(Letter to the Hmasawnna Thar Editor)
Hmar trong indik le indik naw thuah huoisen tak taka mani ngaidan thudik anga hril pop pop ngam ei pung pei a hoi a, ei hmasawn dan hi a dangdai khop el. Kawmiti inzauma ngai hminga thu ziek insuo lem chu mimal aiaw a ni tak naw leiin, pipu thuvara “mi pakhat êk che lawm êk che” an ti char hi a ni thei a, mimal mong hlim el a ni naw leiin poi a tawk dan a danglam. Pawl inzauma inngaihai chun ching tam chi a ni naw el thei. Voi khat muolpho a huntawk.
Thumal trobul le trongkam hung inser tung dan le a kawk umzie inchukna hi Saptrong chun ‘Semantics’ an ti a, chu hnuoia chun branch tam tak a la um nawk a. A hlawmpuia hril chun trong mal tin umzie nei le lam rik dan le hmang dan zira kawk hrang hrang nei trong hi mono-syllabic & phonetic language an ti a, China trong Mandarin, Tibetan le Asia rama cheng Mongoloid group dang po po, eini rawi thrang sain, chu chu ei trong rurel le a fe dan a nih. Chu chu ni lo, ri zom khawma thumal hung suok, a mal mala umzie nei si lo trong hi ‘polysyllabic language’ an ti a, chuonghai chu Vai trong le Europeon trong le trong dang danghai hi an nih. Entirnan, agriculture, education, philosophy ei tihai hi thu lamrik pali inbel khawma thumal pakhat suok an ni a, sienkhom lamrik tinin a hranin umzie an nei nawh. Eini trongin sakeibaknei, thilthawtheina ei ti chun thumal pakhata noun-a ei siem ni sien khom, thumal lamrik tinin umzie an nei vong. Hi lei hin, eini trong rurel fe dan chun mal tin hi ziek kop lo ding a ni laiin, mal iemani zat keikopa umzie hran inneitir ei tum pha ei ziek kop hlak a nih. Trong tin hi mono-syllabic a inthokin polysyllabic zierang a put deu deu pei.
Hnam dang trong, polysyllabic tronga mi ni tinin ei mamaw ang dungzuiin ei trongah a luong lut a, a lut rawnna tak khom bazar hmun le ofis a nih. Amiruokchu, hieng polysyllabic tronga mi thumal ei lak luthai hin chi an thla thei nawh. Ei laklutna charah ei hmang thei a, chutaka inthok chun thumal dang siem tum ina khom a ching a ni leiin tê a nei thei nawh. Saptrong le Vaitronga inthoka ei lak, Deputy Commissioner ei kona Borsap (Bohrasaheb), Governor ei kona Lârsap (Lordship), Commanding Officer ei kona (Manding Sap), Vaihaiin ‘godown’ an kona ‘kudam’, ei trong awphawia ei ziek tempul, sakramen, baptisma, sikul, pencil, pen, pendrive le a dang dang hi hmang trangkai tumin thrang la inla khom, ei trong anga ei laklutna hmuna chauh naw chu hmang thei an ni nawh. Ei lak lut treuh chun ei trong a chǐm hlum a, trong danglam daih a pieng el a nih. Chu lampui chu ei hraw tung mek a nih.
Hieng hi trong bul suina hmangruoa khawvelin a hmang a ni leiin, chu enremna bang le tinzawna ‘kheraval le limlai’ hi inkhi chun Hmar trong indika hang hlu lutna san ding hlek khom a um nawh. Hmar tronga ei lak lut nuom tral a ni ruok chun iem hril ei ta? Amiruokchu, khêl hril sa a trûl kher nawh. Kum sang thum lai hiel liem taa Israel rama thil intui hriek le thil dang dang inkhinaa an hmang (liquid measurement) ni si, voisun chena thil inkhina ieng khom mumala la nei lo Hmarhaiin ‘limlai’ dam a tira inthoka lo nei tah anga hril dam hi a Tuolte Vanglai thil deu a nih. Raja Sanga le ei thiempu threnkhatin thil bul intranna le Sinai thlalera Israelhai tonhriet le Hmarhai tienami an thlung kop thu an hril vet leh khom ei inhnai sawt nuom khopin ka hriet.
(September 6, 2018; Delhi)
###
No comments :
Post a Comment