Language is the blood of the soul into which
thoughts run and out of which they grow.
-Oliver Wendell Holmes.
Khawvela hin trong hrang hrangin pung tieng nekin tlawm tieng a pan pei lem a nih. Zo hnathlakhai lai khom pung nêkin a kiem pei ding a nih. Chu lampui chu pumpel thei a ni nawh.
February 2002 khan UNESCO huoihotnaa mi thiem thlang khawmin khawvela trong hrang hrang bohmang mekhai ngirhmun thlirna an buotsai lekhabu, Atlas of the World Languages in Danger of Disappearing ti chu Paris-ah an tlangzar a. Hi hi kum 1996-a an ripawt ennonna le thlir zauna a nih. An thil hmu chu a tawi zawngin hi hi a nih: Tu hin khawvelah trong hrang hrang 6000 chuong a um a, 3000 vel chu thihmun suola um an nih. Tuta anga thil a fe pei chun, kum 2050 hin khawvela trong zaa sawmkuo (90%) vel chu thi hmin dêr tah dingin an ring. An sut dan chun, thrang thum liem tah sung khan trong 200 chuong dai a thi hmin hman tah a nih. Ramsa an bo hrat let hni le vate an bo hrat let liin trong a bo hrat lem.
Hi Atlas hi ennonin an siem thra pei a. February 17, 2009-a a thar an tlangzara chun India rama trong thi meka ngai 196 lai Zo hnathlak trong hrang hrang 13 a thrang sa a, chuonghai laia a tam tak chu Hmar hnathlak pahnamhai trong a nih. Chu chun i naah inneina dar am a vuok vuina dar?
UNESCO chun trong bo mekhai hi chi ngain a thre a: 1. Him ta lo (unsafe): Naupangin an la hmang theia chu dannaranin insung chauha an hmang. 2. Derthawng hle tah (definitely endangered): Naupangin insunga khom piengpui trong anga an inchuk ta lo. 3. Nasa taka derthawng tah (severely endangered) : Pitar/putarin an la hmang, nu le pain an la hriet thei, an nauhai ruok chun an hriet ta lo. 4. Thihmun suola derthawng le hrangchat mek (critically endangered): Pitar/putar chauin an hmang le hriet tah. 5 Thi hmin tah (extinct): A hmang um ta lo.
Hi thu hi ka lekhabu ziek ZORAM KHAWVEL-4 ah ka chai hrep tah a. Chu taka chun German Language Society chanchinbu ‘Muttersprache’ (March 1996) a an hril dan ka tarlang a. An hril dan chun, tuta kum za hung ding sunga hin trong la dam sun khom zaa sawmkuo vel thi hmin an ta, thi el lo dinga an ring chu trong 300 vel chauh a nih. Nga lienin ngate an dol ang hin, trong tenauhai chimraltu trong challanghai chu English, French, Spanish, Russian le Chinese (Mandarin) an nih. Chuong laia a ngapui lien tak chu English a nih. Darwin thukhawchang ang khan a ru no no suokna khawvela hin a hrat lemin a hrat naw lem chu a hneng suok pei chu a nih.
Chu chu a ni lai zingin, trong hrang hrang hi mihriem tonhriet le varna a khawl khawmhai luong khawmna a ni leiin, trong ei inhmang zatin khawvelin ro hlu ei inhmang a nih. Dr. Johnson, Saptrong diksawnari siem hmasa taktu chun, “I am always sorry when any language is lost because languages are the pedigree of nations” a lo ti a. Trong a thi zatin a hmangtuhaiin hrietna le thiemna an lo khawl khawm tah po po chu a bohmang sa hlak a nih. Chu chu khawvel ta dingin kiemna nasa tak a nih. Chuleiin, UNESCO chun nasa takin trong inhmang dinghai humhal dan a zong a, hma a lak bok a nih.
