Saruokna (Nakedness)

Adam le a nuhmei chu saruokin an um a,
sienkhom an inzak nawh. Gen. 2:25

Thil dang daih artikul ziek dinga ka’n buotsai laiin, tu laia HYG-a titina thupui pakhat chu a haihu laia tar lang thra lem dinga ringna ka nei thut leiin, hi titinaa thranghai phalna khom la chuong kher loin, an thil ziekhai chu a ni dan ang angin, ka hung tar lang a nih.

A thupui chu SARUOKNA a nih. Hi hi secular term-a chu ‘Nudity’ ti ding ni sien khom lungril le thlarau tieng huop zawnga religious term-a hmang dingin ‘Nakedness’ ti hih indik lemah ka ngai leiin ka hmang a nih. Ei thu trobul chu Mizo thiempu pakhat, Aizawla Bishop hmasa tak (2002) Stephen Rotluanga lemziek (painting) a nih. Ama hi Roman Catholic thiempu a ni el bakah lemziek tienga inhnik le chemkal, Toronto-a Ontario College of Art & Design-a inthoka hming ser khopa inchuk suok ngat a nih. A hming hung inlar zuolna san tak khom saruok lim ziek a nih. Chu chu Pathien thilsiem mawizie le ropuizie tar langnaah a ngai. A thlirna mita inthoka thlir phak lohai chun mak le rapthlak an ti a, thiempu thaw chi lo hulhuolah an ngai. A tu am mitdel lem ti ruok chu iengkim saruoka siemtu Pathienin a hriet chieng tak ring a um.

Hi thua HYG-a titina ei hung tar lang dinga hin saruokna thu nek hmanin ei mizie thlungpui pahnih chieng em em ei hmu a. Pakhatna chu ei kawrongzie a nih. Hre awm taka thil ei hrilhai hi, ieng thu khom ni raw se, ei hang indawp chieng a, mi hril ei lo hriet sawng, a’n dik le indik naw mania sui fie tum loa mani lung tluk zawng zawnga ei phulpui a lo ni deu vong a nih. Ei kawrong dan inthukzie khom ei hriet phak naw a, hriet ei nuom bok nawh. Ei kawrongzie mi hriltu chu lawm thu hril neka thangtlawma laa theida ei ching. Pahnina chu, ei kawrongzie thup mawina dingin lemder le lemchang nun ei inchuk a, zeldinna bawiah ei intang a, ei nina anga saruoka inlang ngam ei um ta nawh. Chu zie pahni kol rawn tak chu tu dang ni loin ei thiempuhai le kohran thruoituhai an ni el thei. ‘Thlaraua inthoka ka hmu’ tia tlang insam rawn rawn hi a kawrong zuolhai an ni nuom. Thlaraua hmu tak takhai chu thli ang an ni a, an umna hmun hmunah tu hril tam ngai loin an nungchang le thu hrilah hriet el thei a nih. An fenâ na a’n hning a, an thu le hla fîmin mi a mut har a, a thawi dam bok. A ieng khom chu ni sien, a mimirin mani sengah ei ngirhmun ei inen chieng nuom a um.

Hi a hnuoia thu ei hung tar lang ding khom hi a tira Saptronga ripawttu thu zieka inthok chun lemziektuin saruok lem a ziek nuomna sanah buoina ding a um der nawh. A rûka a thaw hlak a ni naw a, saruok lem a ziekhai chu a’n zapui naw a, India ram le khawvel hmun hrang hranga art exhibition-a khom a lemziekhai inentir tah hlak a nih ti ei hmuh. Ama chu a thilthawah a chieng a, a buoi nawh. A buoihai chu lemderna le lemchangna tukvera inthoka thlirtu le inkhituhai niin a’n lang. Sienkhom, an buoina thu hril si loin mi dang lekhabu ziek le lem ziek, chîk taka an tiem tah le bi tah khom ni lo, a lekhabu hmelhmang khom an la hmu ngai loah mi lutpui an tum a. A taka a hmun ngeia hmu tah le chuong lekhabuhai chu chip dura lo tiem tahai kha an mi sukluhai letling hlauh a nih.

