We can make our lives sublime,
And, departing, leave behind us
Footprints on the sands of time.
- H.W. Longfellow
December 20, 2017, Pastor Thangngur thi champha voi- 74na le Sinlung Academy of Letters (SAL) piengcham voi-4na khan Delhi le Sielmatah ka lekhabu buotsai HMAR HLA SUINA (Hmar History, Culture & Literature) Sut Hnina, phek 408 a sa, Library Edition chu tlangzar a ni a. Hi lekhabu hi hla hmanga sir tina inthoka Hmar khawvel thlirna um sun a ni leiin, library changkang taka sie ding khoma inzapui um lo dinga international standard hawl phaka duong a nih. Eini rawi lekhabu insuo a tam lem hi ei inchawk thei tawk ding hisapa lekhapuon man tlawm chi, zing le zana tiem zoa dehawn el ding, chanchinbu sutnaa hmang hlak, tlawmtea inchawk thei dinga sorkarin sie (tax) an sukhnuoi, newsprint hmanga sut a ni tlangpui a. Hieng lei hin lekhabu changkang chu mihai nei thei ding chauh anga ngaina a um. Sura pelte lo syndrome mi khuopna hi sût a, mihai thaw thei le nei thei thil thra chu eini khomin ei nei ve thei ti a tak ngeia hriltu dinga tuta Hmar Hla Suina (Library Edition) hi sut a nih.
A kawm duongtu chu Tv. Blessing Buhril a nih. A ruongam ding awm ieng khom kan hril tlang naw a, thurawn khom ka pek bok nawh. Thla nga lai liem taa suok, ka thu ziek lawr khawm, ‘Ka Tukvera Inthokin’ ti kawm khah ama duong suok a ni leiin, iemani chuh mawl le inril takin a hung phu suok ka ring tlat a. Editing le proofreading infawma a Manuscript a tiem zo pha a kawm ding ruongam chu hung inlang el dingin a ring a.
A text ding kan sukfel hnung, sut dinga kan pek suok hmain, a hma tieng phek pakhata inchuon dingin, BC parukna laia Chinese mivar, Taoism hmu suoktu, dawnril Lao Tzu (c.605-531 BC) hla, Tao Te Ching No.21 Saptronga ‘Knowing the Collective Origin’ tia inlettuin a sie, a chang tawpna,
From ancient times to the present,
Its name ever remains,
Through the experience of the Collective Origin.
How do I know the way of the Collective Origin?
Through this (Translated by R.L. Wing)
chuh ka na rilah a hung inbu vang vang a. Chu chu kan hlu lut nghal a, press-a pek dinga lo rem fel dingin ka rawipa, printer le graphic designer Mani Rai kuomah ka thon phei a. A kawm ding ruok chu dizain a la ni naw leiin kan la thon thei hri nawh.
A kawm thu ei hril zom hmain ‘Collective Origin’ ti-a an inlet hi ieng tina am ni tang a ta? Chinese hawropa a lim an ziek dan chun thil hung tro suokna bul, trobul, hringna hung mor suoktu (life force) ti ang deuh, Pathienin atira hnuoi le van a’n umtir zut zut lai kha kawka hril fie thei a nih. Hi lekhabu le inzoma ei hmang nuom dan ruok chu Collective Memory ang deua ei hung thlang tlak pei dan chanchin, ei sulhnung ei suinaa ei thil hriethai intling khawm, pi le pu-a inthoka an lo inhlan sawng pei, lekhabu pakhata ei hlu lut a nizie tieng kawk zawngin ei hmang a nih. ‘Thu Tlingkhawm’ amanih, bu fŭn ang deua thu fŭn ei thretna lekhabu a nih.
