In lowly pomp ride on to die;
O Christ, thy triumphs now begin
O’er captive death and conquered sin
- Henry Hart Milman
Tûmkâu Ni
March 29, 2015 Pathienni khah Tumkau Ni (Palm Sunday) a nih. Hmar Christian Fellowship Delhi inkhawmah biek in sung le a tuolpuk inleng lo khopa tam kan fuon khawm a. Hi ni hi hnuoia Isu hung laia zawlnei lo hril lawk anga sabengtung tuoi chungah chuonga Lal Messia a nina anga ropui taka Jerusalem khawpui sung le Tempula a lutna le lal anga an chawimawi hmasakna tak le tawpna tak champha a nih.
Naupang Sande Sikul tienga kaihaiin kum danga an thaw hlak anga tumkau chawiin,
“Hossana, Lalpa hminga hung chu a hamthra,
Ram hung tlung ding ei Pa Davida ram chu a hamthra,
Chuhnung taka khin Hossana” (Mk 11:9)
tia insamin, biek in an hung thrawng a. Mipuiin voi thum a ruolin ‘Hosana’ tiin kan insam ruol thrup thrup bok a. Jerusalema ropui taka Isu an lo chawimawi lai hlimthla ding awm sungril mitah fie kuouin a hung inlang a. A taka thrang ve ang elin, lung hlui a’n leng vong vong a. Ei Ridila Jordan vadung hung luong lut hin kum za sung vel chauhin a mi lo va hang chǐm insang ta de aw! Khang lai huna mihai kha hung thoin, ei inkhawmnaah hung thrang ve hai sien, ei hoiher, ei thu le hla le trongkam hmanghai hi a mik a mak hre ta naw ni hai. “Hosana chu ieng tina?” ti hih an indon hmasa tak lai mi a ni ring a um. Hosana chu ieng tina am a ni hrim leh?
Jerusalema chawimawia Isu a um ding thu le chu ni chun sabengtung tuoi chuonga chuong ding a nizie chu thlarau mita chieng taka hmutu zawlnei Zekaria chun a tlung hma kum 650 vela inhmain hieng ang hin a lo hril a:
Nasa takin hlim rawh, Zion naunu!
Jerusalem naunu, khêk rawh!
En ta, i kuom tieng i Lal a hung,
Mifel le Sandamtu chu;
Sienkhom, inngaitlawm takin,
Sabengtung chungah a chuong,
Sabengtung tuoi chung ngeiah (DV. 9:9).
Chu hrillawkna chu kum zaruk hnung, April 3, 33 AD khan a hung tlung kim a nih. Chu chu kha kuma Fekân Kŭt trumtriek hma hma ni thuma thil tlung a nih. Isu khan kum 30 a ni-a inthokin Kanan ram hmun tinah inzinin rong a bawl tran a, kum thum a bawl hnungin April 7, 33 Zirtawpniin kros-ah an hemde a, a thi a, thlănah an inzaltir a, hrillawka a um angin a thia inthoka Judahai ni tiem dana a ni thumna tuk April 9, 33-ah a tho nawk a nih. Amiruokchu, Isu pieng ni le thi ni hi chieng faka zieka inchik a um naw leiin pawl hrang hrangin a ni le kum dinga an sui dan ang sengin an inser a, an khuongruol nawh. Mi thiem tam takin besan ringum tawka an ngai hmanga an sui hnungin Isu kha AD 30-37 inkara thi ngei niin an hriet a. An hang sawr chin pei chun April 7, 33 AD hi sir hrang hranga inthoka enin an pom tlang tak a. Chu chu eini khomin ei hmang ve a nih.
Hieng ang ni poimaw hi mihriemin ei hmang suol Pathienin a’n lau lei amani ding, inchik loa sie a ni nuom khop el. Senvon-a chanchin thra lutna ni khom a phurluttu takin chieng taka an inzin dan le an thilthaw chanchin February 20, 1914 Official Statement-a a rikawt laiin a ni tak ruok chu hril hmai a’n chû tlat! Mak ve tak chu a nih. A san um ngei a tih.
