Hi trongkam ‘Thu’ hih umzie ngielngan bik nei thu mal a ni nawh. An hmangna le hmang dan le inzomin zierang le hmelhmang tum tum a put. Genesis bung khatnaa hnuoi le van hung suok dan chanchin ei tiem chun ‘thu’ ringot hmangin, “Hung um raw se” a ta, um loa inthokin a hung um zung zung a. Hi taka inthok hin ‘Thu’ chu thilthawtheina hlawm, a kontrawltu, ‘Pathien’ amanih ‘Khuonu’, Hebrai mihaiin ‘Elohyim’ ti-a an ko kuta um a nih ti a chieng. Um loa inthoka a hung inumtir chu hmangin Pathienin mihriem khom hi ama angpuia a siem, hringna thuok a’n thuok khum leia ‘Mihring’ hung ni tah a nih. Chu mihriem chuh buchangrum chauh ringa hring ding ni loin, LALPA baua inthoka suok ‘thu’ tinreng ringa hring ding a nih (Deut.8:3).
Hmangai Johanin, “Atirin THU a um. Thu chu Pathien kuomah a um. Thu chu Pathien a nih. Ama chu a tira inthokin Pathien kuomah a um. Iengkim Ama hmanga siem a nih, thilsiem po po hi Ama hmanga siem naw hrim a um nawh. Amaa chun hringna a um, chu hringna chu mihriemhai ta dinga var a nih…THU chu taksain a hung inchang a, eini lai a hung chĕng a, a ropuizie khom ei hmuh, lunginsietna le thutaka sip Pa Naupa nei sun ropuina chuh” (Joh 1:1-4, 14) ti-a a lo zieka THU a hril hih Isu Krista nina, Ama Pathien ngei mihriem taksa puta a hung inlang hma (pre-incarnated Christ) le mihriem taksa puta a hung inlang hnung (incarnated Christ) thu vong a nih. Johanin hi THU hrilnaa Grik thu mal a hmang chu ‘Logos’ a nih. ‘Word’ ti-a Saptronga an lo inlet chu a umzie ni-a Baibul inlet hmasatuhaiin an hriet leia ‘THU’ an lo sie ve a ni el thei. An lo inlet fŭk khop el. THU hi iengkim hnărpui a nih.
Thu chu thilthawtheina mak tak nei, UMA CHU KA NIH (I AM THAT I AM) titua inthoka suok a ni leiin, a angpuia siem mihriemin thu a hrilhai khom thilthawtheina neia ngai a nih. Bau thraa mi betu le mal mi sawmtu thu le trongsie mi’n phurtu thu ei pai dan khom a letling char a nih. Pakhatin ngai a sukthra a, pakhatin ngai a suksiet. Ieng leiin am? A thu hril khan a sie a thrain thilthawtheina neia ei ngai lei a nih. Mal ei sawm hin ei sawmna hmangruo chu ‘thu’ a nih. Chu chun thilthawtheina neiin ei ngai a, ko kir nawk thei a ni nawh. Jakob-in a pa Isak dawhaa a u Esau malsawmna dong ding a lo dong khal khan Isakin a thu a sût thei ta nawh (Gen 27: 32-38). Hi thil hi Balaam le Balak chanchina hai (Nam 22-24), Ahab, Jehosafat le zawlnei Mikaia chanchina hai (1 Lal 22:5-38) ei hmu bok.
Hebrai tronga ‘thu’ tǐna ‘dabar’ hi New American Standard Bible (NASB) a chun voi 1400 chuong a hmang. Grik tronga a tlukpui ‘logos’ hih Thuthlung Tharah umzie hrang hrang kawkin voi 316 hmang a nih: Luka-in voi 97; Paula lekhathonah voi 79; Hmangai Johanin voi 61; Mathaiin voi 30; Marka-in voi 23; Peterin voi 9 le ziektu dangin a dang po. Entirna dingin a hnuoia hin umzie hrang hrang puta an inlet dan New American Standard Bible (NASB) Version-a inthokin hang bi inla (italics a sie po hi an inkawktir dan chu a nih):
Mathai 5:32..except for the reason of unchastity (uire lei ni lo a..)
