Ka Biekzinna

(My pilgrimage)

There are many truths of which the full
meaning cannot be realised until personal
experience has brought it home.
- John Stuart Mill (1806-1873)

‘Sakei triin sakei an tuok’ ti ang el khan, kum 2007 October 12-14 sunga Senvon-a Hmarram Kristien Thralai Pawl Inkhawmpui Voi Khatna hmang dinga Delhi-a inthoka kan suok trumin, Aizawla kan la thang mek laiin airuo chingin a mi nang tran a. Naupang trap khuoihnâng thaw ang elin, sawtnawte a hung inâng uouin, a hul tran ding chauin a hung sûr nawk pei a; Senvon-a kan chàm sung le Aizawl kan tlung nawk chenin mi’n thla zâi a rèl nawh. Thingtlang lam khokrok, por inthluok le inchêpa airuo ching hnuoia inzin chu ei pieng hma kha ei ngai rum rum el a nih. Zana ruok chu, rangva inchung hnuoia zâl ei ni lem chun, airuo tla hmer hmer riin imu a sukhnik zuol a, mang sawng a mi’n mangtir a, thil inhoi an hril laia pakhat chu a ni ve hrim hrim. Sunah fe suok loa taptebul kîl trai a, zeupuok zêu a, titi bawraw sep dam khom kha tie!

Tu kum 2008 khom airuo ching nang nawk tum ang elin Delhi tlanga inthokin October 15 zing dar ngaah Indigo vuongnaa suokin Imphal tieng zingbu kan hang hnot a.

The Lost Horizon
Favang hnukhawi tieng, sûm tui paihai khom kawl bula an inrel hmang hnung le thlasik trieusum an la hung inlang hma si a ni bok leiin, dâltu um loa hlim sura zîng ni hung suok chu a mawi hle a. Hmar tieng ei hei thlir a, imu inhnik taka in bur bur ni awm tak Himalaya tlang pheia tlang insi khup, ieng lai khoma vûrin a bawm zing hai chu ni zung mawiin a hang ‘kiss’ tawl chun lawmin an hung tho sung sung a. Mount Everest, Kanchenjunga, Lhotse, Makalu, Anapurna, Nanda Devi le tlang dang danghai chu an inlang chieng hle a. Himalaya vur ram, khawvela hmun insangna tak hi Asia rama vadung lien le poimaw po po deuthaw intranna hnar le chuong vadunghai chawmtu, mihriem tlukledingawn li lai damna hnukpui chu a nih.

Hieng lai hmun fienriel le rè, Tibetan Buddhist-hai thusima an khawpui indin Shambala, anni ta dinga Eden huon chu sirsana hmangin kum 1933 khan James Hilton chun tienami, Lost Horizon a ziek a. College kan kai laia hi tienami ka tiem chu ka hriet suok a. Suongtuonaa a Shangri-La indinna hmun ding dam ka dap vel a. October, 1971 lai Sikkim-a kar ruk zet military training/attachment kan nei lai dam ka hriet suok bok a. Hi trum hin India le China ramri Nathula Pass kan sir bakah Sikkim hmar tawpah kan inzin bok a. Himalaya vur tuiin a chawm Lachen vadung (29 km) le Lachung vadung (23 km) khel hmun pilril kan sir a. Hi vadung pahnihai hi Yumthang (Chungthang) ah an infin a, chu taka inthok chun Bengal rama luong thla Teesta vadung ti hming hi a put tran tah a nih. Motor fe theina chen bakah vurin a bawm sip tlang insang tak tak, van sikin to trokin an ngir fuk a. A khat tawka vur hung chim thla ri naw chu ri dang hrim hriet ding a um nawh. A boruok a’n thieng a, a re vong vong a, mi sukbuoitu le zarbuoitu thilhring le hrik an um naw a, ngaituona khom muong takin Siemtu leh inpawlin a angsungah a chawl a. Chu trum chun a nih, Shangri-La umzie ding awm ka man phak ve chu nih. Piengtharna chi khat chu a ni ve hrim hrim.

Black Day Guwahati-a inthoka Imphal inkar, minit sawmli chuong hret kan vuong lai chun tlangrama chenghai fakzongna hautakzie hmu chieng zuolin ka’n hriet a. Van sanga inthokin zuk thlir inla, tlang lo neia fakzong an la tam êm êm a. Rawmau tamna taphotah inhmai ruol loin mautam sulhnung a’n lang a, saruokin an ngir fuk el a, mak tak a nih. Ei ram hluo, abikin tlangram hi bu le bâl chìngna ding nekin thil dang trangkai lema hmang dinga khuonu ruot niin a’n lang a. Chuong ang taka ei hmang thei huna a la’n hoi dan ding dam chu ka suongtuo a. Tu chena thiemna ei inchuka hin ei ram leilung a nina ang taka hmang hlawk dan le a sunga thil umhai hmang trangkai dan a la thrang ve naw niin ka hriet a. Chu thil chu ei inchuk fuk pha leh ei ram ta dingin ei thiemnahai hi ei hmang trangkai tak tak thei chauh ding a nizie dam chu ka ngaituo neu neu a.

