Centenary Darthlalang-2

If we abide by the principles taught by the Bible,
our country will go on prospering.
- Daniel Webster (1782-1852)

Kum za kristien intihai hin ei lemderna hmai kawr hlip vongin, ei nina ang charin centenary darthlalang hmaa hin ngir tah inla, hmai inchang chara mani hmelhmang en ngam mi ieng zat am um ei ti aw? Puo tienga ei inlang dan ang charin ei thla an lak a, ei hang inen a, ei lung a awi naw a, thla latu amanih a thlalakna amanih ei mawsiet a, “Ka’n ring naw lai tak i mi lak a, ka’n lang sie a nih. Mi hung la thra rawh” ei ti deuh fur ang hi a ni ka ring tlat chu tie. Ei inring naw lai tak thla hi ei ni dan tak a ni nuom lem rop. Ei inring hnunga lak chu ei inlang nuom dan, ei lemchang hmel a ni rawn tah lem. Ei nina tak neka thra lem daia inlang tum hi mihriem nuom dan a nih.

Tuta trum hin chu thil dang zep sa rak loin, kum za sunga pawlitiks tienga ei ngirhmun a tanbawsutin ei hril ding a nih. Thil fe le hung le ei histawri hi eini kut ngeia ei ziek a ni lai zingin, Chanchin Thra hung tlung hmaa ei ngirhmun le a hung tlung hnunga bulthrut a mi rempek dan khom a remchang dan ang peiin zep sa ei tum ding a nih.

Pawlitiks hmelhmang
A hmasa takin ei pawlitiks hmelhmang hang thlîr tlâng ei tih. Ei thil lut chilh hi Manipur simthlanga kristien sakhuo hung lut kum zana le inzom bik a ni leiin, chu biela chenghai chu ei lo thlur bing deuh a ni khomin, a thlengpui kiltu le a kaikuongpa an ni tlat leiin, hre thiem inla.

India ramin kum 1947-a zalenna a hmu hma khan Zo hnathlakhai lai hin tu laia pawlitiks tia ei hriet lar ang hi a rim a ra an la hriet naw a, a umzie tak lem chu an la man phak naw zuol. Chu chu ei hril lei chun pawlitiks sin an lo thaw nawh tina a ni nawh. Ei ke nghatsan ding hmun le ram dela an lo bengbel khan ei pawlitiks bulthrut an lo rem a; trong ser suok a, sukhmasawn a, thu le hla an mi maksanpek khan hnam hlawm khatah an mi lo indin suok a nih. Burma tienga tlangram ei lo hluohai chu ram khata hung inhlawmin 1948 khan Chin Hills Special Division ti a hung pieng a, chu chu Zo hnathlakhaiin State puitling ei nei hmasa tak a nih. Chu hnunga State pieng nawk chu 1972-a Mizoram Union Territory le 1987-a State puitlinga hlangkai a ni kha a nih.

Chin Hills-a inthoka Zo hnathlakhai laia thlang tla hmasa chu Hmar hnathlakhai, Bengalihai zu paw hmasatu le ‘Kuki’ hming put hmasa tak an nih. Amiruokchu, inthuruol nachang hre loa mani pahnam senga inkholbing an ni leiin ram hlawm pakhat khom siem loin hmun tinah an inchek dar a, State lien tak nei thei dinghai kha anni hminga kepha bok tiet khom rambung nei loin an la khawsa a nih. Tuta Kuki hming put tah, Thado-Haokip-Khuongsai intihai khom hin Manipur tlangram, Nagahai del naw po deuthawah lalna chang ni hai sien khom inthuruol nachang hre lo an ni leiin anni puola State puitling suol suok tumin ralthuom lekin ri sukse rakhai sien khom anni hmingin sunhang khat khom rambung an la nei bik bok nawh. Luseihai, abikin Zahmuoka thlahai ruok chun inthuruol nachang an hriet leiin an ram hluoa cheng Zo hnathlak po po hui khawmin trong khat hmang ramah an siem a, Lushai Hills District a hung pieng a, chu taka inthokin Mizoram Union Territory (1972) le Mizoram State (1987) a hung pieng tah pei a nih.

