Search


Aug 9, 2017

Histawri Le Hla Inkungkeina


History is a cyclic poem written
by time upon the memories of man.
- P.B. Shelley

January 31, 1981 khan kum tam tak sunga ka buotsai HMAR HLA SUINA (phek 322-a sei) chu Sielmat Christian High School Hall-ah khang laia Agriculture Minister Ngurdinglienin a tlangzar a. Hi ni tluka Tuithraphai sunga cheng Hmar hnathlak laia thu le hla tienga mi challang, ram le hnam le khawtlang thruoitu, bulthrut remtu le ban poimaw, mi hlun le khaw tin lal le khawnbawl le sakhaw thruoitu luhai a ruola an fe khawm rawnna hi ka la tong ngai nawh. ‘Hmar History’ ziektu hmasa tak Hranglien Songate khomin a mi hung hmangpui a, thuhrilna chanvo pek a ni nghe nghe. Kum 1928-29 laia naupang inchuk ding BU HMASA (HMAR PRIMARY) siemtu le kum 1926-a ‘En tu’m mihrang pasalthrahai’ ti hla ropui phuoktu H.L. Sela khom kum 77 mi ni tah sien khom ngai poimawin Old Churachandpur (Suongpi) a inthokin a nuhmei leh funghrol thruna kea hung ngat ngatin an mi hung uop a nih.

Hi lekhabu bung 11-na “A ziektupa Chanchin’ (A Talk With The Author) ti buotsaitu, Dr. Lalzakung (March 8, 2017-a muol liem tah) chun a bu hminga hin Saptrongin sub-title sie ngei thraa a hriet leiin, ‘Hmar History & Literature’ amanih ‘Hmar Cultural History’ amanih pakhat lem lem inchuon sa a rot a, a hmasa hi inchuon ka remtipui a. Kan sut lai khan kei Nairobi-a um ka ni a, L & R Printing Press tienga lo buoipuituhai khan an lo inchuon theinghil leiin a thrang ta naw a. Hi lekhabu hi Hmarhai chanchin, khawsak dan, thu le hla hung pieng dan, trong hmasawn dan, Suotlang Hlui le Suotlang Thara thil hung inthlak tung pei danhai thlirna a ni leiin, a bu sung thu fûn zo hming tawi hang ser chu a harsa hrim a nih. Tuta truma Shillong HSA Joint Headquarters Diamond Jubilee Souvenir-a insuo ding artikul ziek dinga an mi hung fiela sabzek an mi bituk, Hmar histawri suina dinga hla poimawna ti hih kum sawmli liem taa Hmar Hla Suina ka buotsai kha a donna indik tak a nih ti a khulang khangna dingin ka hung tar lang hmasa a nih.

Hmangruo poimaw
Tu hnam khomin chanchin an sui theina hmangruo poimaw chu an pi le puhai sulhnung maksana inthok a nih. Hmun le hma an lo hluo hai, thing le ruo, lung le pil hmanga an thil siem hai, thlan hmun le lungphunhai, sa le ral laka an inhumhimna kul hai, sinthawna le indonaa hriemhrei an lo hmang hai, in le lo an lo indin dan hai, fakzongna hmangruo an lo nei dan hai, bûr le bêl le sil le fen an lo intuo dan hai, sakhawhmang le daibawl an lo thaw dan hai le thil dang dang hmu theia an maksan le thu le hla an lo inhlan sawng peia inthokin an chanchin iemani chen hriet thei a nih. Chuong ang sulhnung chu sui theina dingin hnuhma hmu thei ieng ieng am an mi maksanpek a? Chuonghai chu khaw laia inthokin hmu thei ei ta?

