2008 Thlirletna

Zaiin ka awi ang hun ralte zawng chu,
Sang tam zawk tan lawmna ropui,,
Chhiar sen loh tan trahna a ni.
- Saihnuna



Kum 2008 chu ei lo suo nawk dèr el tah. Threnkhat ta dingin a fe hrât hlè thei a, threnkhat ta ding ruok chun a fe muong hlè thei. Liem vat vat sien ti pawl ei um laiin, a liem ding inpâma chel song nuom pawl khom um bok ei tih. Chu bung le châng, bung 12 le châng 365-a sei chu ei nun ziekfung senga ei ziek a nih. Bung threnkhat chu fai fel le ngainuomum tak tak, bung threnkhat ruok chu râng nuoi le inzapuium tak tak khom a ni el thei. Sienkhom, ei ziek zo ta sa chu, Pilat thukhawchang ang el khan, sunhàng khat khom thlakthleng thei a ni ta nawh. Ei ziek thrat chu ziek thratin, ei ziek suol chu ziek suolin a fe song el a nih. Chuonghai chu rorelna hmaa ei la hmasuon ngei ngei ding, mi hêktu amanih chawimawitu ding an la nih. Mi tin hi ei thilthaw ang peia ei chungthu rèl ding a ni si a.


2008 hmêlhmang tlangpui
Khawvel pum ngirhmun ei thlìr chun, sik le sa thuah kum 2008 sung hin ei khawvel lu a’n hài zom pei a, boruok hulum (global warming) uopna leiin hmar tawp ram Artic Tuipuia vûr khalhai chu kha hma nêk khan an intui hrat a, chu chun vadung le tuipui chìm chin a suksang bakah khawvel hmun tinah sik le sa inlumlet dan a khakbuoi a, hmun tam takah tui a lien a, sang tamin in le lo le hringna an chàn a, hri mak tak tak a’n lêng bok a. Hi thil hi ngaituo dingin Poland ram Poznan-ah December 1-12, 2008 khan UN Climate Change Conference an nei a, thaw ding tam tak an inbitukhai chu bawzui dingin 2009 kum tawp tieng Copenhagen-ah an inkhawm nawk ding a nih. Boruok inthlak danglam leia khawvel petek hi zurui petek ang mei mei a ni naw a, a ram phêka sietna rapthlak intlungtir thei a nih.

Khawvelin a hriet phak china chu 2008 sung hin thautui (petrol) man a la kaisang tak. July 11 khan barrel khatah $ 147 chuong a kai a, sawtnawte sung lem chu $ 150 chuong hiel a kai tung hman a nih. November 20 khan $ 50-ah a hung tla thla nawk a, December thla tawp tieng lem khan chu a biling a balangin $ 38-ah a’n bir thla nawk hman a nih. Hi hin sorkar lu a sukhai a, sumdawnghai hisapna a khak buoi nasa hle. Ei tienamia Nêlhaua rawiin Vawrselapa zawnna ding hlâng an siem ding truma a dung an inkhi, a châng leh a’n thluongpek a, a châng leh a’n tìmpek hlak leia inkhi khikhawk an tizie an hril ang el kha a nih.

America-a intranin September khan khawvel sumdawngna a petek a, chu chu chiepuom tektik hmang rua subprime loans semtu New York-a US Investment Bank lien Lehman Brothers-hai tluk sietna leia hung intran a nih. Wall Street Journal hril dan chun, hienghai hin miin sum an inpuktir an chokchawrawipek zat chu cheng tlukledingawn 3750 vêl hu a nih. Hi hin kakhawk nasa tak a nei a, bank tam takin an tuor a, ni dang angin sum inpûktir ding an nei ta naw leiin sumdawng tam takin an siet pha a, sumpuktu tam takin an sum puk an rul thei naw leiin in le lo an chàn pha bok a. Kompani tam takin thoktu an thrum hnuoi a, mi sang tam takin sin an chàn pha bok a nih. October 24, 1926-a intrana New York khawpui Wall Street-a Stock Exchange chimin kum sawm neka sawt rauh khawvela sumdawngna nasa taka a nghong buoi leia fak le dawn thila chi-aina rapthlak Economic Depression a tlung ang èm khan nghong buoi hri naw sien khom, hi thil tlung, financial tsunami hin kum iemani zat chu khawvel a la nghong buoi ding a nih. Call Center tam tak hi a hung khak buoi tung mek leiin, hi ngirhmun hi siem thrat a ni vat naw chun sinin pung nekin tlawm tieng a pan ding a na, ei thralaihaiin an puonbil le dierkei an sawi sing lawk ngai a tih. Khawvel hi in khata chêng khawm ang chauh ei ni tak leiin kil khata pakhat voi thu kha ei inhnam tlang vong a ni tah.

