkhatah muol inzum tak tak, fei ang ela ngir fuk el an siem, New Zealand-a ka hmuhai le pûk threnkhat, entirnan Virginia le West Virginia inram rina Shenandowa phai ruoma um Luray Caverns-a fangfar far thlain ban inzum tak tak a siem, kha hma November 2006 kan fang thu New York Diary-7 a ka ziek dam a mi’n hriet suoktir a. Lungbuot ang deuh, ni si lo, pil sen, nisa em chang tah le tui hnuoia pil, kangtuihaw le tuia cheng kawr nei chi hrang hrang kawr le inchok pol a ni deu vong leiin, hieng lai hmun hi tuipui hnuoia lo um tah hlak, khawmuol insawi danglamin a hung mor suok a nizie chu indon tam ngai loin hriet thei nghal a nih. A huol veltu Rocky Mountains vel an insiem lai, kum maktaduoi iemani zat liem taa thil tlung a ni chieng khop el.
Hi huon dangdaina le makna, abikin Lungling (Balanced Rock) dam chu a thlalaka inthok chun thil um thei ei ring naw a, a hmunah Thoma Didum anga kut ngeia ei tawkin ei la ring thei nawa chu ei awi chauh a nih. Hi huon chanchin ringot khom hi artikul le lekhabu tam tak miin an ziek tah a ni leiin, a mak dan ang angin, hun remchang danga bitum dingin, la maksan hri phot ei tih. Hieng lai hmun hi tuk tina Pi Rimawi zing lengna le fienrielna hlak a nih. Mihriema pieng seng seng, ei zing lengna khawhnawm hi a va danglam thei ngai de aw! Vokpuiin kam cheka an mi zui hŭl hûlna khawvel leh chu a kâr a hla ngot el ti ro, maw!
Huon dangdai kan fang zo chun Dr. Rochunga Pudaite inah kan fe a, kan tlung chun khuo a lo inhnu ta rei el. Tuolah unaunu Rimawi, kum 1953-54 laia Pherzawl High School-a ka kaipui chun hlim sarin a mi lo tuok a. Damnaw deua hmu inring kha tleirawl deuin ka hmu a, lawm a um takzet. John Pudaite ruolnu Lawm Pudaite, kan tunu le a nauhai pahni bakah Jacob Pudaite naupa Solomon khom a lo um a. Riek hman ding kan ni si naw leiin hun serh tawite kan hmang a. Kha hmaa inthoka sir ka tum, a tawpah ka hlawtling tah hram thu le ka naupa James Lalropui, a tira an mi keitleipek ngei le a nuhmei Anneke hai pahni khomin kut lum ngeia chibaia lawmthu hrilna an hung nei thei hi Pathien lunginsietna zar chauh a nizie ka hril bakah lawmthu hril trongtraina le unaunu Rimawi ta ding bika dawvankaina ka nei bok a.
Denver tieng James ruolpa Patrick-in zanbu a lo buotsai chu hnota kir nawk el kan tuma chu Paula pa-in bu mi fakpui loa kan fe a remti tlat naw leiin nunau po inah maksanin, John leh a pa leh keini pathum chu Japanese restaurant-ah zanbu inhnik tak el kan kil tlang a.
Hril ding a tam a, hril chun a pung deu deu a, lung a’n tar deu deu bok. Hieng thil hi USA khawzawla kan hril tawpna tak a ni el tah thei ti dam hang ngaituo chun lung a’n thip vong vong a. Dar riet kan lo tlung phak el tah leiin, dit khop lo takin, rong nasa lem bawl tlang dinga inhmu nawk vak beiseiin, kan inchibai a, Denver panin kan kir a, lampui intluonin ngaituonain châng dang a kân thei nawh.