Chu ngaituona rama ka cheng lai chun, nuom hun huna a’n hman hmanin umni kham an puongna khawvel (a world of bandhs) ah kan lo chuong lut hman der a. A hming chawi put zo takin, helpawlin ni ser ‘Black Day’ an puong ni a lo ni a, Imphal chu khuoibu rausan ang elin a re thrup a. Dr. L. Fimate, Director, RIMS vengtu kawmandawhaiin motor pahnih thruoiin an mi hung lak a, Checkon-a Dr.Thari kuartar-ah an mi thak a, Churachandpur ban tum kha iruonba khawpui Imphalah kan riek tah lem a nih.

Hi ‘Black Day’ hi kum 1949 October 15-a Indian Union hnuoia Manipur a lut ni champha a nih. India ramin zalenna a hmu khan British Sorkar opna hnuoia um ram hrang hrang neitu Rêngpui zaruk neka tam chun an inlalna ram seng Indian Union-a lut remtina thuthlung an ziek a, chuong laia India aiawa ziektu chu Deputy Prime Minister & Home Minister chel kop Sardar Vallabhbhai Patel a nih. Kum 1949 September khan Manipur Reng Maharaja Budhachandra le Sardar Patel khomin India rama Manipur lutna ding thuthlung an ziek a, chu dungzui chun October 15, 1949 khan Manipur chu Indian Union-a lak lut a nih. A ram mipui ditthlangna khom rawn loa an Rengpan an ram zalenna a lo inthla suok el chu thrangtharhaiin poi an ti hnuhnaw a, a champha hi Sùnna Ni (Black Day) ah an puong a, an inser hlak a nih. India ramah lut loin, anni le anni inenkol dingin India khan lo maksan pal tah sien, iem an chang top ding ti ruok chu ngaituo ngam khom a ni nawh. Khuongbai tienami chu nêpte ni mei a tih.

A ieng khom chu ni sien, ni thra le ni thra lo, vangnei le vangduoi ei ti hi a nia ei chunga thil tlung zira ei lo ti mei mei a nih. Keini sungkuo ta ding ruok chun hi ni Black Day-a an inser hi kan naulutir Margaret Thangmawi pieng ni champha a ni leiin lawmna niah kan hmang hlak. Kristien ram tam takin nambar 13 le zirtawpni intuok fuk dam hi ni vangduoi tawpkhawkah an ngai a, sienkhom sui chet chun bel chieng a lo dawl naw khop el. Kristien taka sui khomin, Isu rawia zanbu nuhnung tak an kil trum khan zirtir 12 le Isu an ni a, a 13-na chu Isu a nih. A zinga an hemdena ni kha Zirtawp a ni a, chu chu a hung san ropui taka a hlenna ni, hnèna hlado a’n samna ni, van le khawvel inrema an infawp thei nawkna ni, ni po po laia ni vangnei tawp a nih. Roman Catholic hmunpui Italy mihai chun nambar 13 hi nambar vangneiah an ngai a, nambar 8 hi nambar vangduoiah an ngai thung. Amiruokchu, Hinduhai le Buddhist-hai nawk thung chun nambar 8 hi nambar vangneiah an ngai ve tlat a nih.

Nunhlui inhnung keithotu
Sulhnung fanga biekzin chu inhmaw loin, a remchangna muol muolah chawla nun hlui liem hnung thlir kîrin titi sep ei ti aw.

Erpawt-a inthoka Imphal sak tienga um veng pakhat Checkon pana kan tlan lai chun Keisampat Bus Station le inepa um, kum 1959 March-April laia Matric ekzam dinga kan insingsat laia kan in hluo ni awm tak, rangva in trop phan el chu in ropui lem le thra lem chep de karah ka hmu a, lung hlui a sukleng vong vong a. Hi in kan hluo laia ka chunga thil tlung pahnih, ka mitthlaa la cham zing pakhat chu ka hla phuok a nih. Ka mangin khawvel tawp a lo tlung a. Van tieng pana hlim taka kan fe lai chun mi tiem seng lo, lawra um ve lohai chu ka zuk thlir a, ka lung an sukna êm êm a, ieng khom thawwpek thei ka nei ta bok si nawh. Hnuoi chu thlaphang le beidong inrûm riin a tuom a. Ka zing tho chun ziekfung ka lak a, inngaituo lawk khom um loin,

Lalpa hungna ni ding chu a hnai tah,
Ropuina ni ding chu a hnai tah;
Inzo ro, hun lawmum ei nei sung hin,
Hun khir tak a hung tlung ding a nih

ti hla, chang ngaa sei chu baihat sa angin a thlûk leh ka ziek thlak mol mol a, hla pawla sak theiin a pawl kimin ka siem nghal a. A hun lai chun sak a hlaw ve hle a, All India Radio-ah kan khum bok a, hla inlar a kai ve phak niin ka hriet.

