Guwahati Diary

April 28, 2008 Thawtranni sunchang, Sardarjihai ‘barabaje’ lai takin kan chuongna IC-879 chu Delhi-a inthokin Guwahati panin a vuong suok a. A thluok a buoi ve naw ni chawk a ta, chawhnung dar hni le a chenve-ah him takin thokâng inlalna khawpui Guwahati kan vuong lut a. Zanah ruo a lo sur nasa leiin boruok khomin za a ngai a, a dam ruom el. Engi le a naunu Rachel-in an mi lo tuok a, thla a ngamin kan hlim hle. Dr. Chongrolien Chonzik in inhoi tak, 3 C Nirvana Enclave, Basisthapur Byelane-3, Regional Passport Office dot chara chun kan tlung a. Kha hmaa mikhuol dûka Guwahati lut hlak kha, tuta trum chu mani sumphuka chuong kai angin kan lut ve tah a nih.

Guwahati hming hi Assamese tronga thu mal pahnih ‘Guwa’ (kuva, areca nut) le ‘Haat’ (bazar, market place) inkopa phuok, a umzie chu ‘kuva bazar’ tina a nih. Hi lei hin a veng lùnna lai tak ni hlak chun ‘Pân Bazar’ ti hming a put hiel hrim a nih. Amiruokchu, anni nêkin an tuolbawm Khasi nuhaiin kuva an hè lem. Anni chun an kut a châng taphot leh an bauah an hnaw lut el chauh khom ni loin pasal le buin an ring nuom deuthaw a ni tak. Khawvela kuva hê tienga anni el thei um sun chu lemchang khawpuia chêng Aizawl mihai an ni el thei. Taksa ta dinga thratna nei lo, kansar invoina dinga kandidet thra kuva khawr ei beng zat hin ei inbeng pasie a, vaihai ei beng hausa thung a nih ti ei hriet si nawh. Bau sen huoma kuva beng tuom tuom mihai hi Pathienin hnam changkang a la siem fuk naw am a ni ding, hmu le hril ding an vang khop el. Sienkhom a du ta ding chun, êk rimsie khom, thil inhnik a ni tlat bok si.

Guwahati-a ka fe hmasa tak chu kum 1964 August thla bul khan a nih. M.A inchûk dingin Imphala inthokin zîng hmângin bus-in Dimapur ka pan phei a. Ka tlung chun rêl chawlna tieng ka pan nghal a. Chu trum chu ka pienga inthoka rêl an ti vet hi ka hmu voi khatna a nih. A tûk, khuontevîkin Guwahati ka tlung a, rêl chawlnaa inthoka hla lo tea um Tribal Hostel ka pan phei a, Chonghnun kawlah ka tlung a, Gauhati University-a admission le umna ding hostel ka sukfel chen ni thum lai ka châm a. Chuong lai chun Gauhati chu khaw chikte, mihriem khom nuoi khat (1961 census) chauh umna a la nih. Kum 2008 ruok hin chu nuoi 12 vela tam mihriem an um ta a, a khuo khom sq.km 216 (83 sq.miles) laia lien a lo ni tah.

Guwahati hi India hmar sak ram lutna kotsuo a ni el bakah tiena hi lai ram hming hlui Pragjyotispura (Light of the East) a put laia ramhuoi (demon) lal Narakashura khawpui lo ni hlak le Hinduhai tienthupui (classic) Mahabharata chena a hming chuong phâk a nih. Kum 2006- U.K. firm-in khawpui inthrang hrathai survey an thaw khan khawvela khawpui inthrang hrât tak 100 an thlang suok lai a thrang ve el bakah India rama khawpui inthrang hrat tak panga laia pakhat ni phak hiel a nih. A’n thrang dan ruok chu a mumal naw kher el. Assam ram khawpuia hmang a nia inthok khan planning fel tak um loa a cham loa an hnaw puom a ni leiin khawpui hmêl sie thlang khawm laia thrang rop chi a nih. Sawt nawtea mi hung thau keng kung, puom lêi luoi, a rik taluo leia inthazo lo, a lungin a hnaw leia harsa taka inthuok phût phût ang a nih. A puo tieng Assamese-hai an inlal hlur a, a sung tieng Marwarihai. Ei Prime Minister ni lai Dr. Manmohan Singh khom hi khuoa inthoka Member of Parliament tling a nih.

