Chuong chu a ni lai zingin, Lalhmingthang hlaa, “I thrang naw chun zaleng lai hin, laituol leng zo naw ningah” ti ang deu khan, alu thrang loin khawvel hi a tlei ta naw a ni hi tie! Japan rama inthoka Amerika ram chenin, Russia rama inthoka South Africa ram chenin alu hi hnuk lalpa laia a poimaw pawl tak, ni tla seng loa roreltu, hotel le restaurant thra tak le inhnuoi taka le mi hausa tak le pasie tak ina khom hmun poimaw hluotu a nih. A thrang naw chun khawvel hin seramu ei thur thei ta nawh. Ei fak chauh khom ni loin ei dawn a, vodka le zu thra dang danghai hi alua inthoka siem an nih. Vaihai lem hi chu, alu fa po thi ding ti inla, zun thlum invoi leia fa lo tlawmte chauh ti naw chu, thi fai vong an ta, India rama hin siksikrieu inhram nghal a tih.
Hi thu ka hung ziekna san ruok chu hi hi a nih. June 20, 2005 khan Britain-a alu chingtu pawl British Potato Council (BTC) huoihotin London-ah khaw fangna an nei a. Hi hi thil la um ngai zen zen lo a ni leiin mi na a ver a, chanchin bu hrang hranga le internet-ah a chuong nasa hle a. BTC hin alu chingtu member sangli chuong a nei a. Chuonghai chun Amerikan-haiin trong ler (slang) a an hmang ‘couch potato’ chun alu hming a suksiet leiin Oxford English Dictionary (OED)-a inthoka pei hmang dingin an nor a nih. ‘Couch potato’ umzie OED-in a hrilfie dan chun, “a person who spends leisure time passively or idly sitting around, especially watching television or video tapes” ti a nih. Mihriem, ieng khom thaw mumal nei loa hun awl zomthaw taka hmangtu, television amanih video amanih ena zal inzam mei mei mi, tina a nih. Kong danga hril chun ei thusima ‘Samdal’ ang kha tina tluk ni thei a tih.
Trong lèr hi a pieng zing a, a thren thla tam dai loin a thi a, a thren chu kum iemani zat hnungah a thi a, a thren ruok chu hmang zui a ni pei a. Chuonga trong lèr hring sawthai chu diksawnari-ah an hlu lut hlak a. ‘Couch potato’ ti khom hi kum 1970 vel bawra trong ler hung suok a na, kum sawmthum chuong hmang a ni hnungin tu lai hnai ela OED suokah trong thar tam tak leh an hlu lut chauh a nih. 1993-a sut ka diksawnari hmanga chu a la um hman teu teu nawh.
Alu le inzoma trong ler a suok rawn vei leh, ieng dinga ‘couch potato’ ti kher kher hi an soisel am a na? ti hi ngaituo tham a nih. Alu le inzoma trong lèr an ching suok laia tlawmte chauh hang thur suok inla. Australian-haiin ‘potato peeler’ an ti chu ‘ngaizawng’ tina nih. Nuhmei hrim hrim hrilna khomin an hmang bok. Amerika-haiin ‘potato jack’ an ti chu lung ina intang ruolin aruka alu hmanga zu an siem (illicit liquor), tu laia Mizorama ‘pehtreh’ an ti ang deu hi a na, sienkhom diksawnari-ah an la hlu lut naw niin an lang. Zu tina tho ‘potato spirit’ ti ruok chu hlu lut a ni tah. ‘Not quite the clean potato’ ti umzie chu ‘a’n hril thiem ang chu a ni teu nawh, mi felfai a ni nawh, a hming a thra nawh’ tina ang a nih. ‘He is no small potato’ ti umzie ruok chu ‘Mi mei mei/ tenau an nawh, Nuom ela pal zut chi an nawh, Nuom ang anga thu hne chi an nawh’ tina a nih. ‘Potato trap’ chu ‘bau’ (mouth) tina, ‘potato finger’ (Shakespeare) chu kutpar inhrol tina, ‘potato bogle’ (Scot) chu vate vengna dinga lo le huona mihriem lim an sie, trikhai (scarecrow) a nih. Diksawnari-a hlu lut tah ‘hot potato’ ti ruok chu thil buoi (controversial), buoina le inkop tina a nih.
