Search


Jan 6, 2018

2017 Thlirletna


We are made wise not by the recollection of our past,
but by the responsibility for our future.

- G.B. Shaw

A thei phot chun kum tin Tuolbuol chawhma tieng hin kum liem tah sung po poa thil tlung inchik tlâka ka ngaihai tarlangna artikul ziek ka tum hrăm hrâm hlak a. Ziek ngeia chanchin sie an um a, zieka insuo an um bok a. A hmasa le nuhnung poimaw dan hi inang de sien khom, sim le hmar ang charh a la hung ni thei. Zieka insuotu chun a thu ziek tiemtu taphothai chuh a thu hretu le vongtu-ah a siem bakah a kawpi lo kol thrahai chun mi dang tam tak an intiemtir bakah a kawpi an kol thra pei chun, thrang la hung thar peihaiin a ziek lai huna an khawvel thlir theina tukverin an la hung hmang pei ding a na; upa deu deu a ta, a hlutna a pung zuol deu deu ding a nih. Zieka sie ringottu chun thu a ziekhai chu mi hriet le ngaithlak dinga a phor lang si naw chun a thi ruolin muol a liempui hlak.

Ei thu luongah ei intawl lut hmain, hi thil le inzom, mi tin damlai ru bawka kop tlat pakhat chauh hang zep vak inla. Mihriem tu khom hi ei hung pieng suoka inthoka vui liema ei um chen inkar hin mani seng tonhriet le inchuk suok varna iemani bek chu ei nei. Chuong ei tonhriet seng ei thlahai kuta inhlan sawng pei chu mi tinin dam sunga tha bat ei tlak dinga ei hma senga inhlum chu a nih. Hieng tonhriet, hrietna, thiemna le varna intling khawm hin nun le khawsak insang lemah mihriem a hlangkai pei a, ‘Civilization’ ei ti chi hrang hrang hi a hung hring suok a nih. Chuleiin, kum 2017 muol ei fang nawk ding hi khom hi ei thaw ding hrima khuonu ruot, tha bat ei tlakna ding a nih ti ei hriet hmasak ka nuom.

Hma bâk inko
Kum 2017 ei hung phok tran ding khan Hmar hnathlakhai khawvel le ei chengna khawvelah thil tlung pomaw, kakhawk tam tak nei ding a um a. Pakhat chu Manipura PHERZAWL DISTRICT pieng a na; pahnina chu Amerika President inthlanga tling sa deuthawa ngai Democrat kandidet Hillary Clinton chu tling lo a, a khingpa Donald Trump a tling lem tlat kha a nih. Khawvel barakhaiin a kahâk el chu a ni kha tie! A tling chu a ieng ieng khom ni sien, a ram mi, thiemna le varna tienga trawm kai loa mi ngaihaiin sin an hmu theina ding le kristien sakhuo inzirtirna dungzuia ram rororelna inlet nawk dinga dittu pawl (moral majority) thrangpuina lieu lieua tling a ni leiin, a mizie enin, iengtin topin am a bazaar trongin khawvela thuneina hmol hratkhawkheng chu chelekin a hang vai ta ding? Hi lei tak hin a hnunga North Korea President leh naupang inhnel ang ela an niukliar ralthuom nei sâla an inchirthè chu nih. “My button is bigger than yours” (Ka niukliar hmetkil kilhai hi i ta nekin a lien lem) ti ang mei mei dam hi an inhnelna trongkam a ni tlat leiin, ei khawvel hma bâk inko naw ziezang a ni nawh. Ni tina chanchinbua mi tin zong tak chu Trump-a ‘fake news’ a nih.