Colorado University: Boulders
Colorado-a ka’n zin san pahnina chu ka naupa James college kaina, University of Colorado, Boulders-a um va sir a nih. Hi hmuna kan naupa a kai sung hin thla tin a fee ringotah nuoi khat kan seng a, chuong lai chun a dawkana bei nawi tla ringot ringa kan nupaa khawsak a ngai. Sunnithlaka a khuo le University kan fang lai chun, Pathien lunginsietna zarin, kan tlan thlawn nawh ti ka hrietin, ka lungril a lawm a. Vur tla tum, thli dei mangkhengin ru le chang chen sun tlanga a mi nuoi lai khomin, lungrila hlimna le lungawina chun sungrila lumna a mi pek a, dei taluoa hmai ngoi vung vung khom olsam takin ka tuor muolsuo thei pha a nih. A ruol le pai mi iemani zat kan inhmupui bok a, an ngainatzie ka hmuin ka lawm a, ka lung a awi takzet a nih. Nauhai ta dinga nu le pa inpumpekna hi a tak ngeia tuoktuhaiin an hriet a, an beisei anga an nauhaiin hlawtlingna an dong leia an lawmna inthukzie khom anni tluka hre chieng an um nawh. Chu chun Pathien le mihriem inlaichinna hlimthla iemani chenah a tar lang niin ka hriet.
(Delhi, November 22, 2013)
USA-a kan nupaa kan inzin hmasa tak trum 1990 October-November chun Dr. Rochunga Pudaite hai nupain Bermudaa mi za ruol fienriel kum tin an neipui hlaka thrang ve ding bakah khawvel huopa an rongbawlna hmun le hma hmupui ve a, India Childrens' Choir fe hmasa tak hai rongbawlna iemani chen zu uoppui ve dinga an mi fiel leia fe kan ni a. Kan inzinna chanchin khom 'Khawvel Thara Inzinna' ti hlam tam fea sei ka ziek nghe nghe a. Sie thrat nachang hrie ei um chun, khang hun laia thil tlung, tlangram hmun kilkhawra pieng le seilien einihai rawiin Pathien thu hmanga khawthlang mihai, hausakna le neinungnain an mit sukdel a, Siemtu neka a thilsiem be lemtu tam takhai laia chanchin thra ei hril let dan histawri suituhai ta dinga hmangraw poimaw tak ni ngei a tih. Khawvel histawri-a thil tlung hmasa tak khom a ni el thei.
Chuong lai chun Dr. Rochunga Pudaite hai chu 'Bible Belt' an ti biel, Wheaton, Illinois State-a umhmun an la khuor lai a nih. Hi hmun hi Watkin Roberts khawsakna Toronto (Canada) dota ei khawvel suizomtu khaw poimaw, USA-a khaw lien le chin sang tam laia eini rawi ta dinga khaw lien tak le poimaw tak, ei mission chanchin ei hril changa a ser laia a mei ni zing ding chu a nih. A kum nawk 1991 khan kan nau tlum tak James Lalropui Keivom chu Illinois Institute of Technology (Chicago) a lekha inchuk dinga a fe thlakin anni hi tluklutna le insaisangnain a zuk hmang phot a Kum hnina a zoin Computer Course-a inthokin Photo-Journalism tieng a pakai leiin University of Colorado, Boulders-ah a’n son a. A hnungah Bibles For The World (BFW) khom Wheaton (Illinois) a inthokin Colorado Springs-ah an inson ve leiin khuo inhnai te-ah an um tlang nawk ta pei a. Kan naupa khomin New York-a a sinthawna New York Daily News besana August 15, 2013-ah khawvel hrieta thla la thiem chawimawina a dong pei leiin, an kuoma ngei fe a, kan pafaa lawmthu hril chu Pathien le mihriem laka khom tha bat kan sut ngei ngei dinga ka ngai a ni leiin November 15, 2013 tuk khuontevikin New York-a erpawt pakhat La Guarda-a inthokin James hai nupa leh kan inthok suok a. An inkar a lo hla khop a. Chawl loa vuong char charin, New York-a inthokin Colorado khawpui Denver tlungna dingin darkar 4 top a lak a, Denver kan tlung chun darkar hnia inhnua Time Zone danga um a lo ni leiin hun hisap dan a buoi rup hman a nih.