Pawlitiks tienga thil tlung thar chu November 2008 inthlanga America President thara mihàng Barack Obama an thlang tling kha a nih. July 4, 1776-a British kuta inthoka independence a hmu hnunga USA mipuiin President dinga mihàng an thlang tling hmasa tak a nih. Kha hma khan chu mingohaiin mihànghai hi sal le suok chaua an nei hlak an nih. President Abraham Lincoln hun lai 1862 khan sala inthoka mihànghai suokna dan an puonga chu America President-a mihàng nei dâm chu vàna ra anga an ngai hlak a nih. Chu chu 2008 inthlangin a hung thlak danglam leiin khawvel histawria mellung poimaw tak el, mihanghai ta ding lem chun an ‘pielral nisa’ a nih.

Kum 2008 hi India-USA inkara inlaichinna nasa taka a pung kum a nih. October thlain civilian nuclear cooperation thuthlung an ziek a, Nuclear Suppliers’ Group (NSG) khomin kum 34 zet India indawrpui an lo khapna chu an sùt ve a, India chu nuclear powers ram tlawmte laia lak lut a lo ni ve tah a nih. Hi hin ram hrang hrang le India indawrtuona lampui lien tak a hong bok a nih. US President George Bush chu khawvel ngaisang President ni naw sien khom India le USA inlaichinna nghet siemtu a ni leiin Indian histawri-ah hmun poimaw le inzaum a hluo ding a nih.

Kum 2008 sung hin sakhaw awm inhnoka inthoka thuok la pawl, mi buru le tawrothai rikrapna kut India ramin a tuor nasa a, hmun hrang hrangah bomb chang kamin an sukpuok a, mi tam takin in le lo le hringna an chàn pha a. Chu chu abikin May le November inkar sung a nih. A tuor nasa bik khawpuihai chu Mumbai, Delhi, Ahmedabad, Hyderabad, Jaipur le Guwahati an nih. A tuor nuhnung tak Mumbaia thil tlung lem chun khawvel mit a lâk a, India le Pakistan inlaichinna khom nasa takin a khak buoi a, indo dingin an intin uoi uoi el a nih. Hindu kulmut le tawrot ruol infuipornain Orissa State-ah kristienhai nasa takin an suknomna a, mi tam takin in le lo le hringna an chàn pha bok. Helpawl Naxalite-haiin hmun hrang hrangah hrawm an insuo bok a, India sorkar lu an sukhai hle. India hmar sak, abikin Manipura ruok chu firfiek pawl hrang hrang leh sorkarin inbiekna leilak dawin, inkap chawl thuthlung an puong a, ni dang nekin râl a muong a, kum dang nekin Vairampura inthoka kristmas hmang dinga suok khom an tam lem.

India tuolbawmhai laia thil tlung inchik tlak hai chu: a. Bhutan-ah inthlangna hmasa tak an nei (March 23) a; chun, Jigme Khesar Namgyal Wangchuk, kum 26 miin lalna a hluo a, khawvela ram thruoitu naupang tak a nih (Nov 6); b. Rangoon (Yangon) khawpui le a sevel thlipui Nargis-in a nuoi a, mi nuoi khat le a chenve vel thiin an inhmang a, sienkhom an sipai sorkarin ram dang mi hmu khap an tum bakah thrangpuina hunghai khom hnawl an tum leiin an hming a se hle (May 2-); c. Nepal chun an Renghai sungkuo inlalna (monarchy) suktawpin mipui ro inrelna le insorkarna an lak lut (May 28); d. Kabul-ah Taliban-haiin India Embassy an bom a, mi 60 an thi (July 7); e. Pakistan President Pervez Musharraf an hnaw suok a (Aug 18), that tah Benazir Bhutto pasal Asif Ali Zardari chu Pakistan Prime Minister-ah a thrang (Sept 6); f. China khawpui Beijing-ah August 6-24 khan Olympic Games (XXIX Olympiad) bakah September 6-17 chen Paralympics a um bok.


Zoram khawvel
January 11-a intranin February 19 chen, ni 40 le zan 40 sung bu nghei a, sietna laka Mizoram san dinga Pathien kuomah ngaidam hni a, trongtraia thupha chawina chu Lal Remsiem huoihotin Aizawlah an hmang a, chu chu khaw hrang hrangah an thei ang angin an lo hmang bok. Hieng ang thil hi Mizorama an thaw hmasakna tak a nih.