Chu khawvel chu maksanin ei khawvel kilkhawrah lut inla. Luok suok pawta inlal tah nia mi tam tak ngai, Manipura Congress Chief Minister hlui Ibobi Singh khan mi dang kuoma a pham hang inhlan el khah chu a lo la teuh naw ngei maw! Kum tam tak India laipuia an sorkar hnuoia inlekphek hlak kha BJP sorkarin lalna a hung chel hnung chun ai mit thlong ang char an hung ni ta a. Sorkar laipui ngaisak hlaw ding chun a ram mihai ngirhmun sukphawkleka risie iemanih siem trûlin an hriet ngei ni mei ding a na, anni puok suokin, Three Bills ti khah an hung duong suok a. Hnam bil ripa intâng Churachandpur Biel a hung deng har a. Iemani chen chu thrangruolin kal an chawi tlang a; an aiawa ngirhaiin tlangmihai humhimna sin le mawphurna an ngaitha leia thil tlung thei chauh a nih ti an hriet chun vok hnotin an hnot a, an inhai an rawpek a, mani sa himna dingin an insaseng tawl hiel a nih. Hi le inzoma September 2015-a mi 9 thihai ruong chu 2017 May khan an vui liem chauh a nih.

Inthuruola tlangmihai dodalna leia 3-Bills an nuom nuoma an lo chinglet chu a hlamzui phing leh an inthuruolna sukdarna ding le kum 2017 March-a State Assembly inthlanga Congress an hrat zomna ding hisap ni awm hielin, December 8, 2016-a Manipur Sorkar thusuok No. 16/20/2016-R chu a tuk, December 9, 2016 khan Manipur Gazette-ah an hung insuo a. Kha hmaa Districts pakuohai laia pasari-Imphal East, Senapati, Thoubal, Chandel, Ukhrul, Churachandpur le Tamenglong- ti-hai kha District thar pahni senga khawi darin Revenue District thar 7 a hung pieng a. Chuonghai laia Churachandpur District-a inthoka khoi thlak District thar hung pieng chu Pherzawl District a ni a, a huop chin chu Pherzawl, Thanlon, Parbung-Tipaimukh & Vangai Range a nih.

Dr. John Pulamte-in, “Pherzawl District” ti thupuia hmanga a zieka chun hi District thar hi ‘hni lo mawlsawmna’ ti thei deuthawa a khuo le biel mihai zanmang le duthusama um chauh kha Manipur politics intetbuoi nei nuoi insuktuok khawm leia hung pieng thut el a nih. A suolsuoktu bik nia insâl le, mimal pakhat papek bikna lem chu politiks khawvela um ei ni leiin thil um thei ngai a ni a; bu tak khûka khŭkpui rak chi lem chu a ni kher naw el thei. Hnam pakhat ditsakna leia hung pieng suok lem chu a ni teu teu nawh a; ka thu ni sien lem chu hnam bing ang zawnga lawmna, a thu le a taka siem, um naw top a tih. A san chu hnam pakhat le pawl pakhatin a lawm chun a lawm naw a let thuma tam an um tei hlak. Election tawm lai lem chu a zuol bik. Thil hrim hrim chu a neitu le chongpu bik um a trul a, chuong mihai sin le mawphurna ding chu mi tin hriet dinga puong le hril dar lawk rak chi ni kher naw nih” tiin a ziek a (Pherzawl District., January 21, 2017), a pomum khop el.

A suolsuoktu kut ni-a inhril khom an um nangieng. A pieng ta si si chun a pa ni inchu khom inzak a um nêp deu tah khom ni naw nim. Ka tupa Dr. Lal Dena le ruok chu Pherzawl hi ieng lai khoma sun le zana hlim anga kan intlonpui, a hming kan săm nghok lo a nih. Hriet ding poimaw le thudik ngir zing pakhat chu hi hi a nih: Mizo Union tuifawnin a mi kiemsana inthoka Hmar hnam bing pawlitiks sunga ei hung intĕl khawma inthoka voi sun chena Hmarhai ta dinga sorkara ei hni ngat ngat chu India Danpui Sixth Schedule hnuoia an rochung Autonomous Hills District Council (AHDC) a nih. Ieng huna khom, tu sorkar kuoma khom, Ibobi-in theichang hrŭt sema a sem ‘Revenue District’ hi, ka hriet china le document ka kol phak china chun, Hmarhaiin ei la hni sin ngai naw hrim hrim a, ‘Pherzawl District’ lem lem chu a teuh nawzuol. A pieng ta si chun, a hlamzui nawna dingin, a sukpuitling dan ding invoi lem inla, ei hlawkpui lem ring a um. A hma bak a’n ko a nih. A lawmnaa an sa bak le an lămnaa pilvut khu an hap treuh bak khah hap dang an nei ti hril dang a vang tah ni naw nim, facebook-a hung inlang sun chu lam siet thu le bus tlung thei naw thu a ni zûr zut.