Tu hin a ru inlangin, a tawi thei ang takin, Hmar hnathlakhai ngirhmun hang sui ei tih. Lusei lal, abikin Sailo lalhai hnuoia Hmar hnathlak pahnam hrang hrang umhai chun Dulien trong le inpolin trong thar, tu pahnam trong bik khom ni lo, an hung ser suok a. Chu trong chu Hmar hnathlak, thlang lo tla tahai chun “Khawsak Trong’ tiin an ko a. Sailo lalhai an hung indo hnungin, remchanga lain tam tak an suok a, hmar tieng an pan a, chuonghai chu ‘Hmarho’ tiin an ko-fiem hlak a, a hnungah anni rawiin inkona hming tlanglawnah an hung hmang a, ‘Hmar’ ti hnam hming hi a hung pieng tah a nih. Hienghai hi Chanchin Thra a hung lut khan a dong hmasatu laia mi an ni bakah an trong hmang chu Chanchin Thra the darna hmangruo le lekha tronga hmang a hung ni tah pei leiin hnam hming tlanglawn le trong tuollengah ‘Hmar’ le ‘Hmar Trong’ ti hi anni tum le suol suok hrim khom ni dêr loin an hung inchang el tah a nih.

Arthatzawl pawlitiks
Manipur sim-thlanga Saptlangval hmanga kristien sakhuo a hung lut khan thu le hla iengkima chakkhai an lakna chu Mizoram a nih. Thruoitu, zirtirtu le tirko hmasahai po po deuthaw kha Mizoram mi an ni naw leh Mizorama pieng le Manipura hung inpem lut deu vong an nih. Thu le hla iengkim chu Lusei tronga inziek vong a ni el bakah, Roman Catholic haiin Latin trong chu Pathien biekna trong bik ang hiela an hung ngai ang khan, Lusei trong chu Pathien biekna trong ang hiela an ngai a nih. Mani hnam tronga thu an hril chang khom, an trongtrai pha Lusei trong kherin an thaw hlak. Zieka khapna um naw sien khom hla hrim hrim khom Lusei trong khera sak le phuok dinga ngaina a um leiin an hla phuok hmasahai po po chu Lusei trong vong a nih.

Kum 1922 January 11-a Field Superintendent hmasa tak R. Dala a thi khan Tlangsang (Jampui Hills) a um H.K.Dohnun chu a ai awtu dingin Saptlangvalin a ruot a, an hmunpui khom Tinsuonga inthokin Lakhipur (Hmarkhawlien) ah an son a. Dohnun hi Hmar hnama khom Khawbung a ni a, sienkhom Lusei trong hmang a nih. Amain a hung enkol hnung hin Hmar tronga hla phuok a hung sukhmu leiin Thangngur le mi hrang hrang baua inthokin hla ropui tak tak Hmar trongin a hung far thla a. Chuong lai huna chun misawnari ropui, thu le hla tieng le inchukna tienga tluk lo rim innam, sienkhom Mizo nunghak le inkopa an hril thang leia Mizoram hmar tienga Welsh Mission rongbawlnaaa inthoka an inchawltir, sienkhom a hnunga rongbawlpui dinga Watkin Roberts-in a lak, Edwin Rowlands (Zosapthara) inrawina hnuoiah Hmar tronga hla an phuokhai chu kum 1923 khan a bua siemin an sut a, chu chu Hmar tronga kristien hlabu suok hmasa tak a nih.

