DAWNTLANG
(Thangngur Memorial Lecture-cum- Book Release)
A hmun: RWUS Conference Hall (Behind ICI Secretariat)
A hun: December 20, 2017 (1100 hrs)
Prokram vongtu: David Buhril
Hongna trongtrai: Rev. Vanlalhlun Tryte
Lekhabu tlangzarna: Dr. Lallukhum Fimate
Lekhabu tlangzar ding: Hmar Hla Suina by L.Keivom
Zailakhai (Resource Persons):
Dawntlang Hun I
Dr. Lal Dena (Lekhabu tlang thlirna)
REFRESHMENT
Dawntlang Hun-II
Pu Thangsawihmang (Hla lenglawng, Sai hla le Keilet hla)
Dawntlang Hun-III
Dr. Lalkhawlien Pulamte (Tuoltro Kohran hla)
REFRESHMENT
Hriet ding poimaw:
- Inhnikna nei phot thrang dinga fiel ei nih.
-Lekhabu tlangzar hi zor suok ni nghal a tih.
Buotsaitu:
SINLUNG ACADEMY OF LETTERS (SAL)
Hi lekhabu hi Hmarhai chanchin tlangpui le an thu le hla nei dan thlir theina Hmar tronga lekhabu um sun laia pakhat, kum sawmli deuthaw hnunga library edition standat-a sum tam tak senga sut, phek 408-a sa, in tina bu khat bek nei ngei chi a nih. Mimal, sungkuo, khawtlang le hnam inzaum le nghet ni ding chun mani trobul le ninaa chieng le ram le hnam ro le thil hlut hai chawisang le kengkaw nachang hretu ni a poimaw. Bel chieng dawl lo thu le hla sirsana hmanga inhril vawng tumtu chu a tawpah a muolpho tei hlak. Mihriem, sungkuo, chi-hnam le hnama ei hung indin suok dan iengkhom hril thei mumal nei si loa Edena inthoka Thupuong chen thuok la hman lo lĕk loa ei inpawtpui thei hi lawm a um hle laiin, ei inbi chieng ruok chun ei kawrongzie le kawk bozie hriltu a ni daih thei. Mani inhriet chieng tluka hrietna tlo le inthuk, Pathien lawm tlak a um nawh.
Bel chieng dawl lo thu ei inchuktir laia pakhat chauh entirna dingin hang hril inla. Chu chu zawlbuk nei anga ei inhril vet hi a nih. Zohnathlak lai, Chin-Kuki-Lusei-Mizo-Zo intihai hin zawlbuk nei hlak chu Luseihai le Mizorama Fanai (Pawi) hai inlalna khaw 13-a chauh an nih. Zawlbuk hi Luseihai Mizorama an hung lut hnunga Pawihai runna laka invengna dinga Sailo lal pariet Selesi-ah insung khawma inthoka an tran chauh a nih. MIL-a naupang inchuk ding chenin ei hlu lut a, Saizahawl chanchin le inzomin kan khuo Pherzawla chen zawlbuk an mi’n neitir chu tie! Gospel deua ei pieng le murna suitu threnkhat lem chun Middle East-a inthokin China an mi banpui! Hi chungthua khawvel hmaa mong ei hlim nasatzie August-a ka ziek ‘Trong Thlithlaina (Linguistic Survey-2’ chu Hmasawnna Thar khomin an pangzat hle amani ding, tu chen hin an la’n suo ngam nawh! DT le Virthli-a ruok chu a suok nghal. A tiem nuom chun Keivom Diary-ah hmu thei a nih.
Ei hril uor nuom tak chu mani hnam chanchin le nina hriet chieng poimawzie a nih. Chuong ang hrietna phuhruk thei Hmar tronga lekhabu ei nei sun laia mi chuh HMAR HLA SUINA hi niin ka hriet leiin, mani tawtawrawt mut anga mi ngai an um a ni khomin en khumin, hieng thu hi ka hung ziek a nih. Kha hma khan Sut Khatnaa Thuhma chu DT-ah insuo a ni tah a, tu hin Sut Hnina Thuhma chu a hnuoia hin ka hung sie. (December 9, 2017 Saturday)
SUT HNINA THUHMA (Preface of Second Edition)
Hi lekhabu hi ka ziek trana inthoka tiem chun kum 45 chuong zet a lo ni tah. Ka ziek zoin India palai sin thawin ram puo tieng a zawnin kum 21 ka khawsa a. India rama ka hung kir nawk hma le hnung, kum 2000 chen khan Zoram Khawvel 1-8 le lekhabu hrang hrang zieka ka buoi leiin Hmar Hla Suina hi phuisui lem le lien lema insuo nawk dingin ka buoipui hman naw a. Sut hmasak kha tiem harsa khopin a khawl ha a’n ruol naw bakah a hawrop a chin a, sut suol le siem thrat ngai a tam a. Chun, Manipur simthlanga Gospel hung lutna champha zabili 2010 chena hla phuoktuhai le an hla phuokhai bakah Hmar thu le hlain hma a sawn dan tlangpui thlirna inthrang satir trul makmawin ka hriet a. Chuonga thaw ding chun a bu a să taluo ding a ni leiin, bu hni-a insuo law law thra lem dingin ka ring a, chuong ding chun lungril ka siem thar a.
