- René Char
Kum 2002-a ka penson chara Baibul inleta inbûr ngat ngat dinga hma ka lak hmain sukfel hmasak makmawa ka ngai thil iemani zat a um a. Saptronga Baibul an lo inlet tah 250 chuong hiel laia besan tlaka ngai dorzon khat vel thlang suok phot a, chuonghai laia pathum vel chu hmang tak dinga sawr bing nawk a, buoina a um phaa innghatna bika hmang ding pakhat nei a nih. Baibul bika mi tam takin a pikhawia an ngai, an trongkam hmang khom ni tin trong tuolleng le inpersan dai tah King James Version (KJV) le a tehruoi hai, a laihawl le khawvelin standat Saptrong an hmang le inzawla inlet New International Version (NIV) le a tehruoi hai, tulai trongkam hmanga hrilfiena le infawma inlet Goodnews Bible (Today’s English Version-TEV) le a tehruoihai chu ka khon khawm bakah commentary thra bika ngai softwares-hai chu sum tam tak sengin ka lam khawm a.
Chun, Parallel Study Bible, zuk phêta version riet hmu nghal theina dam le Hebrai le Grik tronga mi thu khirh hrilfiena diksawnari dam ka’n chawk bok a. Kum iemani chena inthok lem khan chuh internet-a inthokin hmangruo mamaw a key zuk hmeta hmu thei nghalin a hung um ta pei a. Kha hmaa thla tam khoma zong suok harsa hlak khah minit khat sunga computer-a inthoka dap suok thei a hung ni tah. Kutte châng khat tiet chauha lien pendrive-ah pindan lien tak khomin a keng lo ding library sie thei a ni chauh khom ni loin, mobile phone-a chen khom hlu lut thei a hung ni tah pei a. Chu chun Baibul inlet sin khom nasa takin a sawk zang pha. Baibul inlet sin ka trana inthoka tu chena translation tienga hmang trangkai thei hmangruo hang pung hratzie hi hrilin a siek nawh. Chuonghai chu hmang trangkai thei dinga ni tina inchuk sap le thrang lak a ngai.
Amiruokchu, ieng anga teknawlawzi hmasawn le changkang khom hmang thiem inla, thu ei inlet ding trong (source language-SL) le ei inletna trong (target language-TL) thiem ve ve naw chun thaw thei a ni nawh. Thu inlet ding chun ei inlet ding thu mal tin kha ei inletna trongin a tlukpui nei a ngai. Trong zierang inang chi chu a ngiel a ngana inlet thei a ni laiin, trong zierang inpersan daih chu a thei der nawh. Chun, trong zierang inang khom arenga inpawthuo thlapa inlet chu thil thei a ni nawh. Trong inlet hrim hrim chu a thra lem an naw leh a thra naw lemin a suok ngei ngei. Saptrong hi grammar trong chun polysyllabic language an ti a, eini trong, Mongolian chi-hnam trong hrim hrim chu monosyllabic language an tih. Polysyllabic trong chu thu mal ri hrang hrang bel khawma umzie nei thu mal insiem, entirnan, education, exercise, agriculture. Monosyllabic tronga ruok chu ri mal tinin umzie a nei, entirnan lekha inchukna, insawizoina, loneina.
Chuleiin, Baibul inlet sin tran hmain, thu mal poimaw zuol, thu chabi ieng ieng am ei nei le nei naw le a kawk lo ding kawkin trongkam ieng zat am ei lo hmang a, chu chun ieng chen am hnam nunah kakhawk a nei ti hriet a ngai. A tlukpui ei nei chun hmang a, ei nei naw ruok chun a thar ser a ngai bok. Trongkam amanih thu mal iemani zat ei lo hmang suol le thlak lo thei loa kan ngaihai laia pahni chauh chauh hang tar lang inla:
Worship (Chawibiek):
Baibul inlet ding chun hi trongkam hi a chabi poimaw a ni leiin ‘chibai buk’ ti-a ei inlet el dam hi a fûk chie am ti dilsut a ngai. Ei pi le puhai kha ramhuoi kuoma an inthawi pha leh ‘Hei, chibai’ tiin an lo ko hlak. Hi trongkam ‘chibai’ ti hih khaw laia inthoka ei lo lak am ning a ta? Kan naupang lai chun ‘Hello’ ti hi kan la hmang phak ve naw leiin, kan inhmu changa kan inchibaina/inhmuokna trongkam chu “Bu i fâk ta?” ti a nih. Thil chinchang ka hung hriet hnung chun Chinese hai khom ‘hello’ khawvelin a chim phak hmaa an lo in-halawna trongkam a lo ni chu tie! Naupang laia kan lo inhmuokna trongkam kha China rama ei khawsak laia inthoka ei lo hmang tah hlak, ei som pei a lo ni hmel khop el.