Ram bung hrang hrang, tlang le phaiah, sik le sa le inmila thra nuom bik thing le ruo le ramhmul chi tum tum a bil bila mawng a um ang el hin, mihriem khom hi hmelhmang le piengruo inanghai chu a buka tla khawm dingin khuonun a lo ruot a nih ti thei dingin a um a. Eini India hmarsaka chenghai khom hi vairampur bilpuia chenghai leh chu iengkim deuthaw-ah ei danglam a, ei trobul khom a danglam hrim a nih. Sakrama cheng hnam hrang hranga insalhai hi ei trobul hang sui chieng inla, nisa suokna tienga inthoka hung le thlang hung tla pei, tuta ei chengna India hmar saka umhmun nghet khuora inting khawm, a tir khan chuh iengkimah vai amanih mingo thisen le chiin a pol sop thrak lo ei nih. Kong danga hril chun, thing lien tak pakhata inthoka inkau dar le inzar phar pei ei nih. Khawvela chuong ang hnam kungpui pakhat chu Mongoloid thla tia hriethai hi ei nih.

Sulhnung sui hi ui sa thiem anga rim hrietna mak nei an naw leh sa hnung sui thiem pasalthra anga sa hniek hrang hrang le hniek hlui le thar hre thei mi ni a ngai. Sa hnung sui thiem chun sa hniek chier dup lai khom an hniek sui kha a’n langna photah an man nal nal thei a, hnuoi hul phaphina a hniek khom an hriet pei thei. Ui sa thiem khomin a rim inhnama inthoka sulhnung a sui hin a rim a hriet theina chin chu chang baihat hril ang topin an hriet a nih. Vadung amanih lo um sien, tuiah a rim hriet thei a ni ta naw leiin a sui thei ta naw a, sienkhom va rala a kainaah ei thruoi chun a rim kha a hriet nawk a, a hnung bok khah a zui nawk el a nih. Sulhnung sui thiem chun chanchin hlui tak tak, sui zui ngaina hriet ta lo khom kum za tam hnunga a rim amanih hniek hung inlangna a um chun a sui zui pei thei a nih.

Hniekhnung sui dan
Hniekhnung sui dan tlangpui chi hnih a um. Pakhatna, pipu thusim (myths), thurachi (legends), tienami (stories) an inhril sawng peia inthoka hnam pum ngairuotnaa intu nghet thil a um hlak a. Manmasi thla amanih Sinlung suok ni anga inhrilna le inngaina um hi entirna thra tak a ni ka ring. A taka thil um a ni le ni naw nekin ni dinga ei inngaina khan thu a hril lem. Mihriem po po hi Adam le Evi thla ni-a ngaina leh a danglamna a um nawh. Khawvel umphungah puitling saa pieng iengkhom a um naw lai le chu ngaidana inthoka inkhihai chun an pom naw a ni khomin, hi thil hi Judaism, Christianity le Islam sakhuo zuituhai lungrilah a riek sawt tah leiin, Adam le Evi ngirhmun hi a’n phet el chuong nawh. A ziektu Mosie khan research scholar-hai thaw danin a thu lakna hnar ziek naw sien khom, ringhla ruol lo Pathiena inthoka a hriet ngei a ziek nia pom tlang a ni lei khom a ni el thei.

Eini thusim, Manmasi thlahai le Sinlung suoka inngaina hi Hmar History bu hmasa tak ziektu Hranglien Songate (1879-1983) le a naupa T.Khuma thukhawchanga inthlung a lo ni palh khomin, makti-a âr mit intrăna ding a ni bik chuong nawh. Phuokfawm thu le hla hin hnam chanchin ziekna a phan khum truk chang a um hrim a nih. Chu thila chun eini khom ei bangbo bik nawh. Hnam tranna lungril zauthau lem chun a lawmzawng tak a nih. Sinlunga inthoka ei hung suok dan chungchang hrilnaa hla ei hmang khom hi hang bi chieng inla, a thu le trongkam hi a tulai ta hle a, Chin Hills kaia siel ei vai hnung le tuta ei khawsakna ramhai ei hluo hnunga mi a nih ti ringhla a um nawh. Hieng ang hin:

Khuo Sinlungah
Kot siel ang ka zuong suok a;
Mi le nêl lo tam e,
Hriemmi hraiah.