‘Hmar Biel’ ti-a Hmarhai hriet le ko, sorkarin Tipaimukh Sub-Division a ti hih khawvela hmun hnufuol tak laia thrungna hmatawng hluo thei khopa inrienga a hluotuhaiin an soisak a nih. Hi Constituency char hi ieng lai khoma a ram mi MLA tir suok thei a nih. Tu chena MLA/ Minister ni tah po po khom hi biela mi vong hi an la nih. Manipura inthoka Hmar MLA um sun an ni hlak leiin khawvela Hmar hnathlak po po aiawtu amanih an insawn el khom ni loin chuong ang chun an insie hlak. Hi Biel inthlang hi sakhuo le kawrapson chunga inleng a ni leiin a hming sietin văn a ur a, a biel retheinain kawlkawdong a sun. A ram a chieurieu zo a, thing le ruo an ram zo. Ramsa le vate inhram ri chier nuk nuk hlak kha hriet ding a um ta nawh. Inrûm ri inlâr tak, nupuiin kut bena an lămpui hlak chu Ngamlalchawl inrumna hla, “A sietnawna a um nawh!” ti hih a nih. Chuong mihai bok chun, kha hma ela tlangmihai chanvo hum ngam lo le anni inphatsantua an ngai le vok hnota an hnot le a in an rawpek le suosampek hiel kha thla sawt naw te hnungah an aiawtu dingin an thlang nawk el! Hi thil hi kum 2017 sunga thilmak tlung laia inchik tlak a ni naw a ni khomin jel ngei tlak chu a ni hrim hrim. Hi Biel chiterek hi hnam trobul le nina hung inder suokna hmuna ngai le en a ni tlat leiin, a rukol ringot kawl tuma inchăn nêkin, hnuoi hrŭla bal nenga chihrak laia lo injămhai khom hlîm tung a, hna thar le ra thar insuo dinga enkoltu ding thruoitu ei mamaw chu a ni hi tie!

Pherzawl District hung pieng hi lawm a um hle laiin, var tak le duot taka enkol theitu bula innghat le ahmatiema a bat bata bul tran sin thaw a, hmathlir sei tak le zau tak neia duong a ni pei naw chun, a hung pieng lawmna ri a rĕ ruolin hung thring tran pei a ta, hmun le hma changkang lem le a a tuoi lum thei lemhai huongah sonin a um hlak. Chun, Revenue District thar siem treu a, tlangmihai hmun le ram kil le kapa district hmunpui indin hi sorkarin Manipur Land Revenue & Reforms Act, 1960 (as amended) a hmang theina hmangruo a ni leiin, hre chieng loa lo inpak huom chi ni kher naw nih. Rukru khom kotkharpuia lut loa bang vera hunghai hin tum ruk lien tak an nei nuom leiin poi an tawk nasa zuol thei.

Khanga Pherzawl District a hung pieng el khah Bethlehem chung zawna arasi mak hung inlang nek hman khan a mi barakhaih tawl a. Ram rê laia varung thrawng tho an hril chu nêp te a nih. Thil hung tlung thut a ni leiin le thil fe dan, hnung le hma le hung inlumlet dan inhril hrietna dingin, ‘Pherzawl District: An Overview’ ti thupuia hmangin Delhi HSA Joint Headquarters huoihotin Centre For the Study of Law and Governance, Jawaharlal Nehru University, New Delhi-ah January 28, 2017 khan Sinlung Academy of Letters (SAL) chun ‘Dawntlang’ (Seminar) a buotsai a. Hi truma ka bituk chu ‘Pherzawl: The Road Forward’ ti a nih. Hi trum hin ‘Revenue District’ le Sixth Schedule humhimna hnuoia ‘Autonomous District Council’ danglamna bakah Manipur State sunga um tlangmihai ngirhmun derthawngzie ka hril bakah ADC ngirhmun an pek nuom tlat naw el khelah tlangmi (tribal) an nina khom tlangram mi (hill people) ti-a thlak vong dinga Constitution hrang hrang an lo zam tah hai phor langna artikul dangdai, ‘Tlangram Vs. Tlangmihai’ (Hill Area Vs. Hill People) ti khom February 4 khan ka ziek bok a. Tiema hung har suok nachang ei hriet leh a thra; ei hriet naw ruok chun ei cháng chàng ei chang ding ma chu a ni el. Ei mai bil vengtu dinga ei dandehai hlak a fa se hrat hrata thrang ni dinga ei ngai si lem chun, hi khawvel buonzawla hin ei dam khawsuok naw ding a nih ti chieng inla, hisap suol kher nawng ei tih. Mi tin mani thilthaw anga relpek hi Pathien thutak a nih. Tribal concession a um nawh.

