Thengreng Dawr (Space Shopping Mall)

Khawvel hmasawnna a lawna a lawn dĕm dêm lai kha a tlănin a hung tlăn a, iemani chena inthoka computer age-ah ei lut khan a vuongin a vuong tah thung leiin, intlonpui tum chun thuok hang lakna hman khom a um ta naw tluk a ni deu tak. Dier kei sing a, tlanbahrika hnot zing naw chun, thla khat sung ringot khoma ‘Rip Van Winkle’ dawbola inchang theina khawvela leng ei nih. Insuk-gospel deua ‘Hun tawp a hnai takzie hriltu a nih’ ti thlak zena van tieng nghaa ek che inthrung thaw ringot tumhai ta dingin ei khawvel hi dam khawsuokna ruol a ni ta nawh. Mi nauhaiin van thengrengah dawr ropui tak tak indinin, boruok zai hmangin inbiek pawna hrui an thlung fek fuk a, man chawia ei lo hmang theina dingin biekbawm ei lo chawi fir fer a, intitheinaa ngai pawl khom ei bo nawh. Insuktheinaa hmanga ei biekbawm chawi ei hmet le tlai zata hmang man po po intêltu chu mi dang, thluok hmang hlawk thiem le hausa tontawhai an nih.

“A nei taphot pe belsang an ta, a nei naw chu a nei sun khom lakpek ning a tih” (Lk 19:26) ti sukdiktu ni hih thil vangduoium a ni leiin, ka piengcham July 15-a kan tlangzar, lekhabu ka buotsaih ‘Ka Tukvera Inthokin’ ti chuh thengreng bazara dawrpui neituhai laia inlar tak Amazon Dawr hmanga zor suok dan ding lampui chu iengkima mi thrangpuitu Blessing Buhril leh kan dap a. Sorkar Laipuiin India ram puma Goods and Services Tax (GST) dan thar hmang tah dinga an puong hlim, GST Registration Number neihai kuoma chauh thuomhnaw thon thei a ni leia a ram phêka an buoi lai a ni a. Hi lei hin motor-a thon dinga parcel kan buotsaihai khom thon thei loin a um a. Danbawsepa hung inlang huna thil tlung ding hrila um khah ei tong ta’m a nih ti palh rum rum a phu khop el. Leviticus 11-a fak thienga Pathien namnghet bawng that le a sa fak khap ti ang mei mei hi chu ei thu hril lai le tekhi chun nep tak a nina lai a um. Chuong lai chun, India ram hmun hrang hranga khawsahaiin olsam taka an incha thei dan ding lampui zong a trul bok si. A thaw dan olsam tak nia ka ngai chuh thengreng dawr-a inthok zor a nih.

Chuleiin, thengreng dawrhai laia thuomhnaw kan inchawk rawnna tak Amazon-a thuomhnaw inchawtu ni loa zortu (seller)-a in register dingin kan buoipui ngat ngat a. A velvuol le niknek a lo tam khop el a, chu chu a let tamin GST dan thar la chiengkuong lo chun a sukhnok zuol a. Ieng le khaw leh, thaw makmaw trul hmasa lem chu sumdawngna neitu hminga mani umna State sorkara inthoka GST Registration Certificate nei a nih. Chu RC nei lo chun ieng khom thaw thei a ni nawh. Hni ding chun proof of residence, Pan Card, Adhaar Card (UID) le a trul dang dang documents nei a ngai. GST Identification Number (GSTIN) nei pha leh Amazon-ah “sellercentral.amazon.in” hnuoia in register dinga hni thei chauh a nih.

Kar hni pum hlum kan buoipui hnunga kan sukfela kan ngai kha, kan thu a lo inhmu nawh ti a hnungin kan hriet suok a. Mi thil hung incha thon dan chi hnih an nei a. Pakhat chu ‘Easy Ship’ an ta, Amazon haiin thuomhnaw thon ding kha a zortu kuoma inthokin lang an ta, an thonpek ding a nih. Chuonghai chu Amazon-in an thonna address Pin CODE sunga ofis an neina hmuna chauh a remchang a, chu puo tienga umhai chu a thontu khan a thaktu ding mi dang Third Party (courier, speed post etc) ruoi sawng a ngai leiin, keini ta dingin chu chu thil remchang a ni nawh. Chuong anga thaw dinga annin an lo ngai kha keini hisap dan leh a’n mil naw leiin, Step hnina, Fulfilled by Amazon (FBA) a dingin kan thlak nawk a. Hi dungzui hin chuh kan thil zor dinghai kha an kudam (warehouse) ah an company ti dan ang thlapa inchikna ‘bar code’ lekhabu tinah bel thlap a, Global Trade Item Number (GTIN) nei po inchuon a, a nei naw lekhabuhai chu a hrana exemption certificate a pek, Amazon Standard Identification Number (ASIN) an ti chu number inchuon thlap hnunga computer-a hang upload el thei dinga lekhabu tin thlalak leh pek a ngai. Chuong ding chun agreement dang siem a lo trul a. Chu zoah an kudamah thuomhnaw siena ding hmun haw a, chutaka thuomhnaw sie po po chu computer index number pek vong a, lekhabu tin kawmah bar code bel vong a ngai. Lekhabu chu thon a ni pha khom a phakna chin bar code-a inthoka sui zui thei vong a nih.

Chuonga kan thaw fel hnung chun August 3, 2017 khan Blessing leh lekhabu dang dang panga- Ka Tukvera Inthokin, Delhi Version Baibul (Hmar), Impressions on Keivom, Zoram Khawvel 7 & 8- kawpi 250 phurin, Faridabad-a Amazon-hai kudam (warehouse) ah kan va sie ve a. Hi khom hi nuom hun huna fea va sie el thei a ni nawh. Ei thil sie dinghai iengkim documentation ei thaw vong hnungah, a siena ding ni le darkar ni thum hmain appointment an hung pek a, chu dungzui chun Gate Pass an mi pek a, fimkhur taka a thaktu le a thil thakhai security check an thaw vong hnunga sie thei chauh a nih.

Kan va sie-a inthoka darkar thum sungin incha le thon thei dingin an hung sukhring (live) nghal a. A mi hung dawr hmasa tak chu Lalhrietsung Sanate, Rengkai tlangval, Indian Institute of Management, Lucknow-a MBA inchuk lai a nih. A pahnina chu Rengkai suok tho, Pune-a Income-tax ofisar ni lai Samuel Songate a nih. Hyderabad, Bangalore, Guwahati, Shillong, Aizawl le hmun dang danga inthokin an mi hung dawr a, computer le mobile-ah a hung inlang nghal pei a. Mi tam takin an lo thaw zing zing ni sien khom, Hmar tronga lekhabu dawr van thengrenga mani hminga um hmasa tak a ni leiin a mak danglam a, mang amanih ei sawn rum rum el a nih. Mihai ngaiah iengma lo khom a ni thei a, eini ta ding ruok chun mellung poimaw le inchik tlak a nih. Ei dawr thar hi sukhlawtling le hmang hlawktu ding chuh eini rawi ei ni leiin, hmang trangkai tum seng ei tiu. Pathien lunginsietna zara hieng thil hi thaw ve thei chauh ei ni leiin a kuomah lawmthu ei hril a, ropuina le chawimawina chu Ama ta chauh a ni ang hrimin Aman chang kumkhuo raw se.

(August 5, 2017; Delhi)

###