(Letter to the HT Editor)
August 21, 2018-a Bible Society of India Baibul sut le inzoma HT fethlenga Lalramhlun, Zote Veng, Rengkai zawna indon 6 le August 28, 2018-a Secretary, Hmar Bible Translation Committee donna kha point thum chauh hang tuihni ve met inla.
Pakhatna, Isai 33:21 a “Kheraval a ti hi Hmar ṭawng indik a nih” ti-a Secretary HBTC hril hi thudika pompui a harsa el thei. ‘Kheraval’ hi Hmar trong a ni naw a, Hmar trong zepui inthlungna mono-syllabic language leh inzomna a nei naw a, polysyllabic language group-a inthok, ka ring dan chun Syhleti Bengali, eini rawiin Tuidung Vai ei tihai, anni rawi khoma hnam thra loa an ngai le hmusit chei, Tuiruong dunga longa fak zong le sumdawnga inlon ‘Maji’ ei ti hlak hai trongkam ei lo haw sawng le mak taka Baibula ei lo hlu lut ni sien a hoi khop el. Dr. Thanglung inlet BSI sut (1968) a chun, “Chutaka chun LALPA, vadung lien tak tak le, vadung tehai um nghen nghuonna hmun chu, ropuitakin ei kuomah um lem a tih; chuong tui chunga chun indona lawng lientak kheraval nei mi hrim hrim fe naw nih a, lawng lien ropuitak khawma fe khel bawk naw ni” (p.1308) tiin a sie a. Chuong ang char chun Dr. Rochunga Pudaite ‘Hmar Bible’ (1980) sut hmasa taka khom a sie ve a (p.834), sienkhom 2002 Edition-a ruok chu ‘kheraval’ ti khah ‘zapna nei’ tiin a thlak tah.
Chun, a hrilfie peinaah, “...lawng karna hmawl’ ti ding ni awm a nih. Amiruokchu, ‘lawng karna hmawl’ ti chu lawng lien karna hmawl a ni a, ‘kheraval’ ti tak hi chu lawnglêng zâpna hmawl a ni bîk deu” ti hi UPSC ekzam donna ni sien chuh zaa za pei ngei an tih. Long karna hmol (oars) ti tah zinga longlêng zâpnaa hril lut nawk chuh “hniek phawi loa khêl hril” ei ti ang hi a ni thei. Saptronga hi thumal an inletnaa an hmang tlangpui chu “galley/gallant” a ni a, chu chu long lien rak lo, long puonzar (sail) 1-3 nei, long karfung paruk vel, khing intona 3 ve ve nei, suok amanih tuolthat an manhai an inkartir hlak, hmelma rŭnna le mi roknaa an hmang hlak a nih. ‘Kheraval’ an ti hih longlêng zâpna hmol nekin ‘long karfung’ ni lemin a’n lang. A ieng khom chu ni sien, Hmar trong chu a ni naw hrim hrim.
Hi chang ei bi lai hi chik deua ei sui chun thil um tak tak ni loin, Pathienin Israelhai a tungding nawk huna an ngirhmun chel ding muongumzie Isaiin a manghmu dan hril suokna dinga tekhina trongkama a hmang a nih. An kawl le kienga um khawpui hmingthanghai chu vadung poimaw kaia um an ni laiin (Babulon chu Eufretis kaiah; Ninevi chu Tigris kaiah; Thebes chi Nile vadung suoah; Rome chu Tiber kamah), anni khawpui Jerusalem chu Pherzawl ang boka tui kang nghak ngaina, tlangrama um a nih. Chu chu hre zingin, Isai chun an hnam vadungpui chu an Pathien a ni dingzie le hmelma tu khomin an hung rŭn phak naw dingzie thu a lo ziek a nih. A taka tu chena thil tlung leh an inmil am ti ruok chu tak ram le thlarau rama bel pawl hrilfie dan inpersan hle mei a tih. Eini phak ve tawk chu ‘kheraval’ ti vêl Hmar trong indik nia ngai pawl le ngai naw pawl inkungfu dam hi a la ni trĕk trêk!
Isai lekha ziek zaa sawmriet vel hi hlaruonga a ziek a nia chuh thuruongin an mi lo inletpek a, bêlpuia sizo le voksa hmepok, changal invuok tawka inhruoi dupa suong zo tah hnunga tui dei inli duma buok angin an soisak niin ka hriet a. Delhi Version-a ruok hin chuh Hebrai tronga an lo ziek dan angin, hla chu hla angin, kan inlet vong a. Chuonga inlet chun ei thu buon laia ‘kheraval’ hin hmun a chang ta nawh. Hieng ang hin:
Chu taka chun LALPA chu,
A Ropuitak ni’ng a ta,
Ama chu hnâr tam tak nei,
Vadungpui ang ni’ng a ta,
Long kar chi le long lienin,
Chu chun lût ngai naw ni hai.
Pahnina, “Leviticus bung 14 a ‘limlai’ vawi nga lai um hi hmar ṭawng indik a nih. Hmar ṭawng ṭha le upa ei bân pei chun ei hmar ṭawng hi hung da nuom hlêng a tih” ti hi a nih. ‘Limlai’ hi Hmar trong a ni naw leiin Hmar trong indik a nina ding lem chun thrim naa sanghawngsei lut thleng olsam lem a tih.