Ka ruolpa Lal Thanzau Pudaite, kum 2008-a muol lo liem tah kha Chinese trong ‘Mandarin’ inchuka Hongkonga hang um le a penson hnunga Taiwan khawpui Taipe-a India palaia hang um, an trobul thusim le thukhawchang khom ngaiven mi tak le hre tak el a ni a. Kan titi trum khat chuh Mandarin le Zohnathlakhai trong inzomna le inlaichinna kan suinaah, thiempuhaiin an inthawi changa ‘Hei, chibai!’ ti-a an insama an trongkam hmang hi kristien ei hung ni hnunga Pathien biekna thu hrilna trongkama hmangin ‘Pathien chibai buk’ ti hih ei hung hmang pei a ni theizie ka jêldin thu ka hril a. Ama chun, “Ni thei e. Mandarina hin thu mal ‘lîbăi’ ti a um a, chu chu thlarau bieknaa chauh an hmang hlak. An ‘libai’ chu ‘chibai’ ti-a lamin ei som pei khom ni rawi naw nim” a ta.
Kum 2002-a Baibul inlet kan tran khan Chanchinthra Johan-ah tranin a aitecheuna dingin a bu mal kan sut nghal a. Bung khatna ringota khom inlet hmasaka mi nor chim a hau khop el a. A thra ti pawl le a soisel pawlin ei khawvel a hung inthre a. An soisel tak chu ‘thu chu taksain a hung inchang a’ ti dam, ‘iengkim ama hmanga siem a nih’ ti dam, bung 4:20-24 inkara ‘chibai bûk’ ti po po ‘chawibiek’ ti-a kan thlak kha a nih. ‘Chawibiek’ chu Pathien chawimawia biek, Saptronga ‘worship’ an ti hih a nih. Hi trongkam hi soiseltuhai laia a pukhawi, fam tah Rev. Darsanglien Ruolngul chun ramhuoi biekna trongkam niin a ngai a, keinin ‘chibai buk’ ti hih China rama inthoka ramhuoi biekna tronga an lo hmang tah a ni lemzie kan hril thung a. Van court-in ieng tin am a ngai ve thung ding maw! ‘Worship’ ti hih Zohnathlak hnam hrang hrang trongah an nei le nei naw kan dap a, a nei tu khom kan hriet naw leiin thu mal thar ‘chawibiek’ hi kan ser a nih. Delhi tlanga chuh ‘chawibiek’ thrang loin sera mu kan thŭr ta nawh.
Thilsuol thaw Vs Thil thawsuol
Kristienna le inzoma thu mal poimaw tawpkhawk pakhat chu ‘thilsuol thaw’ a nih. Thilsuol thaw umzie chu bawsiet lo dinga thupek um, dăn ti-a hriet le ko ni bok, poisa loa bawsiet a nih. Dan thupek inza lo le zawm loa bawsiet hi Baibul chun suol thaw (committing sin) a ti chu a nih. Threnkhat chun tirko Paula thukhawchang, “mi po poin thilsuol an thaw a, Pathien ropuina an chang thei ta si nawh” (Rom 3:23) ti-aa ‘chang thei ta nawh’ ti hi changchawiin, ‘suol’ hrilfienain ‘tum threlh’ (missing the mark- Grik hamartia) an hmang a. Chu chu ni ding ang ni zo phak lo ngirhmun hrilna niin an kei fân pei a. Kei chun hi hrilfiena hin a kâp threl duoi niin ka ngai. ‘Suol’ umzie hrilfiena ni loin Dan thupek bawsietna, suol ra suok a ni lem. Pathienin bawsiet lo dinga Adam le Evi kuoma thu a pek chu hre zinga an bawsiet leiin, Pathien ngaia hel le ‘thilsuol thaw’ an lo ni ta a, Pathien le an inzomna an baw tan leiin an ngirhmun an chăn a nih. Edena bawsietna hi ‘suol bul’ ti-a ei hril hlak, Pathien le mihriem sukthretu a nih. Mihriemin a sim dam thei a ni naw leiin Ama Pathien ngei chu, Naupa hming le nina chawia mihriema hung pieng le mi tin ta dinga inremna sin thawa a hringna inhlan a, thilthawtheinaa kei tho a ni hnunga van tienga kir nawk a ni thu ei inzirtir.