Hi titi tlangnaa inthoka inchuk ding poimaw chu mi tienami phuok amanih bel chieng dawl lo thu hril amanih tak sawn a, a’n dik le a’n dik naw thlu loa thutak anga poma khukpui rak triumzie le chuong thil laka inveng fimkhur le inthier fihlim trulzie hriet a nih. Chu chu thruoitu le hotu nina ngirhmun cheltuhai ta dingin a poimaw zuol. A san chu ei thu khel khukpui kha ei rawihai khomin thudik sawna an lo khukpui ve pei hlak lei a nih. Ei lo inawk palh a ni khomin, ei intang a nih ti miin an mi hril hriet chara inlamlet a poimaw. Ei hriet hnung khoma lulul suoa ei inlamlet nuom naw chun khêl bawia intang song ei thlang lem tina a nih. Chu lungril tirdakum tak chun eini lai zung a thlak leiin, ei hmaa hung tlung el ding Gospel Centenary hmang thua khom ei khuongruol thei naw a nih.

Chu chu a khulang khanga hmangin, ei thu bi ding chu a hnuoia hin ka hung thur lang.

Mizo Bishop paints nude figures, says honoring 'God's creation'
By: Rinu Varghese [Saturday, 1 August 2009, 16:17 (IST)]

A Reverend in the northeast state of Mizoram has a very eccentric and unique hobby of painting: draw nude pictures of men and women. One of the first Mizo to be ordained a Bishop, Rev Stephen Rotluanga says his art of drawing nude pictures is nothing but plainly revealing human figures created by God.

The bishop of the Aizawl diocese is of an opinion that his paintings of nudity is only revealing God's glorious creation and further proves that God is the "greatest artist" of all time. For Rev Rotluanga, drawing human figures is his favourite subject like other great artists - Michael Angelo and Leonardo da Vinci.

Renaissance art has always been my favourite subject. The realism involved in it is a challenge for me not only as an artist but also as a priest. Subjects involving human beings have always been my core area of interest, the priest was quoted saying by the TOI.

Rev Rotluanga's exhibitions are held both in India and abroad. None of his works are available for sale.

Rev. Lalrosiem Songate:
A milim zawnga inhnik tak tak am annawleh porno addict reng reng?


L.Keivom:
World of arts or literature a chenghaiin saruok mawina (naked beauty) an hmu dan hre phak chinhai chai chi a ni ka ring.

Darsiemlien Ruolngul:
Fine Arts ei la hriet naw zie le ei la man phak naw zie chu Rev. Lalrosiem a question, a chunga ei hung suklanga inthok khin hril tam a ngai naw vieuin ka hriet. Chuleiin comment khom hang pekna chi niin ka la hriet nawh. Hui hah!

Remsang Pulamte:
A painting kha chu arts tienga experience leh inhnikna nei hai comment ding ni sien. A ziektupa profession (pastor) leh saruok lem ziek ruok kha chu mi tuelkhawmin ei comment a thiengin ngai in la. An report dan khan Rev Rotluanga hi painting (general) a inhnik ni lovin mihriem lim ziek inhnikna nei lem a nih. A pastor nina leh chu anhme ti lem chu an tam bekin ka ring nawh. Suol thupha chawi dinga mani nuhmei/nau nunghak hai a kawla tir nuom chu ei la tlawm nawk zuolin ka ring bawk.

Ka dem nawh a chu Pathien thu hrilna ding chun a saruok painting hai hi a hlawk bekin ka ring nawh tulai khawvel a ding chun.

Malsawmthang Keivom:
Arcade painting ka hmu pakhat chu mak ve ang reng. Metre 30 vela hla-ah ka en chun nuhmei pahnih inentuo angin a'nlang a, metre 10 vela hnai ah ka en nawk chun nuhmei pakhat angin ka hmu nawk a. Chuongang bawk chun bawg lim an ziek bawka. Lung lut a um ngei. Tuta ka hmu ang hin midangin an lo hmu kher kher nawh. Hi milim hai hi thla la in la, a effect a pangngai di'm aw ti dam a nih ka ngaituo. Hi painting umna hmun hi dawr lien le ropui tak tak umna a nih. Dawra an thil zawr hai nek hman khan arcade painting hlutna kha a'nsang lem daiin ka hriet.

