Doctorhai Ni (Doctor’s Day)

In nothing do men more nearly
approach the gods than in giving health to men.
-Cicero

When a man has pity on all living
creatures then only he is noble.
-Buddha (c. 563-483 BC)

Delhi, July 1, 2009 Nilaini. Hriet mang lo kârin ni le thla a liem zung zung a, kum chenve suoin, a chenve dang phek khatna chu Siemtu lunginsietna kutin a mi lo inphoktir nawk dèr el tah. Lawm a va hang um de aw! Hi thla ni 15, 1939 khan ka hnuoi khuolzinna tran dingin Pherzawl tlangah khawvel var ka hung hmu tran ve a. Chuleiin, ka ta dingin hi thla hi a hlu bik a, thlahai thla a nih ka ti naw thei nawh.

Hmar trong chun Thlahmur ti a ni a, malsawmna ruopuiin hnuoia thil tro thei le inthrang lien thei po po ditsak bik nei dêr loa hnienghnar taka a chawm hun le an inthrang hlut hlut hun a nih. Lusei trong chun Thlahmur hi ‘Vawkhniakzawnthla’ an ti duot. Hi thlaa hin hnuoi a por leiin vok kongah vok hniek inzawn thliein a chier dup hlak a, chu chu thla hminga an inputtir a nih ti a chieng. Ei ran vai danghai hming put loa vok an inputtir bik el hin vok le ei inlaichinna hnaizie a hril fie hle awm. Thla hming ei phuok dana inthoka bi chun Lusei trong nekin Hmar tronga thla hming hi inbul lem daih dingin ka ring.

Romanhai ruok chun Isu pieng hma kum 40-a thata um tah, an lal hmingthang Julius Caesar (Kaisar Julia) piengna le thina thla a ni leiin B.C 44 khan a hming inchawitirin hi thla hi ‘Julius’ tiin an hung inbuk a. Romanhaiin British thlierkar an hung op hnung chun British haiin an thla hming chu hung hmang vein, anni awphawiin ‘July’ tia ziekin an hung ko a, chu chu ei lo intrawmpui ve tah pei a nih. Ei thla hming a hlàn hnè khop el.

Chinese hai chun kum hrang hrang hi hming 12- ui, beram, rulpui (dragon), bawngchal, âr, mazupui (rabbit), mazu, zawng, rûl, sakei le vok an inputtir a. Ka pieng kum, Indopui Pahnina intran kum 1939 hi Mazupui Kum (Year of the Rabbit) an ti ve tlat. Mazupui hi an chi thratzie hril a ni tawng hlak lei amani ding, DNA suituhaiin tu chena mihriem pakhat chi thla rawn tak nia an hriet chu Central Asia-a Mongol lal ropui le kawlhrawng Chenghiz Khan (c.1162-1227 AD) kha a ni a, July thlaa pieng a nih. Ama khan ram a tukdolna taphotah a kawlhnam tluka nasain a hriemhrei a hmang ni ding a na, tu laia DNA suituhaiin a chet tlatna hmun tinah a chi thlahai an hmu a, a chi zamin Central Asia phek po po hi a phan mat chuot el niin an hril. Pui hep hep tak a nih.

Daktorhai ni
Zing thingpui dawn malama chanchinbu ka hang tiem chun July 1 hi India rama chenghaiin Doctor’s Day-a ei lo hmang hlak a lo ni zing a! Hi ni hi India zalenna suoltu mi ropui laia pakhat le daktor hmingthang Dr. B.C.Roy piengna le thina ni hriet zingnaa inser dinga kum 1991-a inthoka India sorkarin a puong a nih. Chawl puonga thabo taka zâl inzam amanih, an naw leh zât sawm um trok trok inchua sunnithlaka lekha indeng amania inser loin, hmun hrang hrangah mihriem hriselna siem thratna ding thil thra iemani bek thawin an inser hlak. Tu kum 2009 hin chu Association of Medical Consultants le Indian Medical Associations hai inkopin hmun hrang hrangah tlawmngaia thisen pe nuomhai pekna dingin Blood Donation Centre an hong a nih.