An leh, ieng leiin am trong chu a bohmang el am ning a ta? Indik tak chun, ieng trong khom hi a pangngai zinga dam song a um nawh. Ni tina a hmangtuhai mamaw anga insiem danglam tung pei a nih. A hmangtuhai hmasawn dan angin hma a sawn a, an inthlak danglam angin a hung inthlak danglam a, an chàu pha leh a nêka hrât lem trongin a hung hlu suok a, an bo pha leh a bo ve el a nih. Entirnan, Italy hi hmang inla. A tira lo um Estruscan-hai chu Latin trong hmanghaiin an hung hluo suok khan an trong Etruscan khom an hluo suok a; Latin trong khom a hmangtuhai khawvel inlumlet angin a hung chàu tiel tiel a, Tuscanian tronga inthoka hung pieng Italian trongin damten a hung hluo hlan nawk a; Italian trong khom hung insiem danglam peiin ieng hun amania chu trong tharin a la hung chim nel nawk pei ding a nih. Chu lampui tho chu Hmar trong khomin a hraw ve naw thei nawh.
Mihriem khawsakna dinga hmang tlak lem trong trong hi mihriemin ei bawr a, a hung inthrang tuol tuol el a nih. Chuong ang trong hmang tlak hriet chu thiemna nei theina hnàr, sin thra hmu theina tiket le khawtlang inza phurna a ni tlat leiin, sum ieng zat khom sengin nu le pa tu khomin an nauhai inchuktir ei nuom a nih. Hi lei hin thiemna ram paw theina le khawvel dawr theina dinga trong filor nia tu laia ngai Saptrong chu khawvel pumpuiin ei inchuk tlut tlut el a nih. Chu Saptrong chun ni tina insiem thar pei thei dinga trong tina mi a trûl le mamaw taphot a angsungah a lak lut pei leiin khawvela trong hausa tak le hmang tlak tak a hung ni thei a nih. Saptrong hi khawvel hnam tin infe pawna dinga leilak a nih.
Amiruokchu, mihriem hi bei ringota hring le lungawi a ni nawh. A hlimna le lawmna, a lungkhamna le intarna, a beiseina le beidongna, a lungsenna le lungawina, a lungril ruk taka a thil invoi, a awm sunga a khawl khawm hai chu ama trong thiem zawng, naupang a ni laia inthoka a hung inthranglienpui trong ngeia hril le inzawt a nuom a, chu chu inhoi a ti bok a. Chuonga kut le ke zaizira thrang ngai thrak loa an zawt thei chun ieng ang khomin a awm inhnok sien, bau khat a hril zatin a hung inthawl thla hok hok el a nih. Ieng angin hnam dang trong inchuk thiem inla khom, ei seilienpui ei nu tronga thu le hla ang tluka ei thlarau chawm tlei theitu a um nawh. Saptrong, Mizo-Lusei trong le Hmar trong hai hi ka hriet le thiem dan inang thuok vong a tih. Saptrong chu ka fakzongna le sinthawna trong a ni a. Mizo-Lusei trong chu lekhabu ka ziek rawnna tak trong le thu le hlaa nasa taka ka hringnun chawmtu trong a ni nawk a. Hmar trong ruok chu ka nu trong, sula inthoka ka hung seilienpui, ka thisen le inzom tlat, pi le puhai le mi tringmittu, ka Pathien ka biekna trong, van chena ka som ding, ‘ka trong’ a nih.
Sienkhom, chu ka nu trong chu dam khawsuok a tim? Chu chu zawna don harsa tak a nih. Thu ka hrilna hmun iemani zatah Hmar trong hi kum sawmhni neka tam liem tah khan a thi ta a, fan invir vut vut, electric ei that hnung khoma iemani chen a lan vir ang mei mei a ni thu ka hril tah hlak a. Chu chu ka hmu dan char a ni hrim a. Hi thudik, kha tak el hi ngaithlatuhai chun fak harsa an ti a, soi le lem thlâk lem chu harsa an ti zuol. Mizo Students Union-in khuolliena an mi fiel leia Pune-a kan inzin trumin Union Biblical Seminary-a inchuklaihai leh kan titi tlangnaah hi thu bok hi ka hril a. Lem harsa an ti el chauh khom ni lovin an lung a sen nuom hielin ka hriet.