October thla a hung tlung zet chun Pathien thu nekin Sum (Mammon) biekna tieng an lo inchie puom nasa lem lei amani ding, a ram phêk deuthawin Chiepuom thlarauin a man a, hun sawtnawte sungin vaibelsie (crore) tam an chokchawrawi hman a nih. Zo hnathlakhai hin sum thlemna ei do zo nawzie le ei kristienna hang pawnlangzie chieng taka tar langtu a nih. Hienga poisa sie pung hlut dinga inhlemnaa a pikhawi taka an intum le man tuok chu C.Lalmuanpuii, kum 34 mi, Hnahlan khawsuok a nih. Mi dang a che nasa zuolhai khom nuhmei deu vong an nih. Chie puom dinga khuonu siem an nina hi Zonuhaiin sum le pai le thil dang danga khom chin tawk nei loa hmang pung an insukhmu pei chun ngaituo ei um hle ding a hoi. Pasalhai hriet loa a nuoi tela sum ngawi daw ngam mihai hin trul sien chu thil dang daw sa khom an poiti naw nuom khop el a, ei hmasawn dan hi suong a um naw hle a nih. Grik mi var Socrates-in, “Once made equal to man, woman becomes his superior” (Nuhmei hi pasal le intluka ei sie vai chun a chungah an thrang nghal el a nih) a lo ti kha Zopahai hin ngaituo non a ngai khop el. Ei thuvar khomin, “Nuhmei vauh lo le hnawm vai lo chu an pawng tuol tuol” ti a ni khah. Nuhmei hi hmusit ding an ni naw a, sienkhom veng thrat an ngai; Evi thla, rûl tamna khawvela chêng an ni tlat a.

Chiepuom hi Ponzi Scheme tia hriet lar a ni tak a. A hming sertu Charles Ponzi (1882-1949) hi Italian mi, America rama 1903-a $ 2.50 chauh le inpem lut a nih. Mi poisa a pûk a, ni 45 sungin a pung 50%, ni 90 sungin a pung 100% pe dingin a tiem a. A pùk hmasahai kha a pùk nuhnung poisa hmangin a pung a tiem ang khan a pêk phot a. A hlawkzie miin an hung hriet chun an in le lo chen zorin, peipung dingin an inpuktir sup sup a. Hmun hrang hrangah sum lakhawmtu ding agent a sie a, hlaw thra tak a pêk a. Kum 2008-a poisa hlutna anga hisapin, 1920 February khan $ 50,000 a pûk a, May thlain $ 5,000,000 (maktaduoi nga) a nei hman a, July thla lem chun ni tin nuoi 2.5 a siem hman a nih. August-a an man chun dollar maktaduoi tam tak a chokchawrawi hman tah a nih.

Ponzi scheme hma daia hieng ang deuh USA-a lo trantu chu Sarah Howe a na, 8% pung tiemin nuhmei ta ding chauhin Boston-ah Ladies Deposit Scheme a hong a. An man hnungin kum thum lung inah an intangtir a. A dang threnkhat chu kum 1899 a Franklin Syndicate dam, 1980 bawra Portugal-a Branca Scam dam, 1984-a South Africaa Kubus Scheme dam, 2007-a Pakistana mi pakhat S.H.Shah, an man dam kha an nih. Tu lai hnai zuola rapthlak tak chu Madoff scam an ti hi a ni a, chu taka a sukchingpen chu dollar tlukledingawn (tda) sawmnga vel, India chengin tda 2500 chuong a nih. A kaikuongpa Bernard Madoff hi December 11, 2008-a an man hma chun NASDAQ Stock Market-a an chairman a na, a thilthaw hi Ponzi Scheme hnuoia inhlemnaa chu a la turu taka hriet a la nih.

Chiepuomin Mizoram a rùn zoa pawlitiks lirnghing chu November-a inthlang a nih. Hi lirnghing zet hin chu trum hni a zawna rorelna fung cheltu MNF inkulna Hnam Run a sawi chim nasa hle. Seat 40-ah Congress-in 32, MNF-in 3, a dangin 5 an chang a, Chief Minister ni lai, hmùr mistiri Zoramthanga khom hmun hni zetah bei sien khom ke van sonin a bilingin a tla ve ve a. Banga kut ziek hmu thei dêr ta lo khopa lalna le sumin a rawihai leh an mit a lo sukdel tah a ni leiin, hang lunginsiet ngam chi khom an ni nawh. Mautam tram leia party pieng MNF kha mautam tram lei bokin an inlet thal dèr a nih. Mizoram Peoples’ Conference thruoitu le Chief Minister hlui Brig. Thenphunga Sailo ruok chu a la’n huot kai hram a, rorel tlak loa a ngai, Congress thruoitu Lalthanhawla le a rawihai Mizoram mipuiin hnè taka an hang vawt tling tlat el chu a ngaina hre loin a ngha vuol vuol a, a na dâr volume a hang her sang ngiel khomin a ngaina a la hriet thei chuong nawh. Tling lo thei lo dinga inngai, pawlitiks A AW B hre chieng si lo ofisar pension iemani zat ngir vehai khomin an hnàr an hmu vù vû.

