Kum 30 sung hril tâka chun thumal pakhat chauh hmangin hril ding ni inla, ieng am ting ei ta? ti zawna chu ngaituonaah a hung lut a. Saptronga ‘generation’ am ‘decade’ ei hmang ding? Chu chu eini trongin iengtin am ei hril a? ‘Thrang khat’ amanih ‘suon khat’ ei ti hih ‘one generation’ am ‘one decade’? Ei hmang inpol nuoi khom a hoi khop el. Diksawnari hrang hrang ei en chun, mihriem ei pienga inthoka ei hung puitling hun, kum 30 sung hi thrang khat (one generation) a ngai a ni tlangpui. Kha hma kum za vel liem tah, ramsa le zaltlangbung ei la thaw lai ruok khan chuh kum 15 mi chuh puitling thawkkhat, râl tu thei, mani-a ram trang theia ngai an ni tah leiin ‘thrang khat lien’ an ti chuh kum 15 vel chauh a ni a, chutaka inthoka sut tungin ‘thrang hni lien’ chu kum 30 vel hrilna a ni thung. Thuthlung Hlui huna ruok khan chuh an dam sawt bakah nuhmei an nei inhnu a, lengtrul Jakob-in a u Esau kut tuor a tri leia a pu Laban kuom tieng a tlan khan kum 77 mi vel a ni ta a, a hnung kum 7-a nuhmei a nei khan kum 84 vel a ni tah. Chuleiin, a chanchin ka ziekna thusepah ‘Lêngtrûl tlansie’ ti ka hmang hrim a nih.
Saptronga ‘decade’ an ti ruok chu kum 10 bi hrilna a nih. Eini lai chu ‘thrang khat’ anga ngai le hmang pawl ei um. Kei khomin ka hmang chang a um. Chun, ‘suon’ ti khom hi ‘thrang’ ti le inangin ei hmanga chuh mihriem inthla sawng dan hrilna a ni leiin nau inzing le inkhât inkar le nuhmei-pasal nei inhma le inhnûkin thu a phur. Khûp thum hmu’ ti-a ei hrilhai upat dan khom kum tamin a danglam thei. Esau chun kum 40 a niin nuhmei a nei a, a phirpui Jakob ruok chun kum 84-ah a nei chauh. Isakin Esau le Jakob laka tu mong a benna dingin an inkarah kum 44 top, tulai tronga hril chun thrang khat le a chenve, a tla a nih.
Chuong chu a ni laiin, ‘generation gap’ ei ti hih iengtin am hril ei ta? Hi thila kâr (gap) siemtu chu hun le kum ni tah loin hrietna le thiemna a ni tak leiin, generation gap chu ei mawl dan le mawl naw dan inkâr hlatzie hrilna trongkam a nih. Chuong tienga hma ei sawn le sawn naw, ei inthrang lien le lien naw inkar hrilna a ni leiin, kei chun lekha ka ziek tam takah ‘thrang-dan’ ti ka hmang hlak. Ka nauhai le an nu thrangdan inkar hi mêl tama hla a nina a sawt ta a, an nu an titipui pha leh ama khawvela an hung trum thlak a ngai. Kei ruok chu ka nauhai le kan inkar hlat ding vengna lei le ka chengna khawvel le inbe phaka um zing a trul tlat leiin pei le pei loin ka hnot trăng trâng a. Chuong sa khom chun teknikal thil an hril tam tak hi ka man phak ta nawh. An inhmang ve nawna tieng, thu le hla inlet, abikin Bible inlet tienga ruok chu an bo ve map. Eini rawi, Pathien thu ngaisak le Baibul tiem rawna inhrilhai khawvela khom hin, Bible inlet thu fîp taka hang hrilpui ding, a mik a mak hrie, ei vang. Ei mawlna tieng chu tu khom hi ei mawlcho seng a, ei khawtlang hi thol phui ngaina um lo khopa awngkar hrang hranga sip a nih. Chu chu thol phui tumin ieng anga thrahnem ngaiin inhawmthaw inla khom a kâr awng, phuokfawm hnâng rop le puontrieka ei lo hnaw phui tum mei mei a tam taluo leiin, inhawmthaw ringotin kawk a nei tlawm.
Ka nauhai pahni hi eini rawi tiem dana thrang hni neka tam hiel an pieng le murna Tuithraphai sir ta lo an ni leiin, thil dang poimaw an bawzui hmaa chawlkâr khat bek sung le kuo kana inzinpui chu thaw makmaw-ah ka ngai leiin February 21-March 4 sung khan kan chuong kai a. A mal senga a hrana sungkuo le ruol thrahai kan chu thil harsa nia ka hriet leiin, kan tlunga inthoka ni khat hnungah kan innghatna Vocational Training Centre, Rengkai le kan inpui Saidanah kan nauhai hmingin aruolin ruoi kan buotsai a. Ngai poimaw le hung hman poin an mi hung uop a, thu le hla bakah ruoi mi kilpuiin, bawngchal tuoi, voksa kg 10 le nga kg 10 tlak fai pap khopin Lalpa thratna kan dong a, kan tlai takzet a nih.