Guwahati-ah Sinlung Thar
Kum 1964-66 sung Gauhati University, Jalukbari-a ka kai ve lai chun biek in pakhat mawi tawk Zo hnathlak kan um taa chu in hluoa sungkuoa khawsa ka hriet sun chu University kompaun-a kuartar hluoa um Dr. Lalnuntluanga chauh a la nih. Tu ruok hin chu Hmar hnathlak lekha inchuk ringot khom a za ruola tiem ei um tah bakah in le lo neia inbêngbel khom tam tak ei um ta a, a kum têlin ei pung tuol tuol pei a nih. May 20, 2008 chawhnung tieng khan Lalzar B.Sinate leh Guwahati le Meghalaya inramrina Pillankata le Maikhuli vela ei mi le sahai inbêngbelna le prawzek hrang hrang indin an tumna hmunhai kan sir a, thafàn a um takzet. Hieng thila mi dang po po neka thaw hlawk tak le ram zauh lien tak chu Lal Remsiem hai nupa an nih. Mi thrahnem tawk takin Zaipu T.Khuma anga tinkim an dawn changa an ‘Hmartlangpui’ chu mautam a um ve nawna Guwahati phai ruom hi a lo ni dêr tah.

Pillankata le Maikhuli inkara kan tlàn phei lai chun tlangmi hmel put, tlangval ruol sawmnga bawr vel ding hi lam siema lung thakin an lo hnatlang a. A mi trawiawmtu Treningthang le Lalchawisang chun HSA, Guwahati Joint Hqrs member-hai an ni thu an mi hril leiin an thla la malamin sawt nawte kan chawl a. Pathienin Mosie kaiza vengtu Josua kuoma, “Mosie kuoma ka hril tah ang khan, kea in sirna tapot chu pe vong ka ti cheu” (Jos.1:3) a ti thu kha ka naah a hung inri vang vang a. Mihriemin kea ei sirna taphot le neitu nina ei chel theina hmun taphot hi ei ram a nizie thu hi chieng zuolin ka hmu a. Keini hun lai, Rengkai Road-a HSA bilding thrut rema kan hnatlang lai le tekhin chun, HSA-hai hnatlangna muol le tlang khom a lo dang sawt nuom tah khop el. Ei Talan le Thingchom ramrihai hi hma ei sawn dan ang peiin an inson hla pei ding a ni a, ei ramri khom tawp chin nei lo kawlrawn a hung ni deu deu pei ding a nih. Chu chu Pathien zârin, keini sungkuo ramri kham khom a lo ni hman dèr tah.

HSA-hai hnatlàngnaa inthoka hnai têa chun lam sak tieng muol pawngah in a um a, chu chu Lalzarin prawzek thawna dinga inchawk dan lampui a melkai leiin a hmun kan hang fang a. Chu in khela chun thingtlang nu, tar tieng hnai tah hin an huona behna a lo sik a, kan titi chu a lo ngaithlak kar hi a lo ni a. Iemani chen hnunga chun, “In trong ka hriet vong” a ta, Meitei trongin a sunzom a. Kan hang indon chun, Hmar hnathlak Aimuol hnama mi a nizie le Manipura inthoka hung a ni thu a hril a. Ama chun, “Hung inchaw ngei ngei ro. Mani mihai ngei tuolbawm nei kan nuom a nih” a ta. Kan fepuihai chun ama chu Guwahati-a um ENT Daktor pakhat nu a ni an ring a, an hang indon chieng chun a lo ni tak tak a. Mi hnam karah ei um pha leh ei inhnaipuihai hlutzie ei hriet suok tak tak chauh hlak a nih.

