is to live the life of your dreams.
- Oprah Winfrey
Remchang nawna khol tak a um naw chun, kum thar chawlkar hmasa takah kum liem tah sunga ram le hnam le keima nuna thil tlung poimaw ni-a ka ngaihai chu inchuom phuorin ka ziek a, Delhi Thurawn (DT) ah insuo a ni hlak a. Hi hi thil peium lo deu el, ni tin Diary ziek pei lo keinihai ang ding lem chun ni 365 liem taha sulhnung phet nawk ngat ngat a ngai leiin thil hautak a nih. Ei hung upa deu deu ruolin hriet zing theina khawl a hung chau deu deu a; ni tin nuna hmang zing thilhai naw lem chuh thluoka computer-in thil hlui siena pindanah a hnaw lut zung zung leiin, zing le zana thil tlung khom a tûk ela ei hriet mumal ta lo a um nghal hlak. Internet trăngah inbei a, iengkim deuthawa mamaw phuhrûktua ei hmang hnung lem chun thil inchik peina tieng ei inthlada tiel tiel a, computer a thok naw chun ei kahâk nghal el a nih. (Hi thu ka ziek mek lai khom hin ka internet connection a buoi a, ni hni sung chu ai mit thlong an hril ang elin ka bo map!)
Hang hril sei met inla. Eini rawi hi thil inchika rikawta kol thra ei văng leiin ei ban phâk ela thil tlung chanchin hang ziek ding khomin besan tlak rikawt hmu ding a vâng a, ei bo map el a nih. Entirnan, DT-a insuo ding Martar Ni (Martyrs’ Day) chanchin ziek dinga May, 2010-a an mi ngen trumin chanchin ka hmu theina dinga ka ngai taphot telefawna zongin ka dap a, ka hlawsam dĕr a. Law ngaina a um naw leiin ka file hlui, HPC Movement intrana inthoka Indian major English newspapers, magazines, journals le Churachandpur le Mizorama chanchinbu suoka inthoka ka lak khawmhai, Baibul tluka sa chu ka dap suok a. Chuonghai le chanchin hre dinga ka ngai mi iemani zat, telefawna thu ka’n donhai chu besana hmangin, ka puitling hrăm a nih.
Sinlung Hills Council a pieng
Hang hril sap pei inla. April 12-13, 2018-a HPC(D) in silai intung a, Mizoram Sorkar leh lungruol taka Sinlung Hills Council (SHC) Bill an pom tlang hnung khan MARTAR NI voi 28-na chu ropui taka hmang dingin Hmar Trophy Organising Board (Hmartob) chun Saikotah a huoihot a, khuollien dingin Mizoram Home Minister R. Lalzirliana an fiel a. Kha hun ser kha uop ve dinga hnam thruoituhaiin an mi fiel leiin ka hang thrang ve a. Chu thu ka ziek MARTAR NI CHAMPHA 28-NA (June 2, 2018) chu DT le website hrang hrangah a hung suok a, Churachandpur lai ruok chu an pawlitisianhai mong ka hlǐm insangpek deua an ngai lei amani ding, an insuo ti ka hriet nawh. A ieng khom chu ni sien, kum iemani zat hnunga hieng lai chanchin hung suituhai ta ding chun hi artikul hi hnapkhawn pachang hmu an ti nek hmanin an la lawm ka ring.
A ieng ieng khom chu ni sien, Mizoram sunga HPC thil hni leia kum tam remna le muongna tluontling um thei loa an um hnunga chawl lawkna kotsuoa an tlung hi kum 2018-a thil inchik tlak mellung poimaw chu a nih. Interim Council indin phot a, enkoltu lailawk insiem a, an thaw fel bak po sunzom dinga a ram mihai ngei kuta mawphurna inhlana um hi lawm a um a, hnam puitling hoiher khom a nih. Kurini khaw mi Simon ngirhmuna iemani chen thrang ve hi achângin hringnuna thil tlung hlak a ni a, a tawpa ruok chuh mani kraws seng ei bitum a ngai hlak. Mania inmuolvom theia an um hi lawmpui inla, ieng angin mani insungah an insekhĕk chang a um khomin ei zie pangngai an put zing lei a nih ti hrein, trul tongkhong thil a ni ngot naw chun kut rol tieng insûm tum bok inla. Silai piellung hmanga zalenna ram ban tum hi ei hun tong leh an inmil ta nawh ti dam khom hi ngaituo non a ngai. Thiemna tienga mi el phak tum hi ram le hnam dingchangna a nih.