Daktorhai Ni insera hin ka la thrang ve ngai naw leiin tuta trum bek chu daktor sin poimawzie le hlutzie tawite bek artikul zieka inser ka nuom leiin chop le chilin hi artikul hi ka hung ziek a nih. ‘Daktor sin’ ti hin damnaw enkol tienga inhmanghai hrim hrim a huop vong. Hi sin hi sin inzaum (noble profession) tia hril hiel a ni ang hrimin, khaw lai hmuna khom an poimaw dan a danglam nawh. Sukdamtu hnuoi pathien an nih. Ei dam thrat lai chun an poimawzie ei hriet tak tak nawh. Thi hmun suola ei hang damnaw zet chun thil pahni char inhnèmna ei nei: Pathien le daktor. Daktor hmel ei hmu chun angel hmel hmu tlukin ei inngai a, thla a muong huoi nghal. Anni hmangin Pathienin a sukdamna kut mihriemhai chungah a’n langtir hlak a nih.

Tuol daktor le an damdawi hmang
Mihriem khawsak dan chanchin ei sui chun, khaw lai hmuna chenghai khomin mawl lai huna daktora an hmanghai chu thiempuhai le zawlneihai an ni tak. Mihriem chunga natna intluntu ‘huoi’ (spirit) chi hrang hrang umin an ring a, chuonghai chun mihriem an suknat nawna dinga be-tlona suklungawitu chu thiempu an nih. Natna hrang hrang damna dinga damnaw an thawi bakah thil hna le zung le ra hrang hrang hai chu damdawia hmangin an enkol hlak. Lal Hezekia khuoihli sukdamna dinga zawlnei Isaiin a hmang chu theichang hmet hnàk a nih (2 Lalhai 20:7) ‘Saikot damdawi’ amanih, ‘Chawilien damdawi’ tia hriet lar, mi sing tèlin an pan huoi huoi khom kha chuong ang tho chu a nih.

Mihriem ei hung changkang pei a, taksa natna le lungril damnawna tieng (mental cases) chu daktor enkol ding le thlarau tieng natna chu thiempuhai buoipui dingin ei hung sie a. Amiruokchu, taksa, lungril le thlarau chu thil inzom le inpawthuo tlat, in khat sunga pindan hrang hrang um ang a ni leiin thlier fihlim vong thei a ni nawh. Taksa natnain lungril le thlarau a sukchau thei a, lungril le thlarau natnain taksa a sukchau thei bok. Isu rongbawl dan ei en chun, thlarau inhmanghai intlan dinga hung a ni lai zingin a thaw rawn tak nia inlang chu damnaw sukdam a nih. Mipuiin an bawr luoi luoi san tak khom damnaw a sukdam thei lei a nih. A hung san tak ruok chu a thi tawm ruoi chenin a zirtirhai lai ngei khom a man lo an la kat nuk a nih. Tu lai chen khom hin, kristien intihai laia sukdamna kut neia inhrilhai ei huor san tak chu thlarau damna nekin taksa damna ei beisei lei a nih. Bauin khawvel rinum suoksan vat vat ei nuom thu ei inpawtpui hlaka chu tu khomin dam hi ei nuom bek bek a nih.

Thuthlung Hlui huna Israelhai khawvel ei en chun Sinai tlanga Pathienin Mosie hmanga Dan hrang hrang a peka inthok khan thiempu sin le daktor sin po po chu Mosie le a unaupa Aron inrawina hnuoiah thiempu chi Levi-haiin an chel kop vong niin a’n lang. Exodus, Leveticus, Nambar & Deuteronomy hai hi an thaw dan ding hrilna bu an nih. Damdawi an hmang tak ruok chu hrilna a vang khop el. Operation an thaw rawn tak ruok chu sertan a ni a, chu chu in khat pain an thaw deu tak. Midwife (naudomtu) ei hriet hmasa tak (Gen 35:17; 38:28; Ex 1:15) hai hlak kha Padan mi, Kanan mi le Aigupta mi vong an nih. Jakob ruong thu thei loa buotsaiituhai khom kha Aigupta daktorhai an nih. Joba’n ‘daktor’ ti a sàm rik (13:4) le Jeremia-in (8:22)
Gilead-ah thing hnai damdawi,
A um hlol naw a ni maw?
Chu taka chun sukdamtu,
A um ve naw am a ni?
Ka mihai hliempui tuor hi,
Ieng leia a dam thei naw?

