Hmathlîr Hma Thlìr

Hmun ser am lo ni tah,
Kan siengna hnuoi ram hi!
- Thangngur

Delhi, August 1, 2008, Zirtawpni. Ka ruolpa Lal Thanzau Pudaite damnaw kanin Metro Hospitals & Heart Institute-ah ka fe a, chawhma po ka um a. Churachandpur-a inthoka Tipaimukh fena lamlien ang ela a thisen fena dawt pakhat, zaa sawmriet vel hnaw ping tah chu hol fai dinga operation room-ah an tol lut hnungin sun dar 12:30-ah in tieng ka hung inlawi a. Ningani ka la sawn zing kha Zirtawp a lo ni tah zing ti chanchinbu ka tiem leh ka hriet suok thut a. Delhi Thurawn-a ding artikul ka la ziek hman naw thu chu ka na dâra hung inri hmasa tak a nih.

Phingtrâm hre fu chang loin, ka computer hmaah ka thrung chot a, ieng thu am ka ziek ding ti khom ka la ngaituo hman hmain ka mail hang en phot chu makmaw-ah ka ngai a. Ka hang hong chun mail thar 28 zet a lo um hman a. Chuong mail hrang hrang laia mi barakhaitu chu Manmasi Year Book Editorial Board-in, ‘‘Hmarthlir chawl Phawt” ti July 31,2008, zing 08.09-a a hung thon an hung thluoina thu a nih. Hi mail hi ka hong hlim chun Hmar thlir hi chawlsan ka la tum naw leiin tiem zom loin ka maksan a. August 1, 2008 a mi dang dang, abikin Lalchungsiem Thlawngate hung thluoina le Vulmawi Riengsete intiin a hung lepsèna ka hang tiem chun Adviser ka nina chanchinbu poimaw HMATHLIR thu a lo ni zing ti ka hung hriet a, poi ka ti takzet a.

Chuonga mit naulêng anga ka lo en ve, ka artikul an insuo nuom taphot chu a hrana hni buoi ngai loa insuo thei dinga phalna ka pek chanchinbu suongum tak el sikiekin a kei tah chu tiin thil chinchang hriet tumin boruok fawnah ka antenna ka hang rol insang a. Vulmawi Riengsete (VR) hril dan chun HMATHLIR a chawl el san chu a buoipuituhai hi career siem tuma thrang la mêk, sinpuia la nei hman lo, mi dang hmang tlâk tak tak an la um si naw lei niin a hril a. A hril chu iemani chenah thu dik a ni lai zingin, khanga tleirawl tha inthak vanglai ang ela chanchinbu inthrang uok uok ni si a hang kulcho thut el chu iemani kong zawnga ngaituo chun a tlawmthlak a, inzak a um bok a. Chun, an sut nuhnung tak kawpi 3000 lai zet sem dok thei loa an um hnunga HMATHLIR hi sunzom thei hri lo a ni ding thu a hung inri chauh leiin, zawngtra hme tûka inhnawm chu ei zawngtra hme thup thei a ni naw ang elin, thil rimsie le inhnok iemani ur le chim buoi leia tlu bul el a ni le ni naw dam lungrilin a dap nghal a. Saphai thuvar, ‘Once bitten, twice shy’, Hmar tronga ‘Khauhlâng ben threlh,’ Lusei tronga ‘Chukchu ben threlh’ ti angin, kha hma meta kam zalenna hup bet a, mi pakhat khêl hril ippui trâl nuom pawlin mi thu dik insuo ding dang an tum tlat leia Delhi Thurawn, June 1, 2008 a suok ding a suok naw pha dam kha ngaituonaah a la thar bok lei khom ni mei a tih. Chu indona, Satanic Verses vs. Angelic Verses chu thil thar a ni naw a, hnuoi insieng hma khoma lo intran tah hrim a nih.