Denver hi USA khawpui laia lien pawl le poimaw pawl, an erpawt hi an rama a lûn tak laia pangana a nih. Hi State hi a ram lailia um, Rocky Mountains le tlang poimaw takin kulpui anga an huol vel, chuong tlang sanga inthoka vur intui thla chun vadung poimaw tak siema a’n luongtir huou huouna, an ruom turu Grand Canyon (Arizona) dam hi Colorado River-in kum sang tam sunga a hor kuok a nih. Ram dang khaw laia inthok khomin thalhlawn (missiles) hung kap sien, a tlung hmaa lo hmu hmana kap thlak theina hmun remchang a ni leiin sipai tienga hmun poimaw a nih. Saddam Hussein inlal laia America-in a run a, an Scud missiles-hai indo longa inthoka a kap thlak khan, an hmet puokna hmun tak chu Rocky Mountain sunga an ralthuomhai an kontrawlna hmun inthupa inthok daih niin an hril!
Erpawta inthoka kan suok kha, kan cham sunga hmang ding motor thra kan rizapna Hertz hai umna hmunah an bus-in a mi thruoi a. Thlirna tieng tieng, car insi khupin an bok khup el a, a hmang ding an um seng zozai amanih ti ding a ni laiin, chuong ang car hiring company lien tak tak chu erpawt se vela chun a dorzon-in an um. Kan huol lai khan a man kan pek lawk sa a ni leiin, kan car hmang ding khom chu inpei sa diemin a lo um a, a chabi an mi pek a, Denver khawpui tieng kan pan a. Jacob & Zingi Pudaite hai naunu Marilyn Pudaite (a pasal Jonathan Ray le an naunu Shiloh) le a sangnu Gloria Pudaite, (a pasal Matthew le an naupa Sinn) hai chun zingbu fa dingin Viernamese restaurant-ah an mi lo nghak a. Jakob-hai sungkuo hi Wheaton-a an um laiin James-in belbula a zu nei a ni bakah Mayur Vihar, Delhi tlangah pansak-panthlanga kum iemani zat khawsa tlang kan ni a, kan sungkuo laia kan zêl rop hlak an nih. Mani mi le sa, mani tronga inbiekpui thei mi lawmluttu Denver-a dam an lo um el hih, malsawmna ropui a va ni ngei! Bawinuhai, kan lawm takzet cheu!
Colorado Springs
Denver-a zingbu kan fak khop chun, kan inzinna san tak, Dr. Rochunga Pudaite hai sungkuo hmu dingin kan inthok suok a, darkar khat le minit sawmpanga vel lam a nih. An lampui a thra em leiin du tawka hrata khal châk a um khop el. Sienkhom, hieng lai chu motor khaltuhai hi an fimkhur khop el a, dan ang thlapa thaw naw chu lam sira enthlatu camera mit hmun tinah an sie leiin, dan bawsetu chu an inring hman hmain, an man nghal el a nih. Khanga mi’n chăntu le mantuhai khan dannaranin police thuom le motor an hmang ta naw leiin an hmel hmu naw lei ela ngampat chi a ni nawh.
Zing tienga inthoka mi lo tŭng tah a ni leiin Paula pa khom ni dang nekin bathroom a pan inzing lem kan ring a, sienkhom Vaihai ti danin, ‘a râm se-a fe a ngai. Bibles For the World ofis-ah intuok hmasa phot a, fang kuol a, chu zoah an ofis bul ela um, hmun hmingthang le mawia khawvel hrilfak, ‘Garden of the Gods’ chu thlir tlang a, chu zoah a inteknu Pi Lalrimawi le John Pudaite nuhmei Lawm le a nauhai hmu dinga an ina fe a, inhma tienga zanbu kil tlang a, Denver tieng dar 10 velah tlung a, ka naupa James ruol thra, Patrick ina riek chu kan prokram a nih.