Independent Kohran Hla Bu No.228 (Sut sawmna-1997) a Rev. Lienrum hla phuok ‘Sinlung Ram’ tia chun, “Kan Sinlung ram, kan Sinlung Ram, Ram boral ding tlangah kan leng” ti a um a. Hi taka ‘Sinlung’ a ti ruok hi chuh hnuoi ram, la boral el ding hi a nih. Hla phuoktu dang chun dannaranin Sinlung ti loin ‘Khawvel Aigupta’ an ti lem.

A thi hnung kum 31 (2014)-a sut HMAR CHANCHIN, L. Hranglien Songate hminga hung suoka chun kum 1938-a a hla phuok KA’N SIENGNA SINLUNG ti a chuong a. A chang khatnaa chun,

Ka’n siengna Sinlung ram hmingthang,
Ka nu ram, ka pa ram ngai;
A’n lalhrai parthing ang an vulna,
Kan Shan khuo-KHAMCHUNG ram khi

tiin a tran a. Sienkhom a thunonah “Kan sawmfang parthing ang vul la” tiin a sunzom daih a, ei bo map el! A iengkhom chu ni sien, ei hla hluia ngai, Sinlung le ‘Shan’ thrangna po po khom hi hang bi chieng inla, Hranglien Songate kut tlakna sulhnung deu vong ni theiin a’n lang. Pipu thusim le thurachi a hriethai hla thua a’n zawtna a ni leiin, chuong ang chun pom thiem inla, a him takin ka ring. Chu chu thu le hlaa hma thruoitu hnam hmasawn hmasahai khomin an thaw chang a um ve tho a nih. A poimaw tak chu histawri ruongam sunga lak lut chin ding le ding naw hriet fie a nih. A tle reu taphot hi rangkachak a ni nawh.

Hriet thiem le pom thiem ngai chu hi hi a nih: Mosie chun hnuoi le van le thilsiema inthoka Israelhaiin ram tiem Kanan ram an lut chen, kum sang tam sunga thil inlumlet dan a ziek a, a ziek san le tum hruk bitna dingin thu poimaw zuol chauh a hlu lut ti ei hmu a. Eini khom hriet lo rama um, ei trobul Sinlunga inthoka tuta ei chengna ram ei tlung chena ei chanchin, ieng chena sei le tawi amanih ti khom hriet chieng lo, reiruoia ei hriet sun khomin Kawlphai (Kabaw Valley) bak khêl lo a ni leiin, research thawa hruk bit ngai a tam taluo a, phuokfawm tienami le hlaa hruk bit seng el chi a ni naw a, chu chu a’n khawkna a nih. Hnam upa deua inhril hi hnam tin thaw nuom a ni hrim a, besan ding thu le hla ei nei phot chun a poina a um nawh. Sienkhom, hruk bit seng lo chanchin kawrong khukpui chu mani insuk muolphona mei mei a ni thei. Histawri ei ti hih thil tlung tah chanchin suina le inchikna a ni a, thil tlung tah chu Pathien khomin a sukdanglam thei lo thil a nih.

Sui dan pahnina
Chuleiin, sulhnung sui dan pahninaah lut inla. Hi dungzui chun besana hmang thei sulhnung ei hriet phak china chieng phot a nih. Chutaka inthok chun chanchin hla lem le tam lem sui pei ding a nih. Kawlphaia Zo hnathlakhai lut hun kha huoisen taka histawri ruongam (historical framework) sunga khumtu chu B. Lalthangliana a nih. A lekhabu, India, Burma & Bangladesh-a MIZO CHANCHIN-a chun AD 800-850 vel le AD 1200 vela Shan-haiin an hung nor suok leia Chin Hills kai tunga chihnam hrang hranga inhlawm le cheng dar pei niin a ziek a (Ref. Hun Indawt Dan- Chronology p. xxx-xxxi). Hi hi innghatna tlak a ni le ni naw chu eini rawi thu le hla hlui le sulhnung ringota inthok ni loin, ei kawl le kienga cheng hnam danghai chanchin inchik leh a’n mil thei am ti dam enkhi a ngai.