Aimuol hnam zuk hril tâka chun hnam hung insiem dan le inlumlet dan ei ngaituo chìk theina dingin hang sap sa met inla. Hmar hnathlak ei tihai hi British-haiin ‘Old Kuki’ an tihai, Kuki hming put hmasatu tak ei nih. ‘Kuki’ ti hi Bengalihai ei zuk paw hnunga eini rawi kona hming tlanglawna an lo hmang a nih. Eini rawi ruok chun inkona tlanglawn hming ei la nei naw a, pahnam hming vongin ei inko hlak. Kum 1900 laia Linguistic Survey of India haiin British opna hnuoia cheng po po trong hmang an hung sui suok khan, trong inang, unau suopui po chu ‘Old Kuki’ ti hnuoiah an hung sie khawm vong a, chuonghai laia pakhat chu Aimuol hi a nih.

Tuta Mizoram hung ni taa chêng, Sailohai inlalna hnuoia khawsa Old Kuki hnamhai ruok chu damtea hung intêl khawmin, kum 1800 hnung tieng khan Luseihaiin an mi kona ‘Hmar’ ti chu inkona hming tlanglawnah ei hung hmang tran bakah, ei pahnam hrang hrang trong le Dulien (Lusei) trong inchokpola inthoka trong thar hung suok, ‘Khawsak Trong’ an ti chu ei hung hmang tran bok a. Chu trong chu Kristien sakhuo a hung lut khan Gospel puong darna hmangruoah a hung hmang a, ei literechar tronga hmang zui a hung ni tah pei a nih. Hi taka inthok hin HMAR hnam hming le Hmar trong tuolleng, hi lekha ka ziekna trong hi, a hung pieng tah a nih. Chuleiin, ei hnam hming hung suokna upa hle dinga ei ring le hril ang hin a lo upa nawh. Zo hnathlak hnam hrang hrang hai hming khom hi chuong ang chu a ni vong.

Lekha zieka ‘Hmar’ ti hming a chuong hmasakna tak chu 1904-a sut, G.A.Grierson buotsaih, Linguistic Survey of India Vol. III Part 3 a nih. Chu taka chun ‘Hmar’ ti hi pahnam hming pakhat anga ngaiin ‘Old Kukies’ ti hnuoiah a zep sa ve a nih. Hi lai thu hi thri be china ngai lai khom hre chieng lo ei tam leiin hnam insuikhawmna thua ei kalchawi khom nasa takin a sukhnufuol pha a nih. ‘Hmar’ ti hming hi inkona hming tlanglawna hmang pawl an hung um hma khan an chipuihai pahnam tam lem chu a thren thlang tlain, a thren hmar tieng panin an lo inpem daih ta a, a thren chun an pahnam hming chawiin hnam hrang angin an lo insàl hman tah bok a nih. Hi hi thil maka ngai ding a ni naw a, inthiem naw ding khom an ni bok nawh. ‘Mizo’ ti hming tlanglawn hmang thua Zo hnathlakhai ei la khuongruol thei hri naw ang char hi a nih. Hi thil hi a hnawa inhnaw le a hmawa inhmaw chi a ni naw a, damtea ei pom thiem dan ang peia fimkhur taka fepui a ngai. Inhnaw luina a um pha pha leh mi lungril ei sukhel a, a letlingin thil a’n her nuom lem hlak.

N.E. Television le Hmar prokram
April 30, 2008 Nilaini zantieng dar 6-ah Guwahati-a innghat North East Television-a Hmar prokram enkoltuhai inhmupui dingin Dr. Chongrolien Chonzik leh Cachar Hill Tribes Synod Guest House kan pan a. Kan tlung chun ka hei ngha vel a, kum sawmli le kum li lai liem taa a châng chânga kan sir hlak Satribari Hospital kompaun kha hoi ka ti khop el a. Ka hang indon chieng chun a lo ni tak tak a. Hospital thar thra tak tak le bilding ropui tak tak a hung ngir pei laiin Satribari hospital chu chula trû rausan tah ang elin a thring bor bor a. Kha hma khan chu kristienhai hospital hrim hrim kha hospital thra le lùn an ni vong hlak a. Tu ruok hin chu kumthu hrikin a bawm bu ang elin an rop riep vong el ta a, Vellore Christian Hospital ti naw chu hming nei phak khom an um ta mang nawh. Hi hin ngaituo a suksei khop el. Sùt tham a nih.