BFW ofis inhoi tak el kan tlung chun John le a pa chu an la tlung hman naw a, minit nga hnungah an hung tlung ve nghal a. Hril ding kan hau taluo a, an ofis hmasak Wheaton-a kan titi sunzom dingin a karah kum 23 zet a lo tla hman ta a, lungril le thlarau chu sazuk tuoi ngal hrat le tha inza angin la’n per zak zak sien khom, taksa-in zŭr tieng a lo pan ta a, ni danga voi khat inchawma ei hlĕn hlak kha chokchawnâl kal rema suol a lo ngai tah si. Chuleiin, a trûl tongkhong chauh hrilpui dingin lungril ka siem a. Umran Retreat-ah lungril le thlarau le sum le paiin hung thrang sien khom, taksa ngeia a hung thrang thei naw leiin, October 23-25, 2013 Fienrielna kha a tawi kim thei ang taka ka hmu dan tlangpui le ama rawia kum 1978 Haflong HSA General Assembly trumtriek zoa Student Leaders-hai Fienrielna neipui a ni truma buotsaih, LUNGKHAM BANGNA ang kha LUNGKHAM BANGNA-2 buotsai chu a huoihottuhai thaw tum a ni thu le chu chu bawzui a ni pei thu ka hril bakah, a sunzomna ding, thla ruk sung ngeia buotsai nawk a thrat ka ring thu le, chu chu buotsai a ni hmaa a hrâm bilpui lo bitumtu ding, hieng tienga inhnikna nei le hrietna pai mi iemani zatin workshop nei a poimawzie thu ka hril bok a. A tawi zawngin, Fienrielna kha ring bakin a hlawtling a, a seng thlawn naw a, bawzui tlak a ni ang hrimin bawzui a ni pei a, ra thra a la hung insuo zui pei ding a nih.
BFW hin khawvel hmun hrang hrangah Baibul maktaduoi 22 neka tam a thon dar tah a. Kha hmaa an lo thaw dan anga America rama sut le thon suok kha sengso a tam talaw leiin, tlawmte senga tam tak thon suok ding chun India rama sut le thon darh thrain an hriet leiin, kha hmaa ofis lien tak el, an bazarpui laia mi kha zorin tuta an ofis hi an inchawk a nih. Hi khom hi an la hmang seng naw leiin a chenve deuthaw, kha hmaa Baibul thon suok ding an hnaw sipna hlak kha mi an inhluotir a, body-building trening (sasuksekna sikul) in an hmang.
Ofis-a inthokin a bul hnai ela um, GARDEN OF THE GODS kan fang a, ngaituona a suksei khop el. Phaivangpui chi khat, lu inlok bur elin hnuoi sungah in lien tak tak inlengna khop kuo suot a, hmun threnkhatah muol inzum tak tak, fei ang ela ngir fuk el an siem, New Zealand-a ka hmuhai le pûk threnkhat, entirnan Virginia le West Virginia inram rina Shenandowa phai ruoma um Luray Caverns-a fangfar far thlain ban inzum tak tak a siem, kha hma November 2006 kan fang thu New York Diary-7 a ka ziek dam a mi’n hriet suoktir a. Lungbuot ang deuh, ni si lo, pil sen, nisa em chang tah le tui hnuoia pil, kangtuihaw le tuia cheng kawr nei chi hrang hrang kawr le inchok pol a ni deu vong leiin, hieng lai hmun hi tuipui hnuoia lo um tah hlak, khawmuol insawi danglamin a hung mor suok a nizie chu indon tam ngai loin hriet thei nghal a nih. A huol veltu Rocky Mountains vel an insiem lai, kum maktaduoi iemani zat liem taa thil tlung a ni chieng khop el.