Boruok fawna inthoka chanchin ka lo dong dan chun, HMATHLIR insuo zom loa chawl hri phot dinga an tina san laia pakhat chu Saikot Damdawi lei a nih. Lalchawilien kansar damdawi tia hriet làr hi a hung hmingthang phing leh a siem trantu nina chu Lalchawilien unaupa Darhminglienin a hung inchu ve a, chu thu chu chanchinbu hrang hrangin anni pahni ngei intarviuin tam tak an ziek ta a, kei ngei khomin chuonghai chu voi tam tak ka tiem fuk tah. Chuong chanchinbu hrang hranghai laia nasa taka suia hi damdawi chanchin le a bebawmhai inlai taka kim changa a thlalak le hung insuotu chu HMATHLIR a nih. An insuo zat po po hi chanchinbu liena thil vor larna dinga insuo man ang huin hisap inla, maktaduoi tam man ni tang a tih.

An hril dan chun, HMATHLIR July thla suoka khan SMS message an hmu pakhat chu Letter to the Editor-a insuo ding sawnin an insuo a, chu chu tharum khom thaw nuom hiel khopa ngai thei naw pawl an um a. Chuonga thil a um tak si lei chun, a message thontua ngai chun Sinlengnews Administrator kuomah July 12, 2008 01:09:49 pm khan SMS-in hieng ang hin thu a hung thon a: “Pu Administrator, A hnuoia thu hi i mobile news a min suo pek di’n ka ngen che. HMATHLIR JULY 2008 issue vol-ii, No.13, pg 5, Letter to Editor a CANCER DAMDAWI HMUSUOKTU MAW? ti thu, kei Joseph L.Infimate Rengkai hminga inziek kha ka hrietpui naw a. A magazine hi lekha ka thawn naw hrim2 a nih. Joseph L.Infimate Rengkai 9862828806” tiin. Hi taka thu inzieka hin Upa inti ve meu sia Darhminglienin kansar damdawi hmusuoktu nina a hauh ve el chu mak a ti thu chu SMS thontua ngai hin a ziek a nih. Chu thu theida pawl chun tharum hmang hiel khom huomin HMATHLIR buotsaituhai chu suosalin an vau a, an ofis-a July 2008 suok kawpi um po po chu an lakpek bakah Shillong tienga zor dinga an lo thon tah chen khom zor loa hnuk kir vong dingin thu an pek ti thuvuongva a um bok a.

Hi thu hi thil thar a ni nawh. Ziektu hrang hrangin kha hmaa Lalchawilien le Darhminglien trongkam ngei an hung ziek le hienga Pathien hming lam ve ve zing puma hmusuoktu nina inchua an thu a hang inkal el hi mak an ti thu an insuohai kha kei ngei khomin ka lo tiem ve a, poi ka ti thei hle a. Anni karah buoi naw hai sien khom, hi damdawi hmusuoktu nina Patent Rights hi nuompawnga hmu el thei a ni naw a, a dan ang taka thaw a ngai a, an hmu suoka inthoka kum khat sung ngeia Priority Rights hauna dingin hnina siem a ngai a. Chu khom chu an hnina lekha an peka inthoka thla 30 hnungah an ngaituo tran ding chauh a nih. A hmusuoktu nina hauh dingin sirbi pathum hraw thleng a ngai a. Chun, India ram sunga dingin Patent Right lo hmu khom ni tah hai sien, chu chu international level-ah pom a ni naw leiin World Intellectual Property Rights Organisation (WIPO) hnuoia um Patent Cooperation Treaty (PCT) hai kuomah an naw leh Paris Convention fe thlenga hnina siem a ngai a. Chuleiin, anni unau kara hmusuoktu nina an lo inchu ringot hin umzie a nei tlawm a, thrangpuitu thra tak neiin Patent Right an hmu thei khom lo ni tah reng sien, anni dam sunga an hmu chu ka ringna ni loin ka thil hrietnain a phak ve nawh. An lo hmu pal a ni khomin Patent Right hi kum 20 sung chauh dai a ni a, kum tina a fee sunga renew a ngai. Hi thua ni khat laia N.S.Hemam ziek ‘Writing on the wallL: hits and misses of Saikot medicine!’ ti dam kha ngaiven tlak a nih.

