Misawnari Kalhmang (Missionary Method)

They have sown the wind,
And they shall reap the whirlwind.
-Hosea (8:7)

Hmar Christian Fellowship, Delhi (HCFD) chun Hmar Biel Senvon khuoa Chanchin Thra intlun dinga Watkin Roberts (Saptlangval) a hung lut ni February 5, 1910 champha voi zakhatna chu a ni tak February 5, 2010 Zirtawpni hin Delhi tlanga khom umzie nei taka hmang dingin thu a rel a. Chu chu bawzuitu dingin Hmar Gospel Centenary Celebration Committee, Delhi (HGCCCD) a’n din nghal a. Committee inkhawm hmasa tak chun a nipui ni tak a tlung hmaa lungril le ngaituona lo buotsai lawkna dingin urlawkna prokram thruong hni bek lo nei lawk dingin thu a rèl bok a.

Chu urlawkna prokram hmasa tak chu Inrinni May 9, 2009-ah Seminar fumfe tak nei a, ei rama kristien sakhuo a hung lut hma le a hung lut hnunga ei khawvel inlumlet dan le kum za khat la hung dinga ei hmathlir hai chîk taka bina nei dinga riruong mek a ni a. A tuk Pathienni May 10 chu Missionary Day-a hmang zui nghal dinga ti a ni bok a. Chu thu le inzom chun hi artikul hi ziek dingin ka lungrilin a mi mor leiin, Tirko Paula rongbawl danhmang le a hnung zuituhai misawnari ni danhmang inang le inang nawna buk tonin kei, misawnaria voi khat khom la pen suok ngai lo hin, ka hung ziek tlat a nih.

Missionary method
Kristien khawvela misawnari ropui tak le sulhnung sui ding le en ton ding maksan rawn tak chu Tirko Paula kha a ni ring a um. A rongbawl danhmang chik taka suitu le ziektuhai laia pakhat chu Roland Allen a nih. Ama hi Englland-a kum 1868-a pieng, Oxford-ah lekha a’n chuk zo le thiempu trening zoa kum 1895-a China rama rongbawla fe, Beijing-ah zirtirtu sin thaw malama an trong Mandarin inchuk thiem, kum 1900-a helna Boxer Rebellion leia misawnari le a ram mi kristien tam tak an rawt laia dam khawsuok, chuong laia a tonhriet, a diary-a a ziek chu The Siege of Peking Legations ti hming chawia 1901-a insuotu kha a nih. Kum riet zet China ramah a um hnungin England-ah a hung kir a, sienkhom a sinthawpuihai lai kristien lungril put tak tak mi a hmu tlawm leiin a maksan a, nasa takin lekha ziek tieng hun a hmang a. Indopui Pakhat lai khan Naval chaplain-ah a thrang a, long siet an tuok a, mi tam tak an thi a, sienkhom mak takin vakamah an hlieu kai a. Kum 1930 vela inthokin Kenya ramah sin a thaw a. Chu rama chun June 9, 1947 khan a thi a nih.
Kum 1976-80 laia India palai sin thawa kan khawsakna Kenya khawpui Nairobi-ah i fe chun Nairobi City Park-ah kraws lim lungphun mawl taka,

ROLAND ALLEN
CLERK IN HOLY ORDERS
1868-1947
I AM THE RESURRECTION AND THE LIFE SAITH THE LORD

ti inziek hmung i ta, ieng barah ngai kher naw ti nih. Sienkhom, a chanchin i sui zui ruok chun hi hmuna hin i hung nawk pha leh inza takin lungphun hmaa hin kûn ngei i tih. Hi lungphun hi Roland Allen hnuoi taksa inlawina hmun inchikna chauh a nih. Hi lungphun ngir hma daih, kum 1912 khan a lekhabu ziek tam tak laia hril hlaw tak Missionary Methods: St. Paul’s or Ours? ti chu a hung suok a. Hi lekhabu hi khawvel hrietpui chauh khom ni loa Pathien hrietpui ni ngei dinga ka ngai, a lungdaw tak lem chu a nih. Chu chu besana hmangin titi ei sep ding a nih.