A hmaa prokram kan duong lawkhai chu hlen ngei nuom inlang khom, ni nga sung zet khawmuol intrum naw leiin kan nuom angin kan chechang thei naw a, ningintel a um hle. Kan tum dan chun ka naunu piengna Saidan khuo le a sunga cheng u le nauhai khawsak dan le kan nau tlum tak piengna Churachandpur Civil Hospital le a bul ela kan nu umna kuartar hlui la ngir zing chu documentation thaw a, thla la a, editing thaw pha leh tuta an chengna London le New York leh a thrienga sie kop a, documentary siem a ni a. Mit thara an thlir a ni leiin a hmuna chenghaiin ienga ei ngai ta lo le en khom ei en ta lo tam tak chun an mit a lak a, an hmu nuom a, thla lak nuom an hau leiin a ruola intlonpui thei khom an ni nawh.
Raw sur hnuoia kotthler indiek le porche kara New Bazar vela hang invâk chuh thil namei a ni nawh. Khuo a hung thra met hlak chun diek po po khah pilvutin a hung inchang a, a chuongliem nawh. Chu thlalaka inthoka chieng êm ĕma thil inlang chu: ei tulai khawvel hi nuhmei kuta somdawl le an thaw suoka innghat a ni tăkzie thu a nih. Nuhai Salaam, ngaisang le inza in phur takzet!
Thlalak dang chu khawtlang roreltuhai thil hmu tawizie le hmathlir sei tak neia bazaar hmun le hma ding an lo rel naw thu a nih. Chongkor mit put pahai, ei hmathlir suksei ei tiu khai! Motor siena hmun remchang um nawna bazaar intep chu ama le ama a’n up hlum pei hlak a nih. Jenhang Bazar hi entirna hnai tak a ni el thei. A tung zawnga inthrang (vertical growth) dingin remruotna mumal a um naw a; a khang zawnga inthrang (horizontal growth) pei ding hlakin hmun le hma ei nei dai si nawh. Invet biling thaw a, ngaituona bui mei tawi puthaiin leilet an suosam hi inhnar a, an thaw dan ei zui ve pei chun boruoka bu le thlai ching dan ei zong suok ngai a ta, tupa/tunu ringna le trongtrai inhrata nor suok chi ni kher naw nih. Hausak thut nuomna leia thil khap tinreng thaw ei insukhmu dam hi ei ngirhmun tong mekin a hring suok a nih. Marijuana (ganja) le poppy (kàni) buk zing dum dur hnuoia hnienghnar taka inbengbel tum tu khomin thaw thra hlea an inngai hun um sien khom a tawpa an chan chu,
Misuol tawrot ka hmu a,
Tuoltro thing ang a’n buk hlŭp;
Ka sir nawk, a um ta nawh,
Ka zong vel, ka hmu ta nawh (Sam 37:35-36)
ti hih a ni ngei ngei. Hnam le sakhuo bulthrut remtu dinga Pathienin hmangruoa a hmang Mosie sartifiket dong (Hebrai 11:23-29) ruok kha chuh chatuon dai a nih. Khang khopa sun-zan zoma sinthawa buoi siin an thil tuokhai chanchin hrilna, lekhabu hlun panga zet a ziek hman el khah, a va hang inhawmthaw thei awm de aw!
Kha hma, abikin ka penson chen khan, khuolzinnaa thil ka hmu le hriethai chu camera, video le notebook hmangin ka rikawt a, chuonghai chu ka laptop-ah tuk tin le zan tin ka hlu lut tum hrăm hrâm hlak a. Chuonga ka thaw sa khom chun lekhabua hlu lut dinga rikawt dang ka neihai leh rem khawm ka hang tum meu chun thol bit ngaina hmun hi a lo tam nuom khop el a. Lekhabu amanih thil chinchang hrie hang rawn ding an um naw lem chun inthak si loin lu ei huot ei huot el a nih. Hi ngirhmuna hin thlemna trium tuok a, ringvang thu le phuokfawm hmangruo hmanga thol bit nuomna a lien. Hi hi suol turu, inhlemna naran mei mei khom ni lo, chem loa hnam lu lakna, Saptronga ‘intellectual corruption’ an ti chuh a nih. Ei trobul le Sinlung thukhawchang le kohran chanchinah iemani zat a luong lut a, ei lo ring le pawl nĕl tah sa khêl tlip mawina dingin khêl dang tam tak phuok belsa tieng inhawmthaw a ngai a, a poi khop el. Hi livira lut tah laklaw chun intâl suok el thei a ni ta nawh. A maw hlak chuh a hnam pum chungah a tla naw thei bok si nawh!
