An chĕngna ram vong sien la,
An in rausan chang raw se.
- Sam 69:25
Kumpui sul 36 hnungah
January 24, 1986 khan Parbunga inthokin inlănin Senvon khuo ka va sir a. Ka sunghai, ruol le pai mi threnkhat hieng Kh. Thang Dailo, Lala Khobung le J.Batlien, SDC, Parbung haiin an mi hung uop a. Inhman naw hlĕ kâra Senvon ka va sir vuoi nuomna sanhai chu (1) Manipur sim thlang biela Kristien sakhuo hung lutna kotsuo ka nauhai inhmutir; (2) Mission buoina le inthrĕna dinga thu an phierrukna hmun, a hnunga khawhrawngin a sawi chim vong nia an hril ARTHAKZAWL chu ke ngeia va sira a chanchin ziek; (3) February 3-6, 1950 a Independent Kohran zalen fihlimna an lawm le kei khom ka thrang truma Jubilee Lung kan phun chu va sir nawk le kha truma ka tlungna in kha va zong suok (hi Senvon ka sir hmasa tak trum hin kekor khom ka la bun naw a, tuolzakuo infaw hlâp el, khûp chena infuol ka la hak); (4) Kum 36 zet ka hmu ta naw sunga Senvon khaw inthrang dan va thlir vuot; le (5) tienami tawi LALNUNNEM KA NGAI EM CHE ti ka zieka ka ngaituonaa Senvon khuoa hmun threnkhat bisana ka hmang kha a tak le ka thil suongtuona thlalak an inmil am ti en fie a nih.
‘Hmar var a’n hnu’ ti takah, sorkar lamlienpuiin hi Manipur biela khaw lien taka rikawt ni rop, gospel mansa bangna ni bok hi sir loin a kawi el tiengin Tipaimukh ruom panin a nuor thla a. Vai hnung ramah, Tuiruong hung ting tum pawlhai zangaina far tlawmte lo hui dan an hriet hrăm leiin Senvon khuo chu inhoi deua motor tlan lut theiin an rel a, Parbung, Lungthulien le Pherzawl khuohai nĕk chun an la thaw thra ta tho tho. Amiruokchu, a lamlien kha rawra inkhum lo a ni leiin fŭr pha chu vok buol chunga tlan ang ning a tih. Inthlang phaa vote hung beisei dinghai inthuopui ding zong vat dingin lung phan hai sien, an thaw fuk ka ring.
Senvon khuo hang kai tung tawm, Hmunte khĕlah tuhaiin amanih puithu takin lam sirah Indira Gandhi hriet zingna lung an phun a, a thu Saptrongin an ziek a. Mi thu hril an ziek sawng a ni deu tak a, an thu zam danah Congress (I) pawl thilthaw a nih ti inhmai ruol a ni nawh. Eini trongin, ei ngaidan char ziek lem inla chu thupui a fûn lem daih ka ring. Kum 16 neka tam rau a’n lal sung khan vote bawm pur nuoma hung a pawlhai laia mi tlawmte ti naw chun Senvon hi an sir ngut ka ring nawh. Ieng khom ni sien, kha lungphun khan khawpui lut ding a mi sukhoi bakah Pi Indira Gandhi khan ram pilrila khom hmun a lo chang a nih ti a mi hril. Kei chu lungphun ropui le lien taluo um lo phu hlie hliea ka ngai chu gospel hung intluntu Watkin Roberts (Saptlangval) ngei kha a nih. Ke ngata hungin, chatuona hadamna sangson, a thlawna mi tin chang thei chu, a hung sem ngat el kha, ka mi ngaisang zawng a nih. Senvon khuo ka fangna taphotah pawl hrang hrang Jubilee lungphun ka hmu a, Saptlangval lungphun ruok chu ka hmu ve nawh. Khaw lai amanih a phun dam an lo um khiet rawi mawh!
Arthakzawl
Suo tienga inthoka Senvon lutna kotsuo lam thlangah huon zawl a um a, chu chu Bieki Pa (R.Dala) huon zawl tia hriet a ni hlak. R. Dala hi Saptlangval Mission hung phuna Zo hnathlahai laia tuoltro misawnari inthok suok hmasa tak, 1914-a Senvona hung lut le January 11, 1922-a Tuiruong kam Jakradawr-a inkhawmpui an nei truma tuihria thi a nih. Hi huon zawla R.Dala a um hma chun hi hmun hi ARTHAKZAWL an tih. Tien lai a khaw pumpui ta dinga kum tina voi khat sakhawhmang an thaw changin an lak ursun èm ém a, khaw sungah ri se siem an phal naw a, an arhai chen khom khuong lo dingin an hrĕn hlak. Chuonga khawser an thaw huna an arhai, arbawmah khum a, khaw sunga an khuong an inlau leia khaw puoa an thak khawmna hlak hmun chu a ni leiin a hming hi a put a nih. Threnkhat chun hi zawl hi ar thisen thea an inthawina hlak Daibawl hmun amanih Bawlhmun a ni leiin ARTHATZAWL an ti a nih tiin an hril thung. A ieng hming khom chu lo put ta hrim sien, hmun poimaw chu a lo ni phot el.