Inchik Tlâk Ni
Isun kum thum rong a bawl sung khan kong iengkimin Pathien tir, Pathien Naupa, Judahai beisei Messia hung dinga zawlneihai lo hril lawk ngei chu a nizie a fena taphotah thil mak tam tak thawin a’n entir a, a bau ngeiin a hung san a hril mol mol a. Amiruokchu, suol bawia inthoka mi po po intlan dinga hung a nina nekin a mi Isarelhai sansuoktu le an chunga roreltu lal Messia a nina chu hung chelek a, Roman lalram hung phǐn dar a, hnam po po a ke hnuoiah sie a, Davida lalram indin thar a, kum sang rorel tranpui dingin Juda mimir chun an ring a, a zirtirhai khom kha an chuongliem bik nawh. A tho nawk hnung, van tieng a kir nawk ding trep khom khan an thu indon tak a la ni zing: Lalpa, tuhin a ni Israel ram i tungding nawk ding chu? (TT 1:6)
Israelhaiin an Messia ding an lo beisei angin ni khat char a khawsa a, chu ni-a a thilthaw hrim hrim chu ‘Thupek” (By Order) a ni vong. Zawlnei hril lawk angin, a chuongna dingin sabengtung tuoi a mamaw a, a keitu dingin mi pahnih a tir a, an va kei a. Iengkim siemtu le neitu awrdar a ni leiina sabengtung neitu phalna an hni naw a, an hni a ngai chuong bok nawh. Sabengtung cheitu ding, a fena ding lampuia puon phatu ding, hnena changa inlawihai an lawmlut chănga an chawi hlak tumkau chawia lo lawm luttu ding, an thu le hla insam ding iengkim, a bu-a ziek ang thlapa thawtu ding khom inpuocha lawk ngai der loin an lo um el a nih. Iengkim chunga thuneitu a ni tlat a, tu khomin trît an ti ngam nawh.
Mediterranean Tuipui kam le a se vel rama Juda mi tam tak, Fekân Kŭtpui hmang dinga hung hai chu Tempul kompaun sungah an inzi mum mum a. Tangka chi hrang hrang hung chawi an ni leiin, Tempula thilhlan ding ran chi hrang hrang, parva le thil dang dang inchawkna dinga shekel tangka an thlengna hmun (foreign exchange counter) chu khuoibu lŭn vanglai ang a nih. Isu hun lai chanchin ziektu pakhat Josephus hril dan chun, Isu hun laia Jerusalema cheng kha mihriem 40,000 vel an ni a, Fekan Kut huna ruok chu a let sari neka tam, mi 250,000 vel an inbeng khawm hlak a nih. Jerusalem in the Time of Jesus (1969 p.84) ziektu Joachim Jeremias hril dan thung chun mihriem 20,000 vel kha Kût huna chu 150,000 velin an pung hlak a nih.
Kha hma ela Judahan that an tum leia inrel hmang, uolau taka Jerusalema khom inlang ta lo, Jordan rala Johanin baptisma a’n changtirna hmuna a zirtirhai le inkulh, Lazar damnaw thua Martha le Mari’n an incha leia Jerusalem khaw bul Bethani-a hung, thiempu lalhai le an rawihaiin a kei tho Lazar le that dinga an vel ngat ngat a nih. An fe le fe naw ding thuah khom an insel buoi fe a ni ngeizie chu, Thoma, Didum (Phira) tia an ko bokin zirtir danghai kuoma, “Thi ding ni inla khom ama leh feng ei tiu” a ti khan a sukchieng. Chu chu a ngirhmun derthawngzie a nih.
