Life would be infinitely happier if we could only be
born at the age of eighty and gradually approach eighteen.
-Mark Twain (1835-1910)
Tar hi lungril ram
July 15, 2008 Thawleni zing inhma tak khan ka hringnun kailawn sirbi 69-na chu ka lo hraw suok ve ta a, tu hin sirbi 70-na ka hraw tran mek a nih. Sienkhom, ka kum zat hre lang khom ieng anga upa le tar am ka ni tah ti ruok chu ka hriet chieng nawh. Sekhon tinin ei kum a pung pei a, chu chu tu khomin ei pumpel thei nawh. Upat le tar ruok chu ngaituona le inzom thil a nih. Kuma naupang tê khom a ngaituona puitlingin a upa hle thei a, kuma upa tak khom a ngaituona a la songnawi hle thei. Chuong ang bokin, kuma naupang tê khom a ngaituona a tar hle thei a, kuma upa hle tah khom a ngaituona a la tleirawl hle thei. Ei sawsaiti hi hang bi chieng inla, thralai inkhawmpui nikhuoa dam hin taksa la dawng tak tak, ngaituona ruok chu tar kawngkawi hman tah si, thluok chechâng pei lo le hmang pei lo ei tung khup el a nih.
Upat dan chi hnih a um. Pakhat chu kum tienga upat, kristmas hmang rawn tah tina a nih. Pahnina chu lungril puitling, ngaituona, hrietna le varna tienga upatna a nih. A pahnina hi puitlingna thil le inkop tlat a nih. Upa ta hle, sien khom lungril puitling thei dèr lo le naupang hle si, lungril puitling tak an um. Hi hi thlarau tieng thila khom a nih. Chuong ang bokin TAR ti khom hi a nih. Kum upat tak leia taksa zûr le ongrop tah, sienkhom lungril le ngaituona sawizoi le tuoi thar zing, tleirawl tha inthak lai anga inza zek zek an um bok. Albert Einstein kha chuong ang mi chu a nih. Mosie khom kha ni mei a tih. A thi khan kum 120 a ni ta a, “sienkhom a mit a la chàu naw a, a thâ khom a la chuoi bok nawh” (Deut. 34:7).
Kum 1986-1990 bul chen Rangoon-a ka um laiin Burma Prime Minister hmasa tak U Nu (1907-1995) kha a châng chângin ka’n hmupui hlak a, nau angin a mi en a, kan innèl a, kan titi chang thil hlui tam tak ka’n don hlak a. Trum khat chu, 1987 October khan a kum zat hriet ka nuom a, sienkhom kum zat indon hi ei inhnaipui hle hai an ni naw chun thaw ngai lo thil a ni leiin pehel deuin ka’n don a. “Pu, khuo ka hung hriet thei hlima i hming hi ka hriet bel a ni ta a. Tu hin kei nek hmanin i lungril le ngaituona a chakvakin a la thatho lem a” tiin ka tran té tè a. Ama chun, hmêl hlim deu hin, “Kei hi kum 82 chaua naupang ka la ni a..” tiin a hang tran a, a nuna lam suk lam tung a hraw tlang tah tam tak a mi hril a. Ka zuk hril nuom tak chu, U Nu chu a kum a upa ta a, a taksa khom a chakvak ta naw a, sienkhom a ngaituona a la tleirawl a, tarin a la’n ngai naw a, Prime Minister khom la ni zom nawk a lungril tlat a nih.