Hi huon zawl hi June 1927 khan khawhrawngin a sawi chim dar vong leiin tu hin zawl a um ta nawh. June 12, 1897 le August 15, 1950 a tlung, India hmar saka lirnghing rapthlak leh an inzom si naw leiin hi hmun a chim thla vong el hih lirnghing sawi chim chu a ni nawh ti a chieng. Zêldin thua an bel dan chun hi hmun hi sukrama a um san chu Mission indarna ding thuruk an phierna hmun a ni lei a nih. Hi hmun hi chu thil leia chim ning a ti? An naw leh, la chim ding hrima hmun nghet loa phierruktuhai an lo inkhawm palh leia a hnunga an hung hmet bel mei mei lem? ti ruok chu mihriem hang hril fie theina ramri khêl daia um a nih. Chuleiin, hi zawl a chimna san nekin hi hmuna thil tlunghai chu sui lem inla.
Arthakzawl pawlitiks
Arthakzawl chim thla kan fang ni chun histawri lo inlusu hnung an hung tho suou suou niin ka hriet a. Thu tin thu tangin ngaituona a dĕng a. Thuthanga an hril hi thu indik a ni chun hnuoi chim thla chun thurûk mak tak tak delde ngei a tih ti dam ka ngaituo a. A hnuoi chim chun thil a tawk siet rawn nawh. Amiruokchu, chu hmuna thuruk an phier ni dinga hriet ruok chun kakhawk a nei sei hle. Ei Mission muolhai hi mîmin a kei zing zing leiin tu chen hin muol khata inkop thei ta loa ei um bakah muol pêng hrang hrang a siemhai khom chu mîmin a kei zui pei leiin a muola chenghai inrŭm ri chu sun le zanin a tawp nawh. Chu Setan chang kam inper chun kohran ngal chârah a khâwng a, an tlu pheng phung a, chu kakhawk chun ngal tam a la khâwng thlûk zing a nih.
Pânna dam hnunga ngai khei nawk khom hoi ding ni inla, hi kansar zung hi kohran pawl tinah a la’n zam dar pei si leiin, ei nat tuor hi a san hre a, a damna ding ei dap theina dingin thu hnung hang sui kir ei tih. Saptlangvalin Senvon khuo sirsana Mission a hung phun chun hrat taka hma sawn peiin, sawt naw te sungin Manipur, Assam, Tripura le Burma rama chen kohran an hung ngir a. Hi Mission hi danglam tak el, hmun danga Mission pawl hlun le inzomna khom nei lo, tuoltro mission lieu lieu, a phuntu ti lo thoktu hlun po po khom tuoltro mi ngot, pawl chi dang tak a nih. A ram mihai hmanga ramthim nor chu a phuntu pawlisi a ni leiin ringthar an lak hrat èm ém a, thrang khat sungin 5,500 chuong an man hman a nih.
Hieng khopa a mi tamzie le inphua ramthima ringthar pung hratna hi khawvel hmun dangah vâng hlêng a tih. Hi hi a san tak chu a ram mihai ngeiin gospel meiser chawi a, Pentecost thlarau meiser le thimna sumpui an nĕr lei a nih. Chu sŭmpui chu a’n kieng duok duok a. Ngaingam muta Setan inlalna ramhai khom gospel mei vara an hei khaw var zet chun mong inlang kûkin a thrung bik zing thei ta naw leiin a tlân se dŭr dûr el a. Sienkhom, Kalvari hnĕna hlado le an hranglam mup mup lai chun an inring nawna tieng sirah Thimna lal chun a hung kungfu tawla leh, êk vuok pher chu nêpte a nih.
Do dan thiempa Setan,
Râlhrângpa thaw dan hi,
Einin hre thiem inla
tiin an khèk rong rong el a nih. Chu tektik chu a nih ‘Arthakzawl Pawlitiks’ ei ti chuh. Sîr hniah a ruolin a khêng a.
Pakhatna, America tienga inthokin. Saptlangvalin America ram tienga inthoka thrangpuitu mi inpe zo a zong lai chun mi pakhat a hming H.H.Coleman an ti chuh a hung inpe hlauh el a. Saptlangval ta ding chun hnung tienga thlarau thienghlim sa barh anga hang bel naw thei ni naw nih. Coleman chu piengthar le rongbawlna tienga inhnik le thlarau bohmang ding invoi èm éma insâl, sum tienga hnienghnâr tak niin an hril. Indopui Pakhatna hnung, 1920-1933 sunga USA-a zu siem, zor le khap burna dan (total prohibition) bawsea zu tol le zor ruka hung hausa niin an hril bok a. Chuong ang mi chun testimawni, vaninrum anga mi nghor thei an nei tawng. Saptlangval chun a lâk ta hrim a. Amiruokchu, a pindan sûngah rûlngân a khawi a nih ti a hriet dĕr nawh.