Mathai 5:37.. but let your statement be “Yes, Yes” (In thu hrila chun “A nih” ti chu “a nih” ni sien).
Mathai 12:32..whoever speaks a word against the Son of Man (Mihriem Naupa soiseltu tu khom)
Mathai 18:23.. a king who wished to settle accounts (sum thu ching fel tum lal).
Mathai 21:24…I will also ask you one thing (Kei khomin thil/thu pakhat indon veng ka ti cheu)
Mathai 28:15…this story was widely spread (chu tienami/thu chu an hril dar nasa hle a)
Marka 1:45…spread the news around (chu thu chu a hril a hril a)
Marka 8:32…he was stating the matter plainly (tlang takin chuong thu chu a hril a)
Marka 11:29...I will ask you one question (zawna/thu pakhat hang indon veng ka ti che)
Luka 4:32…His message was with the authority (thu nei taka a’n chuktir lei chun)
Luka 7:17…This report concerning Him went out (A chanchin chu a’n thang suok a)
Luka 16:2…Give an accounting of your management (I sum enkol dan chungthu hi sukfel rawh)
Johan 21:23…Therefore this saying went out among the brethren (Chuonga thu a hril lei chun thi lo dingin a unauhai lai a’n thang a)
Thilthaw 1:1…The first account I composed, Theophilus (Theofil, ka lekhabu/thuziek hmasaa khan)
Thilthaw 14:12…He was the chief speaker (lit. “the one who leads with words”) – Paula chu thuhriltu tak a ni leiin…
Thilthaw 19:38…have complaint against any man (tu laka khom thu poi an nei chun…)
Thilthaw 20:2…had given them much exhortation (infuina thu a hril treuh).
Hi taka châng 17 chauh ei lak suoka inthok hin Grik tronga ‘logos’ ti Saptronga inletnain ‘word’ ti chauh hmang loin thu mal dang 17 zet (reason, statement, word, accounts, thing, story, news, matter, question, message, report, accounting, saying, account, speaker, complaint le exhortation) NASB chun a hmang a, version dang danga inlettuhaiin an hmang dan leh khom thuhmun vong a ni nawh. Hmar trong ruok chun sentence tina hin ‘thu’ (logos) hi inthrangtir phet nuom chun thu mal inrem tuo dan hi sawi danglam meta zep sa thei vong a nih. Chu chu mimal seng insawizoina dingin maksan inla.
A poimaw tak chu Genesis bung khatna bula atira THU ngot hmanga thil hung um dan thu Mosien a ziek sunzomnaa kum 1500 vel hnunga Hmangai Johanin “Thu chu taksain a hung inchang a, eini lai a hung chĕng a, a ropuizie khom ei hmuh, lunginsietna le thutaka sip Pa Naupa nei sun ropuina chu” ti a hung zieka a thu khaitu trongkam, BC 600 lai vela Grik filawsawfar Heraclitus-le a hnunga Grik mivar le dawnril, abikin Philo haiin vanvel hung inumtirtu le an inrelbawl dan chungchanga thuneitu hrilnaa an lo hmang hlak ‘Logos’ ngei chu Isu Krista, Pa le Pathien chanchin thra thu hrilnaa a hung hmang hin hnuoi le van a hung sui mat chauh ni loin, chatuon hringna thing khom mi tin chel phakin an hmaa a hung inthrut a nih.
Logos & Rhema
Logos ti le Rhema ti thu mal pahni hi THU hrilnain ziektu hrang hrangin an hmang inkarthlak nasa hle a, chu chun Baibul inlettu tam tak lu a sukhai a. Mi thiem threnkhat chun rhema hi mihriem bausuok thu kawk le logos hi Pathien inhriettir thu kawka hril an um a. Ei hang bi chieng ruok chun a lo ni vong chuong nawh. Thuthlung Thar ziektuhaiin an hmang karthlak dan entirna 6 hmangin hang bi inla.
Mathai 26:75; Marka 14:72 le Luka 22:61 a “’Ar voi hni a khuong hmain nangin voi thum mi’n phai i tih’ a ti thu kha Peter chun a hriet suok a..” ti a Isu trongkam hrilnain Mathai le Marka chun ‘rhema’ an hmang a, Luka ruok chun ‘logos’ a hmang thung.