An chanchin maksana inthoka ei hmu danin, Dohnun kha Watkin Roberts-in kut-kea a ngai, mingo misawnari sawm hiel hena a hril, iengkima a’n thloppui a ni leiin R. Dala thi hnunga a nuhmei thisan hung neitu Lianhawla le Lusei trong hmang, a’n thuopuihai chun nasa takin an thik a, hnam danghai infuipor a, let thlak dan ding thu an phier a. Kum 1926-a Senvona inkhawmpui an nei trumin, Hmar ni lo po a rûkin R. Dala in hmun hluiah, Saptlangval le Dohnun bàn dan ding rêlin an inhmu khawm a. Hienghai kut char hi Coleman-in Watkin Roberts khing thlakna dingin a hnungah a hung hmang a nih. Hi an inkhawmna hmun hi a kum nawk khawhrawngin a sawi chim vong bakah a kakhawk a la fe pei a, chu huoisuol fe pei chu voisun chen hin na takin Churachandpur Biela um Zo hnathlakhai chun ei la tuor pei a nih. January 24, 1986 khan hi hmun hi ka sir a, Arthatzawl Pawlitiks le Misawn Buoina ti thupuia hmangin artikul sei tak ka ziek nghe nghe a. Hienga inthuruol thei lo dinga mi thre dartu hi histawrian tarmit hmanga ei bi chun mission buoinaa intran, ei mit sukdeltu Coleman Factor tia ei hril hi a lo ni chieng khop el.

Coleman Factor-in sin a thaw dan le a kakhawk pei danhai hi mi thiemhaiin la hung sui pei an ta, an sui inthuk po leh a rapthlakzie la hung hre deu deu an tih. Thlaraua inthuk ngiel ngiela inngaihai khom a dawi vet a, hnam bing tranna lungril sosangin a sung sip a, a hnam bing thratna dinga ngai thil a ni phot chun thil thra naw khom thil thra vonga inngaitirna lungril a’n puttir a, ‘Mosie khomin a hnam chanpui a tran leiin Aigupta mi a that tho annawm’ ti thukhawchang hmangin kholbing pawlitiks-ah tin le ha leh thrangin hmun a’n khuortir el a nih. Chu chun tekem a nei a, chu kholbing lungril chun kholbing chin lem a hring sawng pei a, a tawpah sungkuoah a lut vong el a nih.

Hi kholbingna lungrila hin hnam dam khawsuokna a um nawh; hnampui (nation) a insiemna ding daltu a ni bok. Chu entirna thra tak chu Coleman Factor-in a up khum tlat Manipur South District hi a nih. Hnam tinin mani hnam bing pawl ei nei far a, hnam sipai ei nei deuh seng bok a. Chu umzie chu him tawkah ei inngai naw seng lei le mani hnam bing senga ngirhmun inzaum nor suok ei tum lei a nih. Hnam sipai ei nei rawn po leh a tekêm, a hnam bing sungah an hung suok rawn el. Iengkim chu hnam thilah ei lak a, khawlaia goonda ruol insuol khom hnam le hnam insuolin ei lak tum vong el a nih. A khuo a chin leh pahnam zawngin a fe a; chun, khaw sung thil a ni naw leh hnam bing zawngin a fe bok. Chuonga fe peiin, Churachandpur khawpui, vêng hrang hrang inbel khawm khawpui chu vêng pakhat hminga ko tràl trâl tum pawl le chu dinga tharum hiel thaw nuom pawl khom ei hung suok el a nih.

Ei Centenary hmang le inzom hin Coleman Factor-in sin a thaw dan hang bi vak ei tih. A hmaa ei hril vuoi tah ang khan, Arthatzawl pawlitiks tia ei hril char hi kum 1929-a NEIGM sunga buoina a hung tlung khan a mission phuntu Watkin Roberts suot thlakna dingin H.H.Coleman chun a hung hmang a nih ti sulhnung an maksana inthokin chieng takin a’n lang. Chuonghai laia a hung bekbor tak chu a hmaa ei hril tah R.Dala nuhmei thisan hung neitu Lianhawla a nih. Mission an vuok dar hnung khan a hmunpui chu Old Churachandpur-ah son a ni a. Chu taka chun Coleman Factor-in a zepui a hung insuo tak tak a, a thupui hmang chu British-hai pawlisia an hril vet ‘Divide and Rule’, inthuruol thei lo dinga kei thre vonga inlal khum, a mal mala hmal tril a nih. Hnam tinin mani trong thu le hla senga Pathien biek thratzie an hung hril mawi a, Baibul khom mani trong sengin an hung inlet tah pei a. Kha hmaa Lusei trong thu le hla vong an hmang hlak kha mani trong sengin damten a hung hlan tiel tiel a. Chu ruol chun Lusei trong hmang, Manipur puo tienga inthoka hung, a sungpui chan changa inngaihai kha an hung intar tran a, Lianhawla ngei khom kha lungawi loa tlan suok hmasa pawlah a hung thrang tah a nih. A tawpah Lusei trong hmang po kha Presbyterian-ah an insung lut tah vong a nih.