Amiruokchu, Tumkau Ni, Lal Messia a ninaa Jerusalem a lut ni hin chu tritna hlek khom a nei nawh. Tempul huonga lem khan chu, ama tirtu Pathien, a Pa in a ni leiin vuokna hruol hmangin thil zortu le inchawtu le tangka thlengtuhai kha, “Ka in chu hnam tin ta dinga trongtraina in ding a nih. Nangni rawiin suomhmang pûkah in inchangtir lem hih” tiin an thil zorhai leh an dawkanhai a namthluk a, a hlap suok tawl vong a nih. Khanga that tuma Tempul vengtuhai le inthuruola arûka vĕtu thiempu lalhai dam khan puonzar phênah an bi dĕk dĕk ngam chauh a nih. A hrohrâng a na khop el. Sienkhom, tu khomin ieng an hril ngam nawh. Messia a nina a’n suo trum a ni tlat a.
Sabengtung le Isu
Middle East laia lal le lal inkara inremna an siem phaa an thaw hlak chu inremna siemtu ding lalhai kha ran laia phurrik phura sorkawng hlaw tak, ran hmusitum sabengtung chungah an chuong hlak a nih. Sakor chu indona thuomhnaw (war-horse) a ni leiin, inremna siemna hmangruoah an hmang ngai nawh. Thuhnuoirolna le inngaitlawmna lungril puta inremna siem dinga hung an nizie tar langna dingin sabengtung chungah an chuong hlak a nih. Isu khomin a hungna rama an hnamin an lo ching hlak kalchar chu ngai poimawa a ngiel a ngana hung zawmin, mihriem le Pathien inkara inremna siem dinga hung a ni leiin, a chuongna ding sabengtung tuoi kha a’n buotsaitir a nih. Hril lawk a ni dan ang taka a hung hlen kha Pathien thu a nina lai tak chu a nih.
Tumkau Ni-a eini rawi thukhawchang phulpui tak ni tah hiel awma inlang ruok chu Isu ni loin sabengtung a nih. Sabengtung kha thlarau nei le ditthlangna hmang thei mihriem, eini-ah ei hang inchangtir a, hringnun hruola thlung ei ninaa inthoka sut ei ngaizie dam, tu la chuongna ngai lo sabengtung tuoi anga thienghlimna nun cheltu le hrawtu ni a poimawzie dam, sabengtung neitu anga phal taka Pathien hmang dinga ei thil neihai pek suok a poimawzie dam, sabengtung anga thu awina le zawmna lungril put a trŭlzie dam le thil dang dang mai khawmin, lung inno takin Pathien thu nekin eini ngaituona inleng vel ei sermon hlak. Indik tak chun, ei sermon ni loin, ei ngaidan hrilin ei ‘gawp’ a ni tak lem. Chîk nawkzuola ei bi chun, Isu nekin a chuongna sabengtung kha hmun ei inhluotir rawn lem hlak a nih.
Delhi Version kan buoipui tran lai khan kha hmaa BSI sut ei Baibula thil awm lo tam tak ei lo hmang hlak laia pakhat chu ‘sabengtung tê’ chunga Isu ei lo inchuongtir kha a nih. Sabengtung puitling hman hi ran thehrê, mihriem chuongna nĕka thil phurtua hmang hlak a ni a. Sabengtung puitling ni lo, a tê nawknghal chunga Isu inchuongtir chu ni êm ĕmin kan hriet naw leiin, ‘Zangai! Zangai!’ tiin ‘sabengtung tuoi’ chungah kan inchuongtir tah lem a nih. Saptronga sabengtung tuoi hrilnaa thu mal an hmang tlanglawn tak chu “colt’ ti a ni a, chu chu kum 4/5 vela upa a nih. Chuleiin, zangaiin, sabengtung te chunga em chu inchuongtir zing ta nawng ei tiu khai!