Ka hang indon chieng chun, Guest House an bawlna hmun khom chu Satribari Hospital kompaun an inchawk thre a lo ni a. Hi hmuna hin hmathlir hla tak neiin kum 2005 khan mikhuol 50/60 inlengna ding Guest House inhoi ve tak el Cachar Hill Tribes Synod (Presbyterian Kohran) chun an bawl a, lu nghatna ding nei nawhai ta dinga tlungna remchang a ni el bakah a hmang trangkai tak chu Hmar hnathlakhai an nih. Hi khêl chara dûm, dung chen chena insang vok fak chi dolin a bawm sip plot khom chu Rev. Chungthang Thriek bubèlpui EFI-haiin an inchawk tah thu an mi hril. Thiempu hnama insâl nuom hlak ei ni bok a, Zo hnathlakhai lai chu Pathien hausakna sor nasa pawl chu ei ni chieng khop el. Thiempu bengvar le hmathlir nei, Guwahati laia inbengbel tuma kaw suot khom ei um nok tah hrim a nih.

Pêng hla loin ei thupuiah kir nawk inla. Kan inhmupui dinghai chu NE Television-a Hmar prokram zing dar 6:30-7.00 inkara suok enkoltuhai Tv. Rohminglien Hmar & Jonathan Lalremruot Tuolor le Nk. Rotharkim & Lalmuanpui Ngente hai an nih. Hi hi Hmar tronga television channel-a prokram nei hmasa tak, North Cachar Hills tienga Hmar Inpui thruoituhai hmalaknaa an suol suok, November 12, 2007-a an tran a nih. NE Television neitu le trantuhai hi Jorhat tienga inthoka hung M. Sinh, Director le a nuhmei Manoranjana Sinh, CMD an nih.

Darkar hni lai kan hohlim sungin prokram buotsainaa harsatna an tuokhai, abikin trong inlet le hmang thua thaw dan ding thra lema ngaihai hril tlangna kan nei a. Anni rawi hi bulsutu an ni el bakah thaw dan kalhmang zamtu an ni leiin, a tira inthoka an thaw thra chun a hnung peia anni hung thlaktuhai khomin an thaw dan thrahai chu an hung som tung pei ding a ni leiin an ngirhmun chel hi a poimaw êm êm a. Chuleiin, ralkanga inthok khoma ka thrangpui thei ve dan kong a um chun, abikin trong inlet dan le hmang dan thuah, thrangpui dinga ka’n pei zing thu ka hril tawl a. Broadcasting thawnaa trong hmang dan ding thra le indik zam le chu chu a bua siem a trulzie thu dam khom ka hril bok a.

An harsatna tak chu prokram buotsaina ding hun an nei tlawm bakah chanchin puong dinga trul an tihai khom an nuom nuom thun theina dinga zalenna an nei naw chu a nih. Zan dar rieta English news an puong zoin zing tienga an puong ding chanchinhai, a lim le an rem khawm sahai chu an pek suok a, Hmar tronga tiem dinghai po chu zan dar sawm hmaa inlet a, a bel rem dan ding siem fel vong a ngai a. Chanchin an tiem ding le a lim an thun tah sahai kha thlak danglam thei a ni naw a, a lima an trong hmang khom an hmang ang ang trongin a suok a ngai a. Chuleiin, darkar chenve sunga Hmar tronga chanchin an tiem suok chiein hun a aw chu minit 15 bâk a tling naw chang a tam hlak a nih. Prokram rurel an siem le bel rem sa chu thlak danglam thei ni naw sien khom trong dang hmanga sei tak tak mi lim hung inlanghai chu Hmar tronga a thu tlangpui puong ni lem sien chu a lo entuhaiin an trangkaipui thei ding a ni leiin, chuong anga thaw dan lampui chu a um am ti dam kan hril tlang bok a.