Hi huon dangdaina le makna, abikin Lungling (Balanced Rock) dam chu a thlalaka inthok chun thil um thei ei ring naw a, a hmunah Thoma Didum anga kut ngeia ei tawkin ei la ring thei nawa chu ei awi chauh a nih. Hi huon chanchin ringot khom hi artikul le lekhabu tam tak miin an ziek tah a ni leiin, a mak dan ang angin, hun remchang danga bitum dingin, la maksan hri phot ei tih. Hieng lai hmun hi tuk tina Pi Rimawi zing lengna le fienrielna hlak a nih. Mihriema pieng seng seng, ei zing lengna khawhnawm hi a va danglam thei ngai de aw! Vokpuiin kam cheka an mi zui hŭl hûlna khawvel leh chu a kâr a hla ngot el ti ro, maw!
Huon dangdai kan fang zo chun Dr. Rochunga Pudaite inah kan fe a, kan tlung chun khuo a lo inhnu ta rei el. Tuolah unaunu Rimawi, kum 1953-54 laia Pherzawl High School-a ka kaipui chun hlim sarin a mi lo tuok a. Damnaw deua hmu inring kha tleirawl deuin ka hmu a, lawm a um takzet. John Pudaite ruolnu Lawm Pudaite, kan tunu le a nauhai pahni bakah Jacob Pudaite naupa Solomon khom a lo um a. Riek hman ding kan ni si naw leiin hun serh tawite kan hmang a. Kha hmaa inthoka sir ka tum, a tawpah ka hlawtling tah hram thu le ka naupa James Lalropui, a tira an mi keitleipek ngei le a nuhmei Anneke hai pahni khomin kut lum ngeia chibaia lawmthu hrilna an hung nei thei hi Pathien lunginsietna zar chauh a nizie ka hril bakah lawmthu hril trongtraina le unaunu Rimawi ta ding bika dawvankaina ka nei bok a.
Denver tieng James ruolpa Patrick-in zanbu a lo buotsai chu hnota kir nawk el kan tuma chu Paula pa-in bu mi fakpui loa kan fe a remti tlat naw leiin nunau po inah maksanin, John leh a pa leh keini pathum chu Japanese restaurant-ah zanbu inhnik tak el kan kil tlang a.
Hril ding a tam a, hril chun a pung deu deu a, lung a’n tar deu deu bok. Hieng thil hi USA khawzawla kan hril tawpna tak a ni el tah thei ti dam hang ngaituo chun lung a’n thip vong vong a. Dar riet kan lo tlung phak el tah leiin, dit khop lo takin, rong nasa lem bawl tlang dinga inhmu nawk vak beiseiin, kan inchibai a, Denver panin kan kir a, lampui intluonin ngaituonain châng dang a kân thei nawh.
Colorado University: Boulders
Colorado-a ka’n zin san pahnina chu ka naupa James college kaina, University of Colorado, Boulders-a um va sir a nih. Hi hmuna kan naupa a kai sung hin thla tin a fee ringotah nuoi khat kan seng a, chuong lai chun a dawkana bei nawi tla ringot ringa kan nupaa khawsak a ngai. Sunnithlaka a khuo le University kan fang lai chun, Pathien lunginsietna zarin, kan tlan thlawn nawh ti ka hrietin, ka lungril a lawm a. Vur tla tum, thli dei mangkhengin ru le chang chen sun tlanga a mi nuoi lai khomin, lungrila hlimna le lungawina chun sungrila lumna a mi pek a, dei taluoa hmai ngoi vung vung khom olsam takin ka tuor muolsuo thei pha a nih. A ruol le pai mi iemani zat kan inhmupui bok a, an ngainatzie ka hmuin ka lawm a, ka lung a awi takzet a nih. Nauhai ta dinga nu le pa inpumpekna hi a tak ngeia tuoktuhaiin an hriet a, an beisei anga an nauhaiin hlawtlingna an dong leia an lawmna inthukzie khom anni tluka hre chieng an um nawh. Chu chun Pathien le mihriem inlaichinna hlimthla iemani chenah a tar lang niin ka hriet.
(Delhi, November 22, 2013)
No comments :
Post a Comment