Chu a rûl vai chun hun sawt naw teah a hung chuk hrep el tah a. Coleman chun thuneina po po hung inchu fai vongin, a Mission phuntu le a ruoitu chuh êk trawng hnawlin a hung hnawl a. A chongpu chu a mikhuolah a hung thrang a, a ruoipa’n a ruoitu a pu chu a hung băn a, an ram tieng kirna ding poisa takngiel khom nei loin a khuongruong invai a, Hindu pachal pakhatin a kirna ding kalman a tumpek hlol a nih. Kha Hindu Samari kha Coleman-in ringtharin man a ti’m ti hi zawna indon thei lo laia pakhat chu ning a tih. Tu lai pawlitiks boruok inhnop tongkhonga khom hin Coleman hang khûm var ding chu zong fé ngai mei a tih. “A poi ngei! A va poi ngei de maw, tu chen khom hin!” ti hla dam hi hang phuok naw ruol ei ni nawh.
Pahnina, India ram tieng. Kohran inthrèna hmangruo dingin ringnawtu le Hinduhai amanih hmang an ni naw a, a kohran lai ngeia mi bok hmang an ni lem. Isu inmantirtu khom kha chuong ang bok. Khanga NEIG Mission-in hma a hung sawn ruol pei khan Hmarhai ngirhmun hluo le chel khom a hung poimaw zuol pei a. Ofis tieng inenkolna trong chu Lusei trong ngot ni sien khom thlaraua inthoka phuok hla a hung suok truk truk ruolin Hmar hla thar khom ruopui vanawn sŭrin a hung sŭr thla a, dang ruol a ni nawh. Chuong lai chun hla takngiel khom Lusei trong vonga phuok dinga ngaina a um hiel a. Chu ngaidan bang nor chimtu chu Hmar tronga hla hung phuoktuhai an nih. An hla phuokhai chu a hung indar a, an kawl le kienga trong dang hmanghai khomin an inbŭkpui tak a hung tling ta hiel a.
Chu hmasawnna chu a dodal pawl le lungrila nasa taka thîk pawl an hung um a. Chun, H.K.Dohnunin Saptlangval ditsakna dong a, hotu tak nina a hung chel kha lo er le khak thlâk tum rân pawl an lo um bok a. Hmarhaiin ngirhmun poimaw an hung chel nghet pei ding dangna dinga kawitan nia an ngai chu Saptlangval le a kaiza vengtu Dohnun thuneina sat chat phot a nih. Chu thaw theina dinga lampui hnâi tak nia an hriet chu Hmar ti lo, hnam dang po po kha hril tri a, an inthuruol naw chun Hmarhaiin an chǐm nel ding a nih ti zawnga an lungril sukhel phot a, chu zoah rênga Hmarhai arûka do hron chu a nih. Hieng phierruktuhai hnawdok chang kam dan hi ngainuomum takin Rev. Thangngur chun a ziek a, chu chu a hnunga hin inchuon a nih.
Rev. Thangngur hril dan chun, kum 1926 khan Senvon-ah Presbytery inkhawmpui a um a. Chu trum chun palai hung po po chu Hmarhai thrang ve loin arûkin zanrilah Arthakzawl-ah an inkhawm a. Hi inkhawma hin Saptlangval le Dohnun bân dan ding ro an rot nia hriet a nih. Chun, hi Presbytery rozam hi a ripawttu dinga ruothaiin London/America Council kuomah an thonin kha Presbytery-a an rĕl sa ni lo thu belh an nei ngei a nih ti ring a ni bok. Chutaka an belsa nia hriet chu Saptlangval an dit ta naw thu le a thlaktu ding Sap dang an dit thu a nih. Hi Presbytery rozam ripawttu dinga ruothai lai hin Hmar mi an um nawh. Senvon inkhawmpuia thil hung insersuon le America tienga kuo lo suottu Coleman hisapna chu an mil hlein a’n lang. 1928-a Pherzawla Presbytery an nei truma Coleman a hung khan arûka iengkim phan sa diem le Saptlangval hneng dok tum râna hung insingsa a nih ti Thangngur lekha zieka hin hmu thei a ni bok. Chun, Coleman-in Lianhawla lekha a thon, Thangngur lekha zieka inthoka inlanga hin, ruongchaiche an lo thlak dan chu chieng hlein an lang. Hieng thil hi a nih ARTHAKZAWL PAWLITIKS ei hang ti tak chu. A sawi chim chu nasa tak a nih.
