but a reality to be experienced.
- Sören Kierkegaard
A lampui rinum sienkhom
Churachandpur-ah ni nga ka chàm hnung le sung le kuohai ka sir kim deuh phuor hnungin, airuoching hmain Hmar Biel, Tipaimukh tieng kar khat vel inzin dingin lungril ka siem a. Love in Action (LIA) enkoltu, kan makpa Buonga le a rawihai khom Senvon-a thralai inkhawmpuia fe ding an um a, chuonghai chun intlon dinga an mi fiel bok leiin October 22, 2008 Nilaini tuk zing dar 4-a suok a, kan khaw hlui Pherzawl ban kan tum a.
Hmar Biela inzin ding chun National Highway ti hming put ve, sienkhom national highway lai po poa chau tak le suongum lo tak ni thei ding NH 150 hraw a ngai a. Inzin ka tum thu hre taphotin an mi hril hmasa tak chu a lampui rinumzie le Churachandpur-a inthoka Pherzawl kan ban an ring naw thu a nih. A lam rinum dan chie mi hril dinga ka’n don po hlak chun mihriem trongin a dai naw lei le a zuk hril dan ding an hriet naw lei am a ni ding, “I fe pha leh hre el i tih” tiin an mi don vong a nih. Nairobi-a kan um laia kan ruolpa, thil uor thiem deuin hril sien, iengtin am a ti ding maw? ti dam a min ngaituotir a. Khuol a’n zinna sea resort pakhata KS (call girls) tamzie le an hmel thrat tawlzie a hril a. Kan ruol dang pakhat chun, “Are they cheap?” tiin a’n don a. Ama chun, “No. no, no, they are not cheap at all….They are cheaper!” tiin a don a, kawng keiin kan innui a nih.
Ieng khom chu ni sien, NH 150 hmelhmang chu October/November, 2007 a Senvona kan fe truma ka hmu sa le a rinum dan khom ka’n tem sa a ni leiin, lampui sietzie an hril chun a mi sukzàm nawh. Chun, thil thaw ding ka ti tah hrim hrim hi a harsatzie an hril rawn po leh huphur zawnga lak nekin chona nasa lemah ka ngai a. Chu chona chu ngam le hnè ngei dinga inbuotsai hi ka thu chel a nih. Kan inzinna ding lampui chu ieng anga khokrok le turu khom ni sien, mi an fe a, an hung kir nawk thei chun ka thei nawna bik ding san ka hriet nawh. Inhoi le rinum ei tihai hi a hmaa ei lo beisei lawk le tak ram inkar indanglamna hnaizie le hlatzie thu a ni nuom khop el.
Chu el ringot khom chu a ni nawh. Ka fe nuomna hmun taka fe ding ka ni leiin ieng anga lam rinum khom mênah ka thlâk a nih. Chu ka fena ding hmun chu ka pieng le murna, khawvel èng ka hung hmu ve tranna, ka nina (aidentiti) intranna le phurtu, ka service book le ka passport-a chuong makmaw, van ram lekhabua ka hming inzieknaa khom chuong lo thei lo, lungril taka ka khuo, ka ram ka ti thei um sun, ka pi le puhai le mi hringtu ka pa lu innghatna hmun, ka mang khoma ka la cheng rawnna tak a nih. Mani piengna le murna ram ngainat nachang hre nawtu chu a dam lai zing khoma mithi a ni thu khom Sir Walter Scott (1771-1832)-in hla a phuok a, ka sikul naupanghai ka’n chuktir hlak kha tie!
Breathes there the man, with soul so dead,
Who never to himself hath said,
This is my own, my native land?
Airuo leh kan innang
Zing dar 4-a suok ding kan ni leiin Dr. Lalzakung ruolnu Darliensing zing tho hun ‘dâr thum tlângah’ kan tho a. Chu chu Delhi tlanga chu kan in tran chauh hun ni sien khom thimin a bawna ram Churachandpur laia ding chun thil dangdai a ni nawh. Zanbu inhma takin ei fak a, êng a hung thra ngai naw leiin thimbutah vokpui zal ruolin ei zal a, zing dar thuma chu darkar riet vel ei in hman ta a, pang a kham hman a, khaw var kar nghakhlain ei iniel ei iniel hman dèr ta hlak a nih. Del hlum sa ring thei ni sien chu, Churachandpur mihai hi khawvela hnienghnar pawl tak ei ni el thei.
Kan inzin ding hre rûk ni awm hrimin, zan tienga inthokin sûm an hung inhawr khawm tran a, zing tieng chun van chu a phûi ta hle a, Saidan tlang khom hmu thei a ni ta nawh. Darkar lia kan suok kha dar chenve kan tlàn hnung chun Hriengkot tlang kan chuong kai a, chu taka chun pumpel kan tum tak airuo tehmerin a mi hung hnot phak a, Jona tlân hmang tum ang el kha kan nih. Airuo danglamna chu, hieng lai rama fùr ruo hi thlang tieng Bay of Bengal tuipuia inthoka hung a ni hlak a, airuo ruok chu Bay of Bengal-a inthoka hung tho chu ni si, sienkhom simsak tienga inthoka hung a nih. Hi hi tuipui inlumletin thli a hung insuo dan zira a hung hlak lei a nih.