NEIGM sunga hnam dang dang umhai kha aite fun suol an ti chu nepte, Presbytery khata um tlang dinghai khom kha thu le hla le lungril ramah an hung khuongruol tah naw leiin hnam bing sengin Presbytery an hung nei a. Inkhawmpui lien an nei zat deuthawin an insuikhawm theina ding zongin hming thar an phuok a, an phuok rawn po leh bel koi khit khawm ang elin an trè nasa deu deu el a nih. A tawpah a threnin Baptist, a threnin Presbyterian le kohran hrang hrang an zom a, NEIGM khom a atawpah tra liemtu ding um loin, a thlan ding kum tam taka inthoka an lo cho lawkna America-ah 1985 khan vui liem songin a lo um tah a nih.

Hmar hnam bing sung hang bi vak inla. Kum 1946-47 laia Mizo Union ei khukpui rak hnung khan hnam binga District suol suok tumin political party ei hung indin a, hming bulah ‘Hmar’ ti ei hung bel tràt vong a, ei ngai khom a thra hle. Ei thaw ang angin hnam dang khomin an hnam hming khelah ‘National’ ti bel sengin political party an hung indin ve a, ei khu mar mar a, Churachandpur khawpui chu a khaw lien le inphua khawvela ‘National President’ ti hming put an tamna taka hril a hung kai hiel a nih. Chu chun eini lai Coleman Factor-in hmun a hluo tlatzie a hril fie chieng hle.

Iem a ra suok? A tu hnam khomin pawlitiks tieng inches khat khom hma ei la sawn naw a, sunhang khat khom ei ramri bak ei la lak belsa bok nawh. Inthuruolin nor tlang inla chu, autonomous status ei neina sawt tang a tih. Ei inthuruol lai khan ei ram del sungah hnam dang ngampa takin an hung lut ngam nawh. Tu hin hnam sipai indinin, mani seng puon indelkil ei tum leiin ei him naw deu deu a, hnam dangin an mi zuom deu deu bok. Hnam sipai ei hau po leh ei him naw zuol a, invot anga hnam thisen dawktu an ni leiin, hnam sipai nei rawn rawn chu an tuor a sa zuol ting el a nih. Pheng ngawi ngawi inla khom Coleman Factor leia ei Frankenstein Monster (ramhuoipui) indinhai hi ei dawibur sunga khum nawk dan tu khomin ei hriet ta bok si nawh. Ei trongtrai rawnin kori a tuk nawh.

Kum 1956 lai khan Coleman Factor bok hmangin Hmar kohranhai chu suikhawm tumin hma ei lak a, iemani chen chu ei hlawtling hlein ei inngai a, ei inthrang hlut hlut a nih. Amiruokchu, kum 1968 ei hung tlung a, Coleman Factor bokin a mi daidar nawk a, ei inbakkei ri khom a se hle. Chu chu a hretu le tuortu vong ei nih. Chu chun nasa takin pawlitiks buzawlah kakhawk a nei a nih. Chuong thu chu a thren a zar a hnuoia hin ei hung tar lang pei ding a nih. A ieng po khom hril inla, pom nuomin pom nuom naw inla, lungruol taka a nia Gospel Centenary ei hmang tlang thei nawna san hi thil dang ni loin Arthatzawl pawlitiks le Coleman Factor a ni ngar ngar.