Coleman Factor le a kakhawk
Coleman le a rawihaiin ngawi an daw dan le ruongchaiche an thlak dan hi sui tham a nih. Thurûk phor suok tuma ei lilut inthuk po leh a li truong lo inhnopzie ei hmu rawn el. Phuokfawma inbeina a tam leiin Coleman thruoina hnuoia lekha tam tak le ripawt an siemhaia inthokin thudik man fuk a harsa el thei. Hming meu suot a, a ngal ru inlang rawta hril lo, a hawihawm le thawi zawnga thu ziek a tam leiin thil suituhaiin chieng lema an hung phor suok pei ei beisei. Chun, a hnunga thil umzie ei hang dap pei chun, Coleman-in hmangruoa a hmanghai kha a hmangna san a hlen hnunga a mamaw tawl ta naw hnung chun ienga ding khom a ti tawl ta naw a, a hnâr kîr hmasa le tril hmasa an ni zat zat a hoi khop el. Sui tham a tling.
Chun, hun la hung um peiah, entirnan kum 40 hnunga Independent Church of India (ICI) sunga buoina le NEIG Mission sunga buoina ei hril tah hai kha histawrianhaiin kum sawmli vel hnungah hung sui a, 1968 hnunga ei buoina tuok leh hin an la hung khaikhin pha chun, “E khai, kum 40 hmaa a thunon kha ei hung rem nawk a ni hi tie!” la ting an tih. Chîk taka ei hang bi chun buoina hmasak le nuhnung hi a bawlhlopui inang a tam a, buoina bêl choktuhai tektik khom a danglam hlei rak nawh. Se rângin se râng a hring ti ang deuin, a râng le râng naw chu thlier hranpa ngai loin ei inthre suou el. ‘Coleman thil chu Coleman kuomah pe unla, Watkin Roberts thil chu Saptlangval kuomah’ ti thukhawchang a hoi ngot el. A danglamna chauh nia ka ngai chu a hnunga buoi kha chu hnam bing sunga inkungfu an nina chauh kha a nih. Coleman hlimin a la zui zing a, Arthakzawl pawlitiks khom a la pangngai zing. Iengti leia hi Mission hi khawhrawngin a sawi vet el am a na? A trobul indik naw lei am a ni? Hunin a la hung hril fie pei ding a nih.
Kakhawk dangdai
Thil iengkimin thratna muol an nei seng leiin Mission buoi khom hi tukver danga inthokin hang thlir ve thung inla. Mission kha buoi loin, a fe pangngai ang khan fe pei sien chu thil ei hmabak ding pakhat a um: trong inhmang. Iengkim thawnaah, thu le hla chu Lusei tronga thaw vong a ni a, a chǐm hrât hle. Buoina um loin a fe pangngaiin fe zing sien chu Hmar tronga lekhabu tiem ding a um dĕr naw ding a ni leiin Hmarhaiin literechar nei naw ni hai a, tu hin chu an trong inhmang dĕr ta mei an tih. Khanga an buoi sa khom khan Independent Church Minute Book po po kha India ramin 1947-a zalenna a hmu hma po chu Lusei trong vonga an rikawt a nih. 1947-a inthok khan chu Kawnzar (Senvon) a Nomination Council thurel 2nd April 1949) ti chauh naw chu Hmar trong vonga rikawt a ni tah.
Chuleiin, Mission buoi hmasak ra suok lieu lieu chu Hmar trong humhala a um hi a nih. Hmar chauh ni lo hieng Gangte, Paite, Simte, Vaiphei le hnam dang dang, NEIG Mission koi hmaa a chimhai po po khom khan an trong an hum pha bok a nih. “Pathienin mani trong ngeia ama chawimawi le inpak a nuom a nih” tia la pawlhai ta ding chun Mission buoi chu vangneina a ni ve tho. Pawlitiks tukver danga thlirtu, lien lema Zo hnathlakhai inzomkhawmna dittuhai ta ding ruok chun Mission buoi khan kalchawi a sukchai nasatzie ngaituo ve thung an ta, inchek tlok tlok bok an tih. Lien lema intêl khawm am, an naw leh hnam bing chita inlak hran hi hnam damna a ni le a ni naw thu chuh hril sei rak khom a ngai nawh. Chǐn lem thlang chu ngaituona bûi mei tawi, a tawpa inzui ral a ni naw thei nawh. A ieng khom chu ni sien, ei ngirhmun hril hin mihriem thilthaw thrat le suolin kakhawk a hang nei hlat theizie a tar lang chieng hlein ka hriet.
Tuoltro Mission um sun hienga buoina thliin a not zing el hi thil beidongum thlak tak chu a ni phot el. A phuntu thil tum le riruong kha chu mihriem hisapna ringot chun thil ditum a nih. Rev. Thangngur chun, “Hi buoina hung suokna bul hi Pathien hmangai lei ni loin, suol le tisa trânghma sielna leia hung suok a nih ti kan ring a nih” tiin a ziek a. Ama ngeiin chu thu laimu a khè chu hang ngaithla lem inla.