Tirko Paula vs Misawnari Danghai
Hi lekhabua hin Roland Allen chun Tirko Paula rongbawl dan kalhmang le mingo misawnarihaiin ramthima rong an bawl dan hai chu a khaikhi a, a buk ton a. A tawpa a tlangkawmnaa chun, “Ieng po khom hril inla, thil chieng tak pakhat a um a, chu chu ei hlawsamna hmun taphota Paula rongbawl dan kalhmang a hlawtling bik vong el hi a nih” tiin a khar a. A mingo misawnari chanpuihai hnar ur zawng tak hieng ang thu huoisen a hril ngam el lei hin a hmu maw pawl an tam hrim a nih. Sienkhom a zâm nawh.

Roland Allen chun Paula rongbawl dan kalhmang zui a, ringnawtuhai lai ‘Mission’ phun hrata inruolsiek loa mania inenkol thei pei ding ‘kohran’ (Local Church) indin chu rongbawl dan ding tak lem niin a ngai a. Paula khan Roman lalrama rambung (province) pali- Galatia, Makedonia, Akaia le Asia-ah kum sawm vel sungin kohran nghet tak tak, mani inenkol thei el khom ni loa hlawk taka luong suok thei a phun a. AD 47 hma khan hieng lai hmuna hin kohran pakhat khom a la ngir naw a, AD 57 ruok khan chu hieng lai biela a rongbawlna chu zo taah Tirko Paula chun an ngai a, thlang tieng Rom khawpui le hmun hrang hrang sira inzin dingin an buotsai thu khom Lukan a ziek a. Chu thu chu, abik takin, Efesi khuoa upahai kuoma Paulan inthlana thu a hrila khan a chieng zuol (TT 20:17-38).

Paula khan kohran a phunna khuoa mihai kha dannaranin thla nga thla ruk vel chauh a um ngha a, Pathien thu le kohran enkol dan ding ser le sang iengkim a’n chuktir ngat ngat a, mania inenkol thei, kohran puitling le nghetin a siem hman pei a nih. Chu chu tuta ei Baibul hmang ang Baibul hi a la um hma daih a nih. Chu chu ieng leia a thaw thei am ning a ta? Ieng leia rongbawltuhaiin kum tam tak an um chilh hnung khoma hmun tam takah kohran puitling an siem hlei thei naw am ning a ta?

Sawr chin peiin, eini lai ngirhmun leh hang enkhi inla. Kum za kristien ei tlingna kum chu tu hin ei hraw tran mek a, Mizorama lem chu 1984 khan an hmang der tah a nih. Pathien thu le hla le sum le paia intodel le invong dan fel tak neia khawsa khaw tinah kohran ieng zat am ei um ta a? Paula kohran indin le eini kohran indin hai hin inangna le inzawlna ieng am an nei a? Inangna an nei chun chuonghai chu ieng am an na? An indanglam chun an indanglam dan le a san iem a na? Ei fena taphotah Tirko Paula hming le a lekhathonhai hmathea hmangin mihai Pathien thu ei inchuktir niin ei inhril a, sienkhom kohran nghet le puitling ei indin thei tlat naw hi a san iem am ning a ta?

Hmun tam takah misawnarihai rongbawlna a tluong nawna san nia Roland Allen hril threnkhat chauh hang tar lang ei tih. Pakhatna, ramthima misawnari sinthaw dinga pen suok, mi mawl, Pathien thu le khawvel thil hrietna le ringna tienga la puitling lo le nghet lo, Paula lem inchangtu, a thaw letling char thaw si an tam lei. Hi hi chai tham tak chauh khom ni loin, ei ngai poimaw hle a trul khop el.
Pahnina, Paula thaw danhmang an ril rem zawng chauh an lak a, chu chu thaw dan dang daih leh an chokpol a, a hlawsam pha leh Paula thaw dan kalhmang indik naw lei nia an intum hlak lei. Entirnan, chieng taka Pathien thu inchuktir la ni si lo dam baptisma an inchangtir a, sawtnawteah an tlu nawk a. Paula ruok chun fie taka Pathien thu a’n chuktirhai le chieng taka a thu inchuktir pomtuhai chauh baptisma a’n changtir hlak a nih.