A ieng ieng khom chu ni sien, Baibul thu ei hril changa a thupui inthlungna tak neka a bebawma ei thu zeldinin ei thupui tak a fen hmang hlak hi ieng lei am ning a ta? Vantlang inkhawma khom ei thu chai ding tak nêka a bebawm thua pet daih ei ching hi ieng lei khom ni loin ei thu buon takah ngaidan mumal ei nei naw lei a ni nuom khop el. Facebook-a hin hril tlang ding thu poimaw hung sep suok an um zeu zeu a, sienkhom inril taka thil sui pei ei tlawm ni ngei a ta, an hung thluoi sunhai (comments) hi hang tiem inla, kokbong triek nêk daia kawrong le kawk bo a ni nuom khop el. Mani trong takngiel tong khat khom ziek dik thei lo eini tlangpui bok. Facebook hi ei kawrongzie tarlangtu darthlalang, facebook ni si, hmai intona ei ‘face’ ngam lo, hming lema huongtau ngam chauh, mi dawizep ruol tlan khawmna a la ni hri ti inla, khel ei hril tam ka ring nawh. Mani hminga inlang ngam ngatin hmun an hluo rawn pha, umzie hung nei a ta, hmang trangkai bok ei tih.
Pathien thu ei lak le fepui dan lem hi chuh a khingbai zuolin a’n lang. Hre vieua inngai si, ei hriet chieng naw dan hi a turu a, ei hriet naw dan nekin ei zawm naw dan hi a turu lem el thei. Pathien thu chu sunhang khat khom a bo nekin hnuoi le van khom bohmang lem dinga Isu hril kha thudik tawpkhawk a ni lai zingin, Baibul-a ei pom sunga thu chuong po po, famkim lo mihriem kut hmanga ziek le famkim lo mihriem bokin trong hrang hranga indik lo nunga an inlet sawng nawk, inzom lo rupa ei nuomna lai lai ei lo baihat, ei lung tlŭk dan zawng zawnga ei lo hril fie le kei her chu Pathien thutak ni dinga ngai rum rŭt ei tam a. Chuonga thlarau inhrietirnaa ei donga ei ngai threnkhat lem chu Pathien thutak ni lo, inlet suol leia thil um a ni thu dam hril inla, thangtlawmah ei lak bakah thlarau thienghlim hrilsetua mi ngai hlauh an um nuom khop el. Dannaranin, chuong mihai chun thlarau mit varna neia an inngai leiin Theology inchukhai hi an hmu sakhi nuom khop el. Thuhriltu threnkhat hlak chun Baibul thutak umzie hril fie nekin mimawl lungril them zawnga lunginnona chithlum tuia chie zop sermon inri rum ruma thlak ei ching bok. Ei thu innghatna ding Baibul chang tawite ei hang tiem a, ei nuomna tieng tieng ei fang kuol a, ei chang tiema hung kir ta loa for hmang song ei tam. Thupui bituk hril dinga ei intuk pha leh kut le ke le lei khuop de tlat ang el ei ni nuom khop el.
Tumkau Ni le inzoma ei thu le hlahai hi hang bi chieng inla, Pathien ruota a ram mihai hnam nunphung indik tak hraw le fe thlenga thil hung tlung, Remruottu Mak a nizie, tu lai trong takin, an lo beisei Messia a nina ‘role’ a hung ‘play’ dan, kum za tam tak hmaa hril lawka lo um tah chu dangdai taka hlen a hung ni dan le Pathien thu hi ringzo a ni takzet tieng hril hi an um ngai mang nawh. Chuong nek hmana ei buoipui, Isu neka hmun ei inhluotir rawn lem chu sabengtung a nih. Kum iemani zat liem tah khan BSI sut ei Baibul chinglettuhaiin ‘sabengtung’ tia a ‘beng’ tak hi Lusei trong ei lak nia an ngai leiin ‘sanatung’ tiin an thlak a, Isu chuongna ransa a ni leiin ei ngai ursun tho chu ning a tih. Hi trum bok hin ‘sanghawngsei’ khom ‘saringsei’tiin an thlak kha tie! Ei pi le pua inthoka sa-nghawng ei inpek hlak kha ‘sa-ring inpek’ tia thlak el hlak a remchang bok si naw leiin, an mi sukchi-ai khop el. Soiseltu an tam leiin ‘sanatung’ khom ‘sabengtung’ a hung ni nawk a; saringsei khom sanghawngsei.