Kha hma khan, mihriem thluok hrat vanglai tak chu kum 18-26 inkar sung ni le ei hung upat dungzui peia chau tiel tiel niin hril a ni hlak a. Amiruokchu, hi hin bel chieng a lo dawl nawzie Scientist-haiin an hung hmu suok pei a nih. Hieng tieng thil tu lai hnaia sui nasa tak chu Denmark ram Aarhus University-a Psychologist Lars Larsen a nih. Ama hin Amerikan sipai bâng tah 4300 rikawt a lak khawm a. Kum 20 vêla sipaia an lak hun lai le trening an nei laia intelligence test an rikawthai le kum sawmhni hnunga an rikawthai a khaikhin a. Upa lemhai chun harsatna hrang hrang hnè dan an hriet lem bakah nasa takin trong an thiem lem a, sierkop le thil hisap tieng khom an hnufuol bik nawh ti chu a thil khaikhina inthok hin a hmu suok a nih. Hi a thil hmu suoka poimaw chu, kum a hung tam a, taksa a hung zùr a, thâ a hung chuoi a, sienkhom thluok hràtna ruok chu hmang zing chun a chuoi el chuong nawh, ti chu a nih. Cambridge University-a Speech, Language & Brain Centre-a an lukhaitunu Lorraine Tyler khomin thluok hratna hi taksa bung dang angin a chuoi el nawzie a hril bok. *
Chun, hieng tienga research thawtu dang Dr. John Garry hril dan chun, thralai tam takin upat hun chu rinumna hmasuon dinga inngaina an nei a, chu hun chu inhoi tak le hadam taka hmang dinga inbuotsai nêkin hriselna indoi thrak lo le insûm loin vanglai hun an chèn a, an hriselna an suksiet hlak a nih. Chuong mihai lai chun ruihlo chinghai hi tiem sa thei ning an tih. Hieng mihai hi an nih an chawhnung huna dinga thli an tu leia thli bok sik hlaktuhai chu. Inbuotsaina thra tak neituhai chun an hringnun chawhma tieng nekin an chawhnung tieng an hmang inhoi lem hlak. Chun, mi thiemhai sui dan chun, hlim le nun hmang inhoi le inhoi naw thu hi naupang le upat leh inzomna a nei nawh.
Kum 40 ramri
Nambar 40 hi Middle East le a sevela chenghaiin an hmang inrim hle a, Baibula khom hin a chuong rawn hrim a nih. Voi 40 vuok, ni 40 le zan 40 le kum 40 tihai thil poimaw bi thlieknaah an hmang a. Nova’n kum 40+40+40=120 long a tuk hnungin ni 40 le zan 40 ruo a sur a, tui a lêt a ni khah. Mosie chun a hun Faraw lal inah kum 40, Median ramah kum 40, Israelhai thruoituah kum 40 a hmang a, kum 40 zet Aigupta le Kanan ram inkarah a mihai a thangpui a, kum 40 zet manna ringin an khawsa a nih. Saula (Thil 13:21), Davida (1 Lal 2:11) le Solomon (1 Lal 11:42) hai chun kum 40 seng ro an rel. Mosie (Ex. 34:28), Elija ( 1 Lal 19:8) le Isu (Mat. 4:2) hai chun ni 40 seng bu an nghei. Ninevi khuohai chu ni 40 sung simna hun ding pekin an um. Van tieng a fe hmain Isu chu ni 40 sung a zirtirhai kuomah a um (Thil 1:3). Kum 40 hi puitling huna ngai, hringnuna ramri poimaw a nih.
Threnkhat, abikin khawthlang mihai (western society) chun, hringnun hi kum 40 ei kai tunga inthokin ei hmang inhoi tak tak tran chauh nia ngaiin, ‘Life begins at forty’ ti thukhawchang hi khukpuiin an vor lâr hle a. Hi hi thu indik a ni le ni naw fie tumin tu lai hnai el khan Queen’s University (Belfast) a mi thiemhaiin ngun takin research an thaw a, a lo indik ngeizie an namdet a. Sum tuoka hi study inthawtirtuhai chu Changing Ageing Partnership (CAP) hai, More Insurance Company hai le Britain’s Good Housekeeping hai pawl an nih. An hmu dan chun, kum 40 râl ei kai hin kha hmaa khawsakna ding bu sepa ei lo thokrimna le inbuotsaina hai kha mi tam takin a ra sor tranin, sin nghet chelin, fak le dawn tieng intodelin, a tlangpuiin in le lo sungkuo ei indin hman ta a. Chuong ang ngirhmun, hringnun vanglai vawrtawp tlung hun chu dannaranin kum 46 vel bawr hi niin research thawtuhai chun an hmu a nih.