tia beidong taka hla thu hmanga a hung inrum suok hma khan, an Pathien Jehova ngeiin hieng ang hin Israelhaiin daktor taka an hmanghai khawsak dan a hril fai kèl tah a nih (8:10-11):

A chin tak le a lien tak chenin,
Duàmna ringotin an sip a;
Zawlneihai le thiempuhai khom,
Mi hlèm ringot a nih an thaw.
Ka mihai hliempui tuor chu,
Rùndâlin an tuompek a,
‘Dam a tih, dam a tih’ an ta,
A dam chuong teu teu si nawh.

Hieng le hmun dang danga Israelhai khawvela damdawi ei hmuhai hi a nàla nàl chi deu vong nia an inlang bakah an daktor hmang tak chu thiempuhai le zawlneihai an nih. Isu hun lai khan chu Romanhai opna hnuoia khawsa an ni tak leiin daktor an hmang làr tah hle thu ei hriet a (Mat 9:12; Mark 2:17; 5:26; Luka 4:23; 5:31 8:43), damdawi an siem suok ti ruok chu hrilna a um nawh. Damnaw ei hriethai khom invung, phâr, pansie, santen, zeng, hringol invoi, phungzawl le piengsuolna chi hrang hrang neihai an nih. Baibul bu hrang hrang ziektuhai laia daktor um sun chu Luka a ni a (Kol 4:14), amiruokchu Jentel mi a nih.

Ethnobotany
Eini khom, ei pi le puhai huna daktora ei hmang takhai chu thiempuhai an nih. Chuonghai chun dawi chi tinreng hmangin le inthawina chi hrang hrang inhlanin, damnawhai ngei zawnga an hriet thing le hlo hna, a zung, a hawng, a hnâi le a ra chokpola damdawi an siemhai chu infaktir le indawntirin, pânna le hliemna bea hai nàlin an enkol hlak a. Hieng ramhmul damdawi an hmu suok le a hmangtuhai chanchin suina hi Ethnobotany an tih.

Tiena tlanga inthoka India rama ramhmul damdawi (medicinal plants) an lo hmang hlak, internet-a inthoka ka hmu thei chu 2416 chuong a ni a, chuong laia 1953 chu India hmar sak rama mi a nih. Mizorama um tu chena an hmu suok tah po chu 135 a nih. Ram a pawn deu deu ruol le a hmangna le a hmang dan hrie thranghluihai an liem pei ruolin ramhmul poimawhai hi a bo diek diek a; tlawmte la um sunhai khom suma inchangtir thei a ni phot chun, Esau lungril put eini rawi hin ching sap neka a zung puma phawia zor hmang vong khom ei poiti nawh. Hlo damdawi chi hrang hrang ei neihai le a hmang dan hrietna hi khawvelin ei inhmang song inlauin WHO chun hum dan ngaituoin thrang nasa takin a lak a nih. Chu chu ei thaw ve ngei dinga ditum a nih.

Dr. Sûra The Great
Ei tienamia thiempu khom ni si lo tuol daktor ei hriet lar èm ém chu Dr. Sûra a nih. Mongping khuoa operation beipui a thlak trum zet khan chu a nasa ie! A hmangruo hmang khom porche le hri kai thei lo dinga sukthieng (sterilised) naran khom ni lo, thirtul inling ngat a nih. Chu chun naupang mong pinghai chu inri sorin a verpek pop pop el a nih. A ver zoin zêngah a dèng lut a, a khup khum pei a. Nâ tia an khek lom lom ri chu an mong thar nei lawm innui ri a nizie le ni thum hnungah an hung dam vong ding a ni thu a hrilpek a, an awi èm ém. Operation a thaw zoin Mongping khuo chu a suoksan nghal a. A hril tawl anga ni thum hnunga zêng an hang hong chun an lo thu hman vong tah. Lungsena that tumin Dr. Sura chu an hnot thlùr a, chanchin an hau hle.