HPC (D) hai ramsuok salu hung hawn lawmna so ri a re hmain vangduoithlak takin HPC (D) Army Chief le Churachandpur laia helpawl 6 inzomkhawm United Peoples’ Front (UPF)-a Chairman ni lai Lalropui Famhoite chu May 21 khan a chat thla thut leiin a hmunah Lalthansang Pulamte sie a nih. Mizoram tieng ralthuom intung a, sorkara inthoka zângna domna chen an intĕl tah hnung si chun, hmun dangah baw zui pei ding ieng hmathlir thar am neiin an inrelbawl pei ding ti hih kum 2018 hnukhawi tienga zawna poimaw le don harsa ngîr chu a nih. Huouhuou ringot lawm a, inhawr khawmna ding festival ieng ieng amanih huoihot ding mai khawm hi India hmarsak rama hnam tin deuthaw intlansiekna niin a’n lang a, chu chu khuongbai le ei inangna tak a nih. Amiruokchu, hnam dam khawsuokna ding le thil inaihal a nih.
Ei khawvel boruok
Kum 2018 ei hung phok tran lai khan naupang sie anga niukliar saihli-a intin zuk zuk USA President dangdai Donald Trump le North Korea sakeibaknei Kim Jong-un haiin iemani chen khawvel an sukthlabăra chuh sawt naw teah ruol anga insiemin, kum lailung lai khan chuh Singapore-ah inhmuin ruong an inhuot tuo a, fiemthu thaw dan an thiem khop el. Donald Trump-in ama sumdawng dan tektik hmanga USA le ram danghai inlaichinna a nuom ang anga hĕm kawi a tum leiin, ram hrang hrang le an inlaichinna nasa takin a sukderthawng a. China zak khom a khat tawkin a zel hlaka chuh a zel nêka inza lema zel thei an ni leiin law ngaina rak a hriet naw a, a vaupŭm suknatin kongro a suk meu bok nawh.
India khawzawlah, Prime Minister ni si, US President anga khawsak tum tlat, pa taima le theina mak tak nei Narendra Modi khomin awm a la dor puom nasa hle. Ama chotu lêngtrûl, Congress President-a hlang kai Rahul Gandhi hlak duoi bik lo, ni tin deuthaw thu thal ngeiin a kâp zing bok, hmu nuom an um. 2018 sunga State 8-a inthlangah BJP an che thra naw leiin, kum tawp tieng khan chuh Goliatha le tleirawl David inhmason khom an ang nuom sawt khop el.
Hindutvahai solfa vai dan ringota pawlitiks hla le sakhaw hla rem kop hang khikhawkzie khom Parliament-a Indian Citizenship Bill thar an put lut kaltu an tama inthokin chieng taka hmu thei a nih. Sakhaw tienga pawl tam lemin a tlawm lemhai dom dan thiem lo a, an kut hnuoia him tawka inngaina lungril nei lo a, an fak le dawn ding chen khuokhir tum a, bawng an ngaisak le invoi tluk khoma an ngai poimaw nawh ni-a hrietna chun ram pumah boruok thra lo a siem. Kuttin hlek khom hliem a um chun taksa pumin a tuor naw thei nawh. Chu chu kum 2019-a Parliamentary Elections-a hin hung inlang dinga ring a nih. BJP khuoi thlăra khuoizu far liek tuma ring kei fânhai khomin huop bik pawlisi hmang tumtu lakah an tla tlum sawt naw ding ti an hung hriet charin an hnar a kir el hlak a nih. Huop kim pawlisi hin kam a sukdĕn lem rop.