Pathumna, a thren ruok chun, mi tam tak an hawr khawm a, lung inno tak le inri bung bunga Pathien thu an hril zoin enkol zui ta si loin anni le anni inenkol dingin an maksan a, a hnung sawtnawteah an inchek dar a, an bo nawk rip a. Tu laia beiruol (crusade) ei huoihot tam tak khom hin chuong ang zie le rong chu an kai niin an lang. Paula ruok chun mipui a hawr khawm ngai naw a, inhnikna neihai chu damtea hril hrietin an lungrilah Chanchin thra a tu a, anniah a tro pha leh kohran a’n din a, chu kohran chu Pathien thu hrietna tieng dam, rongbawl dan ding dam, ser le sang thaw dan dam le sum le pau le iengkima fel taka invong dan dam a zirtir diem hma chun a maksan ngai nawh.

Palina, khawthlang misawnari tam tak chun a ram mi ringthar mawl tak tak hai kha anni enkolna dinga sum an siehai an inchalaitir a, an hrietna le thiemnan a la tlin si naw leiin thaw suol an nei tei bok a. Sum an inkoltirhaiin an hmang indik naw pha leh an rongbawlnaa santu tak dinga an dandehai kha an ban a, hmelmaah an inchangtir a. Paula ruok chun a kohran phunhai enkolna ding sum a nei naw a, kohran tin chu mania inenkol dan ding a zirtir lem a, kohran sum a kol ngai bok nawh.

Pangana, dannaranin, khawthlang misawnarihai chun thoktu an ruoihai chu anni Mission hnuoia um le thaw dan ding an ti ang ang chu ieng anga inkhor khom ni hai sien thaw ngei ngei dingin an beisei a. Chawibiek inkhawmah anni thlûka phuok hla, a ram mihai tronga an inlethai chu a thlûk indik taka sak dingin an ngiet a, chuonga thaw thei le lem inchang thiemhai chu changkangah an ngaipek a. Paula ruok chun Mission thoktu ding a lak ngai naw a, kohrana pastor le thruoitu dinghai khom kohranin an kohran ta ding le hmang dinga a ruot le thlang hai chu a namdetpui chauh lem hlak a nih. Kohran enkoltu dinga tlak mi an zong le thlang theina dinga Timothe le Tita kuoma Paulan thurawn a pekhai dam kha entirna thra tak a nih.

Parukna, Roland Allen-in Paula rongbawl danhmang leh khawthlanghai rongbawl danhmang inang nawna lien tak pakhat nia a hriet chu an mizie puthmang a nih. Khawthlang mihai chu an niphung le inzirtir danah um trok trok thei lo, inringzona hau em em, mani thil nei suonga Khawsak mihai le mi dumhai hrim hrim chungdel ching mi, mani theina, mani hratna le mani thaw rakna leia thil nor kaw duok duok dinga inngai mi, dawtheina nei tlawm, kohran dan le felna dana ngai chipchier tak hnuoia um thrang, anni inthruoina dan siem chop khir tak hnuoia naw chu kohran inenkol thei lo dinga ngai le an thaw dan ang ang chu ringtharhai khoma kawpi le la lut nghal el dinga beisei, Chanchin Thra chauh tu loa an kalchar khom tu sa ngei ngei tum tlat mi niin a hmu a. Hi thu a ziek lai hin British lalram chu khawvel chung vanzawla a leng lai, iengkim an thaw taphot chu hnamchomhai sukvarna ding an thaw vong nia an ngai tlat hun kha a nih.