Hi hma khom hin a nuhmei Thairanchong lo fe karin in a lo nghak a. Phingtram le dangchara trap a naupa chu a lu a nat lei ni a ring a. A ludêp a hang them leh a’n phu det det a, chu chu a natna san a ring a, operation a lo thaw a, a ludêp a ât hong a. A thluok hung suok chu a panna hnai ni dingin a ring a, a khel suok vong a. A naupa a trap ta naw lei chun a operation chu hlawtling hleah a’n ngai a nih. Ka ngaituo hlak a, Sura operation thaw ang hi ei va hang thaw rawn ding de aw! Sakhuo hi kawra hmang, thlarau daktor tehlemhaiin damna operation an nei veta inthoka ei inkhi chun, Dr. Sura thla nia ei insàlna hi a tak tak sawn pawl ei la tam a nih ti a chieng. Swiss psychiatrist Carl Jung (1875-1961) thukhawchangin, mihriemin hma sawn hlea ei inngai hnung khom hin kha hmaa ei hlimthla khan ei hriet loin a mi zui zing a nih ti hriet fie hi a poimaw hle a nih.

Daktor indai lo
“Doctor’s Search”-a inthoka kum 2009 a India ram pumpuia daktor inziek lut po po chu 1,02,780 an nih. Canadian Medical Association Journal (May 12, 2009) dungzui chun India ramah mi 100,000 peiah daktor 60 an um. WHO dit dan chun mi 1000 peiah daktor 1 an um ding a nih. Chuong ang ding chun a tlawm takah India–in daktor nuoi ruk le nurse maktaduoi bek a nei bel sa nghal a ngai.

February 2004-a YaleGlobal chanchinbua an ziek dan chun USA ringota Indian daktor thok po po chu 38,000 nekin an tam a, inchuk lai mek 12,000 chuong an um zing bok. Chu chu Churachandpur District sunga Hmar po po neka tam an nih. USA-a daktor 20 peia pakhat chu Indian daktor a nih. Kum tina USA-a inthoka International Medical Graduate tling zaa sawmhni (20%) chu India mi an ni bok. Nurse thok zat chie hi hriet ni naw sien khom kum sawmhni neka tam liem tah sung hin kum tin a tlawm takah 1000 neka tam an lut thar zing a nih ( Source: Radhika Manne: Managing Director, Smart Nurse Pvt. Ltd).

India rama hin daktor ei indai naw leiin ram le khaw ril (rural area) a thok pei an tlawm a, mipui 80% vel hin mumalin daktor an la chang phak naw a ni tak. Entirna hnai tak chu Tipaimukh Biel, ngaina taka “Hmar Biel’ tia ei ko, biel lungsietum hi a nih. A hminga daktor an siehai khom a um pei khur an um naw leiin an Health Centre hai chu bawng le vok riek khawmna inah an inchang a; natna mak tak leia naupang an thi truk truk khomin a ni dan ding hrima thil tlungah an ngai am a ni tah ding, thoktuhai le thuneituhai ngêng a sun ta nawh. Tuta Sorkar Laipui cheltu UPA sorkarin ram rila thok daktorhai chu an hlaw let hni pek ding thu ni khat el laia an puong hiel kha thil mak a ni nawh.