Chun, kum 40 ral kai hnung hin sex tieng nupa nun a zuoi le zuoi naw global study an thawa chun ram 40 chuonga mi 29,000 neka tam an intarviu a. Chu taka an hmu suok chu: kum naupanghai nêkin kum 40-80 inkara mihaiin nupa khum an hmang inhoi lem. Austrian-haiin an hmang inhoi tak a, Canadians le Swedes haiin an dot. A san tam tak a um a, hi taka hin ei tar lang hman naw a nih. Study dang an thawnaa chun nuhmeiin kum 40 râl an kai hnungin sex an hmang inhoi lem ti an hmu suok bok a nih. Hieng tienga nasa taka research thawtu laia pawl khat chu Social Issues Research Centre (Britain) hai an nih.
Amiruokchu, kum 40 ramri hi ngirhmun hrang hranga khawsahai ta dingin inkhìna indik a ni vong thei nawh. Thingtlang khuoa an thlanmuol ei fang a, India ramin zalenna a hmu hmaa thihai thlan lung ziek ei tiem chun a tam lem chu kum 40 tling hmaa thi an nih. Kum 1911-20 laia India rama mihriem dam kum chok ruol chu kum 20 chauh a ni a, zalenna a hmu lai 1947 khan kum 35 vêl, kum 2008 ruok hin chu pasal dam kum 66.87 le nuhmei 71.9 a sei a ni tah. Chu hman chu khawvela ram 192 lai India chu 141-na a kai phak trawk a nih. Africaa ram iemani zata mihriem dam kum pangngai chu kum 40 hnuoi a la ni zing. A ieng khom chu ni sien, India rama khom hma ei sawn ang peiin mihriem dam kum pungin kum 40 râl kai ei pung deu deu a, ‘Life begins at forty’ ti hih a hung indik deu deu a nih ti inhmai ruol a ni nawh.
Kum valaihai hrivoi
Mihriemin kum 40 ramri a pal lai hi a vanglai vawrtawp a ni thei ang bokin nun konga harsatna dangdai tak a tuok hun a ni thei bok. Chu chu Saptrong chun ‘mid-life crisis’ an tih. Hi thil hi khawthlang sawsaiti (western societies) haiin hringnuna kum valai amanih laihawl an tlung hun, an vanglai hun, an chawhma ramri kâna chawhnung thlangher an tran huna an nuna siksawina hrang hrang an hmasuon thu hrilna trongkam a nih. Hi ngirhmun phor suoktu hmasa tak chu psychologist Carl Jung a ni a, sienkhom ‘mid-life crisis’ ti trongkam sertu ruok chu Eliott Jaques a nih (Death and mid-life crisis, 1965). Kum 1990 bawr laia nasa taka an sui dan chun, hi hrivoi hi kum valai mi zaa sawm (10%) velin an tuor a, chuonghai chu kum 35-50 inkar mi an ni tak. Mi tam takin an tuok huna an hril chu kum 46 an tlung lai a nih. Hi hrivoi hi pasalin kum 3-10 vêl le nuhmeiin kum 2-5 vêl sung an tuor nia hriet a ni bok.
