Search


Nov 13, 2020

Mit Thar


 “Taksa khawnvar chu mit a nih. I mit thra chun
i taksa pumin var suok a tih. I mit a thra naw ruok
chun i pumin inthima tih. I sunga var chu thim a ni
chun, chu thim chu a va hang să awm de aw!”
- Isu Krista (Mat 6:22-23)

Bessing Buhril-in zun thlum tieng daktor thiem inhmupui ding a mi zongpek leh Vaishali-a Max Super Speciality Hospital-a Dr. Aishwarya Krishnamurthy-in November 3, 2020 (1130 hrs) ah inhmuna hun a hung ruot a. Delhi le a se velah tam tak hieng ang hospital hi an neia chuh diabetic doctor inhmupui ding chun thla thuma inthoka thla ruk vel nghak a ngai. Kum 2015 khan Rev. Hrilrokhum naunu Dr. Janet L. Stephens, Specialist, Swami Dayanand Hospital-a thok ka pan leh zun thlum ka nei ti a mi hril a, insulin inkap loa khawsakpui theina ding damdawi mi ziekpek dingin ka ngĕn a. Chuonga thawin, du du fa zing a, ngei naw ding zawng ruok chu tawk insumin, kum nga zet ka lo pal tlang ta a. Zun thlum ka nei ti hih a hrehai khomin an awi rak naw a hoi, a san chu a symptom nia an hril tam tak hi ka nei ve naw tlat bakah ka sinah a mi sukbahla nawh.

 Muol liem tah ka u Kamzabiek, Pharmacist kha zun thlum kontrawl naw leia mit buoi, Delhi tlangah thla thum neka tam hiel a naupa Joseph le ni tin deuthaw mit daktor kan panpui, a mit voi tieng a siet hnunga a chang tieng 60% vel kan la’n humtir trawk trawk a ni a. Zun thlum kontrawl lo hung hnăm (pŭt) suokin mit râng (cornea) a tawk siet nasat theizie hmutu ka ni leiin, chu laka inthoka inveng dan ding indon chu specialist ka hmu nuomna san tak a nih.

Kum 82 hraw lai mek ka ni a, harsatna nei loin zana khom tarmit bun loin car ka la khal a, ka ruolpuihai lai chu mit thra pawl ka ni ka ring. Zing dar 7-a inthoka zan dar 1 chen hi dan naranin computer leh ni tin kan la’n hmatuok a, lekha tiemna ding chun tarmit ka hmang. Ka penson char 2002 April-a Baibul inlet ka tran khan ka tarmit hratna kha 1.25 vel a ni a, kum 2015-a Revised Version a hung suok khan chu a let hni, 2.50 chuong a ni tah. Mit a he khop el. Chu sung chun Saptrong le Hmar trongin voi 50 chuong Baibul hi sir hrang hrangah ka bi suok niin ka hriet. Covid-19 leia thla sari lai inkhawm ta lo kha October 11, 2020 khan ka va’n khawm leh hla thu banga an kap kai kha phe ruoiin ka hmu a. Ka lungrilin, “Eheu! Ka mit hi keima ta ringot a ni naw a, Zoram Khawvel, abikin Hmar khawvel le kan hmang intrawm a ni leiin ngaisak a trûl a nih” ka ta. Mit inentir chu makmaw-ah ka sie a.

November 3-a zun thlum daktor kan hmu hnung chun mit inentir dingin Eye Department-ah kan lut nghal a. Test chi kim an thaw hnungin Dr. Rinky A. Gupta, Consultant chun ka mitduor (cataract) at thlak a, mit dârthlalang (lens) thar inbuk a trul thu a mi hril a. Lens hi a thra chi le tlo chi, dam sung dai thei a um ang bokin a naran, man to rak lo, a um thu a mi hril a. Sorkar Health Insurance Scheme-ah lens thra chi man hi a huom sa naw leiin mani-a a man chawi a ngai a. Mit pakhatah nuoi chanve vel sengna a ni leiin, thaw ngei chi a ni le ni naw Imphala um Dr. Thari ka hang rawn a, thaw thra a ti thu a mi hril bok leiin, a tuk November 4-ah ka mit chang tieng an at a, kar khat hnung November 9-ah a voi tieng an at nawk a, mit thar var kong el ka nei pha tah a nih.

Tuta ka buoina chu lekha ka bi ding zata tarmit ka la mai hi a nih. Ka mamaw ta nawh ti ka zuk hriet suok phut ruolin Pathien kuomah lawmthu ka hril zie hlak. Chieng lo ruoia thil hmu amanih lekha tiem thawpik hang umzie dam khah ka suikirin, thil hmu fie nun hang hadamthlakzie a mi’n hmu chiengtir zuol a. Pathien lunginsietna zara Baibul inletnaa mit hek ral vang khopa ka lo sengna leia mi tam takin fie ronga Pathien thu tiem ding an nei pha dam hi a manhlazie dam a mi’n ngaituotir a. Mit chân pha vanga inngai nuom el kha mit fie lem nei phanain ka hmang tah lem a nih. Hla phuoktu hin a lo hmu chieng khop el:

Chănna emaw ka ti,
Mahse hlawkna a lo ni si..
Kut ruak pawhin awm ila,
Hlawhchham rêng rêng a awm lo e;
Dam chhung ka tawh apiang hi,
Lawmna tur hlîr a lo ni e.

(November 13, 2020, Delhi)

###

No comments :