Hniekhnung sui hi thil olsam a ni nawh. Hnam bing hniekhnung sui lem chu sa hniek chier dup laia sa pakhat chauh hniek sui bing tum ang a ni leiin, thil hautak tawp a nih. A ruola an tlat khawm lai lem chu hniek a’n mat vong leiin hang sui bing ngaina a um nawh. A hnunga mani tlatna muol senga an peng darh pha sui nawk theiin a um a, an infin khawm nawk pha leh sui hran thei a ni tah ngai nawh. Hnam hrang hranga hung insiem pei mihriemhai chanchin sui khom chuong ang tho chu a nih. Kawlphai (Kabaw Valley) a Zo hnathlakhai le hnam hrang hrang ei hung infin khawm lai dam kha histawri hlama inkhi chun hnai te ni sien khom, chieng faka tu hnam bing khom sui nal nal thei ei um naw khom a ni el thei. Bungpui thusim khom hi tu chen hin ei la’n trawm tlang vong thei niin a’n lang bok. Chin Hills ei lut hnunga tlang hrang hrang hluoa ei hung indar hnungin hnam hrang hrang hmingin ei hung inko hrang tah leiin, iemani chenah ei chanchinhai khom sui hrang theiin a hung um tah niin a’n lang. Hnam tum tuma insâlhai hi ei trobul ei hang sui chun, suon thum vel hnunga chuh ei inmat nawk thrup el a nih. Kong khata hril chun, chu chu ei ‘Collective Origin’ a nih.
Hmar Hla Suina kawma lim chuong hi ‘kepha lim’ (footprint) a nih. Chu chu ka tunu suong Thangi Ruolngul chun Denmark-a inthokin lekhabu kan tlangzar zan WhatsApp-ah, “Ke lim hi chuh a fe nawh ie, khawvela thil tirdakum tawp symbol a ni si a” tiin a hung thluoi a. Chu chun kum sawmnga panga liem taa Oliver Goldsmith tienami ziek ka tiem chu a min hriet suoktir a. Lemziektu pakhat hin a lemziek mawi tak el chu tuolah a tar a, a nuom nuomin an ngaidan anga siem thrat a phal thu a ziek a. Chawhma tienga entuhai chun mawi an tizie le ngaisangzie an hril sap sap a. Chawhnung tienga entuhai chun, hieng lai hi, khang lai kha hieng ding hi a ni lem tiin an hung thai tawl a, ni tlak tawm chun an thai triel nasat leiin ieng lim am a nih ti hriet thei a ni ta nawh. A zirtir: Mi ngaidan ei lak vong chun ieng khom puocha thei a ni nawh. Kepha lim khom a tirdakum zawnga lak chun Bethlehem bawng in tluka porchea ngai thei, hnâr hupa kristmas hmang tluon suok thei a nih. Nunghak hmel thra tak khom a êk pai leh ei suongtuo kop tlat chun, a hnaia inthrung inhawkna khom a hnot bo dai thei. Thil fâk châk leiin chil a pût a, tensiet leiin chilin a mi riel thei. Vok thau beng pŭk pûk châka chil pût an um laiin an hmu chara luok suoka inuok an um. Shakespeare-in Hamlet-a, “Iengkhom hi a thra a sie a um nawh, thlir dana innghat a nih” a lo ti khan a hawl kim tak a nih.
Ziektu ropui Dante Alighieri (1265-1321), khawthlang khawvelin lekhabu hlu le ropuia an ngai Divine Comedy (Divina Commedia) phuoktu le a lekhabu phĕna Italian trong sertu chun “The whole universe is but the footprint of the Divine goodness” (Vanvêl po po hi Khuonu thratna hnuhma vong a nih” a lo ti ang elin, Hmar Hla Suina kawma kepha hmawr huol vela rimawi lim (musical signs) chuong hin hla sirsana hmanga Hmar hnathlakhai hnuhma suina lekhabu a nizie hriltu a nih. Kephaa ngotekher/Hmar-âm zie chuong hi hnam aiawtua hmang a nih. A tawi zawnga hril chun, kepha lim chuong hi Hmarhai hniekhnung suina a nizie hriltu symbol a nih. A bu hming le kepha lim po hi tle senga inlang dinga UV Printing Technology hmanga sut a nih.