Chu hripui paituhai chun ei fena taphotah ei phur a, mi dang ei kaizap pei a, pangzatum deu ei nih. Vairampura chenghai khom hi ei bobang chuong nawh. Delhi tlang hi entirna thra tak a nih. Zo hnathlakhai chu Fellowship hrang hrang 17 laiin ei inthre a, dai ei insakkhum seng a, Believe it or not, ei thupui chu Gospel nekin, ‘Long live, Coleman Factor’ a nih. Chu chu damtea hnam dangin an mi chimralna hmangruo a nih ti ei hriet thei nawna dinga ei na suksettu le ei mit sukdeltu thlarau suol chu eini lai a hrat deu deu khom a hoi khop el. Poi deu a nih.

Kholbing pawlitiks
Khawvel hmun tina pawlitiks inlumlet dan ei bi chieng chun, chikte tea inlak hrana inkholbinghai nekin lien lema hnam khat amanih rambung lien lema inhlawm khawm dan thiemhai chu an dingchang lem pei a nih. Eini rawi hriet thiem zawng, entirna thra tak chu Israelhai an nih. Hnam khata inhlawm khawm a, Saula, Davida le Solomon lalna hnuoia lalram ropui tak an indin kha Solomon thi hnunga ram hnia an hung inthre dar leiin anni le anni an hung indo a, a ni têlin an se tiel tiel a, BC 721 lai khan Israel hnam sawm chu an riral thrak a. A dang la um sunhai khom Babulon salah intangin, khawvel hmun hrang hrangah an invak dar a. Thrangruol nachang an hung hriet hnungin damten thrang an hung lak a, Pathien hnam thlanga an ni leiin kum 2700 deuthaw hnungah 1948 khan Israel ram a hung pieng nawk chauh a nih.

Inrem thei lo le hrat thei loa Israelhai siemtu kha ieng am a na? Tuta ei hril, Coleman Factor tho hi a nih. Churachandpur Biela Zo hnathlakhai mi vaw dartu khom Arthatzawl pawlitiks le Coleman Factor hi a ni ngat ngat a nih. Chu chu khaw lai hmuna khom Setan hemfung thlak a ni ngat ngat. Sienkhom, chu kansarin a man tahai chun an sietpui ding a nih ti ngaituo nachang hre loin, mani hnam bing hmangaina le chu dinga thrahnemngaina firfiek chun an lungril le ngaituona a dawi vêt tlat a, khaw dang an hmu thei nawh. Inthlangah national amanih regional party hmingin thaw de hlak inla khom a thei tak tak naw a, a tawpah hnam bing thilah ei kei lut vong a nih. Kohran pawl hrang hrang fe dan le inbuk khawm dan khom chuong ang tho chu a nih.

Hmar hnam bing pawlitiks ei sui chun, Mizo Union ei inruipui san tak kha a hrana hnam binga insung khawm ni loin, Manipur-a inthoka suok a, Greater Mizoramah insung lut a, ‘Mizo Sorkar’ hnuoia um a nih. Kha lungril, Zo hnathlakhai insuikhawm chakna thlarau kha, Watkin Roberts misawn phun, buoinain a hung nang hmaa Zo hnathlakhai po po lungruol taka kohran huong khatah inlawi a, hma nasa taka la a, hrat taka eini sunga ramthim ei nor kaw duok duok lai lungril leh khan a danglamna a um nawh.

Sienkhom a thuah ei hmin tlanga chu tak ram umzie ei lo la hriet chieng naw leiin lunghnurna nasa tak intluntu a hung ni tah lem a. Pawlitiks khawvelah thil thei lo a um nawh ti a ni lai zingin, a hmaa ramri an lo khang ta sa thriek hi thil namen lo a nizie ei lo hriet chieng naw a. Manipur, Maharaja inlalna hnuoia um, British-haiin an rama an lak lut khom ni lo, an rorelna le thuneina chauh an hmangna ram kha nuom nuoma sat thlak a, Zoram bung pakhat laia bel el thei ni dinga an lo mawl ring kha ni ta loin, India ramin zalenna a hung hmu khan British hun laia Assam, Tripura & Manipur ramri khang sa khah iengkhom sukdanglam loin India chun a hung rochung a. Mizo Union thruoitu lokhai kha Mizoram mi nek hmanin Tripura le Cachar tieng mi tam lem hman hai sien khom ramri inchis khat khom an son thei nawh. Son tumin thrang la rakhai sien khom thaw el thei a ni bok nawh. Kum 1971/72-a India hmar sak ram an hung sawi danglam khom khan Assam ram sunga um ramhai chauh an sawi danglam a, Manipur le Tripura chu an tawk chang naw hrim hrim a nih. India-in zalenna a hmu hmaa inthoka pawlitiks lo tran tah Nagahai khomin voisun chen hin Manipur ramri sunhang khat khom an la tawk chang thei nawh.