Chun, a hmaa ei hril tah, thingkung lien tak, kaupui le kaute za tama peng indar pei ei ni leiin, hnam pakhat ringot chanchin thlur bing tum chu um lo zong le boruoka in bawl tum ang a ni thei. Kawlphaia Zo hnathlakhai ei cheng lai khan ieng trong am hmangin ieng hmingin am ei inko ti ringot khom ei hriet chieng si naw chun, a hla lem sui tum chu rawl bang baw an ti ang char a ni thei bok. ‘Hmar’ ti hming lem hi chu kum 1900 kha zieka a hung inlangna hmasa tak le Old Kuki Group hnuoia hming neihai laia naupang tak le nuhnung tak, sienkhom anni hnathlakhai laia ‘ethnic core’ chanvo phurtu pakhat ni dinga ‘khuonu ruot’ ni thei le chu dinga insiem tung pei chu ni-a inlang a ni leiin, kholbing deua a chanchin le thu le hlahai sui tum chu a thlăn ding chopek ang a ni thei. Hmar hnathlak vonga ei ngai le pom Old Kuki Group lai hin ‘Sinlung’ hming sâm hlak an um hrim hrim am? ‘Khurpui’ ti hmang ruok chu an tam. Lung inno taka “Pi le pu chen khoma an lo sak sa” ti thlâk ringota inzo el thei chi a ni nawh.

East India Company le a hnungah British Kumpinu hnuoia India ram a lut hlim lai khan a ram mihaiin an histawri an hriet phak chin chu Babur-in kum 1526-a Panipat indoa Ibrahim Lodhi hne a, Mughal lalram a hung indin tran lai, a Diary maksan ‘Babur-nama’ a chanchin a rikawt chen chauh chu niin an hril. A hnunga Europe-a inthoka thil hlui sui mi, mithiem tak tak, entirnan Friedrich Max-Muller (1823-1900) hai dam an hung hnung khan thil hlui an hung dap suok pei a, Indian history khom BC 3000 vela hlaah, thudik le inzawl siin, an son hla el a nih. Zani khan voisun a hring suok pei a ni leiin, voisun thil hriet chieng phot chun zania thil tlung suidon a olsam. Chuonga hnung sawn thaw peiin sulhnung dap thiemhaiin thil hlui le chanchin hlui tam tak an dap suok hlak a nih. Hi lei hin a huna chenghai nek daia an chanchin ei hriet chieng lem a tam.

Phuokfawm histawri
Phuokfawm histawri ei ti hih cholesterol thra chi le thra naw chi a um an ti ang deuh hin a um ve a. Hnam tranna lungril chok thona le chawm lienna dingin hnam tinin an hnam huoisenzie le hratzie inentirna dingin thusim, thurachi le tienami ropui tak tak le mak tak tak an phuok a, chu chu a taka an histawri leh hriet hrang thei lo khopa inzûlin thiem takin an zĕl kop a. Grik tienami le thusim tam tak, entirnan Hercules tienami dam, Troy khawpui an rŭn thu le an hung kir truma lampuia an thil tuok thu, Homer-in Iliad le Odyssey a ziek dam hin an khawvel le khawthlang sivilaizeson thu le hla a fang nasa a, an histawri tak le thlier hrang harsa khopin an nunah thu a hril a nih. Santa Claus khom hin kristmas vuokveta chuh hmun a hluo lien khop el.