Hi Mizo Pastor mi ler chungchuong ni awm tak hin 'Adam le Evi saruokna' kha ning a ti a hril tum? Nuhmei saruokna hi pasal ta dinga thlemtu po poa Thlemtu hmangruo lien tak a ni zie a hril tum ning a ti? Saruokna hi Lalpa Pathien hma-a chun a mawi zie le, mihriemin thup nei loa Lalpa Pathien hma-a ei inlang dan ding indik tak a hril tumna ning a ti? Mihriemin thup tit tet nei loa fie kawnga ei inlang hin Krista Mo dit tak ei nina suklangtu, Isu Krista ta dinga nuhmei dit um ngawi ngawi ei nina suklangtu a ni ding? Lapa Pathien hma-a hin saruok el ei nih. Thuomhnaw mawi tak tak hakin, nuhmeiin an nene le an zamaw thupin, pasalin an tilte thup bawkin inthuom hlak de hai sien khawm, Lalpa iengkim hmutlangtu chun saruok vawngin a nih a mi hmu tawl chuh! Ei saruokna leh Lalpa ei pan pha chun, ngaina takin A mi lo pawm ngawi ngawi hlak a nih. Krista mo hai ei ni sia.

Rev. Lalrosiem Songate:
US Michigan state a Seminarya kan umlaia kan hotu pakhat chu Dr. Cynthia Holder Rich a na, Contextual Theology a min chuktir a nih. A teaching hmangruo pakhat chu paintings a nih. Khawvel rambung hran hrana biblical figures an ziekhai a hung lak khawma chuong milimhaia inthawka an context dungzuia Bible thu an lakdanhai a hang hrilfie chu ngainuom um tak an nih.

Paintings hmangin mi han story/idea an lo convey hlaka, Fine Arts tieng inhnik mihai ta ding chun a hlu em em lain a hrelohai ta ding ruok chun umzie a nei naw hle thung. Leonardo da Vinci in The Last Supper lim a ziek kha mawi ei tia ei tar ferfur tawla, a idea convey ruok kha chu hre inla a tar nuom ei um meu ring a um nawh. Leonardo in kha milim hmanga a hril tum chu Mari Magdalene le Isu in ngaizawngna thu a lo ni zing el. Isu awma thle kha hmangai Johan ei lo sawn hlak, pasal khawm an sam a sei hlak leiin a lo awm em em. Anachu ei hang bie chienga nuhmei a ni tlat, hnerhmul khawm a nei nawh. Da Vinci Code film a hung suoka ei hriet tawl chau a ni khah!

Chun Rev Rotluanga chungchang thu kha hang hril nawk ta in la. Hieng anga professional painter hai chun milim an ziek hin a mihriem tak tak entawnin an ziek hlak. Nuhmei saruok lim ziek hi an uor bik bawk, nuhmei saruok lai an bula inumtirin chu entawnin an ziek hlak. Hnam changkanga hai chun ienga khawm an ngainaw khawm a ni thei bawk.

Rev. Rotluanga hi Roman Catholic sakhuoa um sakhaw rawngbawltu a na, chuleiin nuhmei neilo chu a ni ngei ding a nih. Chuchun mihriem saruok lim ziek an hnik vieu a ni chun nuhmei/pasal saruok a umlai entawnin a ziek hlak ding niawm a na. Pasal saruoka um bula chun a buoi dal thei, unless he is GAY.

Nuhmei saruok lim a ziek ding chun nuhmei saruoka umlai a entawn ngei awm si a, hmu thei po po a hmuchieng awm bawk, midang hung lut hlak remlo bawk ding a ni leiin pindan sungrila hai khawm a ni el thei bawk. Ama hlak chu nuhmei neilo ni bawk.Pasal pangngai a ni bawk si chun vawikhat chau khawm nilo, hobby a nei hiel a ni bawk si chun sex khawm lo hobby sa naw nih, ti tum hril thei ding?