Khanga Mizo Union hnuoia ei lo beisei kha a hlamzui phing leh Coleman Factor a hung tho a, hnam bing zawnga pawlitiks khel nuomna lungril einiah tuin a um a. Greater Mizoram hnuoia ei lut thei hri naw kha propaganda remchanga hmangin, Mizo Union hotuhaiin an mi hnawl leia thil tlung angin ei hril thang a. Chun, Mizo Union ei inruipui laia mi threltu dinga Hmar Biela Manipur Chief Minister P.B.Singh a hung inzin truma a hril anga ei hril thang, “In thil ngiet, Manipura inthoka suok dok in tum hi tawpsan unla, District peng kan ti cheu” ti dam hu thidik a ni le ni naw fie si loin ei changchawi a. Hi thil hi P.B.Singh dam lai ngeiin ring tlak mi thiem threnkhatin an indon chieng a, a nui a’n za khop el. Khang hun lai khan Manipur hi District pakhat, Borsap khom pakhat chauh nei, sienkhom State chu ni si a ni a, District-State in District dang a pek dinga hril chu thu bo, propaganda a ni hmel hle.

Sienkhom, hi propagandaa hin Manipura Hmarhai hi tu chena intang a tam lem ei la nih. Hienga nuorna ding san ei phuok suoka inthok hin mani hnam puola ngirhmun suol suok tumin kholbing pawlitiks-ah ei hung lut a, Hmar Mongolian Federation ti dam le Rochunga Pudaite phun Hmar National Congress (HNC) ti dam a hung pieng a. HNC hi miin an bawr nasa hle a, H.Thanglora thruoi Mizo Union-a la inhnik zing hai leh an hung inchal tauh tran a. Hienga pawl hnia inthre hi a suktawp dan zonga voi iemani zat an inkhawm hnungin, Hmar National Union (HNU) ti hnuoia insung khawm vong dingin an remti tlang a, kum 1958/1959-in HNU chu a hung pieng tah a nih.

HNU pienga inthok hin India sorkar laipuiah Hmar hnathlakhai umna ram inrituona po po khoi thlaka District pakhata siem dinga hnina chu pek tran a ni a. Kum khat hnung, February 1960-a inthok khan Kuki unauhaiin Hmarhai an hung nek leiin thla ruk zet buoina a suok a. Hi hin hmun tina cheng Hmar hnathlakhai chu thawk le khatah a kei khawm a, pheikhai inruol takin hma an nor a. Chun, kohran tieng khom insuikhawma hma nasa taka an lak lai a ni bok leiin iengkimah hma an sawn a, District khom a mong inlang kuka hmu pawl khom an um hman a nih. Hieng lai hun hi a nih India sorkara sin insang hmu le zom khom an tam lai tak chuh. Kum 1968-a misawn buoina a hung intran nawka inthokin pawlitiks tieng le kohran tienga hmasawnna a hung khak buoi a, chu taka inthok chun hnamin kal a rem fuk tak tak thei ta nawh.