Hi thu hi eini rawi, mani trong ngaina le hmangai inti, amiruokchu a tak ngeia a damna dinga iengkhom thaw si lo, ni tina a thlân chotuhai chona (challenge) dingin a thra leiin hril hril chi niin ka hriet. Ieng leia Hmar trong hi a thi tah anga ei hril am a na? A san tam tak lai pahni chauh entirna dingin hang hril ei tih.
Pakhatna, trong hring chu ni tinin a’n thrang a, a ni têlin a pung deu deu hlak a, Hmar trong ruok chu a ni têlin a kiem lem. Kum sawmruk vel liem taa Rev. Thangngurhai hun laia Hmar trong an hriet le hmang thiem zatve khom kha thrangtharhai hin an hriet ta nawh niin an lang. Lekha thiema ei tiem chin lai khom hin Hmar tronga lekhathon phek khat khom him ronga ziek thei ei vang tah êm êm. Chu chu inzaka lak nêk hmana insuong phanaa hmang khom ei um hielin an lang. Saptronga tlawmte ei inpawt thei chun mani trong thiem naw inla khom mi taka inngaina lungril ei nei niin an lang. Saptrong thiem sia mani trong ei thiem naw chun ei trong chu ei ngaithà tina a nih. Chuleiin, ei trong vuitu chu eini rawi hi ei ni a, mi dang intum thei ding ei ni nawh.
Pahnina, trong sukhringtu le sukhausatu chu a hmangtu mihriemhai an nih. A hmangtuhai an hringa an chakvak po leh an trong hmang khom a hringin a chakvak el a nih. Chu umzie inril nawk chu, ngaituona thatho nei mi le hmang mi, thil thar zong suok mi le chîng suok mi an nih tina a nih. Mihriemin hmasawnna kalbi a phak hla po leh a ngirhmun phak chin hrilna dingin trong thar a ser suok rawn a, hma a sawn nasa po leh a trong hmangruo khom a pung el a nih. Eini rawi ngirhmun teh iem a na? Thil thar hmu suok chu hril lo, thil hlui vong thra pei khom ei vang êm êm. Ei pi le puhaiin arbawm ta dan teknawlawzi an thiem khela khan kal khat khom ei la pen naw khom a ni el thei. Ei trong ziek dan phuisui lem le thra lem zong suok tum nek hmanin mi zong suok ta sa khom hmang pei lo le hmang nachâng hre lo, inhnawmna ngaia inhnawm tum zing ei kat nukin an lang. Mithi thrung khawm ei ang takin ka hriet.
Thangngur le a hun laia mi hluihaiin hla ropui tak taka an min awi hnung, kum sawmnga sung hin literechar tling khop, bel chieng dawl hla hring le thu hring ei awm sunga inthokin ieng zat am ei phu suok ta a? Churachandpur-a ka’n zin trumin R. Tawna Khobungin Lenruol Hlabu sut hnina a buoipui lai a ni leiin inchuon sa ding hla thar a lak khawmhai chu lo edit-pui dingin a mi fiel a. Ei hla thar a tam lem chu thluk nei an ni leia hlaa tiem sa ni tah mei mei niin ka hmu a. Hi trum hin a nih ei kawrong takzie dam, ei inhmang thuk takzie dam, ei kalchar pawhleu le khawthlang kalchar pawhleu inkara boruok mong nei lova inleng ei lo tam takzie dam ka hmu suok zuol chu ni. Puithu ngiela an siem kaset threnkhat hi hang ngaithla inla, ei trong ei ngaitha takzie le bohmangna tuipui ei pal inthuk takzie mi hriltu an nih. Thu le hla hlutna le a buk rikzie inkhina chu a se êk tam zawng (quantity) ni loin a thratzie inhlirna (quality) a ni lem.