PHAIPUI BIELA INDEPENDENT KOHRAN CHANCHIN
By Rev. Thangngur
(Note: Rev. Thangngurin Lusei tronga a ziek, Independent Kohran Presbytery Minute Book-a inthoka lak suok le Hmar tronga inlet a nih. A ziek kum hi a chuong nawa chu 1936-38 inkara a ziek ni ring a um. Parakraf sei tak taka rem khawm a ni a, a tiem inhoi theina dinga a awm tawka ka thre hrang le rem thrat a nih. L.Keivom)
Independent Kohran chanchin tlawmte hang ziek met inla:
Hi Manipur State S.W. Area-ah hin 1910-a inthok khan Pu Tlangval (Watkin Roberts) buotsaiin Mizohaiin sin kan lo thaw a. Pathien malsawmin kum tin kan hung pung deu deu a, harna voi hnih a hung tlung a. Hi Biel chauha hin kristien 4000 lai an lo tling ta a. Biek inhai khom a hung pung ta hle a; biek in, a chung rangvain Kawnzar le Parbungah thra takin an lo bawl a. Mizo ruol ngota kan thaw lai chun kan inthuruolin kan inpumkhat èm ém a. Presbytery le inkhawmpui danghai khom neiin, kan hlimin kan lawm tlang thei èm ém. Hieng lai hin thoktu khom 48 lai an nih.
Chun, kum 1928 January-in Pherzawlah Presbytery kan nei a. Chuong lai chun Mission hmunpui Saprama inthokin Home Party pathum- Mr. H.H.Coleman, Mr. Williams le Dr. Turnly- an hung suok a, Pherzawl Presbytery chu an hung hmang ve a. Ka lo lawm èm ém tawl a. Pu Tlangval rawia Lalpa sin kan thaw ra malsawmna ropui tak hung ni peia ngaiin kan lo lawm èm ém a, an puok phur kan rin naw a, anni khom kan lo zawn hiel a.
Chun, an kir suk sawt naw te hnunga chun Mission-ah buoina nasa tak a hung um tah a. Pu Tlangval an băn tah ti thu a hung inthang a. Pu H.H.Coleman le Paul Rostad chun Saptlangval chu Mission-a inthoka băn a ni tah tiin mihai kuomah lekha an thon dar rak el a. Keini khomin kan lo hmu ve a. Keini chun Mission-a inthoka băna a umna san ding awm a suolna kan hriet si naw a. Anni hlakin a thil suksuol awm hlak an hril bok si nawh. An bănna sana an hril tak hlak chu: Saptlangval hi Biela inthoka mel 500, Calcuttah a um leiin a nih, an ti chauh si a. Pu Rostad lekha 29 August 1929-a, “The Councils of America and London have dismissed Mr. Roberts because he lives in Calcutta” ti chauh naw lem chu Pu Tlangval băna a um san mi hril khom kan hriet si naw a. Kum 20 ding lai a lo thok tah a, Pathienin mal sawmin kohran an pung èm ém a, a suolna kan hriet ve si naw a. Calcutta a um chu an banna san hiel awm a ni khoma a son khom son el hai sien. Misawnari meu hang bănna san tlak awmin kan ngai ve thei naw a.
Thoktu 25 le kohran member 2500 lai chun Pu Tlangval chu kan pom ta hrim a. October 1929-ah Senvon (Kawnzar) ah Presbytery kan nei a. Pu Tlangval an banna san chu kan pom thei naw thu London le America Council-a khom kan thon nghe nghe a. Chu thubuoi chu ngaituo dingin Pu Tlangval chu London tieng a fe thlak a. Chun, H.H.Coleman chu Council haiin General Secretary-ah an lo ruot tah a. Pu Tlangval leh Mission an inchu a. Pu Tlangval chun Pathien ram lienna dinga mi thawlawm chu rorêltu kuoma thubuoi intlunna ding chun a hmang ngam naw a, Coleman ruok chun roreltu kuoma intlunna dingin cheng sang iemani zat a hmang a. Coleman chun Mission chu a hung chang ta pei a. Saptlangval chun ama pomtuhai inzomkhawmna dingin Indo-Burma Pioneer Mission a hung indin a. Keini Manipur Biela mihai chu a hmain sorkarin NEIG Mission chauh naw chu Mission dang hi biela hin a um an phal naw leiin Independent Church tia inkoin, thoktu 25 le kohran member 2500 chu kan lo insukhrang ta a. Chuong lai chun Saptlangval pomtuhai po po chu keini Independent tiem sain 4983 an la tling a. Pu Tlangval an băn zo hin kan Field Secretary H.K.Dohnun le thoktu dang po po chu Pu Tlangval an pom leiin H.H.Coleman le Rostad chun an hung băn bok a.