Hi thil hi tien laia Israelhaiin thil intui, entirnan thautui amanih hriek keng tamzie inkhina dinga an lo hmang hlak, tu laia litar (litre/liter) ei ti ang hi a nih. Khawvelin ‘metric system’ ei hmang hnung hin thil inkhina khâp, piu, tong, hlam le a dang dang ei lo hmanghai kha olsam takin a hung chok ruol vong a. Kha hmaa Baibul inlet sukkhautaktu laia mi, thil inkhina le bŭkna (weights and measures) kha metric system hnuoia a tlukpui ni dinga an hung hisap suok hnung chun inlet sin nasa takin a sukzangkhai a. Hi metric system hi Delhi Version-ah chu kan hmang tah leiin, a theina taphotah, chuong ang vonga inchuon chu a ni tah leiin, ei trongkam buon lai “Limlai” ti khom hi “hriek litar hmun thuma threa hmun khat” ti a hung ni ta a, ngai buoi thei a ni ta nawh.
“Limlai” ti ringot el chuh ieng lai huna inthoka ei tronga hung inlimlai am a na ti ka hriet nawa chuh Baibul inlet hmasatuhai khan an lo inlimlaitir a, a law ngaina hre loa Dr. Thanglungin ei Baibula a lo hlu lut ve mop a nih ti ringhla a um nawh. Hi trongkam hi hmang loin Mizo (Lushai) – O.V.Reference, 2003 chun ‘log’ ti a hmang a, Kuki-O.V.Reference 2008 khomin ‘log’ ti a hmang ve a, footnote-ah ‘Log-Thao le twi te na’ tiin a sie mop a. Tiemtuhaiin a mik a mak an hriet ring a um nawh. Mizo (Lushai)- C.L.Re-edited, 2005 chun DV-a kan sie dan angin “oliv hriak litar hmun thuma ṭhena hmun khat” tiin hriet theiin a hung sie ve tah a nih.
Pathumna, “Ni kum, Hmar Holy Bible Revision thaw tawm khan spelling indiknaw, inlet kimnaw, le Hmar ṭawng indiknaw hmuhai chun Translation Secretary kuoma hung pe dingin inhriettirna siem a ni a, mi ṭhenkhat chun an hung pêk ngei a, lawm a um hle. Tu ruok hin chu siem ṭhat a vawikhat inkhel a ni tah. Pu Ramhlun khan Editor kuoma a thawn ni sien khawm, a thuziekhai kha hrilzau met nuomna ka nei” ti le “Tuta hnung chu Bible thu siemṭhat ṭulhai chu chanchinbua insuo lovin mawphurtuhai kuomah pek ni hlak sien, ti hi Translation Committee dit dan a nih” ti hi zawna danghai maksanin hang thluoi met trulin ka hriet.
Tlâng hrieta ei Baibul inlet fuk naw dan phorna chu kum 50 lai liem taa Hebrai 12:1 ei inlet danin duthu a sam nawzie thu EI BAIBUL HI ti ka ziek kha a nih. Chu chu HSA magazine Inchuklai Nun-ah an hung insuo a, Pathien thu soiselnaa ngai thiempu threnkhat nak a khîk a, an mi hung inbauh tlier tlier a. Edition thar a hung suok chun ka artikul khah a thlawn nawh ti ka hriet. Chu hnung chun Baibul chang threnkhat ei inlet dan le ei trongkam hmang threnkhatin Pathien thu a kalzie thu artikul iemani zat ka ziek bok a. Chanchinbua insuo kha muolpho thlaka an hriet leiin ka’n suo hmain a kawpi pein an ngaidan kan don hlak a. Insuo naw hrâm dingin an mi ngĕn hlak leiin kut ka kei nawk hlak a. Ei mi le sahai an la mawl si a, an Baibul hmang lai buorzie a ngiel a ngana ei phor lang chun, Setanin remchanga lain, mawl taka Pathien an ringna chen khom inphet phanain hmang rawi an tih ti inlauna ka nei lien leiin, thil dang ka buoipuisan a.
A zawna India ram puo tieng kum 21 kan thang hnunga kan hung kirin, ei Baibul pangngai bok ei la kep furzie le ei sermon thlak nuom dan khom Pathien thutak nêka lung innona tieng khik le pawl tranna tieng awn zawnga thle a la ni zing a nih ti ka hmuin lung a dong hle a. Kong dang zawnga ngaituo ruok chun, hi ngirhmun hin Baibul inleta thi le thau inpola thrang dingin a mi cho suok a nih ti ka hriet a, vangduoi-vangneiah ka’n ngai a. Ei hma elah Holy Bible ei nei tranna champha voi 50-na lawm dingin ei insingsa mup mup niin ka hriet a. A champha ei lawm ding takin kum sawmnga sunga hma a sawn dan thlirin, phek tin deuthawa siem phuisui ngai inthir fek fuk ngaisak nachang hre si loin, a ieng tak am a na ei lawm ding ti hih ngaituo tham a tling. HBTC inti ngam ei um si chun, ieng leia lut chil a, a’n hnokna po po inthiel fai ei tum naw am a na? Ieng leia chanchinbua chai le ngaidan inhril tlang dam hi lawm tah neka ei pheng tum lem am a na? Baibul thra nei ei inbeisei chun tlawmngaia chanchinbu fe thlenga zawna indon pei Lalramhlun hai ang dam hi a za ruol ei nei theina dingin Baibul neitu Pathien kuomah hni lem ei tiu. Delhi tlanga khom hin Delhi Hmar Bible Translation Committee (DHBTC) kan um a, Delhi Version-a hriet thiem harsa an tihai le inlet dan indik lem ni-a an hriet hung hriltuhai hi Baibul thra lem ei nei theina dinga hmakhuo ngaitu an nih ti kan hriet leiin kan lawm a, kan hmang trangkai bok.
(August 31, 2018, Delhi)
###
No comments :
Post a Comment