Hniekhnung poimawzie hi hrilin a siek a nawh. Kawlrama kan um laia thilpek an ngaihlut bek bek laia pakhat chu, thing phek amanih hnâng, inphân taka met le mawi taka ta, thing hnai (lacquer) thra chi-a tle senga an chŭl nam chunga rangkachak tuia Buddha kepha lem inziek, dawkana inthrut thei le banga tar theia an siem chu a nih. Asia ramah Buddha hniekhnunga ngai 3000 neka tam a um a, chuong laia 1000 neka tam chu Sri Lanka-ah a ni a, a lien tak chu Adam’s Peak (Sri Pada) a lungpui chunga hniek hi a nih. Hinduhai chun an pathien Shiva hniek niin an hril a; British-haiin a ram an hung op hnung chun ‘Adam hniek’ an ti ve thung a , an tlang khom Adam’s Peak an hung ti tah pei a nih. Thailand, Myanmar, Laos, Cambodia, Japan le China rama hai Buddha hniekhnunga ngai a tam a, Japan ram ringota khom 300 chuong a um. China Rengpui, Tang Dynasty laia Kumpinu (Empress) Wu Zetian lem khan chuh kum 701 A.D laia Chengzhou-a Buddha hniek an hmu suok khan, an inlalna kum tiem tranin Dazu (Big Foot) Era (Hniek Lien inlal hun) tiin hming thar a ser hiel a nih.
Muslim-hai inza le ngaisang pakhat chu an hmun thienghlim Kaaba lutna kotsuo ăna lungpuia hniek um, Abraham Hniekhnung (Abraham’s Footprint) chu a nih. Abraham naulutir, Hagar le an naupa Ismail hai nufa hnot suoka an um thu le thlalera an vakvai thu, dangchara Ismail a thi el ding laia Hagarin tuikul a hmu thu le tui chu a naupa a’n dawntir thu chu Genesis 21: 8-21 ah ei hmu a. Muslimhai chun khang po po kha an hmun thienghlim Mecca (Maka) a thil tlung vong niin an hril thung a. Kha tuikhur kha Zamzam tuikhur an ti a, Abraham hniekhnung a umna lungpui bula inthoka hung inchik suok a nih. Hi tui hi hnuoi rilah luong peiin, Jerusalem Tempul Muola tempul thruta an hmang lungpui lien take la tuikhur hi a zuk fin niin an hril a. Hi hmun, Solomon Tempul ngirnaa hin Muslim tempul Al Aqsa Mosque, Muslimhaiin hmun thienghlim taka an ngai pathumna, an zawlnei Mohamed khom vana a kaina hmuna an hril hi, an bawl a nih. Zamzam tui hi Abraham hniek umna bula hung luong suoka an ngai leiin tui thienghlim takah an ngai a, India rama inthoka hung hai chun hawn tung ngei ngei an nuom a. Chuleiin, Jeddah-a kan um lai khan Mecca-a fe ruol thrahai kan incha hlak a, tui bel (jerrycan) iemani zat sip hi kan kol zing a, khuolzin le biekzina hung haiin an lawm thei hle.
Hniekhnung poimawna le hlutna hi nuom ela hang ziek seng ding a ni nawh. Pathienin Joshua kuoma, “ ke-a in sirna taphot chu pe vong ka ti cheu” (1:3) a ti ang khan, eini rawi khom Tuiruong ting an hung tum laia awm dora ei lo dadal ngamna san tak chu ei mihrang, dawithiem hmingthang Lalruong hai, Hrangsaipui hai le mihrang pasalthra tam tak sulhnung a chier dupna hmun le ram, Hmar hnathlak tam lem Sinlung-2 a ni lei a nih. Chuong po po aiawa ngir symbol chu Hmar Hla Suina kawma kepha lim le a lekhabu sunga hniekhnung an maksan po po hi a nih.
(December 28, 2017; Delhi)
###
No comments :
Post a Comment