Chuong ang lungril put misawnarihai thlarau chang le Tirko Paula thlarau kol chu kong hrang hrangah inpersan tak a nih. Paula chun mi chungdel loa tlawm taka Chanchin Thra hratna hmanga Thlarau Thienghlim inthuoma a thu ngaithlatuhai lungril inhmin a tum a nih. Thlaraua inthoka a thil hmuhai a hril chu Thlarau thrangpuina boka a lo dongtuhaiin an lo dong fuk a beisei tlat bok a nih. Chun, Juda Dan chipchier tak le khikhawk tak hnuoia lo intàng hlak a ni leiin chuong ang dan laka inthoka sansuokna Chanchin Thra thucha chu mawl tak le fie taka hril ngat ngat chu a pawlisi a nih. Chuleiin, kum sawm sungin rambung (province) pali-ah kohran nghet, ringna le thilthawa inthrang lien pei, puo tieng le sung tienga inthoka hung harsatna, triumna le dalna iengkim khom hmasuon le do hnê thei ding iemani zat a phun hman tlat a nih.

Chik taka ei bi chun, tu lai misawnarihai rongbawl dan le Paula rongbawl dan inang nawna chu pawl indin a tum ngai naw a, Krista ringtuhai kha Krista kohran pumkhata inngir a, mani inenkol thei dinga tuolsung kohran (local church) a indin suok pei a tum lem a nih. Hi hi tu laia ei thaw dan letling char niin a’n lang. Ramthim ei bawna taphota ei thaw hmasa tak chu mani pawl seng indin hmasak tum a nih. Chu chu ei thawnaah mithi ruong ei intel khawm treuh a, ei pawl nambar a pung a, Kristaa hringna nei kristien ruok chu hmu ding ei vang hlak a nih.

Hlawtlingna thuruk
Roland Allen hmu dan chun, Paula hlawtlingna thuruk laia pakhat chu Thlarau Thienghlim thruoia rong a bawl lei le ringthar an manhai chu tuoltro kohranah indin a, puo tienga inthoka sum le pai le mihriem thuneitu kut rolna hnuoiah um loa mania intodel kohrana an din suok pei kha a nih. Kum 1902-a a lekha zieka chun, “Ram dang misawnariin ringtharhai an um chil zing hin thil thra lo a hring lem niin ka ngai. An um leiin a ram mihaiin an theina hmanga thok nekin kut an intìm a, anni thaw ding an inthawtir vong a, kut suiin an thrung inmum a, mawphurna po po lakah an inhlip hlauh a..” tiin a hril. A dit dan tak lem chun khawtuol kohran (local church) tin chu sum le pai le thil dang dangah mania inenkol kohran le thoktu khom Paula anga mania inchawm ngat an ni ding a nih. Chuong ang thoktu chu puo tienga inthoka mi dangin an thlang le hung tir ni loin, a tuolsung kohran ngeiin rongbawltu dinga an mi dit le thlang suok an ni ding a nih.

Roland Allen ngaidan hi a thuphung chun thra hlein inlang sien khom khawvel boruok inlumlet peiin thil thar a hung her suokhai le inhme ta lo thil tam tak a um ti chu chu a kaltu pawlhai thrangna a ni tlangpui a. Ama ruok chun hun thar peiah indik deu deu lem dingin a ngai thung a. Kum 1912-a a lekhabu a hung suok khan khang hun laia mihai nek hmanin kum 1960 hnung tieng mihain a thu hrilhai chu an la hung ngaiven tak tak chauh a ring thu a ziek a, a hung indik tung pei hrim a nih. A ziek lai huna inthoka tiem chun kum za hmel hmu tah lekhabu a nia chu zani ela ziek ang charin a thu vuok thlakhai le a trongkam hmanghai khom a la thar a nih. Kohrana rongbawltu, abikin misawnaria inpe a, ramthim nor dinga pen suokhai lem chun hi lekhabu hi tiem makmaw niin ka hriet. A tiem nuomhai chun internet-a inthok khoma download thei a nih. Sienkhom rùndal le samphuola tiem chi a ni nawh. Ngaituona hmanga sui chet chet a ngai.

Missionary Day
Eini lai kum 1960-a inthok khan May 7 hi kum tin Missionary Day-a hmang pawl ei um a. Hi ni ei hmang san chu Watkin Robert-in 1910 February-a Chanchin Thra hril dinga Senvon a hung sir hnunga a rongbawlna bawzui dinga tirko-zirtirtu mi pathum- Savoma, Vanzika, Thingchhingpuia (Taitea an ti bok)- a hung tirhaiin Senvon khuo an hung lutna ni a nih. Thil suitu threnkhat chun May 7-in Aizawla inthokin an inthok suok a, May 10-ah Senvon an lut chauh niin an hril bok. A ieng lem khom chu ni sien, Watkin Roberts rongbawlna bawzui dinga hung an nih ti chu a chieng.