Efesi 6:17 a, “Sandamna chu lukhumah hmang unla, Thlarau kawlhnâm, Pathien thu chu pai zing ro” ti le Hebrai 4:12 a, “Pathien thu chu a hring a, thil a thaw thei a, kawlhnâm ngei ton ieng ang nek khomin a ngei lem…” ti-a hin Pathien thu chuh kawlhnâm angin an hril ve ve a, amiruokchu Efesi ziektuin ‘rhema’ a hmang a, Hebrai ziektuin ‘logos’ a hmang. Kawlhnâm danglam pahnih hrilna a ni naw a, an trongkam hmang a danglam chauh a nih.
Johan 6:60: “A zirtir tam takin chuong thu an hrietin, ‘Hi hi thu khir tak a nih, tuin am awi thei an ta?’ ” ti-a ‘thu’ a hin ‘logos’ a hmang a. Chang 63-a….”Thu ka hrilhai cheu hi thlarau le hringna a nih” ti le chang 68-a “Simon Peter-in a donna, ‘Lalpa tu kuom dang am fe’ng kan ta? Nangin chatuon hringna thu i nei an nawm’ ti-a ‘thu’ hrilna hin ‘rhema’ a hmang ve ve.
Thilthaw 10:44 “Chuong thu chu Peterin a hril lai zingin a ngaithlatuhai po po chunga chun Thlarau Thienghlim a hung tlung a” ti le chang 48 a “Chuongchun, Isu Krista hminga baptisma inchang dingin thu a pêk a” ti-a hin a hmasa lemah ‘rhema’ a hmang a, nuhnungah ‘logos’ a hmang.
Thilthaw 13:42 “Inkhawm trin an suok lai chun Sabat nawk phaa chuong thuhai chu hril nawk dingin mihai chun an ngĕn a” ti le chang 44-a “Sabat nawk chun Lalpa thu chuh ngaithla nawk dingin a khaw nawt deuthawin an hung inkhawm a” ti-a hin a hmasaa Paula le Barnaba thuhril hrilnain ‘rhema’ a hmang a, a hnunga ‘Lalpa thu’ ti-a hin ‘logos’ a hmang.
1 Peter 1:23 “Chi hmon thei ni loin, chi hmon thei lo Pathien thu hring le tloa inthoka pieng thar in nih” ti le chang 25-a “Lalpa thu ruok chu chatuonin a um zing. Chu ngei chu a nih Chanchin Thra an hril cheu kha” ti-a a hmasaa hin ‘logos’ a hmang a, a nuhnunga hin ‘rhema’ a hmang ve ve.
Pathien theida
Baibula Pathien le kum 300 hiel intlon le a hringa Pathienin a lak tung ei hriet hmasa tak chu Enok a nih (Gen. 5:22-24). Ei hriet nawk chu mi fel, a dam ruolpuihai laia dem kai lo, Pathien le intlon hlak mi, Nova a nih (6:9). A pathumna chu “ka’n tlonpui hlak LALPA chun i kuomah a vantirko hung tir a ta” ti-a a siehlaw hriltu Abraham a nih (24:40). Ni tina Pathien rawl hretu an nih. Ringtu intihai lai hin anni anga ni tina Pathien intlonpui le a thu ngaithlaa zawmtu mi ieng zat am ei um ding maw? Pathienin a biek hlaka inhril, inlărna ieng ieng amani hmua insâl, mani phak china ngaituona inlêng vel mangphana sŭrpui, zawlnei tehlem tam tak an lo um tah hlak ang khan ringtu lai khom hin rongbawltu le thuhriltua inngai, sumdawngnaa Pathien thu hmang pawlawt pawl, mani nunah a rà hlek khom hmu ding um si lo, ei tam.
A tehlĕma Pathien thu khŭkpui hlut hi Pathienin a theida. “Ka hminga hril dinga thu ka pek ni lo hriltu zawlnei amani le pathien dang hminga hriltu zawlnei taphot chu in sukhlum ding a nih” (Deut. 18:20) a ti top el a nih.