Tumkau Ni-a ei thukhawchang tam tak thruoitu sabengtung le a bebawma sermon ei thlakhai hi Baibul puo tieng thila ei zeldinna invak vel thlalak a nih. Chu chu iengin am a thruoi a? Ei pal phak tawka ei taksa le thlarau nuna hmang theia ei ngai le Baibul thu kha suizom ei tum lei a ni ka ring. Chu chu Saptronga ‘Life application’ an ti hih a nih. Mani ni tin nuna hmang trangkai thei le bel kop thei thil tieng thlur bingna a nih. Hi thil hi a thrat lai zingin a thrat nawna khom a um. Taksa le thlaraua mihriem a hung pieng le seilien dan ang peiin a nun thruoitu le cheltu dinga a mamaw khom a hung inthlak danglam pei a. Nautesen chu a hringna dinga bu a mamaw ang peia chawm a ngai. Buchangrum a fak thei hmain hnaw lui inla, a taksa’n a la zo naw leiin a sietpui lem thei. Buchangrum a fak thei hnung ruok chun naute bupok chu a fak nuom ta naw a, a hringna chawmna dingin a huntawk bok nawh. Chu chu Baibul thu hrietna le zawmna tienga khom hin a ni inthuk hle.
Chun, sikulah sabzek hrang hrang naupang ruol ei inchuktir hi an lungrilah hrietna a tam thei ang tak tù nghet ei tum lei a nih. Ni tina an nuna an zawm dinga ei dit nun dan thra ei inchuktir a; hrietna bulthrut nghet an rem theina dingin sabzek dang dang ei inchuktir bok. Hrietna bulthrut remna dinga ei thu inchuktirhai chu ni tina an nun thruoitua hmang dinga ei inchuktir a ni nawh. Hrietna bulthrut nghet tak neia an hung inthranglien ei dit lei a nih. A tawpa ruok chu, hrietna, thiemna le varna an inchuk kha a taka thil thraa inra suoktir ei beisei a nih. Kong danga hril chun, chu huna chun thil ei inchuktir kha a taka an hmang trangkai (real life application) ei nuom a nih. Ei thil inchuk le thiemhai thil thra lem intlunna dinga a taka hmang trangkai hi thiemna thiltum tak chu a nih.
Hi hi ringnaa kal ei chawinaa khom a poimaw hle. Pathien thu hrietna indik ringtua tu nghet hmasa phot hi a trul makmaw. An ring ding chun Pathien thu an hriet hmasak phot a ngai. Tirko Paula’n, “Anleh, an ring naw chu ieng tin am ko an ta? Thu an hriet naw chu iengtin am ring an ta? Thuhriltu um loin iengtin am hrieng an ta?...Chuongchun, ringna chu thu an ngaithlaka inthoka hung um a na, thu hrila um chu Isu Krista thu a nih” tiin a lo hril a ni khah (Rom 10:14,17) . Pathien thutak inhrilhriet hi a poimaw hmasa tak. Ringnaa hung inthrangliena kal ei chawi hrat dan ang peiin, ei thu lo hriethai kha Thlarau Thienghlimin ei mamaw ang peia ei hmang dingin einiah a sukhring hlak a nih. Sukhring ding ei niah Pathien thu a um si naw chun iengtin am sukhring thei a ta? Ei nuna ei la pal phak si lo thu chu ieng angin hmang dingin inzirtir inla khom, a hmangtu ding nunin a phak hma chun ieng leiin am sukhringin um a ta? Ringna le inchawi tawk hrietna nei hi a poimaw takzet. A thu hre treu a, thlaraua hringna nei si lo le thlarau mi fet nia inngaia Pathien thu hre si lo hi thil um thei a nih.