Thil poi deu el chuh, Gospel Centenary ei hmang liem duoi tah hnung le theulawzi tienga dikri insang tak tak nei le hming bula ‘Dr’ ziek theia pui ei kat nuk tah hnung khoma ‘thilsuol thaw’ le ‘thil thawsuol’ ei la hriet hrang thei naw hi a nih. Tukhnungkhur le tukkhurhnung, kemit le kheimit, phing le von, bak le fak, bakkil le samkil, palang le saidawium, tengtere le simkerlek anga thil thuhmun, hril dan inang naw mei mei amanih ei sawn. A ni nawh. Sim le hmar anga danglam an nih. ‘Thil suol thaw’ chu dan bawsiet, Saptronga ‘committing sin’ an ti hih a na; ‘thil thawsuol’ ruok chu hriet lo lei le chang suol leia thaw, committing a mistake or blunder tina a nih. Evi le Adam khan an thawsuol nawh, hre kara dan bawsie a, thil suol an thaw a nih.
Hi thil, Pathien thu zai inthlungna trongkam ‘thil suol thaw’ ti hih Baibul lo inlet hmasatuhai le a hnung peia mawphurna latu dinga ruot Hmar Bible Translation Committee hai buotsai Bible Society of India (BSI) sut Hmar Bible-a chun “thil thawsuol” tiin an sie vong a, “suol” thaw (committing sin) ti hih an sukbo der ni sien a hoi. Amiruokchu, hieng thil invoi hi mi ei vang lei am a ni ding, an naw leh vok hmaa tuikeplung pei ang chauh ni-a an hriet lei, kei le Zaneisang hin mi mit sir ngei sun phier khom poisa lo ang elin, kan khukpui hlut hlak a. Pathien poi le hnam poi hi hriet lo leia tawk thei a ni a, chu chu ei Baibul hmang lai le thu le hla ei phusuoka hai hmu ding a tam em em a, chu chu keini pahni hin kan invoi bik lei khom a ni el thei. A ru inlanga hril chun, ei Baibul hmang lai hi besana theological discussion nei mumal thei a ni nawh ti hmu chiengtuhai laia mi kan nih. Entirna thra tak pakhat chu ei thu buon lai hi a nih.
Hmasawnna Thar, January 31, 2018 suok ka tiem chun ei trongkam buon lai hin ei secular literature chen khom a lo kang kai nasatzie ka hmu suok a. Chu thil leia hi thu hi ka hung ziek pha hiel a nih. Hollywood film industry-a producer hmingthang pakhat Harvey Weinstein, film khawvela hmingthangna hnota tlan khawm nuhmei tam tak thrangpui tiema zalpui dinga lo zawr le soisak ching hlaktu le hekna rik tak tak hmasuontu chungthua actress hmingthang Sharon Stone an intarviuna, Saptrong chanchinbua inthoka an inleta chun hieng hin an ziek a:
Los Angeles: “Basic Instinct” film leia inlar Sharon Stone chun Hollywood producer nuhmei tamtak suollui le mawinaw tak tak an nuom naw saa thawluitua intum, sex addict treatment thaw mek Harvey Weinstein chu Jail intang ngei sien a nuom thu a hril.