Hi inbănna le buoina hi Pathien phal le remti niin ring thei a ni nawh. Coleman-hai thil hung thaw dan hi thlarau thienghlim thruoinaa thilthaw niin ka ring thei hlol naw a. Hi taka inthok hin kohran a hung ngui èm ém a, mi tam tak an ma a, biek in tam tak a hung triek a. An chetzie hi Krista nungchang le berampu rawl ni theiin ring thei a ni hlek naw a. Pathienin a dit zawnga thruoi ding le titak meu le thrahnem ngai taka kum 8 an trongtrai khomin Coleman chu pom theina an nei chuong naw leiin, rinum ieng ang khom tuor naw thei a ni ta naw a.
Coleman chun Phaipuia Political Agent kuomah a hêk hlak a, Political Agent chun a ko rop a, roreltu hmaah a ngir pha vet a. Political Agent chun biek in nei hai, thoktu dang le pastor nei hai, Presbytery nei hai, Conference nei hai, thawlawm hai khapna awrdar a’n suo a. Chuleiin, kum 6 zet chu biek in loah, inah inkhawmin, baptisma le kohran dan danghai khom thaw thei loin an um zing a. Chu sung chun ukil (lawyer) hai rawnin, an zalen ve theina ding chu ngaituon an bei an bei a. Shillong-a Governor kuomah petition an siem a, an hlawsam a. India Viceroy kuomah petition siem an tum pei a, Phaipuia Political Agent-in a phalpek naw a, an mangang ta èm ém a. Chu Political Agent kuoma chun voi hni lai an hni a, a phalpek chuong nawh.
Chuonga mangang taka biek in khom nei loa ina an inkhawm lai chun kohran an hung pung pei a, inah an inleng ta naw a, an hnina po po hlak chu a hlawsam ta si. Pathien rawna trongtraia hni ngat ngat dingin an insiem a. Sawt khom an la hmang hman hmain, mihriem tu khom rawn loin, ukil varna khom ring tum bok loin, Pathien chauh enin, Peter haiin “Mihriem thu nekin Pathien thu kan zawm lem ding a nih” an ti ang khan, Pathien thu chauh enin, Pathien rong ei bawl pangngai ang khan, kohran danin iengkim thaw nawk (nok) el ei tih tiin lungril huoi êm ĕm an hung nei tah a. Political Agent awrdar chu a ngai a la ni zing sain a um naw angin tritna hrim hrim an nei ta naw a. Senvon (Kawnzar) ah biek in a dung hlam 7, a khang hlam 4-in hlim êm ĕmin an hung bawl ta a. Harna a hung tlung a, chu biek in chu kum khat sungin voi hni lai an zom a, a dung chu hlam 10 lai a hung ni ta a. Lalpan a sung sip pei a. A kum nawk chun rangva inkhumin, a dung hlam 7, a khang hlam 6-in thra takin an bawl a. Chu khom chu Lalpan a sung sip pei a. Khaw danga Independent kohranhai khomin biek in an hung bawl seng a. Harna a hung tlung pei a, an hlimin biek in voi khat voi hnih zauh khom an um a, kohran an pung hle a. Kum 1935 sung khan Independent kohran 648 laiin an hung pung thar a. A hmaa NEIG Mission lo ni tahai khom tam tak Independent Kohranah an hung lut nawk mek pei a. Tisa tienga kan retheizie chu, kan pawl chu hang inhnar tlak lul a ni si naw a. Hieng ang chauh ni pum khoma mi an hung inpek lut nuom pei hi Pathien thilthaw ni ngeiin ka ring hlak a nih.
Hi buoina hung suokna bul hi Pathien hmangai lei ni loin, suol le tisa trânghma sielna leia hung suok a nih ti ka ring a nih. Sawt deua thil umziea inthokin hang sui inla. Kum 1926-a Senvona inkhawmpui kan neiin Rohmingliana, Lalnghinglova le Vanchhunga hai, hotu pathum an um a; Dohnun khom a hung a. Dohnunin, “Hieng mi pathumhai lai hin in Field Superintendent ding in dit tak thlang ro” a ta. Sienkhom, pakhat khom thlang an um chuong naw a. Chu trum chun Hmar ti chauh naw chu hnam dang po po chu (khawhnawm hla fea hin zawl a um a, chu chu Bieki Pa, R.Dala huon zawl kan ti a), zan inhnu deu tieng hin an fe khawm a, Dohnun le Saptlangval bănna thu an rot ni awmin an hril. A thren chun an nuom ve naw leiin an fehmangsan ni awmin an inhril bok. Hmar an mi fiel ve nawna san khom Dohnun chu Hmar a ni lei niin kan ring tak. Chu an inrawnna zawl chu a kum nawk vel elah mîmin a kei chim dar vong a. Chu thu chu kan hriet ve dĕr da’l a. A hnung daih, 1934 khan mi baua inthokin iengmawti tiin a hung suok a. Paite le Vaiphei hai chun chuong thu an hril dar hnung chun (Independent an lo ni bok a), “A ni ngei, ka thrang a, mi ko ngotah an mi tir leiin an thu ka lo hriet ve dĕr nawh” tiin anni laia thrang ve pakhat chun a hril.