Bulthrut remtuhai
Hmar hnathlakhai laia Daktor hmasa taka ei hril hlak chu Dr. Thanglung a ni a, sienkhom thu dik a ni nawh. Ka hriet hmasa tak chu H.K.Dohnun naupa Dr. H.K. Thanglur a nih. ‘H.K.’ lamtawi umzie chu ‘Hmar Khawbung’ tina a nih. June 7, 1931-a Lakhipur (Hmarkhawlien) a IBPM Field Secretary Dohnun a thiin hun lailawka ama aiawtu dingin Dr. Thanglur hi Watkin Roberts-in Acting Field Secretary-ah a hung ruot a. July 13, 1931-a HK Thanglurin a pa phun Tlangsang (Jampui Hills) kohran kuoma a lekhathona chun, “Kan hni angin Mr. Thanglung chu Medical School, Dibrugarh-ah a fe ta a, lunginsiet èm émin Rêng chun a mi chawmpek tah” ti a chuong sa a. Dohnun hnipui angin Tripura Rêngin Thanglung chu a chawm tran a, chuong lai chun Thanglur chun LMP a zo daih tah. ‘LMP’ chu Last Menstrual Period amanih, Licensed Massage Practitioner amanih tina ni loin, kum 1946 hmaa MBBS aia India sorkarin daktor dikria a pom le pek Licentiate Medical Practitioner (LMP) tina a nih. Inchuk hun sung khom MBBS nekin a tawi lem.

Hi hi ka ziek lang kherna san chu Dr. Thanglur le Dr. Thanglung hre hrang lo le an chanchin kei pol pawl ei um hlak lei a nih. KRISTIEN magazine Vol.LII No. 6 June 2009 phek 13-a chun a ziektuin thil mak 9 a hril laia No. 6-a chun, “Suksuolna um si loin Dohnun le Thanglung Manipura an lut chun man ding” ti thu a chuong a. Hi taka Dr. Thanglung ti hi Dr. Thanglur ti ding a ni lem. H.H. Coleman-in Watkin Roberts a hung suot thlak hnung khan NEIG Mission hmunpui chu Lakhipura inthokin Churachandpur-ah a son tung a. Kohran sunga buoina a hung zuol pei hnung chun Manipura Watkin Roberts zuituhai chu sukram tumin Coleman le a thrangpuitu Manipura Political Agent Higgins le ABM misawnari Pettigrew hai chun inthukopin kut an thlak a, an hotu HK Dohnun le a naupa Dr.Thanglur hai chu Manipura an kohran mi le sahai kan thei lo dingin a rama lut khapna Manipur sorkar an insuotir a nih. Dr. Thanglung ruok chu Manipura pieng le seilien a ni bakah daktor a hung zoin NEIG Mission hmunpui, Old Churachandpur-ah a thok a, a daktor sin bakah Baibul inlet le sikula inchuk ding lekhabu buotsaia inhmangin, sakhuo le hnam hmasawnna bulthrut remtu mi trangkai tak a hung ni tah pei a nih. A hniekhnung zuiin a naunuhai Thanghnem le Mawii chun nurse sin an hung thaw a, a naupa pakhat Roberts Sanate khom daktor a hung ni bok a nih.

A bebawm hril lo thei lo a um leiin ei pet kuol met a, ei thu zaipuiah lut tah inla. Ka hril nuom tak chu damdawi tienga inhmanghai hi ram le hnam bulthrut remtu laia a hmatawng an lo nizie thu a nih. Khawvel dang le ei khawvel tringmit hmasatuhai chu sumdawnghai nek hmanin Indopui Pakhatnaa Labour Corps-a thrang, France rama fehai le Indopui Pahninaa sipai pangngai le ruongla sipai, Indian Medical Corps-a thranghai kha an nih. Ruongla sipaia thranghai kha indo re hnungin mi tam tak chu India sorkar thar hnuoiah an thiemna le inzomin Health Inspector sin an pek a. “Aw kan Hmar ram” ti phuoktu Kuokluong lal, H.V. Lalkhum Keivom (1921-1997) khom kha chuong laia pakhat chu a nih.