Amiruokchu, pasal nuhmei chunga nunrawng le nuhmei sawisak ching hrim hrim hai po po Jail intang vawng hai sien a tina ruok chu a ni naw niin a hril a. An suksuol dan izirin an phu tawk hremna chu an hmu ding a nih tiin a hril.
“Thil suksuolna le suolna thilhaia reng reng chu, suol dan chi le ki an ang nawh. Thil chite suksuolna (misdemeanours) le thil lientak suksuolna (felony) an ang naw ang bawkin a hremna khawm an ang naw ding a nih. Miin thil suol chite a suksuol chun suol lientak suksuol angin hrem thei an nawh. Rukru chu tuolthata intum thei an nawh” tiin hremna ding chu an thil suksuol izira pek ding an nizie a hril.
Sharon Stone hin Harvey Wenstein chu nuhmei pakhat chau chungah khawm nih lo, tamtak chunga kum tamtak lo suksuol tah a nih leiin tulaia mi ṭhenkhat nuhmei pakhatin a suollui tia intumhai le chu, a hremna ding an ang naw ding niin a hril bawk.
Sharon Stone a comment ang hin Matt Damon khawmin tulaia nuhmeihai hmalakna pakhat Me Too campaign-ah a comment a. “Nuhmei suollui le a mawngtama ṭhâm or ben chu an suol dan an ang nawh” tiin. Chuleiin, sexual abuse khawm a ki le chi an ang naw leiin, suksuoltu thil suksuol danah khawm hremna ding chu an ang naw ding a nih” tiin a hril....
Hi intarviu-a Sharon Stone hril tak chu mi tu khom a suolna phua hremna pek a poimawzie thu, poi tawk nĕp (misdemeanour) hremna le poi tawk nasa (felony) hremna rik dan chu suol an thaw nasat dan dungzuia rel ding a ni thu a nih. Harvey Weinstein chun nuhmei tam tak siem ropui le sukhmingthang tiemin a zalpui a, a thren an nuom le nuom naw thu dawn loin a suollui a. Dema an dodal hlak chun an career a se el ding a ni leiin tam takin lung na takin an lo topui a. Tu lai hin hieng thil hi hai lang ngam dinga nuhmei ruol an huongtau hun a ni leiin, kha hmaa an lo ip trawt trawt kha an hung phor lang ngam el bakah threnkhat lem chun sum siemna takin an hmang tum tah niin a’n lang a. Chuleiin, muolpho le hming siet inlau mi hmingthang le neinung threnkhat chun hniekhnung thupna ding le bau hupna dingin sum an seng rawn hle niin an hril.
Chu phêna eini buoipui ruok chu an thu le hla hrilnaa trongkam Hmasawnna Tharin a hmang inrim ‘suksuol’ ti hi a nih. Mi pawngsuoltuhai hin an ‘suksuol’ leia mi an suol lui hlak a ni? A ni nawh. An ‘suksuol/thawsuol’ lei khom a ni nawh. ‘Suksuol’ chu hriet naw leia thaw pangpalh amanih, fimkhur zo naw leia thaw amanih, chang suol palh lei amanih a ni hlak. Dan poisa lo a, thil suol an thaw a nih ti hre zinga an thaw lui hlak a nih. Chuleiin, rawl tawp insuoa ei sak hlak, “Ka thil suksuolnahai lei chun, kraws chungah an rŭm a..” (KH 94) ti dam hi ieng angin kûrinkukpui hlak inla khom, a zuk indik pha duokna san ding a um nawh. Adam le Evi bawsietna, thil suol an thawin a nghong suok a na, “Edena bawsietna leiin, Kros chungah an rŭm a” ti inla chu thudik ei hril lem ning a tih. Chu chu Rom 5:12 a Paula thukhawchang leh khom hung inmil a tih.