Pahnina chu sierkop kan inekzam ding hma zana ka mang a nih. Hi kuma ekzam hin sierkop a nuhnung takah an sie a. Kum dang ang bokin sabzek danga chu ka tling vong ding ti ka hriet a. Sienkhom kum hni zet sierkop leia Matric tlol tah ka ni leiin ka lung a chawmchawrok a nih. Zanah ka hang in dier dier a, ka mangin ekzam hall-ah ka lo inthrung a, zawna an hung sem a, don thei pakhat khom ka nei naw leiin beidongin thlan tuiin a mi buok a, ka thranghar a. Ka hang in nawk chun ka mang pangngai bok chu ka mang nawk a, ka thranghar nawk a. Chuong ngot chun zan khawvar imu dukdak hmu loin ka um a.

Chu tuk chun phak deuin, phûr lo zetin ka tho a, ka bauah iengkim a khaa ka hriet leiin rùn dâl chauin bu ka fak a. Lu rik bûrin, tuolthattu, an khaihlumna ding hmun pana a fe ang elin kan ekzamna hmun ding, Rengpa tuola um Rajadumbra High School tieng chu ka pan a. Zawna an hung sem lai chun ka zaper tha chu sikinhninga tet ang elin a’n thin der der a. Hieng ang hrim hin Keivompa hi ka la zâm ngai nawh.

Zawna ka zuk tiem chu le, ka mang an naw leh ka mit invai ka sawn a. Ka mit ka hang nuoi a, ka hang tiem thra nawk a. Tharuma ka pawng baihathai chu geometry le algebra thrang lo khoma tlingna khop ka hmu a. Ka don sok sok a, tlingna mark ka hmu khan chu ka lung a awi tawk a, a dang ka don thei dinghai khom chu ngaisak loin darkar chenve-in ka zo a. Ekzam hall-a inthokin suok ka tum a, sienkhom darkar khat inrik hmaa suok an phal naw leiin hall-ah ngaingam takin ka la nghak a. A’n rîk charin ka suok a, tuola mihriem ka hmu taphot chu hlim hmêl putin ka hmu a. Meiteinu kuva zor ka’n chawk a, tu bau phak le khak khak a um ta nawh, kuva kha deu trûi khom hâng le thlum ti takin ka soi miel miel a. Romei zîng chât kara lam sira gom thing, thral thliin a hang mut hning sel sel hai khom chun lawmna hla mi rempuiin ka hriet a. Hi nia ka hlimna hi IAS/IFS ka tling khom khan a khûm teu teu nawh. Lungngaina kara lawmna ni êng hang tuok hi a lo va hlimum de aw! Pastor Thangngurin ‘Pielral nisa’ a lo ti khah ti awm hrim a nih.

Thu tiem hlen
Rûn leilak tana Sanjenthong, ofisar kuartar insi khupa an ngirna hmun kan tlàn pel lai chun ka mitthlaah nun hlui chul hnung sinema angin a hung invir let vut vut a. B.A final year ka thaw laiin, ka hun ruot a tlung ve tah ni naw nim, 1963 kum bul khan nuhmei ka nei a. Kan nu khom sorkarah nurse sin a thaw tran chauh, ieng khom nei la nei lo, Paona Road-ah mi in chite, khum inleng theina trawk hluoa la khawsa kan nih. Ni khat chu rickshaw-in Checkon tieng kan leng a. Rûn leilak tlung hma lam intung lai hi rickshaw an tlan kai zo naw leiin trum a ngai hlak a. Rickshaw-a inthoka trum a, Rûn leilak kan hraw kai chun sorkar ofisar lienhai kuartar insi khupin a lo um a. Ngaituo lawk dèr loin kan nu kuomah, ”Hieng bilding ropui, insi khuphai hi i hmu? Hieng neka ropui le lien lema hin ka la sie ding che a nih” ka ta. Fiemthua khom a zuolkai taluoa a hriet lei le a awi naw taluo lei amani ding, an naw leh ringna mita a lo hmu lawk lei amani lem ding, ieng khom a hril nawh.

A nih, chuonga inring lawk loa pasalin Jeftha ang ela bau ka lo phong ta tlat si chun le, ka thu hlen dinga thrang lak chu ka mawphurna a nih. Chu taka inthoka kum lia chun Indian Revenue Service lutin, kum thum hnungah Indian Foreign Service-ah ka chuong kai nawk a, kum 21 a zawna khawvel hmun hrang hranga India palai sin thawa kan thang sungin, Pathien zar chauin, kan nu kuoma beiseinaa ka thu tiem chu ka hlen ve thei tah a nih. Hieng lai hmun hi ka sir zatin khang hun lai kha ka hriet suok zie hlak. Sienkhom, mawl tak le lungawi taka rickshaw-a intar deua chuong lai hun kha Mercedes car-a India flag phe lep lepa târa tlan hun lai nêkin a lo hlimum lem hman hman khom a hoi ie!

(November 27, 2008 Delhi)