A ieng po khom chu ni sien, mi tam tak dampui Saikot damdawi chu HMATHLIR vui liemna dinga tûr pakhat a lo ni pal chun thil poi tak le vangduoithlak tak ning a tih. A vui liemna dinga hmangruoa thrang an lo um a ni chun, hieng thil hi ramsa rorelna (law of jungle) lekkawtuhai nungchang le khawsak dan a ni el bakah India dan an bawsiet a nih ti an inhriet a ngai a, an thilthaw hi thil varthlak a ni nawh ti an hriet a thra bok.

Chun, Joseph L. Infimate hin a ngaidan a lo ziek khom lo ni ta hrim sien a zalenna a hmang a ni el a, ieng anga inti Upa khom ni hai sien, an nungchang le thilthaw miin a ngaisang naw thu a hril chu a thieng a, mi sukhmingsiet tum lieu lieu leia a thaw a nih ti fie a ni si naw chun, India dan hnuoiah ieng law thei ni kher naw nih. HMATHLIR-in Letter to the Editor-a a lo insuo khom chu ieng khom thaw suol a nei nawh. Letter to the Editor-a ngaidan an hung insuohai hi Editorial ngaidan ni loin a ziektu ngaidan a ni lem. Chun, tu lai internet khawvela hin boruok zai hmanga thu inthon ei ni tah leiin thu ei hmùna source indik le indik naw khom fie el thei a ni bok nawh. Hi SMS hi a ziektua ngaiin HMATHLIR a hung thon tlat leiin, Letter to the Editor-a insuo ding ti kher naw sien khom a’n suona hmun ding indik takah an insuo a na, ieng khom thaw dik lo an nei nawh. A hnungah dawi inchu a, a thu a tran ngam ta naw a ni khomin, a depdenaa chun HMATHLIR-in maw a phur ding a ni nawh. Thupha chawi a nuom thu HMATHLIR editorial board kuomah a hril a ni chun, an nuom leh insuong an ta, an nuom naw khoma thaw lui thei a ni nawh. Insukhmingsietna thil (Defamation case) a ngai an um a ni chun Court-ah thubuoi put lut an ta, insukhmingsiet tumna lei lieu lieua insuo a nih ti sukchiengna a um si naw chun HMATHLIR-in thupha a chawi amanih ngaidam a hnina san ding a um nawh. Hi thuah hin insukhmingsiet sap khom a ngai nawh, vantlang mitah an hming a se dêr ta a, iengkim hretu Pathien ngaia lem chu se chieng hleng a tih.

Chun, chanchinbu amanih lekhabu amanih sut tah, sem dar lo dinga norna leia sem dar lo amanih le rawng taka suksiet amanih raw hmang hi mihriem zalenna hnawchepna a ni el bakah Pathien hmusitna a nih. Hienga thawtuhai hi dan anga police-ah ripawt a, immantir tlak an nih. German hla phuok thiem Heinrich Heine (1797-1856) chun, “Lekhabu an rawna taphota a tawpa an raw ve chu mihriem an nih” (Whenever books are burned men also in the end are burned” a lo ti el bakah John Milton (1608-74) chun, “Who kills a man kills a reasonable creature, God’s image; but he who destroys a good book, kills reason itself, kills the image of God, as it were in the eye” (Areopagitica) a lo ti bok a nih. Chuleiin, hnawchepna leia HMATHLIR hi tawp hri a lo ni pal chun ramsa lungril put ve lo le hmang nuom lo taphotin hnawcheptuhai chu thiem naw inchanga ei hnawl ngam a ngai. Mi suol hnawl ngamna hi Isu mizie putna a nih.

