Mani Inthat

June 13, 2015 Inrinni sun dar 12-1800 hrs khan VETC Auditorium, Rengkai a Sinlung Academy of Letters (SAL) huoihot Seminar hmasa tak chu kan hmang a. Hi seminar hming  tak chu THANGNGUR MEMORIAL LECTURES ti a ni a, a thupuiah TRANSLATION & BIBLE ti a nih. A hnungin Tuithraphai sung ringota khom voi thum sunzom a ni ta a, la ni pei a tih.

Hi Seminar-a hin a thruoitu tak ka ni a. Hi Seminar report ka kolah hieng ang hin a chuong a:

“A khulanh khangnaah,  trongkam hmang thua fimhkur a trulzie tarlangna dingin zawna hieng ang hin ka’n don a:

Zawna: Tu lai hnai el khan a hnam pumin ni ei inser a, ei ni inser hrie ei la um am?
Donna: Hmar Martyr’s Day

Zawna: Chu chu Hmar trongin ieng tin am inlet ei ta?
Donna: Hmar Martar Ni.

Tlipna: Anleh, martar a chang ta si chun Hmar chu a thi tah tina ning a ti? A thi tah si chun ieng leiin am nang le keiin Seminar dam ei la nei zing ding? Delhi tlanga khom kan hmang tran ve a. Banner buoipuituhai kuomah, “Hmar ti kha bănin Martyr’s Day ti chauh ziek ro, ka hnam HMAR chu a la dam zing a nih” tiin ka hril a, an thaw nghal a. Hmun tinah “Hmar Martar Ni” hmanga ei hnam ei vui liem vong hnungin Delhi tlanga chuh hnam ta dinga hringna chânhai chawimawina le hrietzingna dingin “Martar Ni” kan inser a nih...

“A mak? Mak ti nachang ei hriet nawna tak hi ei ngaituona chawlol takzie hriltu a nih. Sikpui Kut hmang tah zing lai khoma banner-a “Sikpui inthang kan urh” ti ei ziek dam hi makti nachang ei hriet am? Thlarau le tisa chu inkal zing, tisa thil chu Pathien dona nia inchuktir zing si-a “Thu chu tisa’n a hung inching a” ti dum dum zing khom hi a dangdai naw maw? Pathienin a thilsiemhai thra a ti bek bek thu voi sari hiel Genesis bung khata chuong chu tiem zing siin, ni hnuoia thil po po hi “teplohai teplo” Ttu 1:2) tipek nawk si chu a biling deu naw maw? May 14, 2006 khan Delhi Thurawn-a John H. Ruolngul thu ziek “Collective Ennui” ti sunzomin ‘Chawlolna’ ti ka ziek a, a sunzomna 2-4 chen ka ziek bok a, sienkhom boruok mong nei loa tlanginsam ang chauh a nih.

Tu kum khom hin May 16-ah ropui taka Martar Ni hi inser dingin ei inbuotsai mup mup a, Khuollien dingin State danga mi Home Minister chen khom ei fiel. Amiruokchu, mani hnam thina inser loin hnam ta dinga hringna chanhai chawimawina le hrietzingna ‘Martar Ni’ (Martyr’s Day) ni tah lem sien, a thra lem naw maw? Mani le mani inthat hi băn ei tiu.

###