Hienga kohran sunga inrem nawna leia mani le mani indai darh zawnga thrahnem an ngai lai hin Mizoram tienga inthokin July 1986 khan political movement pakhat a hung suok a, an party hmingah Hmar Association an inti a, thla hni hnunga an inkhawm nawk chun Hmar Peoples’ Convention (HPC) tiin an thlak a. An thil tum chu Mizoram Chhimtuipui Autonomous District ngirhmun ang Sakawrdai le a se vela cheng Hmarhai khom pe ve dinga tharum thrang loa nor a nih. Anni biel sunga khom an thil thaw tumah an mi le sahai an inhmin chieng hmain March 1989 khan norpui an tran a, police kut an tuor pha leiin silai chawia ram rol pawl an hung suok a, HPC Movement tia hriet hi a hung intran tah a nih. Kum nga hnungah, July 27, 1994 khan Mizoram sorkar leh inremna thuthlung an ziek a, Sinlung Hills Development Council an pek a. Chu inremnaa pom naw pawl po chun HPC (Democratic) intiin ram an la rol zui pei a nih.

Thil mak tak el chu, kristien ei ni hma khoma lu la hnam ni ngai lohai kha kum sawmriet lai kristien ei ni hnunga lu la hnama HPC le a hnung zuituhaiin an mi siem el kha a nih. An kuta thi zat nia an hrilhai lai hin a tuor nasa tak chu an hnam chanpuihai ni tlatin a’n lang. Uolau taka biek in sung meua hnam thruoitu lok kum 1991 February-a an hang suom el dam kha chu, a pangzatum khelah ei kristien nina hin ieng am kawk a nei a? ti zawna, chatuon rorelna hmaa ei la don ngei ngei ding chu, a cho suok a, thâ a zoi rong rong el a nih. Chu hnung chun ram santu dinga inpea inhrilhai kutin mi ieng zat am an san suok taa ti nekin an kut lumah mi ieng zat topin am hringna an chan ta a? ti zawna rapthlak, indon ding a um tlat hi a poina bek bek chu a nih. Chu chu Centenary darthlalanga inthok hin thup thei a ni si naw leiin, ieng am hril tang ei ta? Kut tin hnara hlak lut el thei a ni si nawh.

Hi thil hi ei hmelhmang inlang chiengna muol a ni tlat leiin, hril chak um naw hle sienkhom, hang bi kir nawk vuot ei tih. Churachandpur Nehru Marg-a EAC biek in, an hotu takhai kaina biek in le Aizawl Beraw Tlanga thil tlunghai le a kara insuomna rapthlak tlung po po kha ei histawri le ei hriet zingna bawma inthokin nawt re tum inla khom, van rikawt-ah bo dingin ei ring a ni? Pathien biekna in khom inza derna hlek ei nei ta si naw chun, ieng leiin am kristien inti a, Gospel Centenary dam ei lawm? Kha thil tlung kha Baibul zakkep puma mit ngeia hmutu ei tam vei leh, ieng leia thudik tran ngam loa hriet naw le hmu naw ei inchu vong am a na? Khang thil kha ei biek inah tlung sia ieng leia ei dang ngam naw chu hril lo, thil suol tawpkhawk an thaw kha kal le dem le soisela rawl ei insuo ngam naw am ning a ta? Einiah kristienna hlek khom a um nawh ti a chieng. Mani sa himna dinga thudik le thutak tran ngam ei vang dingzie dam a min ngaituotir pha hiel a nih. Chanchin Thra thutak trana Lal Nero hmason ngam lo ding, zangaina huna lêng ei ni leia kristien anga inlang mei mei, ei lo va hang tam awm de aw!

Tu chena Martin Luther hnam chanpui German kristienhaiin zawna don harsa an ti chu Adolf Hitler-in tawrot a’n suo tran laia rawl nei ngam loa an top chip kha a nih. Judahai suotna dinga Nuremberg Laws a duongpui lai khan kohranin nasa takin dodal ngam sien chu khang ang khop khan tawrot ngam naw ni a, mihriem maktaduoi sawmthum chuongin indonaah hringna chân pha naw ni hai ti hi histawrian-hai ngaidan a nih. A dodal ngam pawl tlawmte Jehovah Witness hai hlak kha poisak thamah a ngai bok si nawh. Eini khom 1991 lai khan kohranin huoisen takin rawl insuo ngam sien chu, a hnunga huoisar taka ei insuomna po po khom kha pumpel mei ei tih. Van ko thla thei hiel khopa inlanga sermon sep thiem le halelui inringhai lai hin hieng thil hi kristien intihai thaw ding a ni nawzie khekpui ngam mi tu am an um a? Ei ramsuokhai hin Setan zarin pawlitiks sapui sahrang kapin hung hawn khom lo ni tah hrim hai sien, ei kut tirdakuma ei them suok hi Pathienin mal a sawm zui pei ei ring ngam ding?