Pathien thu ei inhril le inchuk changa threnkhat poimawsak tak chu ringtu nuna hmang ding (life application) dap suok a nih. Threnkhat lem chun Baibul thu inchuk dinga an bitukin an ringna nuna thu a hril dan ziek thla dingin inchuktuhai kha an ngiet bok a. Ieng khom hril lo anga inlang nuom si lohai chun a thu bebawmah maimarawl an thaw a, hmaimanna dingin an phuokfawm thu tam tak an belsa hlak. Chuong ang thu bebawm sermon siemna ding chun ei sabengtung hril lai hi a trangkai khop el. Sienkhom, Pathienin sabengtung a hmangna san le einiin sabengtung besana ei nuna inchuk ding thu ei hmu suokhai hi an inmil chie am ti ruok chu ngaituo tham a nih. Baibul thu ei hriet suol leia zer far duon duon khopa innoa sermon indik lo ei khukpui a tam. Entirna pahni chauh hang hril inla. Pakhat chu Luka 1:46 ‘Ka nunin Lalpa a chawimawia” tia an mi siepek hlak le 2 Korinth 6:1 a, “ama thawpuiin ka ngen chêu” ti hi a nih.
Baibul thu nuom tawka kei fâna mani testimawni le thlung kop ching pawl ei tam. Mi pakhat chun Isu keitho Lazar, thlana inthoka hung suok, a tuomna puon sut dinga Isun a hril anga an sut khah sermon remnaa hmangin, ringtu tam tak ei hrat thei nawna chu ei intuomna thlan puon sut thla loa rongbawl ei tum lei a nih tiin a hril. Awm ve tak a nih. Sienkhom, mihriemin awm ei ti le ti naw hi Pathien thutak innghatna a ni chuong kher nawh. A poimaw tak chu Baibul thu hi a hrieta hriet hmasak phot a a nih. Chuong ei hriethai chu ringnaa ei inthranglien ang dungzui peia trangkai taka ei hmang theina dingin Thlarau Thienghlimin einiah a hung sukhring a, kha hmaa hring hrietnaa ei hriet nek daia inthukin a umzie a mi’n hriettir hlak a nih. Ei thu le hla hriet hmangin thlarau pawlna ei dong a, chu khela chun thlarauin mi a pawl ngai nawh.
Hosana ei la ti zing ding?
Ei thupui takah lut inla. Messia a ninaa Isun Jerusalem a lut ni chun sansuoktu ngaia kum za tam lo thlir tah a mipuihai chun ‘Hosana” tia hnena tumkau vaiin an lo chawimawi a. Chu chu “Tuhin mi sansuok ta rawh leh!” tina a nih. “Hosana” chu sansuok dinga hnina, ngenna, dawvan kaina hla a nih. An khek tuka inthoka ni linaah a khêktuhai ngei khan kros-ah an hemde a, chawhnung dar thumah a hungna san, Hosana’ tia an lo hmuokna le ngenna kha an beisei naw zawng daiha hlenin, suol bawia intang po po sandamna dar vawa hnèna hlado insamin, “Hlen zo a ni tah!” a ta, ni thum nia tho nawk dingin a hnuoi hringna chu a chat thla tah a nih.
Mi po po ta dinga tlanna sin a hlen zo hnung le Ama ring taphotin Pathien nau nina le chatuon hringna an chang thei hnungin, ‘Hosana” tiin ei la khek zing ding am a ni? ‘Hosana’ ti hih Isu hung laia an trong tuolleng hmang Aramik tronga hosi’a-na, Hebrai tronga hoshiana, Latin tronga osanna, Grik tronga hosanna tia an lam, a umzie chu sansuok, sandam tina a nih. Sam 118:25 a,
LALPA, nangin mi sandam la,
Aw LALPA, mi’n hlawtlingtir rawh
tia khan ei hmu a. Chun, Chanchin Thra gospel ziektu paliin an ziek seng bok a (Mat 21;MK 11;LK 19; John 12). An thil zieka chun lawmlutna le hnina thu insam angin an hmang seng. Baibul hmun danga chu a chuong naw a ni el thei. Tu lai hnai hin ‘hossana’ ti hming chawi hla tam tak a suok a. Rimawi tienga India rama hmingthang A.R. Rahman khomin kum 2010 khanTamil film Vinaaithaandi Varuvaayaa-a dingin ‘Hosanna’ ti a phuok a, chutaka chun tlangvalin a ngaizawng a hmua a hlimzie hrilna trongkamah a hmang a. Hi film hi a Hindi Version Ekk Deewanam Tha an siem le tlangzar trum khan a film siemtu Fox Star Studios-hai kuomah thai bo dingin Catholic Christian Secular Forum (CSF) hai chun an nor a nih.