Chu taka inthok chun damdawi tieng, abikin compounder le nurse inchuk nuomna lungril a hung hring a, a thei theiin an inchuk a, ram le hnam thrut remtu tak an hung ni tung tah pei a nih. An ngirhmun chel poimawzie suina artikul amanih lekhabu amanih a la um naw ni ngei a ta, a lo um palh a ni khomin kei chun ka la tiem fuk ve tlat nawh. Chun, kei ngei khomin kha hma khan chuong tak chun ngaituona ril pein ka lo la sui ngai nawh. Amiruokchu, hi artikul hi ziek dinga ka hang inbuotsaia inthokin damdawi tienga inhmang, ka naupang laia inthoka ka hriethai chu ka hang dap kuol a, kutpar thlieka ka zuk tiem thei el khom zakhat vang an nih. Chuonghai laia a thren chauh chu inzom lo nungin, chîk taka la hung suituhai ta dinga lampui phèt hongna ang chauhin ka hung tar lang ding a nih.

Chuongchun, hieng ang hin thil chu a hung tlung a. Mizoram ram thima Medical Mission hmasa tak tran dingin Dr. Peter Fraser chu tir a ni a. Medical Mission a tran ding si chun ama thrangpuitu ding, damdawi tieng thiem thruoi lo thei lo a nih ti a hriet a. Chuong anga rongbawlnaa inhmang dinga inpe mi a hmu chu an biek ina kai ve tlangval Watkin Roberts a nih. Ama chu Chemist a ni a, chu chu kha hma khan Compounder tiin ei ko hlak a, tu ruok hin chu Pharmacist tiin ei ko tah lem. Thiempu sin le taksa sukdamna sin thaw kop dinga hung an ni ang hrimin, Aizawl an tlung chun Dr. Fraser le Watkin Roberts chun Dispensary an hong nghal a. Chu Dispensary enkoltu Watkin Roberts le a thawpui R. Dala hai chun damdawi hmangin ramthimah Pathien thu var an kap lut chuoi chuoi a. Chu vabuchawi chun Senvon khom a deng a, Churachandpur bielah histawri bung thar hongin a um tah a nih. Medical Mission fe thlenga ringnaa Compounder Watkin Roberts thlahai ei nih.

Chu Senvon khuoa pieng Thanglung chu Manipur Hmarhai laia daktor hmasa tak, Hmar tronga Baibul pumpui inlettu le naupang inchuk ding lekhabu iemani zat buotsaitu a nih. A hmaa ei tar lang tah angin, a nau nuhmeihai Thanghnem le Thangmawi chu nurse niin Europe/USA ah an khawsa a, an sangpa Roberts chu daktor niin, a unau danghai leh USA-ah a khawsa. Hnam thrut remtu sungkuo poimaw tak an nih.

Senvon khaw suok bok L.Rokung chu Manipura Hmarhai laia Air Force zom hmasa tak le MLA ni hmasa tak a nih. Indopui Pahnina zoin Compounder a’n chuk a, sorkarah iemani chen a thok hnungin a maksan a, hlawtling takin Pharmacy a siem a, ram le hnam innghatna sutpui poimaw laia pakhat a nih. A naunu Darkaizo chu Manipur Hmarhai laia nuhmei MBBS hmasa tak a nih. Rokung hi Reformed Presbyterian Church (North-East India) indintu laia a sutpui a nih.

Senvon khaw mi bok Hrangchungthang chu Compounder niin Manipur sorkar hnuoiah a thok a. Ama chun a sangpa Lalfelthang chu MBBS inchuktirin a chawm puitling a, Senvon suok daktor pahnina a nih.

Senvon khawper ni hlak, a hnunga khaw hranga hung um tah Rawvakot khaw suok daktor hmasa tak chu Dr. Ronghaklien Joute, Gynaecologist, June 17, 2009-a muol lo liem tah kha a nih.