Coleman-hai hung suok khan Biela siem thrat ngaihai siem thra dingin Council-a inthokin phalna an hung lak a na. Hi taka an inrawn khawmnaa inthok hin Sapramah lekha thon an ta, Coleman-in chu chu a hriet phing chun lungril nei rieuin Saptlangval hi a hung er rĕng a ni awm. Pherzawl Presbytery 1928-a Coleman hung thrang trum chun Tinsuongah Committee an lo nei a, Sap misawnari hni an rot a, Presbytery-ah an thè lut a, Presbytery-in a remtipui a. Sap hnina thon ding chun chuonga Committee lo neihai chun “Tum ning a ta?” an ti chun, “Keini rawiin thlang inlang” an lo ti ruk a ni kan ring a. A hnunga kan hang ngaituo hin anni rawi ngot chu an lo ni bok a. Chuong ang chun an lo kawmiti ti khom ahmain kan lo hriet si naw a. Chuonghai chu Lakhipura khom, Phaipui Biela khom Coleman rawiin inpawl fienriel bikna an lo nei rop si a. Lakhipura lem chu santiiri ngir chen an insiem hlak an ti bok a.
Chuleiin, Saptlangval an hang bân el ta chu, kan dit khop nawa Sap kan hni bel sa a ni lem si leiin, mak kan ti a. Presbytery-a Sap hnina ziektuhai khan Saptlangval banna dingin Coleman rawiin rot ru’ng an ta, London le America Council kuomah Presbytery hming siin Coleman chu inchawiitirin peng an ta, Council-haiin a biela mihaiin an dit ta si naw chun tiin Saptlangval an hung ban a nih ti kan ring tlat a. Presbytery thu ni lo, thu belh an nei ngei ngei ning a tih ti kan ring ta tlat a. A hnung elah Pu Tlangval tarpu Dodson, Council Member ni ve chun, “I biela mihai dit naw khop hiela i hang um el chu poi ka ti ngot el” tiin lekha a hung thon a nih, an tih.
Presbytery thu bel sa amanih, vervekna leia thu phierrukna a um ngei ngei ning a tih ti chu chieng taka hriet tlukin kan lungrilah a um tlat a. A hnung elah chun Pu H.H.Coleman-in Americaa inthoka Lianhawla lekha a thon 23rd July, 1929 a mi chu kan lo hmu tah a. Hieng ang hin-
“I lekha 24 April 1929 le 2nd May 1929 a mi kha hang don ka ti che. 2nd May, 1929-a i lekhaa Dohnunin order a thon suok copy i mi hung thon bok leiin lawmthu ka hril che. Ka hum zing che leiin Dohnun thu chu poisa hlek naw rawh. America le England le India rama thuneina kim nei dingin Mission-a General Secretary-a ruot ka ni tah. Mr. Williams chu Mission-a inthokin bănin a um ta a, Mr. Roberts (Pu Tlangval) khom tu hin Mission leh inzomna a nei ta naw a, thuneina khom a nei ta bok nawh.
Nang le i ruol ringum panga (Kunga, Vaitlaia, Savawma, Liankeuvunga, Vungtuala) haiin thil umzie in hriet theina dingin hieng thil hi ka hung hril che a nih. Ama (Dohnun) chu ka ngaisak naw a, a nuom dan ang angin thil lo thaw phot raw se, ka hung pha leh ka thaw ding la thaw veng ka tih. Lakhipura Brother Rostad kuomah um zing la, ringum takin a kuomah um rawh. Nangni naupanghai le Rohmingliana hming ziekna amanih, Presbytery hnina kha amanih tu kuoma khom ka’n hmutir naw a, tu tuhai am an na, tuhai am hming ziek ti keimaa inthokin tu khomin an hriet nawh. London le America Council chauh ka’n entir a, ka kuta inthokin chuong lekhahai chu Doctor le Williams chen khom ka’n hlxx0259n rêng rĕng nawh. Nang le Rohminglian-in Phaipui Biela pastor hai, evangelist hai le thoktu po poin thil sukdanglam chu nuom vong an tih in ti kha ka ring èm èm”
tia lekha an inthon chu kan hmu phing leh Pu Tlangval banna dingin Presbytery thu an lo belh ruk ngei ngei ning a tih ti chu mita hmu a, naa hriet ang ela lungrila ring tlatna lo um kha Pathien mi’n hriettir ni ta èm émin kan ngai tah a. Pu Coleman-in Daktor Turnly le Mr. Williams khom, tu dang khom, lekha kha ka’n entir nawh a tizie kalhmang rênga inthok hin ring naw ruol an ta nawh a.