Eini rawi lai khom, Suakliana hlaa “Hosana ti zelin aw, Haleluia Amen” ti dam; Upa Thanga hlaa, “Lei chunga a lawmte chungah rem leng se, Hosana! Hosana! tiin zai rawh se” ti dam; Upa Ralngama hlaa “Hosana! Chungnung berah khian ropui takin awm rawh se” ti dam; Siamliana hlaa “Lal hminga lo kal chu an lawm ta, An lo au, Chungnung berah khian Hosana” ti dam; Pastor Thangngur hlaa “Jeho Jire tlangah hung kai la, Hosana hung chawiin, Salem puonzar hnuoiah” ti dam, “Hei en tu Zion khawpui saw, mi an hung pung khawm, Hosanna hung ti nawk ding am an ni! Lawmna tumkau hlak saw maw, an hung chawi ta si naw a! Hosana rawl a danglam tah, ‘Hemde rawh’ tina in..” ti dam; “A zalna thlan inthim sien khom, Van mihaiin simkhaw leihnuoi an sukhning a, an hung keitho tah; Hnuoia mi le van mihaiin ‘Hosana’ tiin khêk ei tu” ti dam; mitdel hla phuok thiem Lama hlapui ‘Lalberte Lalber’ a, “Lal hminga lo kal chu a lawmawm e, Hosana, Hosana tiin an lo lawm ang” ti dam; Hranglien hlaa, “Hosana, Hosana kha, Hnuoi le vana ropui chu” ti dam, “Hlimin lawm ei tiu, Lalpa hnĕna ropui, Haleluiah, Hosana a hming ropui raw se…. A hlawtlingna le malsawmna ei lo hmuh, A ropui, Hosana, Haleluiah: ti dam; Kâppu hlaa, “Aw ka ngai ie khawpui sunga, Hosana an ti lai kha” ti dam; Lalneisawi hlaa, “Aw, hung lawm seng ro, Hosana Sandamtu” ti dam; Lunzapau hlaa, “Tlung kar nghakhla’n ni tin ka thlir hlak, Angel varhai le chun inpawl tang ei ta, ‘Hosana’ ti’n inpak tang ei tih” ti dam; Luii hlaa, “Lawm hla ropui tak remin, Lal Isu hnĕna lawmin, Haleluiah, Hosana” ti dam le a danga inthokin ‘Hosana’ ti umzie ni awma ei lo pom dan ei hmuh.
Hang bi chieng inla, a umzie ni dinga an hmang dan a khuongruol naw rup a nih. A tam lemin ‘Haleluiah’ ti angin an ngai niin an lang. A thren nawk chun van ram lut hnung khomin ‘Hosana’ tia Tlantu Pathien inpak dingin an inring a nih. Van ram tlung tah hnung khoma ‘Hosana’ (Tuhin mi sandam rawh) tia la khĕk ŭl ŭl chu thil inhmè lo tak ni thei a tih. Isu Krista-in mi po po ta dinga intlanna sin kum sanghni vel liem taa a lo thaw fel vong tah hnung khoma ‘Hosana’ tia la khek zing chu iemani zawnga ngai chun Isu chunga sabengtung inchuongtir ang deuh khom a hoi. Ei Pathien thu inchuktir dan le lak dan hi inbi chieng a trul khop el. Pathien thu anga hringnun fepui ei tum si chun Pathien thua hrietna bulthrut nghet (strong foundational knowledge of the gospel) ei nei hmasak phot a poimaw.
(April 06, 2015, Delhi)
###
No comments :
Post a Comment