Bu hninaa ding hmangruo khon khawm ding chun kum 40 sunga (1970-2010) thu le hla hmasawn dan suina lekhabu hang rawn ding a um si naw leiin, a hrana kumpui lingleta beipui thlak a ngai ding a nih ti ka hmu suok a. Chawla ka suok changa hla phuoktu threnkhat intarviu ka lo thawna video-hai hlak ‘techonology’ inthlak hrat taluo leiin film 50 chuong zet hmang thei ta loin a um bok si a. Kum 2002-a ka hung penson hlak chun thaw ding hmasa taka ka sie Baibul inlet sinah ka pu nghal leiin kum 2007-a Baibul (Delhi Version) tlangzar chenin sun-zan zomin ka buoi char char a. 2008 khan Hmar Hla Suina hi buoipui tran dinga ka ti leiin thu le hla le research thawnaa ka’n thloppui hlak le ka kaiza vengtu, mi fel Ringum Khobungin computer-ah a mi hung thunpek a. A chungah ka lawm takzet.
En phuora sut nawk el thei ding ka sawn khah a lo ni awzawng da’l! Baibul inlet zo, trong ziek thua ka mit a hung kêu met hun, ka fǐr tran hnung a ni leiin, kum sawmli liem taa Hmar trong ka ziek dan inphuoizie ka hmu suok a. A ngaia sut nawk ngam chi a ni si naw leiin, hun remchanga a ruongam thlak si loa tuoi nam dingin ka sie nawk phot a. Lekhabu pathum buoipui lai ka nei bakah chik taka Baibul ennon le a trulna photah thlak ngaihai chu, Pathien ti chauh naw tu mitmei khom vêng ta loa fimkhur taka thlak hmak hmak ta dinga hma la kan ni leiin kum sari neka tam, kum 2015-a Revised Edition kan sut chenin ka buoi nawk a. Kum 2017-a ka piengcham nia suok ding lekhabu ka buotsai, ‘Ka Tukvera Inthokin’ ti kan tlangzar zoin hi lekhabu hi sun-zan zomin ka buopui nghal a. Thla ruk sung beka zo hrâm ka tum kha Pathien lunginsietna zâr chauhin thla thum sungin ka zo hman a, mak ka ti khop el!
Hmar Hla Suinaa thu le hla ei suidon dan kalhmang hi a phuoktu chanchina inthoka a thu le hla thlirna ni loin, a thu le hlaa inthoka a phuoktu ngirhmun thlirna a ni tlangpui a, chu chu hnam var le changkang lemhai literechar khawvel thlir dan le bŭk dan a ni hrim a nih. Sakhuo tienga ‘lempieng’ ei hung tam ruolin, hla thar hung suok tam taka ei thu vuokthlak le a phuoktu nun inpersan tak tak ni awm le thuring bulpui le inpelhel hmu ding a um nuol a. Chun, hla hi ei chengna khawvel le a boruok inlarna darthlalang a ni leiin natna hla, iniel ngawi ngawia phuok, sienkhom inhme lo taka intawm hlut hluta ei sak le lămpui si a tam a. Takram tlansan a, thlarau ramah inlêng lût a, ram thar awia tui hlim cheng nuom pawl sak chi, inbikrukna hla, silai kalchar trongkama phuok, tienami le jĕl kop, a’n ri rĕt rĕt hla tam tak, hla ti dinga ni mang si lo, thu ti dinga hla ni bok si, ho deua inlang, sienkhom ‘rau’ vieu angreng si, a tam bok a. Hla threnkhat chu huou huou boruok chim hlutin a hnaw dok, voihni khat bâk sak hlaw lo a um bok a. A nambar zawnga tiema hla phuok rawn, a buk rik zawnga tiema chĕpa tak si, a tam.