Senvona inthoka hnaitea um Lungthulien khuoa Compounder tling hmasa tak chu H.B.Duma a ni ka ring a, a dottu chu Vompu (Lienzahau) naupa Lienkhawsat (L.K.Sata) a nih. Sata hi a vang lai chun Hmar Biela daktorhai daktora an ngai hiel a ni bakah Hmarhaiin political party an indin tran laia thruoitu poimaw le khaidingtu laia pakhat, ram le hnam el bakah kohran ban poimaw tak a nih. Ama hin a sangpa Laltuoklien chu chawmin daktor a’n chuktir a, Manipur Hmarhai laia MBBS tling hmasa tak a nih. Dr. Laltuoklien Sinate naunu pakhat Rebek chu MBBS a ni bok. Sata nauhai laia pakhat chu nurse a nih. Chun, a naunuhai nau (a tuhai) daktor pahnih- Dr. Bonny MD le Dr. Jasper an um a, daktor ve ve pasalah an nei bok.

Lungthulien suok mi dang compounder ka hriet suok theihai chu Lunchunghnung, Damkhawthang, Vanlalngen le Vankung hai an nih. Hienghai laia pakhat chauh, Damkhawthang hi entirna dingin hang la bing inla. A hnungin Rengkaiah a khawsa a, sungkuo nghet le inhnarum tak an din a. A naupahai Rev. J. L. Songate, ICI thruoitu, Rev. H. Mansang Songate, NEICORD, Guwahati le H. Lallien Songate, Superintendent, Customs, Kolkata hai hi an chettlatna hmun senga ban poimaw tak an ni vong.
Bawkanin Senvon sak tienga khaw chengker, sienkhom hmingthang vieu bok si, Leisen khuoah lut inla. Hi khaw suok, Ropuilal naupa Liensangvung chun kum 1939 khan Compounder a hung zo a, 1940-52 chen Manipur sorkarah sin a thaw hnungin a bang a, Lamka-ah Pharmacy a hong a, a hung hmuingil pei a, kohran le hnam ban poimaw tak a hung ni a. A nau upa tak Lalzakung chun kum 1970 khan MBBS a zo a, a hnungin AIIMS, Delhi-ah MD a zo nawk a, Manipur-a Hmarhai lai MD hmasa tak a nih. A naupahai dang- Lalremthang, Principal, Churachandpur College le Book Centre neitu; Laldatlien, Air India Station Manager, Newark, USA; Haulienhlu, Bata Company Agent le Young Learner’s School neitu; le Khupneikham, dawr siema sumdawng- hai chu an thawna chitah mi hlawtling tak an ni vong.

Liensangvung le L.Rokung hi laibung, thilthawna taphota inthlop hlak an ni ang hrimin kum 1964 khan L & R Printing Press an tran a, Churachandpur khawpui sunga Printing Press hmasa tak a nih. Chun, Liensangvung hin 1946 khan Thenmuol khuo indin phalna sorkarah ama hmingin a lak a, amain a umngha hman naw leiin a unaupain a enkol a, khaw inthuruol takin tu chen hin a hung inthrang pei a, sapthei ching tienga hmathruoitu poimaw le kohran pakhata local church-a ngir, khaw enton tlak a nih.

Leisen maksanin, Parbung tieng inson inla. Hi khuoa Compounder hming ka zuk hriet suok thei po chu Phaka, H.L.Ngura, Thangthruom, Ngamtawnglien le Thangkhawlien hai an nih. Hienghai laia pakhat, H.L.Ngura hi entirna dingin hang la bing inla. A nau pasalhai laia upa tak Lallukhum Fimate (Dr. L.Fimate) chu RIMS-a Director ni lai hi a nih. Ama hi Forensic tienga Hmarhai laia Post-Graduate hmasa tak, Professor kai hmasa tak le Zo hnathlakhai chauh khom ni lo, India hmar sak mihai laia Indian Academy of Forensic Medicine-a President (2000-2003) kai hmasa tak, sak tlangmihai laia arasi lien le var mawi a nih. Chu el khom chu ni loin, an nupain an nauhai minu pathum top MD ni phak dingin an enkol suok a nih. An sangpa Rose Infimate, RPC-a Executive Secretary ni lai chu India rama Children’s Homes lai po poa hlawtling taka ngai phur suoktu a nih. Guwahatia khawsa an mi tlum tak Lalchawisang Infimate chu Guwahati Doordarshana Production Assistant ni pum zinga Hebron Children’s Home enkoltu le kohrana mi trangkai tak a nih.