Manipur tienga thil tlung, Zoram khawvel chauh khom ni lo, Manipur le a sèvela chêng hnam tin nghortu chu Saikota Upa Chawilien kansar damdawi le a rongbawlna a nih. November 19, 2008 tuk Joseph Lalrothang, ZEO, Churachandpur thruoiin a inah kan va kan a. Damnawna leia RIMS, Imphal-a inthoka hung suok hlim, inleng nei loa chawl hadam ding le trong rawn lo dinga daktorin an ti ni sien khom ka hung thu a hrietin a hung suok a, darkar khat neka sawt zet kan inpawl a, a rongbawl dan chanchin bakah a kakhawk thilhai kan hril a, Pathienin a hmang takzet a nih ti inhmai ruol a ni nawh. A kansar a dam taa chu TB a lo kai hman thu le a’n enkol mek thu a mi hril bok a. Kansar damdawi tui an sawr sa chu baltinah siein tuolpukah an inthrut a. A hung taphotin an thil bur chawiah an thun a. A man an lak naw a, thawlawm pe nuomhai ruok chun pek thei a nih. Ka va sir laia hung threnkhat chu vai, a thren lem chu Hyderabad tieng daia mi an ni a, a thren chu sipai hotu le a rawihai iemani zat an nih. An lùn vanglai June-July vela chun hmun tina inthoka hung pantuhai chu tlar thuma intlarin kilometer neka sei an tirameikai a, chawhnung dar 4-ah Gate an khar a, sienkhom a zinga ding dar 5-ah an intlar tran nawk nghal hlak a nih. Ama Chawilien a hrisel ta naw bakah Hindu Meitei le Muslim Pangal hotuhaiin kristiena inchangna hmangruoa an ngai leiin an mihai fe an dodal a, hung pantu an tlawm tiel tiel a, sienkhom ni tin dannaranin 250-300 vel chu an la um tho niin an mi hril. Hi damdawi hi mak taka dampui an tam el bakah ringnawtu ringtua inchang pha an um nuol bok niin an hril.


Keivom khawvel
Kum bulin Baibul (Delhi Version) kan sut bang kawpi 2500 kan sut zoin Manipur, Meghalaya, Assam le Mizoramah kan thon a, March thlain a tlung kim deu vong a. A hnung suizui malam ding le Pathien thutak hrietna tienga mihai ngirhmun an bu zawl ngeia inthoka hmu chieng nuomin, Assam le Meghalaya tieng May thlain kan nu leh kan inzin a, Guwahati le Shillong kan sir a. Kan sir tum tak North Cachar Hills le Cachar chu ram buoina leiin sir thei loin kan hung kir a. Haflong tieng fe tuma hun remchang Shillong-a kan nghak laiin NEIGRIHMS-ah ka’n en leh ka lunga inthoka thisen fena dawt (artery) hmun thumah 75% a ping thu an hmu suok a. Chu chu sukfai dingin Delhi-a inthokin August 25-ah Shillong tieng kan nu leh kan vuong tung nawk a, a zingah NEIGRIHMS-ah an inthiel fai nghal a, September 1-ah Delhi tieng ka kir nawk a. Ka damdawi pan thu hi artikul A DATE WITH NEIGRIHMS ti ka ziek a, North-East SUN magazine le website hrang hrangah an insuo a, tiem le tlip a hlaw kher el.

October 15-in prawzek poimaw deu el buoipui dingin Manipur tieng ka vuong tung a, November 20-ah Delhi tieng ka hung kir nawk a. Chu sung chun Manipur phairuoma RPC (NEI) ngirna khuo po po deuthaw ka sir bakah Hmar Biel tieng khom Senvon chen ka sir a. Mautam trampuiin a del de laia airuoching hnuoia inzin ka ni leiin thingtlang khuoa chenghai ngirhmun harsatzie hmu chieng zuolin ka’n hriet a. Harsatna thuo tam intieng khawmin a del de an ni leiin, a ieng thuo tak am phok hmasa ding ti khom hriet a harsa kher el. Taksa tienga tramna, mautam trampui chu kum khat kum hni hnungah inkieng el a tih. Sienkhom, mautam lei ni loa kong hrang hranga an tràmna chu inkieng el naw nih. Sukkieng ding chun sir tina inthoka thrang lak a ngai.