Hlaw tlawmtea an sor, a entuhai inhnikna tieng zawng chanchin puong sa dinga zalenna nei lo, fumfe taka trening khom pe loa an ruoi top el an ni tawl a, a hmun ngeiah an harsatna ka hang hmupui chu hnam changkang le neinung haiin hnam hnufuol le retheihai an mi sop let dan hmu chieng zuolin ka’n hriet a. An television-ah tribal hnam hrang hranghai hun an mi pek vea chu ei thaw tak chu vaki (parrot) inhràm sin a ni a, insam dinga an ti char kha eini trong sengin ei insam mur mur a, chu chu a ni ringot el. Sienkhom, chu chu ei chantawk a ni mieu bok si. Chuonga vaki inhràm sin thaw phâk dinga an mi ditsakhai chun uong phanain ei la nei nawknghal! Indik tak chun, an television channel-a an thu puong nuomhai eini trong senga ei puongpek lei hin lawmman inzaum tak mi pe ding ni lem awm tak an nih. Amiruokchu, a lien lemin a chîn lem, a hrât lemin a hrât naw lem a neksawrna khawvela hin chuong ang thil beisei chu thil invetthlaka ngai a ni si. Jean-Jacques Rousseau (1712-1778) in, “Mihriem hi zalènin a pienga chu hmun tinah khaidieta thlung a ni si” (Man is born free, and everywhere is in chains) a ti kha a lo indik mâ mà chu a nih.

Sulhnung ramreah
May 21, 2008 Nilaini tuk Sielmata a nu damnaw kan dingin Engi a vuong tung a ngai leiin zing inhma takah Lalzar leh erpawtah kan va’n thla a. Kan hung kir tieng chun kum 1966-a ka suoksan tah Jalukbari-a kan hostel AT-6 ka hung sir malam a, a lo thring bar tah a. A sungah lut loin car-a inthokin ka thlir a, kan nun hluihai chu sinema angin an hung invir let vut vut a. Jalukbari sak tlang inhnuoi tê teah tingdawn kan hang khè hlak a, zanah busuonghai kan inbuttir a, zing kar mess hall-ah kan hang thret a, inhnikti êm êmin kan fak a, vaihaiin an hang intem ve a, inhnik an ti naw taluo leia an pheng sawi sawi lai dam chu mitthlaah a la chieng kher el. Kan hostel-a khan tlangmi 8 kan um a, kan hrohràng a nain kan inti-champ bok a, vaihai khan an mi lo hnàm thei awm de aw! Chuong laia kan ruolhai iemani zat chun chatuon ram an mi lo pansan tah. Khang lai khan tribal tak nêk hmana tlangmi taka vaihai laia chêt kha insuktheina le mani aidentiti kengkawnaah kan lo ngai hlak a. Sienkhom varna lungmawl, ramsa anga ennuoma mani insiemna chauh a lo ni lem ti khawvel lien lem ka hmu hnung hin ka hriet chauh a nih. A huna chu khânga khawsak dam kha a lo awm ve tho chu ning a tih. Kan inzak naw a, mani inzapui nachang kan hriet bok nawh. Mawl hi kongkhata chu a lo zalenthlak ang reng.

Gauhati University hi January 26, 1948-a indin a ni a, India rama university thra pawla ngai a ni hlak a, a la zing am ti ruok chu ka hriet zui ta nawh. Kha hma kum 1980 bawr vel chena Zohnathlak Competitive Exam-a tling zaa sawmkuo chuong kha Gauhati University suok kan nih. Keini hun lai chun Board of Secondary ti dam hi hmar sak ramah a la um naw leiin ka sartifiket nei po po- Matric, I.A., B.A., le M.A- hai hi Gauhati University mi’n hlân vong a nih. Hi University hi thiemna tienga ka aidentiti siemtu le ka nina pei ding bulthrut mi rempektu a ni leiin ka ngaina bèk bék a nih. Chuong chu ni siin, lum ieng ang lai khom thokâng tam leia thosilen hnuoia lekha tiem a ngaina hmun a ni lei amani ding, kum hni zet ka umna a nia chu ka mangah ka hmu nawk ti ka hriet thrak nawh. Sun manga ruok chu, nun hlui ram sui kir châng le fang nawk chângin, ka la sir rop hlak.

(July 12, 2008, Delhi)