Hieng ei tar langhaia inthoka ei en chun ‘couch potato’ an dit nawna san bik ni awma inlang chu thabona le zomthawna le an thil ching le ngaihlut alu chu bel khatah sung khawm an dit naw a nih, an thil ching sukhmelhemtua an ngai leiin. Chu chu a nih ngaisang an umna chu. Hi hi an kalchara an thil ngaihlut le ngaihlut lo hmu theina darthlalang fie tak pakhat chu niin an lang. Ei pi le puhai khomin thaw mumal nei loa um mei mei le zal inzam mei mei chu, dam nawna lei a ni ngot naw chun, thil inzakum thlak tawpa an ngai hlak a nih. Tu ruok hin chu, hmun tam takah a letlingin a hung um tah niin an lang. Television nei phak chin inah leng inla, naupang, thralai le nupui le papui ruolin an hun awl an hmang rawnna tak chu thabo hmai (television) kil a nih. Kasauti Zindagi a suok lai lem khan chu, a suok hun a tlung ta chun en dingin inkhawm lai khom an suok top el a nih. Chuonghai chu dannaranin nuhmei an nih. Isu le an pasalhai nek daiin Kasauti an sie inlal lem a nih. Mihaiin chuong ang nun hrilna trongkam ngot khom chu an diksawnaria inchuongtir lo dinga an nor laiin, eini rawi chun changkangnaa ngaiin ei nunah ei lak lut a, inpui hluotu takah ei inchangtir der el a nih.
Alu hi mihriemin ei ching tak takna a la sawt naw vei leh, hieng ang khopa khawvela hmun poimaw a hluo el hi thil mak chu a ni ve hrim hrim. South America, abikin Andes tlangpui dungah alu hi an lo ching hlak a, chu chu a tuoltroa inthoka an ching pung pei a nih. Tien laia Peru rama an bel hlui cho suok sungah alu an hmu a, chu chu AD 200 vela mi niin an hriet a. Hi hi alu hmelhmang khawvel histawria a’n lang hmasakna tak nia hriet a nih. AD 1500 vel bawr lai khan Andes tlang dunga chenghaiin alu hi an ching hlak a, a hmingah ‘papas’ tiin an ko a. Spanish-haiin South Americaa an rûn a, 1533-a Cuzco an tlunga inthoka kum thum hnungah Europe rama khom alu an fak ve thu ziek a ni a. Chieng taka an rikawt chu Seville-a Sangre hospitalah a ni a, chu chu 1573 kum a nih. Europe rama alu la luttuhai chu Spanish-hai an nih.
Europe hmun hrang hrang le Russia ram chenin a tir chun phar hri intluntu le tui hri (cholera) suksuoktu nia an hril thang bakah Baibul-ah alu a um naw leia fa nuom lo pawl an um a. Sienkhom, var takin, Irish-hai chun kum 1623 lai khan an lak lut a, an ramah thil dang ching a hlawk naw leiin alu nasa takin an ching a, an inbengbelna tak a hung ni ta a. Chu taka inthok chun England, France le Italy ramah an dar pei a. Sienkhom, 1845-46 a alu nasa taka a’n tàm leiin Ireland chun a tuor pha hle a, fak ding nei lo tam tak chu Amerika tieng an inpem a, 1851-1946 inkar khan maktaduoi thum le a chanve zet an lut a, chuonghai lai chun Amerika suk-Amerika tuhai laia mi Kennedy-hai sungkuo khom hi an thrang ve a nih. Amerikaa khom Irish-hai chu alu ching hmasatu pawlah an thrang ta pei a. A hnung peiah Russia chu a ching nasa tak a hung ni a, Poland-in a dot a, anni ram pahni alu tharsuok chu Asia ram po po le USA le Germany tharsuok nekin a tam lem a nih. Chuleiin, vodka hi hau naw ruol an lo ni nawh.
Pherzawla kan um lai, kan naupang lai kha alu kan fak phak ve hun chu a ni el awm. Hmar Biela Hmar umna khuoah alu hi ching nachang an lo hriet naw lei am a ni ding, ka hriet phak china chu a ching an um ti ka hriet naw a, an lo um a ni khomin zor tham khop ching an um naw ni mei a tih. Kan khaw hnai, kha hmaa Vuite (Guite) Biel tia hriet hlaka cheng unau Paitehai ruok chun an ching a, chu chu Pherzawl khuoah an hung zor hlak a. Chu ruol chun purun zung sei hi an hung zor ngei bok hlak a. Alu kan hme ding chang chu sa belpui thret ding ang tlukin kan inngai a, bu fak kar kan nghakhla thei êm êm. Zopui (Zangkum) alu lem chu a khuo an zo thra bok a, mihriem siem fawm hnuoi thratna thrang der lo, pil thienghlima ching, van ruotui fim le boruok thienghlimin a chawmlien a ni leiin an alu chu vahrit intui lai sa ang elin a’n buot sat a, a hâng êm êm a, a rim a’n hnik bok a, a lo dongtu phingpui khomin a lawm a, a lo halelui non tlut tlut el hlak a nih. Kum sawmnga chuong hiel lo liem ta sien khom, lum hluonga alu le maihna zeu pol, thlengpuia an hang thur suok lai kha lungrila ka hang ngaituo changin, ka chil a la sukpût ser ser hlak. Chuong lai hun chu ‘couch potato’ khawvel pieng hma, Eden khawvela nun fieratui kan la pal lai a ni si a.
(June 24, 2005, Delhi)
###
No comments :
Post a Comment