Mautam chi hrang hrang laia trium tak chu hrietna mautam a nih. Chu chu tlângkhuo (secular) tieng le sakhuo tieng a ni ve ve. Dikri intlar thret thrut neihai le dikri nei dêr naw hai tràm dan le chèr dan a inthuhmun rongin ka hriet. Ei sikul tam lem chu a chim se tah. Zirtirtu tam tak chu ei pi le puhai Shana an um laia trampui mitsim tlak an hril ang kha ei nih. Vokpui khom an chêr taluo leiin pal innghai naw chun an ngir zo naw a, an pal innghai a tluk ruolin an tlu hlum top el niin an hril. Mission sikul tlawmte, Sapram chawmna ringsana hring trawk trawk an la um leia la khawsa trawk trawk ei nih. Chuonghai khom chu an innghaina pal tluk ruola tlu ding vong niin an inlang.

Pathien thu invoi vieu anga inlang si, kohran tin bu zawla Pathien thu hrietna tienga mautam tràmpui a tlak nasatzie hi ei hmu inril po leh ei pangzat a zuol el a nih. Mi lung sukno zawnga Pathien thu hril thiem tum hi ei intlansiekna a ni ngar ngar. Pathien thutak ieng am hrilin kohran ka chawm ding ti nekin iengtin am mi lung sukno thei dan ding ti le mani pawla thruoi lut dinga thuhne dan ding zong hi ei thupui tak a nih. Kong danga hril chun, Pathien thudika inthruoi dan inzirtir neka mani pawl seng hrat theina ding phier le lampui sat hi ei tha seng rawnna tak a nih. Pathien hmingin iengkim ei thaw a, sienkhom ei thilthawhaia hin Pathien thrangna a tlawm. Pathien thu ril hriet châka dap le chu chu ralthuoma hmang hmu ding ei vang èm êm. Pathien thu ei hriet nuom zawng khom ei thil thaw nuomhai a langa inkhum mawina hmangruoa hmang thei ding zawng ni deu takin a’n lang. Ei pik dan hi thawpik um deuh a nih. Sienkhom var fea inngaina lungril ei nei tlat tho. Chu chu eini laia Setan tektik hmang thiem dan chu a nih.

Vangduoithlak takin, Churachandpura ka um lai November 3, 2008 tuk khan hla thar mawi tak taka Zo hnathlak hnam tin chawmtu, kohran indaidanna bang nor chima rong nasa taka bawltu Buonglienkung ((10.09.1970 – 03.11.2008) thi thuin a mi hung deng a, a hre taphot chu barakhai le inpâm naw an um naw a, Zoram khawvel tlang tinah an sùn takzet a nih. A in Muolvaipheia vuina hun serah ka thrang ve a, Zoram khawvel aiawin sunpuina thu ka hril nghe nghe a. Hieng ang khopa hnam tin le kohran tin inpâm le sùn hlaw thi hi Zoram khawvelah ka la tong ve ngai nawh. A mi thienghlim thi chu Lalpan a chawimawi takzet a nih.

Kei hin kum 2008 sung ieng am ka thaw ve aw? Pathien thruoina le malsawmna ka dong nasa êm êm. Ama ropuina ding chauin chuong laia mi tlawmte chauh chu hang hril ka tih. Ni 70 India hmar saka kan zin sungin ka sin ding tluong taka ka thaw bakah Baibul nuoi khat man, a zatve vel chu Delhi tle Mumbaia mi thrahnemngaihai pek, ka sem a, a sut man nuoi ruk vel ka tlâk hman bok. Hmar Christian Fellowship, Delhi-a Sunday School thruoitu lai ka thrang ve a, ka pienga inthoka kum khat sunga Sunday School ka thruoi rawn tak kum a la nih. Delhi Thurawn-a insuo dingin artikul 40 chuong, a rênga bel khawmin thu mal nuoi khat neka tam ka ziek a, lekhabuin sut inla, phek 400 khûm a tih. Hmun dang danga magazine-a insuo ding thusep iemani zat ka ziek bakah mi lekha ziek tam tak ka edit-pui bok. Ni tin dannarain darkar 10-12 inkar ka computer leh sin kan thawin ka hriet. Chuleiin, Lalpaah ka lawm takzet a nih.


(December 30, 2008 Delhi)