Sakhuo rawngbawltu ni leia suol theilo ei ni bik bawk si nawh. German-born American Theologian and Philosopher, a lekhabu ziek Contemporary Theology inchuk phawtin an inchuk sa ngei ngei, Paul Tillich khawm kha a thi hnungin a bedroom closet sunga nunghak saruok a um thlalak an hmu dawk teu el an ti chu! Einilai khawm rawngbawltu hienga hril ding ei tam, kei a ziektu ngei khawm ka tlu thei bawk. Bible in Tukhawm ngira inngai chu fimkhur rawseh, tlu rawi a tih,a ti kha hre zingin Rev. Rotluanga thil thaw a inthawka ngairuot thei awma inlang ka hung ziek a nih.

John H.Ruolngul:
Rev. Rotluanga hobby chu thu dang a lo sie inla. Milan a Da Vinci painting The Last Supper chungchang, Dan Brown in thiem taluo ringota a ziek 'The Da Vinci Code' kha thutak anga tu chen a ngai ei um hi mak tak chu a nih. Gospel truth ang ela "Leonardo in kha milim hmanga a hril tum chu Mari Magdalene le Isu inngaizawngna thu a lo ni zing el" hang ti el chu pangzat a um ngei el. Pathien thu le Bible hre vieu dinga ngaihai khoma mi pakhatin a ngaituona novel/fiction a ziek mei meiin ami thruoi kawi el am an ta? Hieng ang fiction/novel thutaka ei lak pei ding a ni chun, ngaituo um tak ei nih. Rev Rotluanga a hobby khom hi hre thiem lo ding reng ei nih.

Rev. Lalrosiem Songate:
Da Vinci Code kha ka pawm niloin Isu-Magdalin affair a suklang zie ka hung hrilna lem a nia, ka suk fie tawk thoin ka hriet. Chun Isu hi Mari Magdalin le inngaizawng anga an hril khawm hi ka pawm bawk nawh. Hi ang ngaidan a umzie ka hung suklangna lem a nih. Chun ngai kawi nuom ta ding chun iengkim hi ngai kawi thei vawng a nih. Keiin Rev. Rotluanga ka ngaikawi dan ruok hi chu awm-khan tak a nih. A milim zieka mihriem tak tak a entawn ngainaw a ni khawmin Pathien thilsiem thiem zie hrietthiem zuolna dinga nuhmei nei thienglopa kher kherin mihriem/nuhmei saruok lim an hnik tlat hi a mak reng reng a nih.

Isu-Magdalin affair hi Da Vinci Code chau khawm niloin ziektu dang dang khawmin an suklang hlaka, Setan thilthaw ropui tak pakhat a nih. The Last Temptation of Christ ti film khawm khan hi thu bawk hi a suklang. German Scholar pakhat lem chun detail research a thaw hnungin DID JESUS REALLY LIVE IN KASHMIR (a buhming hi ka sure nawh) ti lekhabu a ziek a. Isu kha Kros lera khan a thidang mei meia na, thlan khursung hnuoi sung deia a zuk zal khan a hung harsuok nawka, vengtuhai hrietloin an rel dawka, hmar tieng, Syria ram pal tlangin Afghanistan, Pakistan fe thlengin Kashmir ah a chenga, nuhmei nau neiin tar kunin a dama chun a thi tiin a hrila, an sungkuo thlan lung ni awm tak tak khawm a suklang bawk. Hi ang ngaidan hi Muslim han an inzawlpui thiem em em, a san chu Isu hi an Mahamad le inzawl tawka ngai thei ani leiin a nih.

Hieng hi ei Gospel thuring suksiet tuma Setan in khawvel mithiem le varhai hmanga a sinthaw a na, Juda lekhathawnin ringtuhai a lo infuina hi tulai khawm hin a relevent tawk hle a nih.

"Beloved, when I gave all diligence to write unto you of the common salvation, it was needful for me to write unto you, and exhort you that ye should earnestly contend for the faith which was once delivered unto the saints. For there are certain men crept in unawares, who were before of old ordained to this condemnation, ungodly men, turning the grace of our God into lasciviousness, and denying the only Lord God, and our Lord Jesus Christ."

Lalmalsawm Sungte:
'Da Vinci Code' is only a fictional novel. You can check the book, it clearly states it 'is a work of fiction' an nothing more.