Hmar Holy Bible Jubilee
Kum 1968 October khan Dr. Thanglung inrawina hnuoia inlet Hmar tronga Baibul pumpui, Bible Society of India (BSI) sutpek chu a hung suok a. Kum 2018 hi kum sawmnga a tling champha a ni leiin, Souvenir chen buotsaia puithu taka Jubili Lawmna hmun iemani zatah nei a nih. Puithu bika lawmna Tuithraphaia chuh November 24-25 khan Rev. Chawnga Memorial Chapel, Sielmatah hmang a ni a; Muolhoi (Haflong) a ruok chu November 30-December 2, 2018 khan an hmang thung. Muolhoia thupuia an hmang chu CHANCHINṬHA ROHLU a ni a, Tuithraphaia an Souvenir-a ruok chu thupui iengkhom ziek a ni nawh. Chun, Muolhoi Souvenir insuo TUIHRING ti-a hin kha hmaa la tlangzar ngai lo, Dr. Thanglung lekhathon, typewriter-a sut kawpi (facsimile) a chuong a, ngaituona a suksei khop el. Hi lekha hi Sielmata inthoka January 20, 1959-a H.Thiek (Rev. Hrilrokhum Ṭhiek) le T. Sinate (Dr. Laltuoklien Sinate) hai kuoma Hmar tronga Holy Bible a’n let zo tah chu sut el thei loa a um san a hril fiena a nih. Muolhoi chun Souvenir el bakah lekhabu changtlung le innghatna tlak, Baibul hung suok dan le Hmar tronga inlet le sut version hrang hranghai chanchin, hnam ro tling, Dr. Hrilrokhum Ṭhiek buotsai, BIBLE CHANCHIN (Hmar Bible Golden Jubilee Edition), phek 147-a sa chu a bu hran topin an insuo bok a, lawm an um takzet. Hieng thil suia research la thaw peihai ta dinga malsawmna la hung ni pei a tih.
Thil fe le hung thlir le buk tonin, Hmar tronga Baibul inlet le sut thua hin thu inhnok le inthiel fai ngai a lo tam khop el. Ei hriet rawn po leh makti a zuol. BSI sut Baibul ei nei champha jubili chu lawm ding a ni laiin, kum sawmnga sunga siem phuisui sin ei ngaitha dan enin, inzaka thupha chawina ding ngot naw chuh hang lawmna san ding a vang hlein kei chun ka hriet. Kum 7 chuong hiel inlet thrat sin thaw dinga Bible Society of India-in mi a ringzo a thlawna nuoi tam senga a mi ruoipek le a kûl a tâia an sin inrimna sor trangkai neka an lo baihat tah chuh satel se anga vaninrum hma chuh inthla tum loa tuklul insuo le lungril ngar put ei um hlak a hoi. Hi hi Hmar Bible Translation Committee (HBTC) in harsatna benvon a pai rŭk le a konkawpui laia pakhat chu niin an hril.
Mihriem hin chemkalna zawng ei nei seng a, chu chu Pathien thilpek a nih. Olin Miller-in, “Writing is the hardest way of earning a living, with the possible exception of wrestling alligators” (Awle le inbuon ti loa fakzongna harsa tawp chu lekhazieka fak zong a nih) a ti dota sin harsa le sawlum chu thu le hla inlet sin hi a ni el thei a, Baibul inlet hi a ni nawkzuol ka ring. Thumal pakhat ringot khom a thlaa tiem ei buoipui chang le thu threnkhat ei buon hne lo dam ei hmasuon chang a um. Kaisana inthok anga a changa kawmiti inhawr khawma bawmrang thola thol phui el thei chi a ni nawh. A hminga theulawzi amanih kohrana namdetna dikri nei ringot leia buon chi a ni naw el bakah thu le hla inlet dan kalhmang (art of translation) hi thiem thil danglam daih, dikri le inzawlna nei lo, hieng tienga inhnikna nei le chemkalhai inhmangna chi a nih ti hih hriet tum ei tiu. Chun, invêt chilh le lut chila, ni tina ka sawl ka kham ti dawn loa inbuonpui a ngai. Tharum amanih, a sum inhrata nor thei a ni bok nawh. Turtu le mortu thlarau chang a ngai. Chuong chu ni si lo, iengkhom siem phuisui mumal um mang si loa a champha a tlung phaa lawm rikngot hin kawk a nei nawh. Pathien lawmzawng a ni khom ka ring nawh. Ei Baibul hi Pathien le mihriem mithmua inzapui um lo le lawm tlâkin siem ei tiu. Ei thu vuok thlak hi thrahnemngaina hlo (zen) tet muk a ni leiin a puom thra treltrol hle a, a lo theida pawl an um palh chun chuonghai ta ding taka ziek chu a ni bik.