Chu thu zuk hril taka chun Thuvar 25:23, “Hmar thliin ruo a hung thruoi hlak angin, mi dem hmang leili chun lungsen hmel a kei pung” ti châng ka’n let lai ka hriet suok chu tie. Hi hi mi thiemhai insel luoi luoina Baibul chang laia pakhat a nih. An inselna tak chu: hmar tienga inthoka thli hung hrangin Israel ramah ruo a hung phur naw a, thlang tieng Mediterranean Tuipuia inthoka hung hrangin a hung phur lem a nih, ti a nih. Chu chu ni siin, ieng leia ‘thlang thliin’ ti loa ‘hmar thliin’ a ti lem tlat am ning a ta? Hi châng hi version threnkhata chu a letlingin, ‘Hmar thliin ruo a hnot zàm angin, lungsen hmelin mi dem hmang a hnot zàm’ tiin an inlet dai thung a nih. Hi le inzom hin, thlang thliin India hmar sak tieng fur ruotui a hung phur si a, ieng leia airuo hi simsak tienga inthoka a hung phur tlat am ning a ta? ti hi zawna mawl tak, a donna ruok chu khir tak a nih.
Kailam tlang hêlin
Motor lamlien um hma khan Pherzawl le Churachandpur inkar hi ke ngota fein ni thumin kan ban hlak a. Fe thlak tieng Tuila-ah sunbu fain nisa tlak velah Thingkeu kan ban hlak a. Hi khuoa hin tlung in hmu a harsa hle a, man chawia riekna ding riebuk an nei si nawh, tlung naw thei hlak ni bok lo, a buoithlak thei èm èm. Kan khuo Pherzawla ruok chu mikhuol nei thei hi mi vangneia kan ngai a ni leiin tlung in hnong an um ngai naw a, mikhuol hau leia trâm kan um ngai bok nawh. Pherzawl vanglai, abikin 1953-55 lai khan khaw danga inthoka sikul naupang bakah mikhuol kan hau thei hle a. Voi khat chu Kama rawiin thla thum sung zan tin mikhuol tlung zat an tiem a. Khang lai khan in 80 vel chauh kan nia chu chokruolin zan tin mikhuol 100 chuong kan nei hlak a nih. Hieng lai hun hi fak le dawn tienga kan hnienghnar vanglai a ni tlat bok a nih.
Sîr danga inthoka thlir ruok chun, harsa taka lo neia fak zong, an hmel hriet khom ni lo mikhuolin ni tina ei hang sukrik sa nawk kha chu thil thaw chi lo tawp a ni a, an mi lo lawm naw khom kha inthiem an um khop el. Hieng anga lo thei loa riek a ngaina hmuna hin chu tlung man chawia riek theina riebuk siem ngei ngei chi a lo nih. Tu ngei khom hin, Tuithraphai ruoma ngei khom, thaw mumal nei loa intei mei mei, abikin mikhuol lenglak tlungna ding riebuk nei ngei ngei ding a nih.
Peng hla loin, Tipaimukh lampui NH 150 tieng paw nawk zai rêl inla. Ni dang chu Thingkeua inthokin Kailam tlangpui panin kan kai tung ngat ngat a, a tlang insangna takah kan tan a, a sukin kan inbir thla nawk ngat hlak a. Tu ruok hin chu, motor lamlien an hung rel khan Kailam tlangpui hi hmar tieng pangah Santing chen a va hêl kuol a, chu taka inthok chun tlak tieng Kailam tlang thrutah sim tieng panin a tan phei nawk ngat ngat a, Leizangphaiah a trum thla a, Thanlon panin a kai tung nawk a nih. Churachandpur-Thanlon hi km 157 a hla a ni a, darkar 10 vel kan aw a, chokruolin darkar tinah km 15 kan tlan a nih. Italy-a ka um lai chun Milan le Rome kotsuo inkar km 500-a hla chu darkar 4 sungin ka ban hlak a nih. Ram hmasawn le ram hnufuol indangna chu iengkim deuthawa ei tlan hrat dan inthlau bêk bêk hi a nih.
Thanlon-Pherzawl
Thanlon kan tlung hin chawhnung dar thum a ni ta a. Raw sur khom a hung inâng met leiin Pherzawl ban chu bel sung sa angah kan ngai a. Pherzawl le Thanlon inkar hi boruoka chu km 5 khom tling lo ding a ni laiin motor lama chu km 37 a hla a ni a, lam thra sien chu inhoi taka darkar hni sunga tlung thei ding a nih. Amiruokchu, chengkol som anga hniek tiema intawl kan ni leiin darkar ruk neka sawt hiel kan aw a nih.