Chanchinbu thra buotsai le enkol hi thil hautak a nih. Fimkhur a ngai a, fimkhur seng khom a’n tak. Ni tina hrietna thara mihai chawmtu le hma tieng an pên pei dan ding lampui kawkhmutu chu chanchinbu a nih. Hnam damna le aidentiti innghatna pakhat chu trong a ni a, ni tina trong sukhmasawntu le sukhausatu chu chanchinbu a nih. Chanchinbu thra le hmang tlakin a chawm zing ram le hnam chu tui luong dem demna vakama huon angin a hring thra a, chawl loin ra thra a’n suo hlak. Chuonga thu le hla thra le bengvarthlakin a chawm ve lo ram le hnam ruok chu a trawl bor bor a, sietna thli le pilvutin a nuoi zing a, nunrawngna, inpawngnekna le hriemhrei an inlal a, ramsa angin mani le mani an inse hlum a, umna tlak loin ram an inchangtir a, a tawpah an riral hlak. Ei rama rawmau intam neka mautam trium lem le pangzatum lem chu hrietna mautam hi a nih.

Kum 2007 October 11-14 khan Senvon-ah inkhawmpui hmangin ka fe a. Hi khuo hi Hmar Biela khaw lien tak hle hlun tak ni rop hlak, Gospel meiser ruola hrietna meiser hung lutna kotsuo a nih. Sienkhom, an inah ei hei lut a, lekhabu hmel hmu ding a vang êm êm a, an nei sun chu Baibul a ni deu ringot el. In iemani zata chanchinbu an tiem mol mol ka hmu chu HMATHLIR a nih. SAWRTUI magazine khom hmu ding a um zeu zeu. In 400 chuonga insâl an nia chu chanchinbu pakhat khom an nei nawh. Kan cham sungin mi tlawmngai threnkhatin chanchinbu insuo zom an nuom thu le a herna khawl an nei naw thu an mi hung hril a, Aizawl kan tlung hnungin kan ruolhai kuomah lo thon dingin kan hril a, an lo thon a, kar tin chanchinbu phek hnia sa chu an sut tran a. Amiruokchu, khaw sunga pawl le pawla inkhing pawlin thu indik nia an hriet an chanchinbua an insuo chu an dit naw leiin buoina an tuok zing thu a’n khat tawkin telefawnin an mi hung hril hlak. Huoisen taka tran bik nei loa thudik hai lang pei dingin ka’n fui tawl bakah, “A hranin khawvela hin zawlnei an hung inlang ta naw a, huoisen taka thudik puong lang ngamtu chanchinbu enkoltuhai kha zawlnei aiawtu in nih” tiin ka hril zie a nih.

Chuonga zawlnei laia a pukhawi deuthawa ei nei hman tah HMATHLIR a chawl el ding hi inpâm a um dan le a poi dan an inchen rongin ka hriet. Chawl sawt loa an insuo nawk vak beisei inla. Chanchinbu chatlak loa insuo ding chun invêtchiltu le inpe zo mi iemani zat um a ngai. David Buhril le kan thuthlung chu dama kan inthuok hlêp hlêp thei sung po chu Delhi Thurawn sukhring dinga thrang lak a ni a, chu ding chun kar tin zan khat vel chu kan khawvarpui zie a ni deu tak. Chuong ang bokin, chanchin la khawmtu le sut dinga buotsaituhai khomin kar tin zan khat chu an khawvarpui a nih. Chanchinbu laia DT hmang trangkai tak chu HMATHLIR a ni a, simbuthut par khom be chul hman loa nunrawngna le mawlchona kut tuora a hang kulcho el ding chu inpâm a um takzet a nih.

Chuleiin, Sinlung tlangval, kei ka nih inti ngam taphot chun tlawmngaina le thrahnemngaina dier kei sing a, ‘Takchapa’ tia HMATHLIR sunzom dingin inchawm suok ei tiu khai. HMATHLIR hmathlir hi bui mei ang mei meia tawi ni lo a, khamhrui anga sei le a tuihnâng khom khuoizu anga thlum le inhnik ni zing dingin thaw ro, indin thar nawk ei tiu. ‘Hmathlir’ ti hi ka trongkam ser suok a ni a, ka ser anga a hming umzie put zo dingin ka dit a, chu chu ka trongtraina a nih.

(August 1, 2008, Delhi)