Chun, “Zawlneihaiin ka hmingin khêl an hril hlak a ni chuh. Anni chu ka tir naw a, ka ruot naw a, ka biek tawl bok nawh. An thil hmu khom ni lo, hmangna bo thrumvawra an thil dong le an lungril suongtuona mei mei a ni chuh” tiin Pathienin zawlnei Jeremia kuomah a hril bakah chuong mihai le an sungkuohai chu vuitu tu khom nei loa kawlhnâm le trăma an thi dingzie a hril (Jer. 14:14). Chun, Jeremia 23-ah
Hieng zawlneihai hi ka tir nawh,
Anni thu a nih an invirpui;
An kuomah thu ka hril nawh,
Anni thu a nih an hril (chang 21)
a ti bakah “ ‘Mangah ka mang, mangah ka mang’ ti-a ka hminga khêl hril hlaktu zawlneihai thu hril chu ka hriet. Zawlnei khêlhlip, mani suongtuona thu hril hlakhaiin hieng ang lungril hi ieng chen am an put ding a na? Anni le anni mang inhril tuoin, an thlatuhaiin Baal an biek leia ka hming an theinghil ang khan, ka mihai chu ka hming intheinghiltir an tum a nih. Mang neitu zawlnei chun a mang chu hril sien la, ka thu hretu zawlnei ruok chun ka thuhai churingum takin puong raw se. Bu tak le bupawlin ieng am inangna an nei a? Ka thu hi mei ang le lung vuok nawina tubo ang a ni naw am a ni? (ch.25-29)…Chuleiin, ngai rawh, ka thu ni awm taka an ruolhai hril sawng hlak zawlneihai hi ka do a nih. Ngai ta, mani phuokfawm hril hlak zawlnei, ‘LALPAN a tih’ ti hlaktuhai hi ka do a nih. A nih, ka tir le ruot khom ni lo, mang tehlem mei mei hrila ka mihai khêl muhluma thruoi hmang ching hlak zawlneihai hi ka do takzet a nih. Ka mihaiin trangkaipuina hlek khom an nei nawh” ti hi LALPA thu suok a nih (ch 30-32) tiin a chuong bok.
Jeremia 29:22-23 ah hieng hin a ziek bok: “Anni lei chun Judai rama mi Babulona saltang po po chun, ‘Babulon lalin meia a raw hlum Zedekia le Ahab angin LALPAN i chungah thaw ve raw se’ ti hi trongsie inphurna tronglamkeiah hung hmang pha hiel an tih. Israel ramah thil invetthlak tak an thaw a, an tuolbawmhai nuhmei an uiretpui a, ka hming sâlin, ka thupek ni si loin, khêl thu an hril a. Chu chu kei a hmutu le hretu ka nih’ ti hi LALPA thu suok a nih, tiin.
Ezekiel 13:1-10 a chun, “LALPA thu chu ka kuomah a hung tlung a: 2 ‘Mihriem naupa, Israelhai zawlnei ruol, zeldin thu hmanga thil hril lawkhai chungthu chu hril la, LALPA thu ngaithla dingin hril tawl rawh. 3 Lalpa PATHIEN chun hieng hin a tih: Zawlnei invêt, ieng khom hmu nei si loa mani zel din thu khekpuituhai chung chu a pik ie! 4 Aw Israel, i zawlneihai chu khaw ram sihal ang chauh an nih. 5 Israel sungkuo ta dinga LALPA nia indonaa ngir zo dinga siem thra dingin kul chimna lai an va paw ngam nawh. 6 An inlarna hmu chu a lem a na, thrumvawra an hril lawkhai chu thukhêl vong a nih. LALPA tir ni reng reng loin ‘LALPA thu suok a nih’ an ti ve a, an thu hrilhai chu tlung kim dingin an ring nawk nghal a! 7 Keiin in kuomah thu hril si loa, ‘LALPA thu suok a nih’ in ti chun inlarna hmang lo hmuin thu indik lo in hril lawk a ni naw am a ni?