Khang hun laia sulsutuhai khan ieng missionary method am hmangin chanchin thra an lo thè dar ning a ti aw? Watkin Roberts le a pu Dr. Fraser chun damdawi an sem ruolin Pathien thu an lo hril a, damdawi burah an fak dan ding bakah Pathien thu an ziek sa a. Chun, khaw hrang hranga lalhai kuomah Johan bu mal an thon dar bok a. Senvon lal kuoma khom Watkin Roberts-in Johan bu mal chu a thon a ni khah. Chu donna a hmua inthok chun mi iemani zat thruoiin ama ngei Senvon-ah a fe a, tuolzawlah thu a hril a, “Tun atrang chuan Pathian thu lo awih ve tawh rawh u” ti chu Lusei tronga a sermon nei sun a nih. Ninevi khawpuia tlanbahrika Jona tlanginsam nek khomin a la tawi lem. Sienkhom tu chen hin ra hlimum a la’n suo pei a nih. Mizorama kristiena inpe hmasa tak Khuma, July 25, 1899-a baptisma chang le August 23, 1917-a thi khom khan Kawl ram le India hmar sak le Chittagong Hills Tract-a Zo hnathlakhai umna khuo po po deuthaw nau inkhat rak khopa fangin, in tin sirin, Watkin Roberts hril char hi kum tam tak a tlang insampui ngat ngat a nih. Tu lai chu ni sienla, inzin sawl rak khom ngai loin, SinlengNews hmangin mi sang tam tak kuomah mit khap kar loin thu a hril el thei ding a ni ta bah!

Missionary Day ei hmang ei ti hin einiah hi ni hin ieng am thu a hril a? Hi ni hi ieng leia ni dang neka missionary day-a ei inser bik am a na? Ieng tika inthoka ei inser tran am a na? Hi ni hin kohranin ramthima rong a bawlna le rongbawltu a tirhaiin ra ieng ang am an insuoa ti thlirkirna le ieng anga thawin am ra thra lem ei insuo thei ding ti thlirna hun remchangah ei hmang hlak am? Ei hmang hlak si chun, ieng leia thla ruk sung chauin Paulan kohran puitling a’n din hman si a, eini rawi hi kum za kristien ei ni hnung khoma naute nene ne lai ang ela puitling thei loa ei la um bik zing am a na ti dam hi ei ngaituo hlak am? Ieng leia kum za tling tah hnung khoma kutdaw lungril ei la put zing am a na? Ieng leia Pathien thu hrietna tieng khom naute ngirhmunah ei la ngir zing? Ieng leia lemchang nunah a nawlpuia ei intàng thuk deuh deuh am ning a ta? Koh Hae Sung Saptrong takin, ‘Evelything long’ a ni naw khomin ‘Something long, something long’ chu a um a nih.

Enremna darthlalang fie tak hmaah ngirin, ei ngirhmun pal lai hi ei inbi chieng a hun tah khop el. Missionary Day ei ti veta khom hin ei hmang tira inthokin suolnain bu inril takin a khuor a, mi tam takin ei hmangna sanah khom khêl le dawha a’n phum ruk a, a hrisel nawh. Chu chun lungruol taka Gospel Centenary hmang tlang thei lo dingin a mi vuok dar a nih. Chu lungril chun Thlarau Thienghlim a hnawl a, Thlarau Thienghlim thrang loa rongbawl hlak chu Paula misawnari kalhmang leh an inmil bok si nawh. Ieng am law tang ei ta! Thli ei tu tlat chun thrawngaleivir ei sik naw ding am a ni?

Delhi tlanga ruok chu Chanchin Thra le inrem Missionary Day hmang lem ei tiu. Ei Missionary Day chu Iengkim Lalpa hrietpui Missionary Day tak tak ni ngei bok raw se.

(April 25, 2009 Delhi)