Hun le nun inthlak peiin kum tam a chie hnung khoma rangkachak anga ngharĕk thei lo thu le hla ruok chu thutak le inzom a ni tĕi hlak. Thrang iemani zât bek inchie hman lo thu le hla bŭk le inkhi hih thil harsa tak el, Vawrsĕlapa anga inkhikhawk, mi theida hlaw theina a nih. Chu chun thu le hla khon khawm hautakzie a hril băkah buk le inkhi fuk ding chun a phuoktu ngei inpawlpui a, a phuokna ngirhmun le san hriet fie a poimawzie a tar lang. Chu ding chun tulai hnai ela research nasa taka thawa lekhabu pathum zet (Kawlva angin inleng thiem lang-Kappu hla le a chanchin; Hranghluihai Sulhnungah; le Kona Rawl Mawi- Rev. Zosanglien le a hlahai) buotsaia suttu Lallungawi hai anga inpe zo, mi tlawmngai, thu le hlaa hnam santu ringum le pasalthra iemani zat bek ei nei a ngai. Chu chu Bu Hnina ka hril hi a tak ngeia a hmêl ei hmu thei dan ding um sun a nih.
Bu Hnina dinga sui tham chu Sai Hla le Hla Lenglawng a ni ka ring. Kum sawmli sungin a let tamin Sai Hla thra tak tak a pieng a, chuong laia 200 vel chu LENRUOL HLA BU (2005) ah hlu lut a ni a, chuong zat vel bok chuh hi thu ka ziek huna hin hlu lut lo a la ni ka ring. Chu nek daia tam chu Kristien hla thar a pieng tah niin ka sût bok. Chun, thu ziek tieng, abikin tienami, drama, thusep, artikul, chanchin bu le literechar kau hrang hranga Hmarhai kalchawi dan suina lekha pakhat khom hmu ding a la um naw leiin, chuong tieng thlŭrna thu chuh Bu Hnina ei hrila hin a thrang sa ngei beisei inla. Entirnan, hi hun sunga hin Hmar trongin Bible Version panga zet a suok hman a, chuong tienga Zohnathlakhai laia nei rawn tak a nih. Takramah ieng kongro am a suk ti ruok chu bi chieng ngai a tih. Literechar phahlaa chuh a se êk tam zawng nekin lunghlu anga a hlutna lema bŭk a ni hlak. Chun, College chena vernacular sabzeka Hmar MIL lak phalna pek a ni-a inthoka thu le hlain hma a sawn pha dan sui sa thra bok a tih. Hi kum 40 sunga thu le hlaa Hmarhai hmasawn dan bung le châng, a tak bitna le kawrongna suina lekhabu hi ngainuomum tak a ni ka ring a, tuta trum hin la buotsai hman naw inla khom, a la hung suok ngei ka beisei.
Sut hnina hi a bu hmasa ruongam chara insuo dinga ti a ni-a chuh, bung hrang hranga thu poimaw bik suibingna le belsana artikul, thusep le tienami ka lo ziekhai laia thlang khawm pakuo chu Appendix-a sie a nih. Phek hrang hranga mongpha (footnote) ka siehai le lekhabu rawn (bibliography) iemani zat hi sut hmasaka thrang lo, sut hnina buotsai a ni laia suok tah, lekhabu poimaw le ka thu ziek le inzoma ka hriet leia ka belsa an nih.
Kum khat nêka sawt tah hi khumbeta zâl ka nuhmei enkol le dona, Lalruotmawi hla sak ngaithlakpuia sun-zan zoma hun hmang ka ni ta a. Chu sung chun hringnun dawnkhawlna hun remchang ka hau leiin hamthra ka’n ti hle a. Ka nuna thil tlung hrang hrang, a hun laia ienga ka lo ngaisak rak lo tam tak chu Pathien remruot vong a lo nizie dam ka hmu suok pha a. Insung tungdingna dinga nu poimawzie dam, hming thratna chang phak loa a hmingsietna maw an lo phur trăng trâng hlakzie dam, chuong sa khom chun insung ta dinga thi huoma thrahnem an lo ngaizie le thisen far kang rawt khopa an lo inpek zozie dam ka hmu fie zuolin ka hriet a. Chuleiin, Pathien zâra kan insung tungdingtu ka nuhmei Dari Keivom chawimawinain hi lekhabu hi ka’n hlăn a; kan nauhai laia a tlum tak, kan nu hming phuok, kan sungkuoa rohluotu bul, James Lalropui Keivom-in New York-a inthokin hi lekhabu sut man hi a hung tum a nih.
(October 27, 2017; Delhi)
###
No comments :
Post a Comment