Hnam pakhata insâl ve lêmin thla kip suok chanchinbu pakhat takngiel khom ei sukhring thra thei naw hin ei ngirhmun a tar lang chieng hle. Kohran chanchinbu pahni pathum, thu le hlaa hnuchâk invoi ti hriet ngawi ngawi, tiem tlâk anni lei ni lova pawl chanchinbu an ni leia hring mei mei, ei nei trawk a. Keini rawi hun laia thlakip chanchinbu inzom zata suok hlak Inchuklai Nun hi a dam hun nekin a thi hun sung hi a sawt lem a. A’n khat tawka suok hlak le ei suongtawlol Nuhmei Magazine hlak chu a buoipuituhai chawibang ruolin a chawibang amani ding, a hmel hmu ding a um ta nawh. Iemani chen Sawrtui magazine chu mi lawm hlaw khopin a hung inlar hman a, sienkhom a hming chawina Sortui Rakam Neilal le Truoni kara inhmangaina ang elin a hlamzui nawk tah khom a hoi khop el, a hmel hmu ding a vang tah. Tleirawl tha inthak anga hung inper suok hlut Hmathlir hlak chu Saikot damdawi rimin sawt naw teah a ur chau nawk der bok a. RPC-hai hmalaknaa insuo Zawllung magazine hin iem a chang pei ding maw! Kum 25 zet lo suo tah, kar tin suok Delhi Thurawn hi ei chanchinbua hring thra tak le tiem tlak tak chu a ni el tah awm. Hi khom hi mi tlawmte tlawmngaina leia hring mei mei a nina chin a um a, inchuklaihaia inthokin artikul hmu ding a tlawm a, an ziek sun tam lem hlak Saptrong a ni nawk nghal. Inbieknaah ei trong la hmang zing inla khom thralaihai lai Hmar trong nekin Saptrongin hmun a chang rawn lem dai tah ti a chieng. Hi hi Hmar trong a thi hratzie inkhina chieng tak pakhat chu a nih.
Hmar tronga lekhabu ei tiem rawn tak chu inzakum khopa inphuoia an min letpek Baibul hi a nih. Thrangtharhaiin Hmar trong an thiem naw deu deu pei khom hi a kaikuongpa pakhat chu ei Baibul inleta Hmar trong indik lo ei hmang treuh hi a nina chin umin an lang, ei lekhabu tiem rawn tak a ni tlat a. Hi lei hin a nih lo thei loa Delhi tlanga inthoka siem phuisui tuma hma an lak pha hiel chuh. Hi hin thlan muol pan mek ei trong hi a kei tho thei hram ei beisei a nih. Chun, sakhuo tieng thu le hla hi ei hmasawnna tak niin ei hril hlaka chu ei awm thu suok lekhabu tiem tlak pakhat khom ka la hmu ve nawh. Trong danga inthoka ei inlethai khom hi, ka tiem ve phak chin chu, mang sietna khopa turu a tam. Ei pulpithai hi trong ei suosamna, ‘Trongthatzawl’ ei inchangtir vong tah. Na tak a nih.
Ei trong vui liem mektu chu eini ngei ei nih ti hi ei hriet chieng a ngai. Eini tronga chanchinbu amanih lekhabu sut rêng rêng inchawtu ni lova mi inchawk sa tiem tumna lungril put dam hi trong vui liemna lampui hnai tak pakhat a nih. Hi hi ei pasiet lei a nina chin um sienkhom a’n dik chie nawh. A san chu, lekhabu inchawkna dinga cheng khat khom ei inro laiin taksa le thlarau ta dinga trangkaina nei der lo kuva, sada, ziel le kamcherek mei mei inchawkna ding chun sum ei nei tawl tlat si a nih. Ei trong hi vui liem song ei nuom a ni ngot si naw chun ei nungchang thlak a, ei insiem thar a trûl makmaw.
Note: Hi artikul hi kum 2002-a ka ziek, ka siem thrat le belsa a nih. LK (Delhi, May 14, 2009)
No comments :
Post a Comment