March 15-27, 2017 khan molawm malamin Tuithraphaiah ka hang suok a. Ka’n zinna thu Tuithraphai 1-5 ti thusep khom ka ziek pha nghe nghe a. March 4 & 8 a State Assembly Election rizal khom March 13 khan an puong a, Congress 28, BJP 21, NPP 4, NPF 4, Trinamool Congress 1 le Independent 1 an tling a, BJP-in mi 32 an hui khawm thei leiin Sorkarna an indin a, nghet takin kum tawp chen an suo a, mi ral ring bakin thil an thaw rawnin, phaimi le tlangmihai inkar chadan nasa takin an sukhnai a, inhriet thiemna a pung a, remna le muongna boruok khomin hmun a chang lien sawt khop el. Anni sorkarna hnuoia hin a nih 3-Bills leia hringna chân mi 9 ruong kum khat le a chenve hiel ruongsiena (morgue) a an sie tah khom chu an vui liem chu nih.

Tuithraphaia ka cham sung March 25 khan SAL huoihotin Rengkaia HSA Campus-ah “Pherzawl:Thlirvelna” ti thupuia hmangin SAL Secretary David Buhril rokhaina hnuoiah ‘Dawntlang’ nei a ni nawk a, ka tupa Dr. Lal Dena leh thuvaitu-ah kan thrang a. Hi trum khom hi hmathlir ei neihai hril tlangna a ni bakah Manipura tlangmihai ngirhmun derthawngzie le a lu tam lemhai chalai sorkar le roreltuhaiin ieng thil khom hril hai sien, tlang tak le fie ronga tlangmihai ngirhmun le India Danpui hnuoia an chanvo indik tak an pek fel hma chun ieng dan khom siemhai sien umzie a nei tak tak naw thu a nih. Thil poi tak el chuh, thri be china ngaihai khomi tlangmihai ngirhmun hre chieng le invoi ei vang hi a nih. Miin ruongchaiche an mi thlak khum a, hre loa inveng nachang ei hriet bok naw chun, Isun Jerusalem a trà khum truma, “I sunga lung inthuo rêng rĕng hlà nei nawng an ta, Pathienin a hung kan lai che i hriet naw leiin chuong chu i chungah a la hung tlung ding a nih” (Lk 19:44) a ti ei kha pel ngut ring a um nawh.

Chuleiin, kum 2017 sung kha kong hrang hranga inhril hrietna kum ni-a ka ngai leiin, a hmaa ka hril tah hai leh khan hi kum sung hin Sinlung Academy of Letters (SAL) chun ‘Dawntlang/Dinner’ Churachandpurah- voi 3 (Rengkai-March, Bethel-July, Sielmat-Dec); Delhi-ah voi 3 (Jan, July, Dec) a buotsai a. July le December ‘Dawntlang’ hi ‘Thangngur Memorial Lecture’ a ni bik bakah nuoi li chuong senga ka sut ‘Ka Thlirna Tuvera Inthokin’ (Views from My Window) ti, ka thu ziek 40 thlang khawm le kum sawmli deuthaw liem taa sut, ‘Hmar Hla Suina’ (Hmar History, Culture & Religion) chu tuoi nam le appendix phek zakhat chuong belsaa library edition-a sut chu tlangzar a ni bok.