A tira lam sieltuhai riruong dan chun Thanlona inthok hin hmar tieng Khuongzang inpantir a, hnaitea Pherzawl zu paw el ding a nih. Sienkhom a ram mihai lungvar nei lei le nor thiemna zarin sim tieng panin, khaw tin deuthaw sirin, muongchangin an inher thlaktir tah lem a nih. Lampui siet le por zuolna chu Paite Biel tia hriet sung hi a ni bik a, ei tlan dukdak hman naw a ni tak. A lam a trûl a, thrul kara vok kong rau inthluok tak le khokham tak ner ang a nih. A mi vor tung a, a mi vor suk a, a sîr behêkin a mi’n awnpui a, a chângin a’n let vang a, ei ru le châng inthawt vong khopin a mi not a. Nuhmeiin leidâra bu an sèp le indang leh kan ngirhmun kha inang takin ka hriet.
Siel siel siel
Airuo sûr hmer hmer hnuoia chun lam sirah ram hnuoia tla le riek siel (mithun:bibos frontalis), a pui, a chal, a tuoi a tê ruol a’n khattawka hmu ding an um zing a. Kan tleirawl suok tran ve lai chun hieng lai rama hin zan riekin kristmas le kum thar lawmnaa hmang ding se keiin kan fe hlak a. Siel threnkhat chu inah inlawi zen zen loin ram hnuoiah an tla a, an riek a, tê an nei a. A thren chu sakei se lei dam le hri lei damin an thi a. Chuleiin, siel vaitu tam tak chu an siel nei zat hre lo an um hrim a nih. Siel vaitu taima le fimkhur deuhai chun a’n khattawkin an sielhai an khal khawm a, inah machi an inliektir a. Situi dawn ding umna rama chetla an ni naw chun siel hin machi an mamaw a, an inrawp a, machia zawr pei chun inah ngûk deuin an hung inlawi pei a nih.
Siel hi India hmar sak le a sèvel tlangrama naw chu hmun dangah hmu ding an vang. An sa fak ding le an vun khuonga kei ding ringot naw chun hmangna ding an vang khop el. An nene an sawr ngai naw a, sinthawna hmangruoah an hmang naw a, ram an sukpawn bok leiin hnam dangin vai tinah an tin naw khom a ni el thei. Ramri intrawm zing kan nia chu Pherzawla khom siel kan vai ngai naw a, bawng ruok chu kan vai nasa. Pi le pu hunah chu, khawtlang hraia an inchong pha leh mi neinunghaiin siel an sun (that) hlak a, chu chu Sesun Inchong an tih. Chun, siel hi an ran vai laia hlu taka an ngai a ni leiin nuhmei manah an lo ngiet hlak a. British-haiin an mi hung opa inthoka inchawk le zorna hmangruoah tangka an hung hmang hnungin, siel pakhat man chu cheng sawmli-ah an hung pom a, siela inpe ta loin poisain an inpek a, nuhmei man khom se khat, se hni, se thum, se li ti zawngin an hung bithliek tah a nih.
Ka theinghil thei lo chu kan siel kei pakhat lululzie le lunginsietumzie a nih. Ramri kan hung khel a, Pherzawl ram kan hung luta inthok khan a lawn nuom ta naw tlat el a. A tir chun a mei an hang ul a, an tawl hret a. Chu hnungah raw pum por pop popin a mongtamah an hei zei a, chu khom chun a la lawn thra nuom chuong nawh. Vuok dan chi kima an vuok hnung khoma a lawn thra nuom tlat naw leiin meiserin a mongtam an raw a, chu khom chun a lawn thra nuom chuong nawh. Mipuiin hawhaw pumin kan keiphìt a, kan kei tlung hràm chauh a nih. Kan tlungpui chun a mongtam bawr lai taksa kha chu hang sik thlaka fak el thei khopin a hmin tah hiel ka ring. A lawn nuom nawna kha a san inril tak um ngei ding a na, trong theiin hang hril sien chu kristmas thrul thrakna tham a ni ngei ka ring. Ngaituo a sukseiin lungsiet a um kher el. Mitthlaa ka hmu kir changin ka lung a la them hlak. Tu laia Animal Rights Movement-hai hin hmu hai sien chu, ei tuolthu se ngot a tih.
Zawlkhawpui trâng nêmah
Ruo tla hmer hmer hnuoiah darkar ruk lai insêp dan le innok dan chi kima kan inhruol hnung chun ka Kanan, Pherzawl ram kan chuong lut a. Lampui a lo thra tah bakah tu laia sorkar somdawlna prokram National Rural Employment Guarantee Scheme (NREGS) hnuoiah khawtlangin lamlien sir po po an lo sàm fai a, thaw a sukvengin, zan fé a ni taa chu a var uou a, hma tieng hla tak hmu thei a ni ta a, ruo khomin tawp zai a rèl a. Nu tranga nau ngaingam taka an bei hlie hlie angin, Zawlkhawpui boruok innem le inthienga hun sawt tak hnunga a naupa hung kir nawk a hang inbei zet chun darkar 15 zet zangaina thrang loa motor-in a hrum a hriela a not silna po po khom Gilead thing hnai damdawi thrapaa chûl angin a dam song song a.
Home is the sailor, home from the sea,
And the hunter home from the hill.
(December 5, 2008 Delhi)
No comments :
Post a Comment