Nuhmeiin hi hun hi a dai ve phak pha leh a thla pal hung boin chawi a hung bàng a (menopause), a hormone a hung tla hnuoi a, a taksaah danglamna a hung um a, damten a vun a hung trawl a, a pangin a zat a, a hlieu vut vut a (hot flush), a ning a’n tel a, thlan tuiin a buok a (cold sweats), a lung a sen inhma a (mood swings), mi a ngai thei nawh. A tawi zawngin, ngai a aw ta nawh. A thrat lai hun, ‘Parte’ ti a hlaw hun kha a hriet zing a, chu hun chu hang ban phak ela hnaiah hmu sien khom hang ban phak ruol a ni ta si nawh. Nal taka inchei hang tum sien khom sir tinah a vun hnaw martu thauhai kha ter putin an hung dawk a, sathua thun dinga nuomna lai lai hang hlep thlak el thei hlak chu a ni bok si nawh. Insawizoi a, bu fa tlawma inhrên chêr hlak chun thauin a hnaw puom vun kha balun inthla thêp angin a hung inchuor hnuk a, ieng anga cream thra nâl inla khom kei tom thei a ni ta si nawh. Inthladaa um mei mei hlak chun a pasal a hîpna kha a ni têlin a kiem bok si. Hi lai siksawina hi thiem taka enkol le siem rem dan hre lo nupa chun kâr an hung nei tiel tiel a, chu thil leia inthre chu khawthlang sawsaitiah an tam em em. Hieng lai huna hin a nih mi tam takin ngui hri (depression) an invoi hlak chu.
Pasal tieng hang thlir inla. Nasa taka a lo thokrimna ra sîkin, in le lo indinin, sum le pai hmang ding khom a hung nei ve ta a. Kong iengkima inthoka thlirin, a phak chin ding ram, a hlawtling le hlawsam ding chu a tlangpuiin a’n lang uor tah. Hma tieng a hnot pei dan ding a ngaituo a. A thaw ding ang a lo thaw naw leia a tlung ding ang a tlung phak nawzie dam a dawn kir a, a’n sir a, a trangkai ta si nawh. Tlangval taka hang khawsak nawk nuomna lungril a nei a, sienkhom a lungril le a taksa an inkhuongruol thei ta si nawh. A luah kelsam a hung tro a, chu chu sam sukdumna hmangin a la thup thei. A sam a hung tril a, a chal a hung sei a, chu khom chu sam lem hmanga thup thei a la nih. A hmai a hung zùr naw leh a thau leiin a bieng hung inbawr a, a phìng a hung inbèl a, a zâng a hung inkûl tran a, a hung intha zo naw a. Chuonghai ruok chu ieng hmangruo hmang khoma thup thei a ni ta nawh.
Hi huna hin mi tam tak chun an tleirawl le tlangval hun an nuom anga hmang thei loa an um kha phuba lak tumin, hleihluokin an che a, zu le nuhmeiah an inhnel a, mi hang ep theina zawng incheina thuomhnaw, car, motorbike, mobile le thil tlereu man tam tak tak inchawk an ching a, inlang tlangval nawk tumin nasa takin an taksa an sawizoi hlak. Siemtuin mihriem a’n din anga a fe ding her danglam tuma ramtrang pawl an nih. A ni dan ding anga thiem taka pomtu le chuong anga hringnun khaltuhai ruok chun mid-life crisis hi an nei tlawm bik niin an lang. Ieng khom ni sien, a la tuok dinghai khomin hi ramri hi thiem taka kân dinga inbuotsai ei ditpui a nih.