Italy-a ka um laia ka mikhuolhai hmu chak hmun ka sirpui rawn tak chu Shakespeare drama zieka sirsana a hmang, tak cheia an chei, entirnan Romeo le Juliet tuollengna Verona dam le The Merchants of Venice-a Judapa Shylock tuollengna, Venice-a ‘Rialto Bridge’ dam a ni tlat! England-ah ei inzin khomin khuolzinhai hmu nuom pakhat chu thusim anga an hril, mi huoisen, mi hnuoihnunghai santu Robin Hood (c.1250-1350) chettlatna Sherwood Forest-a a sulhnung ni anga an chei hmun dam chu a nih. Europe ram fanga khuolzinhai mit le na tlaina dinga zor hlaw tak, an sum hnarpui laia pakhat chu an thusim le tienamia changtuhai sulhnung a nih. Eini khomin ei Sinlung hmun ding awm dapin mit ei inlĕn a, China ram Szechwan Biela Yalung vadung kama um khaw pakhat, ‘Xinlong’ ti-a an ziek, Reader’s Digest Great World Atlas-a ‘Sinlung’ ti-a an ziek chu ei Sinlung tak taka ngaiin, thri be china ngaihai khomin hnapkhawn pachang hmu an hril ang elin, invak suorin ei tak hril a, Aizawla inthoka a hmun sir dinga an tirh pastor pakhat ripawt khom chanchin bu hrang hrangah an ziek kûr nguoi a ni khah. A ieng a khaw dawn loa chawimawina nopui lo inhlan pawl khom ei bo nawh. Ei awi nuomzawng thila chuh mihriem hi hlĕm ei olsam a, Evi dawbol ni thei ei tam.

Lalruong hai, Sura hai le mi huoisen hrang hrang tienami an hril sawng peihai le ei ram hmun hrang hranga an sulhnung ni awma ei bel tam tak khom hi tak ram am mang rama mi a ni le ni naw thrè thrawp chu thil olsam a ni nawh. Tak rama thil um anga ngaia pomtu chun ama le ama inphatsan chu tlawmthlâkah a ngai leiin, a thranghmun phet thlu vong inla khom dol zora zor a nuom naw leiin thudik khom pom zam el a rin hlak. Ei histawri suina konga khom hi ngirhmuna ngir, phuokfawm histawri-a intûla a dang khom phuok belsa pei tum pawl an um hlak. Amiruokchu, hnam tranna lungril chosuokna dinga thu phuokfawm leklam le histawri tak tak inkhinaa hmang chu a tawpa hnam muolphona intluntu a ni thei leiin fimkhur a ngai. Tu khom hin lungvar hmang thei thrangtharhai lungril le ngaituona sukchi-aitu pakhat chu ei phuokfawm histawri hi a ni dĕr tah ti ei hriet nuom a um.

Sikpui Hlapui
Sikpui Kŭt ei hmang changa inthrumna hlaa ei hmang khom hi lungnona thrang loa bi chieng a ngai. Ei ‘Manmasi’ keileta ‘Manase hnama’ inhril a, Juda sakhuo zui le an sa phun chu Gate Pass remchanga hmangin Zo hnathlak mi 3000 chuong zet Israel ramah inpem phanain hmanghai sien khom, hieng ang phuokfawm thu le hla ni awm tak neitu hnam ni hi thil suonguma hril le ngai ding a ni bek nawh. Kum 2004-2005 khan ‘Phuokfawm Histawri-1-4’ ka ziek a. Serial 3-na chu Sikpui Hlapui chîk taka bǐna a nih. A hla trongkam le thluk hi a tulai takzie le kum 1940-50 inkara Sakordai (Hmunsang) le Vaitin vela inthoka hung suok ni dinga ring a ni thu hieng ang hin ka ziek a:

“Sikpui inthrumna hlapui hi a suok dan le a hung suoksan um ngei a ta, chu chu sui suok tumin hma la pei ei tiu. Hi hla hin hnam tonhriet leh inzomna a nei am ti zawna ei indon pha pha leh, lo thei loin, Israelhai tonhrietah a mi kirpui a, don el thei lo zawna tam tak a cho suok bok a. Mani ninaa lungawi lo le dit khop lo, nina inzaum lema an ngaihai nina intrawmpui chak pawlin inbikrukna dingin an hmang a, hnam threnkhat lem chu hi hla lei le Hranglien Songate chawilar ni awm tak Manmasipa leiin, Kristien sakhuo maksanin Juda sakhuoah an inpêm ta a, a hringhrăna Judahai ropuina chu (an tuorna thrang sa loin) intrawmpui an tum a, a zaa tiem Israel ramah an inpèm pha ta bok a nih. Kum 1993-a Israel ram ka sir trumin ka zu kan tawl a, an innghatna tak chu Sikpui Hlapui hi a ni vong. Kristienhai tukvera inthoka thlir chun, hi hla tluka Setanin hla a hmang hlawk hi Zo hnathlakhai hla lai pakhat khom a um nawh, ti inla, inkhêl naw nih...

“Sikpui hlapui hung inlàr tran hun ni awma inlang ei dap chun, ringna tienga peteka ngai, kohran nawlpuia inleng ta lohaiin a hringhrăna Israel nina intrawmpui châka kum 1950 vela inthoka Calcutta Israeli Consulate an zu dawr tran hun lai kha ni tlatin a’n lang a. Chuong hun laia hieng thila inhnik mi pakhat chu Sakordai (Hmunsanga) lal Lalsanglien (Raja Sanga tia hriet lar), pa mak tak le hming inthang deu el kha a nih. Independent Kohrana thrang hlak ni sien khom a petek hnungin ama sakhuo a biek a. Aizawla kan zin changa mi hung kan hlaktu, mi hlui, police ofisar bang, hieng thila inhnikna nei, Hranglien Songate le mi hrang hrang pawla chanchin lo khawl khawm hlak Sapchhunga leh kan titinaah hieng thil hung satpui hluttu chu Raja Sanga niin a hril tlat a nih. Chun, Sikpui Lam hung tuoi thar nawktu laia pakhat chu Vaitin lal Hrangtinai a ni a, Sikpui Hlapui hung tral suokna khom hi hieng lai biel, Sinlung Hills huom sung hi niin an lang tlat a nih. Hi thil hi lung innona ringota nor loa, histawrian lungril puta sui chi a nih.

“Hranglien Songate ziek HMAR HISTORY chu 1935 vela tranin 1950 lai khan a ziek zo a, 1956 khan sut tranin 1958 khan a suok a. Hieng lai hin Sikpui Hlapui ei hril hi a la hriet naw ni ngei a ta, a lekhabua hin mal khat khom a hril sa naw a. A hnunga 1970-74 laia zau lem le umzie nei lema siem thra a, sut nawk dinga a buotsai lai ruok khan chu Sikpui hlapui ei hril lai awn zawng ringota Hmar chanchin hi thlekpui a hung tum ta tlat a nih. Chuong ang thlarau puta histawri ziek ei tum chun ei zeldinna thu le inmil dinga ei hla hluihai kei her le phuok bel pei rin nawna a hung hring thei a, thlarau khelhlip thununna hnuoiah ei intang thei a nih. Chu chu siemphuisuipui tuma thrang ka lakpui lai khoma kan inkhuongruol nawna tak a nih.” (May 13, 2005)

Ei hmaa zawna poimaw ngir chu, ei Manmasi amanih, Sinlung amanih, Shan amanih le Tuipui Sen Kan (Sikpui Inthrumna) amanih theory hai indikzie thrangpuina dinga thu le hla ei hmanghai hi phuokfawm hmangruo ei fom chop an ni le ni naw thu a nih. Thu le hla hluihai hi ei chanchin suina dingin an poimaw hle laiin, phuokfawm hmangruo hmanga mani le mani ei inhlem chun, cheng tling ni lai dere khom tling loa insiemna a ni naw maw? Phuokfawm histawri chu hun khatah ieng angin suongin hlimpui inla khom, thudik tuipuiah a pil sawt thei naw a, a la hung inlăng suok nawk hun a um tho tho.