Remsang Pulamte:
Pu Lalrosiem, hi laia Da Vinci Code i hung hril hi chu kristien hai chau ni lo khawvel mihai khawma an pawm lo a nih.
Da Vinci code kha work of fiction, tienami a na, a ziektu Dan Brown khawm kha mi thenkhat in an thil ziek inru a an khing nghe nghe. Fictional works a lawr khawm a ni deu tak ani kha. A novel a um Priory of Sion an ti hai dam kha a tak a um lo a ngai an na, mi i lo phuokfawm lem an ni. Chuongang a thil zieka khan thil a taka um si inthangsatir sienkhawm a hung um dan leh a entir naw dan zawng daia mi lungril lakna dinga khel a phuok fawm a ni kha.

Chuleitak chun an nawm a movie a hung suok ding khan khawvela kristian popo deu thawin banned dinga an khek. Fiction el khawm ni sien, an based na kha Isu Krista leh kristien hai thubul a ni tlat leiin ei dit naw em em a ni lem a ni kha. Leonardo Da Vinci a painting 'The Last Supper' a Johan ni lova Mari Magdalin, Isu nuhmei lem a ni ti khawm kha khel a ni. An hril dan chun Da Vinci kha Isu Krista thuruk thenkhat vantlang hriet lo dinga kawl thratu pawla thang vea ngai a nih. Sienkhawm ei ti ang khan hi society hi a um tak tak ti hriet chieng an nawh, tienlaia an ring thu tienami ang a an lo ziek lem ni awm in an lang.

Isu Krista hun lai leh kristien kohhran insiengtir laia mi chanchin ziek tam tak hmu ding a um a. Anachu pawm tlak leh ring tlak ruok chu an ni vawng nawh. A hrie chieng lem hai in hung hril zawm hai sien nuom a um ngei.

Lalrosiem Songate:
Thanks for the clarification. Hi thu tak hi ka lo belchieng ngai nawa, ka material lakna a fuk naw deu a nih.

Remsang Pulamte:
Pu Lalrosiem thangna hi kei chu ngaituo tham takin ka hriet. A pastor (Rev Rotluanga) takin iengleia hi saruok painting hobby kher hi a thlang am ani ding maw? Arts ngainatuohai chun dem naw ni hai. Nisienkhawm, ama profession tak pastor anina leh hin an hme am ti lem a ni.

Ka hril ta ang khan suol thupha chawi dingin ei nau nuhmei amani ei ngaizawng hai amani, ei nuhmei hai amani ama va pan vang vang dingin ei tir nuom dim? RC hai lem hi chu pindanah an naw confession an nei hlak? Bielah ama chau pastor um dam ni sien, ei tir nuomnaw dingzie chu a painting hai sawisel/hrilsiet ding nei tam hleng ei tih ka ring lem a ni.

Nuhmei pastor/kohhran rawngbawltu dam hi beach volley ball bikini hakin inkhel zak zak sien, annawleh a tleirawl inthawka a hobby cheer leading la bei zek zek sien.

Kutzie en dam, mani taksa ah tattoo ziek dam... etc hobby hrang hrang hai hi pastor hai nei chiin kei chu ka hriet nawh.

Ei nina leh inhme lo, ei umna leh inhme lo thil a um hlak a. Kona dawnga Pathien rawngbawl dinga inpe ta chun mani hobby thlakhla em em hai khawm chan ngam ding an naw dimani ti chu ka ngaidan a ni.

Hi lekhabu la tiem lo hi ei la tam ning a tih. Ei thil hril dana inthawk hin mi tawngbaua inthawka ngaidan ei siem tawl mei mei a hawi.

L.Keivom:
Ei thu chai hi a painter am a painting lem khom hriet thei loin Da Vinci Code damin a mi zim buoi a, a zie naw khop el. Ieng khom ni sien, art appreciation-a hin ei la'n hnuoi bek bek leiin, tlawma ei thrathnempui takah tiin kum 1990-a Mizo tronga THE LAST SUPPER tawitea ka riviuna ka hung thon a. Hi hi Zoram khawvela art review-na artikul suok hmasa taka rikawt a ni nghe nghe. Chun, ‘The Da Vinci Code’ ka riviuna khom DT-ah an insuo a, a tiem nuom ei um chun la hung thon ka tih.