Hi thil fe pei hin mani le mani inkara insuomna, inrikrapna le chungrikna chi hrang hrang a hring suok bakah ieng thilin am a hung zui pei ti dam hi ei ngaituo hlak am? Tuiruong dunga sorkar development project hrang hrang le Mizoram le ei infe pawna Tuivai leilak an bawl lai sukchawl a, ei lampui nei sun le ei hnukpui khartu chu tuhai am an na? Trûl der loa Dimasahai le ei inkara buoina kha tu suksuok am a na? Ieng leia North Cachar Hills chena ei mi poimaw iemani zat ei chan pha? Ieng leia mi tam takin ei chung sukrik zuoltua an ngai Hmar National Army (HNA) dam hi a hung suok a ngai? Ieng leia a unaupa thattu Kaina kha Pathienin trongsie a’n phur? Kha trongsie inphurtu kha zani, voisun le chatuon chena danglam lo a ni si chun, ieng leiin am Kaina kut tirdakum hmangtu hnam chunga chun trongsie a’n phur ve naw ding? Ei nungchang le thilthawin zir si loin ieng leia kristien intia Gospel Centenary ei lawm?

Hi thil hi pawlitiks kaw hrang hrang ei purnaa khom danglam chuong naw nih. Tu lai, abikin Manipur khawvel chu Setan kutin vote a thununna zawl a ni tak leiin, inthlangin umzie a nei tlawm tah. A tlinghai hlak chun an kut bal khom sawp fai hman loin Pathien kuomah lawmthu hrilpui dingin tirko le pastor ruol ei fiel khawm a, sa tum sa tlangin ei hrai tlai a, lawmthu ei hril tlor a, ngai ei sukthra em em. A suktlingtu hlak chu Setan kut, thamna le silai piellung a ni bok si. Ieng leiin am ei chungah Pathien lawm dingin ei ring hrim hrim ning a ta? An mi thlang tling a, ngirhmun poimaw chel dingin thamna bok hmanga intât lut a ngai a. Ei sin ei chel chara inthokin thamna sum bok hmanga a mi suktlingtuhai bau suktlai a, an no sung sip zing a ngai bakah inthlang nawka vote inchawkna ding hlepruk dan ding dap a ngai zing. A ieng lai taka hin am Pathien a thrang ta ding chu aw? PATHIEN ei ti ve hi tu am a na?

Chuonga thil a fe lai zing chun, thil mak tak el a tlung a. Cachar phaia tlangmi hnam hrang hranghai chun Tangka Sangkhum inrawina hnuoiah Cachar Hill Peoples Federation (CHPF) indinin hma an nor a, thisen far khat khom seng loin March 13, 1996 khan Barak Valley (Hill Tribes) Development Council an suol suok der el! Chanchin Thra dong hmasa tu khomin an kawl le kienga chenghai el vartu sin an thawna muol muolah malsawmna an dong el a nih. Britain, thlierkar chikte chun chu sin chu a thaw sung po malsawmna tiem seng loa vurin a um a, kum sawt nawte sungin khawvel hmun thuma threa hmun hni zet chu ramper (colony) ah a siem der el a nih. Sienkhom, a Siemtu a hlat ruol ruolin a Siemtu khomin a hlat tiel tiel a, ni tla seng lo ram chunga inlal kha thlierkar chiktea bok a lut nawk a, ram hmasawnhai lai thrungna tlar hmasa tak hluo hlak kha a tlar hnungah hnawkin a um el tah a nih. Hrietna dinga na nei chun hieng thil hi ngaiven tlak a nih.

(February 9, 2010 Delhi)