Tlangkawmna
Pi le puhaiin thu le hla tam tak an ser hun chu Kawlphaia inthoka Chin Hills kaia tlang hrang hluoa ei cheng dar hnung, abikin Rûn le Trieu kara an khawsak lai a nih. Sanzawla an um lai hin Butukhuonglawm dam, Sikpui Kŭt dam an hung tran ni dinga ring a nih. Pahnam hnama tlang hrang hrang hluoa an hung thlang tlakpei dan hai le an khaw hluo tam tak chu tu chena pahnam hming chawia an la ko pei lei dam le Sikpui lam hla, Hrâng lam hla, Dar lam hla, Butukhuonglawm le Loneina tieng hla chi hrang hrang, Lenglai hla, sakhuo biekna hla, inthawina hla, dawi hla le hlado chi hrang hranga inthokin an khawsak dan, inrelbawl dan, sakhaw biek dan, puithuna chi hrang hrang an nei dan, an khawtlang nun hrilna hla dang danga inthokin an khawvel um dan le an chanchin hriet thei a nih. Chun, hlaa ei ngai rak lo, naupang inhnelna le nau inawina hla dam hi ei bi chieng chun, tienlai chanchin lem insîrna le inchangna a tam leiin, sulhnung suina dinga hmangruo poimaw tawp a lo nih.

HMAR HLA SUINA ei hril tah khah sir tina inthoka Hmarhai chanchin sui theina Hmar tronga lekhabu um sun a nih ti inla, thukhêl ni kher naw nih. Ka ziek lai huna inthoka tiemin kum 40 chuong hiel a lo invoi ta a. Chu sung chun thu le hla thar tam tak a pieng ta a, a tam lem chu India ram puo tieng kum 21 sung a zawna ka thang sunga pieng a ni leiin, ka hmelhriet ta naw khom tam tak a um ka ring. Delhi tlanga umhmun khuor ka ni leiin hla suok tharhai ka hmelhriet thei dan um sun chu You Tube hmanga ngaithlak an naw leh an Casette record ngaithlak a ni a, chu ding chun ni tina darkar 12 bek sinthaw ka ni leiin hun awl ka nei tlawm si. Kum khat sung hi khumbeta zal ka nuhmei damnaw sun le zana nghak ka ni leiin a ngaithlak ding You Tube-a hla ka zongnaah ka la ngaithlak ngai lo hla tam tak ka hmu suok a. Hieng hla tharhai hung pieng dan le an mizie inchuon saa Hmar Hla Suina sut nawk chu thaw ding makmaw niin ka ngai a. A tlangpuia ka hmu danin thluk a nei leia hlaa ngai, literechar thra inkhina phahlaa bŭk chun patchawn deu el, bazaar trong deua Hmar trong le Lusei trong a ni hriet hrang harsa khopa thu saisa a tamin ka hmu a, phing suksip thei chi a tam. Ei inhmang nasat takzie hriet theina darthlalang fie tak niin ka hriet. Thrang lak a ngai. Thrangtharhai enton le inchuk tlak ding thu le hla thra ei mamaw.

(August 9, 2017; Delhi)

Note: Hi thusep hi Shillong HSA Joint Headquarters Diamond Jubilee Souvenir, 2017-a dinga ziek a ni leiin a magazine tlangzarh a ni hma chun Keivom Diary le Delhi Thurawn (DT) ti loa chuh a ziektu phalna lo chun khaw lai khom le tu khomin insuo le hmang phal a ni nawh. Author

###

No comments :