Kum 60 ramri khelah
Kha hma khan Central sorkara thoktuhai thok chen dinga ramri an khang chu kum 58 a ni a, chu chu kum 1999 lai khan kum hnia suksei a ni leiin kei khom ka sikul kum angin kum 60-ah 2002 khan ka penson a. Ka penson hin ka kum tak ruok chu 63 a ni tah. Kan naupang lai chun kum 40 kai tah chu upa el khom ni lo, tar ang hiela kan ngai hlak a nih. Ka kum zata upa lem chu tar el khom ni lo, tar kawngkawia kan ngai a nih. Chu chu kan naupang lai huna mihriem dam kum pangngaia sut chun thil mak a ni naw hrim a nih. Amiruokchu, damdawi tienga mihriem thiemna a hung pung pei ruolin mihriem ei dam sawt deu deu a, ram hmasawnhai chun penson kum khom hi 70-ah an son hla ta a, chu chu India ram khomin ei la hung thaw vak ding a nih. Mosie ramri khang chu “kum 70, hrisel leiin kum 80 khom” ti a nih (Sam 90:10). Hi hi ei Baibul inlet hmasahai khan “hratna leiin kum 80 khom” tiin an mi siepek a. Sienkhom, ‘hràt’ hi dam sawtna ni loin ‘hrisel’ hi a ni lem. Chun, kha hma, Tuilet hmaa mihai ta dinga Pathien ramri khang ni awm chu kum 120 a nih (Gen. 6:3). Chu chen chu Mosie khom a dam a nih. Amiruokchu, Nova kha kum 950, Tera 205, Sari 127, Abraham 175, Isak 180, Jakob 147 dam vong an nih. Mosie ramri khang khom hi mihriemin hma ei sawn le sawn naw dungzuia a tlangpuia indik chauh a nih. Chuleiin, Genetic research tienga hma ei hung sawn pei ruola Pathien angpuia siem ei nizie ei hung hmu suok phak ang peiin, Methusel nêk daia dam sawt khom ei la hung um thei a nih ti hi ring inla.
Kum 60 ka tling hnung, sorkar khomin a mi’n chawltir hnung, kum 2002 May-a inthok khan ramri thar poimaw tak ka kân a, prawzek thar, mihriem ngaia chu huphurum deu el, ka lut chil a, chu chu Baibul pumpui, bung 1189 le chang 31,101 a sei mani ngeia a thar hloka inlet le le sut suok vong le chuonghai chu a bua khawla insuttir a nih. Ni tin darkar 12 sin ka thaw chun inletna, sutna, endikna le a bua sut dinga buotsaina dingin kum sawm sung zo thei dinga inringna ka nei a. Chun, chu sung chun, ieng angin buoi lang khom, kar tin Delhi Thurawn-a insuo ding artikul ziek dingin ka’n bituk bok a. March 28, 2004 khan Thuthlung Thar, Sam le Thuvar inkop chu tlangzar a ni a, Baibul pumpui chu October 7, 2007 khan tlangzar a ni bok a. A hung suok meu chun phêk 1686 a sa le thu mal 8,65, 754 a tam a nih. A hmasa le a nuhnung sutna hin Rs. 15 lakhs chuong a lut a nih.
Baibul inlet le sut ka buoipui hun kum nga sung (2002-2007) ka hmang ral dan ka hang thlir kirin, chieng taka ka hriet thei chu Churachandpur tieng in bawla kum khat chuong kan thang lai le kum 2006-a thla ruk kan nauhai kana Wellington, New York le London-a kan inzin lai a ni el. Kum thum le a chenve sung, Baibul inleta ni tin darkar 12-16 hun ka hmang lai kha mit khap kar lo anga liemin ka hriet tlat chu tie! Tu hin Baibul, a khaw lai chang khom hi ni sien, abikin thu khir deua ngai footnote-a hrilfiena kan siehai dam ka hang tiem nawkin, iengtin am, iengtik hunin am le ieng theina am hmangin hieng hi ka lo thaw thei a na ti hi keima le keima zawna ka’n don rop hlak chu a nih. Hi hi a taka paltuhai chauh naw chun a umzie tak hre kher naw ni hai. Ka hringnuna ka thil buon po po laia buon harsa ka ti tak ka buon hun kha inhoi ka ti hun tak a nih. Chu chu a makna a ni a, amiruokchu thil mak a ni nawh. A tonhriet nuom vehai chun a taka thaw ve dingin ka’n fui a, chu chu ka piengcham thilpek inhlan ve a nih. Ring nghet ding chun a tak taka tonhriet a ngai.
(New Delhi, July 19, 2008)
No comments :
Post a Comment