Chun, biek in kan nei a, kohran dan anga iengkim kan hung thaw phing leh kan hlimin, kan lawmin, kan thla a muong a. Kan hung pung deu deu phing chun Coleman, Paul Rostad le Herbert D. Meyers hai chu remna siem dingin an hung a. “Inrem takin, a hmaa ang bokin thok tlang nawk ei tiu” tiin an mi hung thlêm rak el a. Nisienlakhom, a tira inthok rêngin an rawl chu berampu ropui Lal Isu rawl niin kan hriet thei naw a. Sorkara mi hêk le vauna ngota an mi bei an leiin an chetzie khom Krista nun dan angin kan hriet thei bok nawh. Annin Sorkar ruoia kum 6 lai an mi sukmangang lai khom khan Paulan, “Mangangin kan um, bei ruok chu dong loin” a ti ang khan kan rinum lai tak khomin Lalpan a mi thlamuong a, kohran an hung pung pei a, mal a mi sawm peiin kan hriet.
Ukilhai râwna hnǐna siem peiin, President hai, Borsap hai, Assam Governor hai chenin kan hni a, thu kan hmu naw a, kan tawp dĕr hnungin, Lalpa rawnin, sorkar order hai khom baw lui hiel ngama lawm taka biek in le kohran dan po po zawm nawk thei ding khopa huoina mi petu hi Lalpa Pathien, Iengkimthawthei, Peter hai thrangpuitu bok kha mi sukhrattu le kan hma thruoitu a nih ti kan hrriet leiin kan zui pei a, kan mangang lai tak khom an kuomah inpe thei loin kan lo um tah a; kan hung hlimin, kan thlamuongin, kohran a pung pei a, lungril zalen taka kan um hnung si hin chu leiletnaa kut innghatin, hnung tieng kan en thei ta ri naw a nih. Mihriem le mihriemin, “Inrem ei tiu” ti el chauh chu Pathien siem ni loa mihriem siem lui mei mei chauh chun a thrat thei tak tak kan ring thei naw a; Pathien chauh hung siem chu kan nghak ri a. Chun, Coleman haiin inrem an hung ngĕn thua khan, “Conference hung nei kan ta, kan ngaidan hung hril kan ti cheu” tiin kan inthla a.
Chun, March 23, 1935 khan Parbungah member 63 hai chun Conference kan nei a, kan thurel chu a hnuoia hin ziek a nih. Mr. Coleman hai chetzie le an thuhril, an lekhahai mak tak tak a tam a, hi taka hin ziek seng ruol a ni naw a, a bu-a la siem a trûl ei thei.
- Rev. Thangngur
Extract of the Resolutions of the Conference of Independent Church at Parbung on 23 March 1935.
Chairman - Pu Chawnga1
Secretary- Rev. Thangngur
Resolution No. 3
Pu Coleman inremna (hung rot) hi kan remti thei naw a, hieng ang hin lekha thon kan remti:
“NEIG Mission Council, London/America: Tarik 31 January 1935 khan in General Secretary H. H. Coleman chun keini Manipura Independent Church kuoma hin inremna a hung hni a. March 23, 1935-in Parbung khuo-ah kohran mi 1938 aiawin pasal puitling 63 hai chun Conference kan nei a, kan thu ngaituo chu hieng ang hin a nih:
Kum 1910-a inthok 1928 chen khan hi Biela hin kohran kan pung a, Pathien thlarauin a mi thrangpui a, ramtharhai hong peiin, inrem takin kan um hlak a. Kum 1929 khan H.H.Coleman chun, “Biel ka chang” a ti a. Chutaka inthoka biel hang chin takzie le kohran hanmg siet takzie chu in palai George Paysley, London-a Secretary khan fie takin a hriet bok a. Kum 1930 khan Independent-in kan lo um tah a, buoina karah, thlarau thrangpuiin thlamuong takin kan um a. Remna chu thra kan tih. NEIG Mission ruok chu kan zom thei nawh. Remna siem dingin ama le ama inrem (hmasa phot) raw se. Tuithraphai kohran 500 lekha kha lo hmu tang in ta. Kan dit tak chu: hi ei rama hin NEIG Mission khomin, Independent khomin remna Gospel hi inrem takin puong dar ve ve raw se, Lalpa chawimawina dingin.”
Note: Hi chanchin hi Rangoon ka tlung hlima 1986-a ka ziek, a kawpi ka hmu kim ta lo a ni a. Vangneithlak takin Dr. Lal Dena-in ‘Thuro’ ah 1986 khan a lo insuo a, a kawpi a la kol chu a hung scanned a, a mi hung thon a. Chu taka inthokin computer-a ka thun, a’n awngna threnkhat ka thol a, editing trulna iemani zat ka edit bok a nih. Rev. Thangngurin a hril, Lianhawla kuoma Coleman lekhathon le chu le inzoma Lakhipura inthoka October 17, 1930-a Field Secretary H.K.Dohnun lekha insuo ngainuomum tak le bengvarthlak tak chu Zoram Khawvel-6 Appendix-7 ah hmu thei a nih. Chun, hieng lai chanchin hi chieng taka hre nuom chun Zoram Khawvel-6 tiem dingin ka’n fui bok. L.Keivom
(Wednesday May 01, 2013, Delhi).
No comments :
Post a Comment