Nina inzaum phur suok le kengkaw theina dinga thil poimaw pakhat chu mani nina le trobul hriet chieng a nih. Eini rawi hi thuok la hman hman loa Edena inthoka Thupuongsuo chen thiempu dawi hla insam ang topa innâla insam thei ei tam laiin, ei pieng le murna, ei trobul le hnam kalchawi dan bong khat khom hril mumal thei loa intung deu vong ei nih. Ka thu hril ring nawtu chun in bul hnai taka tu khom kha indon unla, chieng nghal vong in tih. Sakhaw zirtirna indik naw leia pi le pu huna ei nina le thil hlut po po hnawmhnawl le thlauthlak vong dinga ei lo inchuktir ra suok a ni a, chu chun ei mit a sukdel leiin, saruoka lêng ei nih ti khom mi tam takin ei hriet nawh. Mawl hi a zakmaw a, saruokna chi hrang hrang hi inzakumah a ngai nawh. Adamhai nupa khom kha an lo ni tho. Chuleiin, lekhabu pakhat sunga ei chanchin tlangpui hriet theina um suna ka ngai HMAR HLA SUINA hi harsatna tam tak karah, sawl le kham dawn loin, sun-zan zomin ka buoi ngat ngat a, Pathien lunginsietna zara a hung suok el hi ka lawm takzet a nih.

Tuta trum Kristmas le Kum thar chu Chawlni le Pathienni inzomin a tlung leiin Delhi tlanga khom ruoi siemin ni hni ve ve hmang a ni a.   December 30, Zirtawp zan kha kan sangpa Lalbieksang Ruolngul le a duotlai Mary Jones haiin an in Vasant Kunj-a ruoi kil tlanga kum hlui inthla an rot thut leiin, ka rawihai maksanin ka khatin taxi-in ka fe a. Kan trumtriek khan chu a lo inhnu rei tah leiin, kan inkar hi km 25 laia hla a ni-a chu tlawmngai insuoin ka pu Lalchunghnung rawiin Lalramsang (Jim Greene) leh Robert Penatu car tharin ka in, Jordan Ral, Mayur Vihar-ah an mi va’n thla a. An trin khan khuo a var tran ta a, ka zing tho pangngai hun a nih. Kot ka kal hnung, Sitting Room-a ka hung lutin thrungna ka’n pal leiin ka tlu a, ka mit ko chang tieng teak table sir ngeiah ka tet a. Blessing zing thoin truonga thisen intling pum laia khuo hre loa inbuol a mi hung hmu chun mi a ko khawm a, car-ah an mi thun lut a, hospital hnaiah a mi           thak phot a. A chung taka ka hak windshield jacket, New Zealand-a inthoka thla hma sak ela ka naunu Helen mi hung phurpek, voi khat chauh ka hak suokna chu, thisenin a zop vong leiin, dustbin-ah kan pei top a. An min thiel fai hnung, ka sam thisen khira tuom vong pum chun Five-Star Hospital MAX kan pan a, Emergency Ward-ah an mi hang tuoi nok nok hnung chun Room 1616-a inthokin kum hlui inthla liemin kum thar 2018 chu Lalpa thratna zarin ka ban tung tah a nih.

Thi hnung hung tho nawk anga inngaina tu chen hin ka nei tlat a, a mak ang reng. Ka hang zal hin ka sirah ka ruong zâl zur            anga hrietna ka nei chang a um a, inring lawk loa ka mai ruoi chang a um. Saptronga ‘trauma’ an ti chi khat chu a ni ka ring. Ka hung har suok hlima ka trongtraina chu: Lalpa, ka lawm che. Lekhabu ziek dinga ka phan mek chu hlen suok dingin i mi dit a ni ka ring nghet leiin ka lawm a, ka lung a awi. I thu thua hring dingin mi umpui rawh. I ta ka ni si a.

A tawp taka chun, kum 2017 sunga ka ditsakhai le mi ditsaktuhai, muol lo liem tah a thren chauh inro tak le ngaina takin an hming hang lam ei tih: Dr. Lalzakung Tusing (1944-2017, March 8); Rev. Darsanglien Ruolngul, 82 (Nov 29); Saidana ka pansak laibung Lalkhawbuoi 82 (Dec 8); Rev. Lalngaisang, 90 (December 12); Rev. V.L.Bela 87 (December 30).

(January 6, 2018; Delhi)

###

No comments :