Hieng thila inhawmthaw hi ei thupui hmang letling a nih. ‘Hawmthaw’ amanih ‘Inhawmthaw’ ti trongkam hin umzie thra (positive meaning) le umzie thra lo (negative meaning) a nei a. Mani ta ding chauha thiphuhaka thrahnemngaina hi inhawmthawna chi khat ni sien khom duamna rong a kai leiin Lusei tronga ‘mahni tana chakai khawrh’ ti tieng a kawk hman hman. Lusei trong chun ‘duhthawh’ an tih. Duamna chuongliem (excessive want/desire) leia indai naw sâ sàa thaw trawk trawk tieng a kawk deuh a hoi. “Anni nupa hi sinah an inhawmthaw taluo a, pan dukdak thei khom an ni nawh” ei ti chun thrahnem an ngaizie le taimakzie ei hril lai zingin an duamzie hrilin ei dem a nih. Thil thra ditna leia inhawmthaw ruok chuh thrahnemngai taka theina po po hmanga inhuot trawk trawk tieng a kawk. Inhawmthawna thra le thra lo inkhina ramri thretu chu thrahnemngaina le duamna chuongliem rong a kai chin le chin loah niin a’n lang. Rongbawlna konga inhawmthawna le mani kohran pawl bing ta dinga inhawmthawna dam hi thil thuhmun hoi si, ni chie si lo a nih. Senvon tlanga February 5, 1910 hmelhmang khom sukporche le thlak tuma thrahnemngai le inhawmthaw khom ei bo nawh.
Mani tlatna le inhnikna muol sengah ei buoi a, ei kraws put seng hi mi kraws neka rik lem le ei ringkol nekin mi ringkol khom hadam bik dingin ei ngai tawng. Invoi ei nei deu seng a, a nei naw khomin invoi ding ei zong. Ei thil invoi chit poimaw bikah ei ngai. Invoi hlawk lo le trangkai lo invoi trawk trawk, ei invoi leia a hlawk duokna ding um si lo, sienkhom phurrika nei tlat ei tam. Naupang te ka ni laia inthoka ka thil invoi laia pakhat chu pi le pu thu le hla khon khawm le inchik a nih. Chu chu tu chen khoma ka la thaw ngat ngat a nih. Delhi-a ka laibrari-a hin lekhabu poimaw crore tam man ka kolhai bakah thu le hla ziek ka siena file hrang hrang, dorzon tam ka neihai hi library standata rem le computer-a hlu lut ding chun chawl loa kumpui linglet iemani zat buoipui ngai chi a nih. A thaw dan ding chu a nih tuta trum ka nauhai hung suoka kan buoipui tak hai laia pakhat chuh.
Tu khom hlun sung ei um naw leiin a hun a tlung pha chuh minit khat khom cham theina pek ei ni nawh. Mi tinin hnuoia ei cham sungin tonhriet ei nei seng a, chuonghai chu thrang la hung thar pei dinghai hriet dinga maksan hi tha bat tlak ding ei nei seng chu a nih. Chuong ei tonhriethai intling khawm pei chunga chun nun thar insersuon, sivilaizeson thar a hung pieng pei a, hma ei sawn ang peiin Pathien ropuizie khom ei hung hriet fie deu deu pei a nih. Kum sawmli sawmnga liem taa thu le hla ka lo ziek tam tak ka hang tiem nawkin siem thrat ding le thlak nuom ka hau a. Thu thar ziek ta loin siem phuisui sin ringotah inhmang ngar ngar ding ni lang, kum sawmthum sung khomin ka zo teuh naw ding ti ka hriet. Delhi Version ringot khom thaw dingin a tlawm takah kum nga bêk a ngai ding ti ka hriet. Lekhabu dang sawmthum chuong ka ziek le sut tah, sut non ngai vong tahai ringot khom hi buoipui ding chun kum iemani zat a ngai. Thusep le artikul hrang hrang ka ziek tah po ringot khom hi lekhabu 50 vel donga khor pum ding a um tah bok. Chuonghai chu iemani zat bek thrang la hung thar peiin an sor trangkai thei dinga hre fel hman loa ka maksan chun Zoram khawvela mimal library lien pawl tak ei inhmang ding a ni si leiin, inhawmthaw naw ziezang ka ni nawh.
Khing tieng pangah, thil thra thaw seng lo hmu le nei leia inhawmthaw zinga um thei hi malsawmna hlu tak a lo nih. Mani inhnikna le nuom zawng thaw tluka lungawina, ningtel damdawi thra a um nawh. Chu hadamna tlaitlana chuong phak, Amazing Grace ti hla phuoktu John Newton (1725-1807) chun hieng hin a lo ti hrim a nih:
Lalpan thil thra a mi tiem a,
A thu ka beiseina;
Ama ka phaw le rochan hlu,
Hnuoia ka dam sungin.
(March 22, 2019; Delhi)
###
No comments :
Post a Comment