Hebrai ziektu thukhawchangin, ei la hril pei di’m a ni? Thanlona kum 1937-a ka u Vanhnuoithang a thi lai khoma Compounder-a lo thrang tah H.B.Duma hai; Indopuina Pahnina laia hmelma kuta thi Compounder Thlunga, Pastor Maka nuhmei Lalhlun pa hai; kum 1955-56 laia mission hmunpui ngirna Sielmat khuo indintu le lal, Compounder K.Luoia le a makpa Compounder Darchunghnung hai; Hill Town (Churachandpur) indintu Compounder Thangzam le a naupa Dr. Thangkhum hai; ka nuhmei pu neisun le a pusum fatu Compounder Nguna hai; Tuisen tieng hmun khuora Tuiruong dunga rongbawl Compounder Sawithang le a nuhmei, nurse hmasa Hmingi hai; nurse hmasa tak nia hriet Lalkim hai; mi hmet dam thiem Hmanga le a naupa Dr. Liensang hai le mi dang dang chanchin ziek pei ding ni inla, hunin a mi dai teuh awm si nawh.

Chuleiin, hi artikul hi a sei taluo tah leiin, kan khuo Pherzawl tlang khom kai hman loin, keini insung bing tieng kei lutin khar tum tah lem inla. June 15, 2002-a muol mi lo liemsan tah ka u Kamzabiek kha keini unau laia Compounder um sun, College ka kai laia mi chawmtu a nih. Ka nuhmei, Rev. Zakhum naunu Dari hi Registered Nurse a ni a, MA kan chuk sung le Competitive Exam ka buon laia mi somdawltu le tu chena kan sungkuo khaidingtu ban nghet a nih. December 23, 2000-a muol lo liem tah a u Lalngatta chu Compounder a ni a, a nau upa tak Lalnunthar (Dr. Thari) chu tu hin RIMS-ah Forensic tieng Post-Graduate a thaw mek. A nau danghai khom sorkar le kohranah sin thawin mani kea ngir thei vong an nih. Kan sangnu Darneimawi chu nurse a ni a, a u Lalfakthang chu Kangreng Dispensary-a Assistant a ni el bakah daktor an um mumal naw leiin a dikri-in phak naw sien khom lo thei loa a thaw a trul tlat leia damnaw enkol dan a hung thiem suok leiin Vangai tlanga chu daktor ang ela an mi sor trangkai a nih. Kan sanghai Darhmangpui le Darsanglien naunuhai nurse pakhat ve ve an um bok. Tu chena, keima tieng le kan nu tienga inthoka damdawi sina inhmang ka hriet po chu, kan tuhai chena tiemin, 12 kan ni ve tah.

Hming tlawmte, inchuom phuora ka hung ziek langhai hi ei thupui hril hongna dinga entirna chaua ka hung thur suok a nih. Hi taka inthok ringot khom hin damdawi tienga inhmanghai hi ram le hnam le kohran le sungkuo bulthrut remtu le ban poimaw an nizie hmu thei a nih. Chuong khopa ngirhmun poimaw chel an ni leiin an chanchin hi fumfe taka research thaw a, lekhabua insuo ngei ngei chi niin ka hriet. Chuonga ei thaw thei a ni chun Zohnathlakhai histawria bung le chang poimaw tak ei hum ning a tih. Anni hmanga Lalpan thil ropui tak ei chunga a thaw puong dar hi ei tha bat sut ding, ei liengkoa mawphurna innghat chu a nih. Chu chu iemani chen ka hung hlen thei leiin ka lawm. Damdawi tienga inhmang po po hai kut Lalpan nasa nawk zuola a hmang peina dingin ditsakna insang tak ka’n hlan.

(Doctor’s Day, July 1, 2009, Delhi)