8 “Chuleiin, Lalpa PATHIEN chun hi hi a hril a nih.In khel hril lei le inlarna hmu anga in inhril leiin ka khing cheu a nih ti hi Lalpa PATHIEN thu suok a nih. 9 Inlarna tehlem hmutu le thu khêl hmanga thil hril lawktu zawlneihai chu ka kutin dodâl a ta, ka mihai inrawn khawmnaah thrang naw ni hai a, Israel sungkuo hming zieknaah ziek sa ni naw ni hai a, Israel ramah lut bok naw ni hai. Chu pha chun Lalpa PATHIEN chu ka nih ti hung hre tang an tih. 10 “Muongna um si loin, ‘A muongum’ an ta, ka mihai an thruoi hmang a, bang lem an bawl a, chinaiin an zŭt văr a..”
Zekaria 13: 2-3 a chun “..A rama inthokin zawlneihai le thlarau tirdakumhai chu la hmang ka tih. Tu khomin thu an la hril lawk rop a ni chun, a hringtu nu le pahai chun, ‘LALPA hminga khêl i hril leiin i thi ding a nih’ ting an tih. Thu a hril lawk lai ngei chun a hringtu nu le pahai chun sun hlum an tih” tiin a ziek hiel bok a nih.
Mathai 7:15 a chun Isu’n, “Zawlnei tehlemhai laka chun fimkhur ro, chuonghai chu beram vun silin in kuomah an hung a, sungril tieng ruok chu satene hnukrawl ang an nih” tiin a hril.
2 Peter 2:1 a khom, “Nisienlakhom, keini mihai lai zawlnei tehlêm an um hlak ang khan nangni lai khom zirtirtu indik lo an hung suok ding a na, mi sukse thei, zirtirna indik lo arûkin hung put lut an ta, an Laltak anni intlantu chu phatsan an ta, anni ngei chungah sietna inrang takin intlungtir an tih” tiin heing zawlnei tehlem le zirtirtu indik lohai laka fimkhur a trulzie bung khat top a ziek a, trongkam hmang khom insŭm loin a mû mŭin a khe pop pop el a nih.
A tawp taka chun ei thu bul innghatna hung vor lârtu Hmangai Johan chun a lekhathon 1 Johan 4:1-3 ah, “Dittakhai, thlarau nazong ring naw ro, zawlnei tehlem tam tak khawvelah an hung suok tah leiin thlarau chu Pathiena inthoka suok a ni le ni naw fie hlak ro. Hi hi Pathien Thlarau in hriet thei dan ding chu a nih: Isu Krista chu taksa ngeiin a hung ti trantu taphot Thlarau chang chu Pathiena inthoka suok a nih. Isu Krista chu taksaah a hung inchang ti tran nawtu thlarau chang chu Pathiena inthoka suok a ni nawh. Chu chu Krista dodaltu thlarau, a hung ding ti in hriet lawk kha a na, tu khom hin khawvelah a um tah zing a nih” tiin a hril.
Paula chun Galati mihai kuomah, Krista Chanchin Thra a hril ang ni lo hriltu chu “chatuonin trongsephurin um mol raw se” tiin trong tawp hmangin a hril (Gal 1:6-9) bakah Efesi khuoa kohranhai kuomah, Diebol zawrna do hnea an dingchang theina dingin Pathien ralthuom kima inthuom dingin a hril. Chu chu thutaka kawng hrĕn, felna awmphaw hăk, remna Chanchin Thra pheikhoka bun, ringna awmphaw hak, sandamna lukhum khum, Thlarau kawlhnăm Pathien THU pai zing le thlaraua trongtrai zing a nih (Efesi 6:10-19).
Hi inchuktirna po po inthlung khawmna chu atira inthoka um THU, Grik tronga ‘Logos’ an ti hih a nih. Paula chun, “Hun a kim phaa Kristaa hlen dinga Pathien thil rêl lawk chu van le hnuoia thil iengkim chu lu pakhat, Krista hnuoia hŭi khawm vong a nih” (Efesi 1:10) tiin a ziek. Chu Krista chu a nih Johan kuoma Iengkimthawthei, Alfa le Omega a ni thuhriltu khah (Thup 1:8).
(June 14, 2018; Delhi)
###
No comments :
Post a Comment