SAK ZORAM INZIN
Kum 1990 Republic Day niin kum li lai India palai sin ka thawna Burma khawpui Rangoon chu ka suoksan a. Kum 1963-a sipai hotu General Ne Win-in tharum hmanga thuneina a laka inthoka kum 26 zet sipai thuneina hnuoia an inrŭm hnungin, 1988 khan ama thu bokin diktetor a nina chu a hlîp leiin, vantlang rorelna lak lut nuomin mipuiin lam an hraw mup mup a. Sienkhom, sipaiin 8.8.1988 a thuneina an hung lak khan a ram pumah trap le harawt ri le silai ri naw chuh ri dang an leng nawh. Zalenna suoltuhai trantu le thrangpuitua ngai kan ni leiin sipai sorkar mit sukkhamtu le an enthlak zing kan ni a, Zo hnathlakhai umna Chin Hills le Kabaw phai hrim hrima inzin chu an phal naw hulhuol a. Rangoon ka suoksan tukin unau mi hung inthlatuhai kuomah dimokrasi sorkar a ngir hma chun Kawlram ka sir nawk ta naw ding thu le zalenna an hmu pha Pathien thruoina zara u le nauhai ka la hung kan nawk ka beisei thuin ka’n thla liem tawl a.
Kum li neka tam liem tah khan dimokrasi sorkara ngai thei, zalenna suoltu Aung San Suu Kyi inrawina hnuoia indin a ni hnung khan damten zalenna kawl a hung eng a, inkhuokhirna hrui hlipin ram a hung zalen a, a ni telin hma an sawn duok duok a. India thrangpuinaa infepawna lampui a hung olsam hnung lem chun pansak-panthlang angin ei hung inhnai zuol a. August 8, 2018-a inthoka ramri kâna lut theina a hung inhong hnungin, kha hmaa Tahan Literary Circle mi fielna anga inzin prokram kan duong khah voi hni zet kan son hnungin November-a dingin kan sukfel a. Delhi-a Myanmar Embassy-a inthoka visa lain, a mi trawiawmtu David Buhril, Tv. Lalremlien Neitham le Rev. Edwin Darsanglur leh November 1, 2018 zing dar 6:30-ah Moreh/Tamu panin kan suok a, thimbutah kan tum ram Tahan chu kan tlung tah a nih.
Kum 30 zet beiseina khamhruia intûla ka nghak, ka penson hnung kum 16 le kum 80 ka hawl phak hnunga Pathienin ka tum a mi’n hlentirna kum a ni leiin ka ta dingin 2018 hi kum vangnei ti naw ruol a ni nawh. Zoram Khawvel-9 na a hring suok ngei ka beisei a, chu pha chun kan biekzinna chanchin chu Pathien zara la ngaithla tlang dingin beiseina hring leh thlir inla.
Lekhabu tlangzar
Sak Zorama biekzina kan fe hmain Tuithraphaiah sungkuo le ruol le paihai kanna ding ni nga vêl hun awl siem a, chu sung chun lekhabu pakhat bêk tlangzar ding buotsai thrain ka hriet a. Hun hrang hranga Baibul inlet malama thu le hla ka lo ziek tah hai le kum 1912 laia Rabindranath Tagore-in Nobel Prize a hmuna, hla 103 thlang khawm, Bengali tronga a ziek, ama ngeiin Saptronga a lo inlet, GITANJALI (Song Offerings) ti-a a ko, kum 1974-a Delhi tlanga Hmar tronga ka lo inlet chu khawvar hmu loa a thamral song el inpâmna le inlâuna lien tak ka nei leiin inthrangsatir a, TRANLATION ti hming hnuoia lekhabu pakhata khor pum chu thrain ka hriet a. Sun-zan zomin ka buoipui chŭk chûk a, Tv. Blessing Buhrilin editing le proof-reading ah a mi san bakah a bu kawm ding a dizain a, thiphuhâkin ka suok hmain kan zo thei hram a. October 27, 2018 Inrinni sunah Rural Women Upliftment Society (RWUS) Conference Hall-ah DAWNTLANG-8 hmangin kan tlangzar tah a nih. Hi lekhabu hi thu le hla inlet dan kalhmang thlŭrna a ni-a chu lekhabu dangdai tak el, Zoram khawvela la um ngai lo, khawvel danga khom um zen zen lo ding, ka kut tlawm tak fethleng a, Hmar trong leilaka hmang a, Hebrai, Grik, English, Bengali le Zo hnathlakhai tronga thu le hla mawi threnkhat, Iengkim Pathienin letdawivai (magic of translation) hmanga a’n lengkhawmtirna a nih. Hnama ei damkhawsuok ngai a ni chun, a hlutzie la hung hre pei an tih.
(January 31, 2019; Delhi)
###
No comments :
Post a Comment