Thil poi tak el chuh, Hmar tronga Baibul lo inlet hmasatuhaiin ‘thil suol thaw’ (committing sin) ti ding po poah ‘thil suksuol/ thil thawsuol’ (committing mistake, error, blunder) ti-a an lo inlet deu vong hi a nih. A poi zuolna tak chu an thaw suol a nih ti khom an hriet thei naw hi a nih. Hieng ang trongkam indik lo dang tam tak hin ei Baibul hi a triel rang nuoi leiin, fîr tak le khŭn taka Baibul thu khelna (theological discussion/study) hang nei tum inla, pen khat khom ei suo hmain ei intâng nghal el a nih. Mi threnkhatin ‘suol’ hrilfienaa tum threlh amanih hlen phak lo (missing the mark) an hmang dam hi awm fu-in inlang sien khom thudik chenve a ni leiin nĕl rak chi ni kher naw nih. Thilthaw Verb form ‘to sin’ tiin hmang tum la, pên khat khom inson thei loin buoi rap nghal i tih. Baibulin ‘suol’ a ti chuh Pathien thupek dan poisa loa bawsiet a nih. “Fa naw ro” ti chuh dan thupek a na, poisa loa fak chu dan bawsietna a nih. Thupek poisak nawna le bawsietna chu Baibulin ‘SUOL’ a ti hih a nih. Suol ra suok laia pakhat chu ni ding ang ni thei nawna, tum hlen thei nawna (missing the mark) a nih.
Thaw ro, inngaituo tlang ei tiu. Kum 2018 sung bek hin ‘thil suksuol/thil thawsuol’ le ‘thil suol thaw’ indanglamna hi hriet fie tumin beipui thlak ei tiu. Kum za chuong kristiena insâl tah si-a hi thil indanglamna khom thlier hrang thei loa thim le var inkara ei la’n tăl buoi zing el hi chu ei nghawngawrh (nectie) sui khomin mi’n zapui tongkhong tang a tih. An indanglamna ei hriet fie pha leh, indik lo taka Genesis-Thupuong inkara ei hlu lut po po hi ei taksa mit le thlarau mit sukvaitu an nih ti hrein, inthiel fai tum ei tiu. Inhmaw taka zingbu fak khopa nuhmei kuoma, “Translation Committee inthrung ding kan na, ka’n hnu ta a, suok nghal el ka tih” ti puma kut thin phur a, inbuotsai lawkna nei si loa Baibul inlet mawphurnaa inbûr chot ei ching sung chun ei inhnawmna ngaiah inhnawm zing ei tih. Thrahnemngaina leia ei ngirhmun phor lang ngamtuhai kuoma lawmthu hril neka ei Baibul hrilhnawmtu anga ei intum nuom el dam hi thutak le inzawl a ni naw el thei. Pathien thu chuongna Baibul hi a ni dan dinga mani trong senga sie hi ringtu tin mawphurna a nih. Kawk bo trongkama triel rang nuoi BSI sut ei Baibul hai hi van tractor hmanga inthiel fai a ngai.
Food For Thought
Ka thu ziek hi khar ding ka ti lai BSI sut nuhnung tak 2017-a mi ka zuk phet leh Luka 22:15-23 thupuiah ‘Lalpa Zanbu phunna’ ti ka hmu a, ka’n ching zok a. Mathai le Marka bu ka zuk en leh chuong ang char chun an ziek ve ve a. ‘Zanbu phun’ chu a umzie ka hriet naw leiin, Hmar tronga inlettu hmasa tak Dr. Thanglung Baibul inlet ka va zong suok a, chuong ang char chun a lo chuong a. A hnunga Baibul inlettu Dr. Rochunga Pudaite ruok chun ‘Lalpa Zanbu’ tiin a sie a. Hmar tronga Baibul varson nuhnung tak, Lal Thiempu, Dr. Lalrosem, IAS; M.A. Ph D; M.Div. P.G. Diploma in Journalism; D.D. Krista Taksa (The Body of Christ, International) inlet, PATHIEN THU THIENGHLIM (2014) ti-a chun ‘phunna’ ti hih a hung hmang ve a. Saptrong Baibul ka hmu ve phak chinah Lalpa Zanbu phun thu hi khaw lai khom a chuong awm ka hmu nawh. A umzie hrie ei um am? Ieng inchuktirna am ni tang a ta? Kawk bo trongkam an zep mei mei am a ni?
(February 